كلام كتير اتقال و انكتب عن الراحل أحمد ربشة و ربما ما يكون فى جانب باقى من حياة و شخصية و اعمال ربشه ما تم تناوله و الكلام عنه لكن ومع كل سماع جديد لصوت و اداء ربشة تتفتح عوالم متجددة و محفزة و مستفزة لكوامن و مستقبلات الطرب و الدهشة و العجب و الاعجاب فى الانسان ربشه انسان متفرد ومتميز فى كل شى، حضورا و صوتا و عزفا و اداءا، خليط و مزيج و توليفة بديعة من ثقافات و بيئات مختلفة ربما هى الأنتجت وخلقت و كونت ربشه المختلف، و اكتر شى بثير العجب و الاعجاب هو مقدرة ربشه فى احداث كل الأثر ده فى فترة وجيزة و قصيرة جدا يمكن ما تتجاوز اصابع اليد الواحدة من السنوات القضاها فى السودان، وبرضو عدد الأعمال الغنائية القليل جدا فى السودان عدد ضئيل من المطربين البجذبو سمع الانسان و انتباه حواسه لما يغنو بالعود فقط بدون مصاحبة اى آلة تانى، محمد الأمين و عركى و شاويش و ابوداود و برعى كحالة ثنائية خاصة، لكن لما تسمع ربشه و هو يغنى بالعود، اول انطباع بصلك هو انه على الأقل فى عدد تلاتة آلات عود او اكتر هى البتعزف، وربشه "اشول" طبعا بعزف باليد الشمال، ومن ميزات التفرد التانية برضو هى انه عازف لدرجة الاجادة العالية لعدد كبير من مختلف الآلات الموسيقية حلاوة و عذوبة اداء ربشة للأغنيات السودانية، سواء فى الأداء الصوتى أو النغمى ربما تكون جات من منطلق انه السلم الخماسى ما غريب على ربشه بحكم موطنه الأول و بيئته الثقافية و الخماسى مشترك طبعا لكل شعوب و ثقافات منطقة القرن الإفريقى، مع تشبع ومعرفة حقيقية برضو بالسلم السباعى العربى لو جازت التسمية و اليمنى خصوصا بسبب حضور مكون عرقى ومعرفى عربى يمنى عند ربشه بحكم اصوله اليمنية، وده كله خلق توليفة جميلة عند و فى احمد ربشه قبل كم يوم سمعت اغنية "بينى ما بينك" وفى كل مره بتذوق طعم اشياء عجيبة فى الأغنية زى كأنك بتسمع فيها لأول مره، فى كل مره تتجلى ابعاد جديدة فى اداء و عزف ربشه، وفى كل مره تزداد الدهشة و يعظم الاعجاب و يتسامى الطرب لدرجة الذوبان و االتلاشى
ربشه حالة خاصة فعلا ما اظن تتكرر بالساهل وربشه عالم هائل من الجمال الساحر والأخاذ
ربشه ما بنتمى لأى شى، لكن الحقيقة الوحيدة هى انه الجمال بنتمى ل ربشه
Post: #2 Title: Re: أحمد ربشه --- حيث ينتمى الجمال Author: محمد عثمان Date: 07-14-2016, 03:26 PM Parent: #1
Post: #3 Title: Re: أحمد ربشه --- حيث ينتمى الجمال Author: محمد عثمان Date: 07-14-2016, 03:46 PM Parent: #2
Post: #9 Title: Re: أحمد ربشه --- حيث ينتمى الجمال Author: أبوذر بابكر Date: 07-15-2016, 04:21 PM Parent: #3
محمد عثمان
يا حامل مسك النغم
سلام عليك فى الطيبين و شكر عميم ليك جملت الفجه بحضورك و ب ربشه الفريد
Post: #4 Title: Re: أحمد ربشه --- حيث ينتمى الجمال Author: Osman Musa Date: 07-14-2016, 03:51 PM Parent: #2
لن و لن يتكرر ولا بعد الف عام . أحمد دنيا فسيحة من الجمال . أرجو الاستمرار في التنقيب في حياة ربشة . وكل عام وانت بخير
Post: #5 Title: Re: أحمد ربشه --- حيث ينتمى الجمال Author: حمد إبراهيم محمد Date: 07-14-2016, 04:39 PM Parent: #4
اخوي ابوذر - سلام وود ...
