***** ما اروعكم يا اهل الجزيرة منقول من الواتس *****

04:40 PM June, 29 2016 سودانيز اون لاين
ABUHUSSEIN-السعودية الرياض
مكتبتى
رابط مختصر

ياخ لسة في ناس طيبين :في مستشفي مدني قام احد مواطني الأرياف وبالتحديد من مناطق المناقل بإحضار زوجته الي المستشفي بحالة ولادة حرجة .وبعد دخوله الي المستشفي كانت السماء تمطر والكهرباء مقطوعة وكان المولد وصوته العالي سيد السمع .كان يمتطي عربته وهي بكس (مازدا) بالكاد يمشي .ادخل الزوج زوجته الي قسم الولادة وذهب ليحضر الطبيب المختص ، وعند خروجه صادف أسرة أمام (سيارته) يبكون بحرقة شديدة وكانت أمهم قد توفت الي رحمة مولاها ، وكانوا محتارين كيف ينقلون أمهم المتوفاة الي قريتها ليتم دفنها .كانت الساعة الثالثة صباحا ولا توجد وسيلة لنقلها بعد أن رفض سائق إسعاف المستشفى نقلها بحجة وعورة الطريق بسبب الأمطار .هنا سأله أهل المتوفية هل لك ان توصلنا مشوار ؟ لم يتردد الشخص في القبول فوافق علي الفور رغم خطورة حالة زوجته التي آتي بها الي المستشفي قبل دقائق وتركها كما آتي بها ومعها أمها فقط ولا أحد غيرها !!دار الشخص محرك سيارته وتوجه الي العنبر الذي توجد به (الجنازة) وتوجه بها خارج المستشفي قاصد قريتها ، وعند الخروج أجبر أهل المتوفيه إلا يعطوه فلوس المشوار وقال لهم أنه لله عز وجل .رفض أهل المتوفيه ذلك ، وبعد إصرار اجبروه أن يدخل احدي محطات الوقود لتعبئة سيارته (بنزين) فقبل ذلك .كان الرجل لا يملك من المال شيئا وكل ما يملكه كان لولادة زوجته ومصاريف المستشفي فقط .أهل المتوفيه عبو (تنك) سيارة الرجل بالبنزين وهم الرجل بالتحرك دون أن يراعي لحالة زوجته في المستشفي ولا لحالة الطقس ووعورة الطريق بسبب الأمطار .وعند وصوله لكبري التفتيش بطريق مدني الخرطوم قبل التوجه لقري (المناقل) صادفتهم عربة (لوري) بها أهل المتوفية كانو يلحقون بالمتوفية الي المستشفى للاطمئنان علي صحتها فتفاجؤوا أنها توفت الي رحمة مولاها .فقال له أهل المتوفية هنا سننزل الجنازة ونرفعها في (اللوري) لنكمل مسيرتنا ، فرفض الشخص بحجة انهم ملؤها له وقود ولن يرجع حتي يوصلها بنفسه .!!فرفض أهل المتوفية ذلك وقالوا له لم تقصر معنا وكلهم بصوت واحد قالوا ( عافييييين) ليك الوقود لموقفك الشهم والشجاع .فعاد الرجل لزوجته فوجدها ادخلوها للولادة فصاح لاحدي الدايات للاطمئنان علي زوجته ، فقالت له أنها بخير وبعد قليل ستفرح بولادتها ، وكنا نبحث عنك لتكملة الإجراءات لكن هنالك من قام بها دونك ، فتعجب الرجل لمن قام بالإجراءات .فبعد برهة سمع زغاريد أمها وهي تصيح له (مبروك التوأم) ففرح الرجل كثيرا لسماع الخبر وشكر الله علي ذلك .وعند تخريج زوجته في الصباح سأل الاستقبال عن دفع الرسوم وتكملة الإجراءات حتي يسمحوا له بالخروج ، فقال له مسؤول الاستقبال كل الفلوس مدفوعة ، فتعجب الرجل لذلك وقال له من دفعها علما بأنني لا يوجد معي أحد غير أمها وامها لا تملك المال !!فتوجه لام زوجته فسألها هل دفعتي فلوس المستشفي ؟ فقالت له لا ، فعاد مرة أخري للاستقبال لمعرفة من دفع المبلغ وعند إصراره قال له رجل الاستقبال "دفعها دكتور ع ع ل" فتوجه الرجل للدكتور قال له لماذا يا دكتور فعلت ذلك ؟ فقال له كنت أقف بجوار أهل المتوفيه فتعجبت لشهامتك ورجولتك وانت كيف أحضرت زوجتك بحالة حرجة وذهبت دون أن تنتظر للاطمئنان عليها !!نعم شاهد الدكتور المنظر فعمل الواجب هو أيضا مع الرجل وقال له هنيئا لك التؤام وشهامتك النادرة ودفع مصاريف زوجتك لا تسوى شئ مع ما فعلته مع أهل المتوفية ..#العظة رجل فقير لا حيلة له قام بفعل أرضي الله تعالي قبل أي شي ، فكسب ولادة متيسرة لزوجته بدون معاناة ، توأم من الأطفال جميلين ، تنك معبأة بالبنزين بعد أن كان خاوي ، ودفع مصاريف المستشفي من الدكتور الذي تابع حالة زوجته ، وكله لأنه قبل أن يحمل جنازة دون أجر للإسراع بدفنها واكرامها. !!ما أعظم رب العالمين وما أسعد من يمدوا يد العون للمحتاجين . تواضع مع الناس حتي ينظر لك رب العباد يا عبد الله ، فالدنيا فانية .ازرع جميلا ولو في غير موضعة تحصد جميلا أجمل منه ما اروعكم يا أهل (الجزيرة) أهل الكرم والجود فأنتم دائما تضربون لنا الأمثال الجميلة .
(( محاولة جادة لتعديل العنوان لو كوجن لي الموضوع بنزلو في مداخلة جديدة ))

