Post: #1 Title: رحلة اغترابي Author: عباس الدسيس Date: 04-10-2016, 08:27 AM Parent: #0
07:27 AM April, 10 2016 سودانيز اون لاين عباس الدسيس-Saudia مكتبتى رابط مختصربعد ما فصلونا من الخدمة ناس التمكين حاولت اشتغل تاجر اسبيرات الموضوع ما لفق معاي ولليوم عايز من ناس قروش ما سددوها لي محتفظ بشيكات طايرة منو العوض وليهو العوض ، قررت امشي السعودية اشتريت فيزا ((كاوبوي)) قلته يا زول الراعي واعي اهم حاجة تتخارج من البلد التي اصبحنا فيها غرباء وكنت بطمن في روحي هذه المهنة هي مهنة الانبياء... راعي تربية مواشي.... ركبت من كبري حنتوب البص لي بورتسودان شايل معاي شنطه فيها قميص وبنطلون وجلابية وعراقي والجواز وخمسة وعشرين ريال سعودي باقي واحد قريبنا كان بسافر السعودية كثير والعملة السودانية المعاي بتوصلني البحر. وصلت سواكن الحل الوحيد العندي عشان انتظر الباخرة ثلاثة يوم بالليل أأجر عنقريب نوم السهلة بتحصل فيهو حاجات عجيبة انت نايم تسمع خش كرش والعنقريب تحصل ليهو حالة اهتزاز بشدة ثم فجأة تتقلب الحالة لاهتزاز متناقم تفتح عيونك تلقي في غنماية بتنكرش بطرف العنقريب وحكاية انك تتغطي مهم شديد لانو في كدايس بتنط بسرعة وتلب الغطاء بعمل ليك حماية من تخربش اضافرين الكدايس المعلومة اداني لهيا واحد ادروب لقاني خالف كراعي وخاتي الشنطه مخدة تحت راسي والتبرع منو بالمعلومة كانت وراها قصد عشان ابيع لي توب بتاع دمورية اتغطي بيهو الراجل لقاني مفتح طلعت من الحقيبة الجلابة وعملتها غطاء. لقيت لي رفقة سفر صديق صالح عام زول ظريف رغم زهجو وطوالي قرفان سبب العلاقة شحدني سفة كان معاي صعوط عبدالحق من مدني صاعوط كافر اشتريت كم كيس معاي والكيس الكنت بسف منو ما عايز إكمل زهجت منو لو مال الزول دا شحدني سفة كنت عايز اجدعو لقيتا فرصة اتخلص من الكيس قلت ليهو خلي الكيس معاك انا عندي كيس تاني الراجل ارتاح نفسيا لكرم الصاعوط فتح معاي ونسة. تعرف يا ابو الشباب العناقريب دي كلها مرقوت ما بتقدر تنوم فيها للصباح عندك حلين اما تتمسح بزيت الراجع بتاع العربات أو تتخدر لو بقيت من ناس الحل التاني شيل جوازك في جيبك وخلي شنطتك في عنقريبك يلا معاي ندقش سواكن. نواصــــــــــــــــــــــــــــــل ......
Post: #2 Title: Re: رحلت اغترابي Author: ادريس خليفة علم الهدي Date: 04-10-2016, 08:35 AM Parent: #1
سلام يا عبس ..
يدقشك قطر مجيدو .. واصل
Post: #3 Title: Re: رحلت اغترابي Author: محمد مجيدو Date: 04-10-2016, 09:11 AM Parent: #2
يا عبس ...
ما متذكر الكديسة خربشتك وين ؟؟؟ وشفتا ادريس دا .. عاجبو قطري ....
عالم بطااله ..
