الرمادي

04:54 PM April, 20 2016

سودانيز اون لاين
عبدالحفيظ ابوسن-كوستي / الحلة الجديدة
مكتبتى
رابط مختصر

زمان كنت بعرف ألوان الطيف السبعة والعرفناهو من المدرسة انها مع بعض بتكون اللون الابيض ..وادونا تجربة المنشور الزجاجي وكيفية تحليل اللون الابيض .. وحتي صوت المطر قالوا اسمو قوس قزح
اها
وكبرنا وكبرن البنوت الكانن قدرنا واخترعن ما شاء لهن من ألوان والشعراء زاتهم اخترعوا .. زمان كان ود المكي عرفنا بخلاسيته
ودي بقت لي مشكلة مع المدام
اللون دة شنو
اقول ليها اصفر
تقول لي بصلي
هي لكن ياتو بصل دة شندي ولا كسلا ولا الجزيرة فهو مختلف ألوانه !
احمر
لا طوبي
طوب حراري هييييي يااااكااا
حرجلي
اوف وايت
ترابي
تمباكي
لون خاتف لونين راحت .. وضاع الخاتف والمختوف
وعرفت ليك الوان جديدة
تراها الدنيا دي فيها كم لون
و
افترضتك لون اساسي
يمنح اللوحة ازدواجية القراية
بين خطوط اللوحة
والخط الاضافي الجاي من شبكية الزول البشاهد
اممممممممماك دييييش ابوالفيزيا !!
هسة دي ما رسمة فيزيا عديل لازمن ينعكس الضوء ثم يرتد لنري
كيف ترفض الجدائل فضة

كنا في الثانوي العالي عندنا استاذ فنون .. تقريبا اسمو مهدي
رجل فنان ومبدع
بطلعنا بره ويطلب مننا نرسم بقلم الرصاص .. عود .. علبة صلصة مجدوعة .. كوز ..ورقة مكرفسة
ومنو عرفنا ان قلم الرصاص ممكن يغنيك عن علبة الالوان .. وممكن تخلق منو مئات الالوان والدرجات

تحياتى اخ عبدالحفيظ
الموضوع طريف و علمى كمان
وما أكثر الفرق بين الرجال و النساء لو كنتم تعلمون و ما افيد هذا الفرق لو كنتم تصدقون☺
تعرف يا استاذ عبدالحفيظ علميا مثبت الفرق فى تمييز الألوان بين الجنسين
الرجل مثلا ممكن يلاحظ الفروقات بين لونين بطريقه أفضل فى حين انه المرأه تتفوق فى درجات وتفاصيل نفس اللون
يعنى كلام برتقالى خفيف و بصلى على بنى مرورا بخطاف لونين له أساس راسخ البنيان فى مركز البصر الانثوى
الدراسه أثبتت حاجات كثيره بس دا ما يتعلق ب اللون

Quote: لون خاتف لونين راحت .. وضاع الخاتف والمختوف وعرفت ليك الوان جديدة

هههههه
ياصاحب ,, ماتعصر على وارد الدمازين ده كتير
ده سحلب بصاحبك ود شيقوق.
انا ماشايف اون زينب هنا لييه؟

Quote: عندنا استاذ فنون .. تقريبا اسمو مهدي

وتقريباً لييه؟ انا ماقلت لك وارد الدمازين ده خَتَرى؟
واحد سأل التانى : إسمك منو؟
التانى: السمانى طه.
الأولانى: وطه ده نامن سمَّاك ماقال لك اسمك شنو؟

مرحب عبدالرحيم
وحبابك
اشكرك
اي مر علي كلام زي دة .. المرأة اكثر قدرة علي تمييز الالوان من الرجل .. عشان كدة برجعوني كتير للسوق
هسة في ذمتك دة لون وردي !!؟؟ اقول ليك جيب لون وردي تجيب لي لون .. وتجدعني بي اسم لون يغلبني اعرفو زاتو
اها سألوني من توب ولا لبسة بعمل رايح من لونها
لا لا رهيبة مافي كلام
وانا زول اصفر و احمر وابيض وكدة الالوان الواثقة من نفسها وما لابسة توب غيرها ولا عندها تصاهر ولا تزاوج ولا ذوبان ..

