اســــــــــتشـــــــــــارة كيبل؟

09:07 PM August, 07 2016

سودانيز اون لاين
عمر التاج-KSA
مكتبتى
رابط مختصر

السلام عليكم اخوة المنبر .. ملاكا وكتابا وقراءا وضيوفا .
أرجو السماح لي بطلب هذه الاستشارة من ذوي الخبرة والتجارب .. إذ أنني بحثت في أغلب المنتديات والمواقع ولم أجد سؤالا مشابها أو إجابة شافية..
أرغب في توصيل الكهرباء لمبنى جديد .. وجدت أن تكلفة التوصيل حسب تقديرات هيئة الكهرباء تتجاوز الـ48 مليون (قديم) 80% منها قيمة كيبل ارضي (وكمان ألمونيوم).
سألت عن الكوابل خارج السودان وعرفت أن أفضل الكوابل (النحاسية الممتازة) المستخدمة في أرقى العمارات لا يتجاوز قيمته 8 مليون، ولدي سيارة للترحيل .
عندما هممت بشراء الكيبل حذرني أحد الاخوة بأن إدارة الكهرباء في السودان لن تقبل باستخدام أي كيبل لا يشترى منهم .

الاستشارة المطلوبة: إذا كانت لدى أحدكم معرفة أو تجربة باستجلاب كيبل من الخارج للاستخدام الخاص ينورنا عن الموضوع وينوبه عنا وعن القراء خير الثواب.

عاد ما بسعلكم تاني يا ناس سودانيز
معقول مافي واحد من 100 الشاهدوا البوست عنده تجربة ولا مشهاد؟
قبل أيام شايف بوستات البناء والتشطيب تطاقش .
أس الواحد لو كان جلابي كان جبتو ليه مدير الكهرباء زاتوو.
المهم

سلام أخى عمر

فرغت من بناء منزلى فى العام 2004 ، أذكر أننى اشــتريت الكابل بنفسى ، الكابل كان طوله حوالى عــشرين مترا(من العمود و حتى الطبلون داخل المنزل)
يعنى حتى العام 2004 ما كان الزاميا أن تـشــترى الكابل من شركة الكهرباء، لســت متأكدا إن كان هذا قد تغير و صار لزاما على الشخص أن يشــترى منهم الكابل.

لكى تكون مطمئنا أرى أن تتصل عليهم تلفونيا أو تكلف أحدا من معارفك بالســودان ليســتفســر عن الأمر قبل أن تشــرع فى الشــراء

مودتى.....

شكرا اخ عثمان على الفكرة ..

Quote: فرغت من بناء منزلى فى العام 2004 ، أذكر أننى اشــتريت الكابل بنفسى ، الكابل كان طوله حوالى عــشرين مترا(من العمود و حتى الطبلون داخل المنزل) يعنى حتى العام 2004 ما كان الزاميا أن تـشــترى الكابل من شركة الكهرباء، لســت متأكدا إن كان هذا قد تغير و صار لزاما على الشخص أن يشــترى منهم الكابل. لكى تكون مطمئنا أرى أن تتصل عليهم تلفونيا أو تكلف أحدا من معارفك بالســودان ليســتفســر عن الأمر قبل أن تشــرع فى الشــراء

الكيبل الذي احتاج أطول بكثير مما وصفته لبيتك .. وموظفي الكهرباء وصلهم مندوب مني ووجهوه لشركة الكهرباء لشراء الكيبل بهذا المبلغ الخرافي.
وعرفت منه أن الشركة هي المحتكر الوحيد لمستلزمات التوصيل في السودان .. لذا قررت أن أوفر الكيبل بنفسي وبافضل المواصفات الخليجية.
مشكلة إدارة الكهرباء أنهم يتعاملون في وظائفهم بصورة سوقية مجحفة ..
قبل عامين زاروا لي موقع آخر وطلبوا مني شراء ثلاثة أعمدة بأسلاكهم حتى تصل الكهرباء ذلك المبنى ..هذا غير رسوم التوصيل .. التكلفة فاقت العشرين مليونا.
والمشكلة أن الاعمدة لا تشترى إلا منهم ... وبعد أن تشتريها تلزم بالتنازل عنها للشركة لتحصد قيمتها مرة أخرى من الزبائن الجدد الذين يطلبون التوصيل من أعمدتك لاحقا ..

