أبومريخ.................................................

02:07 AM May, 08 2016

سودانيز اون لاين
munswor almophtah-
مكتبتى
رابط مختصر

أبومريخ

هذا الإسم ذو المعنى والمضمون والمغذى، والدلالات والرموز التى تتساقط كرطب القنديله على مخيلة الواقف عليها٠والمرخ قد وردت فى إستعطاف الحطيئه عندما سجن فى
هجائه للزبرقان بن بدر بقوله: (خل المكارم لا ترحل لبغيتها... واقعد فأنت الطاعم الكاسي) وقام العادل عمر بن الخطاب بحبسه فكتب الحطيئه من السجن يستجدى قلب عمر منشدا رائعته
(ماذا تقول لأفراخ بذي مرخ... زغب الحواصل لا ماء ولا شجر ألقيت كاسبهم في قعر مظلمة... فاغفر عليك سلام الله ياعمر) والمَريخ تصــغير للتعظـيم والتفخيم للمَرَخْ ،ذلك النوع من
الشـجـر الذى هو اقرب للسَلمْ يـنبـت فى الوديان والشخـاتـير ومــزالق الســيلِ، فى عــروض الســافنا الفــقــيرةِ، وشبه الصـحـراء، وذلـك الابو مَرِّيخْ يتوهـط كـيدا لعابـريه بين جنـوب أم مَــمْرَحْ
وشمال السروراب ويقطـنه عـيال دِشـين بطبعهم ومكر طباعهم وساحر دققهم٠ يحدثك عاقلهم بأنهم سليلى على الكرار ومنه ورثـوا (الشداعه) لا يَتُـرْ ولا يصـد فارسهم لا بل يكـرون كجدهم
الكرار عليه رضوان الله ,يمتازون بفكاهة غليظة‘لا يخشون قانونا.... لا بل لهم خاص قانونهم فى ربعهم ذلك، والويل كل الويل لمن لا ينصاع للرغائب.. والطلبات.. حتى ولو كان الفكى بخيت
أو الفكى جُُحُرْ ,فجُُحُرْ كان تاجرا متجولا يبيع ويشترى جلود الأضاحى والعقائق والكرامات ودابته من الإتان الحرائر حماميةٌ عالية المناكب والأفخاذ‘ مسروجة ومُلْجَمَة بفاخر خواص الإتان
وعليها عِدْلَة من الجلود تفنن فى تصنيفها وتصفيفها وعليه فوق خُدرته الدقاقه وهيئته المربوعه جلابيه من البوبلين الأبيض الناصع أحسب أن ترزيها ود مِكينه أو ترزى الحُكام الدخيرى وعليها
صديريا سواكنى‘ بطانته ستاناً مرمرية الملمس اصفر لونها فاقع تبهج وتهيج الناظر إليها وفى قدميه قِطِعْ ود مُرْدّسْ وصية اُحسنت دباغته، مركوبا من جلد بقرة أحسبها مكلوفة بعنكوليبٍ سُقْيتهِ
كانت ليلا وأرضه حالت وأحْْلَت خَراجُها، وعلى رأسه عمامةً من الكِرِبْ التوتل شُغلت بحرير أبيض تفننت انامل صنعها، وفى تلك الهيئه والجناييت سَكَةْ عِمىْ يرتشفون شاى القيلوله ويقنصون
لصيدٍ جافل فإذا بدابة جُــحُــرْ الذى جاء به القدر لشر العذاب فأوحوا لشابة بأن خُــذى جلد القط النمرى من على الصَــريف وأعرضيه على جُــحُــرْ وجاءته تمشى على هدئً وبينةٍ من أمرها، فصـعّر
وجهه شائحا عنها فإذا بالجنايـيــت يتتالبون من ربضتهم وشماليخهم كمطر العِــينه الناجحه على ظهر الحماره وعنقها فإذا بجُــحُــرْ يصيح (الحماره لا ضْـربوها) ولسانه المعقود من غَـلَــفةٍ خُلق
بها يضطرب وترتجف أوصاله، ورد الجناييت ( الحمار بى رزقو وإنت بى رزقك خبارك ما بتاخد جلد النمرى؟) فصاح الفكى جُــحُــرْ (قِبلتَ الجلد) فصاح الجناييت (حذريك ما تبخِسْ جلد
النمرى بى سعر كَــبِشْ حَـمَـرِى أبرق) "قِــبلْ قِــبلْ" رد الفكى جُــحُــرْ فقال عاقلهم (عاماً أول شريت منى الحمرى اللبرق بى خمسه ورقات الليله عِلْ تَـــطْــبُقِــْن ) وكسكرات الروح أخرج الفكى
جُــحُــرْ عشره ورقات بحشرجة الموت وبصوت واحد قال له الجميع :ـ ( خلاس عوفه أتْــبَـَرِبَــحْ وعجاج كرعيك عُــقْــبان عيـــناً تقع فيك من أبـــدلاله لى أبلعوت بِـــنْوخِدك جلد الزرزور فى الشدر)
وكالذى خُسِفَتْ به الأرض إختفى جُــحُــرْ إختفاء الزَبــاد من أم جقيره ٠ أما ذلك المتطلع لدخل آخر ،الفكى بخيت أستاذ القرآن ، جاءته طاقات من التيترون والشالات من السعوديه ليتحرك فساح فى
الأرض حتى جاء لحنكات أولاد على الكرار صيدا سهلاً ميسوراً، لم يتورع من تحذير ذوى الدرايه و(حسبها لعباً شليل ترتار وقيره) لم ياتهم راكبا ولكنه أقروب. لم يــكُ فى هيئته كسابقه ولكنه ذلك
القصير النحيل الخفيف فى جلابية لا تشتكى من القِصَرِ والطول وكذلك السروال، وبيمناه هشّــاشَــة الكلاب ومآرب أخرى تنتظره٠ عند سيالات أولاد عرديب راى أمة ًمن الناس فطفق يظهر بضاعته
فبادره أحدهم :ـ (يا زول المتر كم ؟وقبل الإجابه عَــبٍــر لى جلابيه وعَــبٍــر للجناييت ديل،قماشك مالو أخَشَنْ آخر بضاعه... والله شنو؟ أقطع ...إقطع رويسك الصِغَيٌِر متل راس النعامه دا) وقال الآخر:ـ
(يا زول إنت العكاز بدوربو شنو؟ ها جناييت حرم تدقوا للزول النشوف كراعو) وضرب أحدهم على القيروانه وأخذ يغنى "حلو التيترون حلو التيترون" وصاح آخر:ـ (يا زول حرم ترقص وتسو لنا
رقصة قرد البَــدَّعْ ...يازول سو... والله ...الركابه دى هسع بتعوى فوق ضَهيرك القِصٌِرْ دا) فعرف الشيخ أن لا عاصم إلا رب الناس وطاعة الأمر فخفّ ساقه على إيقاع تلك النغمه حتى تغطت المغارب
وأبتلعت حَمَار شفقها فقالوا له ( الخراريت دى والله بتتراوح بى وشك... لا عكاز.... ولا تيترون) فقبِل الفكى وكحَجْر الحاحايه صَـــوْبْ الزرزور إنطلق الفكى صَـــوْبْ خلوته٠ ومن النوادر أن يطلق
خفيفى الساق سيقانهم للريح فيقوم الجناييت بوضع حجر عند موضع الرجلين ويسمون ذلك بيانا لصاحبه وعندهم من الأسماء ما تظل مع من أطلقوها عليه حتى بعد مماته٠


