ضربت لي صديقة عزيزة علي كل يوم بلاقيـــها في عالم النت حي الوتسبة وفريق الفسبـــــــكة والغريبة بنرسل الصور لي بعض كل يــــــوم من مناسبات ومتغيرات وخلافو .. اها ضربت لي قالت والله اشتقته للونسة رأيك شنو تجيني ؟ قلت ليها طيب ما تجيني انتي انا القطارات بقت ترمي لي فقري . قالت : والله يا مشغووولة وجارية جري الحصان ! وانا قلت ليها : والله انا شغالة شغل الحمار !
اها قلت ليها رأيك شنو يتلاقي الحصان والحمار في محل يكون نص المسافة بيناتنا الاتنين لانها مدينتها بعيدة جدآ .
ركبت مشيت ليها لقيتها مقنبرة هههههههه طبعآ اول ما شفنا بعض وزي ما عارفين لقاء السودانيين والسلام التحلف تقول شكلة !!!!! وبالاحضان السودانية والانفعال المعروف هههه مع الملاحظة قريب سنة ما اتلاقينا كتر خير النت القرب لينا المسافات .
تصدقوا : وقفنا الحركة في المطعم الكان ملأااااااااااااااان كمية من الناس سابوا الأكل وبقوا بعاينوا لينا !
لما حضروا لينا الآكل فضلت خيركم وقال لينا ادفعوا الفاتورة بدينا الاتنين نتصارع في البدفع منو انا اصريت وهي اكتر اصرار !! وتصدقوا نتحالف بصوت عالي لما انتبهت لقيت الناس بتعايين لينا والله خجلت خجلت اليابا فضيل زي ما بقول ود المنسي !
والله يا منير الدخناها في زوار المطعم مابتمرق بسهولة يعني بقت عليهم خلعتين خلعة السلام وخلعت الدفع ههههههههههه انا خائفة امشي المرة الجاية القي معلقة برا المطعم ممنوع دخول السودانيين نسبة لازعاجهم العام ههههههه . غايتو دي فاتت الله يكفينا شر الجايات ههههههه .
خخخخخخخخخ حليفة شديدة يا منى ديل اهلي قبال كدا بتاع الكاشير دورت قدامو شكلة بين تلاتة سودانيين في لندن عمك قام جاري وداير يتصل بالبوليس قايل الجماعة عاوزين ينهبوا الكاشير😁 لسه الخير موجود
Post: #14 Title: Re: غايتو يا السودانيين سمعتكم سابقاكم! تاني Author: محمد عبد الله الحسين Date: 04-23-2016, 09:54 PM Parent: #13
و الله يا منى عندك موهبة درامية تمام خليتينا نتابع بي شغف. أجمل حاجة في السودانيين المروة و الرجالة الزي دي حتى عند نسوانا ...ههههههههه غلطانة طبعا صاحبتك لكنها اظن فنجرية زيادة عن اللزوم لمن فايتة بي غادي. الله يخليكم و يجمعكم على الخير
هههههههه .. دراما من الواقع ! الغريبة الغربة ومخالطة الشعوب المتحضرة، . ألأهم سماتها الكلام كالهمس ..عندما نتلاقى .النسى قديمو تاه .. أخر حماسة ولعلعة !
الظاهرة نعم مرتبطة بالكرم وحقى لغيرى من أهلى وأصحابى . بس التنفيذ وأسلوب الإقناع شرس تعلو الأصوات وتتشابك الأيادى شكلة مكتملة الأركان .. وتنازل ما فى .. فرض وضع اليد . الكسبان من يسبق الآخر فى هرش الكاشير وتسليم النقود أو الكرت السحرى ما فى أسلوب تفاهم وإقناع .. فرض موقف لا يخلو من جلافة محببة .. تقول لى فى ساسة يسوسو رأى ورأآى آخر .. ههههه
يا بت عمسيب ذكرتنى قبل إسبوعين كنت متواعد مع صديق وزميل عمل سابق خواجة أمريكانى لم نتقابل منذ سنوات، إقترح على نتقابل ساعة (اللنش) وإقترح مطعم قريب من محل شغلى. المطعم زى حقكم التركى البتطلب وتدفع مقدما .. قدمت صاحبى فى الصف ومن قائمة الطعام قلت ليهو أنا حأطلب ساندوتش كورنبيف ساخن ومعاهو شوربة . قال حيطلب سيم .. الراجل طلب طلبه .. قاطعتا الكاشير قلت ليها أناعاوز نفس الطلب بس غيرى لى الشوربة وخلى الفاتورة واحدة .. الراجل رغم المفاجأة صاحبى عاوز يدفع (مدير كبير) .. حسمته ليك وقلت ليهو إنت جيت فى حلة شغلى تبقى ضيف .. والكرت السحرى سلمتو الكاشيرايا ولما إطمأنيت على التحكم فى الموقف قلت للكاشير وكمان إتنين بطاطس محمرة (جبس) و إتنين مشروب بارد .. !! . قال لى المرة الجاية عليهو .. وافقتو مع إنى عارف المرة الجاية حأتلايق وأدفع.
