***** كــــركـــاســـة الـــذكــــــــــريـــــات *****

10:31 AM August, 06 2016

سودانيز اون لاين
ABUHUSSEIN-السعودية الرياض
مكتبتى
رابط مختصر

كركاسة الذكريات

الكركاسة هي رداء مطاطي HOME MADE به كمية من الثقوب .. كان يلبسه التلاميذ تحت البنطلون لتخفيف الألم الناتج عن الجلد بالسوط..
يعني الكركاسة هي سترة النجاة في البر .. واول سلاح وقائي يظهر لمواجة بطش السوط.

اما الردّيف فهو لبس ما هو متاح من هديمات تحت البنطلون اتقاء لشر السوط المستطير .. وكان يتم العمل به حال عدم توفر الكركاسة.

دفتر العيادة كان PLAN B لمجابهة خطر (التسميع) والجلد الذي يرافقه حال عدم توفر الكركاسة والردّيف - لقد كان ذلك الدفتر اغلى من دفتر الشيكات، وبالنسبة للكثيرين كان بمثابة جواز امريكي في ذلك الزمان .. بالله لما اسمك يتكتب في الدفتر التقول جاك اللوتري ..
قد يقول قائل ان استخدام دفتر العيادة بدون مرض هو كذب وتحايل .. اها دي عندنا ليها تأصيل لكن ما وقته .. بعدين المرض ده الا يكون مرض عضوي .. الخلعة والخوف الشديد من السوط ده مش مرض نفسي .. شفتو كيف!

اما سوط العنج فقد كان احد أسلحة الدمار الشامل التي تستخدم لقصف اجساد (المدنيين العزل)، وكان يُستخدم القطران لتخصيبه!
بعدين السوط بكون عندو صوت مع الكركاسة - الشئ الذي اجتهد مصنعو الكركاسات لتجنبه بصنع ثقوب على سطح الكركاسة المطاطي ..

اما المدرسين فكانت لديهم تكتيكات مضادة وناجعة للمواضيع دي..
تكتيكات المدرسين كانت تبدأ بالتهديد والوعيد وقبل الشروع في الجلد: (أي زول مكركس ولا مردف أنا من أول سوط حأعرفو، وإنتو عارفين حأعمل ليه شنو) ..

ما كان يحير المكركسين ممن إنتووا التوبة عن (الكركسة) والإقلاع عنها في الحال إنو ما كان في CHANGING ROOM عشان يقلعوا فيها ما أرتدوه من كركاسات وما ردفوه من هديمات ودلاقين .. يعني القليع كان بكون على الهواء مباشرة :(

الشئ الما قادر افهمو لحدي أسي إنو المدرس لما يقول ( جيبو لي السوط) تجد عشرات الزملاء قد تدافعوا تدافع الحجيج يوم الجمرات لجلب السوط لتسخين المعاقبين من زملائهم في تنكر تام لحقوق الزمالة والرفقة!
آآي انا عارف إنو السوط في النهاية حيجي والجلد حيتم، لكن ياخي ما معقول الجماعة ديل يظهروا فرحتهم بالشكل ده ويشتركوا في العملية الارهابية دي ضد زملائهم!

لكنهم كانوا اقل اثما من الالفة .. قمر الصف الاصطناعي ومقدم البصاصين ومدير الجهاز .. قوائم المهرجلين بحقيبته كانت تفوق كتبه وكراساته عددا ..

وجود اسمك في قوائم العقوبات او عدم وجوده كان مرتبطا ارتباطا وثيقا بعمق علاقتك بالسيد مدير الجهاز، او ما تحمله للفطور من سندوتشات تكفيك لدعوة سيادته مشاركتك اياها بعين قوية (العضة مقابل السلام) ..

كنبة ورا ديل كانوا فريق الدعم والاسناد .. خبراء الرفع واختصاصيو التوازن ..