منصور

حافظ الإمام محي الدين · كالغاري


قمة الإبداع يا منصور. يا أخي قرط على كده وخلينا من ساس يسوس والحوار الغلب شيخه.

حبيبنا منصور ..
فهمت الموضوع .. وهو غاية الجمال والحضور ..
لم تأتي هنا بمفردات غليظة وصعبة ، من هنا عرفت أن لأهلنا أعراب سودان
لغة خاصة بالانفعال والزعل (ههههه ) صدقني لوحة رائعة .. حليل زمن التيترون والبوبلين
والهندمة .. أو كما يقول الخلايجة ( كشخة ) أكل عيش الواحد فينا يعرف خفايا لغة الخليج
وفاقدين مفردات أهلنا الجميلين ..
ويا منصور أنت أكثر واحد يستخدم المفردات ذات الخصوصية .. بس طلع شيخ أبوسن أخطر منك
كمان الملك قريبي وجاري برضو طلع خطير ..
مودتي ..

Quote: ويا منصور أنت أكثر واحد يستخدم المفردات ذات الخصوصية .. بس طلع شيخ أبوسن أخطر منك

أستاذى على عبدالوهاب ,, تحياتى
( الزول السمح
فات الكبار والقدرو
لو شافوهو ناس عبدالله أخوى
كانوا يعذروا
السبب الحمانى
العيد هناك ما أحضروا
درديك الشبيك
البنتوا فوق سدرو )
يا منصور ياحبيب
عليك الله خليك ماسك فى سِكَة أخونا الأديب محمد المكى إبراهيم دا
على طول .

أسمحوا لى بالرجعه
يا منصور , ما تفهمنى غلط
بالمناسبه أنا ما مريخابى
عارف ناس السروراب غالبيهم مريخاب ورحم الله أخى العزيز الفاتح منير
كم كانت لى معه قفشات وقفشات فى تحويل وتسجيل منقستو وعبدالعظيم
قاقارين فى الهلال والمريخ من نادى النيل .