يا ابيض .. يا اسود
اللون الرمادي دة انا بحبهوش
ظهرت في مسرحية شاهد ما شافش حاجة
علي لسان قاضي !
الرك هنا .. علي لسان قاضي مطالب بتحديد المتهم هل هو مذنب ام لا علي بيانات مادية دامغة .. والقاعدة القانونية تعمل وهي
لا يحكم القاضي بعلمه الشخصي
لازمن من ادلة مادية قوية ..
وسير الحياة ليس هكذا
الحياة اعقد من لونين

الحياة اعقد من لونين
الا اذا اردت ان تكون قاضيا علي الناس
وادي الناس نفس الحق دة انهم يكونو قضاة عليك
لو شايل قلم احمر تصحح ليهم .. هم برضوا بشيلوا قلمهم الاحمر ويصححوا ليك
اديتهم صفر !!
ما مشكلة الصفر ما اصغر رقم في ناقص واحد وناقص مية وناقص ما لانهاية
الحياة موجودة بين اللونين ديل مش في نهاية كل لون

الفاضلابي يا صاحب
زمان في زمنا قبل ان تكتشف المرأة الالوان الحديثة .. كانوا بقولوا
السمح كافن دبي .. واظنها مدينة في افريقيا الوسطي .. اشتهرت بتصدير الفرح الذي يخرج من فوهة الفم !
تعرف الالوان دي مهمة جدا .. تناسقها مع بعض لتكتمل اللوحة .. مجموعة الالوان بتدرجاتها المختلفة تخلق هذا الواقع .. الحياة محايدة وموقنا منها هو ما يحدد لونها
الفحوصات الطبية زمان كانت بتعتمد علي الكيمياء .. معامل الفحص .. تفاعلات ثم محصلة والتشخيص .. اي فحص بالكيمياء .. وبتكون قريت الكيمائي ولا كما يترجم الخيمائى ما عارف شايلنها من الخيمة ولا الخيم !!
اها بعد بعتمدو علي التشخيص في اللون .. اللون الطلع شنو ودرجتو ويختو ليك النتيجة .. الهمبقلوين 70% واي جهاز فيهو نسبة خطأ ودة كلام علمي . والخطأ في مقياس جهاز الدم الاحمر 25% .. يعني سبعينك دي امكن تكون 95 ولا 65 .. شفت الفرق مرعب كيف .. يخلوك ولا ينصحوك تفتش القضيم واللوبا العدسي وتاكل ملاح الشرموط وامكن يدوك حبوب الحديد حقات النسوان الحمل .. الاعتماد علي اللون .. معمل يقول ليك دمك 70 وواحد ممكن يقول ليك 50 . الاعتماد علي درجة اللون بجهد بشري .. تقدير بشري !!
لكن الحمد لله العالم متجه لترك الكيمياء والاعتماد علي الفيزياء .. موجات صوتية ورنين واشعة مقطعية .. وحتي الفحوصات الكيميائية بقت تخش الكمبيوتر .. فيزيا برضو دوائر كهربائية ودايوتات ومظر بورد وكدة

المرأة السودانية .. بتعرف الموضة والتناسق .. تلف بيك السوق بكراع كلب . ليه دايرة ليها كارينا لي توبها متعدد الالوان .. دايره كارينا مسطردة ولا حرجلية .. اقول ليها ليه توبك دة هسة ما بيجي !؟
لا ما بيجي فهيو 4 الوان ومحاضرة عن الالوان . فهي دايرة لون يعمل كونتراست .. وما تفرح ساي برضو حتلف لي اسكيرت وشبشب يتناسق مع كامل اللبسة .. بعد تكتمل العملية وتظهر للعيان .. تفغر فاهك اعجابا للاناقة واللبسة الحلوة
الموضوع صعب .. ولكنها الحياة
من يري هذا الكون بتطرف لوني آحادي سيعجز عن رؤية جماله

سلام يا عبدالحفيظ،
بوستيك ده رغم إنو عن الألوان، لكن شايف فيهو تركيز على حواء.
سمعت كلام غريب شوية، وهو إنو المرأة ترى أحلامها بكامل الألوان، بينما يرى الرجل باللونين الأبيض والأسود، ما عارف الكلام ده صحّتو شنو.