شفت، كان الجمال والفن والموسقة المتفردة بدأ ولم ينتهي في اليمن، وعم كل بلدان الجوار بما فيها السودان
فتجد عثمان اليمني والطيب عبد الله وناجي القدسي وهذا الفنان الذي لم استمع له كثيرا للاسف
احمد ربشة ... امل ان نسمع له اكثر واكثر ...
ما تخلينا ننظر خلفنا بغضب للسياسة الظاعنة في برك الخراب مع طائرها ...!
انت عارف يا ابوذر نحن اذا تعهدنا غذاء الروح سنروي النسيج الاجتماعي حبا وتحنان
عندها سيهدينا السلام صك الانسانية ...
مودتي
Post: #12 Title: Re: أحمد ربشه --- حيث ينتمى الجمال Author: أبوذر بابكر Date: 07-15-2016, 08:57 PM Parent: #5
أخانا العزيز حمد
اليمن فعلا كانت مصدر معظم ابداعات العرب على مدى التاريخ بدءا ب حضارات و ثقافات السبأيين والحميريين و ما بعدهم و يكفيهم اخضرار منبت جاد ب ذى الروح امريء القيس الملك الضليل و الشاعر الأصيل
ولغاية الوصلونا هنا و ساهموا فى تلوين لوحة الفن الجميل فى بلدنا
يا ريت تسمع ربشه و تستمتع ب إبداعاته العالية
وفعلا الفنون و الابداع انجع ترياق لكل بلاوي المجتمعات و حل مشاكل عصية على كل الحلول
Post: #10 Title: Re: أحمد ربشه --- حيث ينتمى الجمال Author: أبوذر بابكر Date: 07-15-2016, 04:31 PM Parent: #4
ازيك يا عثمان
أحمد ربشه زى حاجات سمحة كتيره كانت فى حياة السودانيين وفجأة فاتت و خلت وراها عبق جميل من الذكرى الما حتنتهى بالتأكيد ولا بتموت
Post: #6 Title: Re: أحمد ربشه --- حيث ينتمى الجمال Author: Elmosley Date: 07-14-2016, 04:54 PM Parent: #1
شكرا لهذا الاندياح أحمد ربشة هو من الدفعة الخامسة في معهد الموسيقى والمسرح في قسم التأليف زميلا "لدرديري محمد الشيخ وشخصي" ومن زملائه ايضا عمر الشاعر هادية طلسم البيانست ليلى بسطاوي وعازف البيز فيصل سيد امام لك ولضيوفك الود
Post: #7 Title: Re: أحمد ربشه --- حيث ينتمى الجمال Author: سيف اليزل سعد عمر Date: 07-14-2016, 05:18 PM Parent: #6
يا سلام عليك يا أبوذر ياخي. يا سلام علي أحمد ربشة وعلي جمال أغنياته.. يعود بي الزمن للوراء.. أوقات الظهرية وصوت ربشة ينبعث من جهاز راديو من إذاعة أم درمان.