تحايا وشكر للزميل خالد على الرسالة ..
سأقوم بما طلبت عسى ان أجد حلا .

سلام عليكم يا عمر التاجالسودان بلد بلا قانون ولا رحمه ، اذا عندك استعداد تدفع رشوة يمكنك احضاره من الخارج بأفضل من مواصفات الداخل وتستطيع أن تستخدمه ، الشيء الثاني الأكثر تسهيلا وضع قبيلتك فى خارطة السودان ، قد تستغرب على هذا القول والله عدت منذ أسبوع من جدة ووجدت اخوة قدموا من السودان وحكوا لي تجاربهم ولولا قبيلتهم لما خرجوا من السودان . أرد اليك كسائل عن أفضل الحلول ، فاذا كنت جعلي أو شايقي أو دنقلاوي لا خوف عليك حتى لو تأتي به من جزر الواق واق خاصة فى الخرطوم ، أما الولايات فليس للحكومة سطوة والسطوة هي سطوة القبيلة أقول هذا وأشهد الله على ما مررت به من تجربة شخصية دفعتني للخروج من السودان ، جاء رجال أمن من منطقة حجر الطير لاعتقالي وسط أفراد قبيلتي وفى النهاية أنا الوحيد الذى خلصتهم منهم .عفوا للاطالة ولكن هذا هو الواقع الآن ، "قل لي قبيلتك لأقول لك ماذا تفعل " بالطبع لا أريد معرفة قبيلتك لكن أسأل وأجب نفسك .

Quote: سلام عليكم يا عمر التاجالسودان بلد بلا قانون ولا رحمه ، اذا عندك استعداد تدفع رشوة يمكنك احضاره من الخارج بأفضل من مواصفات الداخل وتستطيع أن تستخدمه ، الشيء الثاني الأكثر تسهيلا وضع قبيلتك فى خارطة السودان ، قد تستغرب على هذا القول والله عدت منذ أسبوع من جدة ووجدت اخوة قدموا من السودان وحكوا لي تجاربهم ولولا قبيلتهم لما خرجوا من السودان . أرد اليك كسائل عن أفضل الحلول ، فاذا كنت جعلي أو شايقي أو دنقلاوي لا خوف عليك حتى لو تأتي به من جزر الواق واق خاصة فى الخرطوم ، أما الولايات فليس للحكومة سطوة والسطوة هي سطوة القبيلة أقول هذا وأشهد الله على ما مررت به من تجربة شخصية دفعتني للخروج من السودان ، جاء رجال أمن من منطقة حجر الطير لاعتقالي وسط أفراد قبيلتي وفى النهاية أنا الوحيد الذى خلصتهم منهم .عفوا للاطالة ولكن هذا هو الواقع الآن ، "قل لي قبيلتك لأقول لك ماذا تفعل " بالطبع لا أريد معرفة قبيلتك لكن أسأل وأجب نفسك

وعليكم السلام اخونا صديق ..
أنا قبيلتي قريبة منك مختلطة بدماء الشرق .. والدفع ما من ناسو لو ماكان بالطريق الدغري .
بس نحن موضوعنا ده مجرد كيبل كهرباء للاستخدام الشخصي ..

فوووق
لذوي الخبرة
باش مهندس ايمن وينك ؟؟

شكرا لك اخي الطيب على رفع الاستشارة ..
ولا أخفيك سرا ان قلت ان بحثي عن الموضوع اوقعني في عدة بوستات في سودانيز عن البناء والتشييد استفدت جدا من واحد باسمك..
غير أن موضوع الكيبل غير مطروق في أي منتدى أو موقع.

