طرائف كرويه

06:34 PM July, 31 2016

سودانيز اون لاين
عمر الفاروق عبد الله الشيخ-
مكتبتى
رابط مختصر

هنالك ظرفاء رياضيين من اللاعبين والمشجعين لهم قفشاتهم وطرائفهم المتعددة ومن هؤلاء كان

عبد الهادي ود الشايقي لاعب المريخ ولعب فترة برضه في الهلال من طرائفه

يحكي بان المريخ سجل لاعب في خانة ود الشايقي اسمه مطر وفي تمرين من تمارين المريخ لاقاه ود الشايقي وقال ليه اسمع يا اخونا الخانة دي مزبلة

اجمتع وفد من اداري المريخ برئاسة الحاج شاخور يعرف بوفد الحجاج حاج التوم وحاج مزمل وحاج شاخور بالرئيس نميري وطلبوا منه ان يتبرع لبناء مسجد المريخ وقد كان ان تبرع لهم نميري بمبلغ 2000 جنيه لبناء المسجد

والوفد خارج من مكتب الرئيس نميري ناداهم وقال ليهم: اسمعوا لمن المسجد ده يكتمل حتختوا علي راس الميضنة شنو؟

رد عليه حاج شاخور: والله ياريس عشان خاطرك حنخت صقر الجديان

عندما خاض الهلال في عام 1987م المعارك الافريقية في كاس افريقيا وكلما يهزم فريق يذهب المريخاب شفقانين ويقولوا لي شاخور الهلال ده لو جاب كاس افريقيا وهو بالطبع احسن من كاسنا ما حيخلونا نقعد في البلد يقول لهم اصبروا . اجتاز الهلال يوفنتوس وكانون ياوندي وهم يقول لهم اصبروا ولما وصل في النهائي مع الاهلي المصري قال ليهم «الهلال يا دوب طار ما حيقدر على المصريين ديل ربنا سبحانه وتعالى لما رسل موسى لم يقدر عليهم وطلب دعمه باخيه هارون يعني رسولين وعصايه ما قدروا عليهم يقدر عليهم الهلال» وفعلا جاء لاراش الحكم وكان ما كان.

من نكات ود الشايقي
مباراه بين مصر و السودان
الجو كان مكهرب
نزل الفريقان الملعب
كل لاعب اخد مكانه
جناح مصر كان والد الممثل هشام سليم
ود الشايقي كان بعمل في حركات قدام اللاعب نطيط و حركات
اللاعب سليم عشان الطف الجو
قال ليه اذيك يا ابن النيل
قال ليه لا نيل لا غيره
و الله الليله ان جات ام كلثوم ما تمر بي هنا

مرة السر عكاز أحد ظرفاء عطبرة دخل استاد عطبرة في الثمانينات لحضور مباراة بين المريخ والشبيبة .. وكان المريخ يضم آنذاك الطاهر هواري وفتحي فرج الله وسامي عز الدين وعبده الشيخ وعبده ساتي وفيصل الحنان ... وطبعاً زي ما عارفين عبده الشيخ بيلعب جناح شمال وكان في قمة الوسامة .. المهم كان الاستاد مليان والأعمى شايل المكسر والسر عكاز متشعبط في الدرابزين ويصرخ بأعلى صوته ( نظرة يا عبده الشيخ.. عليك الله نظرة يا عبده الشيخ...نظرة الله يخليك نظرة المهم بعد طول صراخ التفت إليه عبده الشيخ.. فما كان من السر عكاز إلا أن زغرد زغرودة سمعها كل من في الاستاد ( أيويوووويووووووووووووووووا )

فى نهاية السبعينات وفى تصفيات الانديه الافريقيه انهزم المريخ 2 صفر من كانون الكامرونى ذهابا وفاز ايابا 2/1 بالخرطوم بهدفى سامى وعمار وخرج من المنافسه .بعد المباراه حمل جماهير الهلال كوانين الفحم امام بوابة الاستاد استفزازا للمريخ وتشجيعا لكانون.

