الصديق / علي دفع الله

07:11 AM July, 20 2016

سودانيز اون لاين
عبدالحفيظ ابوسن-no where
مكتبتى
رابط مختصر

cc ود المشرف

هل يمكن ان لنا ان نخوض نقاشا لا يفسد ود صداقتنا
معك ومع ودالمشرف
اثق ان ذلك ممكنا لحسن معرفتي بك
ولكن ليطمئن قلبي

حباب ود ابسن
انت يا اخي برفضوا الحوار معاك ..علي الحلف مفروض يدفعوا ليك زي المحللين بتاعين القنوان الفضائية ..بس بكري بدفع للمستنير براه ههههههه
معاك يا صديق ...

وكان العشم ما بيني وبينك وطن حدادي مدادي مزروع ود ومحنة ومعاناة غبش كادحين يكوسو اللقمة من يد كما قال القدال كافر زنيم

عطفا علي بوست ودالمشرف الحردو .. هممت بالرد ولكن يبدو ان الشبكة تٱمرت علي حتي غادره صاحبه
فرزتك من دون الناس لان ردك يمثل رد نموذجي لتيار عريض . وقبل ذلك واولا وخامسا لاني اعرفك جيدا وتعرفني حقيقة ومجازا . رغم بداية معرفتنا الاسفيرية
عموما اعتذر عن المقدمة ولكني اراها ضرورية
إلي اي مدي يمثل لنا الوطن يا صديقي .. هذا الوطن الذي لا يفتأ يزيد عذاباتنا كل يوم . هذا الوطن الذي نخشي فيه ان نعجز غدا عن اطعام اطفالنا . هذا الوطن المبذول خيره لغيرنا دون حدود .. مبذولا لهم حتي لتسديد نفقات ليلة دخلتهم .. ومبذول للاغراب تذاكر طائرات غض النظر عن الوجهة وفنادق خمسة نجوم كاملة الخدمة ونثريات والذي منو والذي لا منو زاتو
وطن من هذا يا صديقي
قال كجراي
فيا وطن الضياع المر
يا نصلا
يمزقني ويكثر من جراحاتي

يوم العيد .. والاسرة بكل اطرافها مجتمعة في بيتي .. جوني الشفع جارين
عمدة ولدي يخطو نحو العاشرة متشاكل مع ود عمتو البالغ الراشد .. مضاربة وشكل ..
سألت ولدي عمدة
مالكم
قال لي
اسامة وهذا اسم ابن شقيقتي قال لي انعل ابوك
قلت ليهو طيب دة ود اختي وانا رضيان ينبذني
قال لي
انت ترضي بي طريقتك لكن انا ما رضيان
طيب نبذو زي ما نبذك
قال لي ما بنبذو لكن بتسدا حقي بي يدي
المهم عالجت المشكلة
وفكرت في منطق ولدي

Quote: لم يكن هؤلاء القوم يبرحون هذه الديار المترامية الاطراف، كانوا قانعين بما قسم الله لهم فيها، وهو كثير، يزرعون النخل في ديار «المحس» و«السكّوت» ويزرعون الحنطة والشعير في ديار البديرية والشايقية والركابيين، ويزرعون الموز في كسلا والبرتقال والجوافة في شندي والذرة في ارض البطانة والقطن في ارض الجزيرة ويجنون الصمغ العربي من شجر الهشاب في كردفان يصيدون البقر الوحشي من جبل مرة، والظباء عند تخوم بحر الغزال، يأكلون سمك النيل الابيض، وسمك البحر الاحمر، يخرجون الذهب من مكامنه في«حلايب» وفي «جبال شنقول»، كانوا يتناشدون شعر «الدوبيت» على الآبار، ويرقصون «الدليب» في ضوء الاقمار، ويرتلون القرآن في جوف الاسحار ويستخفهم الطرب في مديح المصطفى المختار، كانت البلاد تضج في العشيات بثغاء الشياه ورغاء الابل، وصهيل الخيل، وكان الرجل يمشي من «ابوحمد» إلى أبو«دليق» فلا يخشى إلا الله والذئب على غنمه. لكن انظر اليهم الآن يا ابا تمام، في هذه الصالة الرثة، في هذا المطار القميء، في هذه المدينة المهملة، في هذا الوطن الحبيب اللعين». مطار الخرطوم /صالة المغادرة الطيب_صالح // وطني السودان

برجع ليك برواقة ...

فكرة البوست شبه استوعبتها .بس اخليك تكملها

ولي راي سالب في قول الطيب صالح اعلاه .. ولعلك تعلم ان الطيب صالح كانت مواقفه السياسية لا تشرفني . فقد كان مع فصل الجنوب في زمن نميري وقريت مقاله ذلك او لقاء في حينه في احد الصحف . وثم عاد لذات هؤلاء في صالة كبار الزوار نزيلا في الهيلتون ممتنعا او زايغا من كانوا في استقباله من مثقفي هذا الوطن .. حتي كتب زهير السراج اظنه ولا صلاح عووضه ردا علي سؤاله من هؤلاء في مقالة ذيلها بالرد
انت هؤلاء
عموما فالحديث ذو شجون رميت بياضي

ابو العمدة عيدك سعيد
من المتابعين
اذا سنحت الفرصة ممكن نتداخل؟

مرحب محمد حسن
يشهد الله انت من الذين اودهم
اخترت علي لانه سيقيل عثرتي .. ويتحملني
الشدرة كان ميل بتكي في خيتو
البوست للجميع