منقول من الفيس عسي ولعل تفلح

Quote: عندك مشاكل في الكهرباء او عندك هيكل تحت التشييد اكيد حلك عندنا مع اكبر مجموعه من مهندسي الكهرباء العامه و الPLC والقدرة مع ضمان الجودة الاستفسار 0114605791 او0924158377

عمر التاج انت من الكرور ولا لا
اذا كنت من الكرور رقم كم في اللستة؟
الإجابة علی الاسئلة دي مهم جدا
لانو انا عندي تلاتة لفات كيبل جبتهم من الامارات
فاذا كنت من اللستة والمواصفات ظبطت معاك
بديك ليهم بي سعر الفاتورة(دون تكاليف شحن وجمارك)
واذا اسمك ما في اللستة فرجاء تحل ان سماي😜😜
.....
والله الواحد. في البلد دي ما فضل ليهو الا يبيع شراباتو😈😈

من هم الكرور ؟ الذين يلبعون الاشياء ويقفلون تلفوناتم ولا شنو هههههههههه وانت تساكك ..

مطلوب حضور ود التاج توجد كيابل للبيع ساقطه بدون جمرك وبدون شحن بي راس مالها بالله (حقنا برة هههههههههه )

Quote: اذا كنت من الكرور رقم كم في اللستة؟

والله يا الطيب حيرتنا ذاتو
انت سمسار ضبح ولا كيبلات😜😜
عندي ١٥٠ فدان غرب ام درمان للبيع
حق السمسرة عشرة في المية😜😈

اكتب التفاصيل والسعر في الماسنجر و بنعرضا ليك واكتب طريقة التواصل معك شان يجوك دايركت لا لف ولا دوران وحقنا محفوظ عندك ضامننو تب هاههههههه

Quote: والله يا الطيب حيرتنا ذاتو انت سمسار ضبح ولا كيبلات😜😜 عندي ١٥٠ فدان غرب ام درمان للبيع حق السمسرة عشرة في المية😜😈

Quote: والله الواحد. في البلد دي ما فضل ليهو الا يبيع شراباتو😈

كلام زول راجع أبوظبي
ههههههههه

جنابو ياخ ما تخليها مستورة ياخ 😉😉

اووو كرورنا ود عوووضه شخصيا .. يا الف مرحب زارتنا البركة يا رجرجة.

Quote: عمر التاج انت من الكرور ولا لا اذا كنت من الكرور رقم كم في اللستة؟ الإجابة علی الاسئلة دي مهم جدا لانو انا عندي تلاتة لفات كيبل جبتهم من الامارات فاذا كنت من اللستة والمواصفات ظبطت معاك بديك ليهم بي سعر الفاتورة(دون تكاليف شحن وجمارك) واذا اسمك ما في اللستة فرجاء تحل ان سماي

والله يا الكروراب لقيتكم بياعين خلاص
شنو نسيت راس الحربة بتاع الفريق نمرة 9..
صحيح ما كرورابي أصيل لكن بريمة لحقني اللستة كمحترف، يعني مجنس زيك يا رطاني
يلا نخش في التقيل .. قلت لي لفات لفات ولا باقي لفات .. عشان عندي شغلين تاني غير داك ..
اسع دي جاتني تكلفة كهرباء لي بيت تاني في جبرة 19 بمبلغ 20 الف شاملة الكيبل..
ودي عايزة عاجل الان عشان البيت يجهز قبل الضحية
أديني الفيها النجيضة ومواصفات الكيبل عشان أختار سريع..
وبعدين الأرض الزراعية كان مالقيت مشتري بشتري نصها ..
لاني بفتش في ارض زراعية في حدود 600 الف لكن الاولوية خاتيها لي بحري وشرق النيل.
وتنكر هيثرو ممكن نخته في البيعة، شكلك زول بياع
كدي نبدأ بالكيبل الصغير.

