بالمناسبة قصة مقنع الكاشفات

05:21 PM July, 31 2016

سودانيز اون لاين
عبدالحفيظ ابوسن-no where
مكتبتى
رابط مختصر

والتحية
ل
رجال
نساء
وطني
من دفعهم شظف العيش وقهر السلطة لمفارقة الوطن
واخص خصيصا
اولئك النساء والرجال بنواحي جدة
هتافية ؟ نعم!
ااعادة قراءة للتراث

قصة مقنع الكاشفات.
قصة حقيقة بطلها شيخ جزيرة ساردية( شندي ) ادريس سليمان فضل الله وكان الاستعمار الانجليزي في اوج طغيانه وشدته وكان يفرض ضريبة تسمي الطلبة علي الجميع وهي سبعة قروش وكانت المراة التي لاتدفع يتم جلدها عشرة جلدات امام الملا ..فرفض شيخ ادريس ان تجلد اي امراة تحت شياخته فتم استدعاؤه الي مركز المديرية بربر وعقدت له محكمة خاصة وخير بين يجلد هو 100جلدة او تجلد النساء العاجزات عن السداد . وافق ان يجلد هو ولا تنكشف امراة واحدة امام ناظريه وهو علي قيد الحياة .بالحكم عليه ارادو اذلاله ظنا منهم عدم تحمله للسوط خاصة انه شيخ كبير في السن . وقف الشيخ ادريس وركز للسوط حتي اكملت المائة جلده متكئا علي عكازه ولم يتزحز ولم يتململ الامر الذي لفت نظر واعجاب مامور المركز وعلي الفور اصدر قرارا باعفاء جميع نساء الجزيرة من الجلد . عاد الشيخ ادريس لموطنه واحتفل الناس بشجاعته ونظمت فيه عمته خادم الله بت بابكر اغنية مقنع الكاشفات
غنيت بجيب نمات… .لي دود الكواني الضارب الليات… آب امنة حوبتك جات… يامقنع الكاشفات.
كباس درايز ام حبر يا دابي الجبال
قلبك صميم من حجر يا دود الوعر

زينب تجر النم 
فوق تور العواصات الـبكرف الدم
في محكر دواس حاشاهو ما بنزم
ساطور الرجال جرعة عقود السم
يادابي الجبال

زينب تجر القول 
فوق شلبي العيال الوافر الشنقول 
يا جبل الداير المـــــا بنطلع لزول

غنيت بغباش يا مطر السواري
الات هبـــــــــــــــــوب ورشاش 

يا قصبة فراش أل للضلع قصـــــــــاص
ست زين القبيل قبل الناس تعرف الناس

وكبس درايز ام حبر يا دابي الجبال
قلبك صميم من حجر يا دود الوعر
الواعي ما بوصو 
من أمس الضحى جوني الجنود ساقو
يا مقنع ولياتو ...

تور بقر الجواميس العليك الرك
ياعقد الحديد للحلــــبي ما بتنفك
يامقنع ولياتو ...

تورك يا ام رشوم في الحلق عشرق
دقيت الجسر وحاشي الكلام عن حق
يا مقنع ولياتو ...

غنيت وبجيب مسدار
المكن اب سكاسك 
جنن مدافع النار
يا مقنع ولياتو ...

لقوك بحر الكحل
قالوك ما بتندار
أمانة يا بطل
ما هجرت ليك برجال
يا مقنع ولياتو ...

غنيت بجيب نمات
وبجر القول عليك
يا مقنع الكاشفات

يا أسد الخلا يا الحجر اليويات
ساقوك للشــــنق يا أبو أمنة
حوبتك جاتك

غني وشكريهو يا خـــــــــدرة الجوخ
طلع لي عشاري الليلة مسكوا يفوح

ما خطف البدين وما جفل المجروح
سيفو بياخد الخودة ومعــاها الروح

أمك ولدتك ما ولدتــــــم اتنين
تسلم لي يا تلبي البكيل العين
ما بتوه وبيــــــــــــــــن البين
دقيت الجسر لمتـــعة الحيين

غنيلو يا بنية
من قومة الجهل 
ماقاملو بنية

وقت الجند جو وقفولو سلــــطية
استعد وركز قال أخوك يا رقية 

الواعي ما بوصوا

ياسلام ياسلام
القومة لسيرة إدريس وعمته بت بابكر
الضهب دهب كاتب المقال الشين ده يستحق ١٠٠ جلدة
تحياتي ابوسن

