الإستيكة والديمقراطية الفردية..

06:31 PM May, 01 2016

سودانيز اون لاين
Munir-a222
مكتبتى
رابط مختصر

المتأمل لظاهرة الأستكة فى هذاالمنبر يجد أنها أحد إبداعات صاحب هذا المنبر الحر ودالحلفايا بكرى أبوبكر .. رغم أنى أعتقد أنه نفسه ليس حراً مية فى المية فى إدارة منبره الحر هذا ..
فهذه الخاصية كشفت لنا مدى إحتمال الفرد للرأى الآخر ومدى ديمقراطيته الشخصية .. فرأينا وسنرى ثورة كبرى فى إستعمال هذه الخاصية لمحو الآراء المضادة ..
وأنا ما عندى أدنى شك إنو لو بكرى إبتدع لينا وسيلة مثل الإستيكة ـــ زى الصعق الكهربائى الكيبوردى ـــ لمحو المخالفين من الوجود فسنرى ثورة فى مقتل الأعضاء المصعوقين بالكهرباء الكيبوردية ..

والخلاصة فى الآخر فإن المنبر ساهم فى استخلاق ديكتاتوريات فردية اسفيرية من منازلهم ، إذا تنزّلت لأرض الواقع فستتحول لسفك دماء الخصوم ومحوهم من الوجود لا محالة ..

ههها يا دوب وصلك عوج الاستيكة وللا شنو
النصيحة لى الله استعملتها مرتين ,, بعد ما اكتشفت انها ممكن تكون مفيدة فى حتات كدى
و المرتين فى حق مداخلاتى
بعد مرات و لسبب ما مش بتلقى المداخلة نزلت مرتين ,, اها تقوم تشيل واحدة
و بعد مرات مش بتلقى نفسك بتعدل اكثر من مرّة
و تظهر ليك حركة بكرى البايخة ديك بالجنبة الشمال التحت من المداخلة
عدل عدل عدل
اها تقوم تكشحا بى حركات بكرى دى و تكتبا تانى
يعنى مسألة تنظيمية ليس الا
و غايتو دى فايدتا لو فيها فايدة

ههه يعنى شغال تأستك فى نفسك ..
الظاهر لسة مافى زول عمل معاك فاول حقيقى ..
لكين مادام إنك استعملتها ضد نفسك فأكيد إنك جاهزلإستعمالها ضد الغير .. فما فى زول أرحم على الغير من نفسه .. ههه ..
بس تأمل فى هذه اللعبة الذكية من بكرى .. خلع المسئولية من نفسه تماماً وعلقها للأعضاء فى رقبتهم .. وبعداك كل زوول يشوف نفسه.. إلى أى حد هو ديمقراطى ويستطيع تحمل الآخرين ..

سلام يا منير و الزوار الكرام،
تأكد تماماً أن من يمارس المسح (الإلغاء من الوجود) الإسفيري
سوف لن يتردد في تصفية الخصوم إذا دانت له مطلق السلطة.
لدي ستالين مبدأ شهير، يقول بالروسية:
چالاڤيك يست، برابليما يست
چالاڤيكا نيت، برابليمي نيت
ما يعني:
يوجد الشخص، توجد المشكلة
تصفية الشخص، تصفية المشكلة

القمع يمارس كفكرة ثم كفعل إسفيري
ثم عنف لفظي ثم إغتيال معنوي
ثم تصفية جسدية

Quote: القمع يمارس كفكرة ثم كفعل إسفيري ثم عنف لفظي ثم إغتيال معنوي ثم تصفية جسدية

أهلين أخ أحمد الطيب بدرالدين ..
فعلاً ..
غايتو بكرى فكاها فى الأعضاء وريَّح نفسه من وجع الدماغ ..
ويمكن نسمى ذلك خطوة فى طريق الـboard automation .. :)

شايف سيد الحوش بكرى ما قصر معانا وعلّق لينا البوست فوووق ..

شكراً بكرى ..

نسترسل نقول .. إنو الإستيكة بدعة حسنة ولكنها ذات حدين .. وهى مقياس حقيقى لديمقراطية المرء .. يعنى زوول يجيك ناطى فى البوست بتاعك ويكتب ليك كلام ممكن يكون حق يدحض منطقك ويمسح بيهو الأرض .. فتبقى أمام نزاع نفسى .. هل تأستك الزبون وتمحو رأيه من الوجود، أم تتركه شوكة حوت فى البوست؟؟ .. فعندئذٍ الزول يعرف نفسه وهوى نفسه .. ويرى هل إذا استلم سلطة وقوة وتحكم فى رقاب العباد، فهل سيتحمل معارضتهم أم سيمحوهم من الوجود ..

