Post: #1
Title: اليسع وسع كل شيء .. أو تعددت الاكشاك واليسع واحد !!
Author: محمد حيدر المشرف
Date: 07-16-2016, 08:53 AM
Parent: #0
08:53 AM July, 16 2016 سودانيز اون لاين
محمد حيدر المشرف-دولة قطر
مكتبتى
رابط مختصر والتعبير اللطيف تعددت الاكشاك واليسع واحد وجدته صدفه في ناصية الاسفير, تقاطع الراكوبة مع الفيسبوك, ولا اعلم صاحبه وانما نحييه على هذا الابداع البديع..
ستمضي مقولة دكاكين اليسع لمكانها الطبيعي مع العبارات التأريخية المجاورة لها ك اموال قارون .. كنوز الملك سليمان وغيرها .. وللحقيقة ولغرابة امر هذه ال 812 كشكا أو دكانة في سوقٍ واحد, ذهبت بي الظنون في اول امرها لاستحالة هذا الرقم المهول.. وظننت في الأمر تهويلا ما .. كأن يكون عدد الدكانات 8 دكانات .. أو قوووول .. ولأن هؤلاء الكيزان ملاعين جدا ويفوقون سوء الظن العريض لا سيما في الفساد المالي والاخلاقي. فلعها قد تصل ل 80 دكانة فقط لاغير .. بيد أن ذلك لا يُعقل.. لذلك كان الاصوب عندي انها ثمانية دكانات بالتمام والكمال.. لينتهي مطاف هذه التقديرات لما يفوق تخطيهم الفائق لسوء الظن العريض ب 812 دكانة أو كشكاً ..
سرح بي الخاطر بعيدا وأنا اتخيل نفسي مالكا لما يربو عن ال 800 دكان تأتيني ثمراتها في مطلع كل شهر جديد .. ولكن كم تبلغ ثمراتها بالجنيهات ؟! .. افترضت فيما سرحت أن الدكانة الواحد (قووووول بي 500 الف) .. ذلك يعني ان كل 10 منهن يبلغ فيئها ما يعادل 5 مليون من الدراهم السودانية المساة بالجنيهات (لا اعلم من اين اتوا بهذا الاسم .. الجنيه !!!) ... المهم ان ذلك يعني أن فييء ال 100 دكانة يربو عن 50 مليون من دراهمنا المعلومات.. ثم ضاعفت ذلك ل 8 مرات طباقاً فكانت 400 مليونا فاسدة وكأحط ما يكون .. ما يناهز النصف مليار تذهب وبكامل قذراتها لحساب بنكي فاسد بدلا عن تتحول لجرعة دواء لمريض او لقمة لفمٍ جائع أو لكراسات ملونة لطفلة غااااازلت دموعها حديقة في الخياااال ..
رحماك يا الله !!
|
Post: #2
Title: Re: اليسع وسع كل شيء .. أو تعددت الاكشاك واليسع
Author: مني عمسيب
Date: 07-16-2016, 09:07 AM
Parent: #1
ود المشرف .. صباحك زين ..
بالمناسبة تهديم او تكسير الاكشاك ماهو الا للبناء
بصورة جيدآ له .
ولك الشكر ,,,
|
Post: #3
Title: Re: اليسع وسع كل شيء .. أو تعددت الاكشاك واليسع
Author: محمد حيدر المشرف
Date: 07-16-2016, 09:25 AM
Parent: #1
منى بت عمسيب ..
حبابك عشرة يا منى ..
دهشتي بفساد اليسع فاقت دهشتي بذلك الملازم غسان (الله يرحمو على اية حال) .. والسؤال الذي يلح على خاطري:
لو كان هذا حال شباب الحركة الاسلامية, فما هو حال التماسيح الاسلاموية الكبيرة ؟!!
ذلك يكون, حتما, ما لا عين رأيت ولا اذن سمعت ولا خطر بقلب وطن ..
الكيزان ديل ما بختشوا يا منى ؟!!
|
Post: #4
Title: Re: اليسع وسع كل شيء .. أو تعددت الاكشاك واليسع
Author: مني عمسيب
Date: 07-16-2016, 09:46 AM
Parent: #3
صديقي العزيز .. المشرف ..
| Quote: الكيزان ديل ما بختشوا يا منى ؟!! |
كويس برضو عرفتهم متاخر ههههههههههه
ود المشرف الدنيا صباح وصباحك زين .
ودمت ..
|
Post: #5
Title: Re: اليسع وسع كل شيء .. أو تعددت الاكشاك واليسع
Author: باسط المكي
Date: 07-16-2016, 09:47 AM
Parent: #1
Quote: :الاكشاك واليسع واحد وجدته صدفه في ناصية الاسفير, تقاطع الراكوبة مع الفيسبوك, ولا اعلم صاحبه وانما نحييه على هذا الابداع البديع..
|
والله محنة يامشرف .. ويامافي حاجات وحاجات
الناس ماعارفنهااا بكرة نشوف لو حين
|
Post: #6
Title: Re: اليسع وسع كل شيء .. أو تعددت الاكشاك واليسع
Author: أحمد الشايقي
Date: 07-16-2016, 11:06 AM
Parent: #5
1000 دكان .. على كف الرحمـن
هي لله هي لله .. لا للسلطة ولا للجاه ...
|
Post: #7
Title: Re: اليسع وسع كل شيء .. أو تعددت الاكشاك واليسع
Author: محمد حيدر المشرف
Date: 07-16-2016, 11:38 AM
Parent: #1
وما خفي من الفسادِ أعظم يا باسط ..