Quote: عارف ناس السروراب غالبيهم مريخاب

مولانا عبدالله
التحايا والاحترام
من اين لك هذه المعلومة المغلوطة
وحاتك ات...المريخاب عندنا ما يملو ليهم فرد حافلة
وهم من شدة ما شوي لما قاعدين نحن في حالهم
زي جماعة بي هناك عندكم
جماعة الحزب الليبرتاري الأمريكي قصاد الجمهوري ولا الديمقراطي

شوية بس جعجعتهم كتيرة ومسيييييييخة و ورجغتهم اكتر منهم
اخوانا المريخاب طبعا ديل

Quote: يغنى "حلو التيترون حلو التيترون"

الرواية التانية يا المنصور
بتقول
عمك الفكي جا داخل الحلة
والحلة خلاء من راجل ولا صبي
كلهم بي صمة خشمهم في البحر
وهم راجعين من المسور
عينم لي نسوان الحل جت عليهن تحت ضل شدرا كبييييرة
متحلقات في بضاعة الراجل...والراجل يرقص طربا في دواخله
واحد فيهم ادا الحروم فد نهرة
وهن ادنهم عجاجة كرعينم
وجماعتك تلللللب نزلوا من الدواب..فطار قلب الرجل وعرف انه هالك لا محال
كل واحد منهم اتناول لي فردة قماش حريمي
فسأل اولهم
ها زول ها..الداهي دا شن سمو
فقال له..دا الاسموكن
اااااا الشنو....
قال ليهم الاسموكن
اها ما عندك غنوة سمممحة الشئ دا
غنية شنو اااناس...انا فكي
واحد نط قال لي وكت ما عندك
نحن بنغني ليك...صاحبك فرح..قال جالك الفرج
فاذا باحدهم
الا بشرط...ترقص لينا
ااااااا....دا كلام شنو اااجماعة
ما عندنا غيرو
اها سو
وقالوا كدا قعدو يغنوا

الاسموكن حلو فوقهن
الاسموكن حلو فوقهن
الاسموكن حلو فوقهن

فلم يجد الرجل بد من الرقص والطرب
ومن ديك طار من المنطقة كلها طيرة ابريش من الدريش

Quote: أستاذى على عبدالوهاب ,, تحياتى ( الزول السمح فات الكبار والقدرو لو شافوهو ناس عبدالله أخوى كانوا يعذروا السبب الحمانى العيد هناك ما أحضروا درديك الشبيك البنتوا فوق سدرو ) يا منصور ياحبيب عليك الله خليك ماسك فى سِكَة أخونا الأديب محمد المكى إبراهيم دا على طول

حبيبنا عبدالله عبدالله .. تحياتي ومودتي ..
كيف صحبنا ترامب .. يعني نفقد الأمل .. صدقني حرام
ما يفوز .. ده زول تربال عديل .. كلامه مباشر ودوغري بدون غتغته ورتوش ..


كمان شوف حبيبنا منصور يبدع كيف في الكتابة أرجو أن يستمر على هذا المنوال ..
الحبيب منصور حروفو جميلة وصوره رائعة
واصل منصور ..

مع التحية والود للزول الرائع عبدالله

العزيز حافظ محى الدين الإمام الصفراوى الأغر الراغام بالحق والقلام لظهر فواتى الحدود. عزيزى تلك هى
صنعتنا ولكن تنزعنا عنها بعض النوازل والنوازع والإبتلآت العارضه والتى تجد مواعين صبرنا والصمود
واسعة ماهله، وتجدنا لابسين خمسه وشنط الجرايه مستفه ياخ أشكرك أبداَ ودوما وصادق السلام لك.


منصور

عزيزنا على عبدالوهاب عزاك الله ورفع شأنك وعلّى مقامك وأيدك ونصرك وبرّاك. ليتك جالست مجدد صالح ساعد
لامتين القيامه تقوم لتطرب وترقص كل خلايا روحك وتحدق عيون الفرح فيك بوجه حق بائن أو جمعك الزمان بكره
الشيخ العارف للدقق محمد خير السيد شقيق البدع رفيق ود ضحويه والضرير تحت سياله مخطها العلق وغطاها
وجدعت ظلالها وارفةً لعشاقها، أو يسر الله لك لقيةَ بإدريس ود اللعيوّرْ لتعور عين شيطان السمع وتسيخ أرجل ذاتك
فى جوف السعاده الأبديه، ياخ شكرا لذاك الكم من التقريظ العفوى ولك من السلام الكثير الوافر.