هذه إحدى التفاصيل الصغيرة فى الحياة ولكن دلالتها إذا عممناها ممكن توضح الصورة الكبرى لمآلات سلطة البنى البنى آدم على الآخرين ..

ها زول ها
كيفن مابرفعو و ات جايب سيرة انجازو التاريخى
و من رفعوهو شايف كلامك بقى ما ياهو بدعة حسنة و ما ادراك ما بدعة حسنة
اها شن قولك "" تكتب اى كلام ما ياهو فى حق الاستيكة حيرمو ليك البوست ده من علّ
و يا دفنوهو فى خور يا فلقوهو بى طبلة
و الله صحى
حقتى ما حقت ود البشارى و صاحبو معاوية

أستاذنا ول أبا منير،
سلام ..
أخوك والله الأيام المضتت دي درشوا ليك أكثر من عشرة مرات .. مني عشميق وأبو ورطة ما خلوا لي مداخلة ترك .. ينفضوها طايرة .. لكن مبسوط عايزهم يتعلموا ممارسة الحق الديمقراطي .. حفظت المداخلات فى فايل .. كلما يمسحوا المداخلة أخليهم يمشوا بجي بنزلها تانى .. هل تصدق مافي ولا زول فيهم أشتكي ..

أنا أتخيل لي لو تم أستعمال الوسيلة بطريقة سليمة ممكن تؤدي إلي إرتقاء الحوار ونظافة المنبر ..

بريمة

سلامات أخى بريمة .. لاحظت أنك اليومين ديل عيار الغضب عندك طاير السما .. لكن برضك خاتى أعصابك فى تلاجة ..
طبعاً مستوى الإختلاف فى بلادنا وصلت مراحل عميقة من سفك الدماء .. وأنا متأكد إنو الإستيكة دى لن تشفى غليل الناس .. البعض يتمنى طريقة للقتل عديل ..

ذلك مبدأ ستالين، أما الفاشي أحمد هارون
المطلوب للعدالة فقد أبان حين قال:
(أمسح، أكسح، قُشّو! ما تجيبو حي)!!
أولها مَسِحْ!! و آخرها: ما تجيبو حي!!
عندما نبدل الإستيكة بالكلاشينكوف!!

تحياتي اخ منير
انا ضد الاستيكة تماما
الما عاوز حد يتداخل في بوسته او يكتب راي مخالف ما ينزل بوست ممكن ينزل مقال في صفحة المقالات
لكن كلمة منبر تعني الرأي والرأي الآخر
في نفس الوقت من آثار الاستكة الجانبية انها كشفت مدى اتساق البعض مع زعم الديمقراطية والحرية الخ الخ
تلقى الواحد يتشدق بالشعارات دي وما يستحمل اي مداخلة من مخالف
وآخرين يتشدقون بضرورة الحوار مع القتلة وفي نفس الوقت لا يحتمل حوارا مع مجرد مختلف في الرأي
بس برضو دي كلها تظل آثار جانبية لا تبرر استمارا الاستكة لما فيها من مسح لمداخلات قد تكون مهمة وقد لا يكون صاحبها قد تحوط بنسخها قبل المسح
كما انها تحول البوستات لبيانات ذات اتجاه واحد مما يفقد المنبر حيوية التثاقف والتحاور والتكامل

ذلك مبدأ ستالين، أما الفاشي أحمد هارون
المطلوب للعدالة فقد أبان حين قال:
(أمسح، أكسح، قُشّو! ما تجيبو حي)!!
أولها مَسِحْ!! و آخرها: ما تجيبو حي!!
عندما نبدل الإستيكة بالكلاشينكوف!!

ول ابا منير ..حبابك يا صديقي
وكتر خيرك على هذا الخيط..
اسمح لي اختلف معك في الخلاصة التي صغتها والتي تذهب الى ان السنسرة (عبرها المنبر) ستخلق ديكتاتوريات اسفيرية ، وانها لو تنزلت الى الواقع ستمارس اغتيال الأخر ومحوه.
في البدء انا اقف مع السنسرة وعندي خيط مجاور عددت فيه اسباب ومناط السنسرة التي سأمارسها.. وقلت هي حماية للفرد والفكرة والخيط والقارئ من السباب والشتائم وشخصنة الأمور. فانا مع السنسرة اذا انطوى الموضوع: على شخصنة او تحريف للموضوع أو فرض موضوع اخر لا علاقة له بالفكرة وانما بصاحب البوست (فش الغبائن)..فالدفاع عن الذات لا يخلق ديكتاتورية وانما الديكتاتورية تخلقها عقليات الدوغما التي تريد ان تفرض امر السباب والشتيمة واعتبارها رأي يستحق الحماية..وهذه هي العقليات التي ستمار س القتل حقيقة ان وجدت فرصتها..
النقطة التي الاحظها حينما تتحدث الناس عن امر السنسرة.. تتحدث بعمومية وتقول هي قمع للرأي الآخر..و نفس الناس لو قلنا لهم هل تقبلون بالسباب في حقكم او الشتيمة في حقكم؟..سيجبون باننا لا نرضاه..!..شفت التناقض كيف..يعني وكت المثاقفة هم يتحدثون عن رأي وعند الواقع يميزون بين الأشياء..
السباب جريمة ، والقانون استثناء ، لأن الأصل في الأشياء الإباحة ، ولا يتدخل القانون الإ في حالات استثنائية لحماية المصلحة العامة ، وهذا هو جوهر السنسرة فهي استثناء وضرورة..