Post: #18 Title: Re: غايتو يا السودانيين سمعتكم سابقاكم! تاني Author: اميرة السيد Date: 04-23-2016, 11:35 PM Parent: #17
يا سلام .. يا سلام عليك يا منى...وريتينا السمعة السمحة في السودانيين....ولسع نحن بخير ...ويؤثرونهم على انفسهم ولو كانت بهم خصاصة...ومحل ما تمشي تلقى الكرم السوداني ....today you make ny dayزي ما بتقول المسنوحة بسمات...والمشهورة زيك بالكرم.....لكنها هي الاتلومت فينا لوم اليابا فضيل..وحتغيب مننا شهر...وليه يا منى ما تتحفينا كل مرة بالروائع دي.. .والله يديك الصحة والعافية...
Post: #19 Title: Re: غايتو يا السودانيين سمعتكم سابقاكم! تاني Author: Khalid Saeed Date: 04-24-2016, 07:39 AM Parent: #18
هههههههههههههههههههههههههههههههه
ياسسلام يالملكة بت عمسيب
دي اجمل حاجة مازلنا محتفظين بيها .
تحياتي ،
Post: #20 Title: Re: غايتو يا السودانيين سمعتكم سابقاكم! تاني Author: ود الباوقة Date: 04-24-2016, 07:58 AM Parent: #19
بت عمسيب
هاكم الاهداء دا
مع الود
Post: #33 Title: Re: غايتو يا السودانيين سمعتكم سابقاكم! تاني Author: مني عمسيب Date: 04-24-2016, 11:20 AM Parent: #20
حبابك ود الباوقة ..
ومشكور علي المرور والاضافة .
Quote: هاكم الاهداء دا
مع الود
Post: #21 Title: Re: غايتو يا السودانيين سمعتكم سابقاكم! تاني Author: عبد الباقي الجيلي Date: 04-24-2016, 08:24 AM Parent: #19
بت عمسيب للحكي عندك نهكة مختلفة ....
اكتبي كثيراً ...
قيل أن أحد العرسان ... وهو يطوف بعروسته بعد شهر العسل على أهله .... وأغلبهم يحتفي به بذبيحة كاربة ... كان يخشى أن يكلف أحد الأقارب ممن يعانون من ظروف مالية صعبة
أن يكلف نفسه ويقوم بواجب الضيافة ، وعند زيارته باغته وهو يحمل سكينه وحلف عليه "علي الطلاق ما تضبح" ... فتمعر وجه صاحبنا وتلون ، ثم قال "والله يا ود عمي .. إنت
عريس جديد ، وأنا ما بكسر ليك حليفتك ، لكن على الطلاق أكان تضبح إنت" ... وناوله السكين ....
Post: #34 Title: Re: غايتو يا السودانيين سمعتكم سابقاكم! تاني Author: مني عمسيب Date: 04-24-2016, 11:23 AM Parent: #21
لك التحية والشكر اخي ... عبد الباقي.
Quote: وأنا ما بكسر ليك حليفتك ، لكن على الطلاق أكان تضبح إنت" ... وناوله السكين
هههههههههههه قلت لي ورطو ياها دي نهاية الكرم بتعمل فينا اكتر من كدا هههههههههه .
ولك وافر الشكر ..
Post: #32 Title: Re: غايتو يا السودانيين سمعتكم سابقاكم! تاني Author: مني عمسيب Date: 04-24-2016, 11:14 AM Parent: #19
اوووو الارباب منور يا جميل ..
صباح الرضا ..
