دردشة رمضانية ► 3 ◄ ... ود البشرى ....

08:09 AM June, 17 2016 سودانيز اون لاين
جلالدونا-
مكتبتى
رابط مختصر
و رمضانكم مبارك و عساكم من غوادو
ابو حسين خستق بالاولى و عثمان عووضة عمل حميل من التانية
و نسأل الله ننستر فى التالتة

و معكم و بكم ارحب بالرمادى محمد البشرى الخصر
و اول سؤال لو سمحت
مشكلتك شنو مع الغلات

اهلا بي كبسور المنبر ... 😂😂😂😂

مشكور يا ابوحسين للترحيب و التضامن
عندك اى س لو سمحت

هلا

Quote: غوادو

Quote: محمد البشرى الخصر

بدايتك غلط كبير
الله يجب العواقب سليمة هسه الياء دي لو كتبتها بنقطتين كان ممكن نتجاوز كمان ما تكتبها نهائي بطريقتك

الزول دا كل شيء ولا أسمو دا

Quote: الغلات

الغُلآت،
يعني المغالتة ...

شنو يا حمد و ود المدير
اشتت فى العيش و تجو انتو تلموهو
بوظّتو علينا الشرك
لكن برضو ح يجى يغالتكم
و شيلو شيلتكم

بدون شرك برضو ما بخليك

Quote: بدون شرك برضو ما بخليك

حمد انتا بى صحك
تبقى مصيبة دى
خلاص نمشى عليهن نعدلن قبل ما يجى

ومداخلتي البعدلها ليك منو

أوع تأستكا تعب ساي
أبو حسين قبيل بكون عمل الكابشرايزيشن
الناس ديل غتيتين شبكك مطايبة وتعتبرو ما انتبه وهو بكون أول حاجة كبشر في غلط ول مافي

خلاص اتلميتو يا المونساتيه ....
الله يدينا خيركم ...

هلا جلالدونا و رمضان كريم عليك والزملاء
ياخي اسمح لي اقول ليك انت معد برامج فاشل بامتياز, اهم شي لنجاح برنامج زي دا تجيد اختيار يجذب لك المتابعين بعد الحلقات تمش شوية ممكن تجيب ناس ابوحسين و منو ومنو ههههههههه
الناس عايزة تجديد وما فاضين لوجع الراس فا مفروض كان تختار من الاعضاء الجدد منها تعرفهم بالناس وتكسر حواجز الزول الجديد, خليني ارشح ليك الزميل عبد الرحيم واحد من اميز الاقلام الانضمت مؤخرا.
طيب عودة لسؤالك
ما عندي مشكلة مع الغلاط, العندكم مشكلة انتو :) كيف يعني, بقول ليك
أنا يا عزيزي عندي مشكلتين في المنبر دا, واحدة اني بقرا بصوت عالي او بقرأ و بنطق فا الحروف المقلوبة بتضرسني
و التانية ما يستحمل الخم و التذاكي و التساذج - التساذج دي جاية من انّك تعمل فيها ساذج وتعلف اي عليقة تقدم لك وتهز راسك حامد شاكر
ودا للأسف ترند ماشي في المنبر خاصة في امور السياسة و معارضة الحكومة, البعض يعتبر دا نوع من النضال أن اخدعني انخدع لك و الاتنين راضين
فا لما تلقاني واقف في حتة اتفق الآخرين على تمريرها كنوع من النضال ولا صوت يعلو وبتاع المسالة لا تعدو اني انضرست ما أكتر

اتمنى اكون اجبت على سؤالك

لم تقعد تغالط ليك في زول و تحرق روحو لم يطلع من هدومو .....
بتكون مبسوط ..؟؟؟ مـرتاح نفسياً ؟؟؟؟ و ضميرك بكون وضعوا شنو ؟؟؟؟
شكرا لصاحب البوست

لا

Quote: لا

أوع تكون إضايقت بس ......؟؟؟؟؟

لا

Quote: لا

الرسول ...؟؟؟؟؟؟؟؟؟؟؟؟؟؟؟؟؟؟؟

سلام لصاحب البوست وضيوفه الاكارم
تحياتي لاخونا ود البشرى الرجل المحترم
هناك حقيقة لا مجال لانكارها وهي ان ود البشرى الرمادي الشهير بكبسور
من اميز الاقلام في هذا الفضاء واصدقها على الاطلاق
وله قدرة رهيبة في تقصي الحقائق ومحاولة اعطاء كل ذي حق حقه
وايضاً لديه مقدرة فذة في التعبير وتوصيل ما يعنيه برأيه حتى لا يختلط الامر على محاوره
ويفهم كلامه في سياق غير الذي يريده وهذه ايضاً تصب في خانة الوضوح والانصاف
لذلك هو من الاقلام التي تجبرك على احترامها مهما كانت درجة الاختلاف معها في الرأي

نتمناه دايماً بخير

بس مفروض يعترف بالماسورة الركبت في بوست وين الحقيقة😂

Quote: هناك حقيقة لا مجال لانكارها وهي ان ود البشرى الرمادي الشهير بكبسور من اميز الاقلام في هذا الفضاء واصدقها على الاطلاق وله قدرة رهيبة في تقصي الحقائق ومحاولة اعطاء كل ذي حق حقه وايضاً لديه مقدرة فذة في التعبير وتوصيل ما يعنيه برأيه حتى لا يختلط الامر على محاوره ويفهم كلامه في سياق غير الذي يريده وهذه ايضاً تصب في خانة الوضوح والانصاف لذلك هو من الاقلام التي تجبرك على احترامها مهما كانت درجة الاختلاف معها في الرأي

