ما تسمعوا لامريكان سودانيز، ترامب هو الريس

06:57 PM April, 27 2016

سودانيز اون لاين
أبوبكر عباس-الإمارات
مكتبتى
رابط مختصر

كخبير، ومستنير، وأمريكي جديد، كلمتي ما بتقع واطة:
ترامب هو الرئيس القادم دون أدنى شك
ما تسمعوا لي لتحليل حناكيش سودانيز الخبراء ديل، ناس دينق، بريمة، عبد الله وفنانم المخضرم الموصلي
ديل خبرا تعبانين
كلامم دا كلو ودهوا الخور
الكارثة هو الريس القادم

هناك تحالف قوي بين السود والبيض في حب ترامب
البيض كرهانين المسلمين المتشددين والسود كرهانين المكسيكيين
ترامب سوف يكتسح الحنكوشة اكتساح شديد

أتفق معكـ تماما ابوبكــر

الحكاية شكلها (حتى الآن) على الأقل ماشي في الاتجاه ده

ايه رايك يا ابوبكر نحن بنتمنى ان ترامب يكون الرئيس القادم للولايات المتحدة الامريكية وهذه هي الأسباب:- -

اولا حتكون عندنا الحجة القوية للعودة الاجبارية للوطن وبتذاكر مجانية بطائرات خاصة عشان ده كلامو وهو القال انه حيقوم بترحيل المسلمين كلهم خارج الاراضي الامريكية بطائرات خاصة.. والكلام ده حيكون يوم 21 يناير 2017م .. لأمنه حيأدي القسم كرئيس لأمريكا يوم 20 يناير 2017م..-

ثانيا : امريكا الدولة القوية حتضعف لان هذا المجنون حيحارب في اكثر من جهة واحدة ، وخاصة وان الدول الاسلامية حتعمل تحالف قوي ، والاعمى حيشيل المكسر حيجوا جارين عشان يضربوا الاهداف الامريكية بعمليات ارهابية عنيفة.. وطبعا هذه المرة الارهاب ما حيكون مصدره افراد او متطرفين او منظمات ارهابية زي داعش ولكن مصدره حيكون دول ومش دول هينة ولكن دول عندها امكانيات واسلحة كيمائية ..

-ثالثاً ان داعش جتلقى دعم قوي جدا من ناس كانوا على الحياد بل وكانوا يعارضون سياسة هذه المنظمة الارهابية.. ودولة الخلاف الاسلامية البنادوا بيها حتلقى التأييد من معظم المسلمين ..- رابعاً: دي بخليها ليك تتمها براك.. والله يديك الصحة والعافية

يا دكتور أحمد، فوز ترامب ودعمهم ليهو تشوفو في عيون الناس العاديين
ما في زول متعاطف معانا
في كراهية حقيقية
أمريكا تدعم ترامب حتى لو أدى ذلك لزوال الاحزاب

Quote: كرهانين المسلمين المتشددين

انت يا ابوبكر متشدد والا سادة؟

حاول يا أميرة يفرز في خطابو عن السياسة الخارجية، يفرز المسلمين لمتشددين وصالحين،
الخطاب اعدوهو الشفوت بطريقة ذكية تجعل من أوباما وكلينتون حملات ضعيفة لا تصلح بشيء.
الخطاب ح يزيد من اسهمو ويوصلو للبيت الابيض.
الرجل يعبر عن مشاعر الناس الحقيقية
الكلام البقولوا فيهو ناس عبدالله ودينق ما صاح
المهم حضري شنطتك ساكت

ما مقتنع انو دينق ضد الراجل دا!!
تقول شنو؟
علينا بالظاهر

المشكلة انهم ما بفرزوا يا أيمن!!

يعنى السناير ما قادرين يثبتو البرلوم الامريكي دا ؟
غايتو اذا تحليلو طلع صاح ..
عدو معاي بعد خمسة سنين من اليوم ما عندكم قعاد معاهو في امريكا دي.

ياالملك
المستنير بينقل انطباعات ماحقائق
انا قايتوا لو ساندر انسحب صوتي ضمان لترمب كيتا في بريمة

عشان بطرى يا مستنير!!

Quote: كخبير، ومستنير، وأمريكي جديد، كلمتي ما بتقع واطة: ترامب هو الرئيس القادم دون أدنى شك ما تسمعوا لي لتحليل حناكيش سودانيز الخبراء ديل، ناس دينق، بريمة، عبد الله وفنانم المخضرم الموصلي ديل خبرا تعبانين كلامم دا كلو ودهوا الخور الكارثة هو الريس القادم

ابوبكر عباس.

انت يا زول بتتفرج في ياتو اخبار؟

جميع الاستطلاعات ترجح كفة الحزب الديمقراطي في هذه الانتخابات، والجمهوريين انفسهم مقتنعين تماما بأن دونالد ترمب يعتبر كارثة بالنسبة لهم. الرجل خطف الحزب بي قروشه وجرى بشعاراته الزائفة، والشعارات التي يستعملها الأن في الأنتخابات التمهيدية لا تصلح أبد في الأنتخابات العامة. الزول ده أعطى الرئاسة للديمقراطين في طبق من ذهب.

يجب أن تعلم أن هنالك شريحة كبيرة من المستقلين، الغير ثابتين في تصويتهم (swing voters) ديل معظمهم ح يصوتو لي مرشح الحزب الديمقراطي.

Quote: هناك تحالف قوي بين السود والبيض في حب ترامب البيض كرهانين المسلمين المتشددين والسود كرهانين المكسيكيين ترامب سوف يكتسح الحنكوشة اكتساح شديد

ابوبكر عباس.

يازول انت عايش في أمريكا دي ولا امريكا تانية؟؟

هيلاري كلينتون فازت في الولايات الجنوبية بفضل الأمريكان السود.
الكتلة السوداء في الكونجرس (Black Caucus) كلها ساندت كلينتون.
لو رجعت لعدد الذين صوتو لدونالد ترمب ولهيلاري كلينتون في الأنتخابات الأولية حتى الأن سوف تجد أن عدد الذين صوتو لهيلاري كلينتون يفوق عدد الذين صوتو لترمب بفارق كبير، وهذه تعتبر اشارة واضحة للأنتخابات العامة القادمة.

غايتوا كان فاز ترامب
معناها كراعك مكوة على امريكا
يا مستنير ....

Quote: الكلام البقولوا فيهو ناس عبدالله ودينق ما صاح المهم حضري شنطتك ساكت ما مقتنع انو دينق ضد الراجل دا!! تقول شنو؟ علينا بالظاهر

ابويكر عباس.

سيبك من شنطة أميرة، أنت لومقتنع بكلامك ده كان مفروض تكون سافرت كمان.
وبرضو سيبك من كلام دينق وعبد الله، أنت ما متابع الأستطلاعات العامة ولا شنو؟
حتى أستطلاعات الجمهوريين تقف ضد دونالد ترمب.

بعدين كده وريني مداخلة واحدة أنا قلت فيها ح أصوت لي ترمب ولا لي أي زول تاني؟؟
أنا مسجل كمستقل وسوف أظل كذلك.

بعدين يا أميرة

أمريكا قوانين ودستور، والمسألة ديليس بمثل هذه السهولة التي يتحدث بها ترمب أو غيره من المترشحين.
نحن أتعودنا في فترات الأنتخابات بتقال كلام كتير ووعود كتيرة، ولكن في النهاية يوجد واقع قانوني ودستوري وسلطات مختلفة تحمي الناس والبلد من طموح السياسين ومن أفكارهم الغريبة.

مريكا قوانين ودستور، والمسألة ليست بمثل هذه السهولة التي يتحدث بها ترمب أو غيره من المترشحين.
نحن أتعودنا في فترات الأنتخابات بتقال كلام كتير ووعود كتيرة، ولكن في النهاية يوجد واقع قانوني ودستوري
وسلطات مختلفة تحمي الناس والبلد من طموح السياسين ومن أفكارهم الغريبة.(QUOTE)
>>>>>>>>>>><<<<<<<<<<<<>>>>>>>>>>>>>>>>
لكن يا دينق ما تنسى ان الرئيس الأمريكي بيتمتع بسلطات دستورية وتنفيذية وله الحق في طرح قاون جديد
والأغلبية في الكونجرس من الجمهوريين والكونجرس الامريكي هو الذي يجيز القوانين لتصبح سارية المفعول
وانت عارف ان الجمهوريين اساسا بيكرهوا الاجانب.. ولمن ترامب يبقى رئيس حينفذ اقتراحاته وهو قال بعضمة
لسانه انه اولا سيطرد المسلمين والمكسيكيين من البلد وما حيخلي اي مسلم او مكسيكي يدخل الاراضي الامريكية تاني
بل وقال انه حيبني حيطة عالية بين امريكا والمكسيك عشان المكسيكان المجرمين ما يدخلوا البلد.... وطبعا الجمهوريين
في الكونجرس اساسا منتظرين الفرصة دي بفارغ الصبر عشان يجيزوا القوانين دي باسرع فرصة...

