قناة النيل الأزرق توضح أسباب (النهاية)..

متعة،
والله كيََّّفتوني حد الترنح ..
وعلى شفا الترتحة وفقا لأقوال أهل الشعشعة..
حديث أنيق سهل ممتنع وكلام كده من النوع ال لو قالو ليك زولك في الطريق ،
ممكن بعد ثواني تُتَّهم بالتواجد في حالة سكر ظاهر في الأماكن العامه،
تناول (سبب نزول) أغنية عن حالة حب حقيقية من قبل أطرافها ، بل سمِّهم أبطالها ، بجهاز إعلامي وبشفافية
كريستالية ، شئ مجيد يخليك مرتاح ومبتسم وجزل حبور تغني سااااكت،
كلام يسوقك من يدك اليمين إلى باب احترام الرواة ديل..
لم يصدق من قال ( الحب لا يقتل العشاق ، هو فقط يجعلهم معلقين بين الحياة و الموت)،
فالحقيقة هم بالحب يستحيلوا إلى نهر نغتسل منه ونرتوي فيه ،
نهر زي ناس هاشم ومكي وليلى ديل ،
زمزم فن بس ..

مضت شهور على اللقاء الجميل العبقري وبحق تلاقت قمم لم تترك لنا خيارا سوى المتعة المحضة

أغنية (النهاية) كتبها هاشم صديق بموجب توكيل موثق ، من قبل الكاتب بالعشق، نيابة عن المُضنَى المُعَنّى، حقبة ذاك ، مكي سنادة،
والله هاشم صدق بقوله إن العاشقين يستعيروا ألسنة الشعراء ليحكوا عن حالهم ،
ولك أن تضيف يا هاشم : وليقدموا نيابة عنهم (عرضحال) أو طلب اللجوء العاطفي،
شوف بالله الكتف البسندك وتبكي عليهو ،
الكتف الوساده ،
الكتف الكتيبة،

المضاد للهزيمة.

دائما تظهر في وقت نتبعثر فيه
لتجمع نافر أشياءناو أفكارنا
لم أدر من هي ليلى و لكنهم
و أنتم جيل محظوظ

مشتاقين

ليلى يا سعد ، وفقا لكلام هاشم ونسرين النمر ، ربما تكون زوج المبدع مكي سناده،
هاشم أفاد أن حالة العشق التي اجتاحت مكي كانت قبل أن يعرف ليلى ، ويبدو أن موجة مد ليلى ،
تجاه المكي المتعلق بأستار الكعبة، كانت أعلى فغمرت أراضيه واكتسحت سهوله
فلم تترك الرياح من ثمود في الوادي من أثر، كما قال السيّاب، وإلا لما كانت أريحية هاشم في الحكي
وضحكة ودسناده المجلجله ، الضحكة التي لاتصدر إلا عن منتصر ولو عقب نكسة.
الناس العماليق ديل يا سعد لم يجايلونا لكننا تفتحت قلوبنا قبل عيوننا وآذاننا على إبدعاتهم
ونحن بعد يفعا نتهجى أولى حروف الريده اللهلهت لِهاتنا،
زمن ما كنا شايلين هم ولا عارفين بكرا الجايينا.

محمد؛
لكم أفتقد إناراتك للإبداع كيف ما هو..

ها انا في [ كورس ] منتظري إشاراتك حول [ هاشم صديق ] و[ النهاية ]..
و[ سيد خليفة ] العحيب الذي كما [ نقىً يتهيل ]..

أغنية النهاية ، يا محمد ، من أكثر الأغنيات صدقا وتطريبا حسب مصادري الموثوق بها وهي سنتر القلب وضواحيه ، تحديدا الكبد ، ما زلت أذكر طالبا زاملنا في الجامعة كان يمارس طقسا معينا قبل أن يغنيها لنا بحنجرة يقترض منها بافاروتي إبداعه، كان شيئا يماثل التيمم قبل الصلاة ، يصمت لثوان ثم ينظر إلى الأرض واضعا رأسه فادح الهم بين كفيه ثم يتمتم .. يوم في يوم غريب.. فيهو الشمس لمَّت غروبا وهاجرت.. لم تكن تصاحب أدائه آلة موسيقية ، فقط صوته ، لكن صوته كان يغنيك عن أي فرقة سمعت عنها سواء كانت ماسية أحمد فؤاد حسن أو YANNI ، مش يا محمد في أشعار كده براها جايه ملحّنه وأوركستراها بين حروفها ؟ كان بصوته العميق القادم كصدى من مغارات الأسى ومدارات الفجيعة يجبر الحضور على الإنصات كمن ينتظر ردا حاسما ومصيريا يُشبِه التنحي عن سلطة الحب أو تلاوة بيان الوله رقم واحد ،
أها يا محمد ، الزول ده كان لامن يصل إلى منطقة :
حسيت شعور الراهب السار السنين
مشتاق يفتش ليهو دير
لمن تعب سالت دموعو علي الدرب
خاف الأمل كره المسير
يتهدج صوته ويهتز كسفينة تعبر مثلث برمودا ، والله يا سعد ، وماك طالبني حليفه ، كنا بنسمع صوت القلب يختبر مزاريب الضلوع ضلعه ضلعه في عملية مراجعه لمدى تماسكها وقت الأنواء والأرزاء،
بس عارف الزول دا كان بعد ما يغني بيدخل في صمت وظني أنها مرحلة تشبه التسبيح عقب الصلاة لأنو مامكن يطلع من :
(كلمات خطاب من الحبيب كان النهاية
حرفو الدموع سطرو النحيب
والحسرة كانت فيهو غاية)
يطلع عادي كده زي الكأنو كان بيغني الليله وينو حبيب قسايا مثلا، كان بيطلع من مرحله خطيره عادة ما تتوقف فيها أجهزة الملاحة ،كان بيرجع لينا تدريجيا ، عمليه ، إنعاش ، عنبر ثم البيت للنقاهة ، لكن كان بعد أن يعود إلى (صوابه) بيمشي طوالي.

لازم يمشي..

يوم في يوم غريب فيهو الشمس
لمت غروبها وسافرت
بانت نجوم متفرقات زي الدموع
فى خد حبيب ودع حبيبتو السافرت
والليل ضفائر حزنو مداها الألم
زي التقول عارف النهاية القاربت
شفتا الفريق ضامي الفرح
فى دار حبيب ضميتو في قلبي الحنين
ماتت خطاي ضاع الأمل
واحترتا في خوفي الدفين
عاينتا لقيت الحبيب في عرشوا
في تاجو الحزين
حولوا العيون فيها الفرح
بس الفرح في عيونوا ماقادر يبين
والدمعة في عينيك تودع طيف حبيب
خليتو لي قدر السنين

اشتقتا لي طيف الحبيب
ومشيت طريق اسمو المصير
ودعتا زهرات الأماني
ورجعتا لي ألمي الكبير
حسيت شعور الراهب السار السنين
مشتاق يفتش ليهو دير
لمن تعب سارت خطاهو علي الدرب
خاف الأمل كره المسير
ياحبي عيش كلمات خطاب
من الحبيب كان النهاية
حرفوا الدموع صدروا النحيب
والحسرة كانت فيهو غاية
خلاني اغرق في المصير
وانا لسه عايش في البداية
أندم علي الحلم اللي راح
واطفي الشموع وابكي النهاية
وابكييييي وابكيييي النهاية القاربت .

ياسلام عليك ياعمك....

دائما....

تجي في النهاية وتجيب النجيضة

تسلم ياخي

يا علي ،
من مداخلتك لم يظهر لي سوى ثلاثة مربعات صغيرة،
بانت زي الدموع في خد حبيب ودّع حبيبتو السافرت،
لكن أيا كانت فهي تصب في وريدي الرئيس،
محبة غير قابلة للتسوية.

يا جميل لو مافي مانع

عاوز انزل النهاية خلفية

بصوت الراحل المقيم سيد خليفة

سلام

ليلى "الاولى" لو قرت كلامك هنا لا سنادة ولا هاشم ولا سيد خليفة ما كانوا ح يحسسوها بنفس قدر الوله المنزوع من جزوره في يوم فيه الشمس لمت غروبها وسافرت ولاالشجن والحزن والخوف وكل المشاعر الفياضة اللي حس بيها سنادة وعبر عنها هاشم وسيد خليفة
ياخ انت انسان وصاف لدرجة التميز والابداع... لكن أنا حاقول ليك؟ ما انت عارف
كنت غايب يا مولانـا.. welcome back

هارون أخي ، الصفوه ، أتوكأ عليه وأهش به على خاطري ولي فيه مآرب لاتكتب،
شكرا يا الحبيب أن ضممت يدك إلى صدرك وأخرجت لنا هذا النص كاملا من غير سوء..
أغنية النهاية تجدها بصوت سيد خليفه في الفيديو أعلاه ،
أمشي لآخر الفيديو ولف شمال بتلاقي سرادق الإبداع في ناصية الفؤاد فيهو ناس سمحين ملمومين .. .
بعضهم يبكي والبعض الآخر يبكي أيضا وسياد البيت زاتم من حزب النحيب ..
الجميع يبكي النهايه،
صدقت يا هرون، الأغنيه دي بصوت سيد خليفه تكون الأغنيه المعنيه،
حذاري أن تسمعا كلها مره واحده،
إقرأ الإرشادات جيدا قبل التلاوه،
عشان ما نمشي الحوادث ..

وتبقى النهاية..

Quote: فالحقيقة هم بالحب يستحيلوا إلى نهر نغتسل منه ونرتوي فيه ، نهر زي ناس هاشم ومكي وليلى ديل ، زمزم فن بس

كنت واحد من حضور تلك الحلقة فارتويت حتي فقدت وعي الاستيعابي حتي افقت لانتبذ بوستا قصياً اقطف من ثمر ابداعه متميما شطر الجمال في ايقونة الفرح .
مولاناودالمعتصم سلمت بالله عليك امتطي صهوة قلمك واسرج خيل كلماتي لتخمد حرب الاسفاف المنبري .

هسع الواحد يقول شنو ؟

ياخي الواحد يادوب اتجم!!
يا سلام علي الكلام والموضوع الجميل



انت زول فنان حد الابداع ..


تحياتي استاذي محمد و لك كل الود

وأنت ملك السهل الممتنع والممتع في آن !

تسلم يارب

يا رمانه (ليلى الأولى) لها أن تفرح ، فهي السبب في كل الحصل دا ، هي من حفز نار الإبداع في سناده الذي نجح أيما نجاح بإرساله النظيف ، رغم التشويش والوشوشة ، في نقل الصوره والروح الفي قلبو لصاحبه هاشم الشاعر ، ببلوتوث بتاعو براهو ، فهز في هاشم جذع الروح وساقط علينا شعرا بابليا، الصوره والروح والصوت ومشاعر سناده وصلوا بالكامل لخلايا هاشم الذي تقمص ( وضع) سناده فيما يعرف عند ناس علم الأرواح بال ( incarnation ) فدخل في نيرفانا لا يلقاها إلا ذو حظ حريف ،

العاجبني في الموضوع يا رمانه إنو الإتنين ديل – في ونستم الزي الدويتو- وضحوا لي حاجات ما كنت أعلمها قبل هذا وهي عملية (تبني ) الوجع واستجابة المتبَني على تلك الدرجة من الصدقية ، ولكني أكرر إنو استغاثة سناده صادفت ظرفا نفسيا يؤهل هاشما للقيام بعملية الإسناد الجوي والدعم اللوجستي القلبي لألوية هموم سناده المحاصر في وادي عبقر فأرسل إشارة فحواها (جيوش اشتياقي هزمتني وزادت أنّتي)..

قام هاشم كتب الهنهنات زي ما بثت على موجات سناده وزاد عليها هواده ، ربما إكراما لصديقه وبرا بعشقه وإلهابا للتعزية أو ربما أن حالة سناده صادفت فجيعة أخرى لدى ملتقط الإرسال on the same wavelength وسبحان الله المصائب يجمعن المصابين فذهبا يرتلان معا ما تيسر من سورة الضنى ، الزول دا حس بيهو ، شن فايدة رفيقك كان ما عرف الحالة الطبية لحجابك الحاجز و خلاياك وذبذبات روحك وموجاتا الطويله والقصيره ووضع النبض وتقارير الإختلاجات والوجيب؟
عليك الله شن فايدتو؟

طبعا من البدهيات يا رمانه إنو جمال الحوار الدويتو وشغل الباصات البينيه دا ينم عن حالة عشق من نوع براهو، نوع الحب الذي يخلق حميمية بين البشرة والثياب ، الحب الذي يميط الأذى عن الطريق ويزيل حالة الرهق عن كل كالح ويثبِّت الجُدر الآيلة للسقوط ويمسح عن المسافرين في دروبه الوعثاء وكآبة المنظر.. الحب المصحوب بضمان لاستمرار الجمال لألف عام وقد تزيد ويستعدل برج بيزا، حب كل يوم فيه بألف مما تعدون والله يضاعف لمن يشاء من العاشقين.

(ليلى الأولى) يا رمانه لها أن تفرح لأنها كانت لبنة في صرح سناده ، كلنا سناده ، وله أن يخلدها في خاطره هي ومن تلتها في عصور الجمال من حضارات ، الناس الزي ليلى ديل يمنون على العاشقين بأنهم علموهم مقاطع في سِفر الحب وبذلك أصدروا في حقهم مرسوما بالترقي والنقل من الحالة الأرضية إلى برزخ يعرفه الأقطاب وأهل الحظوة و يا سلام على المعلمين والسدنة والتلاميذ والحواريين والكهنة والرهبان والمحراب زاتو..

يا سلام..

يامولانا

كيفك

شكلك الشغل دا هبش اوتارك إنت ذاتك والله أعلم..

عمك عتيق فى مجايلة الحب والمحبين قال نحنا الحبيب كنا بنقول ليه الفريد فى عصرك, وجا زمن بقى يخلق من الشبه أربعين( كان هذا الحكى فى كلية الصيدلة الخرطوم فى الثمانينات)..

سيد خليفة له دور بارع فى تشخيص كل حرف من حروف القصيدة!

تسلم يا ود المرتضى

تحياتى مالك علينا ياخى
الاغنية بكلماتها لى معاها تار بحبها لدرجة الجنون وكرهى لها برضو لدرجة الجنون
حينما اسمعها بتاخدنى لى زمن يصعب ان يجود الزمان بمثله حب الحبيب الاول حينما اسمعها
بفرح وحينما اسمعها بحزن الامر عندى مختلط حيالها...حينما رجعت من السفر كنت على موعد بالزواج
من محبوبتى وفى نفس اليوم الرجعت فيه كان زواج محبوبتى مشيت حضرت الزواج وطلبت من فنان الحله
ان يترنم بهذه الاغنية وقد حصل ما عاوز اوصف ليك حالتى...ولا حالتها كادت ان تكون هنالك كارثة
بس ربك ستر....من يومها والاغنية دى بحاول اكمالها سمعا او قراءه كل محاولاتى باءت بالفشل حتى البوست
ده دخلتو عشرات المرات وخرجت امتعنى حديثك كثيرا...لك التحيه ولها اينما كنتم وكيفما كنتم

سيدي يوسف،
بعض أسباب إعجابي بحلقة الذكر تلك هو مستوى الشفافيه التي تبناها الحضور ، بتحريض واضح من هاشم، حين كشف غطاء الحرير عن تلك العلاقه السمحه، وفي هذا سنة حميده ستستلهمها أجيال ستأتي ، الجايين حا يتعلموا ألا يخفوا حاجاتم الجميله ، بالله يا أخوانا كان في زول بحب يقول للمريود ، وعليك أن تحدث بنعمة ربك فالحب نعمه، قد لاتلتقي من أحببت مرة أخرى في دروب الحياة ويومها لن ينفع الندم و لاتنفع الذكرى ، بتريد زول قول ليهو بريدك هسه، أفشوا المحبة والسلام، البعض يتعامل مع الحب والإفصاح عن حالة الشريان التاجي والأبهر كأنه جنحة أو إثم عظيم، ياخ معقول زول في كل يوم يعلن على الملأ ألف مرة أنه يكره فلانا وفلانه ويلعن شعبا بأكمله وتخذله الشجاعة أن يعلن عن حالة حب واحدة؟ إنت بس قول لسجيلك بريدك ولاحظ ما يحدث للأشجار حولك وحالة زهور الظل كيف تؤانس بعضها بعضا وتنسى المخصبات والكلوروفيل المركب والإضافات المهدرجة،

يا سلام على العشق اليزهدك في بيوت الأزياء والمجوهرات فتأخذ التقاسيم بحضوره شكلها الحقيقي فيتسامى الحضور وتندلق العطور،

أعجبني أحد شبابنا السودانيين في الفيس بوك وقد كتب في البروفايل إنو بيحب زوله بإسمها،
هذا الشاب المتخرج حديثا في إحدى كليات الطب سيستعيض بتلك الإفادة في سيرته الذاتيه عن الإشارة إلى أي
درجة عاليه حصل عليها في سني الطلب وسيكون لعشقه التقدير الأعلى في أي معاينة وسينظر أهل البصيرة في
المجلس الطبي إلى شغفه بزولته دون بقية الشهادات وسيعرفوا حينها ماذا تعني أعلى تخصصات الكارديولوجي.

قادر الله..

Quote: ما عاوز اوصف ليك حالتى...ولا حالتها

صِف لي حالك أنت ودعها هي يا وليد،
لكن ، وعلى سبيل الإحتياط، لن أتفق معك إن قلت لي واصفا حالك بأنه كان كحال جزر الملايو وسومطره بعد التسونامي ،
لماذا لاتنظر للجانب الممتلئ من العشق ياخ،
الناس البريدوك ويمشوا يخلوك بيكونوا فقط أكملوا دورهم في بناء صرحك العاطفي ومشوا،
في ناس بيحفروا الأساس وناس يصبوا الأعمده والسقف ويليهم ناس الطلاء وواحدين بيركِّبوا الأسلاك (بتاعين الكهرباء)
وفي ناس بيعملوا حاجات تانيه من ضمنها سرقة أكياس الأسمنت والحديد كيس كيس لينيا لينيا لكن في النهاية
سيكتمل البناء وتعمل الكرامه ، كرامة إكتمال بناءك العاطفي ، حين ستشكر الجميع ومعهم الحراميه.
نعم، عليك أن تشكرهم على إنجازهم مراحلهم بنجاح وإكمالهم صرح بلقيسك،
بالذات البيعملن الفينيشنق،
مثنى وثلاث..
يعني النهايه.

ناديه
سلامي واحترامي ،
ياهو يا أم إيمان، لامن نلقى طوق ينتشلنا من بحر الظلمات بنلقاكم ونشوفكم،
الخروج ليس سهلا يا عزيزة،
تحَّورت رئاتنا من طول التنفس تحت الماء،
الله غالب.
أريتك تبقي طيبه وتفضلي طيبه زي ما أنت..

Quote: هسع الواحد يقول شنو ؟

دي زاتا رد عليها هاشم
تمشي وتقيف وسط البلد وتهتف : بريدك يا صباح عمري..
فيها شنو يا عثمان ؟
جل الحاجات الكويسه قاعدين نعلنا على الملأ..
كان بعيده ألحقا بتلفون..
إيميل ما معانا..
جني وجن الحب الإلكتروني..




-
عارفك قاصد شنو لكن إعتبرني فهمت كلامك كدا..

برجاك بعدين..

سيد خليفه يا ناصر،
إنه سيد خليفه، رغم جمال الكلمات الساحق واللحن الماحق إلا أن لدي إحساسا بأن هاشما ،وهو يواسي مكي سناده، استصحب في ذاكرته مستوى الحنجرة التي يمكن أن تبث هذا البيان الهام لقوى الشعب العامل وتدعم مناعته وتعينه على صفوف البنزين والرغيف، لم يتردد كثيرا فاستعان بال MRI الرابض في خلفية الذاكرة للحصول على بصمة الحبال الصوتية ومستوى الحنجرة التي يمكن أن تعزف تلك الأنشودة فكان أن جاءت الصورة من الإسكانر سريعا مطابقة لحنجرة سيد التي حار أهل الموسيقى في تعريفها وتصنيفها، فصوت سيد فيه شجن أعجز عن وصفه ، هو الصوت القال عنو أبوصلاح (الأمرضني وما طبَّاني) صوت تسمعو وتسأل المولى أن يهوِّن عليك القواسي ..

إنه صوت سيد خليفه الذي إذا ما تغنى بصوت السماء فعليك الإستعداد لمغادرة الأرض والذي إذا تغنى عن ربيع الحب وكيف ضاع الأمس يبين لك كيف تكون المضاهاة بين الفصول وكيف تتم المقارنة بين المواسم والهجير والزمهرير.. صوت يخليك قاعد في السهله لاترى (غير الرمال) ..
لكن يا ناصر ..

الله في.

بوست زي الجمكسين ياخي
نخجي وجوعير تقيل





ود المرضى كيفنك ياخ

عليك الله يا ود مرتضى إنت سارر هاشم صديق عشان يمرق من صدف الأشواق
الجواك دا ملاحينا لعشق خرافى المدى ياخى إنت متوك عديل وداير زول زى
هاشم صديق دا يكتب عرض حالك ويعطيه لبتهوفنى الموسيقه وماسيى الحنجره
حتى تبكى الجبال وتهتز من خيط دستورها البعيد يا ود مرتضى إنت فرايحى
أفرحك الله بكل جميل وسدد خطاك وبارك فى كل خطوك لأنك تجيد إستوقافنا
على عرفات عروشك الملهمه ولك ألاف التحايا.



منصور

ش

Quote: ش

نااااافر بغني عليهو..
جاهل وقلبو قاسي وقلبي طائع ليهو..

والله يا شكري لو الحلقه دي كان فيها إبن الحي البلاتيني عبدالرحمن الريح كان المشاهدين طشوا بالخلا
وانا قدامم ، مقابر البكري لم تعد الخلا زي ما شايف، لكن قطع شك كان غرَّبوا ومسكوا درب الهوا ..

عارف لما برحمة ربنا ندخل الجنه حايكون عندنا طلب إنو يجمعوا لينا ثلة المسالمه وحي العرب
في قعدة مثلها لاعين رأت ولا أذن سمعت ولا فضائية نقلت ولاخطر حام حولينا..

ياخ ما تغيب عن أولاد الحي بالطريقه دي،

هني برؤياك الحياه الماسخالي،

Quote: شكلك الشغل دا هبش اوتارك إنت ذاتك والله أعلم..

أوتاري؟
أوتاري يا بله؟
يا دكتور الجهاز العصبي المركزي والطرفي أسوي بيهو شنو كان ما استجاب بعنف ألماني لمثل هذه الأفعال،
بالله بعد الخوه دي دا سؤال تسألو؟
الناس ديل يا حبيب لما كانوا بتكلموا فرحت المقاعد وشرعت في مغازلة الطاولات بصورة مكشوفة وخفتت الإضاءة طوعا،
تحركت عدة أشياء من اماكنها كما يحدث في حلقات تحضير الأرواح وخروج ما يشبه الإكتوبلازم السعيد من الجسد،
عارف يا بله ، عندما غنى سيد خليفه الأغنيه وتصاعد الطرب متخطيا ثيابي إلى الخارج خرجت عبر الجدار
إلى أماكن ترتد فيها (جهشة الضوء) كما قال ودالمكي ولم أعد،
هسه سألتك بالله راقب بدقة ما جرى في الفيديو بين الدقيقة 8:13 و 8:43 ،
أسمع صولو الساكس ، وشوف الساكس ، والصولو الأخير ، الأخير يا بله، صولو التبسم فمفاتيح الساكس تشبه عيون الرضا،
أنا كلامي دا بقولو ليك عشان تقدر تكوِّن فكره بسيطة عن ال Tipsiness وتديني رأيك.