وحتى تدير الناس نقاش يثمر بعض الشئ.. فلابد من تعريف الرأي بالضبط وتعريف السباب بالضبط.. وبعدها الناس تشوف شنو البيستحق الدفاع عنو..!

الكأئن السوداني يا صديقي كائن غير ديموقراطي ، وهو اكثر كائن يمارس الإنفصام..يعني ممكن يتكلم كلام سمح للغاية لكن في الواقع ممكن يناقض ذاتو..

التحية لصديقنا بكري ابوبكر فلقد احتمل الكثير وهو يدير هذا المنبر ، وقد نجح كثيرا في ادراة التنوع بكل ما تحمل الكلمة من معنى..ومنح الأعضاء حق السنسرة والرقابة هو امر ايجاب وتخفيف بعض الأعباء ..
ودمتم..
كبر

منير و الضيوف الكرام سلام

Quote: و نفس الناس لو قلنا لهم هل تقبلون بالسباب في حقكم او الشتيمة في حقكم؟..سيجبون باننا لا نرضاه..!..شفت التناقض كيف

يا كبر كلامك دا كلو تبرير ساي
انا القدامك دا مافي سب او شتيمة بتهزني او تقلل من قدري و احترامي لنفسي و ما بتفرق معاي مدحني الناس ام شتموني
بي صراحة انا شايف السنسرة ضعف من عدة اوجه
يا إما ضعف في المنطق
يا ضعف في الشخصية. لانوا من يسب يفضح قلة حيلته، ولا ينال من قدرك

اما حكاية يحرف البوست انت سوق سواقتك و خليهو في خرمجتوا و القارئ اذكي من ما تعتقد

أنا معاك يا منير، إستخدام الإستيكة يوازي قمع الرأي في النقاش الدائر وجه لوجه
ويعبر عن ضعف في ملكات السجال وتبيان منقصة الرأي المختلف وضعف حجة صاحب البوست.
حتى الشاتم يمكن فضحه بدون أستكته.

الحوار في سودانيز أطرافو كتار والبوست بعد يطلع ما ببقى حقك، مشاركنك فيهو المناقشين والقراء
عشان كدا ما من حقك تمسح رأي زول

يا كبر اتفقنا معك في بوستك هناك بأننا لا نرضى السب والشتم ومع ذلك قلنا لك ان معايير تحديد ان هذه المداخلة او تلك تدخل تحت طائلة المخالفات امر يجعل صاحب الاستيكة خصما وقاضيا في نفس الوقت
التناقض الحقيقي في الدعوة للحوار مع قتلة ظلمة ورفضه مع مخالفين للرأي
وهل الأجدر ممارسة السنسرة مع شاتميك ام مع قاتليك؟

Quote: تحياتي اخ منير انا ضد الاستيكة تماما الما عاوز حد يتداخل في بوسته او يكتب راي مخالف ما ينزل بوست ممكن ينزل مقال في صفحة المقالات لكن كلمة منبر تعني الرأي والرأي الآخر

