زيادة كبيرة في أعداد البشر

07:07 PM May, 16 2016

سودانيز اون لاين
حمد عبد الغفار عمر-
مكتبتى
رابط مختصر

ملاحظين :
زمان كان ممكن عادي تمشي الدكان ما تلقى زبون قدامك وممكن تكون ماشي في شارع تلقى نفسك براك الخ

هسة الكلام دا مافي لو مشيت أي محل بتلقى ناس (ما زول واحد) قدامك - الصيدلية - البقالة - المستشفى - الحمام أي محل .

عدد الناس زاد بشكل كبير - السؤال هل زيادة عدد الناس دي من حيث الوزن ممكن تؤثر في ثبات الأرض

:)

سلام يا حمد وأسئلته التأملية

أنا أعتقد مهما تضاعف سكان الأرض لن يؤثر في توازنها .

لآنه البشر هم أنفسهم جزء من الأرض مخلوقين منها ..

يعني الناس الحيايمين الكتار ديل هم عباره عن كيمان تراب تحركت بفضل الروح . والروح ليس لها وزن ( على الأقل بمعاييرنا نحن ) ..
وكل ما تطور الطب والوقاية زاد متوسط عمر الانسان وخف معدل وفيات المواليد ويتضاعف سكان الأرض
لكن سينقص

خصوبة الأرض
نصيب الفرد من المياه العذبة
نصيب الفرد من الأكسجين

حيروحوا وين ديل

حيروا في أجساد الناس الحايمة دي

Quote: هل زيادة عدد الناس دي من حيث الوزن ممكن تؤثر في ثبات الأرض

ليه .. أصلوا عايشين في حافلة
-
سلامات حمدنا
مالك بقيت تنكت الحاجات اللي بتخوف دي
سؤال موضوعي برضو

تحياتي حمد
وضيوفه
المادة لا تفني ولا تستحدث من عدم .. القانون الاول لنيوتن اوعا بس ما يطلع الاول واكون خرفت
ونظرية دارون النشؤ والارتقاء بان الكون قادر علي حفظ توازنه ومشو ناس ابعد قالوا ان الطبيعة قادرة علي العقاب والثواب!!
المهم اظن مالتوس سأل نفس سؤالك بشكل مختلف باعتبار انو كترة الناس بتضايق الموارد الطبيعية . فزيادتهم تفوق زيادة الموارد ورحب بالحروب والكوارث كحل لازمة عدم التوازن

هههههههههههههههههه
ياخي دا مزاج عالي عالي بشكل ما معقول
تشهّي في الفيل والله

Quote: زمان كان ممكن عادي تمشي الدكان ما تلقى زبون قدامك وممكن تكون ماشي في شارع تلقى نفسك براك الخ

صدقت,,, ياخي خلي ده كلو,,, لو مشيت سرير نومك تلاقى واحد من الضيوف مفنقل فيهو ونايم لمن يشخر

سلام إبن العم حمد

ثبات في الموارد ما أظن ، وبالتالي حتحصل غزوات زى أيام زمان للدول التي تملك موارد غير مستَغلّة.
أما ثبات كنوع من عدم إحتمال وزن هذه البلايين من البشر والدواب : فأعتقد أن الله سيرث الأرض وما عليها حيث ستكون ثابتة إلى يوم الدين.

=

لخواجات لديهم نظريتين متعارضتين: The Gaia Hypothesis و The Medea Hypothesis
إحداهما تقول أن الكرة الأرضية تشبه جماعة "الإنقاذ" في تعاملها "الرحيم" مع أبنائها من البشر، فهي تارة تكشحهم بسونامي، وتارة تضربهم في أم رأسهم بزلزال، وتارة تقتلهم بالجوع والجفاف ...الخ
والنظرية الثانية تقول بعكس ذلك بالطبع.

وبمناسبة السؤال الساخر للأخ حيدر ميرغني (أصلوا عايشين في حافلة؟)
أذكر أنني قرأت قبل سنوات كتاباً للدكتور (فؤاد زكريا) تنبأ فيه بأن مشاكل الأرض سوف تتزايد ليس بسبب الكثافة السكانية ، وإنما بسبب زيادة "التناسل" و "التكاثر" المضطرد في عدد العربات والحافلات.
تقوم فرضية الدكتور زكريا على أنه إن كان وزن حمد عبد الغفار يساوي 90 كيلوجراماً فإن وزن عربته غالباً ما يساوي ألف أو عدة آلاف من الكيلوجرامات، علماً بأن أعداد العربات الخاصة تتزايد بوتائر مخيفة، وفي بعض البلدان تكاد تتفوق على أعداد البشر.

