البغو... دراسة ما بعد بنوية في سيكلوجية منبر اسفيري !!

06:52 PM August, 16 2016

سودانيز اون لاين
محمد حيدر المشرف-دولة قطر
مكتبتى
رابط مختصر

بغو اولي

لعثمان عووضه ..
ومعاوية الزبير ..
وآخرون ..
حمد لبد
والجميعابي
وحلالدونا
وعلى محمد الفكي
وابوروضه ..
وحامد بدري المعروف ب ( ح ب)
وعمر التاج
وعادل ابا الحسين ..

بغو عاطفي
قيل ثم من ؟
قيل منى عشميق ..
قيل ومن هي منى عشميق ..
قال الله وبريمة أعلم ..

تنبيه
ليس لهذا البوست ادنى علاقة بموضوع تم حذفه خلال ال 24 ساعة الماضية في الفترة من 15 اغسطس وحتى مساء 16 اغسطس حسب التقيت المحلي لمدينة المنبر وضواحيها..

توطئة
من نافلة القول أن تجربة منبر سودانيزاونلاين تجربة رائدة .. لم يكن المنبر منبرا جهويا أو قبليا أو جغرافيا كما هو الحال مع الغالبية من المنابر من شاكلة (منبر ابناء موكندو) .. وهي الى جانب ريادتها تتمتع بدينامية متجددة تستوعب اعداد مقدرة من الاعضاء والقراء بجانب مشاركات الفيسبوك .. وعلى الرغم من بعض الاسفاف ومظاهر عنصرية بغيضة تطل بوجهها القبيح من خلال سطور المنبر الصفراء هنا وهناك, الا أن هناك حوارات حقيقية تدور في ارجاء هذا المنبر.. ثمة قيمة خبرية وتحليلية عالية.. ثمة تواصل اجتماعي ممتاز يمتد كحبل سري رحيم يلف اعدادا مقدرة من البورداب ويشدهم بعضهم لبعض كما الجسد الواحد اذا اشتكى منه عضو تداعي له كامل الجسد بالسهر والحمى ..

دراسية ما بعد
ليس اسوأ من محاولة احتقار الناس بصورة عامة .. الا ان تطال المحاولة بعضا من الاخيار المشهود لهم بنوازع الخير والانسنة الرفيعة, فتلك شتارة لا يرتكبها الا أحمق عريق في حماقته التي أعيت مداواتها علوم وثقافة وتكنلوجيا الحضارة الاطلسية جمعاء. .

بنيوية
يموت الكاتب ويبقى المكتوب .. وتماما كما تموت الملهمات ويبقى الشعر

سيكلوجيا
ان شاء الله أجن .. وأزيد في الجن .. وانتو جنوني يا حلوين .. ف ,, معليش ياخ !!

منبر اسفيري
موكندواونلاين .. تحت ادارة الكولونيل اورليانو بوينديا ..

لو تضمنت بنيويتك هذه السؤال التالي
كيف ومتي لماذا ولمن نكتب؟
لكان اجمل بغو

د. المشرف يا حبي
والله البغو عمل ليك سافوتة عديل
يعني شرحي داك كلو راح شمار في بغو
صحصح معانا ياخ😜😜

البغو هو السورج
والبغو هو الحسوة hisoha

البغو هو المريسة العندها رغوة
وهي تقطع العطش وتسند الجوع صباحا
شكرا يا صاحب على الهدية
بس حاسب هناك تقلبات نحوية بين الواو والألف والياء
وهناك من يتربص بالبغو ليجعل منها زغاريدا لمسالك سيئة

والله يا دكتور منبرنا دا بقى زي
فيروس الايدز
ما تقدر تخليهو ولو قربت منو ياهو
المسقط حجرك
شيء حقن وشيئ سفوفة وشيئ حجر
صحي 😈😈

ان شاء الله تجن وتحب اب سن
بي جازك😜😜😜

حكي طاعم يا ود المشرف

لكن ماظنيتك بتعرف البغو ، ولايوم البغو العالمي الذي اندثر مع حكم ابتكو

ههههه
حمد ختاها مفندرة
ختها عديل يا حمد ياخ

د محمد حيدر المشرف
لك التحية
شكراً لكتاباتك الانيقة ولغتك الرفيعة المنتقاة حروفها بعناية
واحنا ما بنعرف ليها لكن بنسوي عرفتنا
او كما قال ود حبوبة للسيد عبد الرحمن
فلاحتك دي ما بعرف ليها
في ناس عاشوا الذل والهوان والاستحقار واترسخ في نفوسه احساس الدونية
واتملت نفوسهم بالعقد والاحقاد والكراهية
والنوع دا من البشر لا يبالي في ممارسة الاذلال للاخر متى ما لقى فرصه
فهو اصلاً بقجة عقد من الاحقاد والغبائن فبحاول يفك عقدو ويفش احساس الغبن الجواهو
والنت والاسافير اتاحت الفرصه لهؤلاء وسودانيز اون لاين ليس استثناء
فظهرت النوعية دي فيهو ظانين انهم ح يفكوا عقدهم من خلف الكيبورد دون رادع
وصورت ليهم نفسيتهم المريضة انو الشتم والتطاول برفع من خسيستهم
وديل ما عندنا ليهم الا الجبة المتروزة والحربة المركوزة او كما قال ود النجومي
وبنقول ليهم
الحالانا نسوقو بي سماحة وروقه
والكـــازا نا حفرنا ليهو للمخرووقه
او كما قال حمدان في الناظر حاج محمد ابراهيم فرح
والما بجي الا بالعصا ما عندنا ليهو غيره
لانو النوع دا كل ما تتجاوز وتترفع عنو يتمادى ولا يفهم الحلم ولا التسامي
لانو اصلاً ما بعرفن ولا عاشن فهو عاش على الضرب والدونية
فما بقدر يرتفع
فكل ما تحاول ترفعو وتطلعوا من حفرتو الى مصاف البشر السويه يخلد الى الارض
وجلسات الكهرباء في حد ذاته علاج

Quote: بس حاسب هناك تقلبات نحوية بين الواو والألف والياء وهناك من يتربص بالبغو ليجعل منها زغاريدا لمسالك سيئة

فعلا التقلبات في حروف الواو مع زياداتها كتصريف هنا لاتجوز

اما الذين قد زغردوا فتبا لهم ان ارجعونا الي عصور الظلام

هسي كان ضربوا بغوهم كما ضربه اصحاب الانداية في الستينات والسبعينات

كنا قد حصلنا علي اجيال جديدة من المبدعين غير التي استهلكوها في كل النواصي

حتي صاح مغني عقد الجلاد :

الصور نفس البيوت وقصة الولد اليتيم ونفس صوت الاسطوانة تتا تترا ترتت تتا تتررا

المدهش ان من بين اصحاب البغوا اؤلئك من تخلع سيرتهم اذا ذكروا في هذا البوست

وللمزيد يرجي زيارة بوست (سكران في الزمن الجميل) لاحد بورداب الراكوبة

يا ود المشرف احنا شعوب عجم..
يعنى بنقرا العربى بى تلتله..
تقوم تكتب بالنحوى؟
شغلك دا فوقه اضطهاد لحقوق العجم..

Quote: والله يا دكتور منبرنا دا بقى زي فيروس الايدز ما تقدر تخليهو ولو قربت منو ياهو المسقط حجرك شيء حقن وشيئ سفوفة وشيئ حجر صحي

عليكم بالصوم ففيه وِجاء

سلام يا مشرف،
ردة فعل الزعل تكاد تكون واحدة لدينا جميعا،
على سبيل المثال، أخونا المشرف الذي ينظر من البلكونة الآن، لم يتردد بأن يصفني بالمع-رص حينما سخرت من فكرته في أحد البوستات سخرية قانونية.
فشنو؟ النظر من البلكونة ما جيد، الحماقة ياها الحماقة، كانت أطلسية أم خليجية!

.

Quote: ليس اسوأ من محاولة احتقار الناس بصورة عامة .. الا ان تطال المحاولة بعضا من الاخيار المشهود لهم بنوازع الخير والانسنة الرفيعة, فتلك شتارة لا يرتكبها الا أحمق عريق في حماقته التي أعيت مداواتها علوم وثقافة وتكنلوجيا الحضارة الاطلسية جمعاء. .

يا محمد الفكي،
كلامك الفوق ما صحيح؟!
حتى لو اختلف الآخر معاك بهدوء، أيضا قد يلقى منك هجوم شخصي شرس يصل درجة التدخل في المعتقد وسفهه.
في بوست الغالي تلقيت منك هجوم شخصي يحط مني اخلاقيا كوني ملحد حسب زعمك.
داير أقول، ما فعله بريمه من تحقير غير مقبول تمارسه انت والمشرف حين الغضب
التسامح وأدب الحوار الذي تدعونه سوف يسقط في أول منعطف للخلاف

صوم في عينك
هسي دا وكتو😜😜

الاخ ابوبكر ..
نعم ..
وصفت موقفك او تحديدا فعلك الكتابي بالتـــعـــرصـــة وسوء الطوية .. وهو توصيف صحيح تماما آنذاك .. ولم يتغير شيء الآن

جوهر حديثنا هو محاولة احتقار الناس لو كنت تعقل او تفهم يا رجل .. وانت لا تتواني او تتردد لحظة في وصف زملاءك بالرجرجرة والدهماء وتتمادي في السخرية منهم.. عموما اتوجه اليك بصورة صادقة جدا اللا تتداخل معي .. ليس ذلك امرا ولكنه مجرد رجاء.

* التوصيف لم يكن متعلقا بسخرية ممتدة وسخيفة كانت ممارسة .. وانما حول محاولتك البائسة والجبانة في اجتزاء ردودي نحو الاخ العزيز عادل أمين. وانت تعلم ذلك جيدا ولكنك مازلت تمارس التدليس .. قال سخرية قانونية قال !!

تستطيع منعي من التداخل معك فقط بحذف مداخلاتي

أبكر والمشرف
تكونوا ضاربين بغو امبارح وباتت معاكم
عادي، عليكم بأم فتفت
واحد بيطري والتاني صيدلي، الحبه ما بتجيكم

مشاركة من الفيسبوك

Quote: حزنك ياوطنى احزنى محمد المشرف انت وللامانه من الكتاب المميزين فى المنبر ده وكتاباتك جميعها تحمل فكره ومضمون وان كنت اعيب عليك احيانا انحيازك للبعض حتى عندما يخطى واظن السبب يرجع الى قوة الجذب والتلاصق الناتجه من التاثيرات الاجتماعيه الذكرتها فوق دى لبعض الاشخاص ولكن عموما افكارك مرتبه وتفيد القارى كثيرا. اختلف معاك فقط فى محاولتك لتبعيض اسفاف المنتدى وظهور التوجه العنصرى فيه لانو الحقيقه هى ان كتابات الاسفاف والعنصريه البغيضه تكاد تكون الاعم والغالبه خصوصا فى الفترة الاخيره وده ما لاتتناطح عليه عنزتان. مستوى الاسفاف الحاصل فى المنتدى ده تقريبا لايوجد فى اى من المنتديات الكبيره وتقريبا اشبه بمستوى اللغه الشوارعيه مع احترامى للجميع والالفاظ القريناها هنا تقريبا حتى فى الشوارع قل استخدامها لشدة اسفافها. النقطه الاهم عموما ليست فى الاسفاف الحاصل لانو ده فى النهاية بينسب للشخصيات صاحبة الاسفاف نفسها ومدى تربيتها لنفسها ولمن تعول لانو معظمهم طاعنين فى السن لكن الاسوا هو التكتلات الخفيه والظاهره ضد بعد الكتاب المرموقين سواء كانت تكتلات بسبب انتماء سياسى او مجرد تكتلات شلليه ودى الحتنسف المنبر لانو للاسف اصبحت الغالب وماتجد موضوع فكرى نقاشى والا يبدا فى الانحراف فى اتجاهات لاعلاقة لها باصل الموضوع بسبب ان الكاتب هو زيد او عبيد ومااظن دى محتاجه امثله وعلى قفا من يشيل...يتبع

بغو صباحي رائق

الاعزاء ..
تحية طيبة واحد واحد ..
البوست بوستكم يا صحاب ..

في شرح البغو .. اسهب استاذنا عووضه في التعريف بهذا المنتج العبقري .. الا انو حمد لبد قد جاءنا بالنجيضه

Quote: البغو هو المريسة العندها رغوة وهي تقطع العطش وتسند الجوع صباحا

يبقى يا دكتور محمد حسن الاجابة عندى ان الكتابة في هذا المنبر تقطع العطش وتسند الجوع .. والعطش احساس ماحق جدا يا عزيزي .. فهو من دون احاسيس الله يولد صغيرا ثم يكبر .. يموت التوق وينمحي الالم وتزوي الاشواق وينمو العطش .. ويكون الارتواء محطات محطات .. مداخلة مع معاوية الزبير .. ظوووط من ودالبشرى .. شغب منبري من جلالدونا .. كتابة طاعمة من مولانا محمد المرتضى حامد ..غنية من يحى .. عااااجل من ودالصايم .. اكتشاف غواصة جديدة من صلاح جادات .. تحليل سياسي من مولانا الملك .. حوار بين الخواض ومصطفي بتاع ياااا مصطفى .. خط منبري واضح أن لا ديمقراطية من دون علمانية وهكذا !!

نكتب في كل شيء وعن كل شيء قد يحيط بذلك الوطن عطشا ..

* الاخ ابوبكر .. لن احذف شيئا فاكتب ما تريد.

مالينا في الحاجات دي .....
سنترك المجال لأهل المعرفة و الخبرة ....
حا نشارك بالمتابعة .....
سلام للجميع

و دى النجيضة يا مشّرف

Quote: الاخ ابوبكر .. لن احذف شيئا فاكتب ما تريد.