.. تخريمة لابو بكر عباس::
انا لسع شنطتي ما جاهزة .. لكن حأستف الشنطة اول ما اتاكد ان المجنون ده حيفوز....
واحتمال قبل كده... لاني شايفة الايامات دي بوادر اضواء الديمقراطية بدأت تظهر في السودان.. عشان العودة تكون نهائية...
والله يديكم الصحة والعافية

يا ملك، ما تسمع بي كلام محجوب دا!!
هو برضو محلل أمريكي حنكوش
شً
وف، أنا بحضر الأخبار وبدعمها بالونسة مع الناس وبرمي ليهم الكلام براحة وبعاين ليهم في عيونم
حتى مذيعات الس ان ان معجبات بيهو اعجاب شديد
شفتا الكلام دا في عيونن!
تذكر يا ملك نشرة يونس محمود البعد الساعة تلاتة ديك؟
الناس كلها كانت بتتابعها بلهف شديد
مختلفين معاهو ظاهريا، لكنو بعبر عن احلامم القمعها الزمن
يا أخي، قالوا السعوديين كانوا بدخلوا بالرادي الحمام!
الزول دا يا ملك، بدغدغ حاجات الناس رافضاها ظاهريا، لكن جواهم دايرنّها!
مثلا: حرية التدين للمسلمين
الموضوع دا وصل طريق مسدود
لا يوجد امريكي واحد ممكن يكون مع حرية وجود الاسلام بأمريكا
يقوم يجي #################### زي دا يقول ليهم الكلام دا عديل ويكون برنامج للرياسة؟؟
الزول دا أطلق كرة التلج وانظر ردود الفعل
ردود الفعل متواضعة قياسا لخطورة ما يقول!!

وداعا لقيم ما بعد الحرب العالمية التانية

الكلمة الأخفاها السيستم هي الصعل وك
عشان بالكم ما يمشي بعيد وتقول: المستنير بقى يسب الناس

Quote: كخبير، ومستنير، وأمريكي جديد، كلمتي ما بتقع واطة

صديقي المستنير

أنا يخيل لي الإستنارة الأمريكية مختلفة من الإستنارة الشرق اوسطية

ما حأقول ليك أدعمنا بأرقام لكن على الأقل فيديو ياخ

ما معقولة جايي مطلق يديك كدا و داير تتكلم عن الإنتخابات الأمريكية

نبؤات سااااي كدا بس؟

جنكم نبؤات إنتو يا ناس الشرق الأوسط

Quote: لكن يا دينق ما تنسى ان الرئيس الأمريكي بيتمتع بسلطات دستورية وتنفيذية وله الحق في طرح قاون جديد والأغلبية في الكونجرس من الجمهوريين والكونجرس الامريكي هو الذي يجيز القوانين لتصبح سارية المفعول وانت عارف ان الجمهوريين اساسا بيكرهوا الاجانب.. ولمن ترامب يبقى رئيس حينفذ اقتراحاته وهو قال بعضمة لسانه انه اولا سيطرد المسلمين والمكسيكيين من البلد وما حيخلي اي مسلم او مكسيكي يدخل الاراضي الامريكية تاني بل وقال انه حيبني حيطة عالية بين امريكا والمكسيك عشان المكسيكان المجرمين ما يدخلوا البلد.... وطبعا الجمهوريين في الكونجرس اساسا منتظرين الفرصة دي بفارغ الصبر عشان يجيزوا القوانين دي باسرع فرصة...

أميرة السيد. الرئيس الأمريكي لا يملك صلاحيات دستورية، صلاحياته فقط في السلطة التنفيذية. والقرارت التي يتخذها هي عبارة عن قرارات تنفيذية(Executive Order) بمعنى أخر، أن الرئيس قد يحق له أن يصدر قرار بمنع فئة معينة من الناس من الدخول الى الولايات المتحدة مثلا، ولكنه لا يستطيع أن يفرض مثل هذه الأوامر التنفيذية على المواطن الأمريكي، أو على الناس الذين يعيشون في أمريكا ،لأنهم محميين باالدستور الأمريكي.

أما قصة الجمهوريين يكرهون الأجانب فذلك غير صحيح. ما تشوفي الجوطة والهيلامنة دي، الجمهوريين هم أكتر الناس المستفيدين من العمالة الغير شرعية الأجنبية، والمساعي بتاعت أعطاء المهاجرين الغير شرعيين وجود شرعي في أمريكا ، ومعارضة الأغنياء (الجمهوريين) لذلك، لأن هولاء الغير شرعيين يعملون في مزراعهم ومصانعهم بأجور زهيدة جدا ولا حقوق وأمتيازات لهم، وفي حالة حصول هولاء العمال على الوضع الشرعي والقانوني ، فأنهم لن يعملون بتلك الأجور الزهيدة مرة أخرى، بل سيطالبون بحقوقهم وأمتيازاتهم كاملة أسوة بالمواطنين الأمريكان. يجب أن لا تنخدعوا للتصريحات الاعلامية المضللة. دي الغرض منها خداع بعض الفقراء من الأمريكان الذين يعتقدون أن سبب فقرهم هو الأجانب، وليس الحكومة الأمريكية، وهكذا يخدعونهم.

Don't worry ya Bakor

.Trump will never be president

مافي زول ممكن يبقى رئيس بدون ما يكسب اصوات النساء و المهاجرين. و ترمب رصيده ضعيف شديد وسط الفئتين ديل. ما ممكن تهاجم المكسيين فى حين انو اللغة الاسبانية و المتحدثيين بها ماشى تزيد رقعتها كل يوم.

Quote: لكن يا دينق ما تنسى ان الرئيس الأمريكي بيتمتع بسلطات دستورية وتنفيذية وله الحق في طرح قاون جديد والأغلبية في الكونجرس من الجمهوريين والكونجرس الامريكي هو الذي يجيز القوانين لتصبح سارية المفعولوانت عارف ان الجمهوريين اساسا بيكرهوا الاجانب.. ولمن ترامب يبقى رئيس حينفذ اقتراحاته وهو قال بعضمة لسانه انه اولا سيطرد المسلمين والمكسيكيين من البلد وما حيخلي اي مسلم او مكسيكي يدخل الاراضي الامريكية تاني بل وقال انه حيبني حيطة عالية بين امريكا والمكسيك عشان المكسيكان المجرمين ما يدخلوا البلد.... وطبعا الجمهوريين في الكونجرس اساسا منتظرين الفرصة دي بفارغ الصبر عشان يجيزوا القوانين دي باسرع فرصة..... تخريمة لابو بكر عباس::انا لسع شنطتي ما جاهزة .. لكن حأستف الشنطة اول ما اتاكد ان المجنون ده حيفوز....واحتمال قبل كده... لاني شايفة الايامات دي بوادر اضواء الديمقراطية بدأت تظهر في السودان.. عشان العودة تكون نهائية...والله يديكم الصحة والعافية

على فكره
يا ابوبكر
أي واحد فينا ناس قريعتي راحت ديل
لو اترشح في النهاية ضد ترمب بيفوز عليهو خليك من ست هيلاري الجدعة
هسع فايتاهو في الاصوات في الانتخابات الاولية بي اكثر من 2 مليون صوت
فما بالك ببعدين
أميرتنا اطمني حرم
مابتمرقي سنتمتر واحد من بلدنا دي
كمان البرالمة بقو يغلبو الجلاكين آخر الزمن يا ابوبكر؟؟؟؟ ههههه
تحياتي وارقدو عافيه

غايتو ترمب بقى للجمهوريين شوكة حوت لا بتنبلع لا راضية تفوت

الجمهوريين بنو القبة بس ما لقو الفكي ههههههه ياخ معقولة معقووووولة امريكا بعظمتها دي كلها يقودها زول جهلول مثل هذا الترمب

انا غايتو منتظر مناظراته مع هيلاري عشان تمسح ليك بيهو وبحزبه الارض..... زولة نجيضة جهجت اوباما زاتو زمان وخبرة وخيت ههههه

لا اعلم الغيب ولكن لدرجة اشبه باليقين بان هيلاري هي الرئيس القادم للولايات المتحدة وبتوليها الرئاسة في زول اسمه راش ليمبو عندو توك شو

في الراديو وواحد تاني اسمه شون هانتي ديل احتمال يجيهم شلل اهتزازي عديل. غايتو انا العبد الفقير لله اخدت لي معاها صورة لما جاتنا في ايوا

في حملتها الانتخابية .... حا اقشر بالصورة دي فترة كدا مش بطالة ....... واحد صاحبنا الله يطراهو بالخير قال لي صورتك مع هيلاري دي مشروع تراجي مصغر ههههههههههههههههههههههههه

غايتو

Quote: ياالملك المستنير بينقل انطباعات ماحقائق انا قايتوا لو ساندر انسحب صوتي ضمان لترمب كيتا في بريمة

والله يا محجوب .. أنت والمستنير لذيذين ..

أنا تنبأت بأكثر من ثلاثة رؤساء .. من زمن بيل كلينتون ..
الشعب الأمريكي من المستحيل يخطأ .. فى أختار رئيس المرحلة .. أنا قلت أن هيلاري كأمرأة لا تحمل أي جديد .. ولكنها كسياسية تحمل الكثير ..