تصحيح العنوان :-
ما اروعكم يا اهل الجزيرة منقول من الواتس

سلام يا صاحب
ياخ السودان دا لسه بخير والله
مش المناقل بس .. لكن تمش أي مكان في هذا الوطن
ولا تجد الا الخير .. كصورة عامة مشرقة تغطي على كل الصغائر

نعم المناقل موطني وأهلي وعشيرتي
ولكن مثل هذه المناظر كثيراً ما تتكرر
من هنا وهناك

مشكور يا عادل
بالجنبة كدا:
أول رمضان كان في فيديو حايم في الفيس عن قطع الطريق في السودان
جاء مصري زميلنا شيل جواله وجاري
معقول يا أبو عاقلة في ناس كدا
قلت له أيوة وفي أكتر من كدا

دم بخير

سلام ياصديقى ,, وربنا يتقبل منكم الصيام والقيام
وقوم لف قبل ماترجع تقرآ مداخلتى دى.
يروى ان رجلاً كان مسافراً على القطار قاصداً مدينة بورسودان.
فى الخلاء تعطَّل بهم القطار فنزل المسافرون ليرتاحو على الأرض لحين اصلاح القاطرة ,, ويتنفسوا نسيم الليل بعد انكتمت انفاسهم
طوال الرحلة داخل العربات المحشوة بالبشر.
نزل صاحبنا كغيره ,, وانتبذ مكاناً غير بعيد من بقية المسافرين وتمدد على الأرض وأخذ يتأمَّل السماء الصافية ونجومها ,, وبينما هو فى تأمُّلِه
اذا بشيئ يربت على كتفه ليلتفت فيجد كديساً يقف الى جانبه ويخاطبه كما يخاطب البشر بعضهم بعضاً قائلاً:
اللخو واصِل بورسودان؟
أجاب صاحبنا وهو يرتعد من الخوف ,, نعم.
قال الكديس: لو سمحت بعد تصل بورسودان تمشى مطعم الاخلاص
تلقى هناك كديس اسود بِعْرِج من رجلو اليمين قول ليهو مبروك جابو ليك ولد وانصرف الكديس يلفه الليل تاركاً صاحبنا مذهولاً
لم يستفق الا على صافرة القطار تؤذن بمواصلة الرحلة.
وصل القطار الى بورتسودان وغادره صاحبنا وفى اليوم التالى توجه الى السوق يسأل عن مطعم الاخلاص حتى وجده وتخَيَّر لنفسه مائدة طرفية
وطلب لنفسه طعاماً وأخذ يرقُب الكدايس التى تسرح فى المطعم وبينما هو فى تَلَفُّته اذا بيد تربت على رجله ليخفض نظره فيرى كديساً اسود اللون
يمد يداً مقطوعة مافوق الأظافر فعلِم انه الكديس ابو الولد فمال عليه صاحبنا واخبره بأنه قد وُلِد له ولداً فانصرف الكديس مبتسماً يحاكى صولة الاسد.
تناول صاحبنا طعامه وذهب ليدفع الحساب فقيل له الحساب مدفوع.