و حيّااك الله و بيّاك ياااخ
و معاها اكيد احترامى و تقديرى
___
امّا بالنسبة للبغو و ناس البغو
بااااااحلاتو لامن يكون مبقبق
و كمان بالمرّة اهديكم
غنوة يا سقاة البغو من عهد الرشيد
و ما بين الرشيد و سيدى عمر بن عبد العزيز بضع سنين
غايتو البغو مع شنب ود عووضة ما بنفع
شوف ليك ناست و بالعدم يا ساسوية يا قحف

حزنك يا وطني احزاني

عمت بغوا صباحيا جميل في اطار الحزن العام يا عزيزي ..

هي, للدقة, كتابة ضد التكتل ... الشاهد في الامر اننا لا مكن ان نكتب شيئا ضد التكتل الا وكنا متكتلين حول مسألة ما .. اذن فلتكن مسالة صحيحة ..

هذه المجموعة لا يجمعها انتماء سياسي واحد .. ولكن وبطبيعة الحال لم ينتقيها الاخ بريمة الا من واقع تكتل جهوي.. فهل اذا ما كتبنا حولذاك نكون متكتلين بالضرورة ؟!

المعيار هنا هو صحة المواقف ..
والموقف الصحيح ياعتقادي الشخصي هو محاولة درء الاعتداء والتعدي الصارخ الذي تعرض له هؤلاء .. احسست بمرارة كبيرة قفزت لحلق معاوية الزبير على سبيل المثال .. واختار معاوية كمثال لمعرفتي الشخصية جدا بهذا الزول الجميل جدا .. احسست بتلك المرارة .. فاحسست بوجوب الكتابة .. وهكذا !!

كن بخير

تاني نقول
سيد البوست ما شافنا لا ذكرنا مع الطنبارة ولا مع البفرتقو الحفلات
البغو هي المريسة .. مطلق مريسة
الحسوة والسورج برضو مريسة
في مريسة عيش دقة جليط
وفي مريسة بلح
مريسة العيش بسموها قشو .. لانها تعلق بالشنب
والمريسة ما بتسكر لكن لو لحقت سكرتك سكرتها ما بتفك بي اخوي واخوك الا تطبقها بيها
البغو
برضو تقال للرجرجة والدهماء والاوباش
يقول ليك
دة زول بغو ساي

(زووط من ود البشرى) هههههه
يعني يا ود المشرف ما لقيتلي شي اقابل بيه ربّنا غير الزووط دي :)
وأنا على بعد خطوات من الاحتفال بمرور عقد على انضمامي للبورد و قريب الثلاثين الف مشاركة فيهن ما فيهن و العديد من المقاتل العظيمة التي شهدها البورد و الأحداث و التوثيق و المواقف و الزرزرات و اعرف الحق ... إلخ إلخ
ما لقيتلي بلا القشرووور دي تذكرني بيها!!
يبدو انه الواحد محتاج يراجع خطه في البورد و يشتغل خط الثورة بالنص أو الوادي

هذه رسالة ابوبكر عباس هنا ..

Quote: فعله بريمه من تحقير غير مقبول تمارسه انت والمشرف حين الغضب التسامح وأدب الحوار الذي تدعونه سوف يسقط في أول منعطف للخلاف

الاخ لا يعي الاشياء بصورة واضحة .. يعيها مشوشة ولا يستطيع تبيان الخيوط الرفيعة بين المعاني .. وهو الى جانب لزوجته السخيفة مدلس بامتياز ..

أدب الحوار يقتضي الاحترام اولا ..
والصدق ثانيا ..
والوعي اللازم بالاختلاف ثالثا ..
وجملة مطلوبات أخرى لا تمتلكها

احتقاب سوء الطوية والتنقل بين البوستات لا يعني اكثر من اثبات ما قلناه سابقا .. انك زول سيء الطوية ومدعي وكذاب ..

ولمن نقول هذا التوصيف فاننا نعنيه تماما ونعي حقيقة كونه توصيفا صحيحا ونملك حجج ذلك وبراهينه .. ولكن لمن نوجه الحديث ؟!

لك ؟!!
انت زول غير جدير بالاحترام ..

للناس هنا ؟!!
من لا يرى فيهم هذه الاشياء الواضحة فهو أعمى .. ربما لا يعلمون أنك أول سولت له نفسه الاشارة في هذا المنبر لمجموعة من الصور الخاصة بي في صفحتي في الفيسبوك ومحاولة دمغي بها في سياق سياسي-فكري .. وتجاوزنا ذلك وادخلناه في باب الهفوة عندما اعتذرت عنه على رؤوس الاشهاد .. ربما لا يعلمون ذلك لضعف في الذاكرة او لعدم مرورهم على تلك الواقعة.. ولكنهم بالتأكيد يتذكرون تدليسك المستمر في مسالة السوريين .. مدخلك الذي اردته ساخرا في بداية الامر ثم التحولات الكثيرة نحو مداراة سوء الطوية البائنة بينونة كبرى في ذلك البوست. ثم احتقاب كل ذلك نحو هذا البوست .. وبالتدليس كذلك كما العادة .. الم اوضح لك في التو الفرق الواضح بين ما كتبته هنا والحقيقة ؟!

الم تكتب هنا ما مفاده انو انا وصفتك بالـمـعـرص نتيجة لاختلافي مع تناولك القانوني الساخر ؟!
الم اكتب لك هنا انني لم اصفك بالـمـعـرص وانما وصفت ما كتبته بـالتـعـرصـه ولم يكن ذلك جراء موقف او تناول قانوني ساخر وانما لمحاوولة اجتزاء ردودي نحو الاخ العزيز عادل امين ومحاولة دق الدلوكه ان محمد المشرف وصف عادل امين بالحيوان.. ولم اصف عادل امين الا بالاجترار كما الحيوانات المجترة.. وتمتد الحوارات بيني وعادل للوراء كثيرا وبيننا هذه التجاذبات ونصيبو فيها اكبر من نصيبي ولكنها شهوة الدلاليك وفقه الردحي انك مسكت على محمد المشرف خطأ قد يكفي لتأليب الناس ضده.

لن اشرح الفروقات الدقيقة بين ما كتبته انت والحقيقة ولكن خليني اريحك شوية من عبء الضغينة والاحقاد التي تثقل صرك

انت تريد ان تقول للناس انو محمد حيدر المشرف ده زول مدعي ساي ومليان بالتناقضات ... انت تريد قول ذلك من زمن بعيد .. منذ مسالة الصور الخاصة باجازة اسرية نشرتها في صفحتي في الفيسبوك وحتى هذه اللحظة ..

ثم انت تريد أن يأتي ذلك بصورة تزيل عنك حرج التناول الشخصي وتكتسي صفة باردة جدا كالحقيقة والاستنارة الخ ..

حسنا لك كل ذلك ..
انا زول ساي ومتناقض تماما .. يمحو النهار كلام ليلي زي الما حاصلة حاجه .. ..
وماذا بعد ؟!!!

نهاية العالم ليست خلف النافذه ولم نأت سودانيزاونلاين لابتناء أمجاد زائفة ... جئناها لنضيف ويُضاف الينا من خلال التناضح الفكري والانساني.

هههههه ..

Quote: سيد البوست ما شافنا لا ذكرنا مع الطنبارة ولا مع البفرتقو الحفلات

يا حفيظ سيد البوست ما لقى فرصة ذاتو يقول بغو !!

المريسة كمعنى اجمل من معنى الرجرجة والدهماء يا صديقي ..

غايتو انا بتكلم حسب تراث المنطقة القاعد فيها
المريسة لي اليوم شغالة فيها . ويندر ان لا اشاهد واحد شارب مريسة
اها حسب دة
المريسة مذمومة هنا .. لانها شراب العطالة . فليس اسوأ من وصف احدهم انه
مراسي ساكت
يعني زول لا يرجى منه
إلحاقا بالمثل
ارجا سفيه ما ترجي عاطل
شراب المريسة بالنهار وقت العمل .. وبتاكل الوقت
ووصف الزول دة بغو ساكت
سمعتها بشحمة اذني

يا مشرّف
اسألك بالذى يملك امر روحى و روحك
ان تسوق البوست ده لى حتّة تانية
خلينا فى البغو ياخى
من عميق جراحتنا نحاول ان نرسم البسمة على وجوهنا البائسة
و دى قمّة التسامى
ياخى فى اكتر من ان تصف زول يحبو الى الخمسين بى قلة الادب
... يحبو دى احفظوها لى ...
يمين الله يا المشّرف فتحت البوست ده اكتر من خمسين مرّة
و ضمّة ابيت اشارك فيهو
و فى بالى يا الله ... الزول ده .. ما يجى , و النية فى ستر الحال
و ربنا يهّدى البال .... واقف على حيلو ...

لم اعني يا حفيظ ان شراب المريسة معنى جميل ..
في الواقع لا اعلم كيف انتهى بنا الحديث حولذاك ..

لو كان هناك من وصف الاخ بريمة بانو بغو .. فذلك رد فعل متجاوز بالتاكيد .. انا لم يصلني هذا المعني بالتحديد والله ..

اشارة لازمة
تلزم ود المشرف ثم لكل من يتبادر له ففهم ودالمشرف
بوست بريمة قريتو اول مرة ثم لم ادخله ثانية
دي واحدة
مشاركاتي هنا لا علاقة لها بالبوست السابق ومٱلاته
انا غرضي مع البغو بس
وتداخلت لاصرف نظر العزيز ود المشرف ليلزم بوسته ولا يفخخه

سلام للجميع
و رجاء للإخوة المشرف و أبى بكر

كسرة و لكنها فى البداية:

أنا اخوكما اســامة ، ليس من نافلة القول أن أقول لكما أنى أخطو حثيثا نحو الستين ، اكسبتنى ما أكسبتنى من جميل العادات و ذميمها

بدأت حياتى المهنية فى العام 1984 بشــركة أمريكية تعمل فى المملكة العربية السعودية،كنت قبلها قد عملت سنة بالسودان، جمعتنى علاقة العمل بإخوة (ما زلت احتفظ بصداقات مع كثير منهم) من أجناس شتى.
كان همنا آنذاك أن نثبت أنفسنا سيما و نحن ما زلنا فى فورة الشباب و أوجه.
كنا نظن أنه لنثبت أننا اناس متميزون ، لآ بد أن نثبت أولا أن غيرنا ( و غيرنا هذه كانت تشمل الغرباء و بعضا من بنى جلدتنا) ، قلت لا بد أن نثبت أن غيرنا غير متميزين.
بعد كل هذه السنوات تأكدت(بما يصل حد القناعة) أنه يمكن أن أكون متميزا و غيرى كذلك متميزا و لا أجد فى ذلك أدنى حرج.
و لعل أخى الأصغر(الأصغر سنا) أبو بكر قد يكون لاحظ ذلك فى انسحابى الهادى فى إحدى مداخلاتى معه ، يا أبا بكر أنا انسحبت ايمانا بهذا المبدأ.
صدقانى ،كلاكما متميز فى مجال دون أن يخصم ذلك منكما شيئا.

همسة صغيرة:

دعا عنكما ما أنتما فيه (من كجار) ، وانسيا(وإن لم تستطيعا تناسيا) ما حدث، فهو لا يشبهكما و لن يضيف لكما شيئا.
لكما مودتى
......

و مالو يا حفيظ
لا تثريب عليك
قلتها ليهو واضحة

Quote: خلينا فى البغو ياخى

كان بقى عليها اوكى
كان ما بقى عليها
برررضو اوكى
و فى الخاطر المساحات الطيبة بين النفوس

Quote: ويكون الارتواء محطات محطات .. مداخلة مع معاوية الزبير .. ظوووط من ودالبشرى .. شغب منبري من جلالدونا .. كتابة طاعمة من مولانا محمد المرتضى حامد ..غنية من يحى .. عااااجل من ودالصايم .. اكتشاف غواصة جديدة من صلاح جادات .. تحليل سياسي من مولانا الملك .. حوار بين الخواض ومصطفي بتاع ياااا مصطفى .. خط منبري واضح أن لا ديمقراطية من دون علمانية وهكذا !!

يادكتور البغو ده عندو نسابة مع بقبق سيد المزرعه اشوفك نسيتو معناتا جاك في الخاص للاستثمار باقي الدولار حيقع واطة حسب افادتو
ومن ثم تحياتي واشواقي
ح ب وعيو اتشكل في مدينة لاتعرف صراع التوازن بالاسقاط انا ود مدني المابتسعل رفيقك من وين في الاهل عيب السوعال ده وفي المناسبة بتلقى قرشى العاضاو النعجه وعباس ابشنب سكينو في ضراعو وناس طربيزة الحريق والبغو والكبنقه والحتة دي بتديك ثقة في روحك لاابو ورطه لابريمة لا الجن الاخدر بقدر يزعزعا وختاما عبدالله دينق نيال جلابي وبتاع لا اريد اسيرا احمد هارون جلابي بس متين نفهم كلام زي ده
اتخيييل لي تصرف ليهم روشتة امشو يسكنو مدني اقوليك امدرمان كوستي او بيوت السكة حديد اذا ماباعوها الاشلاق دي حتات الانصهار الحقيقية مو كيبورد بكري
مع حبي الاكيد يامنصف
ح ب

الاخ العزيز أسامة
كسرة مقبولة باذن الله ..

يا عزيزي والذي نفسي بيده سئمنا من هذا التعب البلا صالح .. وتجاوزنا ومشينا لي قدام .. وهجرنا بوستاتنا لما نالها التمييع والتدليس والشغب العبثي .. وما عارف الواحد يعمل شنو بعد ده .. اهو مواصلين لانو في ناس زيكم جديرين بالاحتفاء بالتواجد معاهم... لكن المسالة لا تحتمل المطاردات واحتقاب سوء الطوية من بوست لى بوست .. نسكت ؟!!!