حبيبنا الطيب عباس مرحب بيك وشكرا للرعاية والدعم

Quote: مطلوب حضور ود التاج توجد كيابل للبيع ساقطه بدون جمرك وبدون شحن بي راس مالها بالله (حقنا برة هههههههههه )

قلت لي بدون جمارك وبدون شحن . ههه
اسع تلقاوه الكرورابي ده حاسب التكلفة بالدرهم سنة دو .. ولما يضربها بسعر اليوم تقول اخير لي ناس الجمارك والترحيل. هههه
أنا والله اتفقت على الشراء من السعودية وجهزت عربية كبيرة للشحن ، لكن ناس الكهرباء عنقدو .. كدي نشوف شيخ عووضه ممكن عنده الفرج.
وبعدين يا اخ حقك بره في التانية دي
عايز لي بتاع سراميك نضيف وعاجل يكون سعره مناسب .. عارفك الموضوع ده بتنجضه، يلا ارمي تلفوناتهم سريع.

عمر انت تعال بس والباقي علي
بس بنصحك. لو محتاج. حديد دبر راسك
من بدري لانو الحكاية باظت خالس
الحكومة. زادت عليهم الرسوم. وهم وقفوا
الشغل

اخونا سند من الفيس بوك بقول كلام زي الفل فالتحية له والتجلة ..

Quote: اخ عمر التاج من كلامك الواضح ان مسافة بيتك من اقرب عمود بعيدة جدا وتوصيل كيبل بهذة المسافة مكلف ماديا بالاضافة للمشاكل الفنية التي يمكن ان تحصل مستقبل . اي اذا حصل عطل في الكيبل . برضو بتدخل في تكاليف تغيير كيبل و صيانة . لذلك الاقضل لك من ناحية اقتصادية و فنية هو تقريب المسافة بواسطة اعمدة ليكون اخر عمود مقاصد ( موقع تركيب العداد و طبلون الكهرباء ) كدا المسافة بتقل كتير وبتكون حوالي 10 - 15 متر و كذلك التكلفة سوف تنخفض الي اقل من النصف

الفكرة فعلا ذكية ..لكن الجماعة ديل (وخاصة جماعة عبد العاطي هاشم) يتميزون بذكاء يضاهي عدادتهم الخبيثة..
المهم في موضوع المبنى الأول أن التكلفة ارتفعت لعاملي المنطقة الاستثمارية والموقع الجديد، والمسافة بعيدة من خطوط الكهرباء .. اقترحت الأعمدة والهوائي إلاأنهم رفضوا بحجة أنها تمر على ارض صناعية ..
طبعا 10 -15 متر دي لا يمكن أن يكتبوها لك حتى ولو العمود في بيتك، في جبرة العمود قصاد بيتي بعد شارع صغير، قدروا المسافةمن اعلى العمود وحتى اسفله مرورا بالشارع وحتى منتصف بير السلم ب 34 متر.

ياعمر التلاتة لفات كاملة ما بواقي انا جبتهم لي
طلمبات غاطسة لو اشتريت المزرعة ببيعهم ليك بي
طلمباتم وكمان معاهم شبكة ري بالتنقيط
الكيبلات اظن ٣ ملي ما عارف تنفع لتوصيلاتك دي ولا
ضعيفة
...،
اسمع. برضو عندي اعمدة كهرباء. تنفع😜😜😜
.....
يا زول الاعمدة دي هظار ساكت ما يجي الطيب ناطي
يقول لي لقيت ليهم زبون😉😉😉

ماسنجر شنو يا الطيب
انت اشتغلت مع ود الباوقة ولا شنو😜😜
اسمع اكتب عندك. برضو مزرعة. ١٥٠ فدان
غرب ام درمان فيها تلاتة ابيار واوضتين. بالبلوك
وصهريجين. تمنهم ١٤٠ مليون
دا كلو اكان ينفع فيك😜😜

ههههههههههههههههههههههه والله ريحتني راحه لكن ما تشبهني بود الباوقة بالغت عديل .. بق بق قال لي واحد تعال الخاص هههههههههه انا بقوليك اكتب تلفونك او طريقة التواصل معاك واكتب تفاصيل اوفي شان لمن نعلن يجك براو بدون وسيطط وانت تتطلع الفيا النصيب لينا

Quote: ماسنجر شنو يا الطيب انت اشتغلت مع ود الباوقة ولا شنو😜😜 اسمع اكتب عندك. برضو مزرعة. ١٥٠ فدان غرب ام درمان فيها تلاتة ابيار واوضتين. بالبلوك وصهريجين. تمنهم ١٤٠ مليون دا كلو اكان ينفع