بله ، سألتك بالذي نفسي بيده (لاتزيد بلبالي ولاتكون شكواي مويه في غربال..)

يا نسيم الليل.

يا تروتسكي الاصلي

وذو العشق القديم وإن تاسى
مشوق حين يلقى العاشقينا
وقيل أن البعض ينزفه شعرا
والبعض ينزفه دما من قرحة المعدة
سلامات ياصديقي

Quote: متعة، والله كيََّّفتوني حد الترنح .. وعلى شفا الترتحة وفقا لأقوال أهل الشعشعة.. حديث أنيق سهل ممتنع وكلام كده من النوع ال لو قالو ليك زولك في الطريق ، ممكن بعد ثواني تُتَّهم بالتواجد في حالة سكر ظاهر في الأماكن العامه، تناول (سبب نزول) أغنية عن حالة حب حقيقية من قبل أطرافها ، بل سمِّهم أبطالها ، بجهاز إعلامي وبشفافية كريستالية ، شئ مجيد يخليك مرتاح ومبتسم وجزل حبور تغني سااااكت، كلام يسوقك من يدك اليمين إلى باب احترام الرواة ديل.. لم يصدق من قال ( الحب لا يقتل العشاق ، هو فقط يجعلهم معلقين بين الحياة و الموت)، فالحقيقة هم بالحب يستحيلوا إلى نهر نغتسل منه ونرتوي فيه ، نهر زي ناس هاشم ومكي وليلى ديل ، زمزم فن بس ..

عيك!!
ناس مسقط ألحقوا شيخنا مرتضى دا غرق

يا مولانا الزول العامل زي العنبر الاسمو هاشم صديق دا ليهو دور في حالة وجدك دي
كمان الزولة الاسمها نسرين النمر دي ذاتها مشاركة في المؤامرة
مقدمة برنامج زي ما بقول الكتاب
من غير تكلف وفجاجة وزحمة ألوان لسرقة الكاميرا من الضيف وموضوع الحلقة
ياخي الباقيات البجن معطونات في علبة ألوان وكل مرة يقاطعوا الضيف ويقولوا كلام سخيف من أجل الكلام بس ديل ما يتعلموا منها!

المرتضى ود حامد ,,, وين مختفى ,, فتشنا عليك ومالاقينك

الهجوم على العزيبة الشمالية مخطط له قريبا و ستكون الدهشة ,, بس الاشارة

تسلم يالحبيب

Quote: المرتضى ود حامد ,,, وين مختفى ,, فتشنا عليك ومالاقينك

كان سألت علينا كنت عرفت نحن الليله وين
كنا لما نغيب ثواني بتفوِّقونا بالياسمين،
بعيد عن مسقط يا حيدر والله في طرف آخر من الكره الفرضيه الإفتراضية،

Quote: الهجوم على العزيبة الشمالية مخطط له قريبا و ستكون الدهشة ,, بس الاشارة

بالحيل ، تشرفونا ، تشريف يا حيدر ، أهجموا ، وبمدفعية الميدان،
عثمان ودمحي الدين قول ليهو ما تفوت وللسني طمِّني.
الوصيه في الذمه،

وصيه أخيره:

قول لصاحبك الذي اعتزل المنبر على بال ما أجي أرضِّيهو ما قال سند:
(لا تُساوم..
لم يَعُد في الأرض الا وجُهك المنحوتُ من صخرِ الهزائمْ)

ود المرتضي ازيك

والله انا قايلها نهاية الحاجه ديك

هي تاري النهاية الأغنية

أنا أفتكرت ناس النيل الازرق ديل قلبوا

لانو عنوانك دا في ظل الظروف دي بشير لحاجه واحدة

والله فعلا يا مرتضى كانت حلقة جميلة

واذكر انني تابعتها واستمتعت بها كثيرا

لك التحية والود

الانيق محمد المرتضى ما اجل من الابداع الا حلاوة التذوق وذوق الاحتفاء به
ولكي لا نحمل الجمال في ذاكرة خارجية نعلن لكل فناني بلادي حوجتنا لاستئناف مطر الابداع من جديد خوفا من يباس ارض الغبش
لك كل الود عزيزي

Quote: ولكي لا نحمل الجمال في ذاكرة خارجية نعلن لكل فناني بلادي حوجتنا لاستأناف مطر الابداع من جديد خوفا من يباس ارض الغبش

شقدي ،
قد ينحسر مد الإبداع في زمن ما لأسباب تتباين ، لكن الجمال يأتي بأشكال متعددة وبلادنا ولود لن تعدَم من
يأتي بين حين وآخر ليدهشنا ويفاجئنا في الزمن غير المواتي وفي ظرف نظن أنه غير مرجو فيه جمال وغير متوقع..
رغم أن جل الإبداع في بلادنا ينسب لفترة بعينها إلا أن دورة التاريخ كفيلة بأن يأتي جيل يقدم مالم يخطر
على بال..

Quote: والله انا قايلها نهاية الحاجه ديك

ليلاك؟
غني عليها يا احمد،
أو غني ليها ،
بتجي.

Quote: زي الجمكسين ياخي

Quote: نخجي وجوعير تقيل

طارق المشع،
أفتني في رؤياي يا رعاك الله،
زمان ، زماااان بدري ، قلنا الناس المابيبكوا ماناسنا،
النخجي - بس بدون جوعير - محبب ويجب أن يتم بين حين وآخر،
فللبكاء عشر فوائد منها تنشيط الغدد الدمعية وتنظيف العدسات وتعقيم الجفون وتطهير الفؤاد وشغاف القلوب ،
البكا مطلوب،
كان ما مصدقني راجع إختصاصيي العيون،
البكاء يا طارق هو بيان عملي على صحة العقد والممرات العصبية وسلامة شبكة الأعصاب والوصلات الرابطة،
هسه شوف ناس هاشم ومكي ديل ، والله محمد ولد بكاي الموريتاني بالنسبه ليهم تلميذ ساي،
بعدين يا طارق في ناس في الحلقه دي بكوا في صمت ، دموعم بتنزل للداخل،
قاعدين يتفرجوا بس،
وفي ناس بكاهم يغطي عليه واجبهم المهني لا أكثر،

اسأل الله أن يديم عليك النحيب يا ودجبريل فهو نعمة،


قول آمين.

Quote: عليك الله يا ود مرتضى إنت سارر هاشم صديق عشان يمرق من صدف الأشواق الجواك دا ملاحينا لعشق خرافى المدى ياخى إنت متوك عديل وداير زول زى هاشم صديق دا يكتب عرض حالك ويعطيه لبتهوفنى الموسيقه وماسيى الحنجره حتى تبكى الجبال وتهتز من خيط دستورها البعيد يا ود مرتضى إنت فرايحى أفرحك الله بكل جميل وسدد خطاك وبارك فى كل خطوك لأنك تجيد إستوقافنا على عرفات عروشك الملهمه ولك ألاف التحايا. منصور

المنصور مفتاح الأدب،
لو جيت للجد الحلقة دي ألهبت أسلاكي البسيطه التي لم يكن دورها يتعدى العادية وإضاءة (لمبة بيان)،
فجأة تحولت جميعها إلى High Tension Lines تمد مدينة من مدنكم بما تحتاجه من سهر كرنفالات وبهرج،
والواحد كل يوم يتضح ليهو ال 35000 فولت وما فوقها معناتا شنو..
الحلقه يا منصور لم تقتصر على قصة الحب التي وردت في الحديث لأنو القصة زاتا مافي زول قال تفاصيلها
لكن النتائج كفيله بتوضيح ما جرى ، يعني لامن تشوف بلد لم يتبق منها سوى الأطلال يمكنك أن تعرف كيف
كانت درجة القصف أو حجم الإعصار الذي مر بها، أو حجم السد الذي انهار ، لكن العاجبني برضو العلاقة
الصحبه السمحه الكانت وما زالت بين هاشم ومكي (بدون ألقاب) ..
هاشم قال كانوا بيعرفوا عن بعض كل سغيره وكبيره ، مواعيدم قصصم قمصانم وجباتم وأماكن العشق
واللقيا ، زي العلاقات دي يا هاشم هي الثروه الوحيده في الحياة ولما يكون عندك زول صديق زي دا
مفروض تزيد في النوافل شكرا لله ، لكن برضو زول زي دا لما يرحل بيسبب ليك نوع زهايمر لم يرد في الكتب،
عجبوني لأنهم يحكون في فضائية وفي ما يعتبره العامة (خاصا) كما لو أنهم يتحدثون في ضل شجرة
براهم بصفاء وصدقية وراحة وعفوية تبسطك لامن تدوبي..

من الطريف أن يستخدم هاشم تعبير (ركب التونسية) وأيضا يشير إلى حب هذا الزمن الذي فيه
الحبيب الأساسي والحبيب الإحتياطي ، باستخدامه تلك المفردات والتعابير أكد هاشم على عفوية
الحديث بعيدا عن التكلف ، واثق أن كل الفئات العمرية استمتعت بالحلحديث وبالقاموس المواكب..
بس برضو يا المنصور القاعدين ديل كلهم من العذريين ، ناس خلقوهم للريده بس..
جميعهم تجري عليهم الرواية المعروفة التي سأل فيها إعرابي أحد بني عذرة :
ما بال قلوبكم كأنهم قلوب طير تنماث كما ينماث الملح في الماء! أما تجلَّدون ؟
فأجاب العذري : إنا لننظر إلى محاجر أعين لا تنظرون إليها.

الليزر يا المنصور ،

أنوارو آخذه بدون سلوك..

Quote: الحلقة دي ألهبت أسلاكي البسيطه التي لم يكن دورها يتعدى العادية وإضاءة (لمبة بيان)، فجأة تحولت جميعها إلى High Tension Lines تمد مدينة من مدنكم بما تحتاجه من سهر كرنفالات وبهرج،

انوارك وصلتنايا مبدع ....هاى تينشن البسيطة دى شكلها ولعت الدنيا كلها ....شكرا ليك على توصيل احساس الحلقةالصادق لمبة لمبة ....

Quote: ¡بعض أسباب إعجابي بحلقة الذكر تلك هو مستوى الشفافيه التي تبناها الحضور ، بتحريض واضح من هاشم، حين كشف غطاء الحرير عن تلك العلاقه السمحه، وفي هذا سنة حميده ستستلهمها أجيال ستأتي ، الجايين حا يتعلموا ألا يخفوا حاجاتم الجميله ، بالله يا أخوانا كان في زول بحب يقول للمريود ، وعليك أن تحدث بنعمة ربك فالحب نعمه، قد لاتلتقي من أحببت مرة أخرى في دروب الحياة ويومها لن ينفع الندم و لاتنفع الذكرى ، بتريد زول قول ليهو بريدك هسه، أفشوا المحبة والسلام، البعض يتعامل مع الحب والإفصاح عن حالة الشريان التاجي والأبهر كأنه جنحة أو إثم عظيم، ياخ معقول زول في كل يوم يعلن على الملأ ألف مرة أنه يكره فلانا وفلانه ويلعن شعبا بأكمله وتخذله الشجاعة أن يعلن عن حالة حب واحدة؟ إنت بس قول لسجيلك بريدك ولاحظ ما يحدث للأشجار حولك وحالة زهور الظل كيف تؤانس بعضها بعضا وتنسى المخصبات والكلوروفيل المركب والإضافات المهدرجة،

جميل أنت أيضاً يا محمد المرتضى
ليت هذا يحدث حقاً سيكون الحب حب والإنسانية صافية

Quote: يا تروتسكي الاصلي

فيصل محمد صالح،
منذ رحيل الشهداء أكرم الفاتح والمنتصر أبو المعالي ومحمد سيد أحمد كردمان ومعتصم جلابي لم
ينادني أحد بلقب الأيام الخضراء.. أمد الله في عمر الحبيبين مصطفى شعيب والمنذر أبوالمعالي
وأبابكر وعادل وساطع وشخصك الواقف على مستودع فؤادي ممسكا بمفاتحه كبني شيبة والكعبة المشرفة.

زمن يا فيصل إفتقدت فيه اخوان الصفا أولئك، فرحت كطفل وجد أمه بعد أن ضاعت منه أو ضاع منها
في الزحام وأنا ألتقي جمال عبدالناصر إدريس في أحد المطارات حتى نسيت وجهتي ، عندما عانقني
عرفت ماذا كانوا يعنون ب (زاد السفر) رغم الدموع ، يا سلام عليهم ياخ، يا سلام لما يكون في زول
بريدك فقط لأنو بريدك ، ناس ما عايزين منك إلا إنك تكون عايش ، عقودهم معاك خالية من الشروط
والأحكام والأوهام وما يشي من قريب أو بعيد بالإخلال.. ناس لما يكونوا جنبك يتضاءل حلف الأطلسي
ووثائق لويدز وكل أكاذيب إعادة التأمين.
والله وحَّدوا بينا البارحونا وراحوا ..

Quote: وذو العشق القديم وإن تاسى مشوق حين يلقى العاشقينا وقيل أن البعض ينزفه شعرا والبعض ينزفه دما من قرحة المعدة سلامات ياصديقي

عليك سلام الله يا فيصل،
قرحة المعدة من مظاهر صحة القلب ، ما تسمع كلام الأطباء القاعدين في العيادات عشان يرسِّلوك الأجزخانه،
ديل ما عندهم فكره عن الحاجات .
يروى عن أحد أصحابنا القضاة أنه كان ضمن أول كشف أعلنته (الإنقاذ) لمفصولي (الصالح العام) وكان من القضاة
الشباب المائزين، سأله أحد الزملاء : شالوك؟ فرد عليه صديقنا بابتسامة صادقة : الحمدلله ياخ ، هسه لوما شالوني
كنت أودِّي وشي وين من الناس!!
أها يا فيصل ، مع موجات العشق المتوالية وارتداداتها نودِّي وشنا وين كان ما جاتنا قرحه .
بس سبحان الله البتسببوا فيها هم زاتم بيعالجوك ، إبتسامة منهم تتفوق على أجعص كورس Zantac أو Triple therapy
مساكين الأطباء يا فيصل ، فاكرين القصه هيليكوباكتر كأنهم لم يسمعوا مانفستو الكاشف الذي ورد
في الفقره سبعطاشر منه ( أنت الذي أتعبتني وأنت الذي فيك راحتي)..


ما تغيب عن إنساني يا فيصل.. فالحياة أقصر مما نتوقع.

Quote: كمان الزولة الاسمها نسرين النمر دي ذاتها مشاركة في المؤامرة

بعيدا عن المهنية والحرفية يا أشرف بتلاقي ناس في ونسه عاديه الواحد فيهم يمكنه أن يدير حوارا
بين مجموعة من الناس ك moderator دون أن ينبس بكلمة ، ولمزيد من التوضيح مثلا يقوم زول يقول كلام هنا يلتفت مدير
الحوار إلى مشارك آخر دون أن ينطق بحرف فيفهم الضيف الآخر أن دوره قد أتى في التعليق أو الرد أو المشاركه، حَسَب
النِمِر.

الحاجه دي عادي بتحصل بين ضيوفك وأنت مضيفهم، كثير من الناس يديرون الحوار بلغة الجسد وحسب ،
بس ديل ربنا وهبهم كاريزما خاصة ، الواحد فيهم بسمته تكفي عن مقال ولفتة منه تختزل مجلدا كاملا
وإن حدجك بنظرة فهذا بيان للناس ، ليس لك وحدك وإنما لكل الحضور وكل من ألقى السمع وشهيد ،

لغة الجسد يا أشرف معبره وخطيرة ومريحه وقاتله، هسه مش في واحده لو عاينت ليك ب (قعر) عينا بس ممكن تغيِّر تاريخك
واتجاه الرياح الموسمية وحركة السحاب وترفع الضغط الجوي؟
عارف يا أشرف نسرين النمر ، عاشت الضواري ، شهدت لها عدة مقابلات وكما تفضلت هي مقلة في الكلام وتدير الحوار
وتحرِّك الحضور والمخرج وبتاع الكاميرا والأشياء من على البعد بنظراتها وتعابير وجهها وهذه حالة يعرفها ناس الماورائيات
با ل telekinesis ، وكنموذج معروف في الغنا السوداني تحدث الراحل عثمان خالد عن النظرة البتذوِّب حجر والبسمه البتطوِّل عمر ،
ناس كدا عندهم ملكات استثنائية بتكون شاهدت عروضهم كتير في حياتك الدنيا.

أنا ما عايز أزيد في الكلام عن نسرين لكن أيضا يعجبني أنها لاتقاطع ضيفها بل تتناول منه الحديث برفق كأنه هو
الذي يمدها بخزف بابلي في متحف بغداد، فتمسح عليه باناملها فيلتمع ويتلاصف في عيون الناظرين ومن ثم تناوله
بدورها لآخر بذات الرفق العجيب، الرفق بالولهان.

برضو تقول لي مشاركة في المؤامرة؟
أنا ما دايرأقول ليك دي المؤامرة والمغامره زاتا..

Quote: هسع الواحد يقول شنو ؟

تلتزم الصمت يا عثمان موسى امام هذا الجمال

الم تسمع بان العرب كانوا يقولون ان عدم الافصاح في بعض الاشياء

في حد ذاته افصاح

وان النفس اذا ما حاولت ان تشع بمكنوناتها فاما ان زادت عنها او قصرت منها او شوهتها

لذلك نكتفي بالصمت ، وأظنني اقتبست هذه المقولة من جبران خليل جبران او ميخائيل نعيمه

عندما كتب عن جبران ، لا اذكر

لا نملك الا ان نكتفي بالصمت والادب مع المتعة أمام هاشم صديق وسيد خليفة

والله يا د / القرشي
بعد ما تابعت البوست وموضوع النهاية

لقيت نفسي ندمان ندم عجيب علي الأيام الفاتت وانا بعيد
عن السودان . تخيل حال الشعر والغناء وحال الشارع لو لم يتبدل

الحال في الليلة ديك .
والله يا أحمد يوم أفرجك في صور كانت في سنة 1993 في لندن في كرنفال
نوتنق هل قيت أنا ومجذوب والفنان العجيب سيد خليف .
سيد كان فرحان بالكرنفال والناس والغناء والسامبا المجنونة . نوتنق هل قيت دي
حلة الشعراء الانجليز الكبار ومنطقة الفن .
الحلقة جميلة جميلة وعلاج نافع للورم .

Quote: لقيت نفسي ندمان ندم عجيب علي الأيام الفاتت وانا بعيد عن السودان

Quote: لا نملك الا ان نكتفي بالصمت والادب مع المتعة أمام هاشم صديق وسيد خليفة

حقيقه يا أحمد،
اللوحات الفنيه لاتُشرح والواحد مرات كدا يجيهو إحساس إنو زي الحلقه دي مفروض يجيب الرابط بتاعا
ويمشي عن سُكات عشان ما تزعِّل الناس البريدو الجمال في صمت بدون تعليق، لكن كمان الواحد فينا
الفوله في خشمو ما بِتِتبَلا لمن تكون الفوله في جمالا زي ما إنت شايف.

كتب صديقنا الممتلئ فناُ وفنوناً عمر الفاروق شيخ الدين كتب بوستاً في نوفمبر 2006 قال فيه أن صوت أبو السيد في هذه الأغنية يبكيه لذلك أسمى بوسته ( صوت يبكيني )
تذكرته الأن وأنا أحلق معك في سماوات أبو السيد و ( قنبلة ) الأستاذ هاشم صديق وأريحية الأستاذ مكي سنادة ، وتذكرت أيضاً تداخلي معه في ذاك البوست عن هذه الأغنية تحديداً

Quote: يا الله يا للذكريات يا عمر الفاروق ترجعني هذه الأغنية لتلك الفترة الواقعة في المدى الزمني 13/02/1989 و 28/02/1989 . رجعت للسودان لأتوج حباً كبيراً بزواجي بمن اختارها القلب والعقل . فرح معي أحباب كثر بين رفاعة والخرطوم بحري . احتفلوا بنا كل على طريقته . العامل المشترك بينهم كان ذلك الفرح الكبير وهذه الأغنية . فحيثما تتم دعوتنا نجد الإستريو يصدح بها . يبدو أنها كانت الـ ( Hit Song ) لتلك الفترة . معك أتفق أن حنية الكلمات ، وحنية اللحن ، وحنية صوت أبو السيد تضافروا ليعطوا الأغنية هذا الألق . شكراً لك تشريمة صديقي الحبيب عبدالوهاب عمرابي كان يعرف محبتي لهذه الأغنية وذكرياتها فكان يسخر بالقول " يا أخي في زول عاقل يتذكر ( ليلة الخناجر الطويلة ) هذه ؟؟؟ "

وشكراً لك أيضاً أخي الأستاذ محمد المرتضى
فبعض الذكريات يضخ الدماء في شرايين حيواتنا .

Quote: حسيت شعور الراهب السار السنين مشتاق يفتش ليهو دير لمن تعب سالت دموعو علي الدرب خاف الأمل كره المسير

تصدق ياودالمرتضى بسمع فى الاغنية دى بسنين عمرى الانتا عارفها اول مرة اسمع انو فيها المقطع دا

حيدرامين الصورة دى جديدة ولا قديمة ولا انتا عجزتا قدر دا طبعا ماضى معانا بجى
وشغلو لينا الفى بالى بالك وبطل الغتاتة


تحيات لجميع المتداخليييييين

وحب لناس مسقط

النهايه

اشبه بعمليه تحويل الحبر الى دم

او كما شبه التيجانى سعيد قصيدته (قلت ارحل)

والتى قيل ان الشاعر كتبها فى ورقه الامتحان

(عيونك زي سحابة صيف تجافى بلاد وتسقى بلاد
وزي وطنا وكت اشتاقلو برحل ليهو من غير زاد)

مرتضى مساءك ورد

كم هو ممتع حكيك اتمنى ان تبرنى بقصه (قلت ارحل ) ان كانت فى ذاكرتك الجميله

يا سلام
يا مولانا ياخ
تفلق وتداوي لكن؟؟
شكرا جزيلا لمزج حالة الفرح والحزن فينا.
أجمل ما سمعت من هاشم،
وأجمل ما قرأت في البورد.
محبتي.

Quote: تفلق وتداوي لكن؟؟

أنا يا أحمد؟
أنا؟
بفلق وأداوي؟
ياخ حكِّم ضميرك وما تجور في حكمك،
هسه المفلوق منو ويساسك بين الليسبتاليات؟
ياخ نحن الواحد فينا كان مشى يعمل صورة أشعه بتطلع فاضيه،
تتصور؟
ما فضل شي زاتو يتصور..
يا اخوانا ناس ودالصديق ديل نعمل معاهم شنو؟
هسه دا ما الفيتو الأمريكي بشان المستوطنات زاتو..
الله يسامحك ويجنِّبك المناظير..
والأشعه..