Quote: سلام يا صاحب ياخ السودان دا لسه بخير والله مش المناقل بس .. لكن تمش أي مكان في هذا الوطن ولا تجد الا الخير .. كصورة عامة مشرقة تغطي على كل الصغائر نعم المناقل موطني وأهلي وعشيرتي ولكن مثل هذه المناظر كثيراً ما تتكرر من هنا وهناك مشكور يا عادل بالجنبة كدا: أول رمضان كان في فيديو حايم في الفيس عن قطع الطريق في السودان جاء مصري زميلنا شيل جواله وجاري معقول يا أبو عاقلة في ناس كدا قلت له أيوة وفي أكتر من كدا دم بخير

عمر يا ابو عاقلة
سعيد و بخيت انت البتشهر صحبتك لي ابو حسين .. 😂😂
ياخ ابو حسين ليه الشرف بصحبة الناس الطيبين و زينين ...
نعم الامثلة كثيرة و من كل انحاء السودان لكن اخونا لازم ياخد حقو كامل و من حقنا نفتخر بيهو و نرد ليه جزء من شهامته و نبله ...
ربنا يحفظو و يحفظ كل اهلنا الطيبين السمحين ....
اما موضوع شلاقتك في الفيديو ياخ حاجات زي دي بسرعة اعمل ليها مسح بدل تشوه سمعتنا ... كمان مع المصريين .. 😂😂

قبل ما انسى
اشهار صحبة ابو حسين مكلفة ... 😂😂😂


تحياتي و احترامي

سلام...اخونا...عمر ابوعاقلة
انت عمر ود اللحيمر...ود نفيع ولا تشابه اسماء؟؟
هذه مواقف انسانية نبيلة يقوم بها كثير من اهل السودان دون رياء وفقا لفطرتهم التى فطرهم الله عليها
هذه القيم لو احتكم اليها الساسة فى ادارة الشان العام لتعافى السودان من امراضه المزمنة ولااقلع نحو
الارتقاء والنهوض.

اخونا و حبيبنا الفاضلابي
اهلا و سهلا بيك و بي طلتك الحلوة ..
لكن يا حبيبنا الدنيا قبايل عيد في داعي للكدايس السود و بتكلمو كمان .. ؟؟؟
لا كمان رسالة حبيبة لي حبيبها ... 😂😂😂
الراجل جاب ليهو نقاش في البيت
النقاش بتاع سطلة
اول ما جاء الراجل قعد قال يتونس معاه
النقاش نظامو بجي مسطول
براه بشتغل ما عايز اي ازعاج
ينزل ياكل يغسل يدو و يطلع يشتغل
اها صاحب بيت لخبط ليهو حساباتو
يازول تاني اول ما جاء
قال لي صاحب البيت انت عارف عندنا هناك في بلدنا
السحاب نزحو بالقناية الراجل عاين ليهو بي استغراب.. !!!
و قبل ما يقول لبه حاجة قال ليهو تصدق الضب دا يجي جاري
نضربو يدخل الجحر بعد شوية يجي عامل ليهو لزقة في الجرحة !!
صاحب البيت قال ليه يازول انا نعسان ماشي انوم ...
😂😂😂😂😂😂