لا حولااااا ..
لمن قلت لي منى الكيزان ديل ما بختشو ؟!
قالت لي كويس انك عرفتهم متأخر ..
الشاهد في الامر يا باسط انو مواعين لغة الاندهاش فضت والله وما عارفين نجيب عبارات تعبر عن اندهاشاتنا يا عملات اخونا الذي بلندن هاورن ..
|
Post: #8
Title: Re: اليسع وسع كل شيء .. أو تعددت الاكشاك واليسع
Author: محمد حيدر المشرف
Date: 07-16-2016, 11:40 AM
Parent: #1
1000 دكان والله يا الشايقي .. 1000 دكان في سوق واحد .. 1000 دكان !!!
1000 دكان في سوق وااااحد !!
ما معقول !
ما معقول !!
ما معقول !!!!
|
Post: #9
Title: Re: اليسع وسع كل شيء .. أو تعددت الاكشاك واليسع
Author: Hussein Mussa
Date: 07-16-2016, 02:19 PM
Parent: #8
الاخ ود المشرف تحياتي...
ماذلت اذكر تلك الندوة وتلك الكلمات ,الندوة التي تحدثت فيها الاستاذة فاطمة احمد ابراهيم في موسكو بعد اسابيع من انقلاب انقلاب الكيزان المشؤم عندما قالت يااخوانا السودان في مفترق طرق يكون او لا يكون...فقد صدقت نبؤة فاطمة وذهب السودان في مهب الريح..
|
Post: #10
Title: Re: اليسع وسع كل شيء .. أو تعددت الاكشاك واليسع
Author: أحمد الشايقي
Date: 07-16-2016, 03:38 PM
Parent: #9
قاليك :
ايه هو .. الأعظم ... هو اصلا (كـلـــه) مخفي والـ بيظهر دا بس (زلــة لسان) أو (قرصــة أضان) بسبب كيد الاخوة الأعداء لبعضهم البعض
كله مخفي يا مشرف ... كله مخفي ... شفت التركي قال شنو (نحنا ما دولة افريقية ...........) بعد كل علامات الصلاة المكوية على الجبهات ... نحنا (حتة دولة افريقية ...)
|
Post: #11
Title: Re: اليسع وسع كل شيء .. أو تعددت الاكشاك واليسع
Author: وضاحة
Date: 07-16-2016, 03:44 PM
Parent: #10
ود المشرف يا حبيب سلام يغشاك ويجدك بخير يا عزيز
اليسع واحد من من كٌثر لا تعرفونهم
هناك شخص يتبع لجهاز لامن متخصص في سوق ليبيا عمرو 25 سنة عندو 700 دكان
كل دكان مؤجر بي 3 الف جنية
دا الظاهر بس والله يعلم المخفي
تعيش كتير تشوف كتير بلد هاملة بلا وجيع
تحياتى
|
Post: #12
Title: Re: اليسع وسع كل شيء .. أو تعددت الاكشاك واليسع
Author: محمد حيدر المشرف
Date: 07-16-2016, 03:58 PM
Parent: #1
التركي جرح مشاعر اخواننا المسلمين 
متين ايد الغبش تنمد .. ولي قدام لي قدام .. تتش عين الضلام بالضو يا احمد ؟!!
|
Post: #13
Title: Re: اليسع وسع كل شيء .. أو تعددت الاكشاك واليسع
Author: محمد حيدر المشرف
Date: 07-16-2016, 04:02 PM
Parent: #1
الصديق العزيز حسين موسى ..
حبابك عشرة ..
| Quote: اذلت اذكر تلك الندوة وتلك الكلمات ,الندوة التي تحدثت فيها الاستاذة فاطمة احمد ابراهيم في موسكو بعد اسابيع من انقلاب انقلاب الكيزان المشؤم عندما قالت يااخوانا السودان في مفترق طرق يكون او لا يكون...فقد صدقت نبؤة فاطمة وذهب السودان في مهب الريح |
وما كنا ..
ما كنا يا عزيزي .. سنكون .. وستكون تجربة حكم الاسلاميين لهذا الوطن هي الأسوأ على الاطلاق .. اتمنى ان يكون الخلاص بحجم هذه التجربة المريرة .
|
Post: #15
Title: Re: اليسع وسع كل شيء .. أو تعددت الاكشاك واليسع
Author: جلالدونا
Date: 07-16-2016, 04:10 PM
المشرف اتّا حاسد ولّلا بغران
ده حاصل فى اطار اعادة صياغة الانسان السودانى و احكام التمكين
و ماتزعّل روحك يا حبة الموضوع بسيط اكتر مما تتصور
تلمّها ست الشاى و يخمّها اليسع
و .. بس
|
Post: #16
Title: Re: اليسع وسع كل شيء .. أو تعددت الاكشاك واليسع
Author: Abdullah Idrees
Date: 07-16-2016, 04:15 PM
اليسع ده Baby tycoon بتاع طبالي ساي !