Quote: تصدق ياودالمرتضى بسمع فى الاغنية دى بسنين عمرى الانتا عارفها اول مرة اسمع انو فيها المقطع دا حيدرامين الصورة دى جديدة ولا قديمة ولا انتا عجزتا قدر دا طبعا ماضى معانا بجى وشغلو لينا الفى بالى بالك وبطل الغتاتة

لا قديمه ولالالالالا عجزتا بس صورونى وانا عيان

Quote: الناس العماليق ديل يا سعد لم يجايلونا لكننا تفتحت قلوبنا قبل عيوننا وآذاننا على إبدعاتهم ونحن بعد يفعا نتهجى أولى حروف الريده اللهلهت لِهاتنا، زمن ما كنا شايلين هم ولا عارفين بكرا الجايينا

إذا هو قبضة من أثر العماليق :)

ميزت بين جيلهم و جيلكم حبيبنا
و إن كان يجمعكم الجمال و سعد الطالع..
هل النهاية أقدم من الملحمة 1964؟

Quote: هاى تينشن البسيطة دى شكلها ولعت الدنيا كلها ....شكرا ليك على توصيل احساس الحلقةالصادق لمبة لمبة ....

الدنيا لازم تولِّع يا منار،
الدنيا لو لم يضئها الحب (لمبه لمبه) فألف مرحب بمواكب العتمة وجيوش الظلام،
الحب دا يا منار يضئ الأفئدة ألف واط ويضاعف هوامش التسامح ويرفع مستوى كرم النفس
واليد واللسان، شوفي هسه الزول البريد بيبقى نضيف ومهذب ومتواضع ومُعطَّر ومُعطِّر كيف!! الحب يعيد
التوازن الكيميائي إلى الجسد والروح ويزيل الأملاح الزائدة والسموم والدهون المشبَّعة
عن النفس ويقوِّي جهاز المناعة وبيخلي الزول والحولو سمحين عديل كدا..
لمبه لمبه يا منار ،

ياخ أهلنا السمحه زاتا بيسموها الرتينه والكشافه ، مش سمعتي البيسأل واحده عن صاحبتا علويه السمحه قائلا :
(عينك حاكت الكشَّافه فـي البادوبه .. سـألتِك بـالإله الليله ياللالـوبـه .. سألتِـك بالإله علويّه وين رحَلوبا) ؟
تخيلي ، صاحبة المعشوقه زاتا عيونا كشافه على طريقة ( نقتبس من نوركم) فالريده دايمن مرتبطه بالنور ، يا (منار) ،
سيد عبدالعزيز في واحدة من تجلياته قدم عرضا برشلونيا نادرا تفوق فيه على خطط قارديولا حين قال:

مسو نوركم شوفوا المن جبينة صباح
والصباح لو لاح لا فايدة فى المصباح

الكلام ده جهجه حبيبنا الراحل بادي ولما وصل إلى منطقة (بوشهر) القال فيها :

نور جمالا دهشنا معشر الفصاح
بين ناطق صامت بين صامت صاح

بادي ، في إنفجارو النووي ، قال ووووووووك ، وخلافا لكلام المهندسين عاد التيار إلى
الهايتنشن لاينز وأخذت الأرض زخرفها واحتفلت مدينة الريو وما جاورها بكرنفالها المعروف ..

لمبادا لمبه لمبه..
سامبا سامبا..
سالسا سالسا.

شكراً جزيلاً و كثيراً شيخ الأدب مولانا وأستاذنا ود حامد ،
فالحلقة فعلا كانت أكثر من رائعة .. ومما زاد في حلاوتها
و شدة روعتهامقدمة الحلقة المذيعة نسرين النمر ، والتي
كانت تعرف جيداً متى تتحدث ومتى تتداخل ، دون أن تقاطع
أولئك أولئك القامات من ضيوفها.. لذا لا غرو أن نجحت
الحلقة ، وتدفق في حديث الذكريات والقلوب شاعرنا الكبير
هاشم صديق مع مكي سنادة ، مما زاد في ألق تلك السهرة
الجميلة ، فاخترقت أعماق وعينا واستقرت في مشاعرنا.

ولعل احتفاءك بتلك السهرة ، لا يقل عن احتفائنا بهذا
البوست وبمداخلاتك الثرة وتعليقاتك المليحة والراقية
لأنك تملك ناصية الحرف بحق .. ولعل أختنا نادية عثمان
قد لامست كبد الحقيقة في مداخلتها أعلاه في قولها لكم:
أنت ملك السهل الممتنع والممتع . صدقاً قالت ندوية .

سلمت .. أستاذنا .. سليم الذوق ، و .. تدفق أيها النهر .


مودتي ،


( ليمو )

باين لي سعد الدين ده فاكرك كنت ماسك الرضاعة بيد وبتناول قلبك لبت الجيران باليد التانية

أكيد يا ناصر،
عندما يسود الحب بين الكافة ويفصحوا عنه لمن يهمهم الأمر سترى النتائج بنفسك ،
من النتائج القريبة جدا والمرتقبة يا ودالحاج إغلاق مصانع السلاح وتسريح الجيوش
وكافة القوات النظامية ، بما في ذلك حرس الصيد بسبب سريان مقولة (ظباء مكة صيدهن حرام) ،
سيتم إيجاد وظائف بديلة لمنسوبي الأجهزة الأمنية وقوات الشرطة مع استثناء إدارة
الدفاع المدني حتى تقوم بدورها المنوط بها في إخماد النيران التي تندلع بين الفينة
والأخرى بسبب نظرة السمحه ام عجن وزلازل وبراكين نيرانا ما بترحم..

ربنا يحفظ.

إنعدام المروة عند خطوط النهاية, فلازم يكتبوها بالإنابة


سيد خليفة , غناها بكل جمال وصوتو وحنيتو




____________________

سلامو لـ مولانا ولكل المرور الجميل

آ ناس هه .. إنتو المسلطكم علينا منو؟

أسه الواحد يطش بالبوستات جاي وجاي .. عشان يمرق من حالات الطفش والحزن المقيم ... يجي يلقاكم فارشين قلبو تبروقة؟؟؟؟

شوف هاشم صديق ده زول صنديد .. وممكن يكتب ليك .. حاجة فيك لا بتتنسي لا بتنمحي .. ويكتب ليك ألاقي وجيها شاقي النيل .. ونوارة الفريق الليها كم غنت حروف .. ويكتب ويكتب ويكتب لامن إنت ذاتك تذوب .. ويجي بعد داك يلعن ليك خاش أبو عركي وغيرو في المحاكم ..

لكن أبو السيد ده كلامو براهو .. فيهو رقة كده ما عادية .. أسى بالله شوف أسراب الحسان .. ولا رحلة لأرض الكنانة .. ولا ربيع الحب .. ولا غيرة ..

أخوي الصغير .. كان وقتها في مرحلة الأساس .. كان يحب أبو السيد محبة شديدة .. وكان لا يعرف اسمه .. فقط يشاهده في التليفزيون .. وبعدين سمع إنو سيد خليفة مات .. ولم يعر الأمر كبير اهتمام ,.. أهه بعدين يوم جابو ليهو في التليفزيون صورة وكان الحديث يدور عن رحيله .. أها زولك يا دوب وعي للموضوع .. وتعال يا بكا .. الفريق كلو ما قدر يحوشو من البكا..

رحمك الله يا أبوالسيد ...

المذيعة الاسمها نسرين دي
رقيقة رقة السنين . وتاني هي بتجي متين ؟
والله يا محمد حقو أقوم اجيب دش MX 1800 .

أخي العزيز / عثمان موسى
تحياتي وتقديري ،

Quote: المذيعة الاسمها نسرين دي رقيقة رقة السنين . وتاني هي بتجي متين ؟ والله يا محمد حقو أقوم اجيب دش MX 1800 .

والله كمان كان خليتم دشين بدل واحد ، تكون ما قصرت تب معاي ؟!
وفي محبتها .. فليتنافس المعجبون ، ولتلتئم الدشات ؟!

أتاريني ما براي ! .. والقومة ليك يا بت النمر ، يا رائعة.


مودتي ،


( ليمو )

Quote: شن فايدة رفيقك كان ما عرف الحالة الطبية لحجابك الحاجز و خلاياك وذبذبات روحك وموجاتا الطويله والقصيره ووضع النبض وتقارير الإختلاجات والوجيب؟ عليك الله شن فايدتو؟

ولا شئ


آآآآآآآآآآآآآه بس


منّك لله يا مولانا


ما بتلاقى ربنا بي هيّن

عثمان موسى آخوي ... أحسن تمشي سوق الدشوش .. وتسوق ليك قندراني عديل كده!!!!

مالي أكَتّمُ .... قد برى جسدي؟؟؟؟

Quote: يا أخي في زول عاقل يتذكر ( ليلة الخناجر الطويلة ) هذه ؟؟؟

يا عاطف ،
دعني لوهلة أنحي بموضوع (النهاية) جانبا لأمتع نفسي بتعليق صديقك عبدالوهاب عمرابي
الذي أشرت إليه في مداخلتك لعمر الفاروق شيخ الدين.
صدقني ، عندما قرأت التعبير أعلاه عدت بالكرسي إلى الوراء بابتسامة كفيلة بضخ
الوسامة في أي وجه متعب لأني لم أجد تعبيرا يطابق ليلة الزفاف أبلغ من (ليلة
الخناجر الطوال
Night of the Long Knives ) ، فهو ، لمن يعرف تاريخ النازية ، تعبير (قميص عامر) ،
ياخ صديقك دا أبدع في هذا التعليق ، ففي الليلة المذكورة قُتل كثير من مليشيات
أصحاب القمصان البنية ( Brownshirts ) الذين رأى هتلر أنهم بدأوا يهددون
(مشروعه الحضاري) ، وهو ذات حال ليلة الزفاف حيث يَفنى نفر كريم وتزهق
أنفس عزيزة طالما ظلت تتبتّل في محراب العروس أيام الوله الندي والعشق الأخضر
والكل يرى فيها بقايا العمر وأوهامه كما قال النواب، ليس من قبيل الصدف أن
حكى مكي سناده كيف أنه تقدم لطلب يد محبوبته وجاء الرفض غير القابل للتظلم
أوالإستئناف ، الرفض الذي كثيرا ما يتسبب في ارتجاج بالمخ ونوع غريب من
الشلل الرعاش لولا تماسك سناده الماسي، ذهب مكي في ليلة الخناجر الطويلة تلك مهنئا
العروس وفي ظني ، غير الآثم ، معزيا أصالة عن نفسه ونيابة عن عدد غير معروف من أصحاب
ال(Brownshirts )، والله لما حكى مكي تلك الجزئية خُيِّل إلي أنني في حلم جميل ،
يا سلام يا مكي ياخ، في نوع أريحية ، يا عاطف ، يخليك تتوهج في بدنك زي ما قال الفيتوري،
ناس زي ديل حديثهم يُفضي بك إلى يقين صوفي وحالة تعطُل للجاذبية وسباحة في الفضاء،
حديث ( بعمق الجرح يرقص في عيون الحس يزحف تحت أنسجة الشعور).

الله

علي لم شتات الروح الشريدة في هذا الحكي

شكرا استاذ محمد المرتضي


بابكر زيكو

يا رمانة!

مولانا ده بكون "سلم قلبو" و هو في عالم الغيب قبل أن يكون :)

Quote: و لكنهم و أنتم جيل محظوظ

يبدو أن عطفي بالواو دون جمع (جيل) قد أوحى بأنني نسبت مولانا لجيل العماليق هؤلاء دون أن أقصد
كان الأحرى أن أقول أجيال محظوظة..
مع إن المرتضى هذا لو حكى عن سرور و كرومة لأحسست أنه جايلهم
و سار معهم و خالطهم في الأفراح و المقاهي.
يا رمانة، مولانا هذا جيله (كل جميل).

Quote: حسيت شعور الراهب السار السنين مشتاق يفتش ليهو دير لمن تعب سالت دموعو علي الدرب خاف الأمل كره المسير تصدق ياودالمرتضى بسمع فى الاغنية دى بسنين عمرى الانتا عارفها اول مرة اسمع انو فيها المقطع دا

إنا لله وإنا إليه راجعون،
دا شنو يا نجاة الكلام دا،
يا رعاك الله الراهب السار السنين المشتاق يفتش ليهو دير دا شدة ما دورو
محوري في الغنية دي لامن جاني إحساس إني عندي معرفه شخصيه بيهو وإني مقصِّر
في حقو وعلي إلتزام ديني أشوف ليهو Navigator .
معقول يا نجاة الزول معطون في (دموعو على الدرب) ووحلان في الشجن ومن شدة خوفو
من تلاشي الرجاء كره الرحله ، قلبو اباها عديل كده ، سادر يتمتم مع الزيادي القال:

الـسـنان مــداحـي الـفَـقَّـعْ
والـريق مسَّخ السُكَّر بعـد ما اتنقَّعْ
نخلي الحارسو في خميلة ما بتجدَّعْ
مَرضـانِك مَـقـدَّد قلبو مـا بترقَّعْ

يا نجاة يلزمك سجود سهو..
أو كفارة..

ده جنسو شنو ؟؟؟؟؟

بصلّح الميك أب وبجيك راجع

Quote: النهايه اشبه بعمليه تحويل الحبر الى دم او كما شبه التيجانى سعيد قصيدته (قلت ارحل) والتى قيل ان الشاعر كتبها فى ورقه الامتحان (عيونك زي سحابة صيف تجافى بلاد وتسقى بلاد وزي وطنا وكت اشتاقلو برحل ليهو من غير زاد) مرتضى مساءك ورد كم هو ممتع حكيك اتمنى ان تبرنى بقصه (قلت ارحل ) ان كانت فى ذاكرتك الجميله

التيجاني سعيد زول لايقل جمالا عن هاشم صديق ، التيجاني القال يرحل يسوق خطواتو من زولا نسى الإلفه،
كنت أراه في طفولتي وهو شاب قيافه يشبه في أرشيفي إمرئ القيس في الحارة التالته تعويضات بيت المال ،
شاب تقطر أشعاره وسامه ، يسير بصحبة رفاقه الشعراء والأدباء كسعدالدين إبراهيم ، إن لم تخذلني الذاكرة الخؤون.
ما زالت بمكتبة الذاكرة صورة ذلك المدهش صاحب القصائد البرمائية بملامحه الوضيئة وهدوئه الواثق . أفادني بعض
المهتمين بالأدب والمعنيين بالشعر أن التيجاني اعتزل الشعر وجذبته واحدة من مركبات التصوف الفضائية تتبعها طيور خضر ،
قيل لي أيضا أنه اعتزل الشعر ، رغم علو كعبه فيه، بُعيد تفَكُّرِه في قوله تعالى (وَقِيلَ يَا أَرْضُ ابْلَعِي مَاءَكِ وَيَا سَمَاء أَقْلِعِي
وَغِيضَ الْمَاء وَقُضِيَ الأَمْرُ وَاسْتَوَتْ عَلَى الْجُودِيِّ وَقِيلَ بُعْدًا لِّلْقَوْمِ الظَّالِمِينَ ) - هود/44 - والتي قال فيها السيوطي أن ‏المولى في
( "‏وقيل يا أرض ابلعي ماءك‏" أمر ونهى ، وأخبر ونادى ، ونعت وسمَّى ، وأهلك وأبقى ، وأسعد وأشقى ، وقصَّ من الأنباء
ما لو شُرِح ما اندرج في هذه الجملة من بديع اللفظ والبلاغة والإيجاز والبيان لجفت الأقلام) ، كلامي دا يا ناظم بيِّنة سماعية
وفيه نقل لكنه باستصحابه مع قرائن أخرى وبينات ظرفية موازية يكون للحقيقة أقرب.
بس يا ناظم زول يشبِّه العيون بالسحاب لابد أن يرحل ويسوق خطواتو وأقلامو ورقاعه وأوجاعه ويتسامى إلى ما فوق السحاب.

لاأعرف يا ناظم سبب (قلت أرحل) لكن في ذهني عدة أشياء تقود إلى مثل ذلك القرار ، عموما لو عرفت السبب سأبتدر
بوست بعنوان القصيده الأغنية التي عرَّفتني في طفولتي إنو المنفى هو المكان المافيهو حبيب..

Quote: لأني لم أجد تعبيرا يطابق ليلة الزفاف أبلغ من (ليلة الخناجر الطوال ( Night of the Long Knives ) ، فهو ، لمن يعرف تاريخ النازية ، تعبير (قميص عامر) ، ياخ صديقك دا أبدع في هذا التعليق ، ففي الليلة المذكورة قُتل كثير من مليشيات أصحاب القمصان البنية ( Brownshirts ) الذين رأى هتلر أنهم بدأوا يهددون (مشروعه الحضاري) ، وهو ذات حال ليلة الزفاف حيث يَفنى نفر كريم وتزهق أنفس عزيزة طالما ظلت تتبتّل في محراب العروس أيام الوله الندي والعشق الأخضر والكل يرى فيها بقايا العمر وأوهامه كما قال النواب،

عميق هو ردك أستاذنا محمد المرتضى كديدنك دائماً
وخصبة هى معلوماتك كالعهد بها
لكن دعني ( أعيدك للوراء بكرسيك ) بزوايا أكثر حدة وأحيل بسمتك الوقورة جلجلة وصخباً

فصديقي عمرابي لم يكن يقصد المعنى ( النبيل ) الذي ذهبت إليه بتحليلك البريع،
هو نظر للموضوع من زاوية مغايرة تماماً
أى أن العريس في ( ليلة الخناجر الطويلة ) تلك يمثل الضحية أو هو ( مجموع أصحاب القمصان البنية ( Brownshirts ) ) ينتظر وقع الخناجر الطويلة من ( هتلر ) الذي تمثله هنا العروس فهى رأس الرمح في مخطط القضاء على ( مشروعه الحضاري التحرري ) يساعدها أهلها أو أصهاره ( كل حسب تخصصه ) .

لذلك هو لا يريد ما يذكره بتلك الليلة


______________________

ذلك هو رأى الصديق الحبيب عبدالوهاب عمرابي
ونقلنا له لا يعني تبنينا له
لووووووووووووول

المسألة كلها ما معقولة وما عاديه يا ليمو ، فاحتفالي بالأغنية أسبابه تقليدية وهو أن ما فيها من لحن موسيقي يكفي لرقص المحيط الباسفيكي وإخراج أمواجه عن وقارها النسبي أضف إلى ذلك صوت سيد خليفه الذي يزلزل الرئات المُحصَّنة ويهز الضلوع 9 درجات حسب ريختر إسكيل وأما الكلمات فياهو إنت شايف . هذا كله في جانب وفي الجانب الآخر الطريقة التي تناول بها الحضور أزمة مكي السابقة والأسلوب المتقدم الذي تصدت به الأجهزة المعنية لتلك الأزمة ثم عرض ذلك كله بواسطة سياد الشي زاتا أمام ناس زيَّنا جُبِلوا على دسدسة (إنتصاراتهم ) القلبية دعك عن هزائمهم وانكساراتهم في هذا المجال.
أنا معاك يا حليم كثير من الأغنيات تناولت الموضوع ولم يغادر هاشم من متردم لكن زول يجي ويقول ببساطه تتوجها ابتسامة باتساع الأفق إنو هو الزول الإتردم زاتو.. دي نادره ، أما دور نسرين وصمت صلاح الدين الفاضل الذي ضجَّت إبتسامته بالوحيح فكان لهما الدور الرئيس في تغيير مساحة الشاشة بتوجيه من القمر الصناعي المبسوط من الحاصل،
قلت ليك المسأله كلها كانت غريبه يا ليمو، غريبه لدرجة خلت معها إنو مكي بيعمل فينا بروفه لخطوبة سهير أخرى لأنو بقينا طوالي شغالين بمقولة الفيتوري (الغافل من ظن الأشياء هي الأشياء)..

أعتقد أنني كنت أنتعل غير " تعبي " العالي ، تلك " السفنجة المكروشة " بعناية عزباء فاضية شغلة
وياسيدي الأمانتي ليك كانت تلك الأصقاع المتوارية بإستحياء في قعر خريطةِ ضواحي الضواحي ، لاتشهد نمواً فنياً واضحاً
ثمة " دلوكة " هنا و " شتم " هناك ونحاس يصرخ هادراً " باكُلكُك باكُلكُم "
هذه هي ملامح حلّتنا التي كانت تقاوم طقس " تكشيرتها " بأغنية !
في عصراً قريب الغيبة أحتملت فتات مراهقتي الذي لم يكن يعنيني فيه غير ثريد المشاهد التي تعمر بها شبكيّتي عند مرور سرب فتيات
يقصدن درساً عصرياً أو هن يرجعن من " الفزَع " بعد أن يحتطبن
وما طالبني رقصة عشان أسمح ليك بيها
وجدتني دون أن أعِي في ظل الحائط المطل علي ميدان الكرة
وفي تلك الأيام كنت أظنني " فان باستن " المناطق الحارة عندما أرتديت " فنيلتي نمرة عشرة " وبدأت في الركض خلف الكرة .
أنتهي " الدافوري " بخيرهِ و " شلاليتهِ " بالطبع
وتسابقنا نحو ذلك السبيل الذي ربطوا علي صهوةِ " أزيارهِ " علباً كانت للحليب أسموها " كيزاناً "
وبعد ذلك تحلّقنا مجموعةً من الغلمان والحملان كان يترأسنا " عبد الله " و" عبد العزيز تُنفُش " أفضل من يجيد اللعب علي " البُنقُز "
وثاني إثنين إذ هما في " الدربوكّة " !
كان عبد الله عبارة عن " ساوند سيستم " بشري
وعندما يرفع عقيرته بالغناء " يجيب الرايح والضهبان !
سيد خليفة !
لم أكن أملك له في ذاكرتي أغنيات أحتطب من جزوتها شيئٍ من الحمي
غير ذلك المدعو " بالمامبو السوداني " و " نانا يا نانا " !
ولكن ...
عندما بدأ عبد الله يغني ويردد " يوم في يوم غريب فيه الشمس لمّت غروبها وساااااااافرت "
أعتقدتُ بأننا سنصحو في صباحِ اليومِ التالي ونسأل عن الشمس
ويخبروننا بأنها قد ساااااافرت !
فلم أنهض من غيبوبتي تلك إلا وأنا حافظها عن ظهرِ حب !
" بانت نجوم متفرقات زي الدموع
فى خد حبيب ودع حبيبتو السافرت
والليل ضفائر حزنو مداها الألم "
يااااااااااه
أمتلك إحترازاً راسخاً كان ينبغي علي أن أفصح عنهُ في مطلعِ هذه المداخلة هو أن عبد الله ذاك كان أفضل من يوضّح أسباب النهاية !
تلك الأغنية التي قمت بإستغلالها وساعدتني للغاية في تكسير جبالِ الجليد بيني وبين فتياتِ القرية
فلم أكن احتاج إلي أكثر من قصاصةٍ وقلم وأرميها تحت قدمي أنثي فلا تنم الليل بطولهِ سهراً وإشتياقاً !
كان عندما يتحوّل الإيقاع في سلاسةٍ إلي " ريقي " وعبد الله يغني
" اشتقتا لي طيف الحبيب
ومشيت طريق اسمو المصير
ودعتا زهرات الأماني
ورجعتا لي ألمي الكبير "
نعتقد بأن ذلك المدعو " بوب مارلي " قد أرسل لنا بعض جنده الغير مرئيين ليحتلوننا إيقاعياً
!!
وعندما يغني ويقول
" حسيت شعور الراهب السار السنين
مشتاق يفتش ليهو دير "
كنا نرتدي الصليب جميعاً وننتظر صباح الأحد حتي نذهب لذلك الدّير ونصلي
فنظل بين الرقص والصلاة إلي ماشاء الله حتي نكتشف بأننا سنبكي !
فعبد الله يبدو أنه سيوضح أسباب النهاية !
ياحبي عيش كلمات خطاب
من الحبيب كان النهاية ....
فنبكي
ونبكي
هل بمقدورنا شيئاً يا صديقي غير البكاء ؟؟
وهل نملك دموعنا أصلاً في تلك الصلاة كي لا ندمع بخشوع ؟؟
" حرفوا الدموع صدروا النحيب
والحسرة كانت فيهو غاية
خلاني اغرق في المصير
وانا لسه عايش في البداية
أندم علي الحلم اللي راح
واطفي الشموع وابكي النهاية
وابكييييي وابكيييي النهاية القاربت . "

هسه أنا أبكي ؟؟
غايتو

احك يا صديقي المرتضى .. احك ... احك وتنقل من مرفا لمرفا ... وخذ من كل ركن قصي في شعاب القلب جذوة واشعلها ناراً .. احك .. ولكن ترفق قليلاً .. فمن الحكي ما قتل!!! .. (عاد بعد النار والقتل ده في ترفق)

Quote: باين لي سعد الدين ده فاكرك كنت ماسك الرضاعة بيد وبتناول قلبك لبت الجيران باليد التانية

سعد ما (فاكر) ،
سعد متأكد،

يا rummana
الذين يعتقدون أن لون البشرة والعيون والشعر وباقي الهاردوير هي فقط التي تنتقل بالجينات عليهم مراجعة معلوماتهم ، المشاعر والميول والعواطف ومجموع السوفتوير البشري زاتم بيدخلوا في قوانين مندل ، لايد لنا في مد القلب بيد لبت الجيران بينما اليد الأخرى ممسكة ب (الرَضَّاعة) لأن ذلك مكتوب في لوحنا المحفوظ قبل أن نولد ، يا رمانه هامش التخيير ضيِّق جدا مقارنا بمساحات التسيير العظيمه والكون دا منظم بدرجة لاتسمح بالصدف ، هسه شوفي زي صورة المريخاب الجبتيها دي والتي يجب أن تسمى (زاد السفر) وقال جورج جرداق عن مثلها ( ثم اغمض عينيك حتى تراني) ، الصوره دي سلوك طبيعي لاعلاقة له بالتخطيط البشري وسبق الإصرار والترصد ن حلجه كدا في الكروموزومات منذ الأزل.