Quote: هههههههههههههههههههههههههههههههه
دي اجمل حاجة مازلنا محتفظين بيها .
غايتو يا الارباب في بلدكم مابعرف تعريفها لكن هنا ياهو المصنفننا بالمزعجين والمجانيين هههههههههه هنا الناس كل واحد بدفع براهو الا مارحم ربي هههههه لكن نحن ياها دي الحالة ندخل بي سترتنا ونمرق بكشف الحال الزي دا هههههههه
الله يخليكم يا الشعب العظيم مع التمني بالتخفيف من هذه الظواهر البتخلينا نكون في لستة المزعجين !
تسلم ود الارباب .
Post: #30 Title: Re: غايتو يا السودانيين سمعتكم سابقاكم! تاني Author: مني عمسيب Date: 04-24-2016, 11:04 AM Parent: #18
الحبيبة الاميرة .. سلامي وحبي وشوقي ..
عاد دا كلام دا يا اميرة وكمان بتشجعي علي الازعاج العام ؟
Quote: وريتينا السمعة السمحة في السودانيين.... ولسع نحن بخير ...ويؤثرونهم ولو كانت بهم خصاصة... ومحل ما تمشي تلقى الكرم السوداني ....
كرم اليابا فضيل زي ما بقول ود المنسي أكان هجج الزوار ودخل فيهم خلعة ههههههههههههههههه .
ولكي حبي يا الاميرة ..
Post: #29 Title: Re: غايتو يا السودانيين سمعتكم سابقاكم! تاني Author: مني عمسيب Date: 04-24-2016, 11:01 AM Parent: #17
مرحبابك اخي ابارهيم صالح ..
Quote: اهم حاجه ما حلفتوا طلاق
طلاق شنو آآآآزول وقت الله ما حلا المشكلة بحلها الطلاق ؟ ههههههههههههه
ولك الشكر ..
Post: #28 Title: Re: غايتو يا السودانيين سمعتكم سابقاكم! تاني Author: مني عمسيب Date: 04-24-2016, 10:58 AM Parent: #16
يا النادر لكن لمتين نكون نحن بالحالة الصعبة دي ؟
Quote: قال لى المرة الجاية عليهو .. وافقتو مع إنى عارف المرة الجاية حأتلايق وأدفع.
والله ياها اللوايق باعينها هههههههههههه. غايتو الله يدينا طبع ما دا هههههه .
ولك الشكر .
Post: #27 Title: Re: غايتو يا السودانيين سمعتكم سابقاكم! تاني Author: مني عمسيب Date: 04-24-2016, 10:55 AM Parent: #15
حبابك يا النادر ومشرف ..
Quote: هههههههه .. دراما من الواقع ! الغريبة الغربة ومخالطة الشعوب المتحضرة، . ألأهم سماتها الكلام كالهمس ..عندما نتلاقى .النسى قديمو تاه .. أخر حماسة ولعلعة !
اسمعني يا الحبيب في لحظات كدا ما بنعرف فيها همس يعني لحظة تلاقي لينا كم شهر ما اتلاقينا مافي همس هههههههه بس زي دا او في حالة الدفع برضو زي دا لكن النصيحة باقي قعادنا وونستنا كلها محافظين علي الهمس والكلام بشويش والضحك يدنا في خشمنا عشان الضحكة ما تظهر والله يا نادر بنضحك لما دموعنا جارية لكن بكاتم صوت هههههههههههه . يعني الحضارة والله مواكبنا لكن قول الله يخلصنا من العادات لكن لايوجد في الافق من تغيير عادتنا والدليل بقينا مشهورين وسيد الكشير سألني قال لي انتوا سودانيات ههههههههههههههههه .
ولك وافر الشكر يا النادر ..
Post: #26 Title: Re: غايتو يا السودانيين سمعتكم سابقاكم! تاني Author: مني عمسيب Date: 04-24-2016, 10:47 AM Parent: #14
ود الحسين .. حبابك يا صديق ..
Quote: غلطانة طبعا صاحبتك لكنها اظن فنجرية زيادة عن اللزوم لمن فايتة بي غادي. الله يخليكم و يجمعكم على الخير
تصدق يا ود الحسين بي شددتها ولضتها دفعت ولا هماها الازعاج العملناهو ههههههههههههههه وكان شفتها زولة متفردة في كل تفاصيلها الله يخليها لي وما احرمني منها ..