شاقي روحك ليه .هو. الزعل بيجدي بحرو ما روًاح موجو ما بيهدي يا فرح قرًب يا هموم عدًي ابتسامتك هي الباقية يا سيدي ما بدري من عمرك لسه أنت شباب يا فرايحي اللون يا أب عيون أحباب بدري من عمرك العيون بتريد في البسيمة منى واللا إنت سعيد .. ياالبريدك انا لاني حاضن الريد جوه قلبي هنا عشتك إنت جمال ودبت فيك غنا ما بدري من عمرك لسه انت شباب يا فرايحي اللون يا اب عيون أحباب بدري من عمرك لسه بدري عليك اسوق نجمي شايفو في عينيك الضمير خاتم زي سحابة مشيك إنت تسلم لي يا العمري يسلم ليك ما بدري
Post: #8 Title: Re: أحمد ربشه --- حيث ينتمى الجمال Author: علاء سيداحمد Date: 07-14-2016, 06:35 PM Parent: #7
ياسلاااااااام يا ابوزر ياخ
الجمال كان يسير طائعاً حيث يسير احمد ربشه
Post: #11 Title: Re: أحمد ربشه --- حيث ينتمى الجمال Author: باسط المكي Date: 07-15-2016, 05:00 PM Parent: #8
انت جميل يا ابوذر
Post: #13 Title: Re: أحمد ربشه --- حيث ينتمى الجمال Author: Ahmed Yassin Date: 07-15-2016, 10:05 PM Parent: #11
ابا ذر وشركاه يطول الحديث عن هذا العبقري ويطول يمكن لسنوات لان له لونيته الخاصة في الغناء وفهمه العميق للموسيقى .. وحبه الجارف للسودان واهله .. وصل السودان سنة 1973م وكان لاستاذنا الفاضل بروف انس العاقب فضل كبير في التحاقه بمعهد الموسيقى والمسرح دفعة استاذنا الموصلي كما ذكر مع هادية طلسم واخرون حتى كتابة هذه الكلمات لايوجد من يستطيع ان يعزف على العود ما يسمى بـ (التوافق الصوتي) مثل احمد ربشة الكان بقول: و بيني و ما بين عيون القمرة عذابات المِهجر و وعثاء الطريق و حنين الرجوع يعتبر صوته (التينور) وتحديدا (التينور الثاني) فريدا متفردا
شكرا للاخ علاء سيداحمد لانه ارفق اجمل اغنية لاحمد ربشة وهي تحتاج منا لتحليل كثير جدا وتعتبر من اجمل ما غنى .. وانا شخصيا استمتع جدا جدا بها الاغنية هي ( وتسألين حبيبتي) وتسألين يا حبيبتي كيف الخريف فات؟ لا البروق صهلت ولا السحاب باح بالمطر وددت لو يبوح يا سيدتي كان السحاب في دمي وكانت البروق في عظامي وعندما تسكع الخريف في مسيره ارتوت الجروف من جراحي .. ليت الشتاء لا يعود مسرعا.. لأنني بغير من احب لا استطيب أن يمر فوق جبهتي ريح الشتاء بارداَ وموحشًاً وكنت حينما يعبرني بزمهريره أدفن في تلال صدرها عذابي وتستريح بعد هجعة السفار في عيونها أهدابي وكنت مخموراً بعطرها وسحرها وما عرفت .. حينما أفقت إنني كتبت في عيونها وداعي
Post: #19 Title: Re: أحمد ربشه --- حيث ينتمى الجمال Author: أبوذر بابكر Date: 07-16-2016, 01:15 PM Parent: #13
العزيز احمد ياسين
شكر هميم و تقدير عميم
ليك يا احمد على حضورك الكريم والمعلومات عن ربشه
فعلا و الله زى ما انت قلت عزف ربشه على العود شى فوق الخيال بالجد
ابداع و خلق عجيب و الله
وأنا نسيت اذكر على السقيد برضو ضمن ثلة المطربين المتفردين فى الغناء و الاداء بآلة العود
وكمان على ذكر العود