البشر يتزايدون ، لكن من يموت منا "يتحلل" ، فالدود – كما وصفه الأخ ملهم كردفان في أحد بوستاته: (جبار كيف ....لاحوووولا) الاستثناء من التحلل ينفرد به جماعة الإنقاذ لأنهم أكملوا "تحللهم" في دنيانا هذه قبل انتقالهم إلى الدار الآخرة.

مخلفات العربات وهي ما تزال على قيد الحياة من زيوت وشحوم وقطع غيار مستهلكة لا يقترب منها الدود ولا يقوى على قضمها، وتبقى تلك المواد والإفرازات تتراكم لسنوات والعربة حياة ومدوِّرة وقبل أن تشهق العربة آخر أنفاسها وتنتقل إلى الدار الأخرة.

وأعمار العربات- كما تعلم يا حمد - أقصر من أعمار البشر، وهي غالباً ما تذهب إلى المقبرة في ريعان شبابها و دون سن الخامسة والعشرين، أما ما يعاد تدويره من حديدها وبقية مكوناتها فلا يمثل إلا الجزء اليسير من إجمالي وزنها

التحية لكم أخي حمد وكافة ضيوفكم الأعزاء
...
..
.

هلا عثمان الإمام
اخبارك

كان أي حاجة ياخ إنشاء الله قحة زي القحة المطلعة روحي دي

مرحب درديري كباشي

طبعا في نظرية التوازن البيئي واللهي إنو ما من كائن طغى على الكائنات الأخرى وإلا حدث ما يقلل من عدده ويعود التوازن

بس الإنسان هو المسيطر بعقله المميز به دون الكائنات الأخرى ولكنه سيصنع عناصر فناؤه بنفسه

Quote: خصوبة الأرض نصيب الفرد من المياه العذبة

عشان كدا ظهرت هندسة الجينات والأطعمة المعدلة وراثيا عشان يقدروا يكفوا الناس ديل ولكن ماذا بها

المزيد من الأمراض والتغييرات الجسدية والتي بدورها زادت من معدل الوفيات

حيدرنا
كيفك يا شاب

Quote: ليه .. أصلوا عايشين في حافلة

ياخ انت قربت لي شديد

انا متخيل الأرض زي طائرة
الطائرة ممكن تطير من مطار وتصل المطار التاني في حال توفر كافة الشروط

طيب لو توفرت كل الشروط الأخرى بس زاد عدد الركاب أو العفش الطائرة ممكن تقلع من المطار لكن لو ما جات واقعة في وقتها حتقع بعد مسافة قصيرة

صحيح كتلة الأرض كبيرة جدا تساوي أضعاف مضاعفة لعدد الناس بس عدد الناس لو بقى 100 مليار معقول الوزن دا ما يكون ليهو تأثير على شيء معلق في الفضاء؟

مثلا 90 مليار × متوسط وزن 60 كجم / 1000 شوفها كم طن ديل ناس بس

هلا أبو سن

Quote: انو كترة الناس بتضايق الموارد الطبيعية .

طبعا كثرة الناس حتكون على حساب الأنعام والأشجار (الغذاء والاستخدامات الأخرى)

واعتقد لو اختل التوازن حيكون الوضع لصالح الحيوانات الدقيقة والحشرات وستعود سيرة الإنقراضات الكاملة لأنواع حية بما فيها الإنسان
ونظرية الزول التاني بتاعة الحروب اعتقد أنها شغالة حاليا ولكن بحذر وخطط بطيئة بحيث إنها ما تكون شاملة

هلا ود البشرى

Quote: ياخي دا مزاج عالي عالي بشكل ما معقول تشهّي في الفيل والله

الف مرة قلنا ليكم شاي أخضر كدي جرب

عشان اثبت ليك كلامي
يوم الخميس الفات مرقت عشان أحلق كلما أمر قدام حلاق القى خمسة ستة قاعدين منتظرين الصف
قلت يا ود بكرة صلاة العصر