ومشكور يا حبيبنا .
Post: #25 Title: Re: غايتو يا السودانيين سمعتكم سابقاكم! تاني Author: مني عمسيب Date: 04-24-2016, 10:42 AM Parent: #13
حبابك ود ميرغني .. وتشكرات ..
Quote: حليفة شديدة يا منى ديل اهلي
تصدق يا ميرغني بتاع الكاشير لو شاف الظاهرة دي اول مرة كان بلغ البوليس لكن باين عليهو بعرفنا كويس واتعود علي جنس دا من السودانيين هههههه اها اخذ الموضوع عااااادي بس كان بعاين بعينو لما انتهينا من المصارعة وفي النهاية هزمتني ودفعت هي هههههههههه وغايتو كان ما اخاف الكضب في زول موجه علينا موبايل ظنيتو كان بصور فينا !! غايتو الساتر الله .
وتسلم يا صدوق ومشكور .
Post: #22 Title: Re: غايتو يا السودانيين سمعتكم سابقاكم ! تاني Author: محمد مجيدو Date: 04-24-2016, 09:26 AM Parent: #1
العزيزة منى ... وضيوفك .. سلام
لاكييين لقيتك حكاااية ... وتنفعي تكوني كاتبة قصة قصيرة .. وياهو دا السودان ... والكرم السوداني ... تعرفي السودانين ديل اجمل شعب .. رغم البؤس والحكومات التي افقرتهم .. ولولا سوء ادارة حكوماتنا المتعاقبه والحروبات الاهلية لكنا اغنى بلد ... شكيتم على الله ...
Post: #23 Title: Re: غايتو يا السودانيين سمعتكم سابقاكم ! تاني Author: ولياب Date: 04-24-2016, 10:08 AM Parent: #22
أهلا بت عمسيب
حتى جنسنا اللطيف تيبكال سودانيز ، وهذا مستمد من كرم الضيافة والوفادة السودانية ، إلا أن بعض المواقف تأخذ شكلا آخر أمام كاشيريه تعودوا على الزبون الذي يدفع فقط لنفسه وقد شهدت قبل عدة أعوام وفي مطعم مصري ببغداد شكلة ليها ضل ، فكنا جلوساً نتناول السحور بأحد مطاعم شارع السعدون ببغداد وقد سبقنا أخوة سوادانيين كانوا (مسننيين) بعرق العراق المشهور ، وما أن وقف أحدهم أمام الكاشير حتى أتى الثاني ولحق بهم الثالث وكل منهم مصر على الدفع وحينما أشتد الاصرار ، قابله ذلك تذمر المصري قائلاً ( واحد فيكم يدفع ويخلصنا ) وعلى حسب السكرة لم يتواني أحدهم في توجيه لكمة للمصري وتدخل عمال المطعم واشتد الصدام وهنا توجه أحد السودانيين وحمل طاسة بها زيت حار لقلي الفلافل (الطعمية) وإذ به يكشح الزيت المغلي في تجاه العمال الذين فروا أمام ذلك الموقف وساد الهرج والمرج خارج المطعم وما كانت لحظات إلا والدورية الأمنية أمام المطعم .
Post: #35 Title: Re: غايتو يا السودانيين سمعتكم سابقاكم ! تاني Author: مني عمسيب Date: 04-24-2016, 11:29 AM Parent: #23
ولياب يا هلا ويا مرحبا ..
Quote: لم يتواني أحدهم في توجيه لكمة للمصري وتدخل عمال المطعم واشتد الصدام وهنا توجه أحد السودانيين وحمل طاسة بها زيت حار لقلي الفلافل (الطعمية) وإذ به يكشح الزيت المغلي في تجاه العمال الذين فروا أمام ذلك الموقف وساد الهرج والمرج خارج المطعم وما كانت لحظات إلا والدورية الأمنية أمام المطعم .
يعني كرمنا فجأة بقي عبارة عن ازعاج عام ومشاكل وتشويه سمعة !! بامانة يا ولياب مفروض موضوع الكرم السوداني يحسم وممكن كمان ندخل فيهو المنظمات العالمية لحد هذه الظاهرة ههه ولاشنو رأيك ؟ هههههههههههههه .