الأخ أحمد الشيخ ..
أظنك تعلم أن هذا المنبر يعج بالأعضاء المعارضين للإنقاذ وأعتقد أنك منهم .. وهو ما يعطيك حصانة من العنف اللفظى ويحميك من التعدى عليك إن جاهرت برأيك .. وغالباً هذا الرأى يصب فى المصب المعتاد فى شتم الحكومة ومؤيدى الحكومة ووو .. وفى الغالب فإن مؤيدى الحكومة لن يتعدوا على ويطلقوا عليك التهديدات فى بوستاتك ويخربوها ليك مهما كان رأيك .. فأنت إذن محصن من التعدى عليك بينما يدك مطلوقة للتعدى على الغير ومن خلفك جيش من الأعضاء الذين سيساندوك ويتم التبشيع بخصمك الذى أبدى وجهة نظره التى تظهر مولاة للحكومة .. والذى نشهده هنا أن كثير من دعاة المعارضة المعارضة لا يتورعون عن فعل أى شئ لأذية مخالفيهم فى الرأى .. وتشوف أنك لو فتحت بوست لم يوافق هواهم ينزلوا فيك شتائم ، وأن لم يطلّعوك كوز تطلع رمادى ..
فالإستيكة هى أضعف سلاح للدفاع عن البوست وعن الرأى ، وهى حتى ليست كافية ولا توفِّر حماية لصاحبها فالمتعدى يمكنه أن يفتح بوست منفصل ويملأه نبذ وشتيمة .. فالإنترنت لا يمكن التحكم فيها، وبكرى مستحيل يقعد يصاقر المنبر ٢٤ساعة ليمسح المشاركات التى تؤذى الأعضاء .. وهى مشاركات على مدار الساعة ومن جميع أنحاء العالم .. ومن أناس من مختلف المشارب فيهم الواعى وفيهم السكران وفيهم متلقى الحجج والشمارات .. وممكن برضو زوول ليس عضواً فى المنبر ذاتو يقوم يسرِّب كلام لصاحبه من الأعضاء أو من الفيسبوك أو أو أو .. فهذا المنبر خطر جداً ..
والإستيكة على الأقل أضعف الإيمان لتوقيف بعض المشاركات التى تؤذى الأعضاء بلا حدود .. وبما أنو بكرى مستحيل يراقب المنبر فإنه علق للأعضاء القلم فى رقبتهم ..
وإنت لو عايز تحس بعداء الأعضاء كدى قول ليك كلام مخالف للخط العام فى المنبر عشان تشوف مالا يسرّك ..
ياخى عبدالحفيظ أبوسن الرجل الرزين ذو التوجه المعارض للحكومة ، الناس فهموا البوست بتاعه غلط وردموه بلطف لغاية ما تفاجأ وزعل وقرب يمشى يقع البحر .. :)

تحياتي اخ منير
صحيح انا اعارض هذا النظام ليس لشئ الا لكونه ديكتاتوريا قمعيا
لكن اختلف معك في تأييدك للحركات المسلحة
تقديري

هههههه
غايتو يا احمد الشيخ بى سؤالك ده

Quote: هل الأجدر ممارسة السنسرة مع شاتميك ام مع قاتليك؟

دخّلت صاحبى الحوارنجى كبر ذو اللستات فى قدّوم وزة
و نطالب بى اجابة محددة لا مداخلة دبل قبينة زى بتاعت فنيلتى
و كمان بعيدة عن البوبار اللفظى

هلا يا منير

الاستيكة موجودة اعتقد منذ وجود المنبر وكان بيستخدمها بكري لسحب بعض المداخلات في حالات خاصة جدا
بس بزيادة عدد الأعضاء الموضوع بقى ليهو صعب وبقى شغال تخوير لكامل البوست - احيانا التخوير قد يكون فيهو ظلم لمواضيع جادة وبصيب صاحب البوست بالكتمة والزعل
قام فكاها للناس ولأننا أصلا نفتقد للديمقراطية وقعت للبعض في جرح وبقت الأستكة على الهوية بمجرد ذكر نقد لا يرتقي للإساءة

سلامات يا كبر ..
قصدى بإستخلاق الديكتاتوريات الفردية أنها تستثير نزعة النفس لإسكات الآخر حتى وإن كان صاحب الإستيكة على حق .. المهم إنو الزوول وجد فى يده سلطة واستعملها ..
تخيل الزوول يشرع فى الإسكات فيقوم يرص المداخلات فى صورة مستقيمة ثم يعمل سكرول داون على مداخلة العدو ثم ينشِّن عليها ويعمل تِك علىها، ثم تأتى لحظة الرش بكل قوة مع سبق الإصرار.. هههه .. بتكون معاها راحة نفسية ياخ ..
وهنا تنمو الروح الديكتاتورية حبتين .. ومع تكرار الرش يصبح سفك دم المداخلات ممارسة عادية ..

منير.....
الخائض في الوحل لابد أن يعلق برجليه،
إن لم يكن بثيابه، بعض الوحل
ولكن عليه أن يغتسل جيدا بعد الخروج
لكي يزيل آثار ما علق برجليه أو ثيابه ...