يا سلام على الهندسة الوراثية..

الشعب يريد تفويت القطار

Quote: مالي أكَتّمُ .... قد برى جسدي؟؟؟؟

ودالجيلي،

لاتترك مكانا خصص للحب خاليا أو لحظة أفردت للعشق دون بوح،










-
شر البلاد مكان لا "حبيب" به ... وشر ما يكسب الانسان ما يصم

Quote: منّك لله يا مولانا ما بتلاقى ربنا بي هيّن

اللهم ان كان ذنبي عندك عظيما فعفوك اعظم من ذنبي ياأرحم الراحمين،

أنا لا أقنط من رحمة المولى يا سلمى.

Quote: والله كمان كان خليتم دشين بدل واحد ، تكون ما قصرت تب معاي ؟! وفي محبتها .. فليتنافس المعجبون ، ولتلتئم الدشات ؟!

ليمو،
في ناس الدش ما بجيبم ولايرون بالبصر ،
(هي أشياء لا تُشتَرى)

Quote: المذيعة الاسمها نسرين دي رقيقة رقة السنين . وتاني هي بتجي متين ؟

حين يغرق الكون (في أسى شفيف)..
تأتي (فتورق الكروم وترقص الأضواء كالأقمار في نهر
يرجّها المجذاف وهناً ساعة السحر..)
القال ليك جيب دش MX 1800 خدعك ..
والعلَّمك ظلَمَك ..
ظلَمَك....

Quote: إنعدام المروة عند خطوط النهاية, فلازم يكتبوها بالإنابة

صدقتِ يا ندى،
المروه كملت،
كم مُنهِك هو الماراثون واختراق الضاحية،

ده جنسو شنو ؟؟

والله يا حبيب نورة
أنت زول فنان جد . وصاف وحريف في توصيف الصور .
الأغنية سمحة وكل بيت فيها DIRECTIONS يجيبك راجع لساحة المحلب والصندل .
..

عثمان موسي

ده جنسو شنو ياخ ؟

حكاية غرييييبة

ياخ البوست ده أحرسو ينوبك ثواب من إله فنّي

ومولانا خليناه للملح والملاح

مرتضى؟!!!

ده هسة لزومه شنو؟

شكرا جزيلا على التقديم والتعليق وكله

Quote: يا رمانة، مولانا هذا جيله (كل جميل)

صحيح الجمال جيل محمد المرتضى، وهو جميل يعشق الجمال ..تعرف يا أخي كلما أدخل المنتدى وألقى البوست في الصفحة الأولى وتقع عيني على عدد المشاهدات لا أمنع نفسي من الابتسام لأني أعرف انه مع كل "دعسة على الفأرة" يدخل قيس آخر ليعلن فرحه عند اطلال كل عشق مر على حياته، فالمرتضى الأديب - من مقطع حوار دام خمس دقائق وأغنية لعلها دامت أقل من عشر دقائق - أخرج سيمفونية موغلة في الفرح والجمال يعزفها كل حبيب لحبيبه حتى ولو كانت نهاية ذلك الحب على غير ما اشتهى قلبه الموله.. بالله أنظر كيف تنقل بنا من وصف الكتف الوسادة والتقمص و"الحب المصحوب بضمان لاستمرار الجمال لألف عام" وهو يصور أريحية وحميمية العلاقة بين سنادة وهاشم صديق وكيف التقط الروح المرتاحة في علاقة ليلي بسنادة، ثم عرج على التطريب الموجود في لحن النهاية وصوت سيد خليفة.. وقبل ذلك في ( أشعار كده براها جايه ملحّنه وأوركستراها بين حروفه)...
وكيف جعل لكل ليلى أولى شرف الخلود في حياة انسان لأنها حملت عن جدارة شعلة الانطلاق في تشكيله الوجداني حتى أني أحسست بشيء من الاحباط أن مرت بخاطري فكرة ألا أكون ليلى الأولى لأحد! لكنه لم يجرد كل ليلى تالية من حقها في الفخر بأن مساهمتها لا تقل أهمية عن حاملة الشعلة فهي/ن وقودها الذي يبقيها مشتعلة طالما هناك قلب يستطيع أن ينبض: (نعم، عليك أن تشكرهم على إنجازهم مراحلهم بنجاح وإكمالهم صرح بلقيسك، بالذات البيعملن الفينيشنق، مثنى وثلاث)
وطبعا لم أملك إلا أن أتفق مع مولانـا على المصارحة بالحب في التو والحال (بتريد زول قول ليهو بريدك هسه، أفشوا المحبة والسلام) فماذا لو لم يأتي الغد أبدا؟ محبة تجود بها لمن شئت وشاء لك الهوى وحبذا لو أفشيتها لكل الناس، فأنا مؤمنة بأن الحب هو بلسم الروح، إن ما نجاك، الكره ما بنجيك. لا يتعب الحب القلب كما يشاع عنه بل الكره هو الذي يفعل و (يا سلام لما يكون في زول بريدك فقط لأنو بريدك).. حب لله وفي الله كدا... (الحب دا يا منار يضئ الأفئدة ألف واط ويضاعف هوامش التسامح ويرفع مستوى كرم النفس
واليد واللسان، شوفي هسه الزول البريد بيبقى نضيف ومهذب ومتواضع ومُعطَّر ومُعطِّر كيف!! الحب يعيدالتوازن الكيميائي إلى الجسد والروح ويزيل الأملاح الزائدة والسموم والدهون المشبَّعة عن النفس ويقوِّي جهاز المناعة وبيخلي الزول والحولو سمحين عديل كدا).. أهـا! :)
ورغم ذلك يا صديقي ليست لي أدنى رغبة في موافقته على: (نودِّي وشنا وين كان ما جاتنا قرحه).. فالحب الذي يسبب النزيف ونقص الهيموقلوبين هو حب محلوج البوصلة ويحتاج لتفكيك واعادة تركيب .. الحب يبعث الحياة ويطهر القلوب وينثر الفرح فان أصابها بالمرض فقد فاعليته أو قل انتهت صلاحيته
مولانا عرج بعد هذا الثراء في المداخلات إلى حيث لا أستطيع أن أفتى عندما تحدث عن (البسمه البتطوِّل عمر ،) و (برضو تقول لي مشاركة في المؤامرة؟ أنا ما دايرأقول ليك دي المؤامرة والمغامره زاتا) وهو طبعا يوصف في مقدمة البرنامج، لان هذا جر للدخول في الخاص الذي لا يخصني "بنوب".. أنا بس قرأت الجملة ولسان حالي يقول: الله!!؟
تعرف يا أخي، أكاد أرثي لمن رأت أنها ليلى المرتضى، فالرجل، فيما يبدو، ليلى واحدة لن تستطع استيعاب مشاعره الدسمة كلها وستنجد نفسها حتما معطونة بالحب حد انعدام الاوكسجين وربما رحلت لأنها لن تستطيع مجاراته في كرم العواطف.. تعرف، كلما ازداد كرم الآخر كلما أحسسنا بالنقص.. مش غريب؟
طولت، معليش

تعرف يا محمد المرتضى أنا بحب الورد (الروز) الاصفر والأحمر جدا وزي ما ذكرت في البروفايل بحب الاحمر وبلبس الأصفر.. عمري ما فكرت بانه حب اللونين ديل بالتحديد أساسا موجود في الجينات ومرتبط بالمريخ ;)

حبيب نورة
حبيت مداخلتك.. شكرا ليك

RUMMANA والله أنتي افلح زولة في الدنيا .
انا الليلة أول يوم اشوفك .
شفتك . لمعان كتابتك لمعان جديد علي هذا المنبر المحظوظ .
الله عليك .

Quote: أبو السيد ده كلامو براهو .. فيهو رقة كده ما عادية .. أسى بالله شوف أسراب الحسان ..

عبدالباقي الفارش قلبو تبروقه،
دي مش القال فيها فتنة تمشي الهوينى؟
أسراب الحسان هو التعبير الذي كان يُطلق في زمننا الأخضر على بنات المدارس الثانوية وهن يرتدين الفساتين اللبنيه والكبك الأزرق مع جوارب (شُرَّابات) بيضاء مختلفة الطول في أعلاها خط navy blue وآخر أحمر ، زي السيجنال ، كن يتهادين في أسراب وهن يضممن حقائب المدرسة إلى صدورهن عشان الكراسات ما تتشتت وتغلب اللَّقاط يا دمعي ، وكنا نعتقد أن مقولة (يحفظ في صدره ) جايه من الحته دي .. أصحابنا التلاميذ العابثين بتاعين المشاكل كانو ا يعتصمون في النواصي في حال ترقُّب متكئين على لواعج ولحيظات من فرح قدروها تقديرا مستندين إلى جُدر الطوب والحنان ودراجات الفونيكس والرالي الزي رالي داكار ، و في أعلى حالات الشوق والترقب بانتظار أسراب الحسان تتهادى (كطيور حالمات سابحات في العبير) ، وبالطبع ، كان لكل سرب قائد كما في حالة أسراب الطيران الحربي Squadron Leader وحادي في حالات سرب الطيور Flock Leader ، أها ديل لما يجو في طلعاتم الجويه أصحابنا ناس العجلات والراجلين وأهل الهوى كانوا بيسموا العمليات دي مناورات النجم الساطع ، وسبحان الله كانت قائد السرب ، كما هو الحال في في مقاتلات الميج وطير الرهو والسوخوي، دائما في الوسط ومتقدمه شويييه من أخواتا في فورميشن على شكل V وكانت تتمتع بعدد من النياشين والأوسمه التي لاتخفى على ناظر أو أعشى، وكما في حالة الأسراب الجويه الأخرى كانت تتيح للأخريات من خلفها على الجانبين سهولة التحرك في خطين منتظمين لخلق ما يعرف بال Slipstream ودا موضوع تاني، بس بعض المشاهدين كانوا بيخافوا من الطيران المنخفض واختراق سرعة الصوت ، لكن يا عبدالباقي دا كلو كوم والشنط كوم تاني، بالمناسبه وين اختفت التوكات والبلابل السغيره الملونه التي يجمعها لستك لربط الشعور الطيبه والخُصَل الحميده؟ زمن الإيشارب والشريط القال عليهو خلف الله حمد:

تسريحتو موج ورابط الشريط وللقلوب لقَّاط لقيط..
شفنا الشريط شفناهو شوف لاشفنا زيَّو ولابنشوف
لا ِبتلَفِت ولابيشوف بالإختصار خَّوَّفنا خوف..

أها يا سيدي ، ديل لمن كانوا يجوا مارين ويدخلوا المجال الجوي للمترقبين الهائمين يتوقف كل شئ بما في ذلك الأشعة فوق البنفسجية، حتى إطارات العجلات تفرغ من الهواء والواحد من أصحابي بالفعل قلبو ينفرش تبروقه..
ياخ تعبير القلب ينفرش تبروقه دا أروع من إنو يبقى مارتديلا..

جمَّاع غريب ياخ، غريب ..


يا ملاك الحسن مهلا
انت في زهو الشباب
وانا قد صرت كهلا
من جمال وجه المذاب
لو هوانا كان عدلا
ما جفا ثغري الشراب

شكرا يا ود الجيلي واعذرني على هذيان تسرب من ويكيليكس عهد الرشيد.

لن نترك عصياننا المدني

حلفنا نجيب الزي اللبني!!!

كنا وقتها شفعاً يفعاً ... نسير وراء تلكم الزَّرافات اليانعات التي تسير في ُزرافات .. وأحياناً وحدانا .. وعجلات الرالي إياها .. نلتقط دمع عبد المعين السخين ... كنا نعرف بثينة بجميل وليلى بقيس وعزة بكثير .. بل واستيلا بـ بيب ... في رائعة شارلز ديكنز Great Expectations>>>>

إن في عينيك سحر .. ملء عينيّ سراب
دمعة حرى خجول .. وكؤوس من عذاب
هذا ما نلت فهاتوا .. ماتبقى يا صحاب!!!

حولا .. لم لا يجفو ثغرك الشراب يا ود حامد؟ .. لم لا؟؟؟

Quote: حبيب نورة حبيت مداخلتك.. شكرا ليك

رمانة

ده جنسو شنو ؟؟


ياخ تسلمي يا غالية

وأنا بريدك برضو

Quote: كلمات خطاب من الحبيب كان النهاية حرفوا الدموع صدروا النحيب والحسرة كانت فيهو غاية

أظنها حرفو الدموع ..سطرو النحيب.
و هذا لعمري خطاب ناسف!

قناة النيل الأزرق توضح أسباب (النهاية)..

يا مولانا
عليك الله ما تدوس فرملة،،
و خلي محل رهيفة تنقد،،
فوق ،،، وكت جاء حبيب نورة.
سلامي للجميع.

شكرا يا محمد المرتضى فقد جعلت هذه ليلتي
وحتما غدا أكون كما اود
وليس مثل البوح بالحب من سعادة
شكرا لك ولهاشم ومكي وليلاه الأولى والأخيرة ونبتة كمان

ده جنسو شنو ؟؟؟
أعتقد بأن هذا هو السؤال الأرجح الذي طرحتهُ " حاجة زينب " والدة ذلك العريس المرتقب عندما
قرّر أن يرتاد " الأتبراوي " وتيمّم زغاريد " بص سيرته " تخوم عاصمة السكك الحديدية فيما مضي من سابقِ العهدِ والقطار !
لم يكن المجال مريحاً لطرحِ الكثيرِ من الأسئلة
و " قشّوها في القسمة والنصيب "

" شماعةٌ نعلّق علي مشبكها الفضفاض قرارتنا الحمقاء "
لذا خرجت " المداعي " خجولةً وضربت أكباد الإبل " كروتاً " للدعوةِ لم يتم تزييلها بالعاقبةِ عندكم في المسرّات
ولكنها زثيِّلت بشكراً !
فمن يحجّ اليوم عطبرة ؟
بالطبع كانت " العديلة والبنينة " عبارة عن رفقة مأمونة في تلك الأحداث !
فهي تعتبر طقسٌ مقدسٌ لا يجب المساس بهِ مطلقاً
ذبحوا لنا خروفانِ أقرنانِ كانا بمثابةِ " كرامةٍ " وسلامة
وبعد ذلك أنتصب ذلك " الباظ النيسان " شامخاً مهيباً يزمجر ويزأر وينهل من " جزلينهِ " كما يشاء
أما " البُورِي أب تلاتة " فقد كان يردّد في نغمةٍ خبيثةٍ لم نكن نعرف مغزاها لولا أن تبرّع لنا ذلك " المُساعِد "
الذي وجدناهُ علي شفا " تنْدةٍ " من " تكويشة "
(( التْدة علي ما أعتقد هي مقدمة الدابة الحديدية أما التكويشة فهي الحمل الزائد لذاتِ الدابة ))
فقال لنا أن هذه النغمة التي يعزفها ذلك السائق الدرِب والخبير بخفايا البُوري أب تلاتة كانت تعني
" تارِي رااارت ترارارا را الترارااااات "
( بطنِي طمّت بنات أم دم الشرمّط )

أمتطينا ذلك البص النيسان والذي كان يعتبر بمقاييس تلك الأصقاع لا يقل عن " أيرباص " مصغّرة !
وقصدنا الأتبراوي لا تصحبنا غير أغانينا
ولم يكن يشغلنا إلا ذلك الجدار العازل الذي أقاموه بيننا وبين الفتيات خشية " الصاجات " وما أدراك ما " دُقارات "
فكانت هذه صنيعة لا يفكر فيها إلا ود حرام حسب ما حدسنا !
فتحايلنا كثيراً لإختراق حائط برلين البشري الذي كان يتكوّن من عتاة الأهالي الحاقدين أصحاب القلوب السوداء

وصلنا عطبرة بعد جهدٍ جهيد فوجدنا في " جكسها " نفرةً وجفوة !
وأعتقد بأنهن كن ينظرن إلينا شذرن بسبب لونِ بشرتنا !
فقد كان منزلنا يسكنه الكثير من ذوي البشرةِ البيضاء والحَلَب !
ونحن لم نكن نملك غير فحولتنا وذلك المدعو " عبد الله "
فيما يبدو أننا يجب أن نوضح لهن أسباب " النهاية "
وبالفعل ...
حين بدأ في الغناء طروباً ومريحاً وآسراً
بدأ الزحف الأبيض يتوالي علينا رقصة رقصة وغنية غنية وصفقة صفقة
وزنقة زنقة والدنيا حلوة !
" أتاريها " النهاية العدّدت لينا أسباب البداية !
وحاتك يا مولانا وماك طالبني حليفة
اللحم الأبيبض الضقناهُ يسوّي قاوت عديل كده !!

بالله اتلمن قراية الليل وهاشم صديق وسيد خليفة وجنس فعايل محمد مرتضى في البوست ده والواحد اتوماتيكلي كده يبقي زول شفاف ومتقد عواطف وعاوز يعرف سر الرجفة الضربتو دي بلا حمي

النهاية وهاشم صديق يامحمد مرتضي وكراس ابو اربعة وستين ورقة وقلم أحمر وحبيبة تسمو فوق أن ينطق اسمها ويحال أمل اجتماعكما الي محال تفرق ولا تجمع فتهجع للشجن المتدفق من سيد خليفة وتطفر منك دمعتان تعقبها تنهيدة حارة وأنت دون الخامسة عشر والحب يسمو بالمحبوب الي مرتبة تعلو البشر ولا تملك الا أن تبكي النهاية وأنت لم تبدأ بعد

مستوي الصدق الذي كتب به النص لا يصدق انه مجرد مواز لاحساس صديق كما قال هاشم صديق وان كان لا مناص من التصديق وان ظننت بيني وبينك انو هاشم كان فايت مكي يوم وضحوة ومكسر عدمان العضم

المهم توبة من قراية الليل أم رجفة برة وشكرا يامحمد لغسيل الدموع الجميل ده

Quote: يا مولانا عليك الله ما تدوس فرملة،، و خلي محل رهيفة تنقد،، فوق ،،، وكت جاء حبيب نورة. سلامي للجميع.

ياود الصديق

عليك النبي ده جنسو شنو ؟؟؟

بوست إنصرافي

يا حبيب نورة دي ثورة عشق عجبا لجمالها انها رغم زحفها على اعصابنا لن تبلغ النهاية الغاية

الله يجازيك مزيدا من محبه يا مولانا

Quote: يا حبيب نورة دي ثورة عشق عجبا لجمالها انها رغم زحفها على اعصابنا لن تبلغ النهاية الغاية الله يجازيك مزيدا من محبه يا مولانا

مجهود عظيم وجبار لا نقمطه حقه يا شقدي
ولكن من " النهاية " كده بوست إنصرافي شديد

إيه يا ود حامد ....

تنام ملء جفونك .....


وناس حبيب نورة يشيلوا الليل هم وأسى وسهاد!!!!!!

صحي والله .. ده جنسو شنو ده؟؟؟؟؟

Quote: إيه يا ود حامد .... تنام ملء جفونك ..... وناس حبيب نورة يشيلوا الليل هم وأسى وسهاد!!!!!! صحي والله .. ده جنسو شنو ده؟؟؟؟؟

يا ود الجيلي بس نقول يا النبي نوح ونسكت
بوست جوعار إنصرافي شديد

ده جنسو شنو هسه ؟

عجيب يا ود المرتضي

دايما تحرجنا وتجيب لينا الاشياء الحلوة وسط الغبار

لا نعرف ناكل ونسف التراب لا ننتظر الموت جوعا

ليلى يا سعد ، وفقا لكلام هاشم ونسرين النمر ، ربما تكون زوج المبدع مكي سناده،

نعم ليلي عمر بشير

Quote: دايما تحرجنا وتجيب لينا الاشياء الحلوة وسط الغبار لا نعرف ناكل ونسف التراب لا ننتظر الموت جوعا

إنصرافية مية المية

ده جنسو شنو ؟؟

Quote: الله علي لم شتات الروح الشريدة في هذا الحكي

يا بابكر ،
الروح (الهائمة) أقرب إلى المراد إذا ما كان الحديث عن مساراتها خارج الغلاف الجوي،
(الشريدة) لاتعرف الثبات كشرط ابتداء وانتهاء يا الحبيب ، والثبات القاصدو لايعني الجمود
لكن يعني الإلتزام ، الحب يا مولاي كائن حي يتطلب الرعاية والسقيا وقبل ذلك الشجاعة والإلتزام،
الإلتزام الصارم كأداء الرايخ الثالث ، الإلتزام الذي لايترك لأي نوع من الأشعة يتسرب إلى
قلب زولك ولا زول يدخل قلبك إلا بنظام بصمة عينه غير القابلة للتزييف وكلمة السر
غير القابلة للتسريب ،
(I learned that love cannot happen unless I am willing to commit myself to make it happen. And I learned that love is a process that requires hard work and courage.)
هو يا بابكر زاتو في حاجه سمحه بتحصل بدون الشجاعة والإلتزام والثبات ؟
دع عنك بيانات الإرتخاء والنكوص وإفادات من شاكلة إنت لوداير بكايا ألف أهلا بخشوع،
لامن تلاقي زولك ما تفرِّط فيهو وثق بأنه رفيقك منذ أن كانت السموات والأرض رتقا وفُتِقتا،
منذ البِق بانق ياود عثمان وسيبقى الرفيق حتى يرث المولى النظام الكوني وبعد داك
برضو ستستمر الرحلة جديدة متجدده، بالإلتزام والشجاعة والرعاية والسقيا (صواريخ الدفع)
ستمتطيا صهوة براق لم تحلم به NASA في رحلة الخلود إلى حيث (لا أمنيات تخيب ولا كائنات تمر )
وإلا فستركب أم كركابه وتتدلى في ام روابه..