فى مبدع الناس ما منتبهه ليه يمكن عشان ما بظهر كتير فى الوسائط الكتيرة و مسيخة دى او يمكن غطى على وجوده و حضوره كترة الغثاء والأسماء المالية الساحة بدون اى طعم و لون و نكهة
وهو مجاهد عمر
مجاهد واحد من اوائل اعضاء عقد الجلاد
ومن الناس البجذبوك و يسحروك لما يغنى بالعود
عليك الله لو لميت فيه اسمعه و احكم
Post: #18 Title: Re: أحمد ربشه --- حيث ينتمى الجمال Author: أبوذر بابكر Date: 07-16-2016, 01:06 PM Parent: #11
العزيز المكى
فضلة جمالك و خيرك
كتر خيرك ياخ
Post: #16 Title: Re: أحمد ربشه --- حيث ينتمى الجمال Author: أبوذر بابكر Date: 07-16-2016, 11:55 AM Parent: #8
علاء
يتعلى مقدارك ويزيد عمارك وتسعد و تتبارك
قول آمين
شكرا ياخ على بذلك السخى المبذول وكرمك المبهول
Post: #15 Title: Re: أحمد ربشه --- حيث ينتمى الجمال Author: أبوذر بابكر Date: 07-16-2016, 11:51 AM Parent: #7
تحياتى يا سيف وكل التقدير و الامتنان ليك
فعلا الاذاعة كانت و ما زالت منهل عذب و غنى للحاجات السمحة
مافى اجمل من مقيل ضهرية نديه رفقة انسام حلوه و انغام احلى من الراديو
Post: #14 Title: Re: أحمد ربشه --- حيث ينتمى الجمال Author: أبوذر بابكر Date: 07-16-2016, 08:12 AM Parent: #6
موصلى يا فنان كيف الحال
بالله ربشه دفعتكم عديل ؟
سيقى أكيد برضو بكون شال منكم مكونات اثرت فيه و ساهمت فى خلق ابداعه و شخصيته
ومعناه بكون معاكم و جنبكم انتو اكتر من أى محيط تانى وما شاء الله كلكم موهوبين من البداية و مأهولين بالإبداع شخصك الجميل و عمر الشاعر و البلبلة هادية والباقين
انت يا موصلى الدرديرى مش كان عضو فى البلو ستارز ؟
البلو ستارز أو العقارب ما متأكد كويس، لكين عرفت انه كان فى واحده من المجموعات السميناها فرق الجاز
عليك الله يا موصلى لو بالإمكان تورينا شويه من الأشياء الما معروفة أكيد للناس عموما عن ربشه خصوصا و انه عشرة الزمالة دائما بتخلق علاقات قريبة و عميقة
وليك المعزة و التقدير
Post: #17 Title: Re: أحمد ربشه --- حيث ينتمى الجمال Author: Elmosley Date: 07-16-2016, 12:29 PM Parent: #14
Quote: موصلى يا فنانكيف الحالبالله ربشه دفعتكم عديل ؟سيقى أكيد برضو بكون شال منكم مكونات اثرت فيه و ساهمت فى خلق ابداعه و شخصيتهومعناه بكون معاكم و جنبكم انتو اكتر من أى محيط تانىوما شاء الله كلكم موهوبين من البداية و مأهولين بالإبداع شخصك الجميل و عمر الشاعر و البلبلة هادية والباقينانت يا موصلى الدرديرى مش كان عضو فى البلو ستارز ؟البلو ستارز أو العقارب ما متأكد كويس ، لكين عرفت انه كان فى واحده من المجموعات السميناها فرق الجازعليك الله يا موصلى لو بالإمكان تورينا شويه من الأشياء الما معروفة أكيد للناس عموما عن ربشهخصوصا و انه عشرة الزمالة دائما بتخلق علاقات قريبة و عميقةوليك المعزة و التقدير
انا شخصيا تعلمت من ربشه الكثير وسرايرنا في الداخليه انا وربشه ودرديري جمب بعض وما بنتفارق اصلا ودرديري كان في البلوستارز يغني ليك لي ايزاك هيس لو انت خلف الصيوان ما تعرف ده ايزاك هيس ولا زول تاني داك زمنا كتر يا حبيب