Quote: انا القدامك دا مافي سب او شتيمة بتهزني او تقلل من قدري و احترامي لنفسي و ما بتفرق معاي مدحني الناس ام شتموني

سلامات ناصر جامع .. يازول الله لا رماك فى زولاً ينبذك ويشتمك شتائم لا تكون فى حسبانك ..
بعدين المشاكل بتجى بالإحتكاكات والكتابات النشطة، والمواضيع الحساسة المستفزة التى تستثير العواطف الحادة .. فكلما كتبت كتير فى مواضيع شرسة ــ خاصة فى السياسة ــ كلما مست كلماتك الآخرين ووقعت فى خلافات حادة تجيب ليك ردود حادة تخرجك من طورك ..
لكين هسه إنت لو مسجِّل من سنة ٢٠٠٤ ويادوبك مشاكاتك بالكاد فاتت الألف ، يأستكو ليك شنو ؟؟ .. :)

Quote: أنا معاك يا منير، إستخدام الإستيكة يوازي قمع الرأي في النقاش الدائر وجه لوجه ويعبر عن ضعف في ملكات السجال وتبيان منقصة الرأي المختلف وضعف حجة صاحب البوست. حتى الشاتم يمكن فضحه بدون أستكته. الحوار في سودانيز أطرافو كتار والبوست بعد يطلع ما ببقى حقك، مشاركنك فيهو المناقشين والقراء عشان كدا ما من حقك تمسح رأي زول

يا عيدروس كلامك ده هو الحالة المثالية حين يكون الجو العام صحى والنسيم عليل والمحبة مسترسلة بين الأخوان .. لكين نحن فى ساحة حرب هنا .. والآراء متضادة بصورة صارخة .. ولذلك هناك حنق شديد ..
ثم حقو الزوول ما يحكم على حاضره وحاله الآنى .. لأنو بكرة أو بعد بكرة ربما تدخل فى عداوة غير متوقعة تلخبط ليك مواقفك من السنسرة ..

Quote: الاستيكة موجودة اعتقد منذ وجود المنبر وكان بيستخدمها بكري لسحب بعض المداخلات في حالات خاصة جدا بس بزيادة عدد الأعضاء الموضوع بقى ليهو صعب وبقى شغال تخوير لكامل البوست - احيانا التخوير قد يكون فيهو ظلم لمواضيع جادة وبصيب صاحب البوست بالكتمة والزعل قام فكاها للناس ولأننا أصلا نفتقد للديمقراطية وقعت للبعض في جرح وبقت الأستكة على الهوية بمجرد ذكر نقد لا يرتقي للإساءة

سلامات حمد عبدالغفار..
غايتو بكرى ريح نفسه .. ياخى متابعة المنبر ده مستحيلة .. بكرى ده بيكون قرأ كترة قراية فى المنبر ده، يكون إمتحان الشهادة زاتو ما قرأ ليهو قدر ده ..
بعدين مرات تكتب موضوع على نياتك وتمشى تنوم، يقوم واحد سكران من أحد قارات الدنيا يشتمك ويقول فيك كلام وإنت تكون ماجايب خبر .. وفى الحالة دى الإستيكة زاتها تبقى too late .. لأنو خلاس الجمهور كله يكون قرأ الشتيمة ويكون ناس الشمارات حفظوها سريع سريع وناس الكابشرات كبشروها وهاك يا واتساب وهاك يافيسبوك .. وإنت تكون لسه ماصحيت من النوم ..

أحمد عزالدين كيفك .. أشهد ليك إنك صدرك رحب .. لأنى جيتك خاشى فى البوست بتاعك ضفارى .. فلقيتك يا جبل ما بهزك ريح ..
كان ممكن تمسح مداخلتى .. لكنك رديت بهدوء ..

بس أوع تكون مسحتها وأنا ماجايب خبر؟.. :)

Quote: غايتو بكرى ريح نفسه .. ياخى متابعة المنبر ده مستحيلة .. بكرى ده بيكون قرأ كترة قراية فى المنبر ده، يكون إمتحان الشهادة زاتو ما قرأ ليهو قدر ده

شكرا استاذ منير
تصدق قربت ابقى اعمى من كثرة القراية

منير صباح الخير


صاحبك فرانكلي دا بالذات مفروض يقلعوا من الاستيكة دي... سوء استخدام مبالغ فيهو...

Quote: ثم حقو الزوول ما يحكم على حاضره وحاله الآنى .. لأنو بكرة أو بعد بكرة ربما تدخل فى عداوة غير متوقعة تلخبط ليك مواقفك من السنسرة ..

تحياتي يا منير والمشاركين وبكري ابوبكر

أنا عضو قديم، إتشتمت، وتم إغراق بوستاتي باللنكات والنسخ واللصق
وصلت معاي لحدي"تفو عليك"
لكن برضو ما إحتجت لي إستيكة.

Quote: رغم أنى أعتقد أنه نفسه ليس حراً مية فى المية فى إدارة منبره الحر هذا

يبدو أنك نسيت كلمة :

Quote: رغم أنى أعتقد أنه نفسه ليس حراً مية فى المية فى إدارة منبره الغير الحر هذا

Quote: تصدق قربت ابقى اعمى من كثرة القراية

هههه .. والله يابكرى مقدِّر شعورك .. تكون كمان حافظ الأعضاء صم ..
المشكلة إنو المتابعة والقراية بالنسبة ليك إجبارية عشان ما يفلت منك بوست ..