Quote: ده جنسو شنو ؟؟

القومه ليك يا القاعد بين السماء والأرض،
ده جنسو شنو دا؟؟

Quote: يا رمانة! مولانا ده بكون "سلم قلبو" و هو في عالم الغيب قبل أن يكون

سعد الدين،
لاتستخدم دلالات الشك في موضع اليقين..
(بِكون) دا ما مكانا..
من غرائب الصدف ، ياسعد، أن يقارب ذلك ما قاله شخص يسمى ديفيد كوبر أشار
إليه الزول الخطير جون برادشو الذي اقتبست حديثه أعلاه في كتابه
العجيب Creating Love فهو يؤكد بشكل ضمني أن الكثيرين من خلق الله
الحايمين قدامنا ديل لسه ما اتولدوا وأن ميلادهم ما هو إلا ظل
وأن حيواتهم الشايفنها دي ليست سوى شكلا هامشيا للوجود، وهسه لو
رجعت لأهل التنويم وظبطوا ليك جلسة كاربه من جلسات ال Regression Hypnosis
حا تلاقي روحك في بابل القديمه تتغزل في زولتك الإخمينية بفارسية فصيحة
وخلفها صورة داريوس المخلوع، وستمر ببوابة عشتار حيث حبيب نورة
يخاصرها ضاربا صفحا بتشريعات حمورابي ولوائح حضارة مابين النهدين.

عادي..

Quote: إنو المنفى هو المكان المافيهو حبيب....

Quote: وحبيبة تسمو فوق أن ينطق أسمها

Quote: هو يابابكر زاتو فى حاجة سمحة بتحصل بدون الشجاعة والإلتزام والثبات؟

البوست كلو, تميمة يعلقوها ضد القبح والحزن وخذلان الأحبة وغياب الحبيبات.



______________________
مداخلة رمّانة الجميلة "رمانة والمداخلة" , منهل عذب.......

عزيزنا بكري ابوبكر ياخ .

الشعب
و من ميدان التايم اسكوير يريد رفع قصة النهاية .
اسباب النهاية ممنوعة من الارشفة .
...
عليك الله يا حبيب نورة أنت عارف صاحبك عريبي ساكت وما عارف
حكايات جيب الصور دي . دحين عليك الله تحاول بيدييك وكرعيك تجيب صور
العملاق سيد خليفة .
والابطال ديل : كلهم
أول شيء صورة المتيمين البطل والبطلة ( سنادة + ليلي )
ثم صورة هاشم صديق بن شداد العبسي .
ثم صورة المذيعة الجميلة الذكية المسحت هالي بيري مسح الصاج .
وتجيب صورة ود حامد زاتو .
حاول ياخ

دي شوية صور للراحل الفنان سيد خليفة يا عثمان موسي

صورة للأستاذ هاشم صديق وهو يوضح أسباب البداية

وزير الثقافة يكرم الأستاذ هاشم صديق

نبتة حبيبتي أنا ده

هاشم صديق يوضح أسباب العودة إلي النهر

سنادة

شوفو الجمال ده

الله عليك يا سنادة

أسباب النهاية كاملة غير منقوصة

..
الافكاتو الضليع..استاذ محمد...

لعل ذلك انسراب ارتحال موغل فى الوله والتدنى.
خبب خطى تمشى على ذرى ايقاع رعش ذلك الحب...
فى تمنى يفتح منافذ كل المسارات.لتلج الانفاس..
فى ضوع فواح شذى عطرها .وهى تترنح.وتستعيد...وتنسكب..
لعله سفر احلام الخيال على ضوء القمر...فى غفوة...
تمنى تداعبها اجنحة المنى..وهى تحمل فى رحمها تلك المشاعر الجمال.
استاذنا الرائع..
يا سيدى..
لك الهام ذلك الذوق الرفيع.فى دقة الاختيار..الفنان.الذى اتاح لنا
ان نعيش.كل بدايات ..النهائيات..باشراق وضىء
وياله من اختيار منمق ذرب...فاره ومتأنق.وبديع.

لك الجمال..سيدى....
فانت من سدنته..وحداته... وعشاقه الموكلين به ويدركون خصائصه.ولمحاته..

Quote: فيصل محمد صالح، منذ رحيل الشهداء أكرم الفاتح والمنتصر أبو المعالي ومحمد سيد أحمد كردمان ومعتصم جلابي لم ينادني أحد بلقب الأيام الخضراء.. أمد الله في عمر الحبيبين مصطفى شعيب والمنذر أبوالمعالي وأبابكر وعادل وساطع وشخصك الواقف على مستودع فؤادي ممسكا بمفاتحه كبني شيبة والكعبة المشرفة. زمن يا فيصل إفتقدت فيه اخوان الصفا أولئك، فرحت كطفل وجد أمه بعد أن ضاعت منه أو ضاع منها في الزحام وأنا ألتقي جمال عبدالناصر إدريس في أحد المطارات حتى نسيت وجهتي ، عندما عانقني عرفت ماذا كانوا يعنون ب (زاد السفر) رغم الدموع ، يا سلام عليهم ياخ، يا سلام لما يكون في زول بريدك فقط لأنو بريدك ، ناس ما عايزين منك إلا إنك تكون عايش ، عقودهم معاك خالية من الشروط والأحكام والأوهام وما يشي من قريب أو بعيد بالإخلال.. ناس لما يكونوا جنبك يتضاءل حلف الأطلسي ووثائق لويدز وكل أكاذيب إعادة التأمين. والله وحَّدوا بينا البارحونا وراحوا ..

مُحمد

سلامات

الكلام أعلاه عرفني بك

فتح جروح قلبك للغرباء فوحد الدم بينك وبينهم

( ناس ماعايزين منك إلا تكون عايش )

برغم كل القبح الذي نشهده الآن جميل أن توجد مثل هذه المشاعر

إنشغلت بذكرياتك مع أصدقائك عن موضوع بوستك
ونحن أحرار ...على الأقل في تخير مانقرأه ونُعلق عليه

___________________

كنت قد سألت بكري قبل هذا اليوم عن معايير رفع البوستات فلم أتلق إجابة

الآن علمت

ان جيدها يقبع في الأسفل

يامحمد مارأيك أن تكتب مذكراتك ؟

تفاصيل حياتك العاديه ، فأنت من الذين يجيدون السرد ولغتك صادقه


قرأت هذا البوست بعمق

وودت ان أعلمك أنه أضاف لوجداني

فشكرا جزيلا

Quote: ونسرين النمر

محمد المرتضى تحياتى لك يارائع


ويكتمل الجمال يامحمد عندما تكون المتألقة نسرين نمر حضوراً
دى الفال عليها جمال حسن سعيد..... زولة تخشك وتمرقك مابتقفل الباب من وراها بس تساسق بين شفقتك وحرقتك
التحية لنسرين نمر حضور وألق وذكاء وحوار انيق ومتعة

شكرا محمد المرتضى

عبرت بنا رهق الايام ,,,,

وحلقت بنا بعيدا عن دنيا هذا الزمن الرمادى

لك من الموده مايفوق طول درب الارتحال

المرتضي

Quote: يطلع عادي كده زي الكأنو كان بيغني الليله وينو حبيب قسايا مثلا، كان بيطلع من مرحله خطيره عادة ما تتوقف فيها أجهزة الملاحة ،كان بيرجع لينا تدريجيا ، عمليه ، إنعاش ، عنبر ثم البيت للنقاهة ، لكن كان بعد أن يعود إلى (صوابه) بيمشي طوالي. لازم يمشي.. [URL] [Email] [Profile]

اليك دموعي .. فتبني وجعي !

مالايقوله مكي قاله الشاعر
وما لم يقله الشاعر اخرجه الفنان لحنا

وتكشفت حاجتي لتبني ثلاثتهم هاشم ومكي وسيد ..
اخرجت من سفر المدامع دمعة ليست تجف .. رغم انها من حرقة القلب
ومن اصل نيران العشق ..

يا ربي .. هل هذا تسونامي ؟ اغرقتنا بلا رحمة ..

عمر علي حسن

Quote: لوائح حضارة مابين النهدين

أظن ان هذه المنطقة يطلق عليها في التاريخ اسم Cleavages

ومن اراد ان يشاهد هذه الحضارة فعليه بصورة تلك الجميلة التي تبرعت بمليون دولار لضحايا تسونامي اليابان

او الرجوع الى كتاب

grey's anatomy

ود القرشي ياخوي كان إت ماك قاصد ساندرا بولوك

أنا بجي أشيل عفشي وأبقي مارق



والله صحي متحضرة شديد

Quote: ود القرشي ياخوي كان إت ماك قاصد ساندرا بولوك أنا بجي أشيل عفشي وأبقي مارق

يا حبيب نورة يا اخوي

الحمد لله ما جبت صورة الذي تبرع بمائة الف دولار

بعدين يا حبيب ما لقيت غير الصورة الغاطسة فيها في الموية دي

اسه لو جاء واحد طلعها بره المويه نقول شنو

دا جنسو شنو يا حبيب نوره

Quote: يا حبيب نورة يا اخوي الحمد لله ما جبت صورة الذي تبرع بمائة الف دولار بعدين يا حبيب ما لقيت غير الصورة الغاطسة فيها في الموية دي اسه لو جاء واحد طلعها بره المويه نقول شنو دا جنسو شنو يا حبيب نوره

بركة الما جبت سيرتو عشان اجيب ليك صورتو

عموماً أنا بتهمك بخستكة مسار البوست

Quote: عموماً أنا بتهمك بخستكة مسار البوست

أنا مارق يا حبيب نوره

بس ما تمرق لينا البنية دي من المويه

والله شغل يا حبيب نورة
عمك سنادة
ياهو أنتوني كوين السوداني .

ده جنسو شنو ده آلحبيب؟؟؟

إلى مجلس الأمن الإسفيري ... حبيب نورة استعمر البوست .. استعمار ثقافي!!!

طبعاً الثقافة أنواع يا الحبيب .. علا لاكن ما فيها ثقافة ناس ساندرا بولوك وأنا نيكول سميث وبت أندرسون ديك اسمها منو؟؟ .. أسه في زول جاب سيرة باميلا أندرسون!!!

بالله عليك الله يا حبيب الشعب (على وزن أفراح الشعب وكده) خلي بت البلوك دي غاتسة فيييي مويتا .. وشوف لينا ناس ود سنادة وود صديق وأبو السيد!!!! و..... بت النمر!!! حولا لامن نفسي قام بالله!!!!

حبي

Quote: والله يا حبيب نورة أنت زول فنان جد . وصاف وحريف في توصيف الصور . الأغنية سمحة وكل بيت فيها DIRECTIONS يجيبك راجع لساحة المحلب والصندل .

الزول دا يا عثمان مخالت ، كان يرقب اتجاهات الشهب وحركتها وكان يقعد من كلام المشاركين السمحين مقاعد للسمع حتى باغتهم وأنا لا أستعجب لحركة حبيب نوره التي لاتتقيد بقوانين الفيزياء والديناميكا، بيكون ماشي لقدام وفجأة يرجع ورا بنفس السرعة، وبيأشر شمال ويلف يمين وزي ما قال يوسف سيف عن ميسي البرشا (دا لاعب مالو صِرفه) وقد قيل لنا ونحن بعد صغارا تُسلمنا الأحاجي والقصص للأخيلة المجنحة والنوم قبل أن نعرف الفاليوم 10 ، قيل لنا أن الجن يسكن أعالي البحار والجبال وحبيب نوره، وأن علينا أن نقرأ المعوذتين وآية الكرس قبل النوم ونتحصن من الغاسق إذا وقب وحبيب نورة إذا كتب ..

عثمان عليك الله أمسك عننا حبيب نوره ده وسرحه بإحسان ، أنا زول مسكين ولا أعرف بولوك وورصيفاتها من الكروز توماهوك وآخر إمرأة مشعة غربية غريبه سمعت عنها من شعراء الحقيبة كانت سلمى حايك وأخرى قديمة غنى عليها سرور إسمها راكيل ويلش، هسه الزول دا أمسكو..
أحمد القرشي عندي طلب بالله، طالما عثمان جاب سيرة المحلب والصندل ما بلقى عندك هيوسين إحتياطي؟

والله العظيم يا ود حامد
الليلة نبلتليك تلفون للسودان
وكشحت خبر بوست النهاية ده لصديق عزيز عشان
يودي الخبر لسنادة ( أنتوني كوين ) وهاشم بن شداد العبسي .
..
بعدين قول لحبيب نورة .

يازول تاني لو بتجيب صورة البنت الجكنانة في الطين دي

والله الا نقوم نرسلك ليبيا اليومين ديل .

Quote: بعدين قول لحبيب نورة . يازول تاني لو بتجيب صورة البنت الجكنانة في الطين دي والله الا نقوم نرسلك ليبيا اليومين ديل .

ياخ يا عثمان انا بطالب بوقف إطلاق نار صريح وغير مشروط
وممكن أتنحّي في أيي لحظة شعرت فيها بي حالة إعتصام مشاعري نزِق جواي

Quote: وقد قيل لنا ونحن بعد صغارا تُسلمنا الأحاجي والقصص للأخيلة المجنحة والنوم قبل أن نعرف الفاليوم 10 ، قيل لنا أن الجن يسكن أعالي البحار والجبال وحبيب نوره، وأن علينا أن نقرأ المعوذتين وآية الكرس قبل النوم ونتحصن من الغاسق إذا وقب وحبيب نورة إذا كتب ..

ياخ علي اليمين لو أصدمت نجمة شوق ضوّاية مع كروية دم ريّادة في منطقة تماس وجداني
ربنا يسعلك منها يوم وياني حبيبك إلي يوم لا عشق إلا عشقي
" يعوذُ بالله " يا قول حبوبتي

Quote: عثمان عليك الله أمسك عننا حبيب نوره ده وسرحه بإحسان ، أنا زول مسكين ولا أعرف بولوك وورصيفاتها من الكروز توماهوك وآخر إمرأة مشعة غربية غريبه سمعت عنها من شعراء الحقيبة كانت سلمى حايك وأخرى قديمة غنى عليها سرور إسمها راكيل ويلش، هسه الزول دا أمسكو.. أحمد القرشي عندي طلب بالله، طالما عثمان جاب سيرة المحلب والصندل ما بلقى عندك هيوسين إحتياطي؟

عليك الله رأيك شنو في بت بولوك وهي بتستعمل الدرع الصاروخي في صدرها ؟
ياخ تقول لي قوات أممية !

نسعل الله السلامة

Quote: إلى مجلس الأمن الإسفيري ... حبيب نورة استعمر البوست .. استعمار ثقافي!!! طبعاً الثقافة أنواع يا الحبيب .. علا لاكن ما فيها ثقافة ناس ساندرا بولوك وأنا نيكول سميث وبت أندرسون ديك اسمها منو؟؟ .. أسه في زول جاب سيرة باميلا أندرسون!!! بالله عليك الله يا حبيب الشعب (على وزن أفراح الشعب وكده) خلي بت البلوك دي غاتسة فيييي مويتا .. وشوف لينا ناس ود سنادة وود صديق وأبو السيد!!!! و..... بت النمر!!! حولا لامن نفسي قام بالله!!!!

يا بقّة ياخ أنا ذاتي غلبني البسويهو
هسه في ظل الظروف الراهنة دي يسعلك الله ده بوست لي مولانا ده !
وكمان ود القرشي يجيب لينا سيرة ساندرا بولوك في الحالة الصعبة دي

ياراجل نرجع لموضوعنا ونشوف أسباب النهاية دي بدت كيفن

والله يا حبيب نورة
الطين في يد ساندرا بولوك أجمل من
الكركار في شعر رأس أمشرمات بت عوج الكوع .
ياخ في ناس كان مجلبطين طين كان عجين برضو سمحين
..
ارجع تاني واكرر . الشعب يريد صور الابطال والمذيعة . والله المذيعة دي
تنافس في ال CNN .

Quote: لطين في يد ساندرا بولوك أجمل من الكركار في شعر رأس أمشرمات بت عوج الكوع . ياخ في ناس كان مجلبطين طين كان عجين برضو سمحين .. ارجع تاني واكرر . الشعب يريد صور الابطال والمذيعة . والله المذيعة دي تنافس في ال CNN .

صحي والله صدقت
لكن انت بي طريقتك دي ح توصلنا للنهاية بالباظ السريع

اها هاك إنشاء الله يطمر فيك تعبي التعبتو عليك

عليك النبي أتفرج يا حبيب وأتشهود

النهاية السعيدة

هدنة:
مع حزن على من رحلوا في بقع كثيرة من الوطن العالم بيد بعض حكامنا وبعض نيران الغرب (الصديقة)
وبسبب الطبيعة نقول إن مع العسر يسرا ونسمع طيبا عن إخوة وأصدقاء لنا في تلك البقاع سلموا مما أصاب البعض،
تحاياي للفاتح ميرغني وبهاء الذين في اليابان المنكوبة وهما يتخطيا حواجز الموت ثلاثي الإبادة ، الزلزال
والتسونامي والإشعاع..
أتمنى أن تمر تلكم الأرزاء وتصبح بعضا من الماضي وأن يتجاوز كل ابن آدم تلك الإحن وأن يرحم الله
من رحل وأن يأتي اليوم الذي يكتب لنا فيه أصحابنا عن تلك التجربة كتاريخ .

Quote: مرتضى؟!!! ده هسة لزومه شنو؟ شكرا جزيلا على التقديم والتعليق وكله

أستاذتي الجليله د. أسماء محمد عبدالحليم،

السلام يا روح البدن،
بالطبع ما(جرى هنا) ما كان ينبغي له أن يجري باعتباره لم يكن جزءا من (برنامج التدريب) كما أشرت
يوما مخاطبة شخصي الضعيف في إشارة لسنوات خضراء تلقينا فيها التدريب على يديك في بدايات سلم المهنة،
لكنها "الخلايا النائمة" وقد تلقت إشارة العمل بسبب تلك الحلقة التي لم تترك في الجسم المنحول
موضعا إلا هدَّته وهدهدته..
هاشم صديق وسيد خليفة ممن شاركوا في إعدادنا داخليا ، مدارس كادر عاطفيه ، ومؤخرا جمعتهم نسرين
بمكي سناده فيما سمي بليلة الكواسر ليفعلوا بنا ما ترين فكان هذا البوست الذي تأخر كثيرا ، بس القلم
ليهو رافع يا مولاتي..

برضي ليك المولى الموالي..

محبتي المقيمة.

Quote: RUMMANA والله أنتي افلح زولة في الدنيا . انا الليلة أول يوم اشوفك . شفتك . لمعان كتابتك لمعان جديد علي هذا المنبر المحظوظ . الله عليك .

في ناس يا عثمان ، غير تخصصهم في علم تشريح الأجسام، عندهم
خاصية تشريح الأرواح،
يُعاينوا ليك من فوق لتحت ، يبتسموا ويمشوا ، ويتركوك مهتوك القناع..
مكشوف قدام خلق الله..
عاريا إلا من تقديرك لهم ولمواهبهم..
يجيك تقرير سي تي سكان غريب..

Quote: وكمان ود القرشي يجيب لينا سيرة ساندرا بولوك في الحالة الصعبة دي

يا حبيب نوره منو الجاب سيرة ساندرا بلوك

انا جبت سيرة تسونامي اليابان وفاعلي الخير من المتبرعين

بالمناسبة سمعت انها طلبت الطلاق بعد نيلها للاوسكار

واتهمت زوجها بالخيانة ، الراجل دا عليك الله ما غبيان

ود المرتضى اسفين يا اخ حولنا ليك البوست لجريدة الدار

Quote: يا مولانا عليك الله ما تدوس فرملة،، و خلي محل رهيفة تنقد،،

بس مرات الطريق بكون صعب يا ود الصديق وكثير المنعرجات وربما يفضي إلى هاوية
في ناحية من تعوزهم الحكمة ممن إخترعوا الرادارات ونصبوها في الطرقات عشان بعدين يرسلوا
ليك الغرامه في البريد..

بعدين يا أحمد حتى شوماخر في الراليات بيدوس فرامل، نحن كان إنطلقنا ساي بِنطِش ، بس عايز
أطمنك إنو مافي رهيفه عشان تنقد كلو كلو ، هسه بعد كلام مكي سناده ده في رهيفه؟
الزول دا زوَّد كل المشاهدين بحكمة ذكرتها rummana إنو الحب كان ما نجَّاك فلن يفعل المَقت،
مش كدا وبس بل ، بصفته من أهل البصيرة ، أفاد المبصرين بأنه حقق إنجازا في حياته أنه كان
يحب امرأة وما أروعه من وسام جدارة واستحقاق غير قابل للتجريد ، وبالتالي فإن المسألة
تتضمن ضربا من الفخر والإعتزاز بالحصول على نيشان ( كنت عاشقا ) غض النظر عن أيلولة العلاقة
لأن ذلك أمر ليس محل هذا البوست فهو بمجرد أن عشق فقد فاز بإحدى الحسنيين وعمل العليهو
والحي الله والكاتل الله .
أما بخصوص موضوع الفرامل فإن كان الحديث عن العشق فلا يجرمنك شنآن عاذل ألا تبوح وتفصح
وتتهور وتقول عايز نظام فرمله إي بي إس ( Anti Skid Brake System )، سوق عادي إن كانت
الرؤية واضحة ومافي جليد ومطر أو ضباب وكانت مَنَشَّاتك كويسه،
ياخ لوكان الكلام عن العشق يتطلب الفرامل ما كان أبوداؤود زاتو قال :
مشاكلي بسيطه بالريده بتُحل..

صمتٌ متآمر جداً

Quote: صمتٌ متآمر جداً

(الغرام عمل احتلال)

الدرب انشحط ...واللوس جبالو اتناطن

والبندر ..... فوانيسو البيوقدن.. ماتن

بنوت.. هضاليم الخلا.. البنجاطن

اسرع ...قودع.... امسيت والمواعيد فاتن
..
ياود حامد أخوي
الليلة ومن بياح الصباح صاحبك زول امدرمان شحط لينا تلفون
وبعد ما جدع كبسولات الدوبيت العجيبات ديل . قال عايزك
ياود حامد تسرع تقودع في هادا الدرب الجميل .
قودع ياخ
..
وشايف النهاية جابت خبر الفنان عصمت العالم . وظهر في المسرح
الزول ده يا ود حامد معروف ياهو هو البيوقد فوانيس الغناء في لندن
.. الزول عارف جخانين نوتغ هل قيت . الجابودي البجيب ود العالم ده
بكون جابودي ختري والله . فليقودع برضو كما قودع هاشم بن شداد
...
قلوبنا مع اليابان

ود حامد ... العود أحمد ..