بعد كدا علي كيفك كان داير تلف قوم لف
كان ما داير اخد راحتك كفاك الضب دا ..
😂😂😂😂

تسلم يا راجل يا طيب

يا جماعة سلام
هذه قصة عشتها بنفسي في عام الف وتسعمائة كم وتمانين.
حضرنا من العيد بقطار من عطبرة للخرطوم لا اذكر هل هو حلفا ام بورسودان
وفي الساعات الأولى من الفجر تعطل القطار بخروج عربتنا من القضبان وكان قريب نهر النيل مقاصدا جزيرة الشبيلية بين الدامر وشندي.
اصب الصبح والأمة كلها في البحر وفي ظلال اشجار النخيل وغيرها .
حوالي العاشرة صباحا(بالقديم طبعا) رأينا مركبين ضخمين وكمية من الجلاليب البيضا تمتطى هذين المركبين وتأكدنا ان هذه جنازة سوف يتم دفنها
شرق النيل (حيث ان اهل الجزر دائما ما تكون مقابرهم خارج جزيرتهم).
المهم: انتظرنا المراكب حتى وصلتنا وخرجت تلك الأمة والكل اما شايل صينية قراريص او افوال واو ثرامس شاي او قهوة.
وبدأوا في توزيع الطيبات على ركاب قطار بتاع عيد.
الفطور مافطور والشايات ما شايات والجبنات بانواعها .
والله رأيت بام عيني الناس شايلين الصحون مليانا وما لاقين زول مافطر!
احي الأهل بالشبيلية وعلى رأسهم دفعتنا وصديقنا الأخ اللواء محمد عثمان الحسين

Quote: دفعتنا وصديقنا الأخ اللواء محمد عثمان الحسين

كبسور 3 إنت دفعتك لواء و حايم بيناتنا ......؟؟؟؟؟؟؟
بجيك راجع بي رواقة ....

والله فعلاً مكلفة

Quote: شهار صحبة ابو حسين مكلفة ... 😂😂😂

ياخ الفيديو المعني بقطع الطريق هو تقرير في قناة الجزيرة نت
وفيه ناس قرى الجزيرة على طريق مدني الخرطوم يقومون بقطع الطريق في رمضان
لكل السيارات والبصات والعابرين عشان ينزلوا يفطروا
الفيديو دا برضو في الفيس كان حايم كتير أول رمضان وكتير من الزملاء الأجانب
شاهدوه وكان معجبين جدا بيه
الرابط: https://www.facebook.com/aljazeerachannel/videos/10153579551389893/

غايتو دي فاتت عليك
وكما الدنيا قبايل عيد كنت عاوز اقول ليك قوم لف

أخونا علي تاج الدين علي يا دفعة

Quote: نت عمر ود اللحيمر...ود نفيع ولا تشابه اسماء؟؟

هو نفسه .. كيفك انت وعساك بخير وتحياتنا للعيال

Quote: هو نفسه ..

إنت جايي المنبر دا متنكر و ل شنو ...؟؟؟؟

Quote: أخونا علي تاج الدين علي يا دفعة Quote: نت عمر ود اللحيمر...ود نفيع ولا تشابه اسماء؟؟ هو نفسه .. كيفك انت وعساك بخير وتحياتنا للعيال

يا عمر ازيك احوالك ؟؟ ارسل تلفونك فى الخاص

حبيبنا أبوحسين .. مودتي ..
نموذج من أصل أهلنا الكرام .. هكذا نحن على السليقة ..
من غير تصنع أو منه .. صدقني سلوك طبيعي لم نعرفه
إلا عندما أتينا إلى الغربة وسمعنا رأي الاخر المنصف فينا .. وخاصة الخليجيين ..
ده زول ود بلد أصيل ..
وهذا ما يسمى بالإيثار أعلى درجات الايمان ..

مودتي ابوحسين .. وتقبل الله الصيام والقيام ..

يا تهريف ياخي ود البشير في ليلة وضحاها اضحى فريق اول

ثم عندك الفاتح عروة لواء معاش
اترقى لفريق معاش !!