قد لا تعلم يا عزيزي انو الابتعاد عن هذا النزق محمدة نتقصاها .. بل وفيه احترام كبير لي زول بي قامة معاوية الزبير والذي لا اتمنى على الاطلاق وضعو في الحته دي .. والصحيح انو لا علاقة لمعاوية بهذا الامر ولكنو زول هميم جدا ويقارب الاشياء بمسؤولية ممتدة ..

جدا يا جلالدونا يا صاحبي ..
لك على هذا يا عزيزي .

حفيظ سلامات ومفهوم جدا مدخلك يا صديقي ..

مودتي للجميع

انتهى البوست.

يا دكتور ... وضيوفك .. سلام

انا شايف انو البغو ... احسن اكلة للكروراب ..
والدليل ... من لقى منك البغو فليشمر عن ساعديه ..
من اقوال .. مجيدو .. قدس الله سره ...


عالم بطاالــــــــــــــــــــــه

والبغو عندنا نحن اهل الزراعة النيلية؛
هو الحشة الاولى في البرسيم؛ الحصاد الاول؛ بالمناسبة البرسيم يكتمل ليحصد كل 3 اسابيع
على اكتر تقدير؛ وتعاد الكرة كل مرة لمدةسنوات
فتامل...
وبالمناسبة البغو بعمل اسهالات للاغنام والحيوانات الصغيرة؛ وحتى الابقار لو اكلت كميات كبيرة..
لذلك البغو لا يُباع؛ وانما يُوزع مجانا؛ والحشة البعدا يبدا المزارع في البيع؛
وبالمناسبة برضو البرسيم اجمل والذ قش وحشيش تحبه الحيوانات..
والغريبة بعد سنوات، الحشة الاخيرة وتسمى الطلقة؛ وهي مجانية بالمناسبة وتتاح لجيران المزارع؛
واصدقائه... بعدها تحرث الارض وتزرع محصولا اخر....
لمن قريت العنوان للدكتور عيوني طفرت...
ياخ انا قربت انسى الكلمة؛
وهذه مقاربة اخرى للبغو...

ود الشكيري سلام يا ارباب
الحقيقة بوستك جمع فأوعى رغم بعض الطفابيع او النباتات المتسلقة ان شئت
المهم
المريسة انا زولا و بريدا باعتبار ما كان و اي زول ضاقا شهوته ليها ما بتنقطع خصوصا اكان لقيتلك (دقة)
عمك عووضة دا ما يزيد فوق فت عبار عشان هو من فصيلة (الكرور) و انا خايف عليه

Quote: خصوصا اكان لقيتلك (دقة)

يعني جلد السوط بزيد شهية الزول للمريسه
ولا الدقة دي جايه من شكله ويكون كل ما عملت شكله بتزيد رغبتك في الاستزادة من المريسة
اشرح وبين يا جميعابي

يادكتور بعد التحية شغلك دا اسمه (بغم الأسماء) وليس البغو الواحد داك

لانو الحديث عن البغو بعيدا عن الأنداية ذي الحديث عن الصلاة بدون جيب سيرة الوضوء
والاسم الصحيح طبعاعنوان نص هلاويسي " من الهلوسة" يعج بالأسماء كما يشير للحبيب بركة ساكن ومعاهو اخوانو من البغمات
ولحدي هنا الحمد لله وقفنا شط "او ظط بحسب قواميس البني كجة الألفية " من الجمال المعبي البوست بعيدا عن وحل التفاصيل الباقية اصلنا ممنوعين من نزول حلة نادا "(نادا بالحرف المفقود وهو بين النون والجيم اللي بيه بتبدى كلمة نيالا الحقيقية قبل السمكرة ) وهي حلة بائدة نواحي نيالا كان داير نجيضتها عليك بملازمة بوست عمنا حمدنالله بتاع إنجمينا وبانغي او الاستعانة بالعزيزين وليد زمبركس او عبدالرازق الطالب او حتى اي زول من البحير

مودتي

اسف للركاكة لأَنِّي بكتب من موبايل

Quote: يعني جلد السوط بزيد شهية الزول للمريسه ولا الدقة دي جايه من شكله ويكون كل ما عملت شكله بتزيد رغبتك في الاستزادة من المريسة اشرح وبين يا جميعابي

معقول يا ود الفكي لكن

الدقة دي اجود انواع المريسة على الاطلاق
زي العرقي البكر

مودتي د. ودالمشرف .. بوست جميل ..
لا بد من التويثق النوبي لهذه الكلمة ( بغو )
في النوبية الدنقلاوية ( بقو ) هو فصل الصيف
ويقال للبنت الجميلة ( بقون وسي ) يعني نجمة الصيف كناية عن الصفاء والجمال
وبالمحسية ( فقون ) ولقد غنى عظيم النوبة وردي ( فقون ونجي ) يشبه الحبيبة بنجمة الصيف
بقو ( الصيف ) لا يوجد حرف ( الغين ) في النوبية ..
مودتي .. بوست جميل ..

Quote: احتقاب سوء الطوية

مع اني ما فاهمها .. لكين الجملة دي شكلها كده مغرزة ... و بالذات كلمة (احتقاب) دي :)
واصل يا ود المشرف ... العبار هنا بالعمار هههههههه

ناصر الامين
كيف حالك و ازيك
بفتش ليك ياخ، أرجو الاتصال ضروري
(مافي أي مغرزة)

0097466684229

Quote: ناصر الامين كيف حالك و ازيك بفتش ليك ياخ، أرجو الاتصال ضروري (مافي أي مغرزة)

معاوية الزبير يا زول يا لطيف
و الله قبل يومين في سيرتك .. مع ناجي صاحبك :)
تحياتي

ناجي!! يا زول؟
بطرى اللي آمال وغاية .. ما بتحمي المقدور وقاية
يسلم ناجي من الرماح
إذن خليك انت، قول ليهو يتصل هو

د. المشرف – تحياتيأقرأ لكم كثيرا ومعجبا بطريقة بثكم شيئا من ثقافتكم الجمة في اضابير طرحكم، فاجدها كقارئ ترياقا لكثير مما أقرأه من سموم بهذا المنتدى العامر سودانيزاولاين أو كما اسميه ديوان بكري العامر ولعله من نافلة القول أن أزف أيات الشكر والعرفان للأخ بكري أبوبكر على صبره وحلمه وتحمل ما يصدر من بعضنا من تجاوزات لكل ما نعرف من ثوابت وخطوط حمراء فيتركهم يسرحون ويمرحون لا ينجو أحدا من رائش سهامهم ولايمارس معهم لا ( ديكتاتورية) حميدة أو ( متسلطة) فلله درك يا بكري (ونسأل الله سبحانه ألا يجيب يوم شكرك). البغو عنوان الخيط جذبني للإطلاع عليه كعهدي بكتاباتكم ووجدته شيئا مختلفا وما ورد من تعريفات تفضل به القراء كله صحيح فالبغو هو مريسة العيش غير المقطرة ( الغبشة) وهو غذاء ودواء للجوع وعادة إجتماعية لبعض قبائل دارفور ومن خالطهم من بقية السودانيين والحريفين من السكاري ناس ( المقطر من عرقي وخلافه) يعترون شارب البغو ( هوان ساكت) ومتطفل على السكر أو ( فكي ساكت) إذ أن البغو هو فكة ريق وغدوة بعضهم وام بدادي ( الحيران) حيث يركنون ( ليحان جمع لوح) تعلم كتابة وحفظ القرآن الكريم جانبا ثم تدور الكؤوس بينهم.... أظنها ثقافة سادت ثم بادت، وطبعا للجنقوجورا صولات وجولات مع البغو ... سمعت عن ذلك وشاهدت بعضه وليس لي علاقة بالبغو ومشتقاته لتباين الإختصاص وكده أو مولدا ونشأة وتربية وجهة وعرفا......فالقرب منه العيب كله. إلا أنا ما عرفت علاقة دا كلو مع البغو؟

مداخلات تشهي الكتابة والله ..

ديناميكية العامية تتفوق دونما ادنى شك .. انظر لتفاصيل هذه المفردة وابعادها الاجتماعية كما تواترت عن حفيظ ومنعم وحماد ..

ياخي ده حفر لغوي بديع ..
انظر ..
ولمن الواحد نطط عيونو ..

Quote: والحريفين من السكاري ناس ( المقطر من عرقي وخلافه) يعترون شارب البغو ( هوان ساكت) ومتطفل على السكر أو ( فكي ساكت)

فكي ساكت !!!!

يا الله يا الله يا حماد ياخي ..
نسال الله انو الواحد ما يقعد مع هؤلاء العريقين في السكر ...
كانوا طلعونا انصار سنه ساكت !!!

يا شباب هناك بجانب مداخلة احزانك يا وطني ..
مداخلة جميلة, أخرى, لآدم مهاجر تضاف لمداخلاتكم الجميلة هنا .. ناس ح ب وآخرون

Quote: Adam Mohajer · University Of Khartoum الاخ محمد حيدر تحية طيبة اي نوع من انواع البغو تقصد او (تحب) هنالك نوعان من البغو يا عزيزي بغو عيش وبغو دخن.....اختلافي الراي يا صديقي لا يفسد للود قضية...ولكن كسودانيين اختلافنا من نوع اخر فقط اختلاف من اجل الاختلاف وكاْننا خلقنا لنختلف ..حتى القضايا الوطنية الكبرى والملحة لا تجمعنا وكذلك الانسانية. لا تضع راسك براس بذيْ اللسان وفاحش القول والا ستسقط معه في تلك البركة الاسنة...وما عليك الا السفه والتجاهل وسيحترق من دواخله الى ان يتلاشى.. التكتل صفة عقلية القطيع وهي سالبة جدا. بعدين كلمة ود البشرى يا ها ظ......ط المعروفة دي ولا واحدة تانية ... عموما كلمة ما حلوة وخادشة جدا للحياء. أعجبني · رد · 10 ساعة · تم تعديله

التداعي جميل وجاء عفو خواطركم يا اصدقاء ..
تلبو وسعادة اللواء مجيدو ومنعم والجميعابي وناصر وجميعكم ..

يحدث احيانا أن اشعر بمرارة ما جراء اعتداء او مخاشنة او اساءة تنال الواحد فينا وهو يمشي في دروب هذا المنبر .. وكان أسوأ مافي الامر أن يسكت عنها الناس وكأن أمرا لم يكن .. وكأن من الطبيعي جدا أن تتم اساءة فلان او علان .. ولذلك .. وبخلفية تلك المرارة العالقة بالخاطر .. قررت كتابة شيء نحو ال 10 الكرام ... في الحقيقة لم الحظ اسم الاخ عمر ودالباوقة كما اشار حامد بدري .. ليس لرد الاعتبار ولكن النهم يستحقون فضيلة ان يقال عنهم ما يمثلونه ..

اها الموضوع جاب وجر كما اشار الجميعابي ..
تنقلنا بمفردة واحدة بين انسان المدينة (كوستي) للترابلة (ناس منعم) لي (البقارة والابالة) ناس حماد ...

مدهش !!!

Quote: للترابلة (ناس منعم)

يا سلام عليك يا دكتور ياخ... تصدق انا تربالي لا تشق لي مزرعة؛
كنت اذاكر الكيمياء مع ابوي في العصريات؛ واشتغل شوية في الزراعة؛ وعين في الكتاب؛
واذكر جيدا ان رآني ابي يوما اعمل بعجز ظاهر في المزرعة؛ فقال لي:
يازول شد حيلك في كتابك دا؛ طوريتنا دي ما بنقدر عليها!!!
ليتني كنت مع الحقل والطورية؛
ياخ المزارع دا رغم الشقاء والشقاوة؛
لكنه فت وطبيعي ونشيط وسعيد؛
ياخ البغو دي هيجت جواي الحقل والزراعات؛
وتصدق امكن تلتاشر سنة ما سمعتها!!!
قفزت لذهني طازجة؛ كاني اقف على بعد هنيهة من حوض برسيم؛ اخضرا
ووسيما ونديانا؛
وتريانا؛
يغري بارتكاب الحماقات!!!
تصدق يا محمد الذ اكلة هي تلك التي ياكلها المزارع تحت شجرة ظليلة؛
ليس بعيدا عن حوض البغو؛ وغنيمات مبسوطات؛
حرف كسرة معجونة بموية طماطم بشائر؛
وجدول ماشي؛ تتمها من موية من جدولك ذا الرقراق...
موية نيل بطميها؛
ولا تلوي؛
.......................

البغو كلمة تطلق علي حاجات كتيرة
قطفة اولى كان اكل اكان شراب
وزي ما قال عبد المنعم الطيب تطلق ايضا
علي البرسيم اول حشة
وأول حشة دي بتنفخ الحيوانات عشان كدا
بحشوا البرسيم البغو ويخلوه يومين عشان
يضبلن وبعد داك ما بيسوي ليهن الحبة
زي ما البرسيم البغو بينفخ الحيوانات الزينا
كدا. برضو البغو اللي هو المريسة النية بينفخ
البشر والناس الما كرور
عشان كدا الكرور نمرة اتنين الملقب بامجد الجميعابي
قال ما يدوني انا الكرور نمرة تلاتة اكتر من كورية واحدة
عشان ما ينفخني ويلحقني امات الكرور نمرة كم كدا ما
عارف والملقب بجلالدونا

القش الاخدر الجديد بكون احرش وبلصق للبهيمة في حلقها وبكتلها
عشان كدة بنشفوهو
ولو البهيمة اتناولتو بغرغرو ليها طين ويشربو ليها

Quote: البغو... دراسة ما بعد بنوية في سيكلوجية منبر اسفيري !!