Post: #4 Title: Re: رحلت اغترابي Author: عباس الدسيس Date: 04-10-2016, 09:38 AM Parent: #3
الخدمة المدنية في السودان فقدت رجال كيس صاعوط بطيبة خاطر كان سبب في حل مشكلة كبري في النوم من المرقوت حسي لو طرحت مشكلة دي اخش فيها معتمد سواكن ولجان البلدية لمحليات سواكن وتترفع للوالي وبعد اللفة الكبيرة والاجتماعات والماكله من وراها ارجعوها ليك للانضباط العام. واحد صاحبنا كل ما امشي الدمام بسجل ليهو زيارة ولازم انا ماشي عليهو اتصل من النهار عشان بالليل الراجل بكون واقف لط كنت بشفق علي حالو وبقدم ليهو نصائح عشان إوقف الشراب ولو لازم خلاس نهاية الاسبوع كفاية كان الرد بتاعو انو ما بقدر انوم لو ما تعاطي المكروه عمدا رغم عن محاولاتي الكثيرة ما اقتنع. الراجل قرر امشي السودان نهائي وسافر.... نزلت اجازة غشيتو في الخرطوم لقيتو اتغيير بصورة غريبة من بعد العشاء بنوم. يازول ماشاءالله الحصل ليك شنو؟؟؟؟؟؟ تعرف يا صديق بعد رجعت البلد هنا وصلت لقناعة انو الواحد اكون ملتزم الشغل البيت النوم ياخ لو انت عايز تمشي تجيب ليك قزازة سم هاري بعشرين جنية بلبت ليك عسكري امسكك بيها مع سبق الترصد والاصرار اها العسكري عشان افكك عايز ليهو مية جنية واصادر القزازة وبعد كدا اقول ليك وينو حق العشاء فقلت مالي ومال القراية ام دق وربنا سبحانة وتعال تاب علينا. ركبنا السفينة صديق السفر كان درجة ثانية وانا درجة ثالة في السطوح مع ناس الكوتشينه بقت بينا الفة وفتشنا لي طريقة نكون سواء اقترح علي امشي معاهو الدرجة الثانية ومافي زول بنتبه بعد السفينة تتحرك لانو السفن بتاعت السودانيين بتجوط زي القطر ما تعرف زول الاولي من الثانية من الثالثة. قعدت معاهو في الثانية عبارة عن كراسي وثيرة تتمد فيها وتاخذ ليك نومه بالله من السفينة اتحركت قامو ليك فينا شفع المغتربين ونسوانهم وتعال شوف الجوطه بيت سماية تكون ممد كرعينك وعايز تاخذ ليك غفوة تلقي الشفع البتجارو وقعو فيك لما تاخذ ليك نطه كمان في شفع عندهم كورة بلاستيك متعاقدة مع الوشوش صاحبي عندو نضارة قلت ليهو دخله في جيبك مع الشفع ديل بنزلوك تكابس في جدة الغريبة الشفع الجايطين ديل ما شوفنا ليهم ام ولا أبو نهرم والنسوان السمان اتلمو ليك في محل واحدة وهاك يا نقة قلت لي صاحبي محلك جربناها قبل ما اقول ليك رأي فيها احكي ليك موقف حصل لي. كان في ميز بتاع عزابة محامين اصدقاء لينا يوم الجمعه بنقيل معاهم مرة مشيت ليهم ليقت الجماعه مافي عندهم ضيف في البيت من ناس الضهاري قريب واحد من المحاميين عندو غرض وجاء نزل معاهم. سلمت عليهو سألتو قال لي الجماعه ديل طلعو وقال بجو بعد شوية قعدت معاهو اثناء احنا قاعدين جاء زول صاحبنا سلم واقف في الباب قال لي بمشي وبجيكم راجع الضيف بتاع الضهاري قال لي الزول دا منو ؟؟؟؟ قلت ليهو فلان الفلاني . قال لي شغال وين ؟؟؟؟ قلت ليهو عندهم توكيلات بتاعت لساتك عربات. قال لي عربات كبيرة ولا صغيرة ؟؟؟؟ قلت ليهو جميع انواع العربات قال لي ماركة اللساتك شنو؟؟؟؟ قلت ليهو والله ما عارف قال لي ببيعو كاش ولا بالدين؟؟؟؟ قلت ليهو ما عندي عربية عشان اشتري منهم اعرف كاش و ل بالدين. واستمر في الاسئلة المتوالدة من بعض جاتني حالة غريبة من الزهج وضيق الروح طلعت منو وقفت برة في الشمس الوقت كان نص نهار وسخانه شديدة وكمية من العرق نازل موية. جاء قريب الزول بتاع الضهاري عاين لي باستغراب وقال لي يا زول الجابرك شنو موقفك في الشمس الحارة دي ما تخش جوة قلت ليهو أخير لي الشمس الحارة دي من قريبك الجوة دا. أها يا اخوي درجة ثانية بتاعتك عرفناها قوم يلا السطوح نواصــــــــــــــــــــــــــــــل
Post: #5 Title: Re: رحلت اغترابي Author: الطيب عباس Date: 04-10-2016, 11:42 AM Parent: #1
طلعنا السطوح من طلعت الباب الصغيير بتاع السفينة نسمع ليك وي وي وي وي وي وي خمسييييييييييييييين والفراجة اكوركو ظعتو ظعتو ظعتو صديق الرحلة كان قبل التمكين ضابط اداري ومن اولاد المدن الراقيين الاجواء بتاعت ظعتو ومعطو ما بتنفع معاهو أها قال لي جبتنا لي جنس دا. في زاوية السطوح قاعدين اثنين لابسين سديري وكل واحد مولع سجارتو قصبة طريقة التدخين تشبه تدخين المشاطات ومضاريها بي يدينو الاثنين من هواء البحر عشان ما تكمل . قلت ليهو يا ابوالشباب شوف الجماعة الضاربين الكورنا لو قعدنا معاهم واتونسنا نصل جدة وما نشعر بالمشوار نجرب لو الموضوع ما نفع معاك نرجع تاني لشفع المغتربين. مشينا عليهم ... سلام عليكم يا جماعة ..... واحد رد السلام والتاني شفط السجارة وعشان اتكيف بخلي الدخان جوة كم ثانية ثم رد السلام وبادرنا بسؤال الاخوان اول مرة تجو السعودية. نطيت ليهو أنا...بالحيل اول مرة جينا نخم الريالات. عاين لي بصورة انسان يملك في زخيرته خبرت السنين ويجب الاستفادة منه. اها وفيزكم شنو ؟؟؟ تربية مواشي وعايز اوضح ليهو طبيعة شغلنا في السودان كانت شنو ما أداني مساحة للكلام والظاهر كان بفتش ليهو في ناس اتونس معاهم واصابتو حالة ملل من الزول البتونس معاهو. اسمع يا الاخو بقصدني أنا انت الظاهر عليك بتتعب في السعودية هنا البلد ما عايزة ليها زول شفقان انت قايل تلقط الريال ساهل خلي جيت من هناك عايزين نخم ...كان كدي امك خمت وصرت... اولا بالتبادي قنطرت السفة ما بتنفع هنا اتعود اشرب السجار مارلبورو الاحمر قريب من البرنجي لانو لما تمشي الخلا تسرح بالبهائم ما بتلقالك زول خاتي ليهو حقت صاعوط وابيع تشيل ليك كل نهاية شهر بكت سجاير العلبة فيها عشرين سجارة بتقعدك ثلاثة يوم والبكت فيها عشر علب بتقعدك شهر اها التكييف خليهو نجي لي خم القروش. الكفيل ان قالك اجيب ليك حاجات الشهر قولو لا بشتري براي عشان تشيل منو الراتب وتجي المدينة تحول قريشاتك طوالي لي اهلك إن خليت الراتب اتراكم الكفيل بياكلك وبعدين بتبقي ليهو مرقت القروش صعبة والواحد فيكم