علل: المواضيع الهايفة تجد حظها من النقاش اكثر من غيرها

12:14 PM August, 11 2016

سودانيز اون لاين
عبدالعظيم مكى-
مكتبتى
رابط مختصر

لاحظت وقد يكون غيري قد لاحظ ان المواضيع الهايفة اكثر تداولا وتداخلا من غيرها. كثير من المواضيع الجادة لا تجد حظها من النقاش ولا تثير اهتمام الكثيرين.

عبد العظيم مكى
سلامات
والله ثم والله سبقتنى فى طرح السؤال ودى للاسف من الاشياء الغريبة
لدرجة ان الانسان الجاد يفقد الاهتمام بالكتابة فى المنبر غايتو اما الناس
سطحيين وده مستبعد واللا الاحباط بلغ فى الناس مبلغ خللاهم غير قادرين
على التفاعل الايجابى طرحا ونقاشا وده الارجح والله اعلم خاصة مع
وجود مكثف لكتاب انصرافيين من فصيلة الجهاد الالكترونى سودوا المنبر
ببوستات موجهة للناس الاصلا روحهم محرقاهم وهاك يا مداخلات.
وطبعا ده كلو يدخل فى الالهاء المتعمد للجماهير لصرف الناس عن
التفكير السليم .
الفاعل معروف والمفعول به غافل .

تحياتي الاخ عبدالله حسين
الغريبة ان معظم اعضاء هذا المنبر من اصحاب الوزن التقيل وكثير منهم يحملون درجات عليا. انا في ظني ان الكثيرين عندهم فراغ وعاوزين يملوهو وما اسهل ملء الفراغ بالمواضيع الغثائية.
البعض الاخر المنبر بالنسبة ليهم مكان ترويح وهولاء لن يجدو الترويح في مواضيع جادة وهادفة.

السيد عبد العظيم مكي،

اصبت يا اخ العرب في كل ماذهبت إليه. وكيف لحصيف مثلك ان يخطيء؟!.. وكان من المفروض على كل منشغل بسخيف المواضيع ان ينفض منها يده تاركا الجمل بماحمل ليفرغ للاسهام في موضوعك الهايف الاخير عن منجزات "الانقاذ" و الذي هو عنوان بارز لطأطأة الهامة وتمجيد السلطة المستبدة في الوطن، ويالها من طأطأة يستذل بها المرء نفسه خوفا او طمعا!.

Quote: اصبت يا اخ العرب في كل ماذهبت إليه. وكيف لحصيف مثلك ان يخطيء؟!.. وكان من المفروض على كل منشغل بسخيف المواضيع ان ينفض منها يده تاركا الجمل بماحمل ليفرغ للاسهام في موضوعك الهايف الاخير عن منجزات "الانقاذ" و الذي هو عنوان بارز لطأطأة الهامة وتمجيد السلطة المستبدة في الوطن، ويالها من طأطأة يستذل بها المرء نفسه خوفا او طمعا!.

الاخ عثمان
لك التحية

يا اخي اعد البصر كرتين في موضوعي انحازات واخفاقت الانقاذ عسى ولعل ان تفهم ما اصبو اليه فليس عندي فهامات كي افهم من ليس له القدرة على فهم ما بين السطور.
اتمنى ان نلتزم بموضوع المنشور : ما الذي يجعل المواضيع الهايفة والتافهة الاكثر تداولا وتعليقا.
تحياتي للجميع

سلام ياصاحب
غايتو انا الناس مقاشرة مواضيعى ماعارف عشان هايفة
ولَّا مكchننى غايتو المصبرنى على الاستمرار القراء كتار
الغريبة فى واحدين وكت اكتبى مداخلة فى بوستاتهم يحردوا البوست.
والبجاملنى يخاطبنى بـ (ياعمَّك) وواحدين يردوا على كل الناس ومداخلتى
يفوتوها حُوفَا.