فعلا بمجرد ما أذن صليت في البيت وجري على محل الحلاقين وصلت وقفت العربية ومنتظرهم يجوا من الصلاة ويفتحوا

هل تصدق فتحو الباب من جوة لقيت معاهم ناس قافلين عليهم وبحلقوا ليهم اثناء الصلاة ومع دخلتي جو 4 غيري ولو إتأخرت دقيقتين كان بقيت رقم 7 يعني ما في طريقة تكون أول واحد أصلو

يا زول الناس كتروا عديل كدا

هلا عثمان

Quote: لو مشيت سرير نومك تلاقى واحد من الضيوف مفنقل فيهو ونايم لمن يشخر

والحالة الكراسي لعبة بس
شوف مع الكترة برضو الحركة بقت كتيرة وفي أي وقت ودا مردو لزيادة اهتمامات الناس واختلافها

سلام الريس أبو جهينة

Quote: ثبات في الموارد ما أظن ، وبالتالي حتحصل غزوات زى أيام زمان للدول التي تملك موارد غير مستَغلّة. أما ثبات كنوع من عدم إحتمال وزن هذه البلايين من البشر والدواب : فأعتقد أن الله سيرث الأرض وما عليها حيث ستكون ثابتة إلى يوم الدين

الآن ما يحدث هو تفريغ وتهجير لسكان بعض الدول والجاهزين للهجرة هم أصحاب الإمكانات العقلية والأكاديمية وهولاء حيصل ليهم واحدة من اتنين

اما تغيير طريقة تفكيرهم بحيث تنسجم مع متطلبات من يأويهم وبالتالي إرجاعهم إلى بلادهم كمطايا لنهب الثروات
أو تذويبهم بالإغراء في تلك المجتمعات بحيث تصبح بلادهم بدون مؤهلات وتصبح فريسة للخبراء الأجانب من ذوي الأطماع

مرحب يا الصادق عبد الله

ياخ تناسل البشر نفسو بعمل زيادة كيف ؟
المادة لا تفنى لكنها تزيد
شوف رجل وإمرأة يتزوجان بمتوسط إجمالي وزن قول 130 كيلو
من نطاف بوزن لا يذكر يمكنهم ولادة 10 اشخاص يصبح وزن كل منهم بمتوسط 65 كيلو
شوف الوزن على بيتهم زاد كم

وبالتالي زادت متطلباتهم من سيارات وبيوت زيادة الخ

الارض و ما عليها من مخلوقات مصدر رئيسى لزيادة كتلة الارض
بى نفس حسابك مات مليار زول * 60 كيلو/1000 و شوف زيادة الارض من الرميم كم طن
ما تخاف على الارض تدّيك و تكبّر عشان جب تبلعك فى بطنا
يعنى الواضح كدة البشرية غذاء الارض المفضّل
سؤال .. انتا جنس البوستات دى قاعد تخطر على بالك كيف

هلا جلالدونا

Quote: بى نفس حسابك مات مليار زول * 60 كيلو/1000 و شوف زيادة الارض من الرميم كم طن ما تخاف على الارض تدّيك و تكبّر عشان جب تبلعك فى بطنا يعنى الواضح كدة البشرية غذاء الارض المفضّل سؤال .. انتا جنس البوستات دى قاعد تخطر على بالك كيف

تعرف زيادة كتلة الأرض دي ياها ذاتا المشكلة ال بتضيعنا

لأنو ببساطة ممكن الكتلة دي تقاوم قوة جاذبية المدار البتدور فيهو الأرض حول الشمس

تخيل فلتت من المسار يمين الناس ديل إلا تفرزهم باللباسات

اليوم في دراسة استرالية شايفها في الجرايد بتقول إنو بعد مدة الرجال كلهم حينقرضوا والأرض دي يحرسنها النساء فقط مع باقي المخلوقات
غايتو دا جنس مقلب عليهن

البوستات بتجيبها الزحمة حقت الناس دي تقيف في موقف قبل ما تنزل من عربيتك يكونوا ثلاثة قفلوك من وراء تشهيل هم الطلوع بعدين