ما عارف ليه اتذكرت تنظير ... 😂😂😂


هيثم قوم لف

جلال، الدردشة دي مع ود البشرى ولّ ابو حسين؟
حدّد عشان نعرف نتداخل

Quote: جلال، الدردشة دي مع ود البشرى ولّ ابو حسين؟ حدّد عشان نعرف نتداخل

مع كبسور... 😂😂😂😂

ياخى ما فاشل و لا حاجة بس انتو ما مشجعين عموما برضك بنقبل النقد البنّاء
و الدعوة لى اخونا عبدالرحيم للمشاركة فى اليوم الخمس عشؤ من رمضان
برضو ده ما يمنع انك زول غالات
سؤال تانى
سنين الاغتراب
ماذا اضافت و ماذا اخذت و هل العودة النهائية على البال

ود البشرى متهم بالحساسية العالية تجاه الاقلام المعارضة والعمل المعارض ..

و"العالية" هنا تفيد النسبية ..
ويدخل في هذا الاطار أشياء كثيرة ..
اذ يبدو من غير المعقول أن يتمتع أى مواطن عادي بحساسية أكثر تجاه قصور المعارضة مقارنة بالقصور الحكومي المريع والذي يطال معايش الناس وصحتهم وتعليمهم الخ وبشكل مباشر ..

أي ج هناك ؟!

Quote: سنين الاغتراب ماذا اضافت و ماذا اخذت

اضافت كم شعر ابيض و كم كيلو وزن ...
و اخذت الصحة و راحة البال ...

سؤال للضيف ...

ياخي بوستك الزمان لما كنت برلوم البتلخص فيهو بوستات الصفحة الأولى ...

خليتو مالك ؟ ( ده سؤال جادي ) ...

هلا بالشباب هلا والله...
ح أرجع لأسئلتكم يا جلّي, هيثم, ود المشرف و هندسة
هسّي بس عايز اشارك بنكتة جاتني اسّي في الواتس قلت ابر بيها الحبايب

Quote: في السودان واحدة بتحكي قالت .. الباب دقه ربك رب الخير طلعت جنب الباب، طق فتحت الباب اشوف ليك حاجه كده واقفه قيااااااامه قايمه تحلف تقول متلبه من فديو كليب 😍 سوريه سمحه سماحه الجن الاحمر، كيفك اختي بدي اشتغل اي شغل بشتغل بطبخ بنضف مكوه يا ريت تساعديني؟ 😨 دخلت جوه جبت ليها خمسين جنيه وكشيتها،،، الراجل قال لي ده منو قلت ليه ده بتاع النفايات 😂😂😂😂😂😂 هوووووووووي يا السودانيات خليكن قريبات من الباب والراجل ما يفتح الباب لحد ما الازمة دي تمر. وشكيتك علي الله يا بشار. 😳😳😳😳😳😳😳

😂😂😂😂😂😂😂😂😂
بقيت تنكت يا كبسور ....

لكن حلوة بجد .. 😂😂😂

Quote: ما عارف ليه اتذكرت تنظير ... 😂😂😂 هيثم قوم لف

بالعكس تنظير لو جا هنا

كان رشاكم كلكم من سيد البوست مروراً بيك انت والى المحتفى به


انت ناسي انو زعيم حزب الرش

وعليكم السلام هيثم غالي, وشكرا يا عزيزي على المجاملة اللطيفة
بس اظنك بالغت قليلا خاصة في حتة مقدرة التعبير و توصيل الفكرة بوضوح وعدم اختلاط الامر على المتلقي
و الدليل على كدا موضوع الماسورة الذي تتحدث عنه :)
لو رجعت للبوست ح تلقى انك اول من أشار لوجود تلاعب بالفوتوشوب في الصورة, و دا عين ما نفاه محمد ابراهيم حين قال لا يوجد فوتوشوب هناك
بالنسبة للماسورة هي موجودة ولا زال البعض ماسك فيها, النجرة طلعت باكج كامل من اخفاء نتيجة الطالب الأول مع الحديث عن مسرحية مقتل عم الطالبة الأولى و تبرير لنيلها الوسام و قرار المعتمد


يا جلال سؤالك كبير خلاص
الغربة اضافت الكثير وأخذت الكثير أيضا
اهم إضافة هي انها وفرت لينا فرصة على التعرف على ثقافات أخرى ولحسن الحظ غربتي في دولة مثل الإمارات العربية بها تنوع كبير ويسود فيها احترام القانون و ثقافة الذوق و التعامل المحترم مع الآخر دي بعتبرها واحدة من اهم الإضافات مسألة انك تعرف حقوقك وواجباتك و احترام ثقافة سيادة القانون
بالطبع مع ميزات أخرى.
نجي للجانب التاني, الغربة اخدت اجمل سنين العمر و الشباب الكانت مفروض تكون في البلد وفي خدمتها, او المحاولة على الأقل, الوضع في السودان صعب دي لا خلاف عليها لكن لامن تشوف شباب و مبادرات زي شارع الحوادث وقبلها نفير و غيرها و تشوف الحياة مع صعوبتها كيف الناس بستمتعوا بيها و بخلقوا ابداع من رحم المعاناة بحس باثر الغربة
ومقارنة اولادنا مع من هم في سنهم ونشاوا في السودان
وفوق دا كلو احساس انك اخترت الهروب بدل البقاء والعمل على التغيير دا اقسى ما اخذته الغربة مع انه دا بالذات قرار شخصي لا تلام عليه الغربة بقدر ما نتحمل نحن مسؤوليته.