تحياتنا اخونا عمر عثمان

Quote: كلام زول راجع أبوظبي

والله ما افتكرت جنابو الا بعد كلام عوووضه داك..
قبل فترة كدة كان في واحد بحول لي قروش كل شهر ويقول لي امش استلم من عمر عثمان في مكتبة ...
للاسف ما قدرت وصلت هناك وكنت بطلب تحويلها في الحساب .. لكن كنت متشوق اعرفه هل هو انت ام انت هو ..
على الاقل بعد ما اغتربنا بنحاج لعمر عثمان هذا في مصالح متبادلة .. يصلح السعر وحقه محفوظ.
بخصوص الاقتباس ... أخونا عوووضة ده ما اظنه يجي الوظيفة راجع بعد ما ضاق قروش الاستثمار .



..
..
وين التلفونات يا ود عباس؟
زولي بتاع السراميك القديم اغترب.

اخونا عثمان عووضه كدي راجع الكوابل تاني

Quote: الكيبلات اظن ٣ ملي ما عارف تنفع لتوصيلاتك دي ولا ضعيفة

كوابل 3 ملي ده ما لاقاني قبل كدة ..
أنا قصدي كيبل توصيل من العمود للبيت .. اقل شئ 34 ملي اذا كان نحاس.

أقصد34 متر مقاس 35 ملي نحاس ..
عشان تآمن بي ناس الكهرباء .. مسافة البيت من العمود 12 متر وكاتبين لي 34 متر.
وآخر كلام قالوا اجيب فاتورة مبدئية يوافقوا عليها ويختموها وبعدين اشتري من السوق بره أو جوة.

Quote: اسمع. برضو عندي اعمدة كهرباء. تنفع

هههه
قبل كم سنة كده كنت عايز أوصل بيت في ابو ادم طلبوا مني خمسة أعمدة ..
اشتركت مع تلاتة من الجيران ومشينا استلمنا التقديرات لقينا فيها مبالغة
قلت للجماعة نقوم نجيب سيخنا وأسمنتينا ونأجر واحدين يصبوا لينا أعمدة
ضربنا التكلفة لقيناها ربع تقديرات ناس الكهرباء ، وقبل ما نبدأ مشينا نشاورهم ركبوا راسهم وقالو إلا أعمدتنا..
والغريبة لما اتقسمت التكلفة بتاعتهم علينا الأربعة قالوا نصيب الواحد ناقص عن تكلفة الشبكة ..
دفعونا فرق شبكة +حق التوصيل + رسوم عداد وحفر وتأمين + رسوم أخر ى غير منظورة ..
وبعد ده فرضوا علينا توقيع تعهد بأن كل شئ اشتريناه من حر مالنا يظل ملكا لهم.
وحتى العداد دافعين قروشو كاش ويعتبر مؤجر منهم بقيمة شهرية مستمرة.
والأعمدة حتى ولو اتحملت تكلفتها كلها لوحدك تظل ملكهم ..
واذا جاء جار جديد ورغب في التوصيل منه يفع حقها لخزينتهم تاني من جديد..
شفت عليك الله قبل كده عقد اذعان في الدنيا اجحف وأظلم من ده؟

Quote: عمر انت تعال بس والباقي علي بس بنصحك. لو محتاج. حديد دبر راسك من بدري لانو الحكاية باظت خالس الحكومة. زادت عليهم الرسوم. وهم وقفوا الشغل

المزرعة والله راغب فيها شديد، لكن عايز خيارات في بحري أو شرق النيل . حتى ولو أرض بور مستعد أعمرها.
أها .. السيخ أوع يكون زاد تاني؟

يمين الله ياعمر الشيخ مش زاد
وبس
بقی زاد المجاهد عدیل کدا😈
والله هسي ولا بقدر اراجع ولا حاجة
الفواتير في فايل في الخزنة وانا ضهري
واجعني من القلبة ما بقدر ادنقر😉.
والله ناس الكهرباء. ما تقح ليهم ينشفوا
ريقك
اسمع كلامي ولو ما داير الذنوب نحنا
بنشيل ليك الذنب وندفع نيابة عنك لكين
برضو حقنا برة😉😉😉
....
احييييي. يا ضهري😋😋