حكى سليمان عبد القادر يوم مباراة الهلال والمريخ كان معه عز الدين الدحيش معزوم وجبة سمك وبعد الغداء تحرك كل واحد منهم الى فريقه واثناء المباراه حدث احتكاك بين اللاعبين فقال له الدحيش امشى عامل بيتكم الضيق وريحتو كلها سمك

ومن طرائف الأخوان فيصل كورى وحضر الطوري ( طبعاً فيصل بيلعب في المريخ وخضر بيلعب في الهلال ) حكى خضر كوري الكبير هذه الطرفة..
قال كانت الوالدة تقف بيننا وترفع يديها وتدعو الله وتقول :
يا ربي أولادي إن شاء الله الاثنين يجو غالبين !!!!!!!!!!!!
خضر يقول ليها دي تجي كيف يا أمي ...؟
يعني كل واحد يغلب شوط ولا شنو ؟

من نوادرالفاضل سانتو


قال أنه كان خفيف وسريع الحركة وكان دائما ما يراوغ المدافعين وحتى زملاءه في المريخ اثناء التمارين

قال اول ما جا من مدني قال لميت في سلمان ابوداؤود

وقال اديتو جبده باليمين وجيت راجع ليه تاني واديتو واحدة بالشمال لغاية ما رقد في الارض

قال ابوداود وهو راقد رفع راسه وعاين لسانتو وقال ليه


هووووووووي يا ((.................................... )) تاني ما تعمل لي كدا !!!!!


هكذا كان لاعبو القمة

التطعيم ضد الجدرى
قالو قال... الفريقين ديل حو من وين
اول مرة اسمع بيهم

من ذكريات جناح المريخ المزعج يقول جاد الله - رحمه الله -
كنا في معسكر في نيروبي وكنا نرتدي بدلة وعليها شعار وديباجة وقال بينما كنت اتجول في حديقة الفندق قال حضر إليه واحد خواجة وجادالله لا يعرف غير يس ونو بالانجليزي وسأله الخواجة عن الشعار وطلب منه ان يعطيه الشعار جاد الله ما عرف يرد على الخواجة المهم الخواجة اظهر ليه بأنه يريد هذا الشعار بعشرة دولار .

* مرة في أحد التمارين للجالية السودانية التقيت بالكابتن سبت دودو فسألته ( يا أخي أنت كنت حارس أفريقيا الأول .. تطير كالواطواط وتجيب الكورة من الثمانيات .. يا أخي كيف جاد الله الفرفارة الملقب بكاروشه - الله يرحمه - جاب فيك اثنين (هاتريك ثلاثة أهداف في كل مباراة ) عام 1966م في المباراة التي كسبها المريخ 3/صفر واحرزها كلها جاد الله .. وجاء الهاتريك الثاني لجاد الله عام 1969م في المباراة التي كسبها المريخ 4/2. في مباراة واحدة في المباراة الشهيرة بين الهلال والمريخ ... فضحك وقال لي : تصدق وتآمن بالله .. (( أنا لا كنت بخاف من ماجد ولا جقدول ولا أي لاعب في المريخ الوحيد الكنت بلاوز منه يا هو جاد الله ده )) .
رحم الله جاد الله وحفظ لنا الكابتن سبت دودو

قصص جميلة تحكي واقع جميل
حقيقة سمعنا كثيرا عن الصداقات والإجتماعيات بين اللاعبين خارج المعلب من مختلف الفرق المتنافسة ولا يؤثر ذلك على شدة المنافسة داخل الملعب
بل تزيدها جمالا وألقا.