حتى هذه اللحظة قراءتى لم تكتمل .. وكل من يقل وجد الأجابة عندي له ثلاثة أسئلة ..
الأولي ما هو الحلم الأمريكي الذي يشكل المرحلة؟ .. ماهى المهددات التى تواجهها أمريكا .. هل هى مهددات داخلية أم خارجية؟ ما هو المنعطف التأريخي الذي تحاول أمريكا تجاوزه ..؟

خلونى نرفع البوست بتاعي وبجييكم راجع ..


بريمة

Quote: جنكم نبؤات إنتو يا ناس الشرق الأوسط

اوسكار ياحافظ
بعدين المستنير ماحدد مخاوفوا
اهي علي الاسلام ام المسلمين
مسلمين امركان ولا مسلمي العالم الاسلامي

هنا مداخلتى ..

Quote: واحدة من أهم أسباب الفوز .. تتمثل فى فهم: المنعطف التأريخي الذي تمر به أمريكا .. وقابلية الأنتخاب .. وبعث الحلم الأمريكي. تعريف هذه الثلاثة أجندات .. يتغير ظريفاً نتيجة للظروف المحيطة بأمريكا خارجياً وداخلياً .. مثلاً الرئيس أوباما أنتخبته أمريكا لأنه يمثل منعطف تأريخي .. كان الهدف تجاوز تأريخ الرق والعنصرية وتأريخ أمريكا تجاه الأقليات .. إنتخابات بيل كلنتون كان بسبب تحقيق الحلم الأمريكي بدولة الرفاهية .. أنتخاب جورج بوش الأب وجورج بوش الأبن كان بسبب مواجهة المخاطر التى تهدد أمريكا .. حتى كتابة هذه السطور لم يستطع أي من المرشحين أو المفكرين أو السياسين الأمريكين تحديد بوتقة المنعطف الـتأريخي أو إعادة بعث الحلم الأمريكي .. حتى هذه اللحظة برزت شخصيتين المرشيح الديمقراطي بيرنى ساندرس .. الذي يحاول سياقة الحلم الأمريكي فى تعليم جامعى مجانى .. وتأمين صحي مجانى لكل الشعب الأمريكي .. ودا حلم حقيقي بالنسبة للشباب والأقليات .. المرشح الأخر هو ماركو روبيو، السيناتور الأسبانى الشاب ذو الأصول الكوبية .. وهو خاطب مشاعر الكثيرين بالحلم الأمريكي الذي يمثله فى شخصه كأبن مهاجر ومهاجرة عمال بارات ربوه وأخوته الأربعة ليصير سيناتور ويطلع أعظم وظفية فى أمريكا .. هيلاري تمتلك قابلية الأنتخاب .. لكنها لا تمثل الحلم الأمريكي .. بأعتبار أن ا لمرأة الأمريكية تجد القبول وتحققت تطلعاتها فى مساواتها مع الرجل فى الأنتخاب والتوظيف .. ولم يمثل أنتخاب أمرأة أي حلم لأمريكا. من كل ذلك أقرأ أن علي هيلاري إعادة بعث شخصيتها .. أو إعادة إكتشاف ما تمثله للحلم الأمريكي ..

وجاييكم تانى بشرح أوفي ..

بريمة

Quote: الأشياء الثلاثة التى ذكرتها .. الحلم الأمريكي، المنعطف التأريخي وقابلية الأنتخاب .. هذه النقاط الثلاثة ممكن تشمل أي شيئ وكما ذكرت إنها يصعب التنبوء بها .. نمسك مثلاً قابلية الأنتخاب من السهولة بمكان ممكن تقرأ قابلية الأنتخاب بأنها مقدرات الشخص الخطابية، مقدرته للتفاعل مع الشعب وجاذبيته والكارزما التى يتمع بها .. كل هذه حقائق .. لكن أنظر الظرف التأريخي، فلو تمر أمريكا بتحديات خارجية فإن مواصفات القيادة تتغير لدي الشعب الأمريكى من إن كانت أمريكا تمر بتحديات داخلية .. يعزي الكثيرون أن سبب التقارب الشديد بين هيلاري وبيرنى ساندرس يعود إلي أن الشعب الأمريكي مازال منقسماً حول أيهما أهم التحديات الخارجية أم الداخلية .. فإن ثبت أهمية التحديات الخارجية فإن هيلاري سوف تفوز علي ساندرس .. والعكس صحيح .. فمثلاً لو فازت هيلاري علي ساندرس بالأجندة الخارجية سوف تكون المعركة بينها وصقور الحزب الجمهوري .. وهنا تظهر قصة حمائم الديمقراطين فى السياسة الناعمة مقابل أمثال دونالد ترامب وتيد كروز الذان يتوعدان يحرق الأرض تحت أقدام داعش .. الشعب الأمريكى منقسم بصورة شبه فطرية حول قضايا عدة .. مثلاً حق الحياة، هناك من يرون أن المرأة يجب أن يكن لها الحق المطلق فى جسدها .. وممارسة الأجهاض تكن جزء من حقها فى جسدها .. وهؤلاء يسمون بال Pro choice وهم الديمقراطين .. فى حين الجانب الأخر يري حق الحياة فى حياة الجنين ويعارضون الأجهاض ويعتبرون الجنين إنسان يحس ويتألم مثله مثل الشخص المولود .. فالحياة منذ أن دبت فى جسده فهو إنسان حي .. ولا يمكن أخذ حياته إلا بقوانين أخذ الحياة .. أنظر إلي حرية حمل السلاح التى أقرها المشرع بسب أن الأوضاع الأمنية فى أمريكا حين تأسيسها أوضاع خطرة ويمكن لأي فرد حمل السلاح والدفاع عن نفسه .. والدفاع عن النفس شيئ مقدس بالنسبة للشعب الأمريكى .. فى الجانب الأخر يري أصحاب تقييد حمل السلاح بأن أكثر الموت الذي يتعرض له الشعب الأمريكي بسبب السلاح .. فإنت لا خيار لك غير تكون في إحد المعسكرين مع أو ضد حمل السلاح .. أنت مع عقوبة الموت أو ضدها، مع النقابات أو ضدها .. وهكذا هناك سلسة طويلة من المتضادات .. علماً أن كل من هذه الخيارات لها لوبي قوي وله عضوية مسجلة .. يمكن كسبها أو خسرانها ... بريمة

للعلم السيناتور الشاب ماركو روبيو خرج من الأنتخابات نسبة لقلة خبرته السياسية.

بريمة

بالله، يا منصور، ترامب بيطري؟!
وأنا أقرل الصراحة جابها من وين؟
بعدين لو سخنت بقول ليهم: أنا مسلم لكن بيطري

يا دينق، كدي شوف الأيام دي السي ان ان بتسوي في شنو؟
تفتكر برنامج عهد التمانينات بتاع ريغان البعيدو فيهو دا صدفة ساكت؟
حايم الايام دي واشنطن استات لقيت لي لوحة اعلان كبير في نص حقل برسيم في خلا صر، مكتوب فوقها:
ترامب سيعيد أمريكا عظيمة
وقفت عربيتي وقلت الواحد حقو يتصور معاها سلفي.

يا أخي، أنا ما قلت اتا قلت ح تصوت لمنو؟
قلت شاكي انك ح تصوت لترامب

Quote: غايتوا كان فاز ترامب معناها كراعك مكوة على امريكا يا مستنير ....

يا محمد عبد الله،
تصدق لو فاز، ما كعب معانا؟؟
نتعبو ليك تعب شديد
مظاهرات واعتصامات
وهاك يا حقوق أقليات
وفي نفس الوقت نحاول ندجن الدين شويّة

كلام صاح يا مولانا حافظ
دي فعلا نبوة
أو ممكن تقول عليها ما وراء السياسة
Parapolitics
الأدوات المتعارف عليها يا حافظ لا تصلح في هذه الحالة
دي حالة جديدة يقرأها الراسخون في العلم فقط

خليك حافظ يا حافظ:
ح يكتسحها اكتساح
الكلام بتاع الكتلة السوداء و الكتلة الحمراء بتاع ناس دينق دا كلام ساكت

هوي يا أبوبكر صالح، القال ليك منو انو النسوان زعلانات منو؟
نسوان امريكا ما عندهن حساسية نسوان أوربا؟؟
موضوع الاجهاض والمثلية دي حاجات هامشية جدا
والله، بحبنوا ليك حب!
المكاسيك والمسلمين ما ممكن يسقطوا ليهم ريس
ترامب الكارثة هو الريس القادم

وبعدين شوف الخير الحنكوش التاني دا، قال مستني المناظرة مع هيلاري!!
يا أخي، دا زول ما عندو احساس، ما ممكن زول يهزمو في حوار
وبعدين حملتها السابقة كان مصرفها
الزول البعضر ليك بتقدر تشاكلو؟

فايتو يا موصلي، زي ما قال ليكم المولانا الحقيقي الملك: لو ترامب فاز، الأربعة سنوات الجايات ديل، إلا تشوفوا ليكم حتّة تقبلوا عليها!!
لأنو لو فتحت ليك بوست عن تحليل موسيقى عصافير الخريف
ح أجي أقول ليك: أوعة يكون تحليلك دا لاحق تحاليلك السياسية؟!