الجماعة اصحاب السوابق في (الحيحية) والحك اثناء الجلد كان يتم استدعاء السادة الخبراء لهم .. يتم رفعك في الهواء من اطرافك الاربعة فلا تجد مناصا من السباحة في الهواء .. هو الـ SKYDIVING ده الا الزول يتلب من طيارة!

الغريبة كان في مدرسين مغرمين باستخدام افرع الاشجار كسيطان .. فما عارف القصة دي بتدخلهم في ياتو تصنيف .. يكونوا يا ربي من (حزب الخُضر) ..

طبعاً إنت مطالب إنك تتحمل الجلد للنهاية – ما تخرب الموت بالرفسي - لا قومة، لا حكة، لا كوريكة، لا آهة - وإلا ستكون فضيحتك بجلاجل .. يعني البتجي من السماء بتحملها الواطة LITERALLY ..

ياخي ولي أمرك لو يوم بالصدفة قابل واحد من المدرسين الاجلاء او حدث وإستدعوه في المدرسة كان قبل ما يعرف الحاصل شنو يقول ليهم: (شوفوا يا أخوانا، الولد ولدكم .. ليكم اللحم ولينا العضم)!
معقولة بس يا حاج لكن، ولدك انا ولا خروف .. مدرسة دي ولا سلخانة :)

الغريبة إنو مصطلح (الخير يخص والشر يعم) ده نحن سمعنا بيهو وشفنا تطبيقو في المدارس قبل (عزة السودان)!!

يعني عااادي جداً الفصل كلو ممكن يتجلد عشان في ثلاثة او أربعة من الزملاء كوركوا: بيووووووووت مع جرس نهاية اليوم فرحا بالانعتاق والتحرر من القعاد تحت الزنكي (يا حليل الزنكي) ..

الزمن ده طلاب مدارس الحكومة في بعض المناطق بقوا قاعدين لي الله في السهلة بالمعنيين .. مشتهين الزنكي وما لاقنو .. تعليم OUTDOOR .

تخيلوا .. تلاتة اربعة زملاء كوركوا يقوموا المدرسين يصنفروا الفصل كلو .. بالله عليكم دي مش ياها حرب الامبريالية المدعاة على الارهاب .. طائرات الدرون تقصف اماكن مفترضة لتواجد الارهابيين فيسقط عشرات المدنيين ضحايا ..

يعني لو من زمان بنعرف شعارات (إن تقلها تمت، وإن لم تقلها تمت .. إذن فقلها ومت) .. كان كوركنا وهتفنا بأعلى صوتنا مع الثوار الاحرار .. على الأقل كان انجلدنا وبطنا باردة ..

ملحوظة:
لو قرات وكنت من ناس كنبة ورا معناها انت ارهابي من الخلايا النائمه

الكلام دا منقول من الواتس آب ....

قبل ما يجيني كبسور ....

السلام عليكم يا ابو حسين

اتمناك بخير والعيال

ذكرتنا ايام زمان .. واضف الى ذلك بعض التلاميذ كان الواحد
يضع نواة البلح تحت اضراسه ويضغط عليها بشدّة

لكن كان عندنا استاذ تفتيحة .. واالله فى الشتاء القارس والبرد الشديد داك

لا حول ولا قوة الا بالله

عندنا زير جوّة الفصل .. تخيل كان يقول ليك ادخل يدك جوة الزير وطلعها ثم يجلدك على يدك

عذاب والله

........

يديك العافية

...........