Post: #20 Title: Re: أحمد ربشه --- حيث ينتمى الجمال Author: أبوذر بابكر Date: 07-16-2016, 01:21 PM Parent: #17
العزيز الموصلى
داك فعلا زمن سمح ومليان و تريان و نديان
ربنا كان رضيان علينا و من علينا ب نعم كتيره و الله فى كل المجالات
انا متاكد و الله انه ربشه برضو بكون اخد منكم الكتير جدا واتعلم منكم حاجات ما اظن كانت حتتوفر ليه بدونكم حتى لو ده حصل من غير قصد او وعى منو
بالله قلت لى الدرديرى بغنى ل ايزاك هيس
تعرف انا لو لميت فيه بقول ليه يغنى لينا شافت مع انه الاغنية ما فيها كلام كتير
شكرا ليك يا اصيل
Post: #21 Title: Re: أحمد ربشه --- حيث ينتمى الجمال Author: Ahmed Yassin Date: 07-16-2016, 01:36 PM Parent: #17
الله الله على طريقة كرومة ود مستورة بت عرضو
Quote: وكمان على ذكر العود
فى مبدع الناس ما منتبهه ليه يمكن عشان ما بظهر كتير فى الوسائط الكتيرة و مسيخة دى او يمكن غطى على وجوده و حضوره كترة الغثاء والأسماء المالية الساحة بدون اى طعم و لون و نكهة
وهو مجاهد عمر
مجاهد واحد من اوائل اعضاء عقد الجلاد
ومن الناس البجذبوك و يسحروك لما يغنى بالعود
مجاهد عمر فنان بالفطرة درس قانون ودرس صوت وبيانو في معهد الموسيقى والمسرح اجمل ما قدم تلك الثنائية مع اسرار بابكر والاتنين ابدعوا فيها بصورة خيالية سواء اغاني مسموعة او اغاني خاصة لكليهم مجاهد ليهو تكنيك عالي جدا في العزف على العود وافنعوا د. كمال يوسف استاذ التناليف الموسيقى انه يشارك في مسابقة (العود) وفعلا شارك واحرز المركز (الثاني) من بين الالاف وطبعا اصحاب المراز الثلاثة الاوائل يحق لهم (منحة) للانضمام لـ (بيت العود) في مصر رفقة اخونا (اشرف) ولكن رغم احقية مجاهد لكنه تم استبعاده.. قال ايه المنحة بس للاعمار تحت الثلاثين .. طبعا الفنان مجاهد بيعوف (عود) مع فرقة (التبر) بقيادة د. كمال يوسف ومجاهد استاذ موسيقى بالكلية التطبيقية
Post: #22 Title: Re: أحمد ربشه --- حيث ينتمى الجمال Author: أبوذر بابكر Date: 07-16-2016, 02:23 PM Parent: #21
الله عليك انت يا ابو حميد
ما كنت متخيل يكون فى ناس كتار بعرفو مجاهد عمر و بسمعوه وكمان عارفين اخباره
ده دلالاة طبعا على انك زول ذواق فعلا
قبيل كنت عايز اجيب سيرة اسرار بابكر و مجاهد و اقول انه هو تقريبا القدمها للناس
خصوصا بأغنية "كل الحبايب بزعلو"
شفت بالله الأغنية دى لحنها كيف ؟
و الأداء الدويتو فيها كيف ؟
اسرار دى كمان عالم تانى خالص يا أحمد
أنا بشوف انه الأصوات النسائية الماليه الفجه هسه دى
مفروض يراجعو نفسهن شويه قبل ما يغنو
وفى غفلة من كل شى فجأة اتلفتنا و لقينا أسرار مافى
شفت المغسه دى قدر شنو
فعلا مجاهد مع ناس "تبر" و دكتور كمال يوسف زول عراف و بفرز عشان كده أكيد ما ح يلقى احسن من مجاهد للعود
ان شاء الله بس الفرقة تواصل و ما تبقى زيها زى باقى الحاجات السمحة فى حياتنا
تبدا و فجأة تتلاشى و تختفى
Post: #23 Title: Re: أحمد ربشه --- حيث ينتمى الجمال Author: Ahmed Yassin Date: 07-16-2016, 03:18 PM Parent: #22