Quote: بالله، يا منصور، ترامب بيطري؟!

دونالد ترمب درس إدارة اعمال في جامعة بنسلفينيا

Quote: للعلم السيناتور الشاب ماركو روبيو خرج من الأنتخابات نسبة لقلة خبرته السياسية. بريمة

العبار بريمة بلل.

عن أي "خبرة سياسية" تتحدث؟

وهل دونالد ترمب لديه هذه الخبرة؟

الموضوع هو طرح برنامج وتقديمه للجماهير، والجماهير هي التي تحدد الشخص الذي يعجبها، وذلك طبعا بغض النظر عن الخبرة السياسية.

يعني مثلا عندك الحاكم السابق لولاية فلوريدا جب بوش.

بالنسبة للمؤسسة الحزبية هو أفضل شخص، ولكن جماهير الحزب الجمهوري لم تقتنع به.

Quote: ياالملك المستنير بينقل انطباعات ماحقائق انا قايتوا لو ساندر انسحب صوتي ضمان لترمب كيتا في بريمة

أخونا العزيز أبو بكر عباس

يا حبيب أسمع كلام أخونا محجوب دا .
ترامب مافى ليهو طريقه للفوز إلا يرفع الرايه البيضاء للحزب الجمهورى ويلتزم بالكامل
لتوجهات وسياسات الحزب أو يختار المواصله بمفرده مستقلاً .
من ناحيه أخرى , صاحبنا الرجل الطيب , ساندرز إذا دفعته مواقف الحزب الديمقراطى
لإتخاذ نفس القرار للمواصله مستقلاً سيكون الفوز حليفه لا محاله .
يا حبيب
لا فوز لترامب بدون مؤازره وتأييد من الحزب الجمهورى
ولا فوز لهلرى إذا لم تنسق بتوافق مع ساندرز .

السؤال يا مولانا عبد الله، لو فاز وحقق الرقم المطلوب للفوز بترشيح الحزب، ماذا سيفعل الحزب؟
هل سيقبلون به ويصوتون لهلاري؟
ورطة ضكرة!

بعد دخولك للبوست انت والمحلل الكبير بريمة، فاضل لي من الخبرا المعز ابونورة
ويكونوا ناس المنتدى شاهدين على الهزيمة الثقيلة من المستنير

حقق المتسابق رونالد ترامب فوزا كاسحا على منافسيه بولاية انديانا لنيل ترشيح الحزب الجمهوري.
أكرر فوزا كاسحا

افرح ياعم ترمب قال بعد دا حماية مجانا مافي
وحيفرض الجزية علي السعودية ودول الخليج
واليابان وكوريا الجنوبية ، بعد دا تقعد علي شاطي
مارتل بيتش وكل ماتشوف طائرات في الجو تقول ليها
اهبطي اين ماشئت فسياتني خراجك

يعني يا حجو جبتا ليك رخية شوية؟!
وبديت تقتنع أنو ريس ريس

يابكة دي نبؤتك ، انا ماعندي بيها شغلة
انا بتعامل مع تداعيات النبؤة ، بعدين الشفقة في شنو
دا البرايمري ، خلي نبؤتك مطاطية ولها ماورااها
يعني بعد الدفنة في بحار من خمر وعسل

بعد الهزيمة الساحقة، إنسحب تيد كروز المنافس الرئيسي لترامب، وبذلك يصبح ترامب المرشح المفترض للحزب الجمهوري.

كروس انسحب من السباق
ونبؤة المستنير هي جحيم الحزب الجمهوري

المستنير ول أبا أبوبكر
سلام ..

Quote: بعد دخولك للبوست انت والمحلل الكبير بريمة، فاضل لي من الخبرا المعز ابونورة ويكونوا ناس المنتدى شاهدين على الهزيمة الثقيلة من المستنير

بريمة لم يقل شيئ حتى هذه اللحظة .. منذ عام 1990م .. أنتخابات كلنتون الأولي .. والله لم أحتار كما أنا الأن ..

تمرد رهيب علي قيم ومبادئ السياسة الأمريكية .. بيرنى ساندرس إشتراكي عدييل .. فى التسعينات لو كان شبهة ساكت أثيرت حو ل المرشح
بأنه إشتراكي كان ينسحب فوراً من الأنتخابات .. أما الأن الأشتراكية صارت مقبولة لدرجة منافسها ينافس أكبر آلة إقتصادية رسمالية .. وول أستريت ..
التى تدعم بيديها وكريعها هيلاري كلينتون ..

ترامب .. متمرد علي كل القيم الأمريكية .. بما فيها قيم السياسة الأمريكية الرفيعة .. التى أذهلت العالم أجمع من قبل فى أنتخابات مثل إنتخاب رونالد ريغان،
بيل كلينتون، بوراك أوباما .. أنتخابات تميزت بالموضوعية .. والحصافة السياسية وقوة الخطاب .. دونالد ترامب مهاتر بصورة فظيعة .. ومازال يتقدم ..

ما يمكننى الأقتناع به من ناحية ترامب .. أن الديناميكية الأنتخابية فى جانبه .. يمتلك ترامب Momentum رهيبة .. لدرجة تحييد أي خطاب مناوئ له ..
علماً أن ترامب ليس له خطاب أصلاً .. ولم يقدم أي رؤية .. غير أنه يراهن علي تجربته الشخصية كرسمالي وثري ناجح وسوف ينجح فى إدارة أمريكا كما يدير أموال.

الأقتراعات التى ظهرت مراراً .. وهى أن هيلاري سوف تفوز علي ترامب بفارق 16 نقطة .. وأن بيرنى سنادرس سوف يفوز علي ترامب ب 22 نقطة.

بريمة

تاريخ يتشكل فى جميع الأتجاهات صعوداً وهبوطاً ..

سقوط تيد كروز أعده أهم حدث فى الأنتخابات الرئاسية حتى اللحظة .. أهمية تيد كروز تأتى من عدة وجوه .. أنه يمثل اليمين الأمريكي ..
وهو نسخة طبق الأصل من الأصولية الأسلامية المتزمته .. فهو يتحدث عن معارك فاصلة للبشرية مثل معارك "هيرمجدون" التى يقضي فيها المسيحيون علي أصحاب الديانات الأخري وينزل بعدها المسيح ليملأ الأرض عدلاً بعد أن ملئت جوراً .. أنا تنفست الصعداء بخروج تيد كروز ..



بريمة

علي بالحرام ده أجمل بوست يمكن الرجوع إليه بعد ظهور نتيجة الإنتخابات
إن فاز ترامب .. حاننصب المستنير بكري كافضل خبير في الشؤون الأمريكية في المنبر
-
أنا مع رأي الاصدقاء دينق وعبد الله وبريمة ... ترامب يشمها قدحة

أمريكان أونلاين

ازييييكم كووووووولكم

اها ترامب وصل .........!!

لكم ودّى

Quote: ترامب يشمها قدحة

أنا غايتو بتفق مع تحليل المستنير ....

والناس الهبشه رأس السوط......

حا يتجهجهوا إذا فاز هذا الترمب....

وترامب واضح في نهجه ....

ويعبر عما في دواخل الأغلبية هناك.....

والحرية والديمقراطية والذي منه مجرد دعاية إستهلاكية للعالم الخارجي....

يعني وهمه ساكت....

طيب يا جماعة رايكم شنو لو عملنا نتيجة الانتخابات الامريكية مقروءة مع توجهات ترامب وكلنتون

كمقياس لمدى اتساق الشعب الأمريكي مع شعاراته من حرية وديمقراطية ورفض العنصرية .. الخ

يعني اذا فاز ترامب حا يكون الشعب الأمريكي كما قال المستنير واحمدونا يضمر العداء للمسلمين والمهاجري

فيكون بذلك شعب عنصري وكل تلك الشعارات مجرد شعارات

اما اذا فازت كلينتون وهو المرجح من وجهة نظري سيكون الشعب الأمريكي شعب يتسق تماماً مع شعاراته

ويحترم حقوق الانسان وحريته.



الموافق يرفع ايدو

هثيم غالي،
سلام ..

Quote: طيب يا جماعة رايكم شنو لو عملنا نتيجة الانتخابات الامريكية مقروءة مع توجهات ترامب وكلنتون كمقياس لمدى اتساق الشعب الأمريكي مع شعاراته من حرية وديمقراطية ورفض العنصرية .. الخ يعني اذا فاز ترامب حا يكون الشعب الأمريكي كما قال المستنير واحمدونا يضمر العداء للمسلمين والمهاجري فيكون بذلك شعب عنصري وكل تلك الشعارات مجرد شعارات اما اذا فازت كلينتون وهو المرجح من وجهة نظري سيكون الشعب الأمريكي شعب يتسق تماماً مع شعاراته

هذه أسوء دورة إنتخابية تمر علي أمريكا منذ التسعينات .. هناك سبيبن لهذا المظهر غير المشرف للجمهوريين تحديداً .. مهاترات وصلت مرحلة الشخصنة المذلة ..
وصل ترامب إلي القول عن خصمه السيناتور ماركو روبيو بأنه يتصبب عرقاً فى المناظرة وأنه يظن أنه قد أصاب ملابسه الداخلية بالبلل .. He wets his pant

طوالي حياتى لم أسمع بهذه اللغة من قبل إلا مرة واحدة .. فى أنتخابات يونانية بين زغيم الكتلة التأريخية أندرياس بابندريوس والسياسي الأشتراكي .. وإيفانس منافسه .. يمثل إيفانس شخصية مثل ترامب .. يسيئ يمين وشمال لكل من ينتقده .. وفي نهاية المطاف أنتصر بابندريوس ..