لكن قصصك مريخابية بس ليه ؟
مسجد المريخ ما إنتهوا من مئذنته لغاية هسي ليه؟

هذه حكاها لي ابن عمي وبيتهم كله مريخاب وفيهم واحد متعصب جدا حكاهاعن هذا المتعصب

قال مباراة هلال مريخ واخوي من العصر فرد علم المريخ وعلي الاستاد يشجع باعلي صوته ورافع العلم فوق يلولح بيه في منتصف الشوط التاني الهلال جاب قون بقي ينزل في العلم شوية شوية

قبل النهاية بدقائق الهلال جاب التاني قام طواه

واحد من مشجعي الهلال كان بصور في المشهد قال لي

"علمك ده امش فصله نكس"

سليمان عبدالقادر كان يقرش الكورة من نص الملعب للحارس

هسي في ظل القانون الذي يمنع التقريش بالأرجل فقط بأي جزء اخر من الجسد

كان ح يعمل شنو ؟

ومن أحلى فكاهات المباريات الأهازيج الجميلة

النقر جا يا ابداود أرجا

هذه الطرفه حكاها احد حراس المرمى بنادي الهلال وا ظنه هشام الطيب . .قال كان عندهم جار في الحله ما عندو علاقة بالكوره نهائياً . .وفي كل مرة يشوف هشام الطيب شايل شنطتو وطالع . .في يوم قام سالو : انت ياهشام شغال وين . .فاجابه هشام الطيب : انا حارس مرمى الهلال . .فنطط الراجل عيونو وقال ليه : بالله انت يور البقولو عليهو . .

المريخ كان لاعب مع ديم سلمان . .والكورة باقي فيها خمسه دقايق والمريخ غالب سبعه صفر في لاعب من ديم سلمان قام يسخن . .واحد من لعيبة المريخ سأل ود الشايقي : ده منو البسخن ده . .فرد ود الشايقي ده بكون سلمان ذاتو . .

كتب الصادق

Quote: سليمان عبدالقادر كان يقرش الكورة من نص الملعب للحارس هسي في ظل القانون الذي يمنع التقريش بالأرجل فقط بأي جزء اخر من الجسد كان ح يعمل شنو ؟

بالمناسبة أخي الصادق سبق أن قمت بإجراء لقاء كروي مع الفذ صخرة المريخ / فيصل كوري بمدينة جدة وقد جاءت سيرة ملك التقريش سليمان عبد القادر وأخبرني كوري أنه سأل سليمان نفس السؤال في جلسة أصدقاء بناءاً على التغييرات الجديدة للوائح وقوانين كرة القدم وقال له ( لو كنت بتلعب هسع كنت حتعمل شنو وانت بتقرش الكورية من النص ؟؟) ضحك سليمان وقال بلكنة ( كنت حا أطلعها في الآوط ) فضحك الجميع
يا أخي دفاع المريخ كان يهز ويرز ( كاوندا وسليمان عبد القادر وأحمد سالم وخورشيد ) وخلفهم الطيب سند .. هيييييع

هههههه

ما تضايق !!!!
دفاع المريخ كان يهز ويرز وبرضو قاقارين والدحيش كانو مبهدلينهم
والتاج محجوب ومصطفى النقر والقائمة تطور

ده زاتو لذة التشجيع والمتابعة

Quote: هههههه ما تضايق !!!! دفاع المريخ كان يهز ويرز وبرضو قاقارين والدحيش كانو مبهدلينهم والتاج محجوب ومصطفى النقر والقائمة تطور

هجوم المريخ أجنحة عمار خالد واالجيلي أو جاد الله
انصايدات كمال عبد الوهاب والفاضل سانتو ..
هيييع

بالله شوف الباص بتاع كمال عبد الوهاب ..
الزول ده لمح ظل زيكو يركض ولعب باص بيني خلاهو في مواجهة الحارس
فعلاُ دكتور الكرة السودانية .

قال ليك الهلال مغلوب من المريخ 1/0 من ضربة جزاء

الراجل هلالابي مش البيت مولع نار .. رقد في السرير بدون كلام وقال ما عايز يتعشا

زوجته حاولت تهديه

قالت ليه ولا يهمكم مزعل روحك في شنو ؟ شوف عيني القون كان من تسلل واااااااضح !!

شفت المرة الكضابة دي ؟! قون من ضربة جزاء تسلل؟!