ما ابقي خشيم اقول عندي اخوي ولا ود عمي في المدينة الم عندو القروش والله العظيم ياكلك الضحي الاعلي. كان عندي ود عمي متزوج اختي شغالو في ورشة سنتين بلم عندو الراتب ومحددين ننزل سواء الكفيل اداني حق اخر شهر ومعاها حق البابور لي جدة طبقت شنطتي وجيت علي ود عمي ننزل السودان عليك امان الله وقت ناس الورشة قالو لي الزول دا سافر نهائي قبل اسبوع قعدته في الواطه وختيت يدي في راسي... ها جماعه كلامكم دا جد... معاهو سوداني مسنوح زيو قال لي كمان شال معاهو بوكسي .....((اترمد خشمك يا فلان سنينك ضاعن ساكت)) اها بقيت صادي علي الكفيل ورجعت تاني للغنم شايل عكازي وادوبي كان لميت القروش وحفرت ليهم في الواطه ختيتم في كووره ما كان ود عمك خبتك خبتت التوتو كوره وخلي راسك لافي زي المترار يا العوره نزلت اول شهر المدينة اشتريت لي شنطة البربطوها في البطن بتاعت العمرة والحج سنتين انوم بيها واقوم بيها وقت اتقلب علي بطني اخليها تحتي ولو اتلفت يمين اخليها بصفحتي. بعد سنتين نزلت السودان قلت حرم اشوفو ما إفرزونا من بعض كان إلقطونا لحم.... ما اكون ودعمي ومتزوج اختي كان اخوي شقيقي ما اخلي ليهو حقي. اها وصلت الحلة الزغاريد ضربت والناس اتلمو فيني وانا افتش لي زولي كان شوفتو حرم اكنكش في رقبتو الحلة كلها ما تفكني منو اها بعد حق الله بق الله وجات اختي تسلم علي قلت ليها راجلك التليفة وين اها أزول اتفقعت بكي وعمي كان حاضر اجتمعو ناس الحلة وقالو لي يازول انت ما بتجيب العيب والزول دا متزوج اختك وعندو منها سبعه شفع والله احنا شيلنا اللوم وقلنا ليهو الكلام العملتو عيب كبير شلنا ليك منو قروش نزلنا طوب احمر عشان تبني بيهو اوضة لي مرتك عاين هناك شايف الطوب ولا ما شايفو مرقته لي بره شوفتا الطوب مزروب بي شوك قلبي برد شوية الحروم زغرتن تاني شالتني الهوشة قلت ليهم الباقي عفيتو لي الله ورسولو. الوصية الاولي قلنا تخلي الصاعوط وتشرب مارلبورو احمر الوصية التانية با تحول قروشك يا تنوم فيهن ما تقول ودعمي ولا ود حبوبتي اما الوصية الثالثة..................
ما متذكر الكديسة خربشتك وين ؟؟؟ وشفتا ادريس دا .. عاجبو قطري ....
عالم بطااله ..
مجيدو سلام حكاية الكديسة خربستني وين نسأل ليك منها مليجي ادريس يوم بجيب لينا مصيبة رسل لي رسالة داخليه قالي اسأل مجيدو من هناية ديك الكانت راكبه معاكم قطر كوستي
دور حرك البابور وحاجزين قمرة اتنين دور ,,,, الحبيب عباس الدسيس والله مشتاقين يا رجل غايتو يا خوي قصصك دي يوم بتودينا التوج كل مرة اضحك والجماعة في المكتب يسالو فيني انت شو فيك عم تضحك ,, اقعد ابرر واتعزر ليهم ... لكن بالرغم من كده متابعين ونقرقر .. فواصل ومن غير فواصل خلينا تستمتع بالسرد الجميل لهذه الرحلة الجميلة ... .. واوع تقول لي دي رحلة عزاب دابها انتهت كيف تاني ترجع من جديد وصدقني ما بقدر اعيد ... هههههههههه
تحياتي : ياسر العيلفون .....