وأمسكوا الخشب لو جا ترامب أقصد موسولينى الغرب .. إحد الذين دعي أتباعه للتصويت لترامب .. هو دكتور ديفيد ديوك الذي يعتبر رئيس منظمة الكوكلكس كلان .. العنصريين البيض .. وترامب يذل المرأة وقدم إهانة صارخه وأمام كميرات كل المديا للصحافية والأذاعية الشهيرة ميغن .. حيث قال عنها أنه يريد أن يراها باركة علي ركبتيها .. وهذا توصيف جنسي مخل وهو وضع جنسي يسميه الأمريكان تأدباً Doggy style .. علي طريقة الكـلاب .. هكذا وصلت أمريكا إلي الدرك الأسفل فى
فى شأن الأسفاف .. وقائد كل ذلك هو ترامب ..

وبجييكم راجع بعد الدوام ...

بريمة

الشق الثانى .. البيض فى أمريكا يرون أنهم قد أستهونت بهم الأقليات لدرجة إنتخاب رجل أسود يسودهم .. ويرون أنهم يفقدون السيطرة علي زمام الأمور والمبادرة .. وهذا هو السبب أن ترامب أغلب من يودون أنتخابه من الطبقي الدنيا فى التعليم .. تعليم تحت الجامعي .. وكذلك العنصرين والمليشيات ..

وتذهب بيوتات السياسة الأمريكية، فى حال إنتخاب ترامب سوف تتراجع شعبية أمريكا فى العالم .. وينحسر دور أمريكا فى دعم الديمقراطية وحقوق الأنسان ..
والأنسحاب من الأحلاف مثل حلف الناتو .. والتنازل عن الشراكات التجارية والأقتصادية مع الدول مثل السعودية ودول أفريقيا ... ومنظمات مثل نافتا وكافتا وغيرهاا.

المستنير ول أبا أبوبكر لا يهمه شيئ .. فهو جديد علي البلد .. لكن الشاف ترامب رجعه بشنطته قبل ما ينفض غبار ملابسه يكون صادق ..

بريمة

Quote: وأمسكوا الخشب لو جا ترامب أقصد موسولينى الغرب ..

أخ / بريمه -- تحياتي...

يا أخي ما تقنعوا أنفسكم بأوهام ....

ترامب رجل متسق مع برنامجه وأفكاره ....

ويتقدم في الإنتخابات التمهيدية..

وفارض نفسه --- وبجمهوره...

ترامب لم يقل ما يرد خلف الكواليس....

واللوبي الصهيوني ساكت .....

والسكوت علامات الرضى.....

الآن المجازر اليومية في سوريا فاقت التصور...

والديمقراطيين يحملون المسؤولية للضحية ...

ويتحاورن مع الجلاد...

سلام للشباب،
بعد تنصيبي خبير في الشؤون الأمريكية، مستعد للإجابة عن أي سؤال، وأوعدكم أجاوب دون تجميل أو رتوش.
بجيب ليكم الإجابة من عيون الناس.
المثقفين وبتاعين التنظير محتارين ليك حيرة شديدة مع محن الديمقراطية ونتائجها!!
حقو يا بريمة، تماشيا مع اللغة المتواضعة الشغالة اليومين ديل، نقول ليك عن هيلاري:
تلقاها بت أم ظق ...... من ترامب!

البني آدم دا يا أحمدونا، واحد، أول ما مصالحو تتضرر، طوالي بطلع كروت الجاهلية.
مشتاقين يا حيدر، يا مدير الأعمال
بالمناسبة، حيدر الزين السلفي وين؟

Quote: امركان اون لاين

شكرا يا صبري، مشاركتكم هموم انتخاباتنا بالرغم من انشغالكم (سودانيزاونلاين) بثورتكم!

احتمال يا ابوبكر كلامك يكون صحي لان اخبار الصحف الامريكية الصادرة صباح اليوم
الاربعاء الموافق 4 مايو 2016م تقول ان منافس ترامب الرئيسي واسمه تيد كروز انسحب
من السباق واصبح ترامب المرشح الوحيد للحزب الجمهوري ، وان هذا الحزب ليس له خيار
الآن غير ان يرشح ترامب ليكون المرشح الذي سيقف امام هيلاري كلينتون او ساندرز في
الحزب الديمقراطي...
وترامب بيقول ان الحزب اذا رشحه وتوحد الخزب خلفه فانه سيهزم هيلاري كلينتون بسهولة..
.. واذا حدث هذا الأمر .. فشنطتنا حاهزة مستفة ، وحنسافر مجان للسودان لان ترامب وعد بانه حيرحل
المسلمين العرب والمكسيكان الى بلادهم بطائرات خاصة وعلى حساب الحكومة الامريكية...
والله يديك الصحة والعافية

هووووي عييييييك الزول أصبح مرشح الحزب ...
ويييييايي ويياي .. الخراب جانا ..

بعد أنسحاب تيد كروز بالأمس .. اليوم أنسحب المرشح الأخر جون كيسيك .. أصلاً هو تمومة خير ساكت .. الأن ووووووووك ووووك ترامب الوحيد فى ساحة الحزب الجمهوري .. والأستاذة أميرة يانا مجهزين شنطنا للسفر ..

المستنير، ول أبا أبوبكر

Quote: حقو يا بريمة، تماشيا مع اللغة المتواضعة الشغالة اليومين ديل، نقول ليك عن هيلاري: تلقاها بت أم ظق ...... من ترامب!

.. خليك من بت أم ظق! ..

ترامب أجتمع مع زول أسمه بابي نايت .. وتحدثوا عن قنبلة نووية أو ذرية .. سوف يتم ضربها الخليج أو الجزيرة العربية بها فى حال هناك أعتداء علي أمريكا من قبل العرب ..

بريمة

بعدين يا بريمة قول للناس العندهم جنسيات امريكية من المسلمين من كافة الاجناس ومن العرب بوجه خاص ومن المكسيكان
يكنوا مستعدين ايضا للسفر لأن ترامب لمن عرف نفسه خلاص حيفوز غير اللهجة بتاعته وقال انه سيرحل الكل وحتى العندهم
جنسيات امريكية وما مولودين داخل الاراضي الامريكية .... يعني اولادكم الولدتوهم هنا معصومين من الترحيل القسري، كما
وصفه هو، اما انتم فخلوا شنطكم جاهزة يوم 21 يناير 2017م..
والله يديك الصحة والعافية

في أمريكا لا يفوز أي رئيس ضد إرادة المؤسسة فاذا اذعن ترمب لإرادة الحزب الجمهوري ووافق على تعيين نائب متفق عليه من قبلهم لا يوجد ما يمنعه من الفوز فكراهية ميدل أمريكا لكلينتون أقوى من كراهيتهم لترمب الدخيل سيغير ترمب خطابه بعد ان حقق له ما يريد انجح وسيلة لكسب الأصوات هي خطاب الكراهية أقول هذا رغم تصويتي دائماً للديمقراطيين وان فاز ترمب لن ينفذ شيئ من كلامه فهو للإستهلاك وكسب الأصوات

باالله يا زينب الزول ده من قبل اكثر من 30 سنة عاوز يبقى رئيس..!!!
اذا كده عنده حق يكون رئيس لأنه لا يعرف اليأس ابدا....واذا كنت عندي حق التصويت
كنت اديته صوتي .. لانه زول زي ده بيعلمنا الإصرار على النجاح وان الفشل مرة ومرتين
وثلاثة ليس نهاية الدنيا...
بس المصيبة بعدما نديه صوتنا ويفوز يقوم يطردنا..
والله يديك الصحة والعافية

اميره الاميره تحياتى
والله كنت ناويه افتح بوست واعنونه بى اسمك بخصوص دونالد ترامب
لكن لانى كسلانه وفتح البوست يحتاج متابعه وردود وزمنى ما بسمح قلت
يكون فى بوست المستنير احسن

بس يا اميره ادى نفسك فرصه واستمعى لى كلام لويس فرخان المسلم
وتحيلاته عن كلام دونالد ترمب بخصوص تصريحاته عن المسلميين والمهاجريين
ممكن تغيرى وجه نظرك.. انا غايتو صوتى لى دونالد ترامب لانوا الراجل دا هو
التغيير الحقيقى فى سياسه امريكا التى كانت محتكرها المؤسسه الحزبيه سواء كانوا
جمهوريين او ديموقراط

