ناس سودانيز يقع في يدكم العدو

06:48 AM July, 05 2016

سودانيز اون لاين
عبدالحفيظ ابوسن-no where
مكتبتى
رابط مختصر

العدو الما صليح

حكاكين خلاص
تحكوها لامن تجيب الدم
وبعد تجيب الدم ما بتقيفو
توصلوها العضم

الله لا يوقعنا في يدكم
ولا يوقع لينا حبيب

تقرا الموضوع تشوفو متماسك وفري كونكريد
تلمو فيهو عاك عيك
ناولني العدسة المكبرة
ناولني المشرط
اديني المقص
تشرحوهو
تشريح التقول ممتحنين فيهو

هى لاكين زولك فكّاها كبيرة خلاس
عشان كدى حكتّا جات حااااارّة
كدى شوف لى على ود دفع الله صاحبى استشهد ولّلا لا

عبدالحفيظ، العيد يتبارك عليك.

إذا كنت قاصد بوست وائل .. صدقني مهما عملوا ما حيتوب ... ولا جماعتو البيجوا شايلين البقج حيقيفوا.

وائل ده قعد في الضل لامن إفتكر الناس نسوا عمايلوا .... وجاهم بدون ما يتعلم درس.

هي يا جلال يا خوي خلو الزول يقلب الشهادة
شهودهو ياخ
خلو يتم الشهادة
خت كراعو قبل ما يقول سلام ويقعد تلمو فيهو زي كلاب لهب تتشالبوهو
خلو الزول يخت صلبو في الواطة اول ويتوهط وجيبوها ليهو واحدة واحدة
قولو ليهو في الاول
خلينا القفص فاتح

حلاقة عيد ياحفيظو :)

وعليك يتبارك ابوالريش
هوي ما تدخلني في السياسة
ولا عندي حمل للعمليات
انا زول سكري والدنيا قبايل عيد
يقومو يدخلونا عملية ما نمرق منها
ونقنب نبقا في
الليلة احسن فتح
كمل الدرب
لا نحمدو شرب
مرق من الكوما

كل عام وأنتم بخير
تقبل الله الصيام والقيام

**************

تجي تحاور لاعب كورة حريف

يقلعها منك ويبيضها ليك كمان

ما قلنا حاجة يا حيدر
ياخ الحلاقة ناشفة كدة بتعوق
اعملو ليهو شامبو حلاقة
ولا صابون
بعدينك
موسكم دي ميتة
سنوها ياخ

ما ينفع يا ود ابسن
زولك ده دخل على ود المدير و سولاو جنس لولوة عينة
قال الزول ده كان مشى للريس
ده عشان خاتر عيون سيدو
ياخى عملا دواير فى دواير
اها مع المحنة الفيها الناس بس نغنى كان البطون تشبع
و سور فى سور
بشيرو معلّى سورو
الفقرانين ما قادرين يزورو
و فى بيت الله
زايد حبورو
فقرانين يا بشّة تحن علينا
و جعانين الزاد ما دخل خشيمنا
و بى مال الشعب
ديمة معلّى سورو
امنتووووو بالله ياخى

ود اب سن سلامات و كل سنة وانت طيب
عايز تتمحن زيادة كمان؟ طيب
في سودانيز نشوف العجب, اللفحي نفس اللفحي و صنب الككو ياهو زاتو, و الفجيخ و تنفيس الهنابيك نفس الفجيخ و التنفيس
حكمة الله إن بقى سيد الضنب الفجختو مناضل ولاّ عاجلنجي او حصرنجي تبقى انت سكّاك و انتهازي وصفتك ونعتك ومش عارف ايه
وإن بقى سيد الضنب من جماعة وائل وود الباوقة فا يا سلام عليك و ما قصرت و تعيش تعيش تعيش :)
شوف ليك جنس كيل بمكيالين

يا درديري يا خوي انت تجيهو في محلو وتصحيهو وتقول ليهو الا تلعب معاي
يديك سيك ويرجع ينوم وانت تساهر بالمغسة والشمشارة يدقو ليك الدلوكة
لعب زي دة ما تلعبو تحت الاضواء الكاشفة ووسط جمهور كثيف وعدائي
داير غموتي يا درديري يا اخوي
اها سيكك ومشي نام

يا جلال السوهو لي ود المدير ما شفتو ولا عارفو
علا ود المدير خاتي ثم خاتي عارفو عامل صلعتو زي قرمة الجزار دي
جنو مقابضة زي المجنون يقوم يوم يقبض ليهو نصيبة يفكها ما تنفك منو