منصور

Quote: Taj M Ibrahim  الاهلية الخيرية تحياتي للاستاذ منصور المفتاح على هذا البوست الرائع وحقا ناس السروراب ماهم ساهلين تب-- اذكر منهم الاخ عبد المطلب الزاكي( كلية الصيدلة) جامعة الخرطوم-- سبعينات القرن الماضي- اين هو وعبد الغني عبد الله- المجلس البريطاني- أعجبني · رد · التحديد كبريد إلكتروني غير هام أو احتيال · 26 دقيقة

التاج يا أخوي
ات وقت بتعرف ديل
حرم تستاهل الجنسية السرورابية عدييييل
واضح انك زول سمح..كما تقول اختنا الأميرة بت السيد
فلك كل الود والتحايا العطرة بالمحبة
اخونا عبدالغني...لمحاسن الصدف ..هو الشقيق الاكبر للمنصور
حا اخلي منصور يفيدك بحاله ومحتاله..وهو علي كلا بخير واتم عافية

اما دكتور عبد المطلب..اشتغل مدة بليبيا..وردحا من الزمان بالمملكة
واستقر به المقام اخيرا بالسودان
وهو بخير وعافية

أخونا عبدالله عبدالله ياخ لك من السلام الكثير ونحن كذلك نعرف بعض أهلك كعزيزنا عمر السيد والعزيز حاتم إبراهيم إبن عمه والعزيز بشير حسن يوسف
والدكتور عمر السيد بدر أكرمه الله وعلّى من شأنه والعزيز عباس حسين الطيب بدر وآخرين وهنالك روابط وصلات فيا عزيزى أشكرك على الوقوف بهذا
الحوض ونشكرك كذلك بذكر الشاعر الفذ ود المكى منحه الله الصحه والعافيه وله كذلك السلام والسلام لك ولمن ورد إسمه ولك السلام.



منصور

Quote: لشيخ العارف للدقق محمد خير السيد شقيق البدع رفيق ود ضحويه والضرير تحت سياله مخطها العلق وغطاها وجدعت ظلالها وارفةً لعشاقها، أو يسر الله لك لقيةَ بإدريس ود اللعيوّرْ لتعور عين شيطان السمع وتسيخ أرجل ذاتك فى جوف السعاده الأبديه

حبيبنا منصور .. من خلال سردك .. هناك عبارة إستوقفتني ( سيالة مخطها العلق وغطاها )
( العلق ) هل هي تلك النبتة الزاجفة التي تكتم أنفاس الاشجار ؟؟
نحن كذلك بالنوبية نطلق عليها ( ألاق ) إذن فأصل في الكلمة عربية .. ولأن أهلنا البشارية وغيرهم من أخواننا
هم من كانوا يتعاملون مع إشجار السنط تقطيع وتمتير الخشب وحملها بالجمال ولأن العلق دائماً ما يزدهر مع إشجار
السنط والتي يحب الجمال أكلها مع الشوك .. لذلك ربما سمع أهلنا المسمى من إخواننا العرب وإنتقلت التسيمة بدل
المسمى النوبية ( آريل ) إلى ( ألاق ) شكراً حبيبنا منصور .. دفعتني إلى البحث والتأصيل ..

هل تقصد نفس ( العلق ) النبتة أم معنى آخر ..

مودتي ..

حبيبنا الدكتور أسامه ود زينب بت (بيله) ياخ مشتاقين والله وليك مده ما بنت، رغما عن علاقتى بالصحافه الرياضيه بعض الشئ ولكن لم تكن لى تلك
العاطفه القويه تجاه أى من هلال مريخ ولا تطربنى الحوارات فيها ولكن أعرف أن الكل إتحادى والكل هلالابى وبعض المريخاب وقليل من الأنصار مع
تلاته شيوعيين وأظن أخونا عبدالله يتحدث عن السقاى أي السروراب شرق، أما الفكى بخيت فقد صعد نجمه بعد أن درس الجامعه وصار شيخا كبيرا يحجيه
عن دقق أولاد على الكرار الذين رقص لهم وبدع وكنت والأخ هاشم نتسامر معه فى فناء خلوة الفكى ونبث فيه خيوط الحداثه وكان قابلا لذاك متجاوباً معه
ممتناَ لما نقوم ونحن نود أن نعرف منه كذلك ثقافة مكانه الذى وفد منه بمكرٍ شديد ربنا يعطيه العافيه. أشكرك كذلك بأتيان مداخة التاج ف دكتور طلب
عثمان الزاكى درسنا العلوم فى الثانويه العامه وصب لنا علوم المرآة المحدبه والإنكسار والإنعكاس والبعد البؤرى وما إلى ذلك ولعبنا مع كرة القدم وسهرنا
فى الأنس بالنادى وشاهدنا البلابل وفريد عبدالوهاب وبولاد وضو البيت أما عبدالغنى فهو كما قال أسامه فهو شقيقى الأكبر وقد عملت كذلك بالمجلس
البريطانى مع عصمت وولى الدين أبوالغيس وحامد موسى مراهد وربما أعرف الأخ التاج فقد كنت أعرف كل من له علاقه بالمجلس البريطانى وقتذاك
والأخ عبدالغنى الآن بالسروراب معاشياَ يتقدم العمل الإجتماعى النهضوى فالشكر الجزيل يا أسامه وحباب عزيزنا التاج ولك وله السلام.