يا اميره لو عايزه تعرفى كيفيه ادارة السياسه فى امريكا
استمعى لى هذا الفديو وشوفى المحلليين الجد بقول شنوعن السستم

أنا سايق ليفت في لوس أنجلس
كل ما يركب معاي زبون بسأله
هل أنت مستعد لترمب رئيسا
لحدي هسع
وم اكثر من مية سؤال
أثنين من البيض مؤيدين لترمب
الباقيين طولوا يقولوا ليك
Hell no
دي قريبة ل يشمها قدحة
الغريبة إنو كتيرين جدا ما بحبوا هلري
وكانوا يتمنون فوز ساندرز
الرأي الغالب أن الخيار بين شرين
أهونهما هلري


فيا سيد
حزب المحافظين دا كان إنتخب ترمب
معناها أطلق رصاصة الرحمة علي نفسه

أها أمسكوا، ثلاته من سودانيز ح يصوتوا لترامب
أنا وزينب وأكيد دينق

الموضوع بقى واضح يا زنوبة
أمريكا عاوزة ترامب

شكرا زينب على هذا الفيديو ... فيديو كيفية إدارة السياسة في امريكا.... وفي الحقيقة فيديو متعة وفيديو روعة..... اما فيديو زعيم جماعة امة الاسلام فرخان، فأظن انا اكون فهمت الزول ده غلط.... لاني فهمت بانه بيؤيد ترامب يمنع المسلمين من دخول امريكا لأن السماح بدخولهم بيعني ان امريكا طبظت عينها بيدها. ولذا نرجو من خبراء الترجمة يترجموا لينا كلام زعيم امة الاسلام وبالحرف وهو الذي أكد ان المسلمين السود في امريكا يدعمون ترامب عشان نقدر بس نفهم السياسة الامريكية المعقدة دي...
والله يديك الصحة والعافية

الدراسة بتاعتك يا ناصر، مضروبة؟!
يعني هم راكبين مع زول ممكن ينتحر بيهم ودايرم يشكروا ليك ترامب؟

Quote: بعد تنصيبي خبير في الشؤون الأمريكية،

ياجماعة خبيرنا دا بيستقي معلوماتوا من العيون
معناها لحدي مايصل الساقين حاينجضنا نجاض .
الاخت زينب
سمعتي امبارح بول رايان قال شنو ؟ قال الي
الان غير مستعد لتسمية ترمب مرشح عن الحزب الجمهوري
وسمعتي الرد غير الحصيف من ترمب ، ترمب ورطة جمهورية
وامريكية ، بدلالة الحديث عن الموجز الاستخباراتي الذي يطلع عليه
مرشحي الحزبين والخوف من تسريبة لي ناس الـ ناشونال انكورير والصن

غايتو يابكرى شايفك شغّال بحدسك وإحساسك .. ورغم أنى توقفت عن متابعة هذه الشئون الأمريكية إلاّ أنى شبه متفق معك أن العالم الأبيض خلاس طفح به الكيل من الدهماء الجايين من كل بقاع الدنيا ليقطفوا ثمار إنتاجه وعرق جبينه ويلقوها باردة .. وذلك يتم بديناميكا الكم ـــ الكم وليس الكيف ـــ الكمية المهولة من البشرية من كل بقاع العالم والذين سيتفوقوا ديموغرافياً على الرجل الأبيض.. وذلك مدعاة للقلق الأبيض مهما كان تقبله للتعددية .. المسلمين لغاية الآن أقلية هناك ولكن شوف كمية اللاتينو وجنوب أمريكا الحالمين بالهجرة شمالاً .. أولئك مهدد ديموغرافى كبير للمجتمع الأبيض .. وهؤلاء تجد ترامب معتبرهم ناس مخدرات ليس إلّا .. أما المسلمين فالموت المنتشر وسفك الدماء بالذبح بالسكين جعلهم فى مصاف مصاصى الدماء واحد .. لاحظ إنو الرجل الأبيض ذبح الملايين وخاصة فى بلاد المسلمين وطارت أشلاؤهم من قنابلهم، ولكن من عجب فلا يرى الناس فى ذلك أى بشاعة لأن القاتل ماظاهر فى الصورة يكورك بهستيريا وهو يمسح سلاحه من الدم، بل يعرضوا ليك فى الشاشة صورة أشعة حمراء أبيض وأسود تبيّن دقة التصويب فينشغل المشاهد بدقة التصويب وكرة نار التفجير مع الدخان متجاهلاً البنى آدميين الذين تم تقطيع أعضاءهم لإشلاء من خلف الدخان ..
المهم .. حدسك سليم .. فرغم اصطناع الدهشة من شخصية ترامب إلاّ أن المجتمع الأبيض يراهو يعبِّر عن دواخلهم من جوّة .. وكلامك أقرب للصاح.. فالغرقانين فى داخل أمريكا ما شايفين المنظر من الخارج ..

Quote: الدراسة بتاعتك يا ناصر، مضروبة؟! يعني هم راكبين مع زول ممكن ينتحر بيهم ودايرم يشكروا ليك ترامب؟

ها ها يا أبوبكر
تعرف مرات كتيرة بكنصلوا الكول
وأنا شاكي أسم محمد قاعد يخوفهم
غايتو من ترامب أحسن نتكامل علي كندا ولا أستراليا

YEEEEEEEEEEEEEEEEB
FOR
DONALD
TRUMP

الاخ محجوب على تحياتى
سمعت كلام بول راين لكن موضوع ترمب دا عمل شرخ كبير فى الحزب الجمهورى
سوى فاز بالرئاسه او لم يفز
والموضوع هو انو دونالد ترامب شخص من خارج ما يسمى ال establishment
وما يسمى بالاستابلشمنت لا يخدم اجندات الشعب الذى صوت له بل يخدم اجندات ال lobbyist
والكلام دا ينطبق على الحزب الديمقراطى ايضا
الناس كرهت وتعبت من الغش والنفاق والكذب بتاع السياسيين
ظاهرة دونالد ترامب الهبت حماس مجموعات كبيره لا يستهان بها

ابوبكر عباس
اخونا دينق على ما اعتقد هو يميل للحزب الديمقراطى يعنى ما افتكر فى صف المرشح الجمهورى دونالد ترامب

Quote: سمعتي امبارح بول رايان قال شنو ؟

أخى محجوب على
نقول لمن لا يعرف بول رايان هو الرجل الثالث فى الدوله بعد الرئيس ونائب الرئيس .
هو المتحدث الرسمى لمجلس النواب ومن المفترض أن يرأس المؤتمر العام للحزب الجمهورى
فى كليفلاند وبالرغم من ذلك أبدى تحفظاً واضحاً تجاه دعم مساندة ترشيح ترامب إذا واصل
فى عدم إلتزامه لأبجديات توجهات الحزب الجمهورى وسياساته التقليديه والمحافظه .
بالإضافه لرايان هنالك رؤساء جمهوريين سابقين هما بوش الأب وبوش الإبن , كذلك مرشحين
سابقين للرئاسه ,, رومنى ومكين بالإضافه إلى كروز كلهم رافضين ترشيح ترامب .
أمام ترامب خياران :-
* التنازل عن كل ما ينادى به حالياً ويخضع لتوجهات الحزب ويعمل مع رايان على وحده الصف
لمواجهة مرشح الحزب الديمقراطى فى شهر نوفمبر .
* ركوب الراس عندها سينقسم الحزب ليضعف موقف ترامب التنافسى و بالتالى لن يتمكن من
الفوز فى نوفمبر .
واضح أن ترامب فى موقف لايُحسد عليه مع الحزب الجمهورى .

Quote: التنازل عن كل ما ينادى به حالياً ويخضع لتوجهات الحزب ويعمل مع رايان على وحده الصف

.

Quote: ركوب الراس عندها سينقسم الحزب ليضعف موقف ترامب التنافسى و بالتالى لن يتمكن من الفوز فى نوفمبر .

الاستاذ عبدالله تحيه طيبه
السبب الذى جعل دونالد ترامب يفوز على منافسيه فى الحزب الجمهورى هو عدم خضوعه لى توجهات الحزب
هو شخص اتى من خارج مؤسسه الحزب ومول حملته الانتخابيه من حر ماله لذا فهو شخص لا يمكن اخضاعه
لى اى اجندات سوى كانت حزبيه او غيرها وفى حاله عدم الفوز ممكن يؤسس لى قيام حزب جديد وسوف يكون لديه قاعده
جماهريه عريضه

Quote: واضح أن ترامب فى موقف لايُحسد عليه مع الحزب الجمهورى .

الذى فى موقف لا يحسد عليه هو الحزب الجمهورى وليس مستر ترامب

Quote: الذى فى موقف لا يحسد عليه هو الحزب الجمهورى وليس مستر ترامب¨

تحياتى أستاذه زينب
فى الحقيقه كلاهما فى موقف حرج
لن يصل الحزب الجمهورى للبيت الأبيض هذه المره إلا إذا ساند ترامب
ولن يستطيع ترامب أن يفوز إلا بدعم الحزب الجمهورى
لذلك فإنى أعتقد أن تنازلات كبيره ستتم من كلا الجانبين دون أن تصل الأمور
لمرحلة شق الحزب .