نهديكم الاتنين ومعاكم دكتور محمد الحسن

كلمات الراحل عبد الله محمد خير

عديله عليك مشاويرك عديله
عديله إن كان قصيرة إن كان طويله
***
عديله عليك محل ما تمشي تمشي
يا عديلة أبقيلو زي الغيمة رشي
أما انا الهاماني راحتك أول الشئ
أنت تأمرني وعلي أمرك بيمشي
***
بس عليك توعدني ما طول بيك غيبه
وعد من انبل حبيب لي اجمل حبيبة
فيك شفت الدنيا قاصيها وقريبه
ومنك اتعلمت كيف لأقدر اجيبها
***
لا متين يا نومي فيك رؤياي تصدق
ولا متين يا شوق موالي قليبي تحرق
تاني جود باللقيا يا زمني المفرق
وتاني يا أجمل صباح في عمري أشرق
***
يا حلاة العشرة وكتين تبقي صح صح
ويا حلاة الريدة وكتين تصفي تفرح
ويا حلاة ليلاً معاك ما درنا يصبح
ويا حلاة صبحاً تكون أنت المصبح
في الربيع قالو الزهور تنضر تفتح
وياربيع في حضنو كم لفاني وارتح
صار يباب بستاني من غيرك مكرتح
غير سموم في ام شير وغير ام شير تكتح
***
حبك الخلاني لي زول ما بجافي
وحبك العلمني أنظم ليك قوافي
حبك أكبر مهر لي طهري وعفافي
أى بحبك واصلو حبك زيو مافي

عشان الناس تخش معانا في الصورة ونجيهك النضمي ادناه رد وددفع الله في بوست المشرف وعذرا لتخلفي التقني مع الاقتباس

دوك المشرف يا صديق
اقدر فيك غيرتك على سمعة وطنك ..ولكن ما كتبه الشاب السوري بخصوص العفن بصراحة دي حقيقة والله لا وراك العفن مع بداية الخريف ...
فعلا الوطن اصبح كوم زبالة كبييير كل المدن .... وصناع القرار ما هاميهم لا صرف صحي ولا صحة بيئة همهم البيع البيع لا تخطيط ولا يحزنون يبيعوا الاراضي في مجرى السيل في نص الخور المهم يبيعوا الحتات زي ما قال الليمبي والي الخرطوم ..
يا دوك والله الوطن بقى يئن من العفن على كافة الصعد ...
باعوض .ضبان .ناموس .ابو الجندب .مرقوت ..مستشفيات عبارة عن وسخ مترادم ومياه طافحة ..
اقول ليك حاجة والله العظيم قبل رمضان الفات دا بعرف تيم من الصحة عاملين طواف ميداني في مناطق الدالي والمزموم عشان يحاربوا مرض الجرب ..ما تندهش الجرب الواحد دا اظن بكون انقرض في العالم من القرن السادس الميلادي ..
الناس جربانة عديييل...
اتصل على اقرب زول بتعرفو انشاء الله الامير توفيق ود قلبا وقول ليه كلمني من برة قصرك لو ما سمعت اصوات الصفادع الان على الحلف اكون زول كضاب ساي..
البلد وسخانة دي حقيقة ..فما تزعل من السوريين ..دا الواقع

مرحبا درديري
وحبابك
تشكر علي القصيدة التي تفيض محبة

إلي اي حد سنقاتل من اجل وطن حر ديمقراطي يسع الجميع
ولي ياتو مكان يمكن ان تقودنا معارضتنا لهذه السلطة
حتي ولو دخلوا جحر ضب خرب !!؟
لا احد ينكر الخراب والفساد الذي يطفح حتي لتشم نتانته وتلمسه لمسا حقيقيا وليس مجازا . لمسا في كل مكان اسواقا او مصالحا ولا سفرا .. تحس به في سؤ الخدمات المدفوعة القيمة سلفا .وفي سلوك الناس !!

تحياتى صاحب البوست والضيوف الكرام

يا علي، مبروك الشفنا صورتك
أمس القريبة دي، واحد زميل اتصل بي قال لي: إتّا موش من أصدقاء الشيوعيين؟
قلت ليهو: بلحيل
قل لي: خلاص اقطع لي تذرة ماشي أحضر المؤتمر السادس
قلت ليهو: بقطعها ليك، لكن تسلم لي علي علي دفع الله
قال لي وصفو لي
قلت ليهو: أخضر طويل بحب ستات الشاي

سلام يا ابسن

سهولة اللجوء للسودان .. ولا نقول بشكل دون مواربة السبهليلة في استقبال اللاجئين دون شرط او قيد او حصر او تقنين هي المدخل الاساسي لتقيم اللاجئ ذات نفسه لنا .
كل دول العالم يتم اللجوء لها عبر بوابة الامم المتحدة . ويتم حصرهم والتعامل معهم وفق شروط وقوانين صارمة له حقوق وعليه واجبات وخطوط حمراء .هنا اللاجئ ممكن يخش ويشتغل ويسكن بدون تعقيد بل وبدون ان يسأله احد . اللاجئين عندنا شغالين ركشات وسواقين واعمال حرة . ولافين في البيوت يبيعو بالتقسيط . ولهم حق حرية التنقل والحركة والعمل ..