منصور

( العلق ) هل هي تلك النبتة الزاجفة التي تكتم أنفاس الاشجار ؟؟


نعم هى تلك النبته المتسلقه والتى تعشقها ألبل وتزداد خضرتها حتى تصير داكنه وتتسلق كما اللبلاب وتفعل فعله وأشد منه وعندما يشتد المطر الشجره التى يغطيها العلق لا تمطر
أبداً ويجلس تحتها الترابله ويعلقون الشاى ويمِلّون المطاله أم نارين والشاهى بكبابى الطلس الأبيض يا شيخ على يشوى الشفاه ويسمونها أم قرين ولها أدان تدرعها وتصقع لامن
تغمض زى الدكاى المعتق والشاهى أبو كتيحه من النعجه للحله للزور الناى الله!!

منصور

عزيزنا التاج ألف ود وألف تحايا وألف شكر نعم عبدالغنى شقيقى كما قال دكتور أسامه
وطلب من الأهل حفظه الله ورعاه وله علينا فضل كبير لا نستطع أن نحصيه وهم الآن بخير
كما أسلفت وسنخبرهم بك ولك منا سمح الأمانى.

منصور

ومن عيال دشين الشاعر الفورى حماد الرجاله
الذى قال:

(نحن سياده مانا بياده
والقبل التمانيه نحن أسياده
الجرح المغور نحن ليهو عياده
عن ساعة السُعال شرطاَ تجينا زياده)

منصور

أبشر بالخير يا المنصور

المنصور لك الشكر والثناء الحسن ، يا زول تب ما خليت لك فرضاً ناقص وشايل قروانتي من أول يوم نزلت فيهو إنت هذا البوست محاولاً أن أدلى بدلوي لكين غلبني البقولو تب فقد أبنت وأفضت وأفصحت ولم يبقي لي شخصياً إلا أن أمتع نفسي بهذا السرد الرائع ، جميل أن تنقل ألي الجميع هنا تلك الصور ثلاثية الأبعاد عن أولاد دشين والأروع أنك نقلتهم حقيقة إلى أبومريخ وحلوا في ديار أولاد دشين أهلاً وسهلاً.
من طرائف الدشيناب أنهم ناس حاضري البديهة
قالو في أحد الأشخاص وهو يتكلم بسرعة بالقدر الذي لا تتبين معه مفردات الكلام (باب الصفيح)
ونعتوا إمرأة فائق الجمال (بالسمحه قاعدة) حيث أنها طولية جدا
وقالوا في بعض القرى التي تليهم عندما لم تجاوزتها خدمة الكهرباء للحلال التي بعدها "حلة فطت"
ولهم الكثير المثير من الطرائف
ويبقى زولك الذي حضر من السروراب إحدى المناسبات ورقصت فيها إحدى حسان المنطقة فدخل الساحة وأخد شبال مليان فإذا بشخص يتب فوق كراعو بمركوب يحاكي كدارات الكورة أيام أن كانت جلد ومليانه مسامير محاولاً إستفزازه وجره للبطان قائلأ بعد أن أدمى قدم الرجل "أنا قديم" فما كان من صاحبنا إلا أن رد عليه قائلاً يا أخي أنا مالي ومال قدمك و جدك كراعي دي ما قطعتها.
--
مسجد الدشيناب مكتوب عليه وبالخط العريض "مسجد علي الكرار"

Quote: أخونا عبدالله عبدالله ياخ لك من السلام الكثير ونحن كذلك نعرف بعض أهلك كعزيزنا عمر السيد والعزيز حاتم إبراهيم إبن عمه والعزيز بشير حسن يوسف والدكتور عمر السيد بدر أكرمه الله وعلّى من شأنه والعزيز عباس حسين الطيب بدر وآخرين وهنالك روابط وصلات فيا عزيزى أشكرك على الوقوف بهذا الحوض ونشكرك كذلك بذكر الشاعر الفذ ود المكى منحه الله الصحه والعافيه وله كذلك السلام والسلام لك ولمن ورد إسمه ولك السلام.

منصور يا حبيب
ديل ما هم عِزِى وأهلى وقومى وعشيرتى .
وزى ما بقولوا العِز أهل .
زحمة العمل ما ميديانى فرقه , لكن إن شاء الله بجيك راجع , لدى الكثير من الحديث والحكاوى
عن أخى وصديقى العزيز , وجارى فى مكان العمل ( بنك السودان ) وفى السكن ,,, فى الزمن
الجميل أخى الفاتح منير ,, الله يرحمه .