أذكر في مرة اصطحبت أم العيال للسوق الشعبي في الخرطوم وكانت عايزة تقطع ليها حذاء، وكان الكلام عن الخيارات في التفاصيل وشاورتني بين إثنين من حيث اللون والتصميم. كان رأيي إنو ده أحسن من التاني، لأنو ممكن يمشي مع توب باللون الفلاني وتوب باللون العلاّني وتوب باللون الفرتكاني. بدأنا الكلام مع صاحب المحل وأنا مزهو برأيي. فقال، كلامك صحيح يا أستاذ، لكن مع احترامي ليك (باقي كلامو ما كان فيهو احترام ولا شئ) ... نحن أحسن لينا نتعامل مع النسوان ديل، لأنك كده إختصرت لي بيعة تلاتة شباشب في شبشب واحد.

بعدين تسمية الألوان مرات بتكون فيها ذوق ...... يعني لون خلفية منبر بكري ده، ممكن واحده تجي تقول ليك (ماستارد) واحد تاني يتفلسف يقول (دهبي فاتح) .... مرة واحد قال لي لي اللون الزي ده، (زي لون إسهال الطفل الصغير)

مرحبا ابوالريش
وحبابك
هو عن الالوان يا صاحب فعلا .. وللمرأة نصيبا اكبر لانها البتذكرنا بالالوان في حياتنا اليومية .. يعني انا مثلا داير شبشب حمام .. بمشي اقول لي بتاع الشباشب اديني شبشب 42 والخيارات حقتي بتبقا .. قدري ولا ما قدري .. مريح ولا لا
وما اعرف لونو الا امشي البيت
دة شبشب شنو الجبتو هسة
لامن انهجم زاتو واعاين ليهو تاني بنظرة فاحصة .. امكن دقسوني ومقطوع ولا حاجة فيرتد لي بصري منتصرا .. واقول لها مزهوا فرحا بحسن اختياري
مالو !! شبشب سمح ومريح وخشن من تحت ما يقوم يزلقنا يكسر مخروقتنا
فتنظر لي نظرة معلم حصيف لطفل متواضع القدرات وتكاد تخفي سخريتها فتعجز عنها
هسة دة لون يليق بيك
امممممك انا اخو اللون
الموضوع طفر لي حتات تانية والاسود يليق بك .. وهو قول ملغوم
يا امتن
لا يليق بي وبناتي بقن فتوات وانا لسة متجوهل
او
لا يليق لي لحسن ذوقي وفرط اناقتي
وهما قولان واحد في السماء والتاني في الارض
علي طرفي نقيض الابيض و الاسود
وخليني من فكرة شبشب حمام وجوة البيت .. دة دفاع فار ميت وطلقة سترتد نحوي .. حاتدخلني في جيبي طوالي والرجل السوداني مبهدل داخل البيت لا يراعي لذوق ونظر زوجته التي هي اولي بتأنقه وهندامه وذكرتني دايرة لي جلاليب بيت جديدة
ف شنو
قصة الالوان دي شايكة من شوك وليس الشياكة