Post: #16 Title: Re: رحلت اغترابي Author: عباس الدسيس Date: 04-11-2016, 08:06 AM Parent: #15
تاتي الرياح بما لا تشتهي السفن... كنت منتظر الوصية الثالثة وفي هذا الاثناء ارتفع صوت المكبر يعلن تقديم الوجبة ببوفيه السفينه وما ادراك ما الوجبة والزحمة والمكابسه فلم هندي بسينما الوطنية في الثمانينات الاعمي شايل المكسر تتهادي بينا السفينة بين اصوات ناس الكوتشينه وريحة الرطوبه مخلوطه بدخان السجاير ونحن علي ابواب مدينة جدة وقف زول عندو دقن كبيره مغطيه حلقو وسط الجموع بالسطوح .... يا جماعه في زول ماشي الرياض.. مافي زول رد ليهو صاحب السفر لكزني انت ماشي الرياض شوف الراجل عندو شنو عملت نايم كررها مرة اخري .... يا جماعه مافي زول ماشي الرياض انا عايز لي رفقة سفر معاي في العربية.... نط صاحب السفر وفي اعتقاده بان تدخله سوف يعالج مشكلة وصولي للرياض وهو يعلم بانني املك فقط 25 ريال . الزول دا ماشي الرياض وكدا شبكني مع اب دقن قلت يلا نجازف معاهو. ارهاق السفر وعدم النوم بخليك في حالة عدم تركيز وعمك اب دقن نضام بالله تقول حلاق الخشم شغال واليد في الدركسون والكلام عن الغربة ومشاكلها سألني يا ولدي انت شباب المطلعك من السودان شنو تضييع اجمل ايام عمرك ... يا عمك بالله منو الما عايز اطلع من السودان البلد هناك خربت خربوها الكيزان وانا عامل بتظارف معاهو ((مفروض بعد كدا اسموها شلعوها الكيزان بدل السودان)) الله عمك طلع اتجاه اسلامي رفع كراعو من الابنص والتفت علي لقاني خاتي سفة الموضوع ما عجبو .. يا ولدي والعياز بالله اوع تكون شيوعي و ل بعثي... قلته عمك لو مشي معاي في مستوي النقاش دا بنزلني في نص الطريق نشوف لينا مراقه منو....معقوله يا حاج استغفر الله أنا حزب امة تقدمي عشان كدا سافي الصاعوط. بعد فتنا الطائف وقف في استراحة للصلاة عمك دخل الحمامات قلته اصلو المولانات ديل بطولو في الحمامات اخذ نومه انشاءالله نص ساعة في المسجد عشان استعد لي النقه بتاعتو بعد ساعة صحاني من النوم ...يا ابني صليت... قلت ليهو الله اقبل ... شكلو ما صدقني ركبنا العربية وخشا لي في مواعظ دينيه عندو كم كتيب لقطنهم من مسجد الاستراحة اداني ليهم حاولت ازوق منو اعمل فيها بقرأ في الكتب قال لي يا ابني بعدين انت قاعد لوحدك زاكر فيهم حسي خليك معاي قلت الراجل عايز ياخد فيني حسنات نستحمل اتضح المشوار طويل بالساعات وعمك ما بفتر من الكلام قام سألني سؤال في وقت خلاس أنا وصلت فيهو مرحلة قف من الزهج... يا ابني شكلك ما متزوج الزواج استقرار وبخليك تعرف درب الله انشاءالله تكون جيت من السودان خاطب . قلته عمك دا اخير منو مشي الكداري نخربها معاهو... والله يا مولانا كنت بحب لي بت وخاطبها انت عارف الظروف في السودان صعبة ربنا ما وفقنا نتزوج وغلطه معاها البت حملت وعشان نتخارج من الجنين