واتا طيب ود البشري
يا خوي نحن ما عندنا كبير الا الجمل ووقت جننا يقوم الجمل زاتو نشوفو نملة . ضنب الككو اياهو الضنب اكان قرد طلح هنايو مارق في السهلة ولا غيرو . نحن ناس مصاطب ساكت نتفرج ونشجع اللعاب ومرات مرات نشجع الكيشة عشان نستمتع بي رشو
عمي صديق ود اب سن واحد قال ليهو
انا راجل وشو شبر ما بخوفني
عمي قال ليهو
قابلني بالليل .. علي بالطلاق وشي دة قدر ما تعبرو ما تعرفو كم شبر

السياسة صراحة ما بتندار، لكن ..

قبال ما تطالب الناس يشهودوا الزول، خلي الزول يخت صلبو في الواطة قبال ما يشلّت شمال ويمين

هوي يا جلال صحبي ود دفع الله اطيقش واحمق وروحو مكركرة وسمو فاير
تقوم تحرشو يتلب ليهو بي زول وتتعلق ذنبو

صدقت ابوالريش
مفروض يشرك ويعاين من بعيد . نعمنو مرات شركك بدل يقبض ليك فريسة يقبض ليك مفترس يفترسك زاتو
واهلنا قالوا
الجري قبل الشوف قدلة

غايتو من حسن التعليل ولا تأكيد الذم بما يشبه المدح
ناس الواتس شايلين صورة الريس يا جلال وهو محرم ولافين بيها . وكاتبين عليها
إلهي هذا عبدك قد اتاك فلا ترده
اها ظنيت الناس البدعو واحد ما اتسحر كويس الدعوة وقعت في البلد المحرم فيهو الريس زاتو
يا ربي كجاهم زي ماهو كاجينا

سلام ابو سن وضيوفه

ههههههه

نفس كلامك خطر لي قبل كم يوم ، قعدت اضحك براي، سودانيز دي يبلعو الواحد واقف على طولو وموية ما يشربوها ليهو بعد البلع

نسأل الله السلامة والشر بره وبعيد

ود اب سن وضيوفه كل سنة وانتو طيبين

وعالم بطالة على قول مجيدو

سلام وتحية وغدا العيد ومبارك عليكم مقدما ..

صراحة منذ تواصلي مع هذا المنبر لسنوات طويلة لم أر عنوانا مثيرا جمع كل هذا العدد
من القراء والأعضاء ، ويأتيه الرد بقوة من أحد الراصدين بسرعة داحضة لم يتوقعها القراء ..!!

عشان كده نقول التسرع واللفحي وعدم التريث يأتي على ماء الوجه ويزيد من عدم المصداقية في التناول

وانت طيب يا فرح
عالم ماعندها عشرة ههههه
لو اتقنطرت يشوتوك زي الترتيب ويتغابو فيك العرفة

والله يا يوسف زي ما بقولو
مضارفة المؤمن علي نفسو حسنة
الواحد الاخبار المدوية دي والبتجيب الرعدة والمطرة قبال يومها يتروي فيها
ما قدر ما جاهو خبر يلفحو وينقز بيهو
شايف كمال عباس جاب فيهو واو جدية زلقها ومرت ساي

Quote: تلمو فيهو زي كلاب لهب تتشالبوهو

ديل ياهن كلاب لهب البقولوهِن ياحفيض؟
كل سنة وانت والاسرة وكل من حوى جمعكم بخير.

كلامك صحي يا محمد مختار
يفقدك المصداقية ويخليك تضاير
بعدينك السبق الصحفي دة انتهي مع النت . زمان زمن الورق والجرايد كان ممكن . تسبق الناس بي يوم .. لكن هسة النشر مدور علي راس كل ثانية . الزول يتمهل وينمهل . عمنا قوقل واولاد اهلو ناس اسك وغيرهم كتر خيرهم لو سألتهم بجيهوك

تعرف يا الفاضلابي
سلخانة كوستي كانت طرف المدينة ثم احاطت بها البيوت وتم ترحيلها
اها كانت مرتعا للكلاب .. بترحيل السلخانة توحشت الكلاب . وبتتحرك بالليل ولوعت الناس وانتشرت الشائعات
بتتحرك في قطيع مخيف . مرة شاقه حمار ومرة بقرة والحكاوي كترت