إسم منير إسم أهلنا التسعين ناس سعيد ود منير وهم بالشرق فى الجيلى وبالغرب فى التسعين وصدقت
فعلا من المنطقه لكن أنا لا أعرفه شخصيا فالهجره الطويله ولكن أعرف أهلة كمعرفتى لأبنائى ولك السلام.

منصور

Quote: دَعِ المَكارِمَ لا تَرحَل لِبُغيَتِها وَاِقعُد فَإِنَّكَ أَنتَ الطاعِمُ الكاسي

العزيز المله عمر سلام من الله عليك وعلى أهلنا الجميعاب فى أماكنهم جميعاً شرقاَ غرباَ وفى الجزيره وغيرها ياخ كلام قديّم مع الرجل قالو أنا شن فرزى
فى قديّم وجديّد أما تلك مليحة الوجه عالية القامه كما البكره البشاريه أرادو أن يسخرو من طولها وفى اللغه تأكيد الزم بما يشبه المدح وقالو لواحد من أهلنا الجباراب
وش العزايه وخيالك جديرٌ بأن يصنع ذلك الوجه وسمو أبو ضلوعا حديد لرجل قصير نحيل ولكن صوته عالى وأبو ضلوعاَ حديد هو الترتر أو (التراكتر) وهنالك
رجل مشاى للعزآت أسموه الفاتحه والحكيم الذى يقول حبتين بعد الفطور والغدا والعشا سموهو أبلع سته وسمو منيشير وبلاف والفرشاحه وراس ور لشخص
راسو ماكن زى راس الحمار، ياخ مشتاقين ولك السلام وإن شاء الله تنجح لكم البطايس ويغلى سوقها.

منصور

Ahmed Mohammed

منصور المفتاح سلام يا اخي . قبل ايام مضت كان لاهلك الدشيناب مسجد جديد يريدون افتتاحه ، فدعوا الاعيان والمشايخ للافتتاح
فتبرع لهم واحد من خيرين الجزيرة اسلانج بجوقة مداديح للافتتاح فرفضوا رفضا باتا ، فقال له سعيد ود خالد اذا انت
عاوز تعزنا بالصح جيبلنا قيقم . ·

الناس ناس شداعه منسلين جاياهم من فوق الكرار على والقيقم بهبل فيهم
نار مره ونان تانى بتلاقو هلا هلا العراديب البيسعو الضيب وبياخدو
أم وضيب!!