الاخ الهادي

رغم هلاليتي

إلا انني اعتبر كمال عبدالوهاب واحد من اساطير الكرة السودانية

فعلاً دكتور

علي ايام اسطورة الكرة السودانية نصر الدين عباس جكسا

الهلال لاعب مع فريق من مدني ومهاجم الفريق طوالي متواجد في منطقة الظهر وتارك خانته في المقدمة بين الشوطين سأله الكوتش ياخ انت تارك خانتك قدام وبترجع كتير في خط الظهر ليه

قال ليه باخد دروس من جكسا

كابتن سليمان عبدالقادر متعه الله بالصحة والعافية
عندما كان يلعب في المريخ كان يسكن جارنا في بيت والده العم عبدالقادر الجزولي
وكنا حينها صغاراً ومعظمنا يشجع الهلال
يوم يفوز الهلال على المريخ كنا ننتظره في الشارع لحدي ما يرجع بي عربيتو الاوبل القديمة
ونكورك (الراكوبة الراكوبة الراكوبة)
يوم المريخ ضرب الهلال اظن تلاتة واحد
جا ماري ونحن قاااااااااعدين خجلاااااااانين
مشى قدام وبعد شوية جا راجع وقف العربية وقال لينا:

الليلة مالكم ساكتين.؟؟؟..ما تكوركوا....


ههههههههه

في مباراة الهلال والمريخ الاولي في كاس الدهب التاني المريخ كان غالب 1 صفر المباراة في اخر الدقائق عمر احمد حسين عمل ضربة جزاء مع قاقارين تصدي ليها احرز منها هدف التعادل واعيدت المباراة في استاد المريخ وفاز الهلال 2-1 قاقارين والدحيش

في المباراة الاولي بعد نهايتها واحد من المشحعين قال شوف عيني 3 عربات ببسي جن راجعات من نادي المريخ

Quote: كابتن سليمان عبدالقادر متعه الله بالصحة والعافية عندما كان يلعب في المريخ كان يسكن جارنا في بيت والده العم عبدالقادر الجزولي وكنا حينها صغاراً ومعظمنا يشجع الهلال يوم يفوز الهلال على المريخ كنا ننتظره في الشارع لحدي ما يرجع بي عربيتو الاوبل القديمة ونكورك (الراكوبة الراكوبة الراكوبة) يوم المريخ ضرب الهلال اظن تلاتة واحد جا ماري ونحن قاااااااااعدين خجلاااااااانين مشى قدام وبعد شوية جا راجع وقف العربية وقال لينا: الليلة مالكم ساكتين.؟؟؟..ما تكوركوا.... ههههههههه

أخونا ياسر أضحك الله سنك ..
يا أخي كان هيبة سليمان عبد القادر في الميدان تلقاهو فارد صدره لقدام ... طبعاً حسب ما قريت في لقاء معه أنه الآن مؤذن مسجد .. أخير ليهو ماسك في درب الله وصلواته كلها في المسجد .

أيام كنا نسمع الكورة في الرادي في مدينة عطبرة في السبعينات :
أنا وأخوي أنور مريخاب بينما شقيقنا الأكبر مدثر هلالابي متعصب
في مباراة شهيرة بين العملاقين كنا نتحلق حول الراديو وكان المعلق المرحوم (علي الحسن مالك) هو من يذيع المباراة .. فبدأ يردد بشارة ماشي والدفاع راجع بشارة ماشي والدفاع راجع بشارة ماشي والدفاع راجع بشارة ماشي والدفاع راجع ثم صرخ قوووووووون وهنا ما كان مدثر شقيقي الهلالابي المتعصب إلا وأن ضرب الراديو ضربة كاراتيه حتى أسكته وتكسر إلى أشلاء .
المهم حضرنا الصبح للسوق وأخوي كالمعتاد لمساعدة والدنا - رحمه الله - في الدكان ومدثر تبدو عليه علامات الغضب والتجهم نتيجة هزيمة الهلال وكأن مصيبة كبرى حدثت فظهر من بعيد جارنا في السوق فيصل دبورة مريخابي متعصب يفوق وزنه 140 كليلو جرام وأخذ يردد وهو يتراقص فرحاً وصدره يميل يمنة ويسرة بصورة مضحكة (( بشارة ماشي والدفاع راجع بشارة ماشي والدفاع راجع .. يا مدثر نحن عرفنا أنو بشارة ماشي على القون لكن الدفاع بتاع الهلال ده راجع وين ويييييييين )) .. ..