عودة للذي اظنه استاذ مهدي بالقوز
مرة جاب لينا لوحة الموناليزا وورانا ليها .. مرة ولا سمحة خالص وبتعاين وعاقدة يدينها .. ولبسها قديم من زمن حبوبتي بت امحد زين الله يرحمها
قزعنا فيها .. ولم نر ما يستدعي التقزيع .. امكن لو كانت لابسة جكسا في خط ستة امكن كان نركز معاهو شوية
ونظرنا له نظرة بائسة ورداها لينا بي نظرة ابأس منها
وبقا يتكلم عنها وسرحت عقولنا في سعرها قروش كتيرة خلاس
معقولة رسمة ولا سمحة زاتو
وبقا ينضم معانا شي نفهمو وشي نجليهو .. تداخل الالوان .. زاوية الاضاءة .. تدرج الالوان .. زاوية النظر
وختم حديثه
اها اللوحة دي لو لقاها واحد هنا ما يشيلها الا يكون طاقة الشباك حقتو مكسورة وتكون قدرها .. يديها 8 مسامير اربعة بوصة علي الشباك

مأزق التصنيف
رحم الله جعفر بخيت
بحكو عنو نكتة بعد المصطلحات الحشرها في الثقافة السياسية الحكامية !
قالوا
مرتو قالت ليهو
معني الانتهازية شنو
قال ليها
يعني انتي تسافري وانا انتهز فرصة غيابك ادخل لي مرة
قالت ليهو
ايوووووووااا عرفت .. يعني انت تسافر وانا انتهز فرصة سفرك وادخل لي راجل
قال ليها
لا .. فرقي بين الانتهازية والدعارة
اها عاد كيف تفرق لكن
شفت ذكاء هذا الشعب !!
ما يبقا ليك حار لامن تقنب تلون في الناس

السلام عليكم
الأخ عبدالحفيظ أبو سن وضيوفه الكرام
تحيه طيبه

من الألوان هو عديم اللون ودي حاله بتمثل شفافية الزجاج
و المهم انو عديم اللون بتلون حسب لون الأفق يعني مره تلقي رمادي
ومره تلقاني قاني ومره تلقاهو اسود ومره ابيض انت هو شنو مابتكون عارف
الا تشوف من خلال الزول الوراهو - او إنعكاس لي اللون الأداهو ليهو سيد الرصة

بعدين ياعبد الحفيظ يا اخوي انت البصنف الناس هو الصنفو منو

الرمادي يا بو سن أحياناً يتجه نحو الرصاصي

الرصاصية تمنحه القوة واللمعان وتوقظه من سبات عميق

فيها الاشارات والحركة

أما الرمادي الرمادي فلا علاقة لي به

لك كل تحية

أحمد الشايقي

مرحبا التازي
القزاز زاتو ما بقا محايد ولا عديم لون
جابو القزاز الملون .. والذي لا يشف عن ما وراءه
ولو قزازك سادة جابو ليهو التظليل حسب ما تريد
وقزاز بيرسول
تقيل
خفيف
مضلع
وقزاز ساكنو جان بي جمبة تشوف الجوة وبي جمبة ما تشوف
وقزاز يجهر

مرحب الشايقي
الاسود يليق بك ..
شوف مستغانمي دة جملت اللون كيف .. لامن يعجبك
الرماد الكال حماد
والرمادة في خشمك
و
كانت الحياة ابسط من ان تحسها .. كان السودان حلوا سائغا طعمه ..
امهاتنا ما بطفن النار ابدا .. انتهت من طبيخها .. شالت الجمرات ختتها جوة مخزن الكانون واهالت عليها الرماد .. جا ضيف ولا دايرة توقد نارها .. تفج الرماد وتنكت الجمرات وتديهن فحمات وتهب بي هبابة السعف .. فتتشظي وتتلظي النار وتخرج السنتها
اها
ملاح زمان طاعم .. يجقجق في الكانون بي الساعات .. طعمو مختلف .. عليك امان الله هسة تخت لحمتك وتخش تستحمي وتصلي يختو ليك ملاحك قدامك يغلبك تدخل يدك فيهو ..
وطعمو زاتو ما ياهو
الرماد حفظ الجمرات قبل ان تسفر عن وجهها بفعل ضيف انصاص الليالي