لكين إطمِّن فى ناس فى المنبر ده بيقروه أكتر منك .. :)

قصى .. مستحيل نلقى حرية مية فى المية ..

Quote: أنا عضو قديم، إتشتمت، وتم إغراق بوستاتي باللنكات والنسخ واللصق وصلت معاي لحدي"تفو عليك" لكن برضو ما إحتجت لي إستيكة.

يا aydaroos .. وين كانت معاركك دى؟؟ .. مامتذكر ليك أى منازعات هنا .. يعنى فاتتنا أفلام :)

تفوو دى كان يلزمها مسح طوالى .. بس يمكن الزمن داك السلاح ده ماكان متوفر ..

Quote: صاحبك فرانكلي دا بالذات مفروض يقلعوا من الاستيكة دي... سوء استخدام مبالغ فيهو...

ياحاتم هوارى .. زى ما قلت لأحمد الشيخ أكتر ناس يتعرضون للأذى الذى يستدعى الإستيكة هم المحسوبين على الحكومة .. وأكثر ناس لسانهم كعب ولايتورعون عن الإساءة هم المحسوبين على المعارضة .. فرانكلى من الناس الذين يُحسبون مع الحكومة ولذلك كثيراً ما يتعرض للإساءة .. خاصة إنو فرانكلى إنسان جاد يعنى مايكتب .. ودالباوقة مثلاً حكومى رسمى ويتعرض دائماً للذم والإساءة .. لكنه له القدرة الفائقة على تحوير الإساءة لنكتة ومزاح .. وحواره يتميز بعدم الجدية ولذلك الإساءة له ذاتها مابتكون جادة .. ولذلك خلافاته مع الأعضاء غير حادة ..

سلامات منير
إذا قرأت البوست صاح فإنت بتتكلم عن سلوكيات الماسح إذا توفرت لديه السلطة على الجماهير
سؤال : كم عضو في المنبر دة كايسين سلطة على الجماهير ؟

ما شايف إنه العينة أقل من حجم الدراسة !

بالنسبة للاستيكة بعتبرها حاجة جميلة جداً للناس الما عاوزين سلطة واتخيل لي هم أكتر مما تتصور

في ناس ما بتتحاور ولا يمكن نقاشها .. يعني نتائجهم جاهزة ومستحيل يقولوا رايهم غلط ولا يعتذروا .. وبيجوا يهرجوا ليك بي نسخ ولصق في البوست بتاعك وهم شايفين روحم بزرزروا فيك وخاتينك في كورنة ونقاشاتهم تكون من نوع الكواريك بتاعة زنقو وجراهو وبيض ليه وبتاع
إذا أنا كنت زول جادي وعندي زمن خايف عليه من جنس الإهدار دة وأصلاً في الحياة العادية مستحيل أقعد اتناقش معاهم هل كدة أنا ديكتاتوري ؟
هل كوني قعدت في نادي أو محل شيشة معناها ملزم أونّس كل الرواد ديل ؟ ولو ما بعرف اتناقش مع الجميع من البروفيسور لحدي العتالي معناها سقطت في امتحان الديمقراطية ؟
وين مفهوم المسئولية الفردية وحريتي في التصرف في زمني ؟
وين حريتي الشخصية البمارسها في الحياة في اختيار محاوريني في بيوت البكيات والأعراس مثلاً ؟
هل تقبل الرأي الآخر يعني إنك تقنطر روحك في دروة والناس كلها تنشن عليك ؟
إذا أنا شايف إنه زيد من الناس دة أنا وهو مستحيل نوصل لنقطة اتفاق بسبب إنه متعصب لي رأيه وغير قابل لتقبل رأي جديد هل لازم اهدر زمني معاهو واسمعوا وارد ليه واسمح ليه بفتح حوار جانبي داخل حواري ؟

المشكلة وين لو صاحب المداخلة الممسوحة مشى فتح بوست جديد وقال فيه رأيه ؟!!

سلامات أحمد محمد عمر ..
قراءتك صحيحة .. وزى ماشايف أنى ابتدرت البوست بعبارة 'المتأمل لظاهرة الأستكة' .. لأن هذه الأداة تجعل المرء أمام نفسه فى تقبل الرأى الآخر وتحمُّل الإساءات، وذلك بتسليمه السلطة فى يده .. بدلاً عن أن يجأر دائماً بالشكوى ورمى اللوم على الآخرين بأنه يتعرّض للإساءة ــ مثلاً ــ وبالأخص على صاحب المنبر بكرى لتفعيل اللوائح لمسح مداخلة فلان أو علان لأنو نبّذنى أو خرب لى البوست أو سب الدين ووو .. أها قام بكرى أّداك الإستيكة وقال ليك هاك أمسح براك .. وهنا وضع أى زوول قدام مسئوليته وديمقراطيته الشخصية ..