Post: #31 Title: Re: غايتو يا السودانيين سمعتكم سابقاكم ! تاني Author: مني عمسيب Date: 04-24-2016, 11:08 AM Parent: #22
مجيديو سلاما سلاما ..
قلت لي :
Quote: وياهو دا السودان ... والكرم السوداني ...
يعني عاجباك الفوضي والازعاج العام يامجيدو؟ غايتو حا نضمك علي ناس توقيعك دا !!!!!!!!
عالم بطااااااااااااااااااااااااااالة
خخخخخخخخخخخخخخخخخخخخخخ ,
ولك الشكر ..
Post: #36 Title: Re: غايتو يا السودانيين سمعتكم سابقاكم ! تاني Author: مني عمسيب Date: 04-24-2016, 11:34 AM Parent: #31
بت عمسيب ازيك امبارح جانا ضيف من قلاسقو ومشوا هو واحد صاحبنا اشتروا حاجات للعشاء ولمن بقوا على الدفع العيطه قامت قدام الكاشير واتخيلى وراهم صف طويل عريض الخواجات اتحيروا ..نحن شعب منقه هههههههههه وعندنا حاجاتنا برانا ..تحياتى لك ولصاحبتك وربنا يخلف على الدفعت فيكم.
Post: #41 Title: Re: غايتو يا السودانيين سمعتكم سابقاكم ! تاني Author: عوض محمد احمد Date: 04-24-2016, 07:17 PM Parent: #40
غايتو كلامكم دا الا في اوروبا و امريكا الخليج السلام بالتلتلة و صرة وش معاها
Post: #42 Title: Re: غايتو يا السودانيين سمعتكم سابقاكم ! تاني Author: احمد الشيخ Date: 04-24-2016, 07:54 PM Parent: #41
سلامات منى وضيوفك الكرام فعلا ظاهرة تستحق الاشادة كاشيرات العالم دي على وزن عمال العالم هههه بقو عارفين النظام في سودانيين يعني في شكلة في الدفع .. يقوم ينتظر ترسى على شنو هههه وما بتجرأوا يشيلو من واحد فيهم قبل الموضوع ما يتحسم لانه حتتختف من يده ههههه كمان بقى في حيل في الدفع .. يعني زول يقوم بدري شوية و"يتسلل " للكاشير قبل الزحمة وفي البعمل نفسه جاه تلفون يقوم يمشي على الكاشير ويدفع ويرجع يقعد زي الما عمل حاجة حيل في الكرم دي لاقتك قبل كدا؟
Post: #43 Title: Re: غايتو يا السودانيين سمعتكم سابقاكم ! تاني Author: احمد الشيخ Date: 04-24-2016, 07:56 PM Parent: #41
سلامات منى وضيوفك الكرام فعلا ظاهرة تستحق الاشادة كاشيرات العالم دي على وزن عمال العالم هههه بقو عارفين النظام في سودانيين يعني في شكلة في الدفع .. يقوم ينتظر ترسى على شنو هههه وما بتجرأوا يشيلو من واحد فيهم قبل الموضوع ما يتحسم لانه حتتختف من يده ههههه كمان بقى في حيل في الدفع .. يعني زول يقوم بدري شوية و"يتسلل " للكاشير قبل الزحمة وفي البعمل نفسه جاه تلفون يقوم يمشي على الكاشير ويدفع ويرجع يقعد زي الما عمل حاجة حيل في الكرم دي لاقتك قبل كدا؟
Quote: الأخ العزيز منير أخونا الكنقولى واضح أنه فهم المسأله غلط
أخونا الفاضل عبدالله عبدالله .. الكنغولى القصة بتاعة شكلة الدفع دى اتكررت قدامه كتير .. فالزول فى الآخر قال السودانيين ديل أغبياء .. فى بنى آدم فى الدنيا دى يضارب الناس عشان يدفع ؟؟ ..
الدفع ده زمان فى المواصلات كان قصتة براها .. تكون شايل حق المواصلات والفطور تقوم تدفع للجماعة فى الحافلة وتقعد جعان وترجع كدارى :) .. هسه ماعارف الحال كيف ..
هو طبعاً حار على الجيب، لكنه هزيمة للنفس وحبها للمال ..