الله عليك يا ودبابكر الانت بتجيبو دا كلو على بعضو يدخل ضمن قائمة (الرستاتيف) او ما يعرف بــ (الاسترسال الغنائي الحر) ودا ممتع وجميل في الخفلات وعند منو ؟ يا ابوذكر عند رمضان زايد وعبدالعظيم حركة بتسمع ... (انت هناك خليك معانا) ... (خليك مع الزمن) .. (ايواااااا) اهاااا ( دا وقتو؟) والكحلاوي ..... (عينك يا) (يا الله علي انا) (ابعد) تلك ايام الهجيج والفرح اللامحدود التي جملت ليالي العاصمة الغارقة في الطيبة والجمال وليك الشكر والتقدير لانك اعدت رويحتنا لى ربشة ومجاهد واسرار التي لا تعوض مجاهد بحب جدا اغلني محمد ميرغني بالعود .. وبعتبر ان (انا والاشواق) هي اجمل واحلى لحن (الله يرحم ) حسن بابكر
Post: #24 Title: Re: أحمد ربشه --- حيث ينتمى الجمال Author: أبوذر بابكر Date: 07-16-2016, 05:02 PM Parent: #23
المصادفة الجميلة يا احمد قبل شويه بتابع فى اخبار تركيا وفجاة لقيت مجاهد و اسرار بغنو فى النيل الأزرق
لا عايز انت تحن ولا ترحم حالى ليه انت ما بتعطف على يا غالى بسمة و نظرة
من روائع صلاح محمد عبسى
اسرار و مجاهد من الاشراقات الوضيئة فى غنانا
والاتنين بعدين من الساحة
الله يستر علينا
لكن كلما الزول يحس بنشاف روحه و عطشها بلقى العزاء فى سماع ناس زى ربشه و السقيد و شاويش والهادى حامد
وقبلهم عند الجابرى و عركى
وقبلهم عند ابوداود مع برعى و عثمان حسين مع بازرعة
وقبلهم عند سيد الطرب المطلق عبد الكريم عبد الله مختار
Post: #25 Title: Re: أحمد ربشه --- حيث ينتمى الجمال Author: Ahmed Yassin Date: 07-16-2016, 10:02 PM Parent: #24
سأبدأ من حيث انتهيت انت يا ابوذر .. كرومة واثبت انك تملك شهادة في الفن السمح والاصيل بداية من لحن ( نسيم سحرك ) بايقاع (النقرزان) كبايتين قزاز ومثلث نحاس وعصايتين لكن صوتو البارتون كان اقوى واعذب واجمل .. معاهو سرور برضو صوتو (البارتون) وديل كانوا ناس (التم تم الخفيف فيما بعد) واوضح ما يكون النقرزان الخفيف في (زدني في هجراني) وكرومة كان يضرب على الرق فقط ، وكان الميلودي احسن ما يكون فقط بـ (الخشم) كرومة في (الرشيم الاخضر) وفي الحتة بتاعة (هم سبب آلامييييي) ولاول مرة في تاريخ الغناء السوداني تسمع (الله) ودي ادخلها كرومة
دا كان جانب .. وفي الجانب الاخر المواجه كان فيهو (زنقار) صاحب الصوتين الرجالي والنسائي (الألطو) الصريح والرجل الفنان الفاهم (عبدالقادر تلودي) خلينا نجري بسرعة 6 ماخ لنطوى سنين ودهور وحقب ونجي للمحور الفذ محور برعي وابوداوؤد ولغاية ما نصل لى شاويش والسقيد وهادي الجبل ومن قبلهم عركي ومحمد الامين اظن هذه النجوم الزواهر اضفت على حياتنا جمالا ورونق صبح بديع وان اوتارهم هي من جنة رضوان
Post: #26 Title: Re: أحمد ربشه --- حيث ينتمى الجمال Author: حمد إبراهيم محمد Date: 07-16-2016, 11:28 PM Parent: #25
أبوذر - احمد - الموصلي - والاحباب ... تتباركوا ... انا بقرأ فقراتكم في هذا البوست ... كأني بشاهد فيديو - صورة وصوت ... ممكن تقول: سيمفونية نقلاتها : كرومة - برعي وأبو داوود - محمد الأمين - عركي - ربشة - رمضان زايد - حركة - مجاهد واسرار بابكر.