هنالك الكثير من القفشات والطرائف التي تحكي من دار الرياضة امدرمان حيث كان لمجموعة من الظرفاء مكان خاص في الدار يلتقون فيه منهم المرحوم الممثل عبد الوهاب الجعفري

الجعفري طلع مع صاحبو ماشين دار الرياضة امدرمان وكان في مباراة صعود في السكة صاحبه قاليه ياخي صلاة العصر وجبت نصلي ونمشي بعد الصلاة صاحبه اتاخر في داخل المسجد

جا الجعفري تاوق ليه لقاه رافع يديه ويدعو .... قام جدع ليه جزلانه قال لي ياخ شيل الدايرو والحقني الكورة بدت

أحلى الأهداف أحرزه الساحر كمال عبدالوهاب في مرمى الهلال بعد أن تخطاهم جميعاً واحداً بعد الآخر وانتهت بهدفين دون مقابل باستاد الخرطوم وللمزيد من المعلومات يمكنكم الرجوع لشوقي وفوزي المرضي الذين عانيا المر من كمال ويمكنكم أن تسألوا “المر” نفسه أي عبدالله موسى فقد عانى ما عانى أيضاً من الساحر كمال.

معلومة للتاريخ

السر عكاز أحد ظرفاء مدينتي عطبرة :

طبعاً هو هلالابي على السكين و صاحب مزاج رايق! و له ( صديق لدود) مريخابي وكان السر عكاز حريص دوماً أن يحضر المباراة في وسط تجمع وجمهرة في نادي التضامن اللي قريب من بيتهم الصديق اللدود ده يصر دائما أن يجلس جنب عكاز عشان يغيظو .. أها في مرة في النادي كانوا الاثنين بيحضروا مباراة (هلال مريخ) و الهلال كان ضاغط المريخ (لمن جاب الزيت). في كل هجمة خطرة على مرمي المريخ ، يقوم صديقه المريخابي ينده: يا سيدي على .. يا سيدي على .. يا سيدي على .. تقوم تفشل الهجمة ، عكاز ينظر ليه بغضب و بدون تعليق و تكررت العملية لعدة مرات و في النهاية طلعت المباراة تعادل بدون أهداف ، خرج الصديق اللدود من النادي (كابس) بس بدون أي تعليق. صباح اليوم التاني إتقابلوا وكان الصديق ده مهموم وحزين وهو يردد للسر عكاز ما سمعت الخبر المحزن ده بالله؟
فأجاب عكاز : خبر شنو؟ - طبعا لسع زعلان من نتيجة المباراة أمس –
ما سمعت يا عكاز : سيدي على مات !!
فكان رد عكاز سريعا و ساخراً :
ليه ما يموت إذا امبارح ملعبو شوطين كاملين وهو راجل عجوز زي ده !!!!

يا أخونا عمر الفاروق :

ده بوست جميل بنكهة عبق الماضي الجميل ..
عشان كده خلينا شغلتنا ولبدنا في بوستيك السمح ده ...

اخونا الهادي الشغيل مالك متعصب شديد كده

دايرين طرائف الرياضيين بعيدا عن التعصب ومنها علي ايام المرحوم حسن ابو العائلة رئيس نادي المريخ كان اوقف عدد من اعمدة الفريق منهم كمال سينا وكان ابو العائلة برتبة صاغ مش عارف تعادل ياتو رتبة بلغة اليوم

وايامها كان يطلق علي عملة القرش صاغ بنفس مسمي المصريين

جا سينا وجلس بالقرب من مجلس فيه الصاغ ابو العائلة نادي بتاع الشاي قال ليه هاك ده ريال جيب لي شاي ورجع لي 8 صاغ وخلي صاغ علشانك