لكين بالنسبة لفقرات كلامك الأخيرة .. هناك عيدروس بيقول ليك فى معنى كلامه إنو البوست بعدما تنشره يصبح ملك عام للقراء، وخطأ تمسح منه شئ ..

الاخ منير تحياتي ,,,أعتقد بكري أبوبكر وكثيرون عارفين أن الإستيكة هذهـ ستؤثر على استمرارية هذا المنبر بذات الفعالية التي عرف بها وتبوء مكانة خاصة فى قلوب الملايين لذلك أرى أن واجبنا لا تقتصر على الإشارة لسلبيات الإستيكة فهي معروفة .. فالواجب أن نبحث عن وسيلة بديلة تجعل بكري يحذف خاصية الإستيكة

تحياتي منير
وضيوفه
لم استعملها ولن استعملها
ضد الاستيكة
المنبر بدل ديالوق ببقا منلوج كما يقول الفرنسين
حتي الشتم يجب ان يظل موجودا يفضح الشاتم

Quote: البوست بعدما تنشره يصبح ملك عام للقراء، وخطأ تمسح منه شئ ..

دة كلام فيه مغالاة وتشدد
أمال عملو زر التعديل في كل اسكريبتات المنتديات لشنو !

Quote: أعتقد بكري أبوبكر وكثيرون عارفين أن الإستيكة هذهـ ستؤثر على استمرارية هذا المنبر بذات الفعالية التي عرف بها

مرحباً بالفاتح شلبى ..
لا أظن أن هذه الأداة ستنقص شعبية المنبر .. الشائعات والأكاذيب والتهريج والتطرف هو ما يفقع المرارة ، وينفِّر الناس ..

Quote: لم استعملها ولن استعملها ضد الاستيكة المنبر بدل ديالوق ببقا منلوج كما يقول الفرنسين حتي الشتم يجب ان يظل موجودا يفضح الشاتم

سلام ود ابوسن .. إنت الظاهر عليك خاتّى للشتائم سقف وتظن الناس لا يمكن تتعداهو .. :) ..
ياخوى الزوول الحانق عليك ويكون ما عنده أخلاق تردعه ممكن يقول فيك كلام ليس فى حسبانك ..
مع أنى شايف أن المسح أحياناً ليس كافياً لشفاء غليل الزول المشتوم .. وطبعاً الإستيكة ليست فقط لمسح التنابذ، بل كذلك لمنع تخريب البوستات بالإغراق وغيره ..
وعموماً كما قلت فى صدر البوست أن هذه الأداة تضع المرء أمام ديمقراطيته الشخصية ورحابة صدره.. إذن العيب ليس فى السلطة وإنما فى المتسلط وإستخدامه لها ..

شايف الأستكة فعلاً أصبحت متزايدة وهزمت الديمقراطية الفردية ـــ فالخلافات الشخصية هزمت كثير من المتشدقين بحرية التعبير .. مرات تشوف أحد المتداخليين فى أحد البوستات تقوم تخش تشوفه كتب شنو، تقوم تلقاهو مافى :) .. هو ومداخلته يكونوا إتكبُّوا فى الزبالة ..

وكثرة الحذف طبعاً يقلل من متعة عشاق الآكشن الذين يتابعون بشغف الإسترسال فى التنابذ ونبش الفضائح .. ومعروف أن بوستات الآكشن هى التى تحظى بأكثر المشاهدات وهى التى تشعلل المنبر وتتناسخ منها البوستات ..

يعني يا منير معارضوا الاستيكة هم فقط اصحاب الاستمتاع باسترسال التنابذ ونبش الفضائح؟
دا اختزال عجيب
المهم استرسال البوست بالرأى والرأى الآخر
غير كدا البوستات بتبقى مقالات لا مجال فيها للمخالفة
وحكاية انه العنده راي مخالف يفتح بيها بوست دا تشتيت
وما بالضرورة البقرا البوست ممكن يشوف البوست الفيه تفنيد ليه

مثال
في بوست عن تحليل لمقال في الايكونومست عن الوضع في السودان
بعد المداخلة الاولى توالت مداخلات تكشف الاختلاف بين المقال الاصلي والتحليل
لو اتحذفت المداخلات دي فمعناه المتابع حيفقد ويحرم من جانب من الحقيقة
لازم كل الآراء تكون قدام القارئ وهو يحكم

الأخ أحمد الشيخ .. لا تأخذ العبارات كلها على إطلاقها، ولا تختزلها حسب ماتفهمه ..
عبارتى معناها أن تدخُّل الإستيكة ينهى بعض المهاترات والمشاكل فى مهدها .. فلا يسترسل المتخاصمون فى التنابذ والتشاتم .. وأظنك توافقنى أن بوستات المشاكل يكثر مشاهدوها .. ولذلك قلت الإستيكة تقلل متعة الإستمتاع بالمشاكل للذين يستمتون بالمشاكل ..