من سخرية القدر بناتنا إتجلدن في زمن البشير

حبابك حيدر
الكلام في النسوان بهذا التعميم تعدي علي حرمة الاسر
وصفاقة
عيب والله
لكن اهو الناس بقت تسردب وتاكلها في اللباد
سوري يسئ لينا نختلف في الاساءة ونقول من حقو

صحي يا حيدر
جلدهن
وسجنهن
رغم انهن في مقام احفادهم
ببقا ماهو تعريف الاخلاق السودانية والرجولة
وسد الامر لغير اهله

القصيدة من نظم رقية محمد امام شقيقة ود حبوبة و نظمتها لحظة الاعدام بالمشنقة. و هذا واضح جدا في القصيدة (جابوك للشنق يا ابو امنة حوبتك جات)، لاحظوا ما جابوك للجلد. بادي محمد الطيب هو من غنى هذه القصيدة و هي مسجلة في الاذاعة باسمه.

الواضح انو في تداخل في القصيدتين
بداية القصيدة اظنها تخص ادريس ولكن نصفها الاخر لودحبوبة وهي قصيدة شهيرة مغناة .. الواعي ما بوصو

حبابك ود اب سن..

الركز للجلد منذ زمن الاتراك ربما تكون هي اساس ظاهرة الجلد بالسود في مناطق نهر النيل وبقية مناطق السودان..

حيث كان الاتراك وبعدهم الانجليز يجلدون المتقاعسين عن دفع الضريبة في وسط الحلة ويجمعون كل اهل الحلة من نساء ورجال وفتيات وفتيان..

فكان الرجل و الشاب يبدي صبرا كبيرا في تحمل الضرب ويركز ركزة حيطة كما يقولون لئلا تلومه بنات عمه ..

حتى ان الاغنياء منهم اصبحوا لا يدفعون الضرائب حتى لا يوصفوا بانهم " خافوا من الجلد"..

تلك ربما تكون المؤشرات الاولى لظاهرة الجلد بالسوط في الاعراس والمناسبات ..

ثم ..

ظاهرة مقنع الكاشفات هي ظاهرة قديمة امتازت بها كل القبائل العربية بالسودان ..

وفعلا القصة عليها خلاف ما بين ود حبوبة بالحلاويين وود بابكر في شندي ..

ولكن اذكر ان جدي عمر اطال الله عمره اخبرني عن قصة العمدة الحسن ود ضبعة الذي "قنع" بعض نساء الحسانية في غرب شندي ..
وذلك انه جاء المفتش الانجليزي بالمتمة وجمع العمد والمشايخ في قضية ان شابين من الحسانية قد سرقا سلاح ضابطتين انجليزيين .. وفي اثناء المحاكمة جاءت اخواتهما وكشفن عن شعرهما امام المحكمة وفيها العمد والشيوخ ومن ضمنهم الحسن ..
فقام الحسن ود ضبعة وحده وسط ذهول الاخرين و"وقنعهن" اي البسهن طرحهن .. وتصدى للامر ضد المفتش فغضب المفتش جدا واراد ان ينكل بالحسن فقال له الحسن : هذا " سالفنا" يا سعادة المفتش ويجب ان تحترمه ودون ذلك موتي ..

وفعلا احترم المفتش الامر وعفا عن الشابين ..

مسالة "مقنع الكاشفات" عادة سودانية اصيلة تستحق التبجيل ..

احترامي لك

عبدالحفيظ ابوسن





العمدة الحسن ود ضبعة الذي "قنع"
بعض نساء الحسانية في
غرب شندي .
تحياتي الأخ ،
عادل ابراهيم احمد
لي عودة ،
بإذن الله تعالي ،

،،،،،،،







عزالدين عباس الفحل
ابوظبي

تشكر عادل
وحبابك
لا افتي
ولكن اظنو سلوك سوداني اصيل وليس فردي .. فتتعدد القصص لشيوعه في عدة مناطق . وهذا يؤكد شيوعه
وهو يعني احترام المرأة وسترها والدفاع عنها
هذا السلوك الذي ميزنا قديما ولازال البعض يحتفظ به . فكم سمعنا عن قصص حديثة يتنازل فيها الرجل عن حقه حتي لايقال انه وقف خصما لامرأة . ولا يرد شتيمتها ناهيك علي ان يبادر هو بشتمها والحط منها
البوست المعني رغم انه يسئ للمرأة فهو ايضا يسئ للرجل