هاك الــ(ج) يا ود المشرف :)
ابدا باقتباس الجزء دا من حديثك

Quote: اذ يبدو من غير المعقول أن يتمتع أى مواطن عادي بحساسية أكثر تجاه قصور المعارضة مقارنة بالقصور الحكومي المريع والذي يطال معايش الناس وصحتهم وتعليمهم الخ وبشكل مباشر ..

و اعلن اتفاقي الكامل معه
واضيف في ظل حكومة لا تتورع عن اطلاق رصاصة في مقتل تبدو مثالية خيالية بل أسوأ الحديث عن قصور ذلك الذي تلقّاها, في دي لا خلاف أبدا
طيب الخلاف وين؟ اقول ليك
أولا بالنسبة لي لا يوجد جسم او حزب او جماعة واحدة اسمها المعارضة, يوجد فلان فرد المعارض وفلان حزب المعارض و فالن جماعة المعارضة, كل واحد مستقل و مسؤول عن افعاله و شعاراته و (كذباته) ونقده ونقد كذبته لا يعني نقد كامل معارضة النظام او دعمه.
الشي التاني نعم حساسيتي عالية لكن ليس تجاه العمل المعارض او الأقلام المعارضة كما تفضلت بل تجاه الكذب و التدليس و الخم و التساذج غض النظر عن اتجاه صاحبها
و اضافة أخيرة قد تفيد.. عندي رأي في طبيعة الأسافير السودانية ومدى تأثيرها على الواقع يختلف عن الرأي السائد, وأفرق بينها كثيرا و الواقع, واتعامل معها على هذا الأساس الذي بالطبع يختلف تماما عن الواقع

يا قبّاني الشعر الأبيض و ابكرشولا و مؤخرا الصلعة هههههه
ما بلوم فيها الغربة لأنه حاجات طبيعي ان تظهر مع تقدم السن, لو لا زلت في البلد كان برضو ح يجن
يمكن طبيعة الحياة و العمل وقلة الحركة و الرياضة هنا ساعدت في تسريعهن خاصة ابكرشولا وإن كان جيت بيها من أهلي :)
تسال عن أسابيع البورد
براك قلت لما كنت برلوم و انت عارف حماس البرلم و الشي الجديد زمان كانت القدرة و الرغبة في الكتابة و المتابعة أكبر, اسّي ردين تلاتة عليكم مقوّمات نفسي لي كم يوم :)
الشي التاني طبيعة البوست نفسها كانت متسقة مع حال البورد ايّامها والعدد الكبير من الناشطين في الكتابة و الايقاع السريع للصفحة الأولى عادي كنت تكتب البوست على بال ما تمشي تشرب موية وتجي يكون نزل للصفة التانية
هسّي اهو زي ما شايف البوست بحتل في الصفحة الأولى بالأيام و الحالة زهير و جادات ما مقصّرين
السبب الأخير هو ايّام الأسابيع كان في شلة فرد صاقعة يشيلوا ويختّوا معاك ناس ود الصايم ونوبي وود الجيران و تمبس و أساسي وغيرهم حيّاهم الغمام اينما كانوا جميعا يستلموا الون يجيك التو في وقته
أسّي عليك النبي أسابيع شنو مع ناس ابوحسين الفقر دا

سلام للضيف والمتداخلين

ما هو أكثر ما يضايقك في المنبر ؟
باعتبار ما جاء في المداخلة الفوق دي عن أيام المنبر وأسابيعه
سؤال جادي والله وأتمنى الاجابة تكون أكثر صراحة

مودتي

,عليكم السلام عمر
أكثر ما يضايقني هو خروج الحوار من الشان العام للخاص و اسلوب الابتزاز ومحاولة كسر عين الآخر بالحق و الباطل
وأخيرا ما أسميته من قبل القراءة بآذان الآخرين و مؤخرا كمان جات القراءة بالبروفايل
اتمنى تكون لقيت الإجابة على تساؤلك

Quote: أسّي عليك النبي أسابيع شنو مع ناس ابوحسين الفقر دا

فعلاً أبو حسين فقر..... كان ما فقر بتلم معاك في مكان واحد .....

وين تنظير يا جماعة ...

Quote: و اضافة أخيرة قد تفيد.. عندي رأي في طبيعة الأسافير السودانية ومدى تأثيرها على الواقع يختلف عن الرأي السائد, وأفرق بينها كثيرا و الواقع, واتعامل معها على هذا الأساس الذي بالطبع يختلف تماما عن الواقع

سلام للجميع ورمضان كريم , ود البشرى الاقتباس يوضح تماما نقطة الخلاف بينك وبين من يصبغك بالرمادية , فى ناس عندهم قناعة راسخة انه المنبر والاسافير عموما تعتبر ساحة النضال الاولى والتى سوف تاتى بالتغيير وتقلب الحكومة , انا شخصيا شايف المنبر والاسافير فعالات فى نشر الوعى ولفت انتباه الناس البتعاملوا بيهم ولحد ما يتسع نطاق استخدام الانترنت فى السودان ستظل فاعلية الاسافير محدودة
فى راى يا ود المشرف انه لماذا تجد البعض عنده حساسية عالية تجاه هفوات من يسموا نفسهم بالمعارضين وتنعدم هذه الحساسية كما تفضلت تجاه الاهوال والجرائم الواضحة حقت الحكومة لماذا ؟ , افتكر لعدم وجود شخصية اعتبارية بيننا تمثل الحكومة او تتحدث باسمها وانا اعنى نافذين حقيقين وليس على شاكلة فرانكلى او بشير احمد او عمر صديق مع انه الناس ما بتقصر فى مقارعتهم لكن لا يؤخذ به كنضال ضد الحكومة , لكن لما يجى واحد من زملاءنا ممن يسمون نفسهم بالمرابطين والمناضلين مثلا يمسك الناس ضنب ككو ما المانع فى مسالته والتاكد من مصادره ومن ما يكتبه وهل تعتقد انه التستر على الفبركة والاستروبيا قد يبنى وطنا على اساس ديمقراطى سليم لكن فى النهاية لكل شيخ طريقته ولا اعتقد يوجد صاح مطلق او خطا تام