حكى لاعب المريخ محمد موسى موقفًا طريفًا مر به عندما كان لاعبًا لفريق هلال الساحل بقيادة المدير الفنى فوزى المرضي، وقال: يتميز المرضى بالنكتة الحاضرة وهو رجل ظريف ويحب اللاعبين، واضاف: جمعتنا مباراة قوية فى الدورى امام فريق الموردة الام درمانى، والموردة من الفرق التى يعمل لها المدربون الف حساب، وكانت حسابات الهلال فى هذه المباراة الفوز فقط بمعنى أن الخسارة غير مقبولة، وعندما دخلنا الملعب كانت آخر وصية لفوزي هي قوله ياشباب انا دايركم تضربوا الموردة ده شديد لأن جماهير بورتسودان ما بترحمنا، بدأت المباراة على صفيح ساخن والمورداب حاصرونا شديد فى ملعبنا، والجماهير تهتف دايرين قون دايرين والشوط الاول انتهى ما فى نتيجة، فى الشوط الثانى سحبنى فوزى المرضى وادخل لاعبًا وجلست فى كنبة الاحتياط واخذ نفسًا طويلاً وجلس جواري، ولم تمر اقل من دقيقية احتسب الحكم ركلة جزاء لصالح الهلال انفعل معها المرضي وقام واقفًا يصيح للاعبين خلوها لمحمد موسى وهو يصيح انفجر ناس الكنبة بالضحك اتلفت عليّ وقال انت الطلعك منو
ارجع ياااخ العب كورتك.
ههههههههههه

عمر الفاروق :
وين التعصب البتقول عليهو ده .. مالك عاوز تطيرنا من بوستيك ده

=================
حكى مصطفى النقر
كانت لدينا مباراة أمام المريخ في المربع الذهبي وكان التعادل أو الفوز يمنحنا الكأس بينما كانت فرصة المريخ هي الانتصار فقط، وقد تقدمنا بالهدف الأول ونجح المريخ في معادلة النتيجة وإحراز الهدف الثاني وتبقي للمباراة سبع دقائق فقط.. وقد حدثت طرفة لا أنساها تمثلت في ذهابي للفندق الكبير قبل المباراة وقمت بحلاقة شعري وكان لاعبي المريخ يقيمون معسكرهم في نفس الفندق وشاهدوني وأنا أحلق شعري .
أثناء المباراة حدث احتكاك بيني ومدافع المريخ “كمال عبد الغني” فسقطت أرضاً وأثناء قيامي إذا بأحد أعضاء الجهاز الفني للمريخ يكايدني قائلا: تعال احلق تاني تعال احلق تاني، وبعدها بدقيقة إذا بـ”عمر النقي” يلعب لي الكرة أمام مرمى المريخ ونجحت في إسكانها مرمى الحارس “حامد بريمة” فأسرعت إلى ذلك الشخص في كنبة الجهاز الفني للمريخ وقلت له (( بحلق بحلق بحلق.‬))
تخيلت النقر يضع يده اليمنى على اليسرى ويعمل حركة الإغاطة المعتادة وهو يردد بحلق بحلق هههههههه

دي حكاها لي مدافع الهلال المرحوم هينو ... الله يرحمه
يوم مباراة الهلال مع كمبالا سيتي ذهاب في الخرطوم
كان هو حيلعب اساسي لكن اخبروهو ان عصام عبدالخير حيكون اساسي
وعصام قوي وصاحب شوتات قوية لكن عيبه انه بخاف من الجمهور والمباريات الكبيرة بتجيهو حالة ارتباك .. هينو قال ليهم كلموهو الساعة خمسة
عشان ما يشرد من المعسكر المهم قبل المباراة كلموهو انه حيبدا المباراة وقال مسكتو الرجفة .. ودخل المباراة ومن هفوتين قاتلتين فاز كمبالا على الهلال 2 / صفر
لمهم بعد يومين تلاتة في المعسكر في الفندق قال اشوف ليك واحد شكلو نيجيري طالع ونازل معاهم وبعوم في المسبح حق الفندق واخر راحات ومدلعوا ليك دلع دا منو ؟ قالوا دا (الانطون)
وماشي معانا يوغندا .. وصلوا يوغندا و (الفكي الانطون) مازال معاهم تقريبا اسبوعين .. المهم يوم المباراة دخلوا ليك اللعيبة كلهم بالصف واحد واحد جوة غرفة الفكي دا ومولع ليك بخور تقول قاعد يتدخن
بخر ليك اللعيبة كلهم ومشوا الاستاد ريحتهم ورق ورق وقال ليهم انتو ( ان شاء اللاهو) فايزين تلاتة سفر
ومشى معاهم الملعب ... وشايل سبحة متر .. الهلال اكلها (3/1) والجاب الهدف حق الهلال المدافع جميل... والفكي من اول هدف في الهلال خلا السبحة وكسح