مفهوم اخي منير
لكن ما رأيك في نقطة ان البوستات تفقد روحها عندما تصبح كل مداخلاتها على خط واحد
لاحظت أيضا ان عددا متزايدا من المعارضين اصبحوا يستخدمون الاستيكة لمجرد دخول انقاذي
هذا تناقض مريع في المبادئ
يجب ان يكون معارض الديكتاتورية مثالا وقدوة في تطبيقها
يجب السماح لكل الاعضاء بالتداخل مهما اختلفت توجهاتهم ما دامت المداخلات لا تخالف اللوائح

Quote: لاحظت أيضا ان عددا متزايدا من المعارضين اصبحوا يستخدمون الاستيكة لمجرد دخول انقاذي هذا تناقض مريع في المبادئ

ده ياهو ذاتو لب موضوع البوست يا أحمد .. وهو ديمقراطية الفرد وقدرته على احتمال الآخر .. قبل الإستيكة بكرى جاهو وجع دماغ من كثرة الشكاوى .. ولكن شوف براك مصداقية التشدق بالحرية وحرية التعبير ومحاربة الديكتاتورية .. المحصلة سقوط وزيرو كبير للجميع ..
ودى النقطة التى أشرت للتأمل فيها فى أول عبارة فى هذا البوست ..

طيب اذا كدا مفروض تدين الاستكة من جميع الاطراف
مش اذا مارسها المعارضون كانت معيارا لزيف ادعاءات واذا مارسها الكيزان اصبحوا معذورين لانهم ضحايا عنف لفظي
والا تكون بتكيل بمعيارين

Quote: طيب اذا كدا مفروض تدين الاستكة من جميع الاطراف مش اذا مارسها المعارضون كانت معيارا لزيف ادعاءات واذا مارسها الكيزان اصبحوا معذورين لانهم ضحايا عنف لفظي والا تكون بتكيل بمعيارين

إنت يا أحمد فاهم البوست واللـّ كايس ليك عنكبة ساى ؟؟.. . شنو تدين وما تدين والكلام الكبار كبار ده .. ؟؟

أفهم بعد داك أكتب ياخ ..

هسه الإنتقد معارضة المبادئ أنا واللـّ إنت فى مداخلتك الأسبق؟؟ .. إنت من قلت بتناقض المبادئ .. ما تبقى نساى أو تكون بتتكلم ساى ..

اعصابك يا منير النفس الهادي سمح وبرضو بدخل في اختبار الديمقراطية الفردية
طيب سلسل معاي
انا قلت انا ضد الاستيكة .. قلت لي لو انت متابع المنبر كان عرفت انه مؤيدي الانقاذ اتعرضوا لهجوم عنيف من المعارضين
عشان كدا اضطروا يستخدموها عشان يحموا انفسهم وبوستاتهم
قلنا نفرق بين الاساءة والاختلاف ولما قلت انا انو بعض المعارضين بستخدموا الاستيكة ودا ضد المبادئ قلت لي دا انا البتكلم عنه
فقلت ليك اذا نقد الاستيكة مفروض يكون للطرفين .. وما مبررة لاي طرف حتى بدعاوى الاضطهاد وتمثيل دور الضحية ولا بدعاوى تدنيس البوستات
دي الحتة الانا بحاول اوصلها
فكرة البوست مفهومة وهي انه الاستكة بتضع كل الدعاوى على المحك

كلامى كله بيصب فى جملتك الأخيرة وهى أن هذه الأداة تخت الزول على المحك سواءً كان حكومى أو معارض .. وحقيقة أن مؤيدى الحكومة هم أكثر الأعضاء عرضة للشتم دى ما محتاجة دليل ..
وبالنسبة ليك إنت ، ذكرت ليك لأنك معارض فإنك لا تتعرض للشتيمة ولذلك لا ترى نفسك تحتاجها .. وفى الآخر قمت جبت ملاحظتك التى أمّنت ليك عليها بأنك قلت حتى المعارضين أصبحوا يستخدموها مناقضين بذلك للمبادئ .. والظاهركونه كلامك بقى برهان على كلامى ماعجبك، كأنما أنا جريت ليك الخمسين بتاعة الكوتشينة ديك ـــ مع إنى ما بعرف اللعبة بتاعة خمسين دى ـــ فطوالى قنبت تشبكنى أدين وما أدين ... أدين شنو، وأنا طارح موضوع للتأمّل ليس إلاّ .. ؟؟

أها أهو ده (وجه باسم) عشان ما تشبكنى أعصابك وما أعصابك ..