سلام يا بشرى ورمضان كريم وبعد

كونك من المتابعين للتاريخ الحديث للمنبر، هل تذكر حالة تحول فيها موالي لنظام الإنقاذ عن موقفه وأصبح معارضاً ؟
ومن ثم هل ترى فائدة ترجى من مناكفة الأعضاء الذين يعلنون بصراحة وإصرار ولاءهم للنظام ؟

يا ابو حسين..
رُد على الناس ياخ

Quote: يا ابو حسين.. رُد على الناس ياخ

يا ود الزبير ياخ أنا لسه ما وصلت المرحلة دي ....
السيد كبسور خلى البوست دا و جرى فتح ليه بوست أبو زووووط ....
عليك الله دي بشرية نحن نقعد معاها في منبر واحد ....

وعليكم السلام يا هندسة
غير الإقتباس الاتكلمت عنه في نقطة تانية برضو وهي ثقافة أن لا صوت يعلوا فوق صوت الثورة (الإسفيرية)
الشباب ديل ليسوا سذّج ولا قاصري فهم ويدركون جيدا مواضع ضنب الككو و الخم و الهتافية الساذجة, لكن بفوّتوا بمزاجهم من باب لا صوت يعلوا وغيرها
وشايفين اني مفروض أفوّت برضك :)

هلا ود الزبير هلا والله
ما طناش مني لكن الكيبورد ليه رافع, بعدين الردود على الكلام الفاهم تحتاج تروّي و دقة, زي خرمجة الفقر دا ممكن ترد عليه وانت سايق وبتتكلم في التلفون و بتاكل وتسمع في الرادي في نفس الوقت هههه
تقول يا قريبك ما فائدة المناكفة مع المنتمين للنظام وقبل ذلك تتساءل إن كان أحدهم غير قناعاته من قبل
بالنسبة للجزئية التانية لا يحضرني سوى موقف معتز القريش عشية انتشار فيديو جلد فتاة, غير كدا لا اذكر
اعود للجزء الأول و فائدة المناكفة مع المنتمين, حقيقة المناكفة لا فائدة منها على الإطلاق مع المنتمين او غيرهم
ما يفيد هو النقاش بالمنطق و وتفنيد الحجج, أمّا المناكفة أو الهتافيّة الفارغة ثم الشتائم و اطلاق الاوصاف و النعوت المحفوظة لا فائدة منه, اللهم إلاّ كان ارضاء حاجات الزول البشاتم و يناكف النفسية كونه يظن ان هذا هو النضال كما يجب ان يكون
مناقشة اكاذيب و تفيد ادعاءات النظام مهمة جدا, وهنا تحضرني مقولة بشاشا انه يتخذ البعض تختة يشرح فيها لعزيزه القارئ فكرته
لو اسهمت عشرات النقاشات و المناظرات في ازالة تغبيش وعي شخص واحد مخموم بالآلة الإعلامية الانقاذية لكفاها فائدة
انا معك لا فائدة للمناكفة على اطلاقها لكني ارى ان النقاش المنطقي المدعوم بالحجج ضروري مع انصار النظام او غيرهم, فا المنبر منبر نقاش و حوار في المقام الأول وهذه وظيفته الرئيسة

بالله عليكم شوفو الفرق بين الحلقة الاولى من دردشة رمضانية وهذه الحلقة ..
ضيف فاهم وراقي ومداخلات من ناس فاهمين وراقين زي احمد التجاني ومعاوية الزبير ولولا بعض الخرمجة التخريبية المتعمدة من قبل ابوحسين لخرج هذا البوست في ازهى حلة

😂😂😂
قوم لف زول فاهم و راقي بفتح لي بوست بي زوووووط .. ؟؟؟

في دي معاك حق .. والحق يقال

Quote: بفتح لي بوست بي زوووووط ..

غايتو ..
مرمي الله آآآ بترفع !!

Quote: في دي معاك حق .. والحق يقال Quote: بفتح لي بوست بي زوووووط .. غايتو .. مرمي الله آآآ بترفع !!