حكى صخرة دفاع المريخ السابق الكابتن / فيصل الكوري خلال اللقاء الكروي الذي أجرته معه في مدينة جدة ما يلي :

** الموقف الأول : أذكر في مباراة الفريق الفومي العسكري بإيطاليا بتم التطعيم بنا أنا وشقيقي حضر الكوري ، مصطفى النقر ، عبد المنعم الصياد فلعب الفريق العسكري الايطالي كورة معكوسة وكان اللاعب محمد فضل الله حارساً للمرمى فقال لي ( Mine) أي أترك لي الكرة ووقفت جنباً فلم يستطيع الامساك بالكرة بالرغم أنها ضعيفة فأفلتت منه وارتطمت برجلي وولجت الشباك .

** الموقف الثاني : في مباراة مصر والسودان التي أشرت أليها آنفاً في سياق اللقاء كلفت بمراقبة اللاعب مصطفى عبده ففرضت عليه رقابة مشددة راقبته كظله وكنت عنيفاُ معه في بعض الأحيان ولم يستطع أن يقدم أي مردود في تلك المباراة وما أن أطلق الحكم صافرة النهاية إلا وأتاني وقال ( يا كابتن إنت ليه بتعاملني بالقسوة دي ؟) فرددت عليه ( أنا أنفذ تعليمات المدرب) فما كان منه إلا أن ضحك وانصرف .

عندنا صاحبنا بانكر ..مدير فرع لاحد البنوك في الخرطوم..
هلالابي كبير...وكان مكتبو تجمع للهلالاب ومن ضمنهم لاعبي الفريق..
مرة كان مافي ..
لما رجع المكتب..نائبه (مسطح في الكورة تماماً) قال ليهو يا اخي في واحد جا هنا يسأل منك...
لما قلت ليهو انت منو ...استنكر وقال لي ما بتعرفني انا منو..؟؟
قلت لا والله ما بعرفك ..
قال ليهو انا (فلان) لاعب الهلال
بعد فترة جا جمعة جينارو حارس الهلال وقعد مع صاحبنا في المكتب
لما مشى
صاحبنا نادى نائبه وقال ليهو ما عرفت ده منو؟؟
قال ليهو لا والله ما عرفتو..

قال ليهو ده هيثم مصطفى

نائبه قال ليهو انا ما مسطح للدرجة دي يا ريس


هههههههههههههههه

ود الشغيل ما يهمك ياخ البوست حقك

ود الشايقي لما انتقل للهلال في مباراة هلال مريخ رجع كورة قوية لسبت كادت تسكن الشباك صاح فيه سبت

ود الشايقي انت قايل نفسك لسة في المريخ

الهلال لاعب ضد التحرير بدار الرياضة امدرمان علي ايام زكي صالح وعبد الخير صالح عبد الخير مالعب الشوط الاول والهلال مغلوب 2 صفر

قالوا سمع بانه الهلال مغلوب 2 صفر ركب عجلته وجا دار الرياضة لبس ودخل غيار لاحد اللاعبين وفي ربع ساعة احرز 3 اهداف كفلت الفوز للهلال بالمباراة طلع خلع الفانيلة وهو بعاين لناس التحرير قال ليهم

بلاش قلة ادب!