طبعا تقصد مابعد بنيوية ! اها البغو عندك هو العطش وليس بغو حمد الدغري ، لكن المجاز مقبول

الايتحتم عليك عندئذ ، ان تدرس البنية السيكولوجية حقا وتتسامي علي جراحك الخاصة

مع الاخذ في الاعتبار ، انك كنت من اصحاب اصلاح البين في مسيرتك الاسفيرية

لا لسبب سوي (تربية سابقة) او سلوك منشاه قديم لديك ، فكيف بك بعد مسيرة طويلة كهذه

ان تحرن حرنة واحد ذات غضبة مضرية مع بكور ، الذي اعتدنا علي طبعه الشين (زي تبارك)

وتص مرحلة رفض عدم تدخله ، غايتو بس رد جميل مني لفض معركة اسفيرية سابقة بيني

واحد البورداب ، كنت انت ، سبب فض المعركة ، تجدني هنا اطالبك بان تقبل وساطتي

وان تتبني دراستك البغوية المابعديه في معرفة سيكولوجية الاختلاف (بينك وبكور) لان جذوره اقل عمقا

مما قلته انت ببقاء الشعر وذهاب الالهام وكذا بقاء الكتابة وذهاب الاشخاص ، اعتقد لو كانت دراستك (علمية محترمة)

يجب ان تتكرر نتائجها وصدقيتها وتكون قابلة للنقض والتفنيد ههههه

غايتو يا ود اب سن وما شاء الله اكان ما الجنا العسل
الفي بروفايك الواحد يحلف يمين الله انك كنت
شايل الفروة لي ود تور شين
ياخي انت قديم خلاس
بعدين الحسوا دي ما ياها مواصة الكوجان ولا
شيتا كتر؟
.........
انتو ياخوانا زميل الكرورة ح ب مشى وين

Quote: تجدني هنا اطالبك بان تقبل وساطتي

يا زول ياخميل عمل الخير ما دايرلو إذن
خش على طول و الكل معاك
هم صعبين شوية لاكين حنينين
____
البغو ده عندو علاقة بى عيش الفتريتة ؟
يعنى قاصدين الآبريه اللحمر وللا حاجة تانية
غايتو سمعنا بى التُرّة لكين بغوكم ده ما سمعنابو

يا آدم المهاجر شنو الحنكشة دي؟ خادشة للـ.. شنو؟
يا خوي ألا زال في السودان حياء ليخدش, الناس تموت الموت الواحد دا سمبلا و جوع وسيول وفشل كلوي و على طرق الموت السريعة ويتنفسون وياكلون السرطان وإشعاع نفايات الامم المدفونة
وأحيانا يموتون إرضاء مزاج ساي وقد اعتاد الناس الفكرة وتعايشوا معها
وبرضو تقول لي خادشة للحياء, حياء بتاع فنيلتك :)

السياق الله يهديك .. السياق

كيفن ما خادشة للحياء يا ود البشرى
و الدليل لما اقراها بنضّرس و جسمى بيكش

Quote: شان كدا الكرور نمرة اتنين الملقب بامجد الجميعابي قال ما يدوني انا الكرور نمرة تلاتة اكتر من كورية واحدة عشان ما ينفخني ويلحقني امات الكرور نمرة كم كدا ما عارف والملقب بجلالدونا

والله جلالدونا ده احسن كرور فيكم كلكم


عبداللطيف سلامات ..
(مابعد) اصح بالتاكيد ..
وجميع ال (مابعد) يجعلنني اتحسس مسدسي
الشاهد أن تبارك قد ظُلم ظلم الحسن والحسين.. وش البامية ما ياهو ولكن ..
فلتكن مشيئة المودة اذن ..

ودالبشرى
وضعية الظوووط استدلالية بالتأكيد .. ونحو تلك المعاني !!

قال محجوب شريف
"الف ضحكة حلوة.. تسندك ب جنبه" ..

Quote: يا ود المشرف احنا شعوب عجم.. يعنى بنقرا العربى بى تلتله.. تقوم تكتب بالنحوى؟ شغلك دا فوقه اضطهاد لحقوق العجم..

استاذنا كلنا نور .. نور تاور
ما تشوفي الهيلمانة دي .. نص اللسته عجم .. او يزيدوا قليلا

Quote: ليتني كنت مع الحقل والطورية؛

عندي, وتبدي لي لاحقا, ذات جينات الحنين للحقل يا منعم

في اغترابنا السحيق هذا .. في معاني قاعد تتشكل جواك بمنتهى الهدوء .. احداها مسألة الحنين للحقل هذه

كان اجدادي ترابلة .. تمتد حقولهم في ضواحي الخرطوم وكأنها الازل السحيق لروحي ساعة الخلق والتكوين .. جدي المشرف من خلع العراقي وارتدى جبة مناسبة نحو امدرمان والتجارة .. فما ورثنا من كل ذلك شيء .. لا حقلا ولا تجارة .. فلقد كان جدي بابكر موظفا .. وعلى خطاه سار والدي .. وهكذا طلعنا نحنا اولاد موظفين ساي

اها لمن الواحد فينا تغلبو غربتو ويقعد يفكر في المآلات الرحيمه .. قاعد يلقى انحيازات خفية للحقول .. تتشكل رؤالك رويدا رويدا نحو تراكتور برجوازي ومزرعة واولاد بحضروا للماستر في بلاد الخواجات.

نعم .. كان ذلك ليكون ممكنا جدا .. وحتى دونما تراكتور ومزرعة .. ربما صيدلية اشتراكية انيقة جدا بسوق امدرمان يا صديقي !!!!

من فلاحة كاتب البوست وبلاغة متداخليه بما فيهم بكوري طبعن البوست ...... مغنتيس بس

طيب نجي للبغو ونستثنى المعنى الذي يدل على ( الفسدو)

عندما تقوم (بكد) الدومة وترميها في بلاد مابين الخورين (خور الدونساب وخور ودي البقر)
وبعد نشافها تماما نقوم انذاك بتكسير القشرة الخارجية لاستخراج الجنين الداخلي والذي يسمى ( البغو)
يتم استخدامه في لعبة شعبية اسمها ( الوير).
يضرب هذا البغو بعصا لمسافة حسب قوة الضارب.
يعاد بعد ذلك بواسطة الخصم ( جدعة عالية للميس) حيث يصده ضاربه لتحسب امتاره.
او يثبته الخصم داخل الميس ليكون الحساب صفرا وهكذا.

ح ب
يلقب بحامد بدري احيانا ..

Quote: اتخيييل لي تصرف ليهم روشتة امشو يسكنو مدني اقوليك امدرمان كوستي او بيوت السكة حديد اذا ماباعوها الاشلاق دي حتات الانصهار الحقيقية مو كيبورد بكري

مدني وامدرمان وكوستي ليست روشته يا حامد ..
هذه مؤسسات تربوية تبدأ في مرحلة ما قبل الروضه .. مرحلة تسمى احيانا بالشارع .. والشارع لفظ عام يتعدى توصيف الشارع المعروف ويطال راس البيت وحوش الجيران وميدان الكورة .. .. هي مراحل لا يمكن ان يحرقها احدهم كأن ينتمي لمدني بمجرد دراسته في جامعة الجزيرة .. مراحل التكوين الاساسية هي المحك الاساسي .. عندما تشب ومنذ خشونة أظفارك وشقوق رجليك بين اقرانك في الشارع والبيت .. تدخل بيت خالتك فلانة والتي يعود اصلها لاقصي جغرافيا ممكنة للتهميش .. في تلك الاوضه الطنية المطرفة .. او عندما تدعوكم لصحن كسرة كبير في برندها والتي يطلق عليها تعبير المطبخ هذه الايام .. تمتد الايادي نحو صحن الكسرة ذلك في تلاقح لوني مثير جدا .. حلبي اصفر اخدر اسود .. والمغني يغني حبيبي آه قلبي تااااه في يوم الزيارة !!

الكرور الشهير بعلي محمد الفكي قال
ما بيعرف الدقة فتامل!!!
ياخي الدقة دي مش اجود انواع المريسة
وبس....دي المريسة البكر قبل ما يرخوها بالموية
بعدينا ما بيدوها الا للخاصة
والخاصة ذاتم اكان ما بدروا ما بيلموا فوكا😈😈
....
اما الكرور الاخر الشهير بجلالدونا فأمره عجب
قال فتريتة،،..فتريتة في عينك
عامل راسك المدوقس دا
.....

انا يا عثمان
زول بنادر ساي لا سرحت لا جريت واسوق
لكن زي قول ودالمشرف
تراث السودان يجري نابضا بالحياة في ارجاء المدينة .. تكون اذنك وذهنك فاتح وجيد الملاحظة
كل الحياة السودانية من مختلف بقاع السودان تجري امامك
اللغة والثقافة والسلوك الفردي والجماعي
فعلا محمد الشيخ كنا برضو بنحرق الدومة ونكسر نطلع جناها .. ومرات لشقاوة الاطفال بنربط الجني دة في نص العراقي ونتٱمر به ضربا في الرمة وحراسة

شنو يا نمرة تلاتة
ما صدقّت لقيت ليك بنيوية بغو
و طوالى جيت حاشر طرف جلابيتك فى خشمك
و طابق قرعتك
ياخى البنيوية دى قايلا جات من فراغ
جات من كرور حلل و صفايخ و كوانين اكل الدهر عليها و حكّ خشمو بى طرف جلابيتو
عشان حاطر السايكولجية دى
قاليها
ست البغو لى ببغبى
و غبغبى
و لى غيرى لا ينبغى
يا يااا ست البغو

يا كرور يا ايا كان رقمك
انت مالك ومالي
احشر جلابيتي في اي حتة انا عايزها
والله ياهو
.....
عملت لينا شنو في موضوع التنكرررررر😈😈

ود اب سن اكان ما بحبك ان شاء الله
الحبة التقوم لي في اضان الوزة حقتي😈😈
----
یا دکتور. احسن کرور فینا دا ما یاهو الذم
بما یشبه المدح ذاتو
انا قلت لیک انت مجرم حرب ما صدقتني😜
داير تقول جلالدونا أكر زول...صاح ولا ما غلت؟

Quote: عندما تقوم (بكد) الدومة وترميها في بلاد مابين الخورين (خور الدونساب وخور ودي البقر) وبعد نشافها تماما نقوم انذاك بتكسير القشرة الخارجية لاستخراج الجنين الداخلي والذي يسمى ( البغو) يتم استخدامه في لعبة شعبية اسمها ( الوير).

يا ود الشيخ أُماتنا يستخدمنه مُكحلة للصغار ووجدت من ينحت علية حرف ويعلقه قلادة او دلاية مفاتيح برينسة كحيانة بحي العمارة الفوق ....
بث يا ود المشرف اول مرة اسمع فذلكة تفصل بين الفعل وصاحبة فالذي يفعل الفعل ويمارسة فهو منة لا محالة
أدعم إصلاح ذات البين بينك والمستنير لأن كلاكما ريحانة للبورد . كان ينبغي ان تزبه عن مجاجاتك وانت لا يعجزك تطويع الحرف
ليفهم ما يضيق به صدرك أنا أصغر من ينصح كليكما .
:
:
:
:
:
:
:
مع التحيات لله الزاكيات

ناس كدّوهو و حرقوهو و عملوهو كحل
اسمو العاج النباتى
استنيرو يرحمكم الله
____
مرحب بالعريس فى كار كرورنا
و يا بتاع المدح و الذم انتا
نمرة كم ما عارف
مش بتاعت فنيلتك
مش يا مشك

اي والله يا محمد حمزة
بقرقرن جني الدومة الصغير الجوة و ويعملنو مكحلة
وظهرت موضة الرسم عليهو ونحت الاسم وعمل ثقب فيه ويتعمل علاقة مفاتيح
وانا احبك يا عثمان والله
الصورة حقت الحتالة
علاء الدين عبدالحفيظ
سنتين باي ناو
وهو طفل كان هادئا وصار مشاغبا . وجنو مكاواة

تحياتي لصاحب البوست ودالمشرف وضيوفه، وسلام خاص لصديق الخندريس والشَّدو، ود أب سن
البَغُو
يطلق للمريسة، ومن أنواعها
البغُو
أم شكة
الحُسُوَّة
أم بِلبِل
الدَّقة
البقنية
وعطفا علي مداخلات الأخوة...
الدَّقة وهي أخطرها وبترمي في الشوك،مابزيدوها مي ...
"دقة خريط" ، الخواجة مايكل أشر مرة شربها في الدَّنكوج،والمشي غلبو، كرعينو قعدن إطقشن...نظر
"مايكل أشر" لمرافقيه جمعة ودسنين والدّقلول فقال بإمالة كباشية قُحة:
( اللّيلي مايكل واقف طيني...)
والحديث بسند قفا بعضو، مرات الكرعين بطاقشن من الرَّيدة، الصادق الحاذق وحادق قال:
(غرامِك منُّو كرعي قنَّبن يتخاتَن
كرِّيفك دواء جسمي وجروحي الماتن)
وصاحب الخندريس الدّوش قال:
(خدرت كراعي من الفرح..
نُص في النعال ونص في الأرض)
أمَّا الحُسوَّة ماها مُسكرة، وأهل الريف بسمُّوها
(أم نارين) بصنعوها في النار مرتين........!
والبقنية دي بتكون من الدُّخن الدِّمبي ........
وهي شراب مفضل للمجاقنة، والحرفة، وناس المال
وأم شكة دي شراب الزول العيفة.........!
أمَّا عن البغو، قالت شاعرة كباشية، تتندر من أولاد البادية الذين إغتربوا، وتركوا إبلهم، وتتندر أيضا من أهل الدَّكنوج، أو الأنداية ناس شراب البغُو فقالت من غنا الجراري:
المغتربين إندعوا
لاحجُّو ولا سعوا
عجبي العاط لي الرَّعوا
شرابو فواق مو بغُو
* سعوا من سعي السعية البهائم ، اي سوّالو بهائم، تختلف من سعي بمعني السعي بين الصفا والمروة..
العاط من عايِط اي نادي....والرَّعو اي الرواعية وكل مايرعي البهائم
فواق هو حليب الإبل، والناقة إذا درَّت يقولون :"فاقت"
والفواق إما صبوح وهو حليب الصبح، والغبوق وهو حليب الليل..
أيضا يقولون للقش /العشب الذي نبت لتوه ورويان من المطر :
"قش بغو"
يعلم الله ماني زول دنكوج ولا أنداية، زول بدوي أبَّالي .......!
لكنني تجولت في السودان السمح، سودان قبُل، وفي الزمن الجميل،المهنة والعمل جمعني بأصدقاء فناجرة، ومن مخاليق مولاناالجميلين
وعطفا علي المفردة(البغو) معنا وحسا
(فسوء الخمر يؤذي....
بينما يقتل سوء الخلق)
معزتي للجميع