بالله بعد أن تطمئن على أحوال الفطحل الآخر الفاتح ميرغني .. اسأله أن يرفد المنبر ببوست على شاكلة بوست عصاري كردفان .. وإن لم يكن البوست باسمه .. إلا أنه كان لحمته وسداه .. وعذراً لصاحب البوست إن كنت قد نسيت اسمه ..

وأنا أقول لماذا دائماً تتلاقى القمم؟؟؟؟؟

يا د / طراوة
عليك الشيخ الجعلي تجي وتشوف
عمك سيد خليفة ده بسوي في شنو .
ياخ السودان ده من جوه جميل جمال عجيب .
تعال ياخ
وتحياتي

Quote: جعلت هذه ليلتي وحتما غدا أكون كما اود وليس مثل البوح بالحب من سعادة شكرا لك ولهاشم ومكي وليلاه الأولى والأخيرة ونبتة كمان

لو أني استقبلت من أمري ما استدبرت لكان العنوان زهرة الليلاك،
أقسم لك بالذي سمَك السماء والسِماك بلا عمد يا كبلو أخوي (غدا نكون كما نود) دي
كانت وما زالت تنشر في شراييني إحساس الوقفة ،
باكر العيد،
ولى المساء؟ لاحول ولاقوة إلا بالله ،
شوف بالله تصاعد الفرح في الإيقاع وتسارع أنفاس اللحن وهو يستعجل الغد الواعد بكل
جميل سينثال من أيقونة الأماني وكأس الرجاءات بكل تأكيد ، أو (فورشور) كما تنطقها هي وأنت تسألها
خائفا متوجسا (أغدا ألقاك)؟ (فوشور).. ولكي تُصدِّق مسامعك تعيد السؤال مرة أخرى :
( أغدا ألقاك)؟ فيجيئ ردها (وهي تحكي البرق مبتسمة) :
يااااا خوف فؤادي ووريدي من دم لايصب من وتينك .. لذا يا كبلو كان البعض يستعين ببعض الأصدقاء
استاند باي من بعيد ، إحتياطي كدا لعدم توفر الإسعاف ، لأنها حين تنصرف عنك جزلة ممراح مع لفتة
أخيرة بزاوية كمعماري يلقي النظرة الأخيرة على استقامة البناء أو تشكيلي ترحل عيناه عن لوحة
هو راض عنها وفي يده ريشة ترتعش بفعل آخر اللمسات والألوان ، ما معروف البيحصل شنو ، وعادة
ما ينصح العلماء أن تتم مثل هذه اللقاءات وتلك الإفادات بعيدا عن الطرق المزدحمة بالسيارات
ولكن بقدر الإمكان غير بعيد عن مشفى تتوفر فيه المحاليل الوريديه تفاديا لمضاعفات ال Dehydration .



غدا عماد عبدالله حتما يعود..

والله يا حبيب نورة دي فخامة جد .
وتناسق مافي متلو .
ياخ الله ينصر دولة سويسرا العرفت تهبش
ذوق الناس .
عليك الله شوف التظريزات العجيبة دي .
عاين التوب ده نايم فرحان كيف . يا حبيب نورة ناس عالم الأزياء
في العالم دايشين ساكت . حلقة النيل الأزرق كانت معرض طويل
عريض . فاشن في كل الجهات في الغناء وفي الكلام
وفي جلسة المذيعة . ماشاءالله

Quote: الدرب انشحط ...واللوس جبالو اتناطن البندر وراك...... فوانيسو البيوقدن.. ماتن بنوت.. هضاليم الخلا.. البنجاطن اسرع ...قودع.... امسيت والمواعيد فاتن

هو ده جنسو شنو ؟؟؟

أمبارح في عصراً قريب الغيبة وأنا في محاحاتي بين كلاكسات سيارات القاهرة والزحام
قمت يا سيد الأمانتي ليك نزلت علي المترو
قطعت تذكرتي وأنقشطت في المترو
لقيت في العربة الأخيرة من المترو خط الجيزة شُبرا صاحباً لي ما أفضلو عليك من خبثاء الميدنة
وعتاة الكلمنجية سلمت عليه ووقفنا
عاينت جاي جاي لقيت في العربة التي تلينا شويفعة ما لابسة بي اللون الأحمر شيتاً ما أنزل الله به من " فستان "
وقاعدة تبكي سااااكت
أريتو يا يابة بكا البنات لا حدّهن الدمعتو أطهر من " ألمِي " زمزم
ومسكتني ليك كاروشة المربعات وطوالي مسكت ليك تلفوني وكتبت المربع الجايي هسه دي


المِتلِك حرام يذرف دموع في المِترو
يا نخلة جرِف يخْتِي القوام كم مِترو
عشقوك يا أم نفل خلقاً عِدادهم كِترو
وكان شافوكِ ناس في بالي ما بنسترو

Quote: النهاية وهاشم صديق يامحمد مرتضي وكراس ابو اربعة وستين ورقة وقلم أحمر وحبيبة تسمو فوق أن ينطق اسمها ويحال أمل اجتماعكما الي محال تفرق ولا تجمع فتهجع للشجن المتدفق من سيد خليفة وتطفر منك دمعتان تعقبها تنهيدة حارة وأنت دون الخامسة عشر والحب يسمو بالمحبوب الي مرتبة تعلو البشر ولا تملك الا أن تبكي النهاية وأنت لم تبدأ بعد

عندي مشكلة مع الكلام الزي دا يا محمد لأنو بيفتح القلب على عدة إتجاهات
ويبقى حالك كمن يقف في ميدان عام وكل الأسهم التي تشير إلى الطرق الفرعية مكتوب عليها
(نوستالجيا محببة إلى النفس) ، الكراس أبوأربعة وستين صفحة وذكرى ، والحبيبة التي
تنتظرك في ناصية الوعد بكل براءة النهار ومشاوير العصاري ورعشة الورد البِراري
التي وردت في سفر سيدي أحمد الجابري ، وسن الخامسة عشرة وما جاورها فيما يعرف
بأيام أناقة القلب والرعشة البكر عصية الوصف حين كانت (بخاف) نشيدا وطنيا كالمارسليز
نردده تحت علم الحبيبة كل صباح.

Quote: مستوي الصدق الذي كتب به النص لا يصدق انه مجرد مواز لاحساس صديق كما قال هاشم صديق وان كان لا مناص من التصديق وان ظننت بيني وبينك انو هاشم كان فايت مكي يوم وضحوة ومكسر عدمان العضم

نعم ، صدقت وقد كان هذا رأيي ، فهاشم رغم أنه تبنى وجع صديقه بصدق مُصفَّى ،
إلا أن كل حرف في القصيدة ينضح بقصة هَبَشَت هاشم جوه الجوه حتى يخامرك شك بأن الشاعر كان
الممثل الأصل ومكي هو الدوبلير أو شاشة لعرض التراجيديا، عارف يا محمد ، أحيانا تذهب لعزاء
شخص لتواسيه في رحيل عزيز وأثناء عناقك له تستصحب الوجع المخزون لفراق كل الأحباب ،
الأحياء والأموات ، فتستدعي قوافل الحزن ومواكب الألم ما ظهر منها وما بطن دفعة واحدة وهاتف
دواخلك يقول هات يا زمن جيب كل أحزانك تعال فيندلع نشيج لايُبقي ولايَذر، لايتوقف انهمارك مهما
تقاطر حولكماالناس سائلين:
(يا اخوانا استغفروا .. البقاء لله وحده استغفروا ) وأنت في داخلك المرجرج تقول:
اللهم اغفر لقومي فإنهم لايعلمون.
ربما كان ذلك حال هاشم حين بلغه نبا مكي فأخذه في عناق تولى أثناءه تصفية حساباته جميعها
مع الزمن دفعة واحدة في عملية جرد لانكساراته النبيلة حتى عادت إلى روحه الهجعة والرضا
الذي يلي الهنهنات فيوسع الرئات إلى حين.
فقط إلى حين..

Quote: يا حبيب نورة دي ثورة عشق عجبا لجمالها انها رغم زحفها على اعصابنا لن تبلغ النهاية الغاية

نعم يا شقدي،
هي ثورة ولاعاصم اليوم من الوله ، كن معنا حتى تستوي على الجودي وقل بعدا للقوم العاذلين الخانعين،
هي ثورة يا محمد وليست نداءا أخيرا كنداء صديقنا طيب الذكر دكين بل مد مستمر وهتاف مستدام
كن معنا وكما قال صاحب الترانيم المقدسة حبيبنا الراحل سند:
أدعوك .. ولا أتهاون فيك .. ولا أتردد ..
حتى ينزف عِرق لهاتى ..
حتى يشحب لون حروفى ..
حتى ينشق آخر بحر .. فى الاشعار
ما تسكُت يا شقدي،
أهلنا قالوا الذبحة ولا صمَّة القلب

حتى ينشف آخر بحر .. فى الأشعار

Quote: وكان شافوكِ ناس في بالي ما بنسترو

الحمد لله انا لم اخطر على بالك يا حبيب نوره

عاينو جاي .
البت نعومي كامبل كان عندها
شو في عمارة ناصية في ال 6 أفينيو مع شارع ال 32
في ما نهاتن .
الموضوع كلو عن ( الكيلو جرامات المزعجة )
كلام طويل عريض عن الحمية واتباع الحمية .
اتكلمت عن كيف حرمت نفسها من السكريات والنشويات وملاح الكرارة والتقلية .
قالت 7 أيام كانت بتعيش علي شمام وموز بس .
بتضرب حوالي كيلو موز يوماتي مع الجزر والشمام . واحد قال الزولة دي قرد ؟
تضرب موز بس ؟
كان في في الشو قاعدات ناس نيكول كيدمان وكل الجميلات بتاعات الجزر .
والفلهمات دي .
اليوم داك الشو كان متابع من حوالي 30 مليون أمريكي .
والله ياود حامد فخامة الثوب السوداني دي تستحق المتابعة .
اكتر من عرض نعومي كامبل .
ياخ نيكول كيدمان لو شافت التطريزات دي كان مرقت من العرض وكسحت
سوق سعد قشرة .
ياخ انا زعلان زعل شديد علي عمرنا الراح في الهجرة فالصو .
ياخ يوم سهرة النهاية دي كان مفروض الزول يكون
قاعد في الزيداب وفوق عنقريب
كراب ساكت .

جاييكم الصبُر

وبنجضكم كان الله نجضكم

Quote: دايما تحرجنا وتجيب لينا الاشياء الحلوة وسط الغبار لا نعرف ناكل ونسف التراب لا ننتظر الموت جوعا

تسلم يا أستاذنا من الحرج ومن سف التراب وشرب الكدر،

يا طارق ، شكرا على إطراء لا أظن كلماتي جديرة به

لكنك دائما تنظر إلي بعين الرضا وتزوِّدني بالأوكسجين

في زمن الغبار وسيادة الزعازع والمواجع.




أنا غير أحبابي حطام ، واتجاه الدموع واحد ..
إلى الداخل..

أنت عارف يا حبيب نورة يا ود أخوي ؟
البت ساندرا بولوك دي ممكن تديك ال Green Card وأنت قاعد
في الزمالك . والبت Single .
وبعدين النهاية بدل تكون في قناة النيل الأزرق . تكون في ديسكفري .
ياخ صاحبك ود حامد ده بجيب حاجات في سوق تمبول زاتو مافي .

ياراجل كمان سنغل

لا حولا لاحولا الكلام ده بتعب ود القرشي شديد
وهسه يجيب لينا مستندات تثبت تبرعها لصالح ضحايا الزلزال في هاييتي

بغض النظر ......

Quote: اليك دموعي .. فتبني وجعي !

يا مولاي ،
مكي عرض عليها أن تحمل معه الأمانة فأبت أن تحملها وأشفقت منها وحملها وحده إنه كان صدوقا صبورا..
بقي مكي على حاله تلك ردحا من الزمن محتملا ما إن أوجاعه لتنوء بالعصبة أولى القوة وما تنوء بحمله
الجبال آملا لقياها الحبيبة في شراكة أبدية مقرها الرئيس السموات والأرض وفي الفؤاد ترعاها العناية ،
وحين انهد الكتف وطال السفر مع قلة الزاد والوقود ومتلاطم بحر الظلمات برز هاشم الميناء.
صعب تشيل الريد براك ، وصعب تشيل إنفجاره وحدك ، تلك المفاعلات تحتاج إلى فريق من مهندسي الوجدان
والخبراء في إدارة الكوارث ، صعب يا سعادتك ، والله صعب.
(إليك دموعي .. فتبنى وجعي)
اللهم اغسله بماء العشق والورد والثلج والبرد،
اللهم لا تباعد بينه وبين أشجانه النبيلة،
اللهم لاتجعله تائها والغرام يصبح حكاية كما قال محمد وردي ..
اللهم إن كان محبا فرقِّه ولهانا إلى رتبة أدميرال وقائدا للأسطول،
وإن كان مريدا فزد في تشببه وتجاوز عن تقصيره في هذا الإتجاه،
اللهم افسح له في تَبتُّلِه مد البصر، وآنسه بشريكه الصالح،
اللهم أدِم عليه نعمة العشق والإعلان عنها والإنضمام لكل معاهداتها وبروتوكولاتها،
آمين يا حنان يا منان..

آمين..

Quote: حسيت شعور الراهب السار السنين مشتاق يفتش ليهو دير لمن تعب سالت دموعو علي الدرب خاف الأمل كره المسير

عزيزي محمد المرتضى

تجذبني كتاباتك المشحونة بالطرب المموسق، وبالزين والعديل المنقى.. والمفعمة بالجمال والحب واللوعة.. حيث تبدو حاسر الرأس عند كل جميل مستشفاً من كل شيء جمالا.. الشكر لك على هذا الانتقاء للكلمة واللحن والأداء ..

رغم تصنيفي لك أنت وصديقنا طراوة (أخوك الكاشف!) بأنكم من أبناء الجيل الوسيط، إلا أني أراك مواصلاً (مراحك)!

أسائل نفسي هل أخاطر بالدخول إلى بوستاتكم ( الخطرة) وأصطلي بنيرانها الصديقة، والتي يزيدها (حبيب والقرشي وعثمان موسى) لهباً واشتعالاً؟ أم أن الحكمة تقتضي أن أنأى بنفسي عنها، وألوذ بوقار العمر، واكتفي بالدعاء لهن (أو عليهن!) - كما فعل الشاعر محمد ود الرضي - (الله يكبرن!)؟

ربما تلاحظ أنني منذ فترة قد فضلت هذا الخيار الأخير، وآثرت أن تكون ساحاتي هي البوستات المحايدة مثل (ناسنا)، بعيداً عن (الحب في المنبر) و (تستاهلي) و (المعلومة)!

أذكر أخي مرتضى أنني كنت قد حدثتك عن أدبيات سنوات الصبا، والرومانسية الحالمة، والعواطف المشبوبة البكر .. شعراً ونثراً.. تلك السنوات التي شكلت محور قصيدة العام السادس عشر لصديقي الشاعر حجازي.

وكنت قد حدثتك ايضاً عن صديقي ابن الخمسة عشر ربيعاً.. وعن حبه العنيف الذي لم يأخذه احد بجدية! فلم يملك إلا أن يبثه نثراً شعرياً مبدعا.. فكانت رسالته إلى عمه (والتي أعجبتك وأدهشتك!) .. وأكتب جزءاً منها هنا من الذاكرة:

"عمي..

لقد بعثت إليك بها في العشرين من يوليو الماضي من أعماق نفس تحترق
كروما.. يندلع في جوانبها اللهيب
ولكن .. مع الدخان المتصاعد ترتفع أنفاس الحضارة..

وحدي الذي أحب
وحدي الذي أتمزق
فالزيزفون كذبة كسائر كذبات الأتراك
وقيس وليلى مجرد عمل فني رائع..

إذا قلت أنني لم أحببها
فسيصحو مسيلمة الكذاب من قبره
ليضع أوزاره وزراً وزراً في كفيَ فلا تمتلئ..

****

Quote: أظن أن هذه المنطقة يطلق عليها في التاريخ اسم Cleavages

سؤال لصديقي د. أحمد القرشي:
ماذا يطلق Grey's Anatomy على (معالق الجوف)؟

محبتي

عبد المنعم خليفة

يامولانا ....

Quote: فأبت أن تحملها وأشفقت منها وحملها وحده إنه كان صدوقا صبورا..

وممكن Vice versa

الصبر والشجاعة والإلتزام وقوة الإحتمال صفات حقت " الكائن الحى" ممكن تكون هنا وهناك بنفس القدر أو أزيد.

لاتبخسونا إشياءنا ياخ ....

______________________
بعدين الرحمة كويسة , القصة دى ماشة للـ الأنكأ نرجو منكم قفله فى ساعته وتاريخه ... مع ختم شمع احمر
ونكون شاكرين ومقدرين

يا هليفه

Quote: صعب تشيل الريد براك

خذها مني وانا صادق كما قال الرسل " واتيناك بالحق وإنا لصادقون" .. الريد لايشيله الا واحد
فاذا طرحه للاخرين تبخر .. الم تتفكر في سبب ضياع (ليلي) من (مكي) .. الشكوي من الاحمال
لا تخفف اثقالها .. لذلك ظل الصامدون اذا سئلوا يقولون (ساي) و (براي)

Quote: اللهم لا تباعد بينه وبين أشجانه النبيلة، اللهم لاتجعله تائها والغرام يصبح حكاية كما قال محمد وردي ..

بعد ايه ؟

Quote: اللهم إن كان محبا فرقِّه ولهانا إلى رتبة أدميرال وقائدا للأسطول،

كان كدي الترابه في خشم اسطولكم ..

Quote: اللهم أدِم عليه نعمة العشق والإعلان عنها والإنضمام لكل معاهداتها وبروتوكولاتها،

آمين يا حنان يا منان..

وتبقي اسباب النهاية باقية وخالدة ولو تعلل اخي الاصغر عبد المنعم خليفة بوقار السن .. فلابد لذكري عابرة أن
تحدث كرا وفرا ينتهي بابتسامة من القلب ومعها الا ليت الشباب .

ثم قل لي .. ماله حبيب نورة ده هائج كده .........

لكم جميعا حبي .

عمر علي حسن

Quote: ثم قل لي .. ماله حبيب نورة ده هائج كده .........

أنا خليني ساهي يا حبيب
جاييك بي رواااقة وأحكي ليك

البوست ده ما تفوتو بي اخوي وأخوك

Quote: أظن ان هذه المنطقة يطلق عليها في التاريخ اسم Cleavages

أطلس الأناتومي لايفيد في هذه الحالات يا أحمد وعليك أن تنسى Grey's ومن
لف لفه وما نلته في كلية الطب ، تلك المناطق تسمى المعتَقلات وأنت كطبيب وموثِّق
للحقيبة لاشك ستستصحب (الـنور الـفي حـليـهو رافل في حُق نـهدو قـلوبنا قافل) ،
وفي كافة الأحوال نسأل المولى أن يحفظ المولى العراق ودجلة والفرات ..
ويحفظنا..

الكترابة .
شوف النهاية جرجرت منو .
ياخ ده شيخ كتاب الدنيا والعالمين .
ده عبدالمنعم الخليفة . ياهو زول ليدز . الزول الكان حاضر
كلام الليلة ديك .
ليلة د / عبدالله الطيب وجمال محمد أحمد .( وقصة الكأس الذي تحطم )
النهاية جابت ناس ال East و ال West .
دخاخين الكلام الزين عكلت .
التحية لك أستاذي عبدالقدوس الخاتم .

لالا يا عثمان

ده كلام خطير
أنا شخصياً بحاول أوفر في طاقتي لي قدام
البوست ده ح يجيب هوايل


ده جنسو شنو ؟؟

Quote: لا لا يا عثمان ده كلام خطير أنا شخصياً بحاول أوفر في طاقتي لي قدام البوست ده ح يجيب هوايل

قصدك نسايم الليل ؟
عارف يا زول نوره ، هناك بعض الأشياء لايمكن إنجازها إلا بما يوازيها من شجاعة كافية،
الأشياء العظيمة تتطلب قرارات عظيمة كما يقولون ،
الشُغل ال (نيئ) لاينفع في بلوغ المراد ، لذا عليك بال (هوايل)..
ما بقول ليك أرقد عافيه ساي ، بقول ليك أعقلها بجنازير ناقلات النفط وتوكل..
قول ( يا إنتِ يا أغرق) ..

يا حبيب نوره انحاز لحبيب نوره ..

Quote: والله شغل يا حبيب نورة عمك سنادة ياهو أنتوني كوين السوداني .

مكي زول قيافه وحديثه وملامحه تشي بدواخل جميلة.[/green]

استاذنا عصمت العالم،
ككثير من السودانيين لي أبناء ولدوا وترعرعوا خارج السودان ويحزنني أنهم فاتهم كل ما يدهشنا ويمتعنا حتى نحس أحيانا
أنهم غرباء عنا رغم أنهم يحملون جيناتنا ، لا أعرف كيف أستوعب كيف لا يهتم أحدهم بما يميت جيلي ويحييه من كلام كالدعاء ،
هؤلاء ، يمكن أن يمر أي وحد منهم ب:

عاينتا لقيت الحبيب في عرشو
في تاجو الحزين
حولوا العيون فيها الفرح
بس الفرح في عيونو ماقادر يبين

ولا يعبأ وكأنه يمر بلوحة إعلانات عن طلاء جوتن أو رينبو، أكاد أجزم أنه سيأتي جيل في مقبل السنوات لايعرف معنى الريده بل مجرد
الإحساس بها ، يا سيدي يصيبني خوف أن تصبح كل علاقات المستقبل عبر التويتر والفيس بوك ، فأنا لا أدري كيف ينقل الإسكايب
الهنهنات ودفء الأنفاس وعطر الأوراق وأنت تفض مظروفا خُط إسمك فيه بحروف لايكتب مثلها إلا الحبيب ، عندها خط براهو،
زي طريق الحرير ، ياخ قول خط ماجينو، تعطره قبل أن ترسله وعلى المظروف قليل من عَرَق محبة جف فأضاف كنتورا محببا
إلى سطح المظروف، يمر دهر قبل أن تفض المظروف ، والدهر هنا هو الزمن المنقضي بين الإمساك بالمظروف ومشاهدة الحرف الأول ،
عمليا قد يحسبها البعض بالنانوثانية لكنها سنوات ضوئية في حسابات العاشقين.
ياخ أولادنا ديل خربم الإيميل ، تتشابه فيه الخطوط والإبتسامات المبرمجه وحتى الحزن والدموع والمشاعر سالبها وموجبها
مُعدَة سلفا كرموز إلكترونية صممت لإغاظتنا لاغير، ما شافوا آباءهم كيف كانوا يعاتبون الحبيب ويصطنعوا الزعل لإلهاب الجمر
ليدخل حزب هاشم صديق والجبهة المعارضة للبعاد وسيطا ، عشان خاطرنا ترجع ، والجميع موقن أن كل ما يجري مجرد إزكاء
لجمر المنقد الملهلب سلفا ، وماهي إلا أيام ونحن مع زيدان يا هَنَايا وجديدي ، يدا بيد ، يوم اشوفك يبقى عيدي.. آه..
يا العالِم، أولادنا ديل حايخذلونا وسنخذلهم في توريث مشاعرنا ودموعنا ووجداننا لأنهم لن يجدوا في التَرِكة غير الوله. .