عشان تصدق و تامن انو كلام خالك ما بقع الواطة .. 😂😂😂

طيّب يا ود البشرى البمنع شنو انو نجيب اكاذيب و الاعيب اهل الانقاذ هناو اثبات كذبها و تفنيدها
بدل اتهام ناقلها بناقل الكذب و مسكان ضنب الككو ثم نهاجمه و نترك المقصود من وراء الكذبة
____
بصراحة ... و الحق يقال ... حركتو البايخة دى ما لذيذة

ما في مانع بالطبع يا جلال
هذا منبر حر كل يفعل و يكتب عمّا يحب دون حجر أو قيد سوى ما تعارف عليه الناس من قيم نبيلة اهمها الصدق و أحترام الرأي الآخر و الحق في أن تختلف مع اتجاه الرأي السائد دون تخوين أو تجيير, العايز يفنّد اكاذيب الحكومة ليفعل, العايز يفنّد اكاذيب معارضيها كذلك ليفعل
في النهاية تفنيد اي كذبة و محاققة اي فرضية ومحاربة اي خم وتساذج بالحجة و المنطق و اللاّ هتافية مكسب للجميع غض النظر عن الاتجاهات
إشارتك لمهاجمة ناقل الكذبة و ترك الموضوع الرئيس خليني اخدها بشكل آخر, عن نفسي احرص على البحث عن الحقيقة المجردة و اكتب ما احسبه كذلك, بعض الزملاء يتقبل التصحيح بصدر رحب و البعض يعتبره مهاجمه لشخصه ويتبنى الكذبة المنقولة كأنه صاحبها ومن هنا تبدأ الجرجرة و الردود و الصفحات الطويلة
وهو ما يرسخ في الأذان ان الأمر هجوم على ناقل الكذبة وليس تفنيدا للكذب في عضمه

Quote: إشارتك لمهاجمة ناقل الكذبة و ترك الموضوع الرئيس خليني اخدها بشكل آخر, عن نفسي احرص على البحث عن الحقيقة المجردة و اكتب ما احسبه كذلك, بعض الزملاء يتقبل التصحيح بصدر رحب و البعض يعتبره مهاجمه لشخصه ويتبنى الكذبة المنقولة كأنه صاحبها ومن هنا تبدأ الجرجرة و الردود و الصفحات الطويلة وهو ما يرسخ في الأذان ان الأمر هجوم على ناقل الكذبة وليس تفنيدا للكذب في عضمه

تحياتي جلال وود البشرى والسادة الضيوف

على ما اظن هنا تكمن المشكلة ويأتي الخلاف والاختلاف

فالسؤال هو : من أي المصادر يحصل ود البشرى على الخبر اليقين في تكذيب ما يرد من اخبار مضلله؟

واخص ما يلي السودان فقط من اخبار ومصادر لانو الاحداث العالمية خارج المنطقة العربية يمكن التيقن من صحتها بالكثير من الطرق وذلك لمصداقية

الاعلام ومساحات الحريات المبسوطة هناك .


وتحياتي من قبل ومن بعد

هلا يا هيثم يا غالي

Quote: فالسؤال هو : من أي المصادر يحصل ود البشرى على الخبر اليقين في تكذيب ما يرد من اخبار مضلله؟

ما ح احصر الإجابة على السودان فقط كما تفضلت لأن المسألة ليست مصادر
عموما من طوفان الفبركة المالي السايبر و مع الأخذ في الإعتبار الطبيعة السودانية المحبة لنشر الشائعة خاصة التي تلاقى هوى و ايضا تلك الخصلة البايخة بتاعة الإيحاء بانو تالواحد صاحب مصادر ومن المطلعين و المحللين بالإضافة لهوس السبق الصحفي و عاجل التي اصابت الكثيرين مؤخرا مع انتشار السايبر
ترسّخت لدي قناعة أن كل المقدّم من اخبار مسبوقة بناس (حصري) و (عاجل) و ما شابه عبارة إمّا عن كذب صريح وفبركة أو على الأقل متموم موية
أها مع القناعة دي ومع الحساسية العالية لبعض الأخبار ذات طبيعة معينة صرت عند قراءة أي خبر اقرأه بحذر و اقيسه بقياس المنطق و العقل و هل يستقيم الأمر و هل يمكن ان يتسرب هذا الخبر مثلا أو أن يصل للعامة و مع الإستعانة بمحركات البحث ممكن تلقى اشارات ودلائل تفيد بفبركة الخبر او نقله او ترجمته بطريقة غير سليمة.
الموضوع ما معقد يا هيثم فقط كل المطلوب عدم تسليم عقلك و الأنقياد و تصديق كل ما يقدم لك من الوهلة الأولى- خاصة من مصادر و مواقع واشخاص اشتهروا بالفبركة او على الأقل عدم التدقيق و اللفح بلا فرز للحاق الصفحة الأولى - وعرضه على ميزان الشك و هذا ما يفعله الكثيرين لكن الفرق ان الاغلبية تفعل و تنصرف او تسكت أو تطنش وانا لا افعل
فا المسالة ليست مصادر بقدر ما هي ميزان

Quote: ما ح احصر الإجابة على السودان فقط كما تفضلت لأن المسألة ليست مصادر عموما من طوفان الفبركة المالي السايبر و مع الأخذ في الإعتبار الطبيعة السودانية المحبة لنشر الشائعة خاصة التي تلاقى هوى و ايضا تلك الخصلة البايخة بتاعة الإيحاء بانو تالواحد صاحب مصادر ومن المطلعين و المحللين بالإضافة لهوس السبق الصحفي و عاجل التي اصابت الكثيرين مؤخرا مع انتشار السايبر ترسّخت لدي قناعة أن كل المقدّم من اخبار مسبوقة بناس (حصري) و (عاجل) و ما شابه عبارة إمّا عن كذب صريح وفبركة أو على الأقل متموم موية أها مع القناعة دي ومع الحساسية العالية لبعض الأخبار ذات طبيعة معينة صرت عند قراءة أي خبر اقرأه بحذر و اقيسه بقياس المنطق و العقل و هل يستقيم الأمر و هل يمكن ان يتسرب هذا الخبر مثلا أو أن يصل للعامة و مع الإستعانة بمحركات البحث ممكن تلقى اشارات ودلائل تفيد بفبركة الخبر او نقله او ترجمته بطريقة غير سليمة. الموضوع ما معقد يا هيثم فقط كل المطلوب عدم تسليم عقلك و الأنقياد و تصديق كل ما يقدم لك من الوهلة الأولى- خاصة من مصادر و مواقع واشخاص اشتهروا بالفبركة او على الأقل عدم التدقيق و اللفح بلا فرز للحاق الصفحة الأولى - وعرضه على ميزان الشك و هذا ما يفعله الكثيرين لكن الفرق ان الاغلبية تفعل و تنصرف او تسكت أو تطنش وانا لا افعل فا المسالة ليست مصادر بقدر ما هي ميزان