مرحبا عزالدين
وحبابك
وننتظرك

عبد الحفيض تماما زي ما قلت العمدة ود ضبعة ما كان واحد و ود حبوبة ما كان واحد
السودان دا كلو كان ود ضبعة و ود حبوبة
عشان كدا كل التفاسير الوردت في البوست دا ممكن تكون. صحيحة...ياخي في الجامعة كان في جنايني شغال في بيت د. عبد الله الطيب لمن كان مدير
ياخي الزول دا ورغم. محدودية مرتبو. كان لمن يجي يلقانا. بنذاكر تحت واحدة من لمبات المينرود يمشي النشاط ويجي مالي الصينية شاي وقهوة وسجاير ويقول لينا. يا وليداتي كان دايرني اجي اغسل ليكم هدومكم ما. عندي مانع. بس. انتو
انجحوا عشان ترفعو راسي وراس. البلد دي
بتاعين التكسي بالليل كانوا لمن ينزلونا في البركس عادي كانوا بدل يشيلو حق مشوارهم بيقولوا. لينا عيب نشيل منكم ...نحنا داخرنكم. لي قدام عشان لمن. نقعدانتو البتشيلونا. وبتشيلو بلدكم....دا. كان. السودان. يا عبد الحفيض وديل كانوا رجال السودانوالله هسي الواحد. لو ما مات. من. الجوع يموت من المغسة

كتب كبر ذات مرة :
((
زمان حبوباتنا يا اميرة.. لمن الدواس يقع بين ولاد العم.. الزولة بتمرق وبتشق الصفوف..ناس جاهزة ..وكل زول بيقول انا اخوك يا فلانة..اها زولتنا دي بترمي التوب.. وقعة التوب دي بتحقن دموم ما انزل الله بها من سلطان ، والله صحي..ودي الفكرة الجاية منها حكاية (مقنع الكاشفات)..ودخولك هنا ، بالخير والمطايبة.. اشبه بتلك العادة القديمة..الرمزية دي ذكرتني بيها كلماتك هنا..و اعفى لينا يا بت ابا..حتى لو قرينا ماركس وما بعد ماركس ..فنحن رعاوية ساكت.. والرمز/الدلالة بيعني عندنا حاجات كبيرة وابعد من الحجاج الفلسفي.. شرحو: ابشري بالخير يا بت ابا..!!

))

الأخ عبد الحفيظ
لك الود والتحايا الطيبات
معنى مقنع الكاشفات هو كماتفضلت به مداخلة الأخ عادل ابراهيم
ومقتبس كبر الذي أورده الأخ احمد محمد عمر إذ أنه إرث شعبي
قديم ضارب في القدم ولا ينسب لشخص بعينه وقد مارسته القبائل
السودانية فيما مضى ومازالت قبائل شرق السودان تمارسه حتى
يومنا هذا ويظهر عند الشروع في الإقتتال سواء كان بين قبيلتين
أو حتى بين أفراد فبمجرد أن تستل السيوف إيذاناً بالقتال فتدخل
بينهم إمرأة وتزيح الثوب عن رأسها كاشفة عن شعرها يبادر كل
من المقتتلين وفي تسابق إلى إغماد السيوف ومن أغمد سيفه أولاً
فهو مقنع الكاشفات .. وهي صفة يمتدح بها الرجل كما هو واضح
في قصائد الرثاء الشعبية (المناحة) كالقصيدة التي تفضلت بإيرادها
أعلاه .. وفي حق المرأة يمثل هذا السلوك أعلى تقدير تحظى به الأنثى
إن لم أبالغ في العالم كله ودليل على عزة المرأة السودانية وسمو مكانتها
في المجتمع السوداني .. واشير إلى أني كتبت هذه المداخلة على عجل
والحديث حول (مقنع الكاشفات) يطول ويحلو كثيراً فإن قدرت لي عودة
فسأعود بالمزيد .. تقديري ومحبتي ....

مرحبا عثمان
وحبابك
فعلا السلوك كان منتشر في كل السودان
حين تكشف المرأة عن رأسها فهي تسترجي وتستعطف وتطلب المساعدة . وحتي اليوم المرأة كشف رأس المرأة في داخل البيت لها دلالاتها

مرحب احمد
وحبابك
ما حكاه كبر صحيح وهو تأكيدا لذات فكرة حسر المرأة لرأسها .