دفعت دم قلبي الحمد لله اتفكيت منها وتاني ما عندي نية زواج باقي للرياض حوالي مئتان وسبعين كيلو عمك كضم تاني بقم ما قالها اول استراحة قابلتنا قال لي يا ولدي ربنا اصلحك واعدل طريقك انا خلاس مشواري حدو هنا حا انزل علي قرية قريبة من هنا شغال فيها معلم وانشاءالله لو اتقابلنا تاني اكون ربنا عمر قلبك بالايمان واتفارقنا ولي حسي تاني ما اتلمينا فرقا الطريفي لي جملو. وقفت في الشارع في محاولات للوصل الي الرياض حسي الكداده كلهم سعوديين وعساكر زمان كان الكداده غالبيتهم اجانب ((لفظ كداده يعني البشتغلو توصيل بعربات خاصة في الطريق)) اها قلته خمسة وعشرين ريالي اصل منها الرياض وربك بعدين اهون أنا واقف في الطريق مر علي باكستاني بعريبة كامري شايل معاهو باكستانيين هنا في البلد دي لما الواحد يأشر ليك بي راسو لي قدام عندها معني تاني عندنا في السودان توصيلة ملح الراجل اشر لي بي راسو ووقف . ياسلااااااام الدنيا هنا بخيرا ركبت مع الباكستاني علي اساس ملح الراجل تبرع وقف لي وصلنا الرياض. صديق انت روح بطحاء ؟؟؟ لا أنا ماشي غبيرا. مافي مشكله معلوم انت في غبيرا روح فين؟؟؟ ما عارف انا جيت من السودان جديد بس معلوم شارع غبيرا العام نفر هناك. الراجل مشكور وصلني شارع غبيرا العام نزلت من العربية قفلت الباب بفتش لي كلمات عشان اوصل ليهو جزيل شكري وامتناني . شكرا صديق والله انت نفر كويس ربنا اديك قروش كثير الباكستاني كفكف يديهو ونزل من العربية ...قروش ربنا خلي الحين انت جيب قروش بتاع سيارة إركب. صديق انت وقف لي حالو انا اركب فكر انت ما يبقي قروش يعني انت نفر وقف روح جهنم انت اركب لاحولاااااااااااااااا الله ولاااااااااااا قوة أنا جيب شرطة عندنا جدنا الشريف سليمان ابريش حبوبتي دايما كانت بتقول يا ابوريش من البوليس.... قلته امك الراجل من اول يوم عايز ارجعني السودان تاني يا بريش من البوليس !!!!! الشمطه قامت مع البكاستاني تاريهو هنا الواحد لو وقف ليك و ل اشر بي راسو معناها ما ملح قلته نتخارج من الراجل طلعت خمسطاشر ريال وخليت العشرة قلت ليهو يلا خلاس شيل انت نفر مافي كويس ما يبقي اجر من الله. بالله الراجل فكاها لي في وشي وكان في شوية هواء ربك ستر الخمسطاشر كانت ورقتيني خمسة وعشرة لحقته الخمسة وبقيت مطارد العشرة مع الهواء وفي مجازفة عجيبه جدا العشرة قطعت الشارع بي هناك والعربات هنا ما بتخليك تقطع بسرعه بقيت مركز عليها بنظري. الشارع اخد ليهو فجوة صغيرة سكيت العشرة وقت لميت فيها عاينت للباكستاني لقيتو واقف هناك بطرف الشارع التاني عشان احصلني لازم امشي نهاية الشارع للاشارة والاشارة لما تفتح عييييييييييييييييك زمن ضربت حساباتي لقيت عندي زمن اودع فيهو البكاستاني من بعيد وادخل زقاقات غبيرا. نواصـــــــــــــــــــــــــــــــــل