شكراً ود البشرى على هذا الرد الوافي ولكن تظل هناك نقطة واحدة يجب الوقوف عليها

وهي ماهو موضع الاعلام السوداني من هذا الميزان وهل يمكن ان يشكل كلام المسؤولين وما ينشر من اخبار عبر قنوات الحكومة

في ظل هذا النظام الحاكم مصدراً للتيقن من صحة الاخبار ؟

هو ميزان يا غالي
معناه مخرجاته - ههههه مشيها مخرجاته دي - فيها ان تكّذب او تصدّق الخبر, وهو ما ينطبق على كل ما تعرضه عليه من أخبار غض النظر عن مصادرها
تدخّل عليه خبر مصدره حكومي قد تخرج بما يقنعك بكذبه أو بصدقه. طبعا مساة الإقتناع بالكذب اسهل دائما خاصة ان توفرت ادلة اخرى كصورة مرفقة مفبركة مثلا
لكن السؤال عن كيف تتاكد من المصداقية - أظن دا هدفك, طبعا اذا ما لقيت ما يدعم ظنك في التشكيك في الخبر او يفنده لكن ستيل لا تريد تصديقه او احساسك يقول لذلك لكن ما عندك غير هذا الاحساس
برضو ما معناها تصدقه, لكن لا تستطيع تكذيبه دون حاجة ملموسة, في الحالة دي انا بعمل شنو, بحاول اجيب الموضوع للنقاش علّي اجد من الزملاء من توصل لأدلة مقنعة و اجد فيها ضالتي, غير ذلك لا استطيع التكذيب ولكن في نفس الوقت لا استطيع ان آخذه كحجة صادقة طالما انا غير مقتنع
مثال لذلك موضوع اشاعة بيع جامعة الخرطوم و المثال التاني ما قاله الكوز بتاع اتحاد الطلاب السودانيين عن انتماء شهيد جامعة كردفان ابوبكر لتنظيم الطلاب الإسلاميين
خاصة الأخيرة كنت اتمنى ان تجد تفنيد قوي ممن عندهم الخبر اليقين, عن نفسي لا اصدق الكوز لكن ليس لدي ما أحاجج به و اثبت كذبه.


_________________________

اظن اديتك ليها في ايدك بعد دا

Quote: اظن اديتك ليها في ايدك بعد دا

هههههههههههههههه

يتخيل لي يا ود البشرى انت قبل كدا استندت على كلام مسؤولين لنفي بعض ما ينتشر من اخبار

وكمثال وانت ذكرته هو مسألة بيع جامعة الخرطوم مع انو الخبر أصلا طلع بعد تصريح مسؤول اخر

هو وزير السياحة والنفي أيضا طلع من مسؤول فما عارف وضع الميزان هنا بكون كيف ؟



غايتو اتحمل شوية لانو في حتة معينة عايزك فيها


بطل اللياقة وتعال لي في نقطتي ياخ عطشتنا

هيثم إنت صايم بالله ...؟؟؟؟؟

Quote: هيثم إنت صايم بالله ...؟؟؟؟؟

بالحيل

هل عندك شك

انت شكلك ما صايم من الوش اللافي براهو دا

بمناسبة الوش اللافي


قوم لف

بالعكس انا بحاول أوفر عليك الوقت و المشوار وفتحت ليك الأتو بتاعك
جبت ليك سيرة موضوع بيع الجامعة عرفت من الوهلة الأولى دي الحتة العايز تصل ليها, يلاّ أمسك اللعب و حت الأتو بتاعك بعد دا
بالرجوع للبوست ح تلقى رأيي مكتوب فيه, انا جبت حديث الناطق الرسمي باسم الجامعة و جبت برضو تصريحات وزير السياحة ثم نفي وزيرة التعليم العالي وادراة الجامعة لحديث الوزير ثم رد الوزير عليهم
المهم من الهلمة دي كلها لا توجد كلمة واحدة تشير لـ - ورجاء تابع كلماتي بدقة - كلمة واحدة تشير لبيع أراضي الجامعة. نقطة
أصل الموضوع كان اشاعة انتشرت في السايبر تتحدث بوضوح عن (قرار صدر) ببيع أراضي السنتر وهذا القرار بعلم وموافقة البشير و صندوق دعم الطلاب و بالمناسبة هذه الاشاعة صدرت قبل تاريخ تصريح وزير السياحة
هذه الشائعة الكاذبة نتيجة لفح و تحوير جملة وردت في تقرير سونا عن لقاء نائب الرئيس بإدارة الجامعة وتأمينه على نقل مباني الجامعة لسوبا و استغلال اراضي الجامعة
وهو ما وضحه تصريح المدير في ما بعد في حستبه على الفيس ثم الناطق الرسمي ان المقصود نقل مجمع الطب لسوبا وهو ما بدأ فعلا, والاراضي المشار فستغلالها هي الاراضي الممنوحة للجامعة بسوبا
ولم توجد اشارة لمجمع السنتر.
المهم انا متأكد مليون في المية من كذب الإشاعة, وجبت الموضوع للنقاش, وما عندي دليل على كذب الناطق الرسمي باسم الجامعة لأكذبه, العنده دليل يجيبه كان في البوست.