كلامك صاح يا منير، الرجل الابيض خائف على ضياع ما اجتهد في بنائه.
المشكلة انو كوّش على موارد الكرة الارضية وجعل البشرية تتنافس على موارد بسيطة.
السؤال: هل وصول الرجل الابيض لامريكا، كندا، استراليا ونيو زيلندا قبل الآخرين يجعلهن ملكا له؟
ورطة زيادة السكان في الدول الفقيرة صنعها الرجل الابيض بسيطرته على الامراض والتعليم، مما أخلّ بالتوازن!
الرجل الابيض مسؤول بما له من معرفة وسيطرة لايجاد حل لمشكلة الفقر والجوع ديل
هل يعقل ان يسيطر عشرين مليون على الموارد الطبيعية الضخمة لدولة زي كندا؟!
خلي ترامب يفوز بنصل معاهو لحل لمشكلة الفقر التطرف ديل
لا يستطيع الهرب من هذه المشاكل

Quote: هل يعقل ان يسيطر عشرين مليون على الموارد الطبيعية الضخمة لدولة زي كندا؟!

أذكر ياأبوبكر أحد الأصدقاء ـــ سويدى أبيض قح ـــ أثناء نقاش معه عن إحتلال البيض لأمريكا وإبادة الهنود الحمر أن وجدت الرجل مقتنع تماماً بهذا الإحتلال .. وقال لى فيما معناه ما ممكن تكون الأرض والموارد راقدة هبطرش ويكون مسيطر عليها الهندى وكل يوم يقوم من الصباح يعاين للأرض البكر والبافلو يرعى ويقوم يهز راسه ويرجع يركلس وهو يقول لنفسه ــ أوككككييي .. كل شئ على مايرام ..!! ..
الناس دى مقتنعة أن الأرض لمن يعمّرها .. وهو مبدأ شبه صحيح .. وهو المبدأ الذى يحرِّك البشرية حول الكوكب من مكان لمكان .. وما نستغرب لو يوم الناس دى رأت أن أفريقيا دى وجب إعمارها ولكن بعد تفريغها أولاّ من اشباه البشر الساكنين فيها ديل ـــ حسب نظرية التطور ـــ كما أُفرغت أمريكا من الهنود ..
ترمب يعيد الشعور الكامن للبيض فى وجوب سيادتهم التى تتهددها سيطرة الأجناس الأخرى ــــ أوباما مثالاً ــــ رغم إنو الأجناس الأخرى لا تطمح فى الرياسة الآن، لكنها مصيرها عندما تتكاثر أن تطمح فى السيطرة على القارة .. وتلك طبيعة الإنسان ..
أنا لا أنظر لصراع الرئاسة الآن على أنه جمهورى ضد ديمقراطى فقط ، بل صراع أجناس وميول الأجناس فى الـ domination ..
طبعاً ناس قريعتى راحت أساساً ما عندهم طموح للسيادة والرياسة .. لابد من "آخر" يقود المركبة وهم يقعدوا فى الكنبة الورا ..
لكين ترمب حيكرِّه الناس القعدة ..

يامنير
الهنود باعتبارهم سكان اصليين واصحاب الارض
لاتفرض عليهم اي نوع من الضرائب ، حتي
ضربية الدخل الفردي ، لذلك تجد اغلب ملاهي
القمار في مناطقهم ، لان المستثمر يدفع للقبيلة
بشروط تحددها خير له من الحكومة .
بعدين عليك الله شيل ادوات تحليلك دي
عن الواقع الامريكي واشتغل بيها في
الازمة المستطيلة في السودان وورينا النتيجة

السينس قسم

صدق حدسك يا بكه ب ك
بنسلفانيا حسمت الامر

سلام يا أبو بكر

توقعك طلع صحيح بالرغم من كل القراءات المضادة له. قبل قليل قرأت في BBC

((6:35
هبطت مؤشرات الأسواق الأمريكية بأكثر من 5 في المئة في الساعات الأولى من صباح الاربعاء.

ويشير هذا التهاوي إلى القلق الذي يساور المستثمرين من احتمال فوز دونالد ترامب بالرئاسة الأمريكية والمخاطر الاقتصادية المترتبة عليه.))

ترمب فاز ولكنه سيحكم أمريكا كما تريد القوى التي تسير الأمور من وراء المال، وهو بصفته صاحب مال سيعود إلى جماعته.

ياسر

يا ياسر واخلاص،
أقول ليهم: شفتو في عيون الناس
يقولوا لي: إتّا برلوم!

شوف يا بكري،
أنا تاني ما بكتب حرف مجانا هنا
كفاية

كخبير، ومستنير، وأمريكي جديد، كلمتي ما بتقع واطة:
ترامب هو الرئيس القادم دون أدنى شك

صدق الخبير الدكتور ابوبكر محمد عباس
ولو انو الواحد ما كان محتاج لكل هذ لاثبات ان هذا المستينر ما ساهل
عليكم بهذا الرجل في شان دنياكم لن تضلو ابدا

وقرأت قبل قليل في BBC

((توقيت النشر
8:00
قال وزير الخارجية الفرنسي، جون مارك أيرو، إن دونالد ترامب على ما يبدو سيفوز بالانتخابات الرئاسية، مضيفا أن شخصية ترامب تطرح العديد من التساؤلات.

وأوضح أيرو أن فرنسا ستواصل العمل مع الولايات المتحدة حتى في حال فوز ترامب، لكنه أكد أن بلده سيطلب توضيحات حول المواقف الأمريكية بشأن التغير المناخي والاتفاق النووي الايراني وسوريا.))

بعدين يا علاء،
دينق قاعد ليهو في أمريكا زي خرتمية سنة، قال لي: إتّا قاعد تشوف ياتو أخبار؟
أقول ليهو: عيون الناس يا كيشة

ابوبكر الشفّت



طيب كدي اتجاوز المرحلة دي
وورينا توقعاتك عندما يتحّكر ترامب في البيت الابيض

يا ناصر، الموضوع فيهو فائدة
نقعد نتسلبط ليك فيهم زي ناس دارفور مع الجلابة بعد الجنائية
لو زول عاين ليك ساي، تقول ليهو دي عنصرية

أحسن يفوز الآن من أن يفوز زول تاني بنفس الأفكار بعد أربعة سنوات
الطريق الآن يتمهد لفكرة ساندرس

10/10 يا برلوم


البشوف .. الشوف في عيون الناس ياخد كيد

10/10

التحية للمستنير دكتور أبوبكر على تحليله وصدقت توقعاته . في انتظار تحليلك للمرحلة القادمة .

عليك الله، يا فتح شوف الكلام دا من شهر أربعة:
"كلام صاح يا مولانا حافظ
دي فعلا نبوة
أو ممكن تقول عليها ما وراء السياسة
Parapolitics
الأدوات المتعارف عليها يا حافظ لا تصلح في هذه الحالة
دي حالة جديدة يقرأها الراسخون في العلم فقط"

علم!!

تحياتي دكتور مرة اخرى
صدقنى اذا مررت على هذا البوست في وقته لما ارهقت نفسى بمتابعة التحليلات والاستطلاعات والتوقعات لاني اثق بمقدراتك .
وسؤالي هل ترامب الرئيس سوف يختلف عن ترامب المرشح ؟
مع احترامي وتقديري لك

إطناشر من عشرة يا وضاح
أعتقد دي مناسبة
الموصلي يألف ويلحن ليهو أغنية حزينة

سلامات د.أبوبكرفي بدايات البوست وبتاريخ 4 مايو كتب الأخ الفاضل حيدر حسن ميرغني :- "علي بالحرام ده أجمل بوست يمكن الرجوع أليه بعد ظهور نتيجة الأنتخابات .أن فاز ترامب .. حأنصب المستنير بكري كأفضل خبير كأفضل خبير في الشئون الأمريكية في المنبر ".