Post: #17 Title: Re: رحلت اغترابي Author: عباس الدسيس Date: 04-11-2016, 08:52 AM Parent: #16
Quote: حبيبنا عبس الدسيس
قلته لي درجة تانية ما حبابه .. ههههههههههه ذكرتني بتاع المطار اللقه شفع المغتربين جايطين وقالبين صالة القدوم فوق تحت هههههههههههههه
حبيبنا خالد اخبارك مشتاقون حكاية الطلح تحفة مرة مشيت لقريبتنا زيارة في مناسبة عندهم وشايل معاي علبتين حلاوة فاخرة جدا معاي الاولاد ختينا الحلاوة علي جمبة وقدمو لينا حلاوتم طلغت النوع التعبان البتلصق في السنون المرأة والراجل مصرين علي الاولاد اشيلو حلاوة أها الشفع حاولو ياكلوها اتلصقت ليهم في السنون قامو طلعوها وختوها ليهم في التربيزة وهم مصرين علي الاولاد اكملوها واشيلو تاني البت قالت ليهم حلاوتكم كعبة لو عايزين ادونا من حقتنا ياخ انا الضحك عايز اشرطني قامو فتحو ليهم علبة من حقتنا يلا الاولاد قعدو اقزقزو بعد جينا ماشين وطلعنا بره الباب رخيت اضاني اسمع ليك المرأة قالت للراجل ...باقي العلبة حقتم خليتو ليه ما كان تلحقو ليهم اتمو اكلهم بره الشارع.
عاوز تفصلنا من الشغل بالضحك قلت لي زعلتك بتاعت مولانا عاوز تفكها في الباكستاني الله يعطيك العافيه
Post: #19 Title: Re: رحلت اغترابي Author: فتح العليم محمد أبوالقاسم Date: 04-11-2016, 10:10 AM Parent: #17
تحياتي عباس رغم حلاوة الحكي والسرد لكن يبدو لي أنك تعيش حالة إحباط دفعتك لإجترار تلك الذكريات . مستمتعين بقلمك وحضور بإذن الله حتى نرى بدايات هذه الرحلة أما نهاية الرحلة بيد الله سبحانه وتعالي . موفق
Post: #21 Title: Re: رحلت اغترابي Author: سيف النصر محي الدين Date: 04-11-2016, 01:47 PM Parent: #20
هسه اولادك البعزلوا في الحلاوة ديل اكان جو معاك من قولة تيت في نفس الباخرة كانو قشوا اي حاجة قدامهم مش لو بتتلصق في السنون لو تكسرهم عديل.. لقوها باردة اولاد اللذينا هههههههه. الهروب الكبير بعد 1989 ده فعلا داير توثيق.
عندنا زميلنا في الشركة مهندس جاب اخو قانوني من السودان بفيزة سواق خاص الوقت داك كنا عذابة كل زول عندو غرفة. سكن اخوهو معاهو كم يوم اخوهو مرض حمي شديده وجفاف في اللسان وتكسر في الجسم كنت بكون معاهو في الغرفة وهو شكاي تقول مرة عجوز ضهري كرعي عندي حمي. أنا بقول ليهو امشي الدكتور كان ما عندك قروش ارح لي صاحبنا فلان مع عدم اقتناعي بدكترتو لكن بفك الحيرة .... أها الراجل اقول لي لا لا ياخ ما محتاجة دا تعب السنين بتاع السودان يادوبك ظهر شغال معانا تعب السنين لما يوم اغمي عليهو خميناهو وجريان الدكتور اكتشفنا المرض سببو اخوهو زميلنا كان خاتي ليهو السرير بتاعو قصاد المكيف الاسبليت وضربو الهواء البارد والراجل شابكنا تعب السنيين تعب السنيين . وصلنا الرياض استجمينا من تعب السنيين تحت المكيفات ........