عبيد الطيب انت كنت غاتس وين بالطيبات دي وأهلك ارابيب الندا....يا حفيظ ربي يحفظم ليك ويحفظك ليهم.....اها يا شباب بعد اذن الدكتور كديكمان شوفوا لينا حكاية مبغبغ ديوعلاقتها شنو بالبغو والبغبان

صباح البغو يا احلى صباح
المثل بقول: اضرب المرس وبطل العرس
مبغبغ يا عثمان عند الحناكيش معناها ملظلظ

Quote: مبغبغ يا عثمان عند الحناكيش معناها ملظلظ

و قيل مشعشع
و الشعشة شعاع

برضو يا جلالدونا في التكحيلة
اتحداك كان تعرفها

Quote: برضو يا جلالدونا في التكحيلة اتحداك كان تعرفها

يا منتمي
تكحلا يعني تنخسا و المعنى واضح

في المسحة
الضواقة
واحدة من طقوس زيارة الاندانية يدوك كاس مسحة
اها الزول المفلس بلف الانادي ويسكر مسحة ساي. وهو مما يعاب به ويذم
عكس الشراب النضيف . فالمريسة بتدور اللمة .. اي زول يجيب عبارو في التاية ..
حباب العببد
صحبي المتمم كيفي
ليك وحشة والله
اخوك زيك وواحد ياهو السجاير والصعوط . لكن شاققنا وقعدنا مع الاصحاب وسمعنا
علاقة المريسة بالبصل شنو
الناس دي بتاكل بصل يحيرك
معانا واحد في السوق تشوفو بقرقش في البصلة لامن يشهيك ليهو . ما بقطعها والكلام دة من الصباح . بصلة بس
لامن تجي جمبو تلقا دموعو ونخيرنو يوشلو

التكحيلة يا رعاك الله لمن تكون بايتة
معاك وانت في عنقريبك تمد ايدك وتديها
كباية بشرط قبل تتسوك
لو اتسوكت الضحك بيشرطك
كلمتك
بعدين امجد دا كرور مطرطش ساكت
ما تسمع كلامه
....
طيب التحبيسة شنو؟

بالمناسبة

تهريف ماعندو في متل الكلامات دي؟؟؟؟


يقوم يلف

Quote: او عندما تدعوكم لصحن كسرة كبير في برندها والتي يطلق عليها تعبير المطبخ هذه الايام

عليكم الله نفر الحنكشة دي لآقتكُم !؟، قااااادر الله في مُلكو العظيم !.البرندة دي خلها كلآما براهو،
لكن عشان تصل مطبخكم دا، تدخل الدونكا ؤ تلقُطلك حرِف من الدونكي ؤ تمرق بالنفاج الجنب المارقون،
أها بعد تخفِس في السآم بتلقالك خُس فيهوخُمارة هِيّل بت جاد السيّد، لآ تلمس عجينا وابقى ماشي لآمن
تووووش تدخل في التُكُل بوراهو بتلقى المتبخ اللِيّلكُم دا خُدلك بِييس بتاعت جاتوه، سمِح .
حضور ود المقدم بنكهة ريحة النترة يخلينا نفرهد ياخ،أي والله .
ؤ يا ود المقدم قلنالكم كلآمكم عربي فصيح بالحيل،
والفواق المسافة الزمنيةبين الحلبة الأُولي والثانية، في القرآن (ما لها من فوآق) .
آ زول قسم مِشتهيك، ؤ مِشتهي طلتك ...

يا سلالالالالالام يا مشرف ياخ

تصدق في هذه الغربة الطاحنة التي لم تبق لباقيات الأيام شئياً ولا لأولادنا الذين يندهشون أيما دهشة
حينما يسمعون شرحنا لمثل هذه المفردات التي تغلغلت في نفوسنا لكأننا جئنا من كوكب آخر

سنين مرت ومرو سنين .. وهذه الكلمة لم تطرق أذني مع كثريات أخر
البغو لنا فيها أسم آخر (نحن ناس جزيرة ساي)
كانت تسمى البقنية .. تصنع من بقايا وفتات الكسرة البايتة
غذاء ورواء ومظهر اجتماعي تجدها في كل بيت غير أنها أندثرت الآن
موجب في الأعراس أن تأتي ومعك جردل بقنية
مكرمة لأفراد النفير وهم يساعدونك في منحى من مناحي حياتك
وجبة صباحية وأنت تهم بالخروج للعمل (زراعة في الأغلب)
وكانت تحفر لها المطامير (مطمورة) في الأعراس وكل جاي المناسبة يحمل موجبه
يدلق في المطمورة حد الامتلاء (شفت البساطة دي كيف)

كسرة:
مجاراتك في اللغة دي حاجة صعبة خلاص ياخي .. ليتني جاريت الكرور وريحت نفسي

إلى أبو سن (مرجع البوست):
الحسوة عندنا لا يشربها إلا الكبار وكانت محرمة دولياً علينا ونحن صغار
فهي أعلى درجة (من ناحية السكر) من البقنية

مودتي

Quote: البغو... دراسة ما بعد بنوية في سيكلوجية من�

والله يا ناس المركز عندكم قدرة غير عادية في اختراع المواضيع"الانصرافية"
ناقصكم بس علجوم الانقاذ حسين خوجلي وايام لها ايقاع
لمن تتكلمو عن عوض دكام نادوني...ما بريد زول في الدنيا ذى الراحل عوض دكام...وكمان "الهادي الضلالي" بس ما تكلم زول يا مشرف
بالله بوست من اوله لي اخره ما فيه كلمة ديموقراطية او فدرالية او اشتراكية او حتى المحكمة الدستورية العليا...او حتى سلفا كير
قطيعة تقطعكم يا ناس المركز قاعدين في رسانا ستين سنة ليه
قائد الجيش الشعبي لتحرير الضهاري

هو انت زاتك حنكوش يا جلالدونا بالاضافة لانصرافية المركز القالكم عليها عادل امين
اسي جنس قون بشة العلى الطاير في مريخ كوستي تعبر بشنو غير زوووط دي. وين خدش الحياء هني اللهم الا كان حياء الحارس

Quote: التكحيلة يا رعاك الله لمن تكون بايتة معاك وانت في عنقريبك تمد ايدك وتديها كباية بشرط قبل تتسوك لو اتسوكت الضحك بيشرطك كلمتك

وبهذا يتم تعيينك قائدا أعلى وناطقا رسميا باشم الكرور أمجد يشوف ليهو شغلة طلع حنكوش ساي

آي الكلام يا يختوهو زي ما ياهو ول بلاش

التحبيسة دي حقت الكبنقا عشان تخليها كعصف مأكول

لقيتكم بتاعين كلاب قديمين
الكبنقا دي قايلو اسم خاص بناس كوستي زي كتوكومس
الكبنقا والقوية وكافن دبي
تعرف يا حمد في التفتيش للمواصلات السفرية بفتشو اصابعين الشباب
الشوشوة

Quote: حضور ود المقدم بنكهة ريحة النترة يخلينا نفرهد ياخ،أي والله . ؤ يا ود المقدم قلنالكم كلآمكم عربي فصيح بالحيل، والفواق المسافة الزمنيةبين الحلبة الأُولي والثانية، في القرآن (ما لها من فوآق) . آ زول قسم مِشتهيك، ؤ مِشتهي طلتك ...

ودالمدير ياصاحب الزينة والمفردة الرزينة وطوافرالكلام
سلااام ومعزة صادقة، والعديلي تخطمك وتعقبك
"الفُواق"
قالت بت المك ودصباح،تشكِّر أخونا الدليل الضي ودالمك، وهو في يتوغل بإبله في رحلة الجنوب:
نزل في شارع القطر
شرب في فواقها وفطر
الضّي نجعهن بطر
لا برّاق لا مطر
ياخ اي بهيمة من النعم ممكن تشيل ماعونك وتحلبها إلا الإبل....إن مافاقت شوقك علي طنُّوب..........!

هلا ود ابسن

الشوشوة دي هي من مكملات المتعة
تأكد لو ما حصلت الشوشوة إلا يلحقوها بواحدة تانية


يا عادل أمين

اليوم بغو وكبنقا وغدا ديمقراطية واشتراكية ومركز

غايتو يا ناس سودانيز البتدوروه بتقشو ليه الدرب..والبتابوه بتوسسو ليه الكلب...
من يوم البوست دا نزل امشي واجيه راجع عنوانو شيء تفاصيل العنوان شيء تاني......
بعد مداخلة حمد بداء البوست ياخد منحى التحدث عن المريسة ..
بنيوية وسايكلوجية وظواهر ولستة وبقدرة قادر اصبح البوست عبارة عن عبابير..
البوست دا ذكرني واحد صاحبنا في المتوسطة بخاف استاذ العربي اسمو بابكر الامام اها مرة زانقنا في المبتداء والخبر ..لمن الدور وصل صاحبنا نجم الدين وقف علي حيلو يرجف وقال جملة(الوصب ارب في جسمه)الاستاذ قال ليه يعني شنو : رد نجم الدين والله ما عارف معناها جات كدة بس ...
هسي انا دا اقر بأنني في محل نجم الدين ما قدرت افهم لا عنوان البوست ولا متنه ..بس شايف الناس منداحين ...
واحد من الخيارين يا انا ما وصلت مرحلة فهم بعض الكتابات..
يا كمان برضو ما وصلت نفس المرحلة اعلاه...
اسف على المشانرة لكن علي الحلف دا الحاسي بيه ..
استمتعوا وانداحو في الدراسة البنيوية السايكلوجية للبغو ..
---------
مع وافر الاحترام لراعي البوست وضيوفه الكرام

غايتو دقة الوردت بعاليه بعرفها ، دقه بتومه حلاتها معدومه
ثم نحن نقول من تعاطي المكروه عمدا غير شك تعاطي الحرام

Quote: وبس....دي المريسة البكر قبل ما يرخوها بالموية

حبيبنا عثمان عوووضة سلام قالوا واحد كان قاعد فى بيت مريسة وبيشرب فى المريسة يجى يقعد من الصباح وبعدين الحاجة قالت ليه ياحاج
فى كسوف فى القمرة وقام قال ليها دة كله من عمايلكن رققتنها وطبنجتها موية العبار بقى كله موية هههههههههههه’/B]

هههههه
يا احمد حمودي والله طرايف الشراب
لو الزول باراها توديهو التوج
....
انت ما سمعت حكاية الراجل القاعد في
الانداية وجنبو صفيحة مريسة
جو تلاتة انفار طلبوا صفيحة. وقعدوا يشربو
واحد فيهم ملا العبار واداهو ليهو
يا زول صاحبنا قطع العبار ومسح شنبو
زي الما حصل شيئ
واحد شليق من الجماعة التلاتة قال ليهو
الصفيحة دي كملتها براك؟
قال ليهو ايوا
يا زول كيف الكلام دا
قال ليهو والله. توفيق من الله. ساي

إخلاص المشرف عليك الله ياخيلمن تلقي اتنين من الكرور في بوستطوالي دسي شهادك العربية وتعالي.....توم شنو ياخدقة حقتك القلتيها دي بضم الدالودقتنا. الفي بوسطينا دا بفتح الدالما تعملي فيها. البوسطي حق اسرة المشرفوتتأمري علينا😈😈........كان زعلتي بشاكلك. نحنا. الكرور اصلنا شتر....،،وبمناسبة انحنا ديزمان. في اوائل. التمانينات في ابو ظبيكانوا. الجماعين متشددين شوية في حكاية السكريازولة في واحد صاحبنا قبضوهو ليك واقف لمبةالمحقق قال ليه. انت شازب خمرة؟قال ليهو. ابدا واللهيا زول انا شامي ريحة خمرة ما تكضبابدا والله يا جنابو نحنا السودانيين اصلوريحتنا كدي😜

حبيبنا .. ود المشرف لك عاطر التحايا .. ولضيوفك الاكارم ..

ومشكور علي هذا الدرس الاخلاقي وعسي منه أن نستفيد .

بخصوص هذا وشئيآ من الا انا .

Quote: بغو عاطفي قيل ثم من ؟ قيل منى عشميق .. قيل ومن هي منى عشميق .. قال الله وبريمة أعلم ..

احكي وبمنتهي الصراحة لقد مارست في يوما .....
ما هذا البغو ! وندمت ومازلت نادمة . ولكني اخذت
دروس اخلاقية لاينسي ! وقررت بموجبها الكتير
اولها عدم ( البغو ) .

قصة ( البغو ) !!! واني نادمة .

في محل العمل ومعي هولنديتين واحد الزملاء من
امريكا الجنوبية من اهلنا السود من منطة تدعي ...
( سرنام ) فهو سرنامي .
استاذن اثناء العمل لكي يذهب الي ( المرحاض )
باعلي صوته فسمناهو جميعآ .
وبعد فترة ليست بالقصيرة من تاخيره وفي همس
من الهولنديتين وبي لغة بمنتهي الآدب والرقة انه
تاخر فالواجب ارسال احد الزملاء من القسم التاني
لتفقده ! حقيقة اصبت بي هجمة وقلت ليهم ليه ؟؟!
وتحسست جدآ جدآ لانه اول مرة يمر علي موضوع
دا !!! فاجابت بمنتهي الايمان الفطري :
احتمال يكون اتوفي !
حقيقة في اللحظة دي ما تتخيلوا اصيبت بشنو ؟؟؟
بس خلوها مغطية .