منصور

حياتي ومعزتي الصادقة أخي الأديب منصور المفتاح
وسلامنا ومحبتنا إلي أهلنا السروراب في مشارق الأرض ومغاربها
فالقوم نعم هم، فيضهم ونفعهم يعُم،وكما قال حادي قوافلهم المكاوي
"أصلو الإكسير معدنا"
أينما ذهبت في بقاع السودان تجد نفعهم،والسعيد من جاورهم أو جاوروه أو أجاروه فهم كأمطار البخات.
وكيف لا يكونوا شجعان "دشين قاضي العدالة"
المرخ دي موضوع طوييييل
لكن نعلِّق علي العلق
العلق والزِّقي والشعلوب، كلها متشابها، ومتسلقة للأشجار، قال طقاق توية يصف بيت حسناء وهو مملوء "بالشلايل وأيد الفايقة، والعضب والكتب و....الخ
وسائر أدوات زينة البيت المصنوعة من الجلد:
بيتها الوادِي أبوزقيِّي
ونفسها فتيل أبو بني
وقالت بت مازن الجرارية "في السلطنة الزرقاء" تهجو أحدهم:
رخيس.....وأمُّو معلولة
وكيف فرع الزِّقي مابقيف علي طوله
أيضا عن الزِّقي:
قصبة وعندها القيف دقّ والخور كوَّر
بتتمايح مِتل فرع الزِّقي النوَّر
جرِح ناس القفيل تاني إنفتق وإتعوَّر
وفي تمر الفؤاد سوّالو قيحة وغوّر
أما عن الشعلوب وهو أيضا شبيه بالعلق، يقول الصديق الشاعر جمعة البري، في مطولة عن خريف "وعَرة" ومنهل أُم كحل
شِدَرِك عارشُو شَعَلَوباً قَطَع رارابِك
وفَرْعِك لولَحُو الزِّيف العَقَب كَرْكابِك
سَماحِك في سَمَاح زولاً بِرُدْ تِرْحابِك
ويا امْ كُحُل السَّماح ناساً بِقُولُو حَبَابِك
الشعلوب هو نبات متسلق ، كاللّبلاب تماما ويسمي أيضا العلق ،ويسمي الزِّقَيْ .
وأسمح لي أخي الوريف منصور أن أهدي الأخوين
أسامةالإمام والملّة عمر،خريدة الشاعر جمعة البري،فهما من القلائل اللذان يستحقان هذا الجمال.
يقول دكتور جمعة محمد سعيد الكبَّاشي البرِّي، وهو طبيب بيطري مقيم بالمملكة:
إْنحنَلَّ آام كُحُل بعد النَشَاف كَرَّابِك
وجَاكِي الفَرَّحِك من هَمْبَرِيبُو شَرَابِك
يا القَلَبَن رَشايْمِك وَدَّرَنُو سَرابِك
ويا الزَرْقَن سَمَاكِي اللَيْلَة عِيدِي شَبَابِك
شمِّك هَاجَرَتْ وَهَج السَمَايِم سَابِك
و يا البَدَّر خَرِيفِك وما انْكَشَف دَرَتابِك
ما جَفَّن غَدايْرِك وما انَفَضْ وَرَتابِك
و يا الغابَن مُحُولِك والفَتَق تَيْرَابِك
الورتاب هو ورق القصب او العشب عامة
يا الكَسَرَن مَرانْعِك وانْسَرَف دودابِك
سَماحِك سَمَّحُو الرَعَد البِكُر فِي سحابِك
لَيْلِك جَمَّلُو البَرْق البِفِج دَهَرابِك
والسَّارِي البِسُوق سَوَّاكِي دَرْب وسَرَابِك
النَعْ البِشِيل لَيلُو و نِهارُو سَخَابِك
وناغُوشِك نَتَر دَعَتاً بِنِف و دَوَابِك
فَجَغَيْب ،كَرِّك آامْ بُوح البِجِضْ مُتْلابِك
ومِن عَصْراً كَبِير كَبَرَوسُو بَان حَلَّابِك
البَرْقَة بِتْهَاب النَّدَى المَا بْهَابِك
وسَمْحَات زَرَاف رَيْرَة اللِقَن مُضْرَابِك
ياحْلَيل فَرَّتِك والسَّرْحَة فَوق هَبَّابِك
وقَفِك فَوقُو حَارُوك النَعَم مِتْشَابِك
بياضِك ودَمْبَلابِك والسِّحا ووَرَتَابِك
وحَنْتُوتِك مِفَرِّش فَوق دَرُوكِي وشَابِك
قَفَلِك وانْدِرَابِك والبَنُو ومَعَرَابِك
والكِتِر المِجَرْجِخ والسَّعَات واطْيَابِك
شِدَرِك عارشُو شَعَلَوباً قَطَع رارابِك
وفَرْعِك لولَحُو الزِّيف العَقَب كَرْكابِك
سَماحِك في سَمَاح زولاً بِرُدْ تِرْحابِك
ويا امْ كُحُل السَّماح ناساً بِقُولُو حَبَابِك
*نشرح البسيط لمحبتنا لأخونا الأستاذ علي عبدالوهاب
*يا سلااام وقفت في إنحل كرابك، "قشاطة" النشاف والجدَب ،كلنا يعلم عندما يربط الإنسان عُقدة،علي بطنه،"كرَّاب"
هذا يعني ،أنه يستعدلأمرٍ ما، أو أنّه مُنهك، والذي جعل الأضاة ،تضع هذه "الكرَّابة" هو المطر العزيز
وكأنها تعيد شبابها ونضارتها، بالمطر، وهذا صحيحا ،لأنَّ الجفاف هو شيخوخة المناهل.
الدوداب هو شارع او الطريق من الفرقان والدِّكك للمورد إن كان طريق بهائم او ورود، وماأجمل ليل البدو بدوي الرعد وهدير السَّواري.
الدَّعت هي الهوام من ثعابين وعقارب ،وأم بوح هي البقر ، الكر يقصد به حظائر العجول "متلاب "والكبروس هو إناء من جذوع الشجر يتم به حلب النوق والبقر.
البرقة يقصد بها الضأن، وفي الخريف لا تسرح الغنم صباحا ، لأن الندي الذي يكون علي العشب والأوراق، يسبب لها المرض، وروعة التشبيه،
أنَّ الغنم، تخاف من النَّدي ،ولكن الندي لايهاب أضاة "أُم كُحُل" ،وزراف ريرة هي الإبل والنوق
الفرَّة اي "النشوق النشوغ"،ودائما تكون فرَّة البهايم، بعد الرجوع من رحلة الجنوب وكثيرا ماتكون شمالا ، حيث التلال والقيزان والسهول المنبسطة،
والقف هي التلال، والقف أيضا هو النبات الغزير الشديد الإخضرار ، والحاروك هي مرحات النوق أو النوق الكثيرة، والقف هنا تعني النبات المتشابك.
جميل ٌ منطر شجر الكتر ‘عندما يكون "مجرجخ" ، من كثافة الأوراق وإخضرار الأغصان حتي صار مُنحنيا ،وهذا لعمري من أكثر الإنحناءات جمالا وأنفةً.
أخي منصور، عدت من إجازة "شهرين" قضيتها مابين ديار السروراب والفتيحاب والمقداب، ومابين عتامير كردفان الغرة
وماكنت أريد أن "أمرق" من "حجيل" خلوتي، لولا مايكتبه شخصك الكريم أخي منصور وبوست آخر لأخونا الأستاذ علي عبدالوهاب
معزتي بلا حدود