مرحبا معاوية
حبابك يا صاحب
ود دفع الله اتشوافنا كم مرة واتوانسنا فكنت احرص علي لقياه متي ما كان طريقي يمر بسنار . علا صورتو الهنا دي سمحة
تحياتي لي مبارك بطري ومبروك لي وليداتك واسرتك

حبابك بكري
غايتو لاقيتو كم مرة ما عزمني عند ست شاي
تعرف مرة ونحن مسافرين نزلنا في الطريق اظنو الحاج عبدالله . خرمانين لي جبنة . واحدة سمحة وبنابرها مليانة وجمبها واحدة كحيانة وشينة ولا معاها زول واحد . قلت لي صحبي نقع المسكينة .. الله عليمك ندمتني علي التعاطف حشفا وسؤ كيل . جبنتها مرة ولا بتنبلع وعادمة اسم البهار وسعرها عالي واتلاءمت علينا كمان . في الرجعة وقعنا السمحة وطلعت سمحة !

تحياتي صديقي ابسن تاني
لحدت اللحظة ما قادر اجمع انت مع وجهة النظر بتاعة دك.المشرف القايلة انو عفننا نحن اولى بيه حتى ولو انتشر وعم القرى والحضر نزعل لو في واحد اجنبي اتكلم عنو ..ولازما جينات الوطنية تنتصر ونقيف وقفة رجل واحد نظام ومعارضة ضد هذا الناشر لي عفننا.
او مع عدم دفن الرؤوس في التراب لو واحد شكر ليه سوداني ننقل الخبر ونفرح ونهلل ولو واحد ذكر واحد من مشاكلنا وقصورنا وازماتنا ننتفض نفضة ملانة زعل وندق سدرنا ونوريه الحد في الطندبة .
انا معارض للنظام دا حتى قبل اعرف يعني شنو معارضة .. كنت في تانية ثانوي وبعد الانقلاب بي كم شهر اصبح ابوي الله يرحمو من معتقل لي معتقل ومن استجواب اي استجواب لحدت ما اتوفي وكان كل مناه يشوف يوم خلاص الوطن من هؤلاء الاوغاد .. اذكر جيدا بعد تم فصلي من الجامعة سياسيا كان فخور جدا كانت الوالدة اطال الله كانت بتقول ليه انت خربت الولد دا ..ومن عجايب الحاجات بعد اتخرجت من الجامعة حصل تم اعتقالنا انا والوالد مع بعض اظرف حاجة كان بنوموه هو ومعاه الناس الكبار في ناموسيات ههه وكانو بتريقوا علينا ..الله يرحمو كان زول جميل .
اسف على التداعي دا لكن الاشارة للكلام دا جات لانو الواحد جبل على معارضة هذا النظام الحقير وليس حبا في المعارصة ولكن مافي اي مؤشر طيلة ال27 سنة الكالحة اي مؤشر ايجابي يقودك على اسواء الفروض عشان تقول احسنتم دمار حروب فقر اقصاء نزوح تهجير هجرة مرض عفن تفكك اسري تشرد طلابي زيادة اطفال الشوارع والاطفال مجهولي النسب تدني على مستوى التحصيل الاكاديمي انهيار المرافق الصحية انهيار المشاريع الزراعية والخدمية ..في المقابل ازدهار ونمو الطبقة الطفيلية الاسلاموية وتمددها الاقتصادي والسياسي وعلى كافة الصعد ..لم يتركوا خرم ابرة الا وملوه بالموالي والمندغم ...
بعد كل هذا الانهيار والمسبب معلوم اجي ازعل من ضيف او لاجيء او مقيم شاف العفن والوسخ يحاصرو في الشقة والشارع والجامع والكنيسة والمستشفى والحامعة والسوق والمطعم اقول ليه لا . افتح الله له مطلق الحرية ان يقول ما يضايقه نشر صور او التعبير عن الاستياء عن العفن ليس خط احمر ولا امن قومي بل هو حق اصيل لكل من شاركنا السكن او الدراسة في هذا الوطن المسلوب والوسخان لحين زوال المسبب. .
واصلا ما بقيل اي تبرير من ناس المواطن شريك في العفنو..المواطن بدفع كل التزاماتو في كل شيء وايضا بعمل نفاير وكلنا اشتغلنا في تعمير المدارس وتنظيف الشوارع ولكن الحال صعب ومافي مواطن بقدر يغيب يوم كامل لاعمال النفاير لانو بكون خصم على عيشة اولادو ودي الاولوية لهذا السبب كل ما حاق بالوطن سببوا الاساس هو النظام عليه عدم زعلنا من هذا السوري ليس كية في النظام ولكن دا الحال والوضع .
بجيك تاني ...
شاكر صديقي معاوية لجلب الصورة كان تكلمنا كان اديتك واحدة بالعراقي والسروال وسايق البابور في المشروع نواحي جبل دود..
صديقي المستنير حا افرد ليك مداخلة كاملة عن علاقتي بي ستات الشاي ..
مودتي ابسن..

كما لايفوتني اسلم واحيي صديقي الاديب الوريف ابو الدر ود كباشي . وحقيقي من الناس الجميلين االاواحد يتمنى يلاقيه ويقالدو ويجر معاه عشرة ونسة..
اتمنى التقيك والله .
كن بخير يا زول يا نيل ..