وموش كدا وبس !
بعد كم يوم وبعد ما انتهي يوم العمل وانا طالعة لقيتهم
الاتنين في عربيتها بتبادلوا في القبل تراهم عملوا علاقة
مع بعض .. وبت نفيسة كانت الباغية علي العواطف .
عليكم الله في بغو اكتر من كدا ؟
ومن اليوم داك بعدت بعيييييييد وعملت شخيت .

وحذركم ثم حذراكم من ( بغو العنصرية والعواطف ) .

ولكم جميعآ وللزول السمح ود المشرف وافر
الود والمحبة ,,,


ودمتم ,,,,

آسف عذرا

Quote: والموقف البيحكى عن الامام احمد انه قال لبعض الملاحدة الحاميك تسلم شنو قال ليه انكم بتحدو في الخمر قال ليه انت بس اسلم وما عليك لما اسلم قال ليه انت الان اسلمت لو شربت حددناك ولو ارتديت قتلناك دا اول حاجة انا اشكك في وروده من الامام احمد

يا أحمد دا قطعاً كلآم خارم بارم عن الإمام أحمد .
عارف، مرّة رِكِب معاي وآحد من الخواجات ديل يا زول شبعان جد وآقف زُمبارة،
أها فتح معاي ونسة ؤ سعلني، إنت مسلم ؟. قُتلو، نعم . قال لي، عارف، انا أصلي
ما عندي شكك في الإسلآم دا بمِزقال ظرّة إنو الدين الحق، وإيماني بيهو قاطع تب.
قُتلو، سمح الحاميك تسلم شنو ؟.
قال لي، يا زول انا الخمرة دي بلآها تب ما ببقى، والإسلآم بيقول حرام .
قُتلو، اقولك ؟.
قال لي، أها .
قُتلو، اسلِم يا زول وإتلطَّ زي ما داير .
أها، فارقتو ؤ فارقني لي يوم الليلة البِقت عليهو ما بعرفا ...

بت عشميق ازيك أمي😜😜😜

عثمان عووضة





ريحتك طقت ،
عملت لي شنو في معجم الكوايتة ؟
،،،،،،،





عزالدين عباس الفحل
ابوظبي

Quote: بت عشميق ازيك أمي

حبابك حبيب قلبي عووضة .. لعلك طيبة بوي انا ؟

كيف الكلام ده يا عادل امين

Quote: بالله بوست من اوله لي اخره ما فيه كلمة ديموقراطية او فدرالية او اشتراكية او حتى المحكمة الدستورية العليا.

هسّى العدالة الاجتماعية فى طريقة شرابو ما ملت عينك
و حرّية الحوار و التعبير تلقاها وين غير فى القعدات دى
و اشتراكية تمن الصفيحة دى ما لاقتك فى البوست ده
و الفرد فى خدمة الشلّة و الشلّة فى خدمة الدولة
و القرعة مجراها اليمين ده مش التزام كامل الدستور و روح القانون
ديل مش بعض مطالب الثوار و الحركة الشعبية تحديدا
بعد ده تقول انصرافى
انصرافى انتا ياااخ
___
و اجمل الشوشوات فى الاصطباحات
و اصطباحة مباركة يا نمرة تلاتة
___
قال تكحيلة قال
اسمها تفديرة
تعرف يا حمد لبد فى واحدين يجو يكحلوها يعموها

يا زول تفديرة انت قايلها لدغة
عقرب
اففففف
الله يحيبك يا نمرة عشرة

شنو ياجماعة
نحول للدكاي ولا الكلام دا كيف😈😈

دكاي شنو بعد صلينا العشاء قول كلام غير دا

كتب علي دفع الله

Quote: بعد مداخلة حمد بداء البوست ياخد منحى التحدث عن المريسة

زي العايز تقول البوست انحرف بمداخلتي
خليك منصف يا جميل بعد مداخلتي في قريب عشرة مداخلات ما فيهن سيرة مريسة

حتى مداخلتي عرفت فيها البغو بس والباقي ضمنيا ما قصدت بيهو المريسة وانما قصدت بيهو مزالق الحوار في سودانيز

عموما ما عناهو مشرف حدث تماما في البوست من ود وانسياب لمداخلات وتناول (حتى للمريسة) بدون التعرض لشخص باستثناء المخاشنة بينو وأبو بكر ودي كانت (محتقبة) من سالف الزمان

هذه قصة حقيقية
الراجل جنو شراب ومكره ام عيالو . يجي لط لا بفرز صرفا ولا عدلا .. خاشي البيت يلغلغ ويلم منابيذ في المرة
اها مرة ام عيالو تفتق ذهن جارتها علي خطة مجربة .. واقنعت زوجة زولنا تطبقها
بدل تخش الحمام تقعد في القصرية من الصباح وتلم عذرة اليوم كلو
زولنا جا خاشي البيت هبايب الصباح .. وانجدع نام
لامن غرق في النوم تب .. حلت تكة سروالو وكبت ليها العذرة بي ورا السروال ونامت
صحت قبلو . وصحتو .. وبدت تدق الكواريك
سكتها وحلفها
قالت ليهو
والله ما اسكت مفرج فيني ناس الحلة يوماتي الا الليلة افرج فيك خلقو .. يا راجل يا عايب يا خايب كمان حصلت تنزرق في هدومك ما بتخجل
وزولنا يتحلف
استريني يا فلانة .. استريني
هو انت زمان سترتني لامن استرك
زولنا يتحلف وقال تاب توبة عبدا عاصي . وتاني الشراب دة بي درب وهو بي درب
اخذت منه مواثيق مغلظة بالتوبة حتي وافقت حضرت ليهو موية الحمام وقعدت في هدمو غسلتها
سألتي محدثتي وكان عمها
اها تاب
قالت لي كيف ما بتوب
كلمتو
لا لا اصلو ما جابت ليهو سيرة

Quote: هسّى العدالة الاجتماعية فى طريقة شرابو ما ملت عينك و حرّية الحوار و التعبير تلقاها وين غير فى القعدات دى و اشتراكية تمن الصفيحة دى ما لاقتك فى البوست ده و الفرد فى خدمة الشلّة و الشلّة فى خدمة الدولة و القرعة مجراها اليمين ده مش التزام كامل الدستور و روح القانون ديل مش بعض مطالب الثوار و الحركة الشعبية تحديدا بعد ده تقول انصرافى انصرافى انتا ياااخ

تعرف يا جلال....الفرق بين وعي البطة ووعي النسر...والبطة لمن تعمل فيها نسر ومقرم وبتاع مرايس من الضهاري
الصراع بين المركز والهامش مستمر والله ذى ونستكم البايحة دي تنفع في لواتس اب او ايام لها ايقاع في فضائية ام درمان (ذى دق الحلاوة) متكيفين ليها انتو بس ...وحسين خوجلي كمان --نفس الشيء
ويا مشرف عشان تهزم اولاد تالضاهري وتعمق ثقافتك الخندريسية
امشي اقرى كتاب الانداية لابن الدامر لراحل الطيب محمد الطيب واقشر لينا بي اولادالخرطوم بس
بعدين يا ربع الدماغ يا جلادونا لو عودت دماغك على هذا الهذيان حينتهي وترجع وتكون شمبنازي فقط ومن الثديات العليا وحتى الشمبنازي ممكن يعزف كمان ويسوق موطر في السيرك

Quote: غايتو يا ناس سودانيز البتدوروه بتقشو ليه الدرب..والبتابوه بتوسسو ليه الكلب...

شكرا يا علي ..
وشهوة ان تكون المودة في عزها واضحة يا عملات البرغوثي ..


البنيوية وما بعدها سخرية متعمدة من مسالة حذف البوستات .. ولو كنت ممن بتدور الناس, كان ذلك ميسورا يا زميل.

حمد لبد ..
ما عارف اقول ليك شنو ..
عليك البغو ..
وساعدها الاسمر ..
وذاك النشيد ..

او كما قال ايوب مصطفى.

كتب عمر التاج ..
دونما تبني اعمي وحتى ينجلي الخيط الابيض من الاسود
يحيلنا للجنقو بالاتي نصه:

تحياتي لك أيها المشرف .. هذه المداخلة كتبتها في بوست اخ كريم فمحيت من الوجود، ثم فتحت بها بوستا باسم (مايخرج من السيدين) فذهب البوست ادراج جهنم، وكتبتها في بوست جديد بعنوان (مايخرج من السفيهين) فتجمد وانكفأ في زنزانته يحرسه القفل، وها أنذا أساهم بها خيط من هنا وأعنونها (البغو.. مسامير المنبر) حتى لاتذهب بالبوست، ولاجعله حضنا آمناً لحفظ المشاهد لوقت الحوجة الشديدة إليها ..
المتتبع لما بثه السفيهان في الأسفير مؤخرا يدرك تماما أن كتاباتهما لم تكن مجرد طقطقة أصابع للتسلية ولا بعض فساء يفسد هواء المنبر الطلق، كما أن أفرازاتهما المتأخرة ليست وليدة كتمة مغص عابر أو ردة فعل لمداخلة أو تشبيه ، بل هو طبع متحكم مغروس في أحشائهما منذ أمد بعيد، طفقا يخرجانه بين الحين والآخر كضراط بعير سقيم.
السفيه الأول مدعي شهادات الزور لم نر له من شهاداته واهتماماته غير أذية الناس ووصفهم بسمج الحديث وتخاريف القول والوصف، فلا يخرج الكلام من جوف كيبورده إلا كاسهال نتن الرائحة كريه المنظر، لايحمل للقارئ غير سوء الطوية وقبح العنصرية و الاستهزاء بالناس والأعراق، ولقد بلغ به تجاوز الناس عن ترهاته شأوا بعيدا، حتى طال به أمد الاستحقار أن يخوض في أعراض الرجال ونسائهم، أما حديثه في السياسة فكان يأينا موبوءا كطنين بعوضة في سروال، يحشر كل معاناة الوطن الخارطة في مثلث ضيق يخيطه هو مفصلا على ادعاءاته، يطارد به الرجال ويرمي به النساء ولايقبل في ذلك نصح ناصح ولا حجة محتج، مثله في ذلك كمثل الغراب ان تحمل عليه يجفل وان تتركه يلهث بتاريخ مزيف للجعليين ومكوكهم، فما أحقره من فكر لايشبه منابر الحوار التي عنوانها سياسة حاضرة أفسدها أهله بالاشتراك مع طقمة البغي والقهر.
السفيه الثاني متعدد الاحداثيات العنصرية يضمرها طوية ولكنها تبين مع أحاديث سياستة السمجة، لا نحاول أن نبخسه اهتماماته الأدبية والفنية المتعلقة بتراث أهله، ولا يعنينا في شئ قناعاته السياسية وانتماءاته الفكرية أو ما يدعيه، إلا أن تغليف ذللك بورق الخساسة والنخاسة لا يمنع فواح نتانتها من كتاباته هنا، ولا يعفينا ذلك من الرد عليه بسفه القول- أن جنح لها- بغير سد.
حديثنا هذا ليس مجرد تعقيب على حدث، ولا ردة فعل على وصف أطلقه السفهاء على الشرفاء، ولكنه رسالة بائنة لأمثال السفيهين أن منابر الأسافير لا تحتمل نزاعات القبلية والعنصرية، وأن التنابذ بألقاب النساء والقبائل ليس مجرد هواء يلطلق في الأسافير، ولكنه خنجر مسموم إذا مس العرض والشرف لايمسحه غير الدم، وأن كل مايخرج من هذين السفيهين انما هو من مبطلات الكلام في المنابر والتحاور فيها.

كنا حداشر ونوباوية !!

و ال 10 المبشرين .. و
حكايات لم تثمر ..

تعرف يا معاوية ود المدير ..
المدنية فضيلة غائبة يا ابن عمي ..
لم تبدأ بجورج مشرقي .. ولم تنتهي باستار بكس .. ولا يمكن اختصارها بالكوكاكولا ...

ما للهوى وطن يا صديقي

ليست انعام يا صديقي واستاذي عووضه ..
هي اخلاص عمتي .. اخلاص بت عبدالرحمن كما يطيب لنا ..

انعام دي منو ؟
اعترف !!!