واهو خريج الخلوة (هناي) صار لواء جنجويد حرب


المافي شنو؟

Quote: أول رمضان كان في فيديو حايم في الفيس عن قطع الطريق في السودان جاء مصري زميلنا شيل جواله وجاري معقول يا أبو عاقلة في ناس كدا قلت له أيوة وفي أكتر من كدا

عمر يا أبوعاقلة ياخ أسي كلامك دا فيه ما يدل على أن قطع الطريق دا عمل خير .....؟؟؟؟
لو كنت قلت لي قناة العربية كان إتذكرت لأني شفته المقطع ....
بوظت أعصابي بي قطع الطريق دي ....
بالله وضح كلامك كويس المرة الجاية .....

و قوم لف

Quote: حبيبنا أبوحسين .. مودتي .. نموذج من أصل أهلنا الكرام .. هكذا نحن على السليقة .. من غير تصنع أو منه .. صدقني سلوك طبيعي لم نعرفه إلا عندما أتينا إلى الغربة وسمعنا رأي الاخر المنصف فينا .. وخاصة الخليجيين .. ده زول ود بلد أصيل .. وهذا ما يسمى بالإيثار أعلى درجات الايمان .. مودتي ابوحسين .. وتقبل الله الصيام والقيام ..

أخونا و حبيبنا الأستاذ علي أهلاً و سهلاً بيك
أهلنا الطيبين السمحين ما إتغيروا ياهم أهل الواجب و الكرم ....
في ربوع السودان و في دول الإغتراب لازالوا على أخلاق آبائهم و أجدادهم ....
دعواتنا لكل أهل السودان بالصحة و العافية و السلام و رغد العيش ....

و تقبل الله منا و منك صالح الأعمال و الدعوات ....


تحياتي و إحترامي

موقف نبيل
كل سنة وانت طيب

Quote: فتعجبت لشهامتك ورجولتك وانت كيف أحضرت زوجتك بحالة حرجة وذهبت دون أن تنتظر للاطمئنان عليها !!

والله يا جماعة من وجهة نظري الخاصة انو الرجولة والشهامة بل والمسئولية أمام الله عز وجل تتطلب انو الراجل ده كان يقيف على زوجتو خاصة انو جابها في حالة حرجة كما هو مذكور ، أنا أتعجب كيف يتركها وليس معها أحد وهي في هذا الوضع الصحي الحرج ثم يسمي الناس هذا رجولة وشهامة؟!!
ماذا كان سيفعل لو رجع ووجد زوجته جثة هامدة لأنها عانت الإهمال من جانبه ولأنها لم يكن معها أحد ؟؟
بالطبع ليس هذا تقليلاً من رجولة وشهامة أهلنا في الجزيرة وأنا أول من يشهد لهم بأنهم رجال كرماء وأصحاب مروءة وهم عملة نادرة في زماننا ولكن أقول أن المسائل تحتاج ترتيب حسب الاهمية والأولوية

تحياتي

Quote: موقف نبيل كل سنة وانت طيب

و انت طيب و بألف خير

يديك العافية

Quote: والله يا جماعة من وجهة نظري الخاصة انو الرجولة والشهامة بل والمسئولية أمام الله عز وجل تتطلب انو الراجل ده كان يقيف على زوجتو خاصة انو جابها في حالة حرجة كما هو مذكور ، أنا أتعجب كيف يتركها وليس معها أحد وهي في هذا الوضع الصحي الحرج ثم يسمي الناس هذا رجولة وشهامة؟!! ماذا كان سيفعل لو رجع ووجد زوجته جثة هامدة لأنها عانت الإهمال من جانبه ولأنها لم يكن معها أحد ؟؟ بالطبع ليس هذا تقليلاً من رجولة وشهامة أهلنا في الجزيرة وأنا أول من يشهد لهم بأنهم رجال كرماء وأصحاب مروءة وهم عملة نادرة في زماننا ولكن أقول أن المسائل تحتاج ترتيب حسب الاهمية والأولوية تحياتي

Quote: وتركها كما آتي بها ومعها أمها فقط

Quote: علما بأنني لا يوجد معي أحد غير أمها

تحياتي و احترامي

حياك الله أبو حسين ..
أنا قصدت أنه ليس معها رجل غيره وأنه المسئول أمام الله عز وجل عن زوجته .. وفي القصة نفسها أن الام لم تكن تمتلك المال كما في الإقتباس أدناه :