الاخ عبدالعزيز

الناس بتقاشر المواضيع الجادة.
نزل ليك موضوع هايف وشوف عدد المداخلات مواضيع مثل:
1. كدة كدة يالترلة
2. كع كرع ولعت
3. بت سمحة سماح (صورة )
4. الكديس فنجط
5. ابو الزفت
عدد المداخلات حا تفوق الميات ههههه

فاضلابي يا (عمّك)
خليتني اتحسّس زي التكنّك قاصدني, لولا النت كعب هني كنت راجعت جميع مداخلاتك في بوستاتي و العكس عشان أتأكّد, لكن عموما إن بقى فعلا قاصدني فا اعفى مني و ادنّي خاترك
أكيد دون قصد إمتّا كسل أو غفلة

تحياتي عبد العظيم و معذرة على الإنصراف عن موضوع البوست

Quote: فاضلابي يا (عمّك) خليتني اتحسّس زي التكنّك قاصدني, لولا النت كعب هني كنت راجعت جميع مداخلاتك في بوستاتي و العكس عشان أتأكّد, لكن عموما إن بقى فعلا قاصدني فا اعفى مني و ادنّي خاترك أكيد دون قصد إمتّا كسل أو غفلة

لا حولاااااا ,, ياود البشرى ياخ انت كمان انا مابعرِف مخاطبتك لى معناتا شنو؟
غايتو انتهيت منى ,, ياخ انت مستثنى (بألف الاثنين) تقول الداير تقولو
حتى كان قلت لى ياجِدو ,, إنت كمان بزعلو منك ؟ انا كان ما خايف
من الاحراج كان كتبت اسم النفرين القاصدهم ,, بس تصدق وتامن ياود
البشرى الناس ديل كل سببهم معاى انى ما اتفقت معاهن فى الرأى
ومازلت احترمهم بس بقيت مابهوِّب ناحية بوستاتهم ,, وانت كان كنت
واحد منهم كان وقفت من بوستاتك ,,, تصدِّق يا ابو حتحوت ,, يومتا
كنت عاوز ادخل اشارك فى بوستك بتاع النكتة داك لكن لقيت واحد كاتب ليك كلام سخيف
عشان كده زعلت عشانك وحردت البوست وبرضو تقول لى قاصدك؟
ابو حتحوت قول كلام غير ده الله يرضى عليك ويديكن كاس من بره.

ياخوانا عَمَّك ابوحتحوت ده شاف مداخلتى الفوق دى؟
ولا داير يسوى لى سهر الجداد ولا نومو ,, اصلهن الرشاشات
ديل مابخلوا الواحد يغمِد ..

غايتو الاتنين ديل كان محسوبك ده واحد منّهم !
ليك اعتذار مفتوح تقول فيهو البرضى روحك
وحكاية ناس يجبّو مداخلاتك دى حاجة عادية فى حوشكم ده
عليك بالصبر .. باكر بجوك فى محلّك

فاضلابي ولدنا الجميل
ود البشرى ربما اعتقد ذلك لأنه - حسب متابعتي لكتاباته - اول من اجترح مفردة "ياعمك" في المنبر ده
انتو الاتنين ناس جميلين وموضوعيين كمان ربنا مايجيب بينكم سوء فهم
كويس انك اوضحت بانه ليس المقصود

Quote: غايتو الاتنين ديل كان محسوبك ده واحد منّهم

عاين المسحلب ده كمان ,, جننك ابوحسين بكترة اللف جاى تنشبك
فينى كمان,, تلقاها عند الغافِل ,, بعدين مسحلِب دى تنفع تضيفها
للقائمة بتاعتك ديك ولا ماتنفع ,, على الاقل نكون اخترعنا لينا شيئ
يذكرونا بيهو.
سلام يا حيدر
ودالبشرى زول جميل ,, لاعيب فيه غير انه رشاشة ,, وموضوعى جداً
بس حساس اكتر من اللازم وزى ماقال جلادونا المنبر ده عاوز زول جلدوا تخين بس من وين نجيب الجلد التخين؟

زادت المواضيع الهايفة في المنبر العام موضوعا وسنرى
تكالب البعض عليه تداخلا وردودا.
الحريف حا يعرف الموضوع من عنوانه.
تحياتي