اذا كانت دي نقطتك فا اتفضل أمّا لو تقصد موضوع تاني كدي ذكّرني بيه

سلام لكل المشاركين
البوست فكرته لطيفه وتناسب اجواء رمضان وتحديدا فتره بعد الفطور
اختيارات جلادونا للضيوف ممتازه ونتمنى أن تشمل القائمه اقلام مختلفه التوجهات من معسكرات الاعداء و الأصدقاء : )
شكرا يا ود البشرى لحسن الظن استضافه قدامى المحاربين تتوافق مع فكره البوست واوعدك أن اكون فى القائمه فى رمضان القادم حينها يكون لنا معارك و صولات فى حوش بكرى
اها نمرر ليك الكوره يا ود البشرى ب سؤال عام قناعات قديمه كنت تظنها راسخه تغيرت فى خلال تفاعلك مع المنبر و مناقشته مع إيراد امثله توضيحية
يا جلادونا ارشح ليك المستنير ابو بكر و فرانكلى اعتقد ان فكره البوست توفر تلك الاريحيه المفقودة فى عر صات المنبر

يا ود البشرى معليش سؤال تقليدي ...
ماذا اضاف لك المنبر وماذا اخذ منك ؟؟؟

------

زمان اطلعت على بوست الخرطوم القديمة ...
كنت بتسال فيه عن خالد سليمان بتاع المسرح ...
تدفع كم واديك عنوانه ؟؟؟

إنت رجل حقاني يا ودد البشري ماعارف بي قولوا عليك رمادي لييييه
اوعا تقول لي لا
رمضان كريم وضيوف البوست وصاحبو وقريبي ود المدير ايضا كذلك
:
:
:
:
:
:
:
مع التحيات لله الزاكيات

Quote: اظن اديتك ليها في ايدك بعد دا

غايتو النصيحة لى الله .. و الحق يقال ...
بستفتو
تعرف كل اللولوة و الولولة دى داير يزوغ من الماسورة ديك
____

Quote: رمضان كريم وضيوف البوست وصاحبو وقريبي ود المدير ايضا كذلك

الله اكرم و عساك من عوادو
______
يا ود البشرى ياخى قرايتك التانية دى ما تكون ظلمتنى فيها .. كل القصد
تجى الكذبة هنا و تتفضح و تتعرى سيدا او من نقلا اقتنع فبها
ما اقتنع ما فبها سيبو فى ضلالو يكفينا الكثيرين الذين اقتنعوا

اقتراح اخونا ود البشرى على العين و الراس
و لولا اعتذارو الرقيق لكان اخونا عبدالرحيم ضيف دردشة اليوم
على العموم
رمضان الجايى قريب فضّل ليهو 11 شهر و اقل من نض شهر
و لو ربنا مدّ فى الآجال هو و ود المشّرف فى اول اللستة
و حسب ما هو مخطط اليوم بنكون فى ضيافة اخونا القبانى
و نختم ان شاء الله بالمستنير
و ربنا يجعلو عامر

هلا عبد الرحيم, خلاص وقت أجّلتها للسنة الجاية الله يحيينا ان شاء الله خير يا زول
بالنسبة لسؤالك عن القناعات التي كنت اظنها راسخة واسهم المنبر في تغييرها, هي موجودة بالطبع لكن حاليا في البال موضوع او اتنين مثل موضوع الهوية و مسالة الافضلية وكذا
دي من المواضيع التي اسهم المنبر مشكورا و ما دار فيه من حوار - وكوار أيضا - في تغييرها او على الأقل اظهار الوجه الآخر للصورة


اهلا قسم الفضيل
المنبر اضاف لي الكثير, خاصة اني لم يكن لي علاقة بالمنتديات السودانية او لنقل المجتمع السوداني على النت, اضاف الكثير من العلاقات الانسانية الخالصة مع اصدقاء من مختلف انحاء السودان ومتواجدين في مختلف بقاع العالم
كثيرا ما يردني اتصال من زميل جاي الإمارات أو وصل ولما تلاقيه تسالمه كأن بينكم معرفة السنين, لا زلت اذكر احد الاجازات النزلتها وكان في استقبالي في المطار المرحوم العوض وود الصايم ووهبة وهذا كان اول لقاء فعلي لكن لو شفت المطايبة و المقالدة كأننا نشانا مع بعض
الواحد بعتبر انه عنده صديق و معرفة في اي مدينة في مدن العالم فيها بوردابي دي بعتبرها واحدة من اهم الاضافات التي كسبتها من المنبر
أمّا أهم شيئ في رأيي فهو الوعي, الوعي بقضايا مهمة وحساسة مثل العنصرية و الحروب و اسبابها و التهميش وغيرها, لاحظ في الفترة الكنت فيها في السودان وقبل الغربة وقبل الانضمام للمنبر الواحد كان اسير وجهة النظر الواحدة من اعلام موجه و ثقافة لا ترى او تعترف بالآخر إلاّ في اضيق نطاق او في ما لا يؤثر عليها سلبا, المنبر و الحرية المتاحة فيه خلّا الواحد يقرا ويرى الوجه الآخر للعملة وان المختلف معك ليس شيطانا بل انسان مثلك له فكر ورؤية وكامل الحق في التعبير عنها
ودي ايضا من الإضافات البشكر عليها المنبر وما يدور فيه من حوار و اختلاف وجهات نظر, علّمني فضيلة الاستماع للآخر - القراءة - و احترام وجهة النظر المخالفة وحق الآخر في الإختلاف ز أخذ الموقف و الخيار الذي يريد دون ان يحتاج التبرير أو أن أجيّر موقفه حسب فهمي.
ما ذا أخذ المنبر أقول أخذ الوقت و إن كان هذا أمر بكامل ارادتي و خياري
لكن بحق أسوأ ما أخذه مني المنبر هو قدرتي على سفه و الترفع عن ما يستحق الترفع, بقدر ما يوجد هنا من يزيدك شرفا معرفته توجد عاهات بشرية ونفايات آدمية وسقط متاع بمعنى الكلمة, مثل هؤلاء مجرد تبادل الكلام معهم يؤذي و يوسّخ للأسف الواحد لقى نفسه مضطر ليس فقط ان يرد بل ويجاريهم في سقوطهم, غايتو اهو شوية شوية الواحد بتعلّم كيف يتحكم في نفسه ويختار أنداده حتى في الخلاف