يا زول الجاب سيرة انعام منو هسي
الواحد فيكم يمشي يلطش ليهو عبارين
بغو ويجي محوص ما شايف الكتابة يقعد يبهت الناس😈😈
.....
صلحتها عليك كتاب الدين ما تكلما

تحياتى يا دكتور ولكل المشاركين
كان يجاورنا السكن وبيوتنا فى ذلك الزمان الماهل مبنيه من القش و الطين كمعظم بنيان اهل القضارف
كنا صغارا ننتقل بشقاوه وسلاسه بين الحيشان خلال ثقوب صغيره فى الصرفان *
لم نعلم عنه الكثير سوى أنه من غرب السودان عرفته بيقين طفل اخضر القلب لم تقلقه اسئله وجوديه ومشاعر وعره تجتاح اركان الروح دون استئذان ودون رأفه
كانت لجدنا شنكنتى كما نخاطبه تأدبا طقوس يوميه لا تتغير
فى كل مساء يجتمع فى قطيته جمع صغير من اهله و اصحابه يسكنون معه لا نسمعهم إلا فى اليل و يختفون مع الصباح الباكر بين النور و الظلام متوجهين إلى اعمال و أشغال تقيم أود حياه بسيطه منتقاه بخيار ربما يكون مبهم لمن يقف على ظاهر المشهد ولعلى وانا فى زمان مختلف وتجربة مختلفه احس بتفهم اكبر للجد القادم من الغرب البعيد كانت عبارات الترحبب تجرى على لسانه فى سجع فصيح على قله كلامه
تتداعى هذا الذكريات مشبوبه بأسى لايفارقنى لعلى كنت اتمنى ان اقف على حقيقه هذا اليقين واقبض من قبس تلك الايام بادراك ما بعد الطفوله وان كانت بصيره الطفوله أعلى مقاما
فى كل مساء يجتمعون فى تلك القطيه
يتوسطهم شيخ شنكنتى ضعيف البصر وديع الملامح
فى ذلك المكان وفى زمانهم المعلوم يشربون ما يشربون من( بغو) و يقرؤون قرآن لو سمعه الطير لوقف مأخوذ الفؤاد مسمر النظر مشغول بحال عن حال
شيخ شنكنتى اختفى فجاءه من ذاكره طفولتي حينها كنت بين الرابعه و الخامسه من عمري
لم يحول صغر سنى أن ادرك صلاح حاله وعلو مقامه فقد كان ساطع بينا من غير جهد و فخر
رحم الله جدنا شنكنتى ذهبت معه ايام الطمأنينة وصفاء السخيمه
اجتمع الناس على قيم راسخه ومحبه ناصعه
تاكلت أطرافها و تصلب قلبها فى زماننا هذا
*
الصرفان جمع صريف وهو سور من القصب ويسمى قاطوع إذا كان داخل الحوش كفاصل بين بيت الرجال و النساء

كويس انو البوست رجع لمسارو الأول؛ برفع صاحب البوست لمداخلة عمر التاج من الفيس بوك.
هذه المداخلة مليانة تعدي على الغالي واسماعيل وهي تشبه تعدي المشرف على محاوريه حينما لا تعجبه كتاباتهم!!
نعم يا سيد مشرف، مداخلتي قصدت منها تبيان تناقضك في نقد بريمة، أرى من خلال انفعالاتك انك لا تملك الكفاءة -كذلك عمر التاج من الفيس بوك- في توجيه الارشاد للمتحاورين.
انت ترى في كوني عملت هاي لايت في جزء من حوارك مع عادل أمين بانني راعي فتنة وأستحق أن أوصف بالتعر صة؟؟
كأنك داير تقول لي: المفروض تمشيها لي!!
حاليا انت فتحت هذا البوست لتحليل اسباب انحدار الحوار، واردت ان تأتي ببريمة كمثال في تعديه على كثيرين بوصفهم بالكرور،
بريمة غلطان ويستطيع أن يقول ذلك ويعترف
لكن محمد المشرف لن ينزل من البلكونة حتى لو كان شارب بغو
ويا عمر تاج، وصفك للاخوان بالسفه؛ تعدي لا يقل عن تعديهم

بوست حناكيش ومريسة :)

اكان فيهو تمثيـل واقعي لمراد قائل العبارة اولاً فياهي مداخلات اخونا المستنير بلا لمبة دا

بس حسب ما فهمتو من شرح العبارة اعلاه من اخونا المرَاسة جازاهم الله خيراً انه البغو فيهو فائـدة عظيـمة ومنفعة للشاربيـن .. وفي الحالة دي لا يصح الوصف أعلاه في حق مداخلات اخونا المستنير :)



ــــــــــــــــــــــــــــــ

..

يا حيدر الزين نحنا كرور الدناقلة ناس
دكاي ساي محمد سيدنا
لا بنعرف بغو لا مريسة
قول الدكاي حرام كمان

سلامات عمنا عثمان عووضة ..
القال منو :) :)

أول مداخلة وقفتني في البوست بتاعت علي الفكي بيسال الجميعابي :)
صراحة حتى مقدمة ود المشرف الفخيـمة دي مريت عليها مرور كرور ساي.. كلام مثقفاتية :) :)

قبل ما اجي القي " بغي " المستنير واكسل انسخ المداخلات تاني كنت عاوز اقول للحنكوش ود الفكي قدامك عمك ابشنبات دا في المدينة وتستفتي حنكوش آخر :)


طيب اكان بتعرفو المريسة اكان كتبت شنو تاني

Quote: المهم المريسة انا زولا و بريدا باعتبار ما كان و اي زول ضاقا شهوته ليها ما بتنقطع خصوصا اكان لقيتلك (دقة) عمك عووضة دا ما يزيد فوق فت عبار عشان هو من فصيلة (الكرور) و انا خايف عليه

Quote: يعني جلد السوط بزيد شهية الزول للمريسه ولا الدقة دي جايه من شكله ويكون كل ما عملت شكله بتزيد رغبتك في الاستزادة من المريسة اشرح وبين يا جميعابي

بعدين لقيت شرحك الفخيم .. واخدت لي سرحة كدة واترحمت على الخالة أكوت مشرفة الكلنك في النشيشيبة.. :)

كانت بتبر الطلبة الراقدين بالملاريا خاصة إن كانوا من زبائن الليل حقها بجكاكة الدقة.. وتقول لهم اخير لكم من حقن عم إدريس ..!

رحمها الله كان معروفها كبير جداً في الطلبة عند الغاء مجانية التعليم ..!
خاصة زي مدن هامش ما مؤهلة لإستضافة ناس زي مدني دي كدة :)

اولا. يا. حيدروف الجميعابي وعلي الفكي
ديل مستجدين في الكرورة ما تضيع وقتك
معاهم
بعدين ياخي شارح البغو والمريسة
ليس بغواتي ولا. مراسي
ثم ثالثا ويمين الله. نحنا كان ما بلينا
الدكاي لا في زول بيتطهر لا في عرس
بيقوم
بعدين سكرة الدكاي ما تفك منك الا بعد
العرسان يجو من. شهر العسل او ود الطهور
يخطبو ليهو،،،ايهما أبعد😜😜

Quote: ويا عمر تاج، وصفك للاخوان بالسفه؛ تعدي لا يقل عن تعديهم

شوفو المسخوت و شوفو لولوتو
زول يقول لى زميلة يا عاهرة لمّا يقولو ليهو سفيه يبقى تعدّى
و لمّا يجى بريمة و يصف الناس الوقفو فى وش صديق بالكرور
و يقولو ليهو علطان يبقى ده تعدّى
و لمّا تجى انتا تصفنا بالرجرجه دى حاجة عادية وحقيقة مستنيرة لا تقبل الظلامية
عشان قلنا ليك ألتزم جانب الادب و انت تتناول رموز نكن لها التقدير و الاحترام
و وصلت بيك الجرأة فى السخرية و الاستهزاء بأن تصف رب العزّة و الجلالة بالزول ده
ياخى حرام عليك
لمّا تكتب كلام زى ده

Quote: درب زي دا ما ممكن تشوف فيهو ناس الشغيل وجلادونا وبقية الرجرجة.

و تانى تكتب زى ده

Quote: في ردّة فعل بريمة لموازرة الغالي، طلع ليهو لستة "كرور" ضمت معاوية الزبير

و معاها دى

Quote: المهم يا كبر، دايرين منك وساطة تسمح ببقرنت (جعله بقاري) معاوية الزبير.

يعنى انتا موافق على اللستة لكن معترض على وجود ابن الزبير فيها
و يبّرك استاذنا كبر فى مجاملة استنارية بحتة بقوله فى حق من استنكر وصفنا بالكرور
و فى من فينا اخونا معاوية الزبير

Quote: اما في بوست البغو..اشهد انو محمد حيدر المشرف مرق من علبو ..وبقى من الناس الركبوا الطرورة..الله يجازي محنك يا

ثم تأتى لترد على زميل استنكر وصفنا بالرجرجة بقولك

Quote: يا زبير، بهظر مع الرجرجة ديل ساكت.

ياخى تانى حرام عليك
الداير اقولو شنو .. ابقى عشرة على شعرة معاوية دى
لأنها لو انقطعت .. محسوبك احسن زول بيعرف يفرم الخدرة و خاستن الدقاقة
اوعاك تجى تقول ده تهديد .. ده حق رد كفلو القانون
حتى اسأل استاذنا كبر

و طبعا بالتأكيد ما ناسى نعتك لى بى قلة الادب

يا جلال، أنا مستعد أناقش وأعترف بالتعدي على الآخرين، لمان أطرح نفسي مصلح.
بمعنى، لو جيت فتحت بوست للاصلاح لازم اشمل نفسي.
دي فرصة أقول:
وصفي للناس بالرجرجة لا تخلو من محاولة مني للتظارف زي ما قال عثمان محمد صالح، وهي نوع من التحفيز كما أراهو وقد أكون مخطي
سوف اسحب وصفك بالرجرجة مستقبلا واتعامل مع رسميا في المخاطبة واعتذر عن الضرر

ما متذكر وصفتك بقلة الأدب بسكل جادي، لكن لو حصل، دا ياهو فكرة مداخلتي الأولى:
كلنا ننفعل ونتجاوز الحدود وليس بريمة أو الغالي
عليك آمون يا جلال، أقرأ فكرة المداخلات قبل المشاركة

د. ابوبكر ..

عندما تمسك الكيبورد وتكتب باحترام ستلقى الاحترام اللازم الذي نحمله لكل الذين يخالفوننا في الرأى ..

مسألة الكتابة باحترام ليست بتلك الصعوبة ..
لا تسخر من الناس .. لا تمارس الاستهزاء .. لا تتظارف دون مقومات التظارف الحقيقية .. ثم ولا تجعل من التظارف مواراة والتفاف عن قدرات مافيشه .. لست محسن خالد ولن تكون حسن موسى في يوم من الايام .. ممكن تخلى ملاسي مثلا كتارقت .. وممكن تحصلو وممكن ما تحصلو آ زول ..

الباقي كلو هين ..

..

المقدمة يا حيدر الزين ولا فخيمة ولا حاجه وما فيها ذرة ثقافة.. هي خستكه ليس الا من مسالة حذف البوستات وكتبت بخلفية حذف بوست للزميل معاوية الزبير ..

يا جماعة والله كمية مداخلات كتيرة وجيدة .. بعضها اجود واجمل من ا تكون في هذا البوست ..

فكتر خيركم عليها يا شباب ويا شابات ..

البوست يا شباب خستكة ساكت لا يخلو من مضمون التضامن البسيط مع اصحاب تلك اللسته ومن السخرية من مسالة حذف البوستات الموجهه للادارة كبوست معاوية الزبير التذي تم حذفه .. لذلك جاء العنوان تلتيق ساكت من غير معنى حقيقي ولم يتعرض البوست للحذف الاداري !! الرسالة وصلت حير وبركة .. ما وصلت ما مشكلة نهائي .. وصلت ل 6 بس من اللسته فذلك نجاح في حد ذاتو .. شخصيا اجدني لست راضيا الى حد ما من افتراع البوست.

كونوا جميعا بخير ...
ونلتقيكم في بوستات اخرى ونعد بتوفير موصلات بعد العرض

يا ابوبكر بن عباس
كان الامر علينا قول الدايرو و اتظارف و استهزأ بينا زى ما عايز
بس لمّا تتناول معتقداتنا اتناولا بى جدية و اطرح كل وجهات نظرك بى مسئولية
عشان تجيك الردود بى مسئولية من اهل العلم
و تستفيد و يستفيد و استفيد و الغير يستفيد برضو
لكن السخرية البتمارسا فى الحتة دى ما حبابا ياخ
بعدين الاديان ديل تلاتة ياخ
يهودية و مسيحية و اسلام
و الكتب
تلمود و زبور و توارة و انجيل و قرءان
و الرسل
موسى كليم الله
و عيسى الما اتولد من ضهر راجل
و محمد الامىّ الامين
استنارتك خلت ديل كوووولهم و مسكت بس فى محمدنا و قرءانا و اسلامنا
لكن استنارتك حقّارة يااخ !!
عموما حصل خير يا .. زول ,, و العفو لى آمون
و شالوم

سمح وقت البوست طلع خستكة...
زووووط يا وصيفاب هاكم الامل الضيع الامل دا
زووووط تاني هاكم بشة دا

😀😀😀😀😀

فوق لحين ميسرة

ميسرة دا ود اختى

هو الشاي ذاتو برد
يعني شنو اكان ضاع الامل

Quote: سمح وقت البوست طلع خستكة...زووووط يا وصيفاب هاكم الامل الضيع الامل دازووووط تاني هاكم بشة دا

وووووووووووووب حي عديل غايتو الامل ده بقى لينا زي اكل السمك بالليل والكهربة قاطعة والزوووواط ود البشرى بقى لي زي طارق بتاع سوق مدني يكورك ليك هوووويا هوووويا ويديك الزوط باشارة يدوية تاكلا على اللباد معاك الجن اللحمر بي اصفر بزوووطك ]

وين. يا ح ب (ي) يا كرور😜

انتو البوستك دة عن شنو بالضبط

Quote: وين. يا ح ب (ي) يا كرور

مرحبا ياعوووضة كيفنك ضربتا لي كورية بغو وبسمع في الخدير انا ماحي النقدو الطير ماني حي بس بعد اصحا كلموني مانقوم نسلح في سروالنا وتبقى علينا توبة زول عبد الحفيظ
بس لو سلحتا برو بشرب لامن امشي البلد دكاييي مدفون طرف البحر في اريينكونج