سلامات
عبدالحفيظ علك طيب يارجل
يا اخي بعد اذنك ارد علي الجزئية دي من كلام الصديق علي دفع الله

Quote: ولكن ما كتبه الشاب السوري بخصوص العفن بصراحة دي حقيقة والله لا وراك العفن مع بداية الخريف ...

سلامات يامواطن
يا اخوي دي جليتها واقف علي قول ناس سودانيزاونلاين .
يامواطن السوري دا ماشغال عامل بلدية يحفر ويردم المجاري في حي الجنينة ولا مايرنو في سنار ولا شايل باغة زيت مقصوصة وبيغرف البلاعات عشان يشم عفن المجاري والبلاعات ولا بشيل اكياس الزبالة ولا ساكن جنب كوشة عشان يشم ريحة عفانة ولا مشي المستشفيات الفيها الدبان والناموس والباعوض ولا ولا ولا.
الزول لاجئ لاجئ يامواطن مأكل وشارب ونايم ونايم دي ختا ليها ستين خط يا مواطن. وبأكل في افراح مول وبتعالج في رويال كير وده كلو علي حسابك وحسابي وحساب ود السن وعلي حساب بقية السودانيين التعابة الغلابة تقول لي كلامو حقيقة.

الزول دا كلامو ده ماعندو اي علاقة بالكلام الكتبو انت يا مواطن ده استحقار واذدراء وعدم احترام للبلد احتضنته يجب ان لا نجامل يا مواطن .الوسخ والعفن الانت بتقصدو ده حيكنسو الشعب السوداني ولو طال الزمن.
تحياتي

مرحب وددفع الله
ورحم الله والدكم واسكنه عالي جنانه
فرق يا صاحب حسب تقديري
فرق بين النقد والاساءة . لم نسئ نوايا منظمة الشفافية العالمية حين تحدثت عن فساد الدولة .. ولم نشكك في التقرير الذي تحدث عن ان الخرطوم اقذر مدينة في العالم . تقارير محايدة وباردة برودة المعادلات الرياضية . ولا ندفن رؤوسنا تحت ركام الوطنية الساذجة بل نعلم اسباب الفساد والقذارة ونسعي بشكل ايجابي لقلع تلك الاوساخ
بعيدا عن منشور السوري فهذا ليس قصدي ولكن اتحدث عن موافقتنا بالاساءة والحط من قدرنا بإعتبار ذلك حقيقة بلجاء
لعلك تذكر او لا تذكر رفضي للاحتفاء بالراعي .
يمكن ان اناقش قول السوري هل هو نقد او اساءة .. وهل يستحق الرد ام لا .. وهل هو رأي فردي ام جماعي
لكن قطعا ارفض بشكل شخصي الاساءة للوطن غض النظر عن موقفي من السلطة . فالوطن ليس للسلطة بل هو ملكنا وماهم الا مرض عابر ونحن قادرين علي اقتلاعه
لله در السياب
الشمس اجمل في بلادي
من سواه
والظلام !
حتي الظلام
فإنه يحتضن العراق
ف شنو يا وددفع
ماشين ودشن
وهظارو خشن
سموم وسوافي
شن الحبك فيهو
ما الحب في زاتو مبرر كافي

مرحب عودو
وحبابك
ولو جينا لموضوع اللجوء ده براهو شبهة فساد . ناسنا لاجئين في بلدهم بدون امتيازات اللاجئ الاجنبي وما قدامهم غير التسول والتشرد والنوم في العراء

Quote: ولو جينا لموضوع اللجوء ده براهو شبهة فساد . ناسنا لاجئين في بلدهم بدون امتيازات اللاجئ الاجنبي وما قدامهم غير التسول والتشرد والنوم في العراء

سلامات
ود ابو السن
يا اخوي انا بعرف ظروف اللجؤ واللاجئين والمشردين والنازحين كويس لكن ده ما الموضوع وبيعرف انو السودان فيها فساد ريحتها ازكمت الانوف بعدين يااخي موضوع فساد واهمال الحكومة للخدمات للمواطن دي موضوع سوداني بحت ومشكلتنا نحن السودانيين .
طيب مافي نازحين ومشردين سودانينن من دارفور وجبال النوبة عندكم في كوستي ليه ما في واحد كتب (من قلب ولاية النيل الابيض من قلب العفن كوستي اشعر بالعفن ) ذي ما كتبها السوري .
ياود ابو السن ما نرفضه هو الاساءة والاذدراء والافتراء واهانة السودان دولة وشعب من واحد غريب السودان وفر ليهو السكن المعيشة ويصفنا بالعفن .

متفقين يا عودو
المثل بقول ليك
يدك في خشمو واصبعو في عينك
ف شنو
البهمني في الامر اعتزازنا بوطننا وعدم قبول الاساءة فيه . مافي زول بقبل الاساءة في امر عزيز عليهو ... زي ولدي عمدة رغم موافقتي لكنو هو بتحدث عن امر محبتو

A bubakr Mohamad
تحياتى ى شيخ العرب شهيدى الله انت من الناس البخلونا نتصفح الاونلاين
تحياتى ليك ولضيوفك
دمت بخير
أعجبني ·
كتر خيرك والله يكرمك

صديقي المواطن محمد نور عودو
عمت مساءا
خليني اول شيء احترم وجهة نظرك ..ومن ثم اختلف معاها توتالي ..
حا تقول لي لي شنو ..
حا اقول ليك انو اللاجيء دا من حقو يعبر عما راءه من جمال او قبح . ما بتحتاج كل هذه الحملة المنتشرة على كل مواقع النواصل الاجتماعي ..واصلا ما عبر عنو حاجة حقيقية مش كضبة عشان نزعل متهم ..هسي السوري دا لو لما فينا شكر عينة شعب كريم مضياف وكريم ودي اصلا خصالنا كان احتفلتو بيهم ..او كضب علينا وقال السودان بلد نضيفة عليكم الله بتصدقوا ..
بس خلاص
مودتي التي تعلم ..