الكيبل المطلوب مقاس 35 ملم نحاس ( مسلح )
شركة الكهرباء بتطلب منك تأمينه بطريقتك ومعاهو قاطع 100 أمبير مع الصندوق ( عدد 2 )
أسعاره الأسبوع الفات في شارع الحرية من 280 جنيه إلى 330 جنيه للمتر حسب النوعية ( جود ، جياد ، الشروق )
ده عن تجربة ( الأسبوع الفات )

Quote: يمين الله ياعمر الشيخمش زاد وبس بقی زاد المجاهد عدیل کد

شيخ عوضه انت بقيت تلخبت بين حكومة المشروع الاسلامي وحكومة البيت
السيخ انا اشتريتوا بي 8.5 قبل اقل من شهر ورفعتو ومتوقع الصبة خلال اسبوع، بس مايكون الخرصانة الجاهزة زادوا رسومها برضه.
والسيخ ما تكون زيادتو كتيرة لاني حا احتاج لي 10 طن بعد شهرين ان ربنا سهل. زمان كان سعره ماشي مع الدولار وربك يستر ما يمشي يلحقه تاني.

Quote: والله ناس الكهرباء. ما تقح ليهم ينشفوا ريقك اسمع كلامي ولو ما داير الذنوب نحنا بنشيل ليك الذنب وندفع نيابة عنك لكين برضو حقنا برة

وبعدين الاستشارة كويسة ممكن أعتبرك مستشار مالي وفني ..
قبل اسبوعين اشتريت 3 طبلون كهرباء 12 خط ماركة شنايدر الفرنسية الواحد بي 530 ريال(أغلى نوع تقريبا)،
الكاشير كان سوداني وقال لي ديل أحسن نوع في السعودية وبشتغلن عادي في السودان
أمبارح وصلن هناك والكهربائي قال لي ديل الا تبلهن وتشرب مويتهن .. ما بشتغلن هنا..
كدي شوف لي ليهن صرفة ، وشوف لي الكيبل الاماراتي ، وشوف لي بتاع سراميك سوداني وحقك بصلك في الخاص.

سلامات اخونا السيد .. نعتز بقيمة مداخلتك لانها عن تجربة شخصية كما قلت ..

Quote: الكيبل المطلوب مقاس 35 ملم نحاس ( مسلح ) شركة الكهرباء بتطلب منك تأمينه بطريقتك ومعاهو قاطع 100 أمبير مع الصندوق ( عدد 2 ) أسعاره الأسبوع الفات في شارع الحرية من 280 جنيه إلى 330 جنيه للمتر حسب النوعية ( جود ، جياد ، الشروق ) ده عن تجربة ( الأسبوع الفات )

للأسف الكيبل الأول لم يكن 35 ملي .. فهل في شارع الحرية كوابل ضعف ذلك؟
الكيبل الثاني فعلا 35 ملي ولكن تكلفته التي وصلتني تكلفته بتقديرات صباح اليوم بمبلغ 20 الف..
اذا استبعدنا حق العدادات يبقى الكيبل حسب فاتورة الإدارة في حدود 17 الف،
بقسمتها على 34 متر (تقديرات الهيئة) فالمتر عندهم في حدود 500ج، بزيادة تقارب ضعف سعرك المعلن
وللأسف لم يضعوا خيار الشراء من السوق إلا بعد مداولات انتهت بشروطهم المذكورة سابقا..
مع العلم أن تقديراتي الخاصة للكيبل اذا تم اشتريته من السعودية و بجودة أعلى بكثير من ذلك، وحتى وصوله للبيت لا تزيد عن 250ج .