السلام عليكم
الأخ عبدالحفيظ

اها نديك الجديدة لنج الإنت ماعارفها ولا بتكون سمعته بيها قبل كدا
في تظليل الكتروني في قزاز العربات اها نوريك قصتو يعني لو في بتاع مرور يبقي شفاف بي ضغطه بتاعت زر
ولو بتاع المرور مشي او انت فته منو يرجع مظلل وتتحكم كمان في درجة التظليل
جنس دا ناس التصنيف بودوها وين - فات الحربويا وفات الما بنفات
ودمتم

لا دي جديدة يا التازي .. اتوماتيك يعني
منو فيهو
قال سند
لكل حالة لبوسها
فكن
اذا نطقت باردا بلا انفعال

نخش في اطن النسج الحي كما قال حميد رحمه الله
اول مرة اسمع رمادي في المنبر
او
سب احدهم انه رماد
او
بروزته وادخاله قسرا لو كبير يتقص ولو صغير يتمطي المهم يخش جوة البرواز ..
ومتين ما ادخل فعل مبني للمجهول .. متين ما ادخل جوة البرواز تاني لو حمار الوادي هنق ما بطلع
يظل حبيسا هناك .. ثم تقرأ ردوده طبقا للتصنيف
وهو زاتو ببقا يشوف نفسو كدة مرات
وتبدا المكايدات to and fro

في تقديرات ان يكون الرد لما هو مكتوب وليس قراءة للنوايا وذلك يدفع النقاش خطوة للامام
قراءة ماهو مكتوب لا سبر النوايا والتكهن بها
الانسان متي ما صنفته وهو كاره لذلك تكون قد استعديته ..
طيب لامن احاور من انا ضده ببقا الهدف شنو .. رجما بالغيب ساي بناقشو عشان اكسبو في صفي او ان اجعله محايدا غض النظر عن هدفه هو من نقاشي .. لامن اصنفه زي الدايرو يكون في الخط المعارض لي دوما .. فأنا افقده قبل ان احاوره
مافي قنع من زول مهما كان موقفه .. عشت عمرا اثبت لي ان الانسان ليس جمادا . بل كائن حي ينمو ويتقدم او يمرض فيتقهقر .. شهدت من كان في اقصي اليسار يتحول اقصي اليمين .. ومن كان اقصي اليمين يتحول اقصي اليسار .. ولكن لم اشهد احدهم كان متزنا في مواقفة الا ورأيته دوما صاعدا نحو قمة الانسانية في مواقفه بشكل سلس وهادئ ومبرر

الأخ عبدالحفيظ

Quote: شهدت من كان في اقصي اليسار يتحول اقصي اليمين .. ومن كان اقصي اليمين يتحول اقصي اليسار

إن ثبات الراي عند الإنسان دليل علي التبلد الفكري فمن النادر ان تثبت علي راي ولكن دوما تتنقل بين الاراء - الغريب ان يمسي الإمعه -
ده قمة العقل وقمة الصدق مع النفس و الذات قبل ان تتوهم وتثبت لغير الناس اثبت لنفسك اول انك ماتتدعيه وليس مايدعيه الناس لك
======
سؤال بي الجنبه كدا انا شفاف حاليا بما إنك وصلته لي درجة لون محدد تقدر توريني من باب الفضول كدا بعد الشفاف في كم لون تاني عشان اصل الرمادي

ودمتم

مرحب التازي
الانحياز نحو قيم العدالة الاجتماعية .. والانفعال بقضايا الناس بشكل ايجابي ثابتة بشكل مبدئي دون تحنيط
الكون متغير وكذلك الوسائل

الاخ عبدالحفظ

Quote: لانحياز نحو قيم العدالة الاجتماعية .. والانفعال بقضايا الناس بشكل ايجابي ثابتة بشكل مبدئي دون تحنيط