شكرا ليك يا ود الحسين على المجاملة, حقّاني دي كلمة كبيرة لها استحقاقات اسال الله ان يعينني عليها, لكن خليني اكون امين واقول اني اسعى واحاول ان أتحرّى الحق اين ما كان, إن اصبت فمن الله و ان اخفقت - وقد حدث فعلا - فمني
مسالة رمادي دي أنا لا انزعج منها بل بالعكس اراها محمدة, و الحمد لله ربنا وفقنا وقدرنا نغيّر مفهومها العام السلبي لدى الناس على الاقل هنا
تخيّل ان تعطي انت للكلمة معناها لا العكس, نعمة كبيرة و الله نحمد عليها الله كثيرا.

هلا جلّي, لا بستفة هناك اظنني اخطأت في تعبير اديتها ليك في يدك فأنا قصدت مسّكتك ليها بمعنى حاولت اختصر الوقت و صوّبت مباشرة نحو النقطة التي حسبت ان ود الغالي يريدها
لا اظنني ظلمتك يا جلّي وإن فعلت فا السماح
حسب ما فهمت انت عايز تقول لا داع للمساككة أو اللياقة, تكفي الإشارة لموضع الخلل و خلاص
أوكي أنا معاك في ذلك وهذا ما افعله, اشير و ابين لما اراه خلل, البعد كدا يعتمد على رد فعل سيد النجرة, إن اقتنع و مشّاها خير, إن ما اقتنع ومشاّها برضو خير, إن ما اقتنع و ما مشّاها برضو خير بحاول اقنعوا
المشكلة وين يلاّ, في البقتنع انها نجرة وكذبة وبرضو يصر ما يمشّيها و يعتبرها مسالة شخصية ويدوّر, دا بقى ما بقدر اخلّيه

الشكر ليك يا جلال و الشباب و رمضان كريم عليكم اعانكم الله على القيام و الصيام وجعلكم من عتقائه
مرحب بضيف الدردشة الرابعة قبّاني
النقوم ننقل العدة ونمش نعسكر هناك :)

Quote: الشكر ليك يا جلال و الشباب و رمضان كريم عليكم اعانكم الله على القيام و الصيام وجعلكم من عتقائه مرحب بضيف الدردشة الرابعة قبّاني النقوم ننقل العدة ونمش نعسكر هناك :)

بالله شوف ديل ختمو قبل اجي راجع


يا جلي ياخ دي ما بستفة البستفة زي ردو الأول ليك داك ياخي

يعني حتى البستفة ما بتعرفا كمان ثم ان الماسورة معروفة راكبة وين

تصدق



نقطتي يا ود البشرى هي انك أحيانا برضو ميزانك بعتمد على حسب الشخص الناقل للخبر

يعني زي ما تقول كدا نوع من الانطباعات فاذا كان الشخص من الصادقين وانت الخبر ما وقع ليك

هنا انت بتتعب وتعاني جداً لانو مساحة (البستفة) بتكون ضيقة

اما اذا كان من القائمة إياها فا بتتجدع


صراحة كانت دردشة مفيدة جداً وغايتو كان ما لحقنا أبو الجل واحيينا ليهو البوست

كان دا زاتو لحق الأول

تحياتي لكم الاتنين

يا هيثم مرحب

Quote: يعني زي ما تقول كدا نوع من الانطباعات فاذا كان الشخص من الصادقين وانت الخبر ما وقع ليك هنا انت بتتعب وتعاني جداً لانو مساحة (البستفة) بتكون ضيقة اما اذا كان من القائمة إياها فا بتتجدع

انا ايام التوقيعات كنت خاتي كلمة سيدنا علي رضي الله عنه
الحق لا يعرف بالرجال,
أنا اعتم بالخبر في رقبته في المقام الأول, كون ناقله من الصادقين أم لا لا تأتي في المقام الثاني بعد الميزان
و المسالة ما متعلقة بالبستفة بل ممكن تقول المحاققة او التحقق ودي ثقافة مهمة غايبة عنا كسودانيين عشان كدا عندنا الحاجات مجانية و سهلة و الناس تشيل وتلفح وتردم وتدلب و تقمبل سمبلا ساكت دون ادنى مسؤولية
الناس تعرف ان الكلمة مسؤولية و البتكتبه و البتجيبه انت مسؤول عنه وعن اثبات صدقيته من عدمها