السلام عليكم اخي عادل حسين
جزاك الله خيرا وربنا يجعل هذا البوست
في ميزان كركاستك
هذا مع. تحياتي واحترامي 💖😏

Quote: السلام عليكم يا ابو حسين اتمناك بخير والعيال ذكرتنا ايام زمان .. واضف الى ذلك بعض التلاميذ كان الواحد يضع نواة البلح تحت اضراسه ويضغط عليها بشدّة لكن كان عندنا استاذ تفتيحة .. واالله فى الشتاء القارس والبرد الشديد داك لا حول ولا قوة الا بالله عندنا زير جوّة الفصل .. تخيل كان يقول ليك ادخل يدك جوة الزير وطلعها ثم يجلدك على يدك عذاب والله ........ يديك العافية

و عليكم السلام اخونا انور
حكايات و حكايات عن الترديف ...
زميلنا الأستاذ طلعو و قال ليهو اتكل على الكرسي عشان يجلدو ...
السوط الأول المدرسة كلها سمعت صوت الإنفجار .. 😂😂😂
و كتاحة عديل كدا قامت من زميلنا ... 😂😂😂
الاستاذ ابتسم و قال ليهو املص ..
و الاستاذ طلع مشى يجيب ليهو حاجة من المكتب ..
الصعاليق قالو لي زميلنا ... يقول ليك املص..؟؟؟؟
انت ما راجل .. ؟؟؟
شحنو ليك الزول لم عايز يطرشق ...
جاء الأستاذ راجع
انا ما قلت ليك املص .. ؟؟؟
زولنا طااااااااخ ضرب ليك الاستاذ بونيه في وشو ...
امسك امسك رفعنا الاستاذ من الواطة 😂😂😂😂😂😂

يديك العافية

تحياتي و احترامي

Quote: السلام عليكم اخي عادل حسين جزاك الله خيرا وربنا يجعل هذا البوست في ميزان كركاستك هذا مع. تحياتي واحترامي 💖😏

أسمع الحصل شنو في خط هيثرو ....؟؟؟

ما عارف والله

ما عارف والله
اسال منو الكيزان وناس المؤتمر الوطني

شايفك صاحي الدغش يا عووضة
عبادة ولّ تسخين تانكر!
عموما برضو العمل عبادة.. و مال ايه

التعديل لأنو شايف أصحابك المتعلمين اللي هم متعلمين زانقين المستنير في الدين أو لـلدين
ثم لتقديم شنو كدا والاحترام لصاحب البوست

Quote: الكلام دا منقول من الواتس آب ....

ما يحتاج..
انت كان كتبت دا كلّو من راسك بتفقد سوائل و ترقدلك يومين تلاتة ميرود

ابو حتحوت السلام عليكم ياخ 😉

ABUHUSSEIN





سلام أخوي بوحسين ،
المفردات صعبة عايزة ود عووضة ،
يفتي فيها ،
الكركاسة
HOME MADE
أم
Housemaid
أما الـ الحيحية
أصلاً ما عرفتها ،
SKYDIVING
LITERALLY
OUTDOOR
CHANGING ROOM
PLAN B
و يا سلااااام علي اللغات ،
يا جدعاااااااان ،
،،،،،،،







عزالدين عباس الفحل
ابوظبي

عبادة يا ود الزبير ياخ
عبادة بن الصامت
نلحق صلاة الفجر يمكن ينزلوا
لينا صفحة في الجرايد زي حقت
عبد الرحمن الخضر😂😂

UP


الزول دا وين؟؟؟؟؟؟؟؟

ومعك نسأل يا هيثم

أبوحسين ..
وعثمان عووضة

يا سلام على الايام الجميلة

في وفاة والدتي رحمها الله قبل شهرين تقريباً
تواصل معي عبر الهاتف معزياً .. له الشكر ولا اره الله مكروهاً


مع التحية لأبوحسين وعثمان عووصة

أتمنى رجوعهم ..

عووضة دا شايف واحد بشبهه
حايم في بوست العشق القديم بتاع أبوسن
لكن أبو حسين دا شكله قنع من البورد دا
غايتو لو عندك فيس يمكن يكون حايم بي هناك
أغلب مؤسسي المنبر دا بقوا (فياسة) والمصطلح دا ناجرو ساي

مودة للجميع
وأولهم أبوحسين سيد الشي دا

محمد معانا ما تغشانا
هسى فى داعى للسيرة دى