مرحبا ود دفع الله
هدف البوست ليس قبول او رفض الحديث عن السودان من لاجئ فتحنا له ذراعينا .. ولا تقيم حديثه او نقدا ام شتما .. ولكن في قبولنا الحديث عن الوطن بسؤ بإعتبار ان ذلك يمس السلطة ولا يمسنا .
قديما يا صديقي قبل هؤلاء وذلك ! كانت الدعارة علنية . رغم ضيق سكان الاحياء منها . ولكن لا سلطة تدعم موقفهم لترحيلهم بحكم القانون . وكن بعضهن يعرضن اجسادهن بشكل معروف في الشوارع وامام ابواب منازلهن . سافرات متعريات
ولكن لا يقبلن ابدا ان تصف واحدة منهن بعاهرة ( ش....ة ) يرفضن لدرجة الشجار العنيف واللفظ الجارح المتوشح سيفا !

ابسن رفيق همي وغناي وبشتنتي وشحتفتي ...
اريتك طيب وسالم
التحدث عن الوطن بسؤ ابدا ما بنقبلوا تب وحات خوتك ...
بس عليك الله فتش لينا عن الوطن كان لقيتو قول عوووووووك ..
الوطن في غربة قسرية ولو هؤلاء الاوغاد ظلوا على دفته ثق تاني في الخريطة ما تلقاه ...
النوة جات وبشايرها بانت يا نلحقوا يا كمان بروح في حق الله ..
عاين وتفرس وغوص عميقا في حال البلد المايل حا تلقى الفرزعة هي المتوقعة وهؤلاء الاسلاميون ولا هاميهم شيء ..دي حقيقة ليست تشاؤما او احباطا ..شفت هذا القشير علي الحلف لو قالوا ليه افصل دارفور وبنفكك من الجنائية افصلوا ليك قبل ان يرتد له طرفه ...
رئيس مبتز من الغرب ومن مجموعتو الحاكمة معاه بملفات قذرة ( dirty file) سواء منو او من اقرباؤه .. شوف الرئيس المبتز دا لحدت اللحظة كل الفساد والوسخ والعفن في نظامو ما بقدر ياخد اي خطوة ..مكبل بي ملفاتو ..وعقلية هؤلاء التافهون نفس عقلية العصابات ما بخلوك الا يسجلو ليك ملف عشان ما تقول بغم ..
ارجع واقول انو احساسنا بالوطنية الله يستر عليه من التناقص يا اخي زمان لمن تسمع وطنا الباسمك كتبنا ورطنا شعرة جلدك بتكلب زي ما بتقول حبوبتي بت امحدحمد .هاجرنا ولفينا العالم وجيناه حبا فيه لكن والله ما عارف نحن العاقين ولا الوطن ... اكيد نحن ابناؤه العاقون ..
ابسن يا صاحبي الجميل خليه السوري يقول قولو لانه دا واقع الحال والحق ما بزعل .
اقول ليك قولة خلينا نتداعى في البوست دا تداعي خليه ملان حب حسرة خوف عن حب الوطن ..بس سؤالي قايم انت حاسي بي حب الوطن ..خسمتك بالرسول كان ما جاوبت

بجيك تاني وتالت
مودتي يا ابسن

وددفع الله
بجيك بس ماهسة
وحياتك وحياة خوتك هذا الوطن لازال مكانه صميم الفؤاد رغم العفن البتلب فوقنا من شرف الفنادق
هذه الخرطوم التي لا تشبهني ولا احبها ولكني اعزها لانها عاصمة حبيبتي
رغم الغناء المخنث المستشري في اركانها .. رغم رغد عيش صعاليكها وشذاذ افاقها منعدمي الاخلاق والوطنية لازلت اعزها
ففي اطرافها لنا احبة
ف يا علي
نحن قادرون
رغم الصعوبة المتبدية من ثقل مهمة الكنس
و
غني يا خرطوم وغني
وشدي اوتار المغني
تلك ذكرياتنا
لن نبيعها لهم
وسنأتي
وتجي يا محمد
وتــَجــِـــى يـــَامـُــحُــــمَّـــــــدْ مـِـتـْــــــل الـــبـَــــــريـــــــق
لـُــونــَــــــــــك شَـــــفـَّـــ ودَرْبـــَـــــــــك هـِـــــمـِــــــــــــل
كـَــلـِــمْـــتــَــــك هـَــانـَـــت مِـــتــْــــــل الــنَــعـِــيـــــــــــق
وصُـــوتــَــــــك بـــَـــــحَّ وصَــــبــْــــــرَك كـِــمـِــــــــــــــل
وتـَـجـِــى يـَـامـُـحُـــمَّــــــــدْ داخـْــــــــل الــفــَـــريــــــــــق
ورَجـْــــعــَـــــــــــة دَارَك لــَــــــــــــــمْ الـــشَـــــــمـِـــــــــــل
عــَـــرَقــَــــــــــك نـــَـــازف مِـــتــْــــــــل الـــسَـــلـِـــيـــــــق
وسـَــــــــارت صـُـــــوتـــَـــــك سـَــــــــــرت
تــَـصَـــفــِّـى حـِـــسَـــــــابـَــــــك مِـــــن وجـَـــــــــديـــــــــد
وتــَجْــلــِـــــــد تـَـجْــــلـِــــــــد لامَــــــــــنْ تــَـفـِــــيــــــــق
تــَـخَـــلـَــــــصْ حــَـــقَّـــــــــك قـَــبــْــــــل الـحَـــــــريــــــق
ضَــــربـْــــــةْ الـحَــــــــقْ إن صَــــــــابــَـــتْ تـَــعـِـــيــــــــق
وجـُـــــرْحـَــــــــــًا نازف مـَــــا بــِــنــْـــدَمـِـــــــل
طـَــلـَــبــْــــــــتَ الـــرِّفــْــقـَـــــــــه وزَاد الــطـَــــريـــــــــــق
لـِـقـِـــيـــــــتْ الــحَــــــبْ فــى بــِـــيـــــــتْ الـــنـَّـــمـِــــــــل