إنتوا عارفين ما فضل للواحد الا يخت عنقريب وسط الحوش ومع وشوشة همبريب ودعاش قبلي، يبحلق في السماء ووسط كل نجمة يكتب اسم وصورة واحد من المبدعين الفوق ديل تظلله اغصان زيتون، عشان كل ما ضاقت بنا الحال نجدهم هناك عندها نلم شعث شتات ارواحنا ونبتسم لكل من يلاقينا في سهلة الله الواسعة.
كتر خيركم
Post: #27 Title: Re: أحمد ربشه --- حيث ينتمى الجمال Author: حمد إبراهيم محمد Date: 07-16-2016, 11:37 PM Parent: #26
مجاهد واسرار بابكر : دويتو ..
Post: #29 Title: Re: أحمد ربشه --- حيث ينتمى الجمال Author: أبوذر بابكر Date: 07-18-2016, 06:36 AM Parent: #27
شكرا ليك كتير يا حمد
دائما بتخجلنا والله بكرمك السخى الفياض وحصورك السمح
ليك كل التقدير الكتير و الامتنان الغزير
Post: #28 Title: Re: أحمد ربشه --- حيث ينتمى الجمال Author: أبوذر بابكر Date: 07-18-2016, 06:32 AM Parent: #25
ازيك يا أحمد
تعرف على ذكر كرومة وبعيد عن تطريبه العالى انا بعتبره أعظم ملحن فى الدنيا
فى الدنيا دى ما مبالغة ولا تهويل عشان انا بحبه ومفتون بيه لكن عشان حجم و عدد ونوعية وعبقرية الحان كرومة الفريدة فعلا وبرضو كمان قياسا بعمر كرومه وحياته القصيره العاشها
عارف تانى انا شايف بعده منو فى التلحين فى غنانا السودانى كله ؟
ما برعى ولا علاء الدين حمزة ولا أحمد زاهر وديل كمان ملحنين محترفين ولا وردى ولا حتى الكاشف نفسه
الملحن التانى مباشرة بعد كرومه فى تاريخ و مسيرة الغناء فى السودان هو
عثمان حسين
ده رأيى انا غايتو
ولا شنو بالله
كدى بالله تأمل فى الحان زى
فى محراب النيل نايك ايه فى هواه انا و النجم و المساء شجن قصتنا مات الهوى الفراش الحائر
والفراش دى كمان موضوع براهو
وكل باقى الحان أبو عفان
Post: #30 Title: Re: أحمد ربشه --- حيث ينتمى الجمال Author: محمد عثمان Date: 07-18-2016, 11:35 AM Parent: #28
Post: #31 Title: Re: أحمد ربشه --- حيث ينتمى الجمال Author: Ahmed Yassin Date: 07-18-2016, 01:29 PM Parent: #30
ابوذر .. بعد دا الا اقول ليك قول عتيق وياذو القدر رفقا بمهجة محبك قدرت توصلنا تدريجيا الى القمة وتسحبنا الى اعلى على ايقاعات السودان المختلفة وموازير فننا العجيب .. الى.. الصوت (الباص) عثمان حسين او مقام (فا) الكبير زي ما سماه مصطفى كامل لانه عثمان رسخ الخماسي السوداني مع التاج مصطقى عثمان حسين جاء اعتلى القمة ولا زال وهو الفتى الآتي من خلف عبدالحميد يوصف عازفا للعود وكان يجلس في صمت مهيب دا يا اباذر ياودبابكر هو خلاصة القول هو النكهة السودانية الاصيلة او الماركة المسجلة للسودان في اغنية (عاهدتني) انك تكون مخلص في بعدي ... وهنا السباعي الاتقلب خماسي في (الفراش الحائر) دي الاغنية الوضحت النهضة الغنائية السودانية وبنت ورسخت بقوة (قالب) عثمان حسين وكسر بيها الرتابة الكانت حاصلة في الغناء السوداني
Post: #32 Title: Re: أحمد ربشه --- حيث ينتمى الجمال Author: أبوذر بابكر Date: 07-18-2016, 06:09 PM Parent: #31