تختلف شكل القيم والانفعالات بمقدار الزاويه التي تنظر بها فهي تختلف من كل زاويه لاخري مما يجعل منها غير ثابت
ففي حالتك تجاهلت - ممكن اقول واعتقد عن قصد وممكن اخت انك تناسيت
وممكن اقول انك اعتبرت الامر غير جادي - لسوالي عن درجات من اللون الشفاف لي اللون الرمادي - وممكن اعتبر هذا السوال هو مهم للغايه لي وممكن اكون هو تريقه وممكن اكون اقصد بيهو توريه لي سوال اخر
هنا تكمن تحديد الثوابت يختلف بمقدار رويتك وزاية ماتراه
والشيطان يكمن في التفاصيل
ودمتم

فعلا التازي
كما قالوا
الشيطان يكمن في التفاصيل
ف دعنا لا ندخله !
حول اللالون
لا حياد في هذا الكون وان ظننت ذلك

توجد مواقف رمادية !!

تحياتي أخ عبد الحفيظ أبوسن
جاء في القران الكريم" مذبذبين بين ذلك لا إلى هؤلاء ولا إلى هؤلاء "إ
ن تحايد وتتوشح بالضبابية في شكلة بين إثنين من أصدقائك لأنك لاتفهم حقيقة الخلاف فهذا مفهوم ، إن تتسربل باللون الرمادي في خلاف بين زوجين لاتعرف خلفيته وأبعاده ـ فهذا أيضا مفهوم ولكن من غير المفهوم أن تختار الحياد في قضية مبدأ أو قضية أخلاقية كُبري ـ وتعد هذا محمدة ومصدرا للتباهي ــ الحياد والرمادية في مثل هذه الأمور ـتعد منقصة وتعبر عن ميوعة فكريةوجبن سياسي وعدم مبدئية ــ إنها مولاة متخفية للجلاد وطعن في ظهر الضحية ـ حتي وإن كان غرضها مجرد إسترضاء كافة الإطراف وإنتزاع التصفيق وآهات الإعجاب ـ أو سعيا للتحلي بموضوعية زائفة وشائهة !! كتبت في موضع آخر((لحياد مرفوض في قضايا المبدأ والقضايا الأخلاقية الكبري ــ فهو هنا ليس محمدة فلا حياد بين جلاد وضحية وفاشية وحرية وظالم ومظلوم ــ معارضة الإنقاذ والتصدي لها مثلاقضية مبدأ وأخلاق وواجب وطني وإنساني ـ والتصدي لما يمارسه عُمر البشير ـ مسألة مبدأ لاتعرف الحياد والتقية والتخفي ! يقول دانتي في الكوميديا الإلهية“أحلك الاماكن في الجحيم هي لأولئك الذين يحافظون على حيادهم في الأزمات الأخلاقيه”)) حاشية:- منقول من بوست آخر لي بتصرف يسير

احتفي دوما بوجودك اخي كمال عباس
ف انت من الذين يكتبون بصرامة فكرية غير عدائية وموضوعية
تشكر جدا
كما اسلفت انا هنا لا يوجد حياد وان توهمت ذلك . لا حياد .. ف حتي الحياد هو دعم لموقف المتسلط
تقول النظرية الثورية في قراءتها لشروط الثورة .. دون اقتباسا مني .. تنضج الظروف الموضوعية للثورة حين يبدأ الشك يساور بعض الثوار .. حين يترددون ويهابون .. حين يصيبهم اليأس او نحو ذلك
ففي تقديري لا لون رمادي ابدا لشخص .. فما نراه رمادي من زاويتنا انما هو لونا اخر من زاوية اخري .. حين المنعطفات الخطيرة في تاريخ الوطن ونجد بعضهم يسوفون ويميعون الصراع ويحسبون انفسهم مع الثورة .. فهؤلاء ليس برمادين بل هم اعداء الثورة
حين الوضع ملتهبا ونري بعض البوستات التي تميل للتهاتر والصراع الشخصي وصرف الناس فهؤلاء ليس رماديين
اظن ما اوردته انت عن دانتي اوردته انا عن مالكوم اكس .. ودانتي قرأته منذ امد بعيد اظنه حدد مكانا كالاعراف لاولئك المتخاذلين يحسدون اهل الجحبم ويحسدون اهل النعيم