Quote: الوطن في غربة قسرية ولو هؤلاء الاوغاد ظلوا على دفته ثق تاني في الخريطة ما تلقاه ..

سلام المواطن علي دفع الله
يا مواطن لاتأيس
سيذهبون غدآ ويبقي الوطن
لاتأيس ياصديقي
وسلامات مجددآ ياود ابسن

تعرف يا عودو
سعت هذه السلطة من بواكير عمرها لقتل روحنا وقيمنا . ولكننا لا نزال نبرأ جراحنا بقليل من الشعر والغناء والقراءة . نقاتل اليأس والاحباط واللاجدوي
لن ينتصروا علي ارواحنا وان هزموا اجسادنا

السلام عليكم صاحب البوست وضيوفه الافاضل .
من بعد اذن صاحب البوست .

الاخ / الاكرم " ابو علوة "
لك مني اصدق التحايا.

عطفا علي رايك هنا وهناك . فيما يختص ( باسأءة اللاجيئن السورين ) .للوطن .
طبعا يا ابوعلوة . انا معك قلبا وقالبا . فيما يخص العفن والوسخ في بلادنا للاسف .
لكن في نفس الوقت لانقبل بمثل حديثهم هذا . حتي ولو كان صحيح .

انا شخصيا عشت في بلاد الشام . واعرف تماما ماهي بلاد الشام . عشت فيها ودرست فيها ... وتجولت في ساحاتها من المرجة ، وغيرها . في عصر والد طبيب الاسنان هذا .
وعندهم الفقر ، وعندهم الذل ، لكن لايقبلوا . باي حال من الاحوال بان يسئ احدهم الي بلدهم .

وزي ماقلت انت . نحن مشكلتنا في النظام القائم ، النظام المجرم ، النظام الفاسد . وليس مع السورين . ( لكن من المفترض ان يحترموا المكان الذي ااؤاهم . وحفظهم من البراميل المتفجرة ، وصواريخ الاسد .

وزي ماقال د . المشرف :