أهو أنتهت الأنتخابات وصدقت توقعات أبوبكر ........أها

حيدروف قال يسمها قدحة ( اها نسوي شنو هسع )
غايتو جاءتك من (عيون الناس و الظل الوقف ما زاد )

هنا يظهر الفرق بين الذكاء الواقعي والعاطفة الرغبوية..
تحية مستحقة لصديقتنا زينب عبد الله (التي نسميها بيننا وبين نفسنا زينوبا)..
عبرك دعني اقول هاردلك لول ابا بريمة ..لأنو كان طيبان وعاطفي في حساباتو..!!
هل كشفت امريكا عن وجهها البطرياركي/الذكوري؟.
بالطبع لأ..ودي قذارة السياسة..!!
صاحبنا ، في غرفة واتساب ، وهو مؤتمر شعبي يعيش في امريكا ، حكى نكتة طريفة وقال: لآقيت مجموعة من شهود يهوا ، وقالوا ح يدعموا ترامب لتحقيق نبوءة خاصة بيهم..مفادها انو نهاية العالم محتاجة احمق يولع الحرب العالمية ، ومافي زول بيقدر يشتغل الشغل ده غير ترامب..عشان كده ح يدعموا ترامب..!!
عندي ، لا يعني نهاية العالم ، ان فاز امثال ترامب برئاسة امريكا..!!
احيى اللعبة الحلوة ، لعبة التمردعلى المؤسسات العتيقة ، افهمها ، وسوف اقاوم ناتجها بطريقتي الخاصة ، فان تخسر معركة لا يعني بتاتا ، انك خسرت حرب..وهكذا..!!
نبوءتك صدقت يا عم..فشنو ما تسوي لينا سالفة ياااااااااااااااخ..!!
خلينا نشوف يوم باكر كيف..!!
كبر

Quote: نت يا زول بتتفرج في ياتو اخبار؟ جميع الاستطلاعات ترجح كفة الحزب الديمقراطي في هذه الانتخابات، والجمهوريين انفسهم مقتنعين تماما بأن دونالد ترمب يعتبر كارثة بالنسبة لهم. الرجل خطف الحزب بي قروشه وجرى بشعاراته الزائفة، والشعارات التي يستعملها الأن في الأنتخابات التمهيدية لا تصلح أبد في الأنتخابات العامة. الزول ده أعطى الرئاسة للديمقراطين في طبق من ذهب. يجب أن تعلم أن هنالك شريحة كبيرة من المستقلين، الغير ثابتين في تصويتهم (swing voters) ديل معظمهم ح يصوتو لي مرشح الحزب الديمقراطي.

تبلع من سكات يا صحبي

التحية لابا بكر عباس

قبل ما يجي ابكرونة ليثبت بأنه ابو عرام.

ههههههه

انا بضحك على توقع نسبة حدوثه 50 في المية.
لو اغبى 2 في الدنيا واحد قال حا تفوز كلنتون ولاخر قال حا يفوز ترامب واحد من الاغبياء توقعه حا يكون صحيح.

التحيّة للمتداخلين بمن فيهم الكيشة الكبير مكي
يا كيشة، التوقع كان قبل فوز ترامب بترشيح الحزب الجمهوري

اليوم القال فيهو ترامب على الملأ انو ح يمنع المسلمين من دخول أمريكا

البوم داك يا كيشة، عرفت انو أمريكا إرتدت

يا بكري، يا أدفع لي فلوس، يا توقف مني الكيشة ديل

انا في الهليلة دي كلها اهم حاجة عندي هنيت بت ترمب المزة العسل Ivaka Trump الان على تويتر بفوز ابوها و راودتها عن نفسها ...

يا علي انا متأكد ما همت بك لا من قبل أو دبر

ههههه حلوة يا منتصر

يا مستنير بلد خبيرها المستنير اكيد حيفوز فيها ترامب
هههه

يا ودالشيخ بك عايز يزيدوا ليه راتبه ياخ عبدالمجيد عبدالمجيد مفروض يدوه وزير ولائي ولا على الأقل معتمد ياخ ده نصر ترمب حين كذبه الناس

هنالك الملايين توقعوا فوز ترامب.
وهنالك قرد صيني وضعوا مجسمين لترامب
وهلاري واحتضن القرد مجسم ترامب معلنا توقعه بفوز ترامب.
ترامب فوزته المخابرات الروسية وليس لهجته العدائية تجاه المسلمين او الوافدين كما تظن.

ياجماعة المستنير ده طلع مستنير استنارة تنور بلد بى حالها.
اتاريك ماك هين يابكور ,, ناس الجزيرة الـCNN ماتوقعوا توقعاتك دى.
بختك لما تنزل المعاش ممكن تشتغل مذيع نشرة جوية.

الفاضلابي حاقر بمذيع النشرة الجوية واللاين مان والكورس!!
عندي نكتة بمناسبة قرد وأغبياء مكي، لكن خائف زعلو يزيد
بقولها ليهو في حتة تانية، هنا أنا محلل إجتماعي

غايتو الأيام دي نتوجس
جارك الأبيض الما كان بسلم عليك،
تقول في سرك:
ود الكل--ب، بكون صوّت لترامب
التوجس من انو في زول في محيطك وبكرهك، شعور مخيف
عادي ممكن تتعايش مع الكراهية المعلنة زي بتاعت مكي دا
لكن ....
الله في ما داير ليهو فكي.

بدأ البلع
الانتخابات شئ والحكم شئ تاني
حتي اوباما بدأ يتراجع
هل يمكن ان ترجع البشرية الي الغابة. او الكهف ؟
وكمان طلعت مظاهرات ضد افكاره ال قالها حتي في بريطانيا

ترامب لست رئيسنا قاصدين فكر ترامب
اول مرة في التاريخ مظاهرات ضد الفائز
زمان كان يقال مات الملك عاش الملك
الان فات الملك ي ملك اتعدل ولا نعدلك
لو استمر بافكاره ال قالها الحرب الاهلية الامريكية الثانية في الطريق
اسهل شئ تفكيك بلد


والا كمان زي ما قال احد اتباع شهود يهوا دايرين القيامة تقوم
ان شاء الله يا ترامب لو ما غيرت افكارك خصلتك الامامية تتحت
وتلحق يول برينر
(خصلتو دي راسمالو ) صدقوني

زماااان الملوك يضعون التاج
ترامب خصلته الاماميه اعطاءها له ملاك طيب عند الولاده
كل الذي يلمسه يتحول الي ذهب فأغتني وصار شهيرآ ورئيسآ
وكما ذكرت في الاول الملاك طيب
الان ينظر له
سينزع الذهب (من كل البلد ) وكذلك الخصلة
الجميع يدعو له ان يكون الرئيس الطيب ك ملاكه الحارس

المستنير ابوبكر رغم حداثة عهده بالعيش في امريكا أثبت حقا أنه عميق وبعيد النظر ويستحق لقب أفضل خبير في الشئون الأمريكية في المنبر .
لقبه من الآن فصاعد ( الخبير المستنير) - وجه مبتسم .
.الأساتذة : احمدونا / د. احمد أمين ، د. منير / ياسر الشريف ، علاء الدين صالح : أراهم كانوا موفقين جدا في تأييد وجهة نظر المستنيرفلهم التحية والإجلال .هذا البوست من البوستات النادرة التي اعدت قراءتها مرتين .
تحياتي ووافر احترامي

*

أبوبكر عباس,

لكن طلعت محلل خطير جدا وإنسان يقرء الأمور بواقعية وبصورة تحليلية ممتازة جدا

تهانينا

اول مرة في التاريخ مظاهرات ضد الفائز
حتي في بريطانيا
دخل التاريخ الامريكي منذ الولادة
ادعو له بالتوفيق ،والتوفيق ده من الله وهو الهداية للطريق ال بقدم البشرية

لماذا خسرت هيلري !!! ؟
ساندرز كان احق بالترشيح ،هو النقيض ل ترامب
السؤال يتغير لماذا ترشحت هي
الخلل واضح ،الخلل في المرشحة ولم يصوت لها الملايين
عمي النخبة هو السبب

وتتصوري يا اخلاص ان بعض المحللين قالوا ان سبب هزيمة هيلاري
وفوز العنصري ترامب ان المجتمع الامريكي ، وعلى الرغم من تحضره
وادعائه بحقوق المساواة بين والمراة..لكن هذا المجتمع ليس مستعدا
الان كي يختار امراة كرئيسة للولايات المتحدة...وانه اذا كان الحزب
الديمقراطي اختار اي رجل لكان فاز على ترامب بسهولة...

والتحيات النواضر لصاحب البوست د. ابوبكر عباس
ودمت بالف خير وصحة وعافية

ممكن يا بسمة وكمان في مقولة المرأة عدوة نفسها ،لو طلعت نسبة النساء ال صوتو لها شوية ح تكون مشكلة

بالنسبة لي كنت ح اصوت لها رغم اني ما مقتنعها بها
وبعدين موقفها من بيل غايظني والله ،كان تنفعل حتي لو شنو داك
غايتو انا في المحل ده لا يعتد برائي

تاني التحليلات والتوقعات السياسية المستنير بس
التوقعات الرياضية طلحة بس

والأثبات بالعمل

أيها الصِدّيق .. أفتنا في رئيسنا وفي بقراتنا العجاف القضت على ألأخضر واليابس

شوف يا أمين،
حل البقرات العجاف هو وجود طاقة رخيصة
ليس للأمر علاقة بمن يحكم

هههه
يا مستنير نبوءة في السلك وبتوري إنك تمام
أنا اصلو ما اتنباءت إنه ترمب يبقى الرئيس
لكن تمنيت إنه يبقى الرئيس عشان يتم التدعيم باع التحالف
الاشتراكي العملو ساندرز واللي هو من اهم اسباب
سقوط هيلاري.

انا متشوق للانتخابات الجاية كان ربنا احيانا
حنشوف مصير التيار الاشتراكي الجديد الحيكون مدعوم من الجيل الجديد

انتخاب ترمب الما كنت متوقعوا وقع لي في جرح.

رغم إنه ما في تغيير جذري، وحكاية عنصرية دي كلام انتخابات
بكرة حيظهر ليك داعي المسلمين وضابح ليهم خروف في عيد الضحية
ومتصور ليه مع سود فقراء
مكنات السياسة الامريكية بنعرفها زي جوع بطنا ههههه