Post: #45 Title: Re: غايتو يا السودانيين سمعتكم سابقاكم ! تاني Author: اميرة السيد Date: 04-25-2016, 03:38 AM Parent: #44
بالله يا جماعة الخير... بعد الكلام القاله احمد الشيخ ..مش عندنا حق نقول في كرم اكتر من كده...بتخيل لي اذا حاتم الطائي ذات نفسه كان جانا هنا كان حيتحير.... ..يا حليلك يا اسماعين ود حسن...والله وصفتنا وصف تمام.. واسفاااااي اذا ما جيت من ناس زي ديل... ..انا ما حافظة القصيدة....لكن يا ريت كان بسمات هنا كانت كتبت القصيدة كاملة... ..ارفع راسك فانت سوداني....وارفعي راسك فانت سودانية.. والله يديكم الصحة والعافية...
Post: #46 Title: Re: غايتو يا السودانيين سمعتكم سابقاكم ! تاني Author: مني عمسيب Date: 04-25-2016, 09:50 AM Parent: #45
حبابك يا دكتور ..
ومشكور علي المرور البشرفنا ..
Quote: امبارح جانا ضيف من قلاسقو ومشوا هو واحد صاحبنا اشتروا حاجات للعشاء ولمن بقوا على الدفع العيطه قامت قدام الكاشير واتخيلى وراهم صف طويل عريض الخواجات اتحيروا ..نحن شعب منقه هههههههههه وعندنا حاجاتنا برانا .. تحياتى لك ولصاحبتك وربنا يخلف على الدفعت فيكم.
يا دكتور ما دايرة اقول ليك دي الحالة يا دكتور ههههههههههههه بس بقول ليك دا الحاصل هههه يعني محل ما نمشي في المستعصي دا ! ومشكور علي التحيات وعلينا بالتبليغ ..
ولك التقدير ..
Post: #47 Title: Re: غايتو يا السودانيين سمعتكم سابقاكم ! تاني Author: مني عمسيب Date: 04-25-2016, 09:55 AM Parent: #46
استاذي واخي الحبيب .. عبد الله بن عبد الله .
تحياتي واحتراماتي ..
Quote: كلام حلو يؤكد على أن السودانيين والسودانيات لن يتغيروا .
لكن يا استاذي عبد الله لو استمرينا بهذه الحالة الصعبة والظاهرة الغريبة في المجتمعات بأسرها يمكن تجينا بعد شوية بالمعكوس وزيادة الالقاب علينا حقيقة يا عبد الله يا خيي الموضوع دا دايرو دراسة للمتغيرات هههههههههههه .
ولك وافر الحب والشكر .
Post: #48 Title: Re: غايتو يا السودانيين سمعتكم سابقاكم ! تاني Author: مني عمسيب Date: 04-25-2016, 10:05 AM Parent: #47
الاصلي ود قباني ..
تحياتي وتحياتي ..
Quote: لكن قصة الحلايف انتهينا منها لانها بقت تسبب مشكلة و حرج ...
والله هنيألكم الوصلتو لي نهاية وحسم لجذور المشكلة . يا اصلي نحن ما بطلع طوالي لكن كمان بنطلع بعض مرات وبكون سعيدة جدآ في لقاءات زي دي لانها نوع من التغيير لكن البعكر المزاج انت بتكون عزمت وانا القلته ليها عازماك علي حسابي لكن غدرت بي وبارتني والله انا مباراتها لي ماعجبتني كنت حاسه دايرة تقوم شكلة هههههه وفعلآ احساسي ما خاب لكن تاني حلفته اي زول يعزمني الا يدفع هو والموضوع انتهي .
ولك الود والشكر يا اصلي .
Post: #49 Title: Re: غايتو يا السودانيين سمعتكم سابقاكم ! تاني Author: مني عمسيب Date: 04-25-2016, 10:08 AM Parent: #48
Post: #50 Title: Re: غايتو يا السودانيين سمعتكم سابقاكم ! تاني Author: مني عمسيب Date: 04-25-2016, 10:16 AM
الأخ الفاضل .. عوض محمد .
لك التحية ..
Quote: غايتو كلامكم دا الا في اوروبا و امريكا الخليج السلام بالتلتلة و صرة وش معاها
يا حبيب في اي محل عندنا النوع دا وانا بتكلم اي قصتي عن صديقة عمر يعني ما زولة لقيتها اول مرة ولا في الشارع . بعدين معقول انت ما عندك انسان قريب ليك نهائي ؟ معذرة لو اقتحمت خصوصياتك .