Quote: انا بتكلم عن بيتي فما بالك بالوطن

تقبل تحياتي ابوجدو.،،،،

مرحبا كاروي
وحبابك
تشكر

Quote: ﺍﻟﺴﻮﺩﺍﻥ ﻋﻠﻲ ﻟﺴﺎﻥ ﻣﻐﺘﺮﺏ ﻋﺎﺋﺪ ﻣﻦ ﻋﻄﻠﺘﻪ ﺍﻟﺴﻨﻮﻳﺔ .. ﺑﻌﺪ ﺍﻥ ﺳﺄﻟﺘﻪ ﻛﻴﻒ ﺍﻟﺒﻠﺪ ﻓﻜﺎﻥ ﺍﻟﺠﻮﺍﺏ : ﺑﻨﻘﻮ .. ﺑﺎﻋﻮﺽ .. ﻏﺎﺯ ﻣﺎﻓﻲ .. ﻣﻮﻳﺔ ﻣﺎﻓﻲ .. كهرباء مافي .. ﺯﺭﺍﻋﺔ ﻓﺎﺷﻠﺔ .. ﻛﺒﺎﺭﻱ ﺿﺎﺭﺑﺔ .. ﺷﻮﺍﺭﻉ ﻣﻜﺴﺮﺓ .. ﻋﻄﺎﻟﺔ .. ﻋﻨﻮﺳﺔ .. ﺟﻮﻉ .. ﻣﺴﺘﺸﻔﻴﺎﺕ ﻣﻘﻔﻠﺔ .. ﻣﺪاﺭس ﻋﺒﺎﺭﺓ ﻋﻦ ﺭﻭﺍﻛﻴﺐ .. ﻓﺴﺎﺩ ﺍﺩﺍﺭﻱ .. ﻓﺴﺎﺩ ﺍﺧﻼﻗﻲ .. ﻛذﺏ .. ﺳﺮﻗﺔ .. ﺩﺟﻞ ﻭﺷﻌﻮﺯﺓ .. ﻓﻨﺎﻧﺎﺕ ﻭﺭقاصات ﻭﻏﻨﺎﻳﺎﺕ .. ﺍﻟﻜﻮﺭﺓ ﻣﺎ ﻧﺎﻓﻌﻪ ﻟﺤﺪﻱ ﺍﻟﻠﻴﻠﺔ ﻣﺎ ﺟﺎﺑﻮ ﻛأﺱ ﻋﺮﻗﻲ .. ﺩﻗﻴﻖ ﻓﺎﺳﺪ .. ﺩﻭﺍﺀ ﻣﻨﺘﻬﻲ ﺍﻟﺼﻼﺣﻴﺔ .. ﺑﺮﻭﻣﻴﺪ ﺑﻮﺗﺎﺳﻴﻢ ﻣﺨﻠﻮﻁ ﺑﺎﻟﺮﻏﻴﻒ ﻣﺶ ﺭﻏﻴﻒ ﻣﺨﻠﻮﻁ ﺑﻲ ﺑﺮﻭﻣﻴﺪ ﺍﻟﺒﻮﺗﺎﺳﻴﻢ .. .. ﺟﻴﺶ ﺿﻌﻴﻒ ﻣﺎﻗﺎﺩﺭ ﻳﺤﺮﺭ ﻗﺮﻳﺔ ﺧﻠﻰ ﻳﺤﺮﺭ ﻣﺪﻳﻨﺔ .. ﻃﻴﺮﺍﻥ ﻣﻨﺘﻬﻲ ﺍﻟﻄﻴﺎﺭﺓ ﺑﺘﻘﻊ ﻓﻲ ﺍﻟﻤﻄﺎﺭ ﻗﺒﻞ ﻣﺎ ﺗﻄﻴﺮ .. ﻋﺴﺎﻛﺮ مرور ﻋﺒﺎﺭﺓ ﻋﻦ ﻫﻤﺒﺎﺗﻪ .. ﺳﺮﻃﺎﻥ .. ﻓﺸﻞ ﻛﻠﻮﻱ .. ﺍﻧﺘﺤﺎﺭ .. ﻃﻼﻕ ﺑﻲ ﺳﺒﺐ ﻭﺑﺪﻭﻥ ﺳﺒﺐ .. ﺗﺸﺮﺩ ﺍﻃﻔﺎﻟﻲ .. ﻭﺗﺸﺮﺩ ﻧﺴﺎﺋﻲ .. ﻭﻫﺮﻭﺏ ﺭﺟﺎﻟﻲ .. ﻋﻤﻠﺔ ﻣﺎﺗﺸﺘﺮﻱ ﺣﻼﻭﺓ ﺣﺮﺑﺔ .. ﻟﺒﻦ ﻣﻐﺸﻮﺵ .. ﻧﻔﺎﻕ ﺍﺟﺘﻤﺎﻋﻲ .. ﺍﻟﺪﻋﺎﺭﺓ ﻓﻲ ﻓﻲ ﺃﻭﺳﺎﻁ ﺍﻟﺠﺎﻣﻌﺎﺕ .. ﻭﺍﻃﻔﺎﻝ ﺍﻟﻤﺎﻳﻘﻮﻣﺔ .. ﺳﻤﺎﺳﺮﺓ ﻓﻲ ﺍﻟﺪﻻﻟﺔ ﻭﻓﻲ ﺍﻟﺤﻠﺔ .. ﻭﺳﺮﻗﺔ ﺷﺒﺎﺷﺐ ﻣﻦ ﺑﻴﺖ ﺍﻟﻠﻪ .. ﻧﺪﻯ ﺍﻟﻘﻠﻌﺔ ﺷﺨﺼﻴﺔ ﻗﻮﻣﻴﺔ .. ﻭﺍﺣﻤﺪ ﺍﻟﺼﺎﺩﻕ ﺳﻔﻴﺮ ﻟﻠﻨﻮﺍيا ﺍﻟﺤﺴﻨﺔ .. ﻫﻴﺜﻢ ﻣﺼﻄﻔﻲ ﻣﻦ ﺍﻟﻬﻼﻝ ﻟﻠﻤﺮﻳﺦ .. ﻓﺎﻃﻤﺔ ﺷﺎﺵ ﻭﺍﺣﺪﺓ ﻣﻦ ﺭﻣﻮﺯ ﺍﻟﺮﻳﺎﺿﺔ .. ﺷﻴﺦ ﺍﻟﻠﻤﻴﻦ ﻣﻦ ﺣﻨﺔ ﺍﻟﻨﺴﻮﺍﻥ ﺍﺻﺒﺢ ﺳﻔﻴﺮ ﺍﻟﺴﻮﺩﺍﻥ .. ﺑﻨﻮﻙ ﺭﺑﻮﻳﺔ .. ﻣﺸﺎﺭﻳﻊ ﺍﺳﺘﺜﻤﺎﺭﻳﺔ ﻭﻫﻤﻴﺔ .. ﺗﺸﻐﻴﻞ ﺍﻟﺨﺮﻳﺠﻴﻦ ﺍﺻﺒﺢ ﺣﻠﻢ .. ﻋﺮﺱ ﺑﺎﻟﺪﻳﻦ ﻭﻻﺩﺓ ﺑﺎﻟﺪﻳﻦ ﻭﻃﻼﻕ ﻋﺸﺎﻥ ﺍﻟﺪﻳﻦ .. ﻋﻘﻮﻕ ﻭﺍﻟﺪﻳﻦ .. ﻃﻠﺒﺔ ﺍﻟﻤﺪﺭﺍﺱ ﺑﻀﺮﺑﻮ ﺍﻟﻤﻌﻠﻤﻴﻦ .. ﺍﺳﺒﻴﺮﺍﺕ ﺻﻴﻨﻴﺔ ﻣﻐﺸﻮﺷﺔ .. ﻟﺤﻮﻡ ﺣﻤﻴﺮ .. ﺷﻌﺮ ﻣﺴﺘﻌﺎﺭ ﺣﺒﻮﺏ ﺗﺴﻤﻴﻦ .. ﻭﺣﻮﺍﺟﺐ ﻣﺮﺳﻮﻣﺔ ..