يا لك من جميل يا صانع الجمال وجالبه ومجليه بشرحك البائن الواضح يا المقدم وود المقدم نسأل الله دوما تتقدم وحالنا يا عبيد فى هذا المكان حال محسوبنا الشريف الجاك سرورابى
وهمباتى موثق له كان يقود رحل أم قجه عنية وجساره ويبيعها فى سوق بربر ووسمها فوقها وأهل الوسم واقفين وكان طروبا لعوبا يعشق الحياة وينفق كل ما جمع فوق البعدلن كيفو هو
ومن معه وكان لا يشرب إلا الفاخر ولا ياكل إلا من ثريد الأيانق الأنيقه ولا يركب إلا عليها ولا يطلب إلا دركها وفى ذلك يفعل الكثير المثير الخطر وفى مجالسه لا يشرب اللبن إلا
من ضرعها إن أراد وفى ثوبه وعراقيه والسروال الجرجار وفى الكتف السيف وأم خشمن عفن مملحه والطاقيه تحت العمه تغطى الحواجب يم أولاد حسن ود البدرى وعندو كبير الجبل قبل
الجمل ودارت الدوائر وسيق إلى سجن كسجن الحطيئة ذلك بلا عمرٍ ولا عادل ولكن كان هنالك سجان يشخت على الأسود مجنزره فى الزنازين ويناولهم المى الحار والأكل المسيخ وكان
إسمه سرور

فقال الجاك
(شراب البيره واللبن البجيك معبور
بقينا حيارى فى لفظا بقولو سرور)

فيا ود المقدم هذا المكان قليل من هم فى قامتك وقليل منهم العارف الراكز أتمنى أن يكون
لهم هذا المكان جامعة فاعلة ملقنة تضيف لهم ما يشبع قوهم المعرفى ويروى ظمأ الحوجة إليها يا رب. أما ما نثرته من جمال وما عرضته واهباَ ثمرته ونضرته لمن يستحق فذاك لعمرى
إبداع بدوى أصيل وتصوير بالكلمة برع قائلها وأجاد وأوصف وصنع الأجواء من مطرٍ ورطبِ وطرب وأثملنا حتى كادت أن تقع من الرأس العمامه شكرى لك غير منقطع وثنائى لك
دائم ما بقيت ولك من السلام الوافى الشافى ولك الحب.

منصور

شكرا جزيلا العزيز Ahmed Mohammed
من الفيسبوك وشكرا لرصدك الدقيق لاولاد على الكرار وألف سلام عليك.


منصور

العزيز العبيد إن ما بسطه للناس لزاد أرابيبٍ، أثق فى أنه سيبسطهم وسيزيد
جبارة معرفتهم، زادك الله بسطة وبسطك بنجاح الأبناء ولك السلام.


منصور

عبيد الطيب
منصور المفتاح
إيه الجمال ده والله إبداع وإمتاع ، أنا غايتو حماري غلب ولن يستطيع أن يجاري أدبكم الجم وكلامكم الغلاد دا بالرغم من أنني زول غرب زي زيكم بعرف أصررالعنز وأعلف السعيه وأقرع الموية أفتح اللبقه وأنجم البصل وألف البطايس وأخزنها في البوته . ومروري من هنا بكل ما فيه من شتاره هو تعبير عن سعادتي بمقدرتكما على الرسم بالكلمات. وقطع شك كان الدلوكة دقت وخلفتو الشتم بركز للبطان وحرم بندق
نحن الفينا للنايبات ثبات ومروة
ونحن كرمنا طامح سيلو برة وجوة
نحن قباح علي الغايرنا بلقى القوة
نحن سلامنا ملخ الليد من الترقوة

المله عليك الله ما عندك راكوبه فوق جدول وكبابى الات طلس أم قرين وعدة شاى كامله ودعول أليل بقر نجيب السنارى ونهبلو وبعد ما يلهلهب
نجدع فوقو بطايس وقنقر وندفن تحتو مطاله ونجيب طنوب من الضان السارح نسرف الكبروس سرف، شخبوب رغوتو السكين ما تقطعا، والقصب
اليلنا مجدع والسيجه مبنيه وزمبارة الرواعيه تقول يا ليل وتسوى العجب والتمباكه إتجادعو الحقق الله قادر وباصرلنا ود مسيخ أكان يوثق ونشوفو
ويشوفنا ياخ سلام شديد وتحايا غلاد.



منصور