ولك الشكر اخي عوض .. ومافي اي مشكلة نحن هنا اعتبرنا اصدقاءاك .
Post: #51 Title: Re: غايتو يا السودانيين سمعتكم سابقاكم ! تاني Author: مني عمسيب Date: 04-25-2016, 10:21 AM Parent: #50
حبيبنا .. احمد ود الشيخ ..
تحيات مع ردوم الشوق هههههههه .
Quote: كاشيرات العالم دي على وزن عمال العالم هههه بقو عارفين النظام في سودانيين يعني في شكلة في الدفع
صدقت لانه الدليل الناس الجات كلها هنا بتشيد بالفكرة والظاهرة ههههه ودا دليل كافي في البعملوا فيهو والحايعملوهوا يعني تعبت وفتحت البوست من غير فائدة لانيي للحظة دي مافي زول ادان هذه الظاهرة المزعجة !
ولك الاشواق يا ابو حميد .
Post: #53 Title: Re: غايتو يا السودانيين سمعتكم سابقاكم ! تاني Author: مني عمسيب Date: 04-25-2016, 10:33 AM Parent: #51
يا حبيبة قلبي الاميرة ..
Quote: بعد الكلام القاله احمد الشيخ ..مش عندنا حق نقول في كرم اكتر من كده...بتخيل لي اذا حاتم الطائي ذات نفسه كان جانا هنا كان حيتحير....
يعني انت مصرة علي الفوضي البتحصل في الكاشير والجميع بعاين وبتفرج فينا ؟ هههههههههههههههه لو سمحتي دايرين الحلول ومن اسه بكلمكم يا الاميرات لو جيتني زيارة هنا ما دايرة ايي مبارة للكاشير البتباريني بعمل رائحة وبدفعها في اي محل هههههههه .
وزي ما بتقولي الله يديكم الصحة والعافية والفي المراد .
Post: #57 Title: Re: غايتو يا السودانيين سمعتكم سابقاكم ! تاني Author: على عبدالله بشير Date: 04-25-2016, 11:10 AM Parent: #47
Quote: وقال لينا ادفعوا الفاتورة بدينا الاتنين نتصارع في البدفع منو انا اصريت وهي اكتر اصرار !!
أختى منى لك التحية و لصديقتك هكذا نحن و هذا حالنا داخل السودان و خارجه و شئ تربينا عليه فصعب الفكاك منه ...
Post: #52 Title: Re: غايتو يا السودانيين سمعتكم سابقاكم ! تاني Author: ياسر منصور عثمان Date: 04-25-2016, 10:30 AM Parent: #1
دي (الفضلت ) لينا يا منى اختي
يوم تنتهي
نحن انتهينا
والله نحن بالجد شعب اسطى زي ما قال محجوب ود مريم بت محمود
لكن الزمن جار بينا
تسلمي
Post: #54 Title: Re: غايتو يا السودانيين سمعتكم سابقاكم ! تاني Author: مني عمسيب Date: 04-25-2016, 10:41 AM Parent: #52
ياسر منصور ..
لعلك طيبة ؟
مالك زعلان ود امي مافهمت مداخلتك لكن حسيت بعدم الرضي !
الله يرحم شاعرنا الحبيب الشريف ود مريم .
Quote: دي (الفضلت ) لينا يا منى اختي يوم تنتهي نحن انتهينا والله نحن بالجد شعب اسطى زي ما قال محجوب ود مريم بت محمود لكن الزمن جار بينا
تسلم من كل شر ..
Post: #55 Title: Re: غايتو يا السودانيين سمعتكم سابقاكم ! تاني Author: ياسر منصور عثمان Date: 04-25-2016, 10:48 AM Parent: #54
ما زعلان يا منى بت امي
انا بالعكس مبسوط من (الحاجة) دي وافتخر بيها..
لكن نحن فقدنا كتيييييييير من حاجاتنا السمحة بسبب الظروف التي نمر بها ..
مع ودي
Post: #56 Title: Re: غايتو يا السودانيين سمعتكم سابقاكم ! تاني Author: مني عمسيب Date: 04-25-2016, 10:51 AM Parent: #55
حبابك ود منصور ود امنا ..
Quote: انا بالعكس مبسوط من (الحاجة) دي وافتخر بيها..