ﻣﻨﺒﺮ ﺷﺎﺕ ﻓﺴﺦ ﻭﺟﻠﺦ .. ﻣﻘﺼﺎﺕ .. ﺧﺮﺷﺎﺕ .. ﻭﺍﻟﺒﻨﺎﺕ ﺑﺴﻔﻮ ﺗﻤﺒﺎﻙ .. ﺣﺮﺏ ﻗبلية .. مليشيات ﺣﻜﻮﻣﻴﺔ ﻭﻗﻮﺍﺕ ﺍﻣﻤﻴﺔ .. ﻭﺩ ﺍﻟﺼﺎﺩﻕ ﻣﺴﺎﻋﺪ ﺭﺋﻴﺲ .. ﻭﺯﻭﺟﺔ ﻭﺯﻳﺮ ﺍﻟﺨﺎﺭﺟﻴﺔ ﺳﻔﻴﺮﺓ ﻓﻲ ﺭﻭﻣﺎ ﺣﻴﺚ ﺍﻟﺒﺎﺑﺎ ﻭﺍﻟﻔﺎﺗﻜﺎﻥ ﻭﺍﻻﻧﺠﻴﻞ .. ﺟﻴﺮﺍﻥ ﻣﺘﺨﺎﺻﻤﻴﻦ .. ﻭﻟﺪ ﻛﺘﻞ ﺍﺑﻮﻫﻮ .. ﺧﻴﺎﻧﺎﺕ ﺯﻭﺟﻴﺔ .. ﺍﻭﻻﺩ ﺍﻟﺤﺎﻓﻆ ﻓﻲ ﺷﺎﺭﻉ ﺍﻟﻨﻴﻞ .. ﺗﺮﺍﺟﻲ ﻣﺼﻄﻔﻲ ... ﺗﻠﻔﺰﻳﻮﻥ ﻋﺒﺎﺭﺓ ﻋﻦ ﺑﺎﺭ ﻭﻣﻌﺮﺽ ﺍﺯﻳﺎﺀ .. ﺟﻨﺒﺎﺕ .. جلكسات ...وﻣﻌﺎﻣﻞ ﺗﺪﻳﻚ ﻧﺘﻴﺠﺔ ﻏﻠﻂ ﺗﻔﺤﺺ ﻣﻼﺭﻳﺔ ﻳﻘﻮﻟﻮ ﻟﻴﻚ ﻣﺒﺮﻭﻙ ﻃﻠﻌﺘﺎ ﺣﺎﻣﻞ .. ﺣﻼﻳﺐ ﻭﺷﻼﺗﻴﻦ ﻭﺍﻟﻘﻀﺎﺭﻑ ﻭﻣﺎﺷﻴﻦ ﻧﺤﺎﺭﺏ ﻓﻲ ﺍﻟﻴﻤﻦ .. ﻣﺮﻳﺾ ﻳﻀﺮﺏ ﻃﺒﻴﺐ .. ﺟﻤﺎﻋﺎﺕ ﺍﺭﻫﺎﺑﻴﺔ .. ﺍﻓﻜﺎﺭ ﻣﻨﺤﺮﻓﺔ .. ﻣﺎﻣﻮﻥ ﺣﻤﻴﺪﺓ ﻭﺯﻳﺮ ﺻﺤﺔ .. ﺍﻏﺎﻧﻲ ﺯﺍﺭ .. ﺧﻴﺎﻧﺔ ﺍﻣﺎﻧﺔ .. ﺣﻠﻴﻠﻚ _ ﻳﺎﺑﻠﺪ ﻟﻤﺎ ﻏﻨﻮﻙ ﺍﺣﺐ ﻣﻜﺎﻥ ﻭ ﻃﻨﻲ ﺍﻟﺴﻮﺩﺍﻥ !

تحياتي صديقي هاشم كاروري برجع ليك برواقة .
وايضا التحايا لاحبابي ودابسن وود عودو
راجع ليكم ايضا لكن والله فتران فترة لمن بشوف طشاش
ودي وتقديري

مرحب ودفع الله
التعب راقد .. قلنا الروووب لو بحلنا
ننوم بي هم ونصحي بي همين ولا ثمة ضؤ يلوح في الافق .. عتمة حد النظر
الدنيا لاعبه معانا ضاغط
والحكومة ابنصيها فرش
لكن
اهو بنكاتل
اقلاها بنكاتل الاحباط واليأس
همنا براهو ما عندو علاقة بالايدولوجيا واللغة الراقية
همنا هم المعيشة
و
كيف نحيا يوما ٱخرا دون ان ننهزم