كيفك يا أحمد يا فنان
عثمان حسين الناس يبدو لى ما ادوه الاهتمام الكافى كملحن
ويمكن معظم المستمعين ما بكونو عارفين انه كل الإبداعات دى من تلحينه
ذكرتنى الموسيقار العجيب مصطفى كامل المصرى القدر يطوع اكتر آلة موسيقية مغرقة فى شرقيتها و يدوزن القانون و يخلق بيه كل الجمال ده طيلة فترة نهاية الخمسينات وبداية الستينات
انا قبل فترة كتبت موضوع هنا فى المنب بعنوان
موسى و مصطفى
وموسى المقصود هو موسى أحمد إبراهيم صاحب الزينات البديعة بآلة البيكلو و اليمكن مافى اغنية بتخلو من طعمه الشهى اليها ومصطفى هو مصطفى كامل المصرى ذو الهوى والذوق السودانى
والموضوع مر مرور العابرين سريعا ومش لغياهب الأرشيف
فى زول تانى عجيب برضو فى سجل موسيقانا و اغنيتنا السودانية وده كمان بمثل أشد و أقسى حالات الإهمال والنسيان
سمعت ب بشير عمر يا أحمد ؟
أو بشير الشباب زى ما كان بيلقب
لو ما سمعت بيه حاول مثلا اسمع اغنية
فتنة الأنظار
بتاعة سيد خليفة و اسمع صوت العود فى الأغنية
و ورينى عليك الله لو سمعتها
Post: #34 Title: Re: أحمد ربشه --- حيث ينتمى الجمال Author: Ahmed Yassin Date: 07-18-2016, 06:46 PM Parent: #32
ابوذر والله بعد دا الا الواحد يغني ليك انت عارف لما اخترتك حبيبي وبالمناسبة الاغنية دي يمكن ناس كتار جدا ماعارفين ان عثمان حسين هو الفنان الوحيد في السودان الغني (للحب التاني) ما الاول لان غنانا كله للحب الاولاني وفلان الفلاني .. الوحيد الذي احتفى بالحب التاني ودا نتاج تجارب واحساس بازرعة وذكاء عثمان لما تسمع يا ابوذر يا ذو البصيرة في حياتي قبلك انت عشت قصة حب قاسية لسه ما زالت في قلبي ذكرياتها المرة باقية لما هليت في وجودي وقلت بيك سعادتي باقية دي جات في (المصير) ... في قوة ارادة وشجاعة اكتر من كدة دا اعتراف واضح وصريح وخلينا انا وانت والقراء نمشي لى قدام ونغرق في الحكى حق بازرعة وترانيم عثمان حسين كل واحد ليه في تاريخه ماضي أي ماضٍ ليهو ذكرى حب قديمة وانت عارف لما اخترتك حبيبي كان في قلبي جرح يندى بالهزيمة لكن انت صرت اغلى حب عندي دي وردت واتثبتت في (بعد الصبر) هو لحن كل اعماله بداية من اول اغنية في الاربعينات وبدأ بى (عايق) في (حارم وصلي مالك؟؟) سؤال والاغنية الوحيدة المالحنها هي (تسابيح) لحنها (ودالحاوي) واظن كانت في سنة 1990م بعد قرابة خمسين سنة من بدايته وشاعرها محمد يوسف موسى
Post: #35 Title: Re: أحمد ربشه --- حيث ينتمى الجمال Author: أبوذر بابكر Date: 07-19-2016, 06:11 AM Parent: #34
تحياتى يا أحمد ياسين وكل التقدير ليك لمشاركتك الثرة والممتعة المعلومات الغنية و مفيدة العرفتنا على أشياء كتيرة
وليك كل الامتنان والود
Post: #33 Title: Re: أحمد ربشه --- حيث ينتمى الجمال Author: أبوذر بابكر Date: 07-18-2016, 06:13 PM Parent: #30
العزيز محمد عثمان
والله العظيم انت ذاتك قصة جميلة وشلال فياض ب النغم الجميل