سلام يا عمر التاج
يا زول أنت دربك مرق تب ما دام بقيت على الكرهب على قول اليمنيين
عندي كبيل طوله 40 متر مسلح فيهو تلاته فرد نار 35 مللي , والفردة الرابعة 16 مللي للأرضي, اشتريتو من السعودية .
لو بينفع معاك تعال لي في قفا دكان بكري من السماسرة وناس البيحضر دق التقا بيتعشى .
وبالنسبة للطبلون ما تشتغل بي خستكات الكرهبائي . الطبلون يعتبر شأن داخلي ولا تشترط شركة الك
رهبة نوع معين. أهم شيئ المفاتيح والقواطع تكون نوعية جيدة .

.

اخونا من الفيس بوك له التحية إلا كلامه محنا زيادة ..

Quote: اخي عمر اذا اشتريت السلك من اي مكان ـ بعيد عن مستودعهم ـ عندهم بند او اجراء ـ سميه ما شئت ـ يلزمك بدفع سعر الكشف بالمتر على السلك مضروب في عدد الامتار في النهاية تجد الاسعار شبه متقاربة.. واتا فزت بالجودة الخليجية . التوقيع: صاحب تجربة 2014م .

يعني لو استوردنا بي حقنا برضه حا ندفع فروقات؟ حرام والله
ويعني شنو سعر الكشف؟ وبالمتر كمان؟
يا اخ الكوابل هنا جودة مبالغة و بتتحمل كهرباء فوق مقدرة السد زاتو .. يجو يقولوا يكشفوا عليها بالمتر كمان؟
يعني لازم تدفع قدر تكلفتهم التقديرية واكثر؟
اللهم لا اعتراض على حكمك.

يا عمر ياخي انت مالك راسك قوي
كدا
ياخي خليني من ناس الكرهبة زي ما. قالوا
الجماعة الفوق
اقسم بالله. ديل ما يوصلوا لي بيت المدير
بتاعم لو ما قح
ماتعمل. لينا فيها ابو الدرداء وما بدفع وحنكك
الماجايب حقو دا
والله وتالله غصبا عنك. تدفع
بعدين ناس الكهرباء ديل زي بتاعين المرور
يطلعوا ليك مخالفة غصبا عنك
ولو مالقوا حاجة خالص يقولوا ليك انت لباسك
لونو ابيض ليه😈😈
نجي. للسيخ:
يمين الله. مش طار السماء وبس
يمين انا خايفك. الصبيت بيهو دا ذاتو تقلعو
تبيعو

وعليكم السلام عزيزنا معاوية الأرباب .. الاسم حقنا تب.

Quote: عندي كبيل طوله 40 متر مسلح فيهو تلاته فرد نار 35 مللي , والفردة الرابعة 16 مللي للأرضي, اشتريتو من السعودية . لو بينفع معاك تعال لي في قفا دكان بكري من السماسرة وناس البيحضر دق التقا بيتعشى . وبالنسبة للطبلون ما تشتغل بي خستكات الكرهبائي . الطبلون يعتبر شأن داخلي ولا تشترط شركة الك رهبة نوع معين. أهم شيئ المفاتيح والقواطع تكون نوعية جيدة .

بالنسبة للطبلونات نوعيتها ماركتها مافيها كلام، لكن الكهربائي بتاعي هو القال ما بتنفع، أفتى سعادته بأن كهربتها مختلفه عن كهربة السودان
وأتمنى أجد واحد متخصص يرد عليه ويعشمني في انها ممكن تشتغل حتى ولو اتعدلت.
بالنسبة للكيبل دايرله معاك قعدة عديل .. جهز لي بعض مواصفاته وماركته وأنا بسأل عن ما طرحته فوق، وأجيك بالباب الخلفي.

الاخ ابو حسين مشكورا أوصلني بالمهندس الامين حسين المتخصص في المجال
والذي أفادني كثيرا في المجال وعشمني في امكانية عمل الطبلونات في السودان
وودت ايضا ان يقوم الاخ السيد أحمد إبراهيم بعرض الاجراءات و التكلفة كاملة للاجراء وفق تجربته الحديثة
كما انتظر من الاخ الطيب عباس او عوووضه او أي من القراء رقم فني سراميك عاجل خلال اليوم على الايميل [email protected]