Quote: وعند تخريج زوجته في الصباح سأل الاستقبال عن دفع الرسوم وتكملة الإجراءات حتي يسمحوا له بالخروج ، فقال له مسؤول الاستقبال كل الفلوس مدفوعة ، فتعجب الرجل لذلك وقال له من دفعها علما بأنني لا يوجد معي أحد غير أمها وامها لا تملك المال

لكن قد أكون غلطان .. على العموم لو فهمي ده ما صاح أنا بعتذر والله للراجل الكلس ده .
قد نختلف أو نتفق في هذه الحالة الخاصة لكن بشكل عام لا شك أن أهل الجزيرة أصحاب كرم ومروءة وشهامة ومعظم أهل السودان كذلك ..

تقبل عاطر التحايا

Quote: حياك الله أبو حسين .. أنا قصدت أنه ليس معها رجل غيره وأنه المسئول أمام الله عز وجل عن زوجته .. وفي القصة نفسها أن الام لم تكن تمتلك المال كما في الإقتباس أدناه : Quote: وعند تخريج زوجته في الصباح سأل الاستقبال عن دفع الرسوم وتكملة الإجراءات حتي يسمحوا له بالخروج ، فقال له مسؤول الاستقبال كل الفلوس مدفوعة ، فتعجب الرجل لذلك وقال له من دفعها علما بأنني لا يوجد معي أحد غير أمها وامها لا تملك المال لكن قد أكون غلطان .. على العموم لو فهمي ده ما صاح أنا بعتذر والله للراجل الكلس ده . قد نختلف أو نتفق في هذه الحالة الخاصة لكن بشكل عام لا شك أن أهل الجزيرة أصحاب كرم ومروءة وشهامة ومعظم أهل السودان كذلك .. تقبل عاطر التحايا

اخونا محمد عبدالله سلام
في حالتها دي الرجل بنتظر فقط ...
وجود امها اهم من وجوده هو ..
و الجماعة لم عرفوا سبب عدم وجوده ما قصروا معاه ...
جازوه بنفس الاحسان ...
اهلنا الطيبين ديل ساعة الفزعة بنسو نفسهم زاتا ...
جزاه الله الف خير ..


تحياتي و احترامي

اخونا ابوحسين
السلام عليكم ورحمة الله
مع اعجابى واكبارى لنخوة البطل فى قصتك هذه إلا انىى اختلف معاك فى تصرفه
واعتبره نوع من التهور والاهمال الجسيم والتخلى عن شخص هو مسئول عنه
ليتحمل مسئولية اخرى اقل اهمية من حالة زوجته التى وضعها فى غاية الحرج
ماذا لو انتظر اهل الجنازة ساعة او ساعتين فالدنيا كما ذكرت صباح ولا يضيرهم التأخير
حتى يصبح الصبح وتتوفر العربات فالمسألة ليست عاجلة ولا تنقصهم الفلوس حتى
يترك زوجته فى هذه الحالة ويتبرع بنقلهم/
كان ممكن يوصلهم لأى موقف عربات ويجيبوا عربية تنقلهم بعدما يطمن على زوجته
انا مع الشهامة والفزعة لكن مرات الشهامة الزايدة تكون فى غير موضعها
ولك التحية والتقدير

Quote: واعتبره نوع من التهور والاهمال الجسيم والتخلى عن شخص هو مسئول عنه

أخونا صلاح و عليكم السلام
الراجل دا بعد ما زوجتو وصلت المستشفى مهمتو إنتهت .....
في حالات الولادة يا صلاح الزوج ما بعمل شي غير الإنتظار لأنو آخر نقطة ممكن يصل ليها هي الإستقبال
و حتى بتلقى ممنوع دخول الرجال لمكان الولادة ...
وجود الأم هو الأهم لأنها بتقدر ترافقها و تكون موجودة جنبها وقت الولادة ....
و الولادة لو إستغرقت 10 ساعات الراجل حا يكون جالس فقط ....
بعدين إنسان بهذا النبل ما أظنو يكون عمل الإحسان على حساب زوجته ......

ناس السودان بقولو إكرام الميت دفنو عشان كدا الناس بستعجلوا بالجنائز للدفن ....

تحياتي و إحترامي