قال مخاصم ،
وصارِّي،
ونحن نبتسم،
(غضبك جميل زي بسمتك).

Quote: خذها مني وانا صادق كما قال الرسل " واتيناك بالحق وإنا لصادقون" .. الريد لايشيله الا واحد فاذا طرحه للاخرين تبخر .. الم تتفكر في سبب ضياع (ليلي) من (مكي) .. الشكوي من الاحمال لا تخفف اثقالها .. لذلك ظل الصامدون اذا سئلوا يقولون (ساي) و (براي)

Quote: فيصل محمد صالح،
منذ رحيل الشهداء أكرم الفاتح والمنتصر أبو المعالي ومحمد سيد أحمد كردمان ومعتصم جلابي لم
ينادني أحد بلقب الأيام الخضراء.. أمد الله في عمر الحبيبين مصطفى شعيب والمنذر أبوالمعالي
وأبابكر وعادل وساطع وشخصك الواقف على مستودع فؤادي ممسكا بمفاتحه كبني شيبة والكعبة المشرفة.

زمن يا فيصل إفتقدت فيه اخوان الصفا أولئك، فرحت كطفل وجد أمه بعد أن ضاعت منه أو ضاع منها
في الزحام وأنا ألتقي جمال عبدالناصر إدريس في أحد المطارات حتى نسيت وجهتي ، عندما عانقني
عرفت ماذا كانوا يعنون ب (زاد السفر) رغم الدموع ، يا سلام عليهم ياخ، يا سلام لما يكون في زول
بريدك فقط لأنو بريدك ، ناس ما عايزين منك إلا إنك تكون عايش ، عقودهم معاك خالية من الشروط
والأحكام والأوهام وما يشي من قريب أو بعيد بالإخلال.. ناس لما يكونوا جنبك يتضاءل حلف الأطلسي
ووثائق لويدز وكل أكاذيب إعادة التأمين.
والله وحَّدوا بينا البارحونا وراحوا ..

______________________________________________________________________________________________________





مُحمد

سلامات

الكلام أعلاه عرفني بك

فتح جروح قلبك للغرباء فوحد الدم بينك وبينهم

( ناس ماعايزين منك إلا تكون عايش )

برغم كل القبح الذي نشهده الآن جميل أن توجد مثل هذه المشاعر

إنشغلت بذكرياتك مع أصدقائك عن موضوع بوستك
ونحن أحرار ...على الأقل في تخير مانقرأه ونُعلق عليه

___________________

كنت قد سألت بكري قبل هذا اليوم عن معايير رفع البوستات فلم أتلق إجابة

الآن علمت

ان جيدها يقبع في الأسفل

يامحمد مارأيك أن تكتب مذكراتك ؟

تفاصيل حياتك العاديه ، فأنت من الذين يجيدون السرد ولغتك صادقه


قرأت هذا البوست بعمق

وودت ان أعلمك أنه أضاف لوجداني

فشكرا جزيلا

________________________

وجدت مُداخلتي في غير مكانها الذي قصدته يامحمد فنقلتها ، لم انتبه ان البوست في صفحته الثانيه

مروراً بهذا المعبد القدسي
وإلقاءاً للتحية والسلام .
هنا الصمت أبلغ و مهذب أمامكم يكون (الكلام)
فسلاماً سلاما......سلاما
يا شعب الجمال والإنسانية.
مولانا المرتضي وضيوفه الكرام
عاطر تحياتي وإحترامي لكم\ن أجمعين




__
يا مولانا....
لاحظ تعابير الوجوه في الفيديو,أثناء غناء سيد خليفة
تجد فيها كل الإجابات.

ياخ الليلة لاقيت رفيق قديم من أيام " الترس والضللة "
دفقت ليه البوست ده إتكيف جنس كيف !
وعلي اليمين هو في سعوديتو دي لو وهب لي عُمرة ما يجازيني

هسه تلقاهو يقرا ويدعِي لي

ده جنسو شنو ياخ ؟؟

ياود حامد صاحبك
زول الدوبيت داك .
قال : الناس دي بتجيت الكلام ال SWEET ده من وين . ؟
.. والله ياود حامد الناس ديل فنانين كبار بس البلد مسكين مملطش .
هسع حلقة حلقة زي دي مش مفروض تكون مترجمة بالصيني ؟

Quote: وشايف النهاية جابت خبر الفنان عصمت العالم . وظهر في المسرح الزول ده يا ود حامد معروف ياهو هو البيوقد فوانيس الغناء في لندن .. الزول عارف جخانين نوتغ هل قيت . الجابودي البجيب ود العالم ده بكون جابودي ختري والله . فليقودع برضو كما قودع هاشم بن شداد

عصمت إنسان رقيق يا عثمان ،
زول مرهف لدرجة إنو ممكن يستمتع بشريط فاضي وفقا لتعليق أحد أصحابي عن آخر،
بالله مش في ناس كده بجيك إحساس إنهم خلقوا من أثير؟
عارف يا ودموسى هناك نظرية في علم الأرواح تقول أن لكل كائن حي جسم أثيري
(كوكبي) Astral body مطابق للجسم المادي يحمل النفس والروح وهذا هو الجسم
الذي يتسامى إلى البرزخ منعتقا من إسار الجسد لحظة الموت ، وما الجسم المادي
المحسوس (أبو 5 قدم وسته بوصه وعيون عسليه وشعر أسود وعندو بطاقة أو بدون)
سوى مركّب كيميائي عضوي لغرض الحياة الأرضية القصيرة المحتشدة بالفواجع كما ترى ،
أها يا سيدي ناس عصمت ديل ربما كانوا كائنات بين الجسمين ولا أريد الإطالة هنا
لأن بوست النهاية سيتجه غربا إليكم وشرقا إليه ولايبقى لأمثالنا سوى ترديد:
روحنا واحده وكيف إتقسمت قسمين أوعلى أقل تقدير ( عندي التلت من
عقلي وعندك التلتين)


شي عجيب في كلامك..

Quote: والله ياود حامد فخامة الثوب السوداني دي تستحق المتابعة . اكتر من عرض نعومي كامبل .

يا عثمان ،
يا عثمان ،
ربما لا أعرف الكثير في فن تزيي الجنس اللطيف لكن ناس نعومي كامبل ديل ولا بعاين ليهم،
كل عروض الأزياء والمشية المصطنعة (كسيارة عطِبة المحاور) أو ( عربية الباسطه) والعجين
اللي بيعملوه ناس كلوديا شيفر ومن لف معهن بسقط اللوى أو استيج الدخول فحومل ، ما بيمشي
معانا ، وبذات القدر هناك سودانيات يرتدين ثيابا ترهق النظر مهما غلا سعرها .

المسألة يا بَرَكه في التناسق والبساطه ، في النيل الأزرق أو المسيسيبي ، و زي ما
الخالدي قال الريد قِسَم برضو الذوق قِسَم يا عزيز. لم أشأ الخروج عن موضوع البوست
الأساس ولا تعليق لدي عن شكل ثياب المذيعة لكن يا عثمان في ناس كده لو لبسوا تبروقة
عبدالباقي سيتوارى فيرساتشي تواضعا..

يا عثمان ، الإبتسامة المضيئة وسماحة النفس لاتترك للناظر الإلتفات لما يرتدي الفرد،
لما تلاقي زول أثيري ثم تُسأل بعد رحيله عن ما كان يرتدي فلن تستطع الإجابة مهما كان
طول إقامته معك ..
السَحَرة السمحين يخلبوا الأنظار ويُعدِّلوا قوانين الفيزياء التطبيقية والنظرية وما ورد
في مراجع الفيسيولوجي عن عملية الإبصار ومن ثم ممكن تجيك واحده ب (دمورية) بسيطة
وسط مدمني بيوت الأزياء فإذا بدموريتها تلقف ما يأفكون.

Quote: يا عثمان ، يا عثمان ، ربما لا أعرف الكثير في فن تزيي الجنس اللطيف لكن ناس نعومي كامبل ديل ولا بعاين ليهم، كل عروض الأزياء والمشية المصطنعة (كسيارة عطِبة المحاور) أو ( عربية الباسطه) والعجين اللي بيعملوه ناس كلوديا شيفر ومن لف معهن بسقط اللوى أو استيج الدخول فحومل ، ما بيمشي معانا ، وبذات القدر هناك سودانيات يرتدين ثيابا ترهق النظر مهما غلا سعرها . المسألة يا بَرَكه في التناسق والبساطه ، في النيل الأزرق أو المسيسيبي ، و زي ما الخالدي قال الريد قِسَم برضو الذوق قِسَم يا عزيز. لم أشأ الخروج عن موضوع البوست الأساس ولا تعليق لدي عن شكل ثياب المذيعة لكن يا عثمان في ناس كده لو لبسوا تبروقة عبدالباقي سيتوارى فيرساتشي تواضعا.. يا عثمان ، الإبتسامة المضيئة وسماحة النفس لاتترك للناظر الإلتفات لما يرتدي الفرد، لما تلاقي زول أثيري ثم تُسأل بعد رحيله عن ما كان يرتدي فلن تستطع الإجابة مهما كان طول إقامته معك .. السَحَرة السمحين يخلبوا الأنظار ويُعدِّلوا قوانين الفيزياء التطبيقية والنظرية وما ورد في مراجع الفيسيولوجي عن عملية الإبصار ومن ثم ممكن تجيك واحده ب (دمورية) بسيطة وسط مدمني بيوت الأزياء فإذا بدموريتها تلقف ما يأفكون.

LIKE

Quote: واتهمت زوجها بالخيانة ، الراجل دا عليك الله ما غبيان

يا القرشي ،
الخيانة تجري على المشاعر لا الجسد،
الذي يسئ معاملتك ولايرحم مشاعرك يخونك حتى إن كان بينك وبينه ألف عقد ومليار مأذون،
الذي لايحملك بين عينيه ويضاري عليك ويدرأ عنك العوادي ويسندك ويغطيك من صروف الزمان ويسوق لك العذر
إن أخطأت يخونك في كل نانو ثانيه،
بذات القدر فإن الولي الحميم هوالذي يترفَّق بك (براً حفيا) ويُخلص إليك ويوفر لمراكبك موانئ تقيها بأس
الخلجان الكافرة وجبال الأمواج البذيئة..،
حين نتحدث عن الحب لاتشر إلى الأجساد الزائلة، وهذا موضوع آخر لا نريد خلط أوراقه مع اليوم الفيهو الشمس
لمَّت غروبا وهاجرت.
كيف حكمت علي زوجها بأنو (غبيان) دون أن تسمع منه؟
تعلمنا من مهنتنا ألا نحكم على طرف دون أن نسمع الآخر.


-
ما قلت بتجي يا حليل مجيكا،

أصبحت وعودك عرقوبية..

Quote: كيف حكمت علي زوجها بأنو (غبيان) دون أن تسمع منه؟

الم تسمع بال

Bias

انا هنا يا مرتضى منحاز

وكان راجلها ما غلطان برضو غبيان

واذا كانت هي أخطأت الم يسمع بحاجه اسمها بالتسامح

أجزم انه لم يستمع لعثمان حسين يغني ..

قـدر ما حاولت اخاصمك وانسي احـزاني واسايـا

واكتم الغيره الفي قلبي واطوي جرحي في الحنايا

القـي اثارك في حواسي وظلك يتبعني في خـطايــا

القـي كـل الدنيـا حولي تهاتي بي اسـمـك معايــا

او مسامحك يا حبيبي

او
برضو سا محتك لحبي ما لاجلك

للمعاني الكنت بنظم فيها حولك

اصلي بعدك ما هويت ولا حتي بعدك

ولكنه اختار النهاية المعنى وليس الأغنية

وغلطة كانت غرامي ليك

وبعد ايه


نسيت يا مرتضى هم تاري الناس ديل امريكان

انا بكتب في كلامي دا وفي ظني انهم ينمون الى ثقافة نظرة يا السمحة ام عجن

قبل يومين هذا الرجل الكارثة اتهمها ببممارسات سيئة وقال بكتبها في كتاب ( عليك الله يا حبيب نوره ما تجيب الاتهامات دي)

المهم لم يفوتهم في الحياة الكثير سوى الاستمتاع باغاني عثمان حسين وجيله

Quote: انا بكتب في كلامي دا وفي ظني انهم ينمون الى ثقافة نظرة يا السمحة ام عجن

وييين ياخ
ده ملكوت سامي لن يستطيعوا إليه سبيلا

Quote: أسائل نفسي هل أخاطر بالدخول إلى بوستاتكم ( الخطرة) وأصطلي بنيرانها الصديقة، والتي يزيدها (حبيب والقرشي وعثمان موسى) لهباً واشتعالاً؟ أم أن الحكمة تقتضي أن أنأى بنفسي عنها، وألوذ بوقار العمر، واكتفي بالدعاء لهن (أو عليهن!) - كما فعل الشاعر محمد ود الرضي - (الله يكبرن!)؟

كم كان غزل كعب بن زهير عالي السقف ونسيبه عالي العبارة وتشببه بسعاد فن لايُجارى لذا
تسببت أبياته تلك في أن يلغي الحبيب المصطفى (ص) قرارا أهدر بموجبه دم كعب ، ومن فرط
إعجاب الرسول (ص) بقصيدة كعب خلع عليه بردته ولا أحسب أن سيد الخلق فعل ذلك لأبيات
المدح التي مجَد فيها الشاعر حبيبنا المجتبى (ص) فهو تكفيه شهادة ليس بعدها شهادة
جاءت من خالق الأكوان ( وإنك لعلى خلق عظيم) ، ولكن مجمل القصيدة كانت من خير ما
كتبت العرب في الغزل.. فإن كان ذلك مما أجاز الحبيب المصطفى (ولا نقول الوصف الحسي
الرخيص) فما بالك بنا ونحن نمجد صنع الله في الكون .
لذا ، أستاذنا عبدالمنعم خليفه خوجلي ، ستبقى قائدا للفرقة المجوقلة في جيش كعب
بن زهير وكل الفاتحين لمدن الجمال منذ إبن حجر الكندي ، وصديق صباك الذي قال :

وحدي الذي أحب
وحدي الذي أتمزق
فالزيزفون كذبة كسائر كذبات الأتراك
وقيس وليلى مجرد عمل فني رائع..

إذا قلت أنني لم أحببها
فسيصحو مسيلمة الكذاب من قبره
ليضع أوزاره وزراً وزراً في كفيَ فلا تمتلئ..

هذا الصادق في قوله الأمين في أحاسيسه ، صاحب (الوعي المبكر والعاطفه النبيلة) من الذين
يسكرهم الجمال ويذكرونه إنما يتحدث بنعم الإله على العباد ويتفكر في جمال خلقه ويبث لواعجه
في معرض إستئنافه قرار الرفض لعمه مؤكدا كلام فضل الله محمد ( مافي عيشه بلاك بتبقى ومافي
نشوه وما في ريد ) وهذا هو الوضع الطبيعي الخاص بالميل الفطري بين حواء وآدم ، ماشي جاي
، وحيث أنكم من حراس تلك الفضيلة فإن عنوانكم المكاني المستدام سيظل بين (الأُبيض) والجسر
وإحداثياتكم هي عيون المها بدقة يحسدكم عليها قوقل إيرث. ستكتب يا سيدي في الجمال
وفي هاشم صديق وفي ليلى العامرية وخمرة هوى مي الصافيه وجليه.

يا أبا المعتز ، نحن الزول السمح بنقول ليهو إنت سمح وإن إختلفت وسائل التعبير وسيكون
ذلك جليا في ( سلامي وفي كلامي وفي قليبي الشايلا إيدِك) ولانبخس الناس جمالهم وموجز طلبي
يا سيدي ألا تلوموا نيران نيرون في جنونه فلهيبها حتما يضئ طرق روما حتى الدردنيل ،
وما تسمع العاذلين ولا ( تَأْخُذَنّي بأقوالِ الوُشاةِ ولمْ أُذْنِبْ ولو كَثُرَتْ عنِّي الأَقاويلُ).

ود المرتضى يا صااحب...

ياخى سلااام كتير..

قريت البوست قبل فتره بس ما قدرت اتداخل وقتها
لكن زنقت ليك جارنا مكى سناده جنس زنقه...هههه
بجيك بالتفاصيل لاحقا...

تسلم..

أســــتـاذنـا ود الـمـرتـضــى

الله يـرضـى عـلـيـك دنـيـا وآخـــره

ويـفـرحــك صــبـاح ومـســا

ويــســر خـاطــرك مـغـرب وضــحــى.

يــاأخــى أنـت مـن نـظـر إلـى الـحـجـر لـم يـره صـــلـدا

وإنــمـا مـســتـحـلـب يـشـــقـق فـيخـرج مـنـه مـاء الـوجــد

شــلالات تــتـفــجــر مـن جــوف أعـمـاقـه، تـفـيـض بــالـعـواطــف

عــلـى وقـع تـرانـيـم عـبـاد تـتـنـاغــم مـع إنـســيـاب أمـواه الـرجـاء.

لـك كـل الـدعـاء مـن قــلـب فـتـحـت فـوهــة عـشــق خـبـره ثـم إرتـضـاه

مـحـجــة للأمــل زمـانـا مـضــى ولــم يــزل

أنـار الله حـجـاك.

كتب محمد المرتضى

Quote: أستاذنا عبدالمنعم خليفه خوجلي ، ستبقى قائدا للفرقة المجوقلة في جيش كعب بن زهير وكل الفاتحين لمدن الجمال منذ إبن حجر الكندي

وكتب عثمان موسى

Quote: ده عبدالمنعم الخليفة . ياهو زول ليدز . الزول الكان حاضر كلام الليلة ديك . ليلة د / عبدالله الطيب وجمال محمد أحمد .( وقصة الكأس الذي تحطم )

وكتب عمر علي حسن

Quote: وتبقي أسباب النهاية باقية وخالدة ولو تعلل أخي الأصغر عبد المنعم خليفة بوقار السن .. فلابد لذكري عابرة أن تحدث كرا وفرا ينتهي بابتسامة من القلب ومعها ألا ليت الشباب .

الأصدقاء الأعزاء .. محمد المرتضى .. عمر علي حسن .. عثمان موسى

الشكر لكم على كلماتكم الودودة، وما حبوتموني به من تقريظ عال، لست أدري إن كنت أستحقه، وما أسبغتموه علي من صفات، لست أدري إن كانت تنطبق علي تماماً.

في دوحة ود حامد الظليلة هذه يطيب الحديث عن الحب والشعر والجمال!

أثمن عالياً أخي مرتضى تذوقك الرفيع وإعجابك المتجدد بالإبداع الذي خطه يراع صديقي ابن الخمسة عشر ربيعاً عن الحب! وسوف يدهش العزيز عمر علي حسن عندما أذكره بذلك الصديق، والذي هو من أبناء الدفعة بخورطقت، التي (جمعتنا وكان يلهو صبانا باعتزاز كمارد متعالي).

أعود إلى سنوات الشباب لأهدي لكم أبياتاً من قصيدة لشاعر شاب آخر، ينفي فيها أن يكون الشعر من صياغة الجن في وادي عبقر! كما ينفي فيها كون الحب أسطورة محيرة! إذ كتب:

أنت كل السحر في الدنيا

وأنت العطر كل العطر في الدنيا

وأنت الرمز والمعنى

وأنت بغفرنا الجنة

فيا سكري

ويا طهري

وتغريدي وتهويمي

ويا لوعة

تذيب القلب

أحبك أنت يا روعة

وإني لا أرى في الحب أسطورة

وإني لا أرى في الشعر إلهاماً خرافيا

لأن بحبك الإلهام

وحبك بهجة الأيام

*****

محبتي
عبد المنعم خليفة

الشفيف المبين .. عبد المنعم خليفة

لست ادري اخي الحبيب هل تقف قدماي علي ارض ام علي سراب .. روحي ليست معهما .. لا تكل
عن ارتياد البعيد من الاكوان والازمان .. فتتيح لي دفعا يجعل للحياة نبضا ومعني .. غير اني احس
باني من عالم آخر وليس في عالم آخر .. فلما اري الحب والشباب اجدني بعيدا بعد المشرقين والمغربين
وعندما اري او اسمع اصوات قرنائي مثلكم ومثل عبد المجيد خليفة ومحمد البدوي عبد الساتر ومحمد
طه الدقيل وابراهيم جقود وعبدالله مكي او تمر بسماواتي ذكري حسين السيد ديدان وعمر بلال اجد
المطر يتقطر فوق شعر راسي الكثيف (يرحمه الله) وانا اسابق قطراته لتسقط علي ثيابي فلا تبلعها
الارض وكثبان الرمل في خورطقت ..

هذا الوليد العبقري ذو الخمسة عشر ربيعا يحكي ثقافة زماننا ورؤيتها الثاقبة لمفردات الحياة ..
فيقول :

Quote: وإني لا أرى في الحب أسطورة وإني لا أرى في الشعر إلهاماً خرافيا لأن بحبك الإلهام وحبك بهجة الأيام

اما جيل المرتضي الذي يكتب بقوس الكمنجة وريشة العود علي اوتار القلوب فانه يخيفني كما يخيفك
من زلل يخل بوقار السن ولكنه يستصرخ فينا مخزونات غالية لا ينبغي لها ان تندثر ..

هل الهزات والبراكين الا اخراجا نوعيا لاثقال الارض .. كذلك ما يحدث لنا من اخراج لاثقال الحنايا
والوجدان من هزات وارتدادات كلما وقفنا علي مواكب الضوء يخرجها المرتضي في صور اهل سارة
او مش عيب عليكي او اسباب النهاية .. أي منها لا يصل الي ظل يغطي جحيما كامنا فيقول له ان الثورة
تتفجر في كل مكان الا اياك

يا صاحبي : الموت حق .. فلا تمدن له عنقا ولا تجفل به ..