وبقينا في استخراج الاقامات الفيزا استخرجت لي ثلاثة في ورقة واحد سمسار الاقامات قال لازم نتلمي كلنا عشان نعمل التقرير الطبي لاستخراج الاقامات كلها فترة واحدة ومن مستوصف واحد... بتأمر علينا... ظهر معاي واحد ادروب مشلخ مطارق سواق اختو شغالة مع اميرة راجل لذيذ بصورة غريبه مشكلتو تهاظر معاهو ما بفهم الموضوع هظار الا بعد فترة طويلة حتي اجمع والثالث من اولاد الخرطوم بتاع معامل طبية بتاع الخرطوم دا الجاب لينا المصايب. سمسار الاقامات راجل سيء جدا من البطانة اسمو الامين مشلخ تي مشينا نعمل الفحوصات بعد اتلمينا الثلاثة لاحظت ادروب عيونو صفر قلت ليهو يا ادروب انت اصلو عيونك صفر ولا احتمال اكون عندك الكبد الوبائي هنا ادروب ركبو الجن. شنو بتاع الكبد دا انت تقول؟؟؟ يرقان ما بتعرف يا ادروب ايواااااااااااا والله يا أباس اختي قالت كدا هسي نعمل شنو !!!! ادونا الفاضي بتاع الفسحة والبول ومنها نمشي ناخذ الدم وبعدها الاشعة لاحظت ادروب راسو ضارب سألني: انت يرقان بعرفو كيف؟؟؟ من فحص البول يا ادروب بالله كان اشوف ليك ادروب عصر لي الفاضي بتاع فحص البول في يدي قلت ليهو شنو يا ادروب ارجعو ما عايز تعمل فحص بول ولا شنو؟؟؟ انت يا أباس ما بتفهم كب لي شوية من بولك في العلبة هنا.... ادروب حيرني قلت نهاظر معاهو اسمع بملاها ليك بول بس بعد النتيجة تطلع نضيفة تديني قروش. نطط عيونو وقال لي يااااااااااا الله انت يا ناس جزيرة كمان بول تبيع ما تخاف الله. خلصنا انا وادروب الفحوصات ود الخرطوم قال ما بعمل فحوصاتو في مستوصفات البطحاء لان مستوصفات ما راقيه وكلها هنود وبنقاله وممكن الخبتو ليهو النتيجة والراجل مشترط علينا من مستوصف واحد كل النتائج ادروب إحنس فيهو وأنا شغال معاهو تحنيس وجبنا ليهو فاضي العينات ربك رب الخير اقتنع دخل الحمام وجاب معاهو العينات ختاها لينا في الكنبه جمبنا وقعد صاري وشو باقي ليهو الدم والاشعه قلت لي ادروب شيل العينات وديها المعمل انا بمشي معاهو لباقي الفحوصات الزول دا متلكلك وباخر لينا الاقامات. ادروب عوج خشمو وحمر عيونو... انت يا أباس عشان اديتني بول انا اشيل وسخ ود خرتوم دا لو إقامة ما إطلع كلو كلو أنا ما بشيلو!!! ود الخرتوم فال خلاس يا جماعه أنا بمشي اعمل فحوصاتي في مستوصف في العيا مع اخوي هناك اجيبا ليكم بعد بكره . انا.... يازول استهدي بي الله باقي ليك الدم بس خلينا نخلص عشان نطلع الاقامات. الراجل رافض وحرن. ادروب عمل فيها عايز احل المشكله جراني من يدي شويه منو وقرب لي اضاني ... أباس ناس الخرطوم ديل بكون عندهم مشاكل انت أدي دم امكن خايف عندو مرض الايدز داك يا ها
Quote: بالله كان اشوف ليك ادروب عصر لي الفاضي بتاع فحص البول في يدي قلت ليهو شنو يا ادروب ارجعو ما عايز تعمل فحص بول ولا شنو؟؟؟انت يا أباس ما بتفهم كب لي شوية من بولك في العلبة هنا....ادروب حيرني قلت نهاظر