في ناس يا ود المشرف عمل تجاري ده زاتو ما بشغلوا بيهو نفسهم بهبرو بس انتو قايلين اموال البترول و القروض دي بتمشي وين؟ شركات القطاع العام الاتحولت ملكيتها لاشخاص قبيل توقيع اتفاقية السلام مع الحركة الشعبية مشت وين؟
انتو نسيتو موضوع ال200 مليون يورو الفي حساب ود ابراهيم احمد عمر؟
سبحان الله ! والله لو شفتو اليسع ده زمان في الجامعة "الغنماية تاكل عشا" .. لكن الانسان صنيعة بيئته ..
|
Post: #14
Title: Re: اليسع وسع كل شيء .. أو تعددت الاكشاك واليسع
Author: محمد حيدر المشرف
Date: 07-16-2016, 04:07 PM
Parent: #1
وضاحة يا فجر المشارق ..
Quote: اليسع واحد من من كٌثر لا تعرفونهم
هناك شخص يتبع لجهاز لامن متخصص في سوق ليبيا عمرو 25 سنة عندو 700 دكان
كل دكان مؤجر بي 3 الف جنية |
هو شنو هو ده ؟!
الناس ديل ما عندهم ارقام معقولة كلو كلو ..
ويييين ناس كوز فاسد بنى بيت طابقين في كافوري و عندو 10 دكاكين في السوق المركزي ..
انقرضوا ولا شنو ؟!!
أين ذهب أولئك الكيزان الفاسدين الاطهار ؟!!
|
Post: #17
Title: Re: اليسع وسع كل شيء .. أو تعددت الاكشاك واليسع
Author: محمد حيدر المشرف
Date: 07-16-2016, 05:02 PM
Parent: #1
بالله عليكم الله شوفو الزول ده مؤلم كيف ؟!!
Quote: تلمّها ست الشاى و يخمّها اليسع
و .. بس |
ياخ ما كان تخلينا في قرقريبنا وضحكنا البنسوي فوقو ده ...
|
Post: #18
Title: Re: اليسع وسع كل شيء .. أو تعددت الاكشاك واليسع
Author: سيف اليزل سعد عمر
Date: 07-16-2016, 05:51 PM
Parent: #17
والله لحدي الان ان مستغرب كيف أنه
قال إنه ما بملك الف دكان بل 500 طبلية.
إتذكرت الزول مصاص الدماء داك الاسمه دراكولا أو اليسعكولا
|
Post: #19
Title: Re: اليسع وسع كل شيء .. أو تعددت الاكشاك واليسع
Author: جمال خضر
Date: 07-16-2016, 08:07 PM
Parent: #18
https://www.0zz0.com
موضوع سيدنا اليسع ده لو كان تطرق له الأستاذ فتحى الضو فى أحد كتبه كان إتلحونا الكيزان وشككوا فى الموضوع جملة وتفصيلا
وكانوا أثبتوا لينا بالجعجعة الفارغة إن هذا اليسع لا يمتلك منزلا وساكن بالإيجار وسايق ليه عربية مكعكعة من زمن حفروا
البحر وكانوا تحدثوا لنا عن ورعه وتقواه وزهده وصيامه الاثنين والخميس وعدم مفارقته للمسجد وبالمختصر المفيد كان قالوا
صحابى ضل طريقه الى القرن الواحد والعشرين لكن جاءت الطامة من أحد كوادرهم وفى إطار صراع المصالح عشان كده
الجماعة عاملين غمرانين من الحكاية .
سلام وتحية أخونا ود المشرف
|
Post: #20
Title: Re: اليسع وسع كل شيء .. أو تعددت الاكشاك واليسع
Author: عوض الكريم الضو
Date: 07-16-2016, 08:08 PM
Parent: #18
ودالمشرف وضيوفه الكرام السلام يغشاكم...
اليسع فعلا واحد ملايين الفاسدين لكن زى ماقالوا شقى الحال بقع فى القيد...
ميدان المدرسة المتوسة بجبل اولياء واحد من المساحات العامه المن قمنا لقينا متنفس...
تم تخصيصه بواسطة ادراة الاستثمار بوزارة الشئون الهندسية لعميد امن معاش مقابل اتنين مليار وتمنمية مليون...
سعادتو باعو لاحد رؤوس الاموال باربعه مليار بالتمام والكمال...
قضايا ومحاكم ومحامين يقعوا ويقوموا فى الفاضى..
الان المول الجديد على وشك الانتهاء من الاعمال الانشائية به....
ولسسسسسسسسسسسسسسسسسسسسسسه....
تحياتى...
|
|