وقل للمرتضي ان الحب حق .. ولا يشيله الا واحد .. مبتلي به .. حصريا

لك الشوق والمحبة

عمر علي حسن

عزيزنا محمد عثمان
محافظ بنك الجمال
سلامات
وعليك الله تقول لسنادة كوين . الزول الهجر كلفورنيا
الي امدرمان اليتابع .
اكيد حيضحك ديك الضحكة المسرحية النيلية المشحونة بالتعابير الكبيرة .
يا محمد عثمان ياخ مافي قطعة أرض في امدرمان أنشاءالله في الحارة صفر ؟

Quote: سؤال لصديقي د. أحمد القرشي: ماذا يطلق Grey's Anatomy على (معالق الجوف)؟

أستاذي الجليل الأديب / عبدالمنعم خليفة

تحية وتقدير واحترام


طابق البوخه........قام ندا يهتّف
نام من الدوخه
ايدو عاقباهو.......الجدلة مملوخه
لي معالق الجوف....موسو مجلوخه

معالق الجوف استاذي عبدالمنعم أظن ان شيخنا ودالرضي يقصد بها ...

gastrointestinal tract

شعراء الحقيبة أستاذي عبدالمنعم لم يجعلوا القلب فقط هو مكان الاحاسيس والمشاعر بل جعلوا مناطق اخرى سكنا للمجبوب ليس القلب وحده هو الذي ينزف ويتألم ويحزن لفراق الحبيب بل جعلوا أعضاء أخرى في الجسم هي التي تحمل هذه الاحاسيس والمشاعر
فأبو صلاح جعل الألم في الجوف وأظن الجوف يقصد به القناة الهضمية والشد والضغط النفسي يزيد من إفراز حامض الهيدروكلوريك في المعدة مسببا ما يسمى بالحرقان وفى بعض الأحيان بتطور الأمر إلى القرحة ولذلك ابوصلاح استعمل مع الجوف كلمة ( لا تحرقي ) وكان ذلك في أغنية لو تجازى لو تسمحي ...
لا تحرقي الجوف ريحي ....وشوفي دمعي البتسيحى
من غصونك ما بتبرحى .....يوم تبكى ويوم تفرحي
بل ابوصلاح جعل الجوف مكانا لسكن المحبوبه بدلا عن القلب بل اكسبه كل صفات المدينة حتى يعطى المحبوبة راحة ورفاهية في ذلك المكان ولم يسكنها في الحوش بل في الظل الظليل داخل الجوف ( الضرا) وكان ذلك في أغنية العيون النوركن بجهرا ...

جارحه صالح كل ما يحضرا ....في مدينة الجوف ساكن الضرا
الرشيم والرشمة الخضرا ....زى فريع في موية منضــــرا
وأيضا في أغنية في النسائم شاكى وهى من اغانى المجاراة ويشاركها في اللحن هذه الاغانى ..
* من جناين الشاطئ لخليل افندى فرح
*من فروع الحنه للعبادى
* من قليبو الجافي لابوصلاح
*روح واعرض حالي لود الرضي
ولقد بنى ابوصلاح في هذه الأغنية مسكنين لمحبوبته احدهما داخل الجوف في المقيل والعشاء أما في المساء والضحى فهي تكون في الفؤاد هولاء المبدعون كانوا فقراء لا يبنون المساكن إلا داخل أجسادهم وليت النساء يقدرون ذلك ...
سرى لا يفشاك ... انت ساكنه الجوف في المقيل وعشاك ...
ياشريكة الروح
عقلي كيف يمحاك ...والفؤاد مأواك في مساك وضحاك ...
بهوى ردفك خصرك
وبهوى ردفك خصرك يصف بها الملهمة في حلبة الرقص حيث يكون ظهرها في ردفها عندما ينثني خصرها ليقترب من الأرداف.. وهذا المعنى طرقه ابوصلاح في أغنية فرع البانه البيرنع يقود حيث قال ...
طيبك عبق...... وسنك براقه يسوى بق
ترنحي تشبهي مهر السبق ... وفوق أردافها كتيفه انطبق
وهذا البيت اخذ كرومه مع أبيات أخرى من قصائد مختلفة ليكون بها أغنية جمال الليل والتي سجلها أولاد المأمون .

وشيخنا ابراهيم العبادى اكتشف لنا عضو جديد يصيبه الم الفراق والبعاد وهو الكلى ولم يتطرق احدهم إلى هذا الموضع من قبل والعبادى أبدع في هذا الوصف لان المغص الكلوي من اشد الآلام في الجسم وكان ذلك في أغنية حي الم البعاد ..

حي الم البعاد حشش كلاي وأجرى دمعي.... انا شوقي طائل لي ظبية وجرا

مودتي استاذنا عبدالمنعم خليفة

Quote: فيقول له ان الثورة تتفجر في كل مكان الا اياك يا صاحبي : الموت حق .. فلا تمدن له عنقا ولا تجفل به .. وقل للمرتضي ان الحب حق .. ولا يشيله الا واحد .. مبتلي به .. حصريا

استاذنا عمر لك التحية

عزيزنا عمر علي حسن

ياخ عليك الله تجي البوست ده تاني .

ده جنسو شنو ؟؟؟؟

Quote: Quote: Quote: فأبت أن تحملها وأشفقت منها وحملها وحده إنه كان صدوقا صبورا.. وممكن Vice versa الصبر والشجاعة والإلتزام وقوة الإحتمال صفات حقت " الكائن الحى" ممكن تكون هنا وهناك بنفس القدر أو أزيد. لاتبخسونا إشياءنا ياخ ....

ندى ،
لم أقل أن المرأة لاتتسم بالصبر والشجاعة وقوة الإحتمال إذا ما كان الحديث عن العشق
لكنني قلت أن مكي سناده عرض (الأمانة) على رفيقة القلب أو من ظنها كذلك ، إلا أنها
أبت أن تحملها وأشفقت منها ، وظني أنها لم ترفض مكي كيانا وقميصا وبنطالا أو رداءا
وإزارا، لكنها لم تمنح ذلك الكيان سِمة الدخول اللازمة ليصبح إضافة لكيانها فيُشكلا معا
كوكبا دريا عاشرا في المجموعة الشمسية ثم يغار القمر، وسبحان الله ، تشاء الأقدار أن
يظهر كوكب جديد لنج ، بي غادي لبلوتو ويكون بردا وسلاما وهو المكتوب في أزل مكي ويتحد
معه في ظاهرة سماوية أنيقة أدهشت (هابل) زاتو..

بعدين يا ندى نحن لانبخسكم أي شئ ، وهناك إحتمال تكونوا ممكونين وفايتننا بالصبر ساي ، لكن
منذ عهد بن حلزة اليشكري القال (لا أرى من عهِدتُ فيها فأبكي الـيومَ دلْهـاً وما يحيرُ البكاءُ) ،
أصبح النحيب جهرا حق الرجال براهم لا يشاركهم فيه أحد ، وحدهم من يذرف الدمع الهتون ويتفصَّد
عرقا وينزف دما ، وتبنيتم إنتو يا ناس "التَقَلَه" حال عنترة وتركتم لنا دور المهلهل .
ياخ بالله كان حبيتوا ما تسكتوا ، بادروا بالبوح بالأشياء الجميلة حتى تستطيع الأمم المتحدة
القيام بدورهاالمنوط بها على أكمل وجه وحتى ينزاح الإحتباس الحراري وتهدأ البراكين
وتلتئم فتحة الأوزون ..
والكواكب يحتفلوا بالقمر.

اراكم استمتعتم بعبد المنعم وحبيب نوره وشقدي وعثمان موسي قبل ان يعود المرتضي متئدا
وقبل ان ياتي الغائب شيقوق الذي ان سٍالتم عنه فلابد ستجدونه مشغولا بتبريد قلبه من حر هذا
البوست اللافح


عمر علي حسن

Quote: برغم كل القبح الذي نشهده الآن جميل أن توجد مثل هذه المشاعر إنشغلت بذكرياتك مع أصدقائك عن موضوع بوستك

عشاري ،
عندما تتكاثر حول أجسادنا الرماح وتلتمع السيوف وتخطب على منابر الرقاب ويصبح الوجع
هو العملة المتداولة في السوق الكعب ويزداد القصف العشوائي من طائرات الأعداء والحلفاء ،
على حد سواء ، ويتوافرالخلق خلف "ودالرضي" في أهليته مرددين:

مالك يا زمان شبَّعتنا وِح ووحيح
صِح الدون كِضِب .. كِضْب العوالي صحيح
يات من كان أنا جعلتو ليَّ صليح
عقرب حزَّ ليَّ يا نفسي زين ومليح

طوالي بتلقانا نبحث عن الملاجئ .

Quote: يامحمد مارأيك أن تكتب مذكراتك ؟ تفاصيل حياتك العاديه ، فأنت من الذين يجيدون السرد ولغتك صادقه

يا عمر ماعندي شئ أكتب عنو ، كغيري من أبناء جيلي عشت في معظم أرجاء السودان
من أقصاه إلى أقصاه عدا جنوب أبيي والقصه دي مزعلاني وحارقاني في قلبي ، ياريت كان عشت
هناك قبل أمشي بتأشيرة للجنوب أو الآخرة.
حياة أقل من عادية تشبه حياة أي واحد من أبناء أمدرمان لأبوين عملا في التدريس ، ضف إلى
ذلك سفر في بعض القارات للدراسة والعمل ومآرب أخرى ، وعندي رغبه أمشي كجوريا والنهود تاني
وأختف رجلي للبرازيل أيام كرنفال الريو ولابد من كوبا والبيرو والإكوادور وحضارة المايا
والإنكا قبل الممات.. لكن يا عشاري أشكر لك مجاملتك الكريمة بمدحك لأسلوبي في الكتابة
العايز ليهو قماشات فرامل دا ، فنحن هنا لانكتب بالصرامة المطلوبة كما ينبغي لأن الكتابة
في مهنتنا هلكتنا ولانريد إضافة مزيد من الأحمال على الكتف المهدود ، وياهو بجي المنبر دا
أعرف أخبار القاطعين الرسائل الأحلى من عسل النحل وأحكي ليهم علي شقانا و(اندب حظي وسعدي
المعاديني ) إضافة إلى بعض المهام الصغيرة وبسيطة ومحدودة.

Quote: قرأت هذا البوست بعمق وودت ان أعلمك أنه أضاف لوجداني فشكرا جزيلا

والله دا كرم منك وتشجيع قصدك منه معروف ونبيل.. لكن يبدو لي أن صديقي القديم
الحميم الحليم الهميم فيصل جرجرني ، كعادته ، لأنه يعرف مواطن استفزازي ..
وسقمي ..

لا حولا لاحولا


ده جنسو شنو؟؟؟

Quote: شعراء الحقيبة أستاذي عبد المنعم لم يجعلوا القلب فقط هو مكان الأحاسيس والمشاعر بل جعلوا مناطق أخرى سكنا للمحبوب ليس القلب وحده هو الذي ينزف ويتألم ويحزن لفراق الحبيب بل جعلوا أعضاء أخرى في الجسم هي التي تحمل هذه الأحاسيس والمشاعر

أخي ومودتي د. أحمد القرشي .. الحارس الأمين القيم المؤتمن على فن الحقيبة.

يا سلام على تجاوبك الشامل الوافي المصحوب بالإمتاع..

وشكراً نيابة عن الأصدقاء على اصطحابنا في هذه السياحة مع أصدقائك شعراء الشعب.. من ساروا خلف أحبتهم من أسكلة الخرطوم إلى الجبلين إلى الرجاف!! كما كتب عنهم العزيز محمد المكي إبراهيم في قصيدة قطار الغرب، وهم يثرون علم الأناتومي!

كتاباتك يا صديقي ترعاها العناية.. وينبغي أن تحميها المنظمة العالمية للملكية الفكرية (الوايبو)، وأيضاً اليونسكو المعنية بالمحافظة على التراث الثقافي للشعوب.. خاصة مع سوابق (الهمبتة) التي تعرضت لها من قبل.

محبتي
عبد المنعم خليفة

ياخ البوست ده عمل لي فلايت عديل كده

أنت ياود القرشي
الفنان سيد خليفة ده كان عارف
ومتابع قصة النهاية دي مش كدي ؟
يا أحمد عاين .
عاين وشوف الخدر العجيب الكان واضح علي
اعصاب سنادة وهاشم والمذيعة . والله العظيم حلقة PASTA عديل .

Quote: معالق الجوف استاذي عبدالمنعم أظن ان شيخنا ودالرضي يقصد بها ... gastrointestinal tract

الكبد يا قرشي،
الكبد ،
أما بلغك قول العباسي في عهد جيرون (أدنيه من كبدي الحرى ويدنيني)؟
أما سمعت بالتي تقسم بفلذة كبدها ؟
أحي يا كبدي وهردت كبدتي،
الكبد ياخ..



موسو مجلوخه..

Quote: عزيزنا محمد عثمان محافظ بنك الجمال سلامات وعليك الله تقول لسنادة كوين . الزول الهجر كلفورنيا الي امدرمان اليتابع . اكيد حيضحك ديك الضحكة المسرحية النيلية المشحونة بالتعابير الكبيرة . يا محمد عثمان ياخ مافي قطعة أرض في امدرمان أنشاءالله في الحارة صفر ؟

ابو عقاان...

يسعد مسااك

بوصل كلااامك لى مكى

هههههه...قلت لى الحاره صفر..؟؟
ياخى اليومين شكلو سوق الاراضى راقد واطه...مافى حركه
طبعا بسمع الناس بيتكلموا لانى انا ما زول اراضى...ههههه

تسلم...

Quote: مروراً بهذا المعبد القدسي وإلقاءاً للتحية والسلام . هنا الصمت أبلغ و مهذب أمامكم يكون (الكلام) فسلاماً سلاما......سلاما يا شعب الجمال والإنسانية. مولانا المرتضي وضيوفه الكرام عاطر تحياتي وإحترامي لكم\ن أجمعين

هواري ،
يا نمر ،
والله يا هواري الباقي من العمر لايكفي للجمال المترف حولنا لذا نعجب كيف نقضه في غير الجمال،
ياهو زي ما شايف نحاول الإحتفاء بالسماحه الخمج التي أسرف هاشم ومكي ونسرين وصلاح وسيد خليفة
في بذلها تحت رعاية ليلى ومن سبقها في الطريق منذ عهد العامرية .

نيابة عن المشاركين أشكر لك اهتمامك بالبوست ومشاركتك المفرحه..
يا نمر ، خلافا لما قال الأمي أنا شوقي ماليني والبين برى جسدي بنوايبه باليني
عاصم عندو أغنيه كتبها عزيزنا شادول قال أنا يا جميل ماليني خوف، أها في معرض
تعليق الشباب هنا على البوست ورد إسم نسرين النمر وجانا النمر زاتو هواري
وأصبحت (ماليني خوف) .. فرجاءا مَشَّيها لي ، الفيني مكفيني.. إنه عصر الكواسر..

Quote: لاحظ تعابير الوجوه في الفيديو,أثناء غناء سيد خليفة تجد فيها كل الإجابات.

تلك كانت ملاحظتي أيضا يا هواري ، كل الحضور ، وتحديدا صلاح الدين الفاضل ،
قال كل شئ من خلال تعابير الوجه والقسمات والصمت الضاج وربما كانت اللقطة المثبَّتة
للفيديو تكفي للشرح ،
مكي كان يكتفي بابتسامة تعادل بركان مايون وقد كان على بت النمر تحذير السكان وإخلاء المنطقة
لأن تلك الإبتسامة قد ينفجر بعدها ما لا يوجد بمراجع الجيولوجيا، ناس تعبيرات الوجه عندها ترسمها
بلايين الأشياء في الداخل مصحوبة بهِزَّة رأس أفقية تفسر قول أبو أمير:
ظل الصامدون اذا سئلوا يقولون (ساي) و (براي)

(سجعك يواسيني ورجايا فيك يا " نمر" يوم موتي ترثيني)

Quote: قريت البوست قبل فتره بس ما قدرت اتداخل وقتها لكن زنقت ليك جارنا مكى سناده جنس زنقه...هههه بجيك بالتفاصيل لاحقا...

محمد عثمان،
يا غايب عن عيني مع إنك موهط في قلبي،
أولا بالتبادي كنت وين؟
ثانيا جارك دا ربنا يديهو العافيه ويطوِّل عمرو،
قسما قصته دي لحقت قيس ولبنى بكونكشن أنطونيو وكليوباترا،
ياخ بسببه البوست أصبح زي تاج محل،

نحن في انتظار التسابيح وكل الأوراد..

عزيزنا محمد عثمان
سلامات
عليك الله يا محمد تقول لعزيزنا سنادة يديك
صورتو مع حمدنالله عبدالقادر في السبعينات ضروري تجيب الصور دي
في البوست ده .
وبعدين عندي معاك كلام كتير .
سلام

أستاذنا الجليل عبدالرحمن إبراهيم،
ياسيدي ، والله بدون الحب لامعنى للحياة ولانريدها وهذا أمر لايد لنا فيه لأن المسألة ،
كما أسلفت ، من مكونات الجين ، حب الإنسان والزمان والمكان غض النظر عن أقاويل المُنظِّرين
من أهل النسبية ، والواحد منا حين يكتب لابد أن يستصحب أشياء تأتي من تاريخ سحيق حتى تفي
المعنى ، تلك (الأشياء) هي التراث والماضي ونار الغرام والجغرافيا واللغة والوله الخرافي
و أنت أدرى بما يمكن أن تتضمنه القائمة من معان ومباني.. نحن يا مولاي حين نعانق الشخص
و النَص لانعانق الجسد أو الحرف ولكن نعانق تاريخا يمتد إلى سلمى الإنسان ودار عبلة المكان
وكل حرف نطق به الملك الضليل وكل ما تتضمنه (المسافات) الضوئية بين الإنسان والزمان والمكان.

أعجبني حديث العاشقين المضمخ بالموسيقى والكلم المموسق في تلك الحلقة وفي البداية قلت
أقطعوا في مصاريني لكن فاض النص على مساحاتي وغمر جروف صبري وكَسَر للجيران وشفت إنو من
الأفضل أن يشاركني الأحباب كرنفال البشاشة وعارف إنو القراء حيقدِّروا الظرف التاريخي الذي
دعا للتدفق والمنعطف الذي تمر به أرواح جيلنا كله الذي نهل من ثقافة وفرت له تراثا
بحمولة عالية من العشق وأدبيات تصهر أجعص شبكة توزيع مركزية وربنا يغفر لينا قلة صبرنا
وضعف أسلاكنا:

فقلت استغفر الرحمن من زلل * إن المحب قليل الصبر والجلـد
خلفتني طريحا وهي قائلـــة * تأملوا كيف فعل الظبي بالأسـد

تحاشيت اقتباس الثناء الباذخ أو حتى بعضه لشخصي الضعيف رغم أني ، كبشر، أحتفي بالثناء ،
لكنك يا سيدي غمرتني بأضعاف ما يستحق كياني المعطول وجسمي المنحول وهذا كرم منك
(إن الهدايا على قدر مهديها) .

Quote: وقل للمرتضي ان الحب حق .. ولا يشيله الا واحد .. مبتلي به .. حصريا

سعادة اللواء عمر،
والله أجدني لا أتفق معك في هذا الجانب، القصة دي مامكن كلو كلو ، الريده دي دائما
متبادلة بس في بعض الأطراف تحاول إخفاء الحاصل ونحن نقدر تلك الأسباب لكن نتمنى
زوالها لذا نشجع الغير على التقليل من عمليات الإخفاء غير المبررة والتي قد
تسفر عن نتائج غير مرغوب فيها.. أما ما يتداوله العامة من ماركة (من طرف واحد)
فتلك تخريفات لا أساس لها كقصة السعلاة وعمرو بن يربوع ، قلب المؤمن دليلو يا سعادتك
، الزول البريدك بتعرفو بالرادار العجيب القاعد بين الضلوع حين مروره بأجوائك ،
فالإنسان كما تعلم عبارة عن محطة إرسال واستقبال قمة في تقدمها وغاية في التعقيدعشان
كدا تبادل الذبذبات والبيانات في تلك المحطة ما ممكن يكون غلط رغم إنو أحيانا البث
والإستقبال بيتعرَّضوا للتشويش من قوى خارجية أوبسبب الملاريا وأدواء ومتلازمات أخرى ،
على أية حال (نازلة) العشق يتحملها ويبتلي بنهايتها أطرافها مهما ادعوا إنو الموضوع (ساي)،
وحتى إن كان ثمة مجرد إعجاب فعلى البشر توزيعه بينهم ليعم الخير وفقا ليافطه في سوق
عكاظ كتب عليها النابغة الذبياني:
(Fifty lemons are a load for one person, but for fifty persons they are perfume)

Quote: على أية حال (نازلة) العشق يتحملها ويبتلي بنهايتها أطرافها مهما ادعوا إنو الموضوع (ساي)،

صدقت ايها الحكيم
ولكنني معارض من جهة ( تبني الحب) .. فقط لاغير .. فلا يسعني ان أحمل ما يشتعل في وجدان آخر
ولو كان أحب الناس الي قلبي.. ولكنني قد (اعقل) فرط ما يثقل قلبه واتعاطف معه وادافع عنه ..

لايوجد Referred Love مثلما يوجد Referred Pain واراك والدكتور عبد المنعم تبحثان الامر
مع Grey ........

عدا ذلك فاني معكم واقول ان النهاية احساس من الشاعر والمغني بصهد الحب الصادر من قلب مكي ..
ثم إن مكي (ارشف) هذ الحب .. فهل بقي (متبني) عند غيره ؟

صدقني في هذه النقطة بالذات ..

وحصّل هذا البوست الرائع قبل الارشفة فلنا فيه عودات .. ونريد حبيب نوره (حيا) (ومخفورا) فعنده
ما يخرجه من سعير حب لم يتركه للتبني

حفظك ربك وحفظ فلبك وحفظ فيه حبك ..

عمر علي حسن

على ذِكر سيد خليفة،
ونزولا عند طلب عزيز،
نضيف إلى هنا (غيرة) جمَّاع ..
فهي قمينة بإزالة تجاعيد الخاطر،
وكفيلة بأن تجعل الدواخل صقيلة بما يكفي لرؤية الآخر بوضوح

*

أعلى الجمال تغار منّا

(سؤال وجِيه)

أعلى الجمال تغار منّا
ماذا عليك إذا نـــظرنا
هي نظرة تنسي الوقار
وتسعد الروح المعنّى
دنياي أنت وفرحتي
ومنى الفؤاد إذا تمنّى
أنت السماء بدت لنا
واستعصمت بالبعد عنّا
هلا رحمت متيماً
عصفت به الأشواق وهنّا
وهفت به الذكري
وطاف مع الدُجى مغناً فمغنا
هزته منك محاسن
غنّى بها لما تغنّى
آنست فيك قداسة
ولمست فيك اشراقاً وفنّا
ونظرت في عينيك
آفاقاً وأسراراً ومعنى
وسمعت سحرياً يذوب
صداه في الأسماع لحنا
نلت السعادة في الهوي
ورشفتها دنّاً فدنّا

Quote: يا القرشي ، الخيانة تجري على المشاعر لا الجسد، الذي يسئ معاملتك ولايرحم مشاعرك يخونك حتى إن كان بينك وبينه ألف عقد ومليار مأذون، الذي لايحملك بين عينيه ويضاري عليك ويدرأ عنك العوادي ويسندك ويغطيك من صروف الزمان ويسوق لك العذر إن أخطأت يخونك في كل نانو ثانيه،

و اذا حصلت تلغى كل العقود و تمزقها قطعة قطعة....

و الله يا ود المرتضى بتعبيرك ده:الذي لايحملك بين عينيه ويضاري عليك ويدرأ عنك العوادي ويسندك ويغطيك من صروف الزمان ويسوق لك العذر إن أخطأت يخونك في كل نانو ثانيه،

اكتشفت انو سكان هذا العصر كلهم خونة الا نسبة كلمة قليلة عليها كثيرة ....

و للكلام بقية ... يديك العافية و يرجع ليك احساس حق الليمون القعدت شهور تلمو ( ما اظن بتكون عايز دعوة احلى من دى)

Quote: أعلى الجمال تغار منّا (سؤال وجِيه)

تاااااني ؟؟؟

ده جنسو شنو يا مولانا ؟؟


خلاس أسمح لي بالتذكار الجايي ده

بس أفضي وأديها نفضة