أمل كتبت وبدر قرأ ود البشرى قاعد في محل البغو الأصلي
هاكم بشة دا


عثمان وحامد بالله أدونا نبذة عن الدكاي والله صحي

Quote: عثمان وحامد بالله أدونا نبذة عن الدكاي والله صحي

مرحبا اخوي حمد ومساك عافية وجركن دكاي صافي
الدكاي مشروب محلى تجيب جركانة وقيراط تمر ووقية ونص خميرة فوق البلح وتتمها موية وتنتظر خمسة ستة يوم حسب السخانة
بعدها تصفي وتقرطع
في المناسبات في ناس بزيدو التخميرة وبدفنو الجركن طرف البحر عشان يعتق وبعملو منو نوعين واحد خفيف للفقراء وواحد تقيل لي ناس هييييييييييق جيبي نوص
في عرس كده جا مولانا طابق كتبو وكتب العقد والزغاريد اشتغلت قام واحد قال من فسسسسلتون (من حق الفقرا الماسخ ) جيبو كورة للماذون في واحد شقي حال مشى مخصوص عبا ليو من الجركانة بتاعت ناس هييييييييييق مخمر بالرطانة نرررررررررررلتون عمك الملا قطع الكورة احححححححححححححححح لامن عيونو اتقلوظو وقال اللللاح فسسسسسسقا اونقا يقصد المسيخ المابلف الراس الشرعي وحلال من كرسييييو قام يخيييت في الشارع لانو ضربو العصيير على جوع طبعا على جوع تجررري البحر بي السروال الداخلي وتغني نارية في جسمي
اسمع اتا بتسعل ليييي شنو ماتقوم تشيلنا ذنب المشير اليها الحمد لله ناس طريقة التحضير ماذكروهم بي شئ

يا ابو علاء زمان في سفرة. الجامعة
ساعة الغداء كنا بنجيب سفرة كبيرة نقطع
فيها الرغيف. او الكسرة ونكب فوقو الملاح والسلطة
والرز او المكرونة والحاجة الحلوة اكان كاستر ولا باسطة
ومرات. بتيخ ولا موز
وعينك ما تشوف الا النور
اها البوست دا. زي سفرتنا القلتها ليك دي
عندك اي حاجة تجي تكبها هنا و لو في زول
سعلك تعال لومني

يعني يا عثمان اشيل واكب ساي .. امها مافي يعني 😉😉😉

آي مافي
كب كان بتقدر تكب😜😜

ودحيدر
كيفك ياصاحب
انت يامحمد البقة جاية من البغو ؟






تنهدات: نحمد لهذا البوست انه خالى من العميل دينق

عووضة امبس .. عندي كتابات عن البوقانا والدكاي والنبيت ..
عشان ما نطول .. سوف أنزل جزء منها :
=======================
أما ليالي القرية او الساقية ( أسكليه / كولييه ) فكانت تضج بمجموعات (البوقانا ) والمشروب المتداول في البوقانا هو ( الدكاي ) ولا يتم تناول الخمر ( عرقي التمر ) أطلاقاً في البوقانا لأن الاصل في البوقانا هو التواصل الاجتماعي والاسري وقضاء وقت للتواصل ، ولأن (عرقي التمر) له مضاعفات زائدة عن الحاجة ويجعل بعض شاربيه خارج السياق ويجلب المشاكل والخطأ فلا يجوز في قانون البوقانا تداوله ولأن مرتادي البوقانا من كل المستويات حتى كبار القوم والبعض كان يعتبر ( العرقي ) حرام قاطع ولكن الدكاي أخفف ضرراً بحكم التجربة والممارسة والتجريب وإعمال العقل كان من المرتكزات المهمة في المجتمع النوبي .. فقط المباح كان الدكاي لأن الدكاي مفعوله خيف وسكره نبيل وتأثيره على العقل لا يخرج من نطاق الفرحة والبهجة .. ربما لأن عرقي التمر فيه نوع من التخمير الزائد ثم التقطير .. والدكاي نسبة التخمير فيه وسط مع جمال طعمه ورائحته مقبوله وغير منفره ولا تفوح كما رائحة العرقي .. والدكاي كان سهل الصناعة .. ويتوقف طعم الدكاي وجودته على نوع التمر المستخدم وكلما كان طعم تمر ألذ كان المنتج أفضل ولا يستخدم البركاوي اوابتاموده او القنديلة .. كان هناك نوع خاص من التمر هو المفضل لهذه الصناعة وهو نوع غير مرغوب فيه للتسويق او الأكل وحباته سوداء اللون ( اوسميدان ) وتكون نخلة واحدة في الساقية لا يهتم بها أحد وما تعصف منه الريح لا يأكله البشر فقط البهائم ودائماً ما يتم عمل زريبة البهائم تحت ظل هذه النخلة .. ومحصولها وفير جداً وعلى درجة عالية حلاوة الطعم .. وبعد الغلي في الماء الساخن حتى تكون حبات التمر بدون أي طعم يخزن في ( كوبيه ) وهو زير فخاري تم الاستغناء عنه من ضمن منظومة تبريد الماء لأن الازيار ( فوكيه بالمحسية / قالو/ فووكا بدنقلاوية ) عندما تتقادم عمرها تحدث انسدادت لكل المسامات ولا تبرد الماء بفعل تراكم الاملاح وبعدها ينقل الزير الى مهمات أخرى كتخزين (البقوليات ، لوبيا وترمس ..الخ ) وتستخدم بعضها في مهمة الدكاي والنبيذ . ويتم يتفريغ الدكاي في ( كوبيه ) ويكفي تخزينه في الصيف لمدة ( خمسة ايام ) ليتخمر تماماً ..
وفي مكان البوقانا .. يتم جلب ( كوبيه ) ووضعه في منصف المجلس ثم يتم تصفية الدكاي من باقي التمر ( موشوق ) وفي بمصفى يسمى (أسكور) في مواعين كبيرة ثم يتم توزيعه على الحضور بمواعين اصغر تسمى ( دناد ) او القرعة بالعربية ، ويقوم الأصغر سناً من الموجودين بهذه المهمة

Quote: يا ابو علاء زمان في سفرة. الجامعة ساعة الغداء كنا بنجيب سفرة كبيرة نقطع فيها الرغيف. او الكسرة ونكب فوقو الملاح والسلطة والرز او المكرونة والحاجة الحلوة اكان كاستر ولا باسطة ومرات. بتيخ ولا موز وعينك ما تشوف الا النور اها البوست دا. زي سفرتنا القلتها ليك دي عندك اي حاجة تجي تكبها هنا و لو في زول سعلك تعال لومني

سلام عليكم عثمان عووضة , يا اخوى كلامك دة داير شرح , اول حاجة لما قلت الجامعة فقد عرفتها تب لانه اعتقد فى ذلك الزمان يكفى ان تقول الجامعة ليفهم محاوريك انك تعنى ام نخيل , لكن من ما قلت كسرة جهجهت على فهمى لانه طيلة قعادى فيها ما شفت لى كسرة حايمة فى السفرة , تانى حاجة كلمة سفرة كبيرة البتقطعوا فيها الرغيف دى شنو , بس ما تكون قاصد سفرة ناس الخليج البفرشوها للاكل لانه دى الناس هناك عرفوها فى الالفية دى , غايتو ان كنت قاصد بالجامعة جامعة قار يونس ولا جامعة محمد الخامس فانى اعتذر

ود المشرف تحايا تليق بيك وبضيوفك , اولا سامحنا على خمج المستنير الزول دة عنده شهوة عظيمة للمكاواة لكنه انسان جميل وودود ويا ريت ما تقطع معاه شعرة معاوية والاستعاضة عنها بالكيل بنفس مكياله

ياها جامعة الخرطوم يا احمد التجاني
يا ود امي
وشهودي د. بشری الفاضل و نور تاور وطلحة
السيد
والله كسرة الله والرسول ومرات بي بامية
مفروكة كان ما عجبك
ما عارف. انت اتخرجت. سنة كم لكين حكاية الكسرة
دي طعمها في خشمي لي. يوم. الليلة
والله اكل الجامعة كان في ناس بحردوا ليهو
الاجازة عديل
...
يا هندسة ياخي. افتح بوست. عن الجامعة زمان
خلينا نبكي شوية
...
آآي انا يدي محننات انت مالك. ومالي 😜😜😜

يا هندسة ياخ معليش الكبر حصل
انا قاصد الصينية
وزيادة علی الکبر اللخبتة حصلت
نحنا في. الشمالية الصينية بنقول. ليها
الصفرة

Quote: وشهودي د. بشری الفاضل و نور تاور وطلحة السيد والله كسرة الله والرسول ومرات بي بامية مفروكة كان ما عجبك ما عارف. انت اتخرجت. سنة كم

والله يا عثمان انا قديم لكن ما لدرجة ناس بشرى الفاضل ما فاضل ليك الا تقول لى ابو حسين كمان
اها عشان اقرب ليك الحكاية ود البشرى قرب يلحقنى فى الجامعة كان ما لحقنى عديل

بعدين كان عندنا بوست جميل ما خلينا فيه حاجة ما حكيناها عن الجامعة اسمه اليوم الحار , غايتو كان فتحنا بوست الا نحكى عن الجامعات المجاورة
المحيرنى ياخ كسرتكم دى كان بعوسوها فى الجامعة قبلها ولا كان بيعوسوها برة ويتلتلوها يجيبوها لحد عندكم

العلاقة بين البغو والبغي شنو
دا اذا افترضنا وجود جذر "عربي" للكلمة
عربي دي بتزهج الكرور هههه
تواضعوا حتى لا يبغي احد على احد
والبغي هنا التعالي
فهل البغو يتعالى فيها سطحها بسبب الفوار
ام تجعل شاربها يبغي "يتعالى ويظلم" غيره
ام تتجاوز الحد في العدل والانصاف "من معاني البغي ايضا"

اما لو كانت اصولها نوبية زي ما قال علي عبدالوهاب فيبقى كلامنا دا "بغو" ساي هههه
البغو برضو كلمة بتديك معنى الزبد الذي يذهب جفاء
والمريسة البغو برضو بتزبد

إنتقلت إلى رحاب ربها شقيقة معاويه المدير !!!!!!!!!!!!!!!!!!!؟؟؟؟؟؟؟؟؟؟؟؟؟؟؟؟

ياتا فِيهِن ؟؟؟؟؟؟؟؟؟؟؟؟؟؟؟؟
الله يديهِن الصحة والعافية .

الغيّر عنوان البوست مِنو ؟؟؟؟؟؟؟؟؟؟؟...

يا زول بطل اللولوة و مواعيد عرقوب
اتفاقنا قايم قايم
انا بعمل. واحد هنا وانت بهناك

احمد الشيخ ما تولع. النيرن ياخ
شنو الجاب البغاء هسي؟😜

عواسة شنو ياخي
كانوا. بجيبوها من برة.
كل كيس فيهو لفة(ما اللفة حقت ابو
حسين 😉)
ياخي. داك زمن بصحيح
كل يوم جمعة كان عندنا رحلة لجناين
شمبات. ولا. الكدرو ولا الجريف بي حرفاننا
و....نقطنا. والطباخين معانا.
والفنانين من خضر. بشير وزيدان وانت
طالع

يا ناس ما تورونا الحاصل شنو ؟.....
؟؟؟؟؟؟؟؟؟؟؟؟؟؟

يا بكري ابو بكر ما تفكنا من المصيبة دي ... مبروك لزروق قنصلا عاما بجدة وشكرا للقيادة السعودية مبروك لزروق قنصلا عاما بجدة وشكرا للقيادة السعودية

علي امبس ريلت بينا ياخ😜

آمنتووووو بالله
الزول ده سقيتو شنو
قعد يطربق كدى
شبكنى ليك وعى وقرد و بطّة متشعلقة في رقبة شمباتى
غايتو الله لا كسبّكم
جبتولينا النجيهة

جلالدونا يا حبي
كنت نايم وين. الزمن دا كلو
مشيت لقيت ام فتفت خلست ولا شنو

Quote: إنتقلت إلى رحاب ربها شقيقة معاويه المدير !!!!!!!!!!!!!!!!!!!؟؟؟؟؟؟؟؟؟؟؟؟؟؟؟؟ ياتا فِيهِن ؟؟؟؟؟؟؟؟؟؟؟؟؟؟؟؟ الله يديهِن الصحة والعافية . الغيّر عنوان البوست مِنو ؟؟؟؟؟؟؟؟؟؟؟...

الله يرحمها يا معاوية ويرحمهن جميعا
فعلا الآن لاحظت تغير العنوان في بعض المداخلات في هذا البوست وبوست قنصل السودان في جدة
وفي الحالتين بدأ التغيير بمداخلة للأخ أحمد التجاني أحمد

Quote: وفي الحالتين بدأ التغيير بمداخلة للأخ أحمد التجاني أحمد

اسال الله لها الرحمة و المغفرة , يبدو انه فى خلل فى جهازى او المتصفح الذى استخدمه بحيث لاحظت انه
هذا العنوان من بوست سابق شاركت به ما زال معلق فى كل المداخلات التى اشارك بها و فى الغالب لا انتبه لما هو مكتوب فى عنوان المداخلة
عذرا اخى ود المدير وكل الاخوة المتداخلين لهذا الخطا غير المقصود

اول شى الشكر لى ود المشرف
فالابداع يولد من تفاصيل حياتنا و ان كان منكرا
ثم برضو
للكرورابى الكبير
غاتس لى في جر بغو
مالك و مالى
تعرف الجر يا زووط الحنكوشى

اغتس ياخ
ان شاء الله تغتس في جر دكاي ذاتو
انا مالك ومالي😈😈

سلآم يا كرام .
ابداً أخي أحمد مافي خلل في جهازك والبوست بوست عزاء قديم، والعنوان
دا ظهر في عِدة بوستات لخطأ حصل لا أعرف كنهه . أسأل الله ان يتقبل
دعائكما أنت والأخ معاوية الزبير، والله أنا سعيد جداً لحدوث هذا الخطأ
نسبةً لأنه اتاح لي الفرصة لأستمتع بمحادثة الأخ الحبيب عثمان عووضة
الذي إتصل معزياً وهو الذي لفت نظري للعنوان، ومن ناحية أُخري
سعيد نسبةً لأنّ هذا الخطأ جعل الله سبحانه وتعالى يغيّض لأختي من
يدعو لها سائلاً إياه ان يستجيب .

أرجو ان تواصلوا في موضوع البوست، ولا تنسوها من صالح الدعاء
سائلاً الله ان يشملها بواسع رحمته وجميع موتاكم وموتي المسلمين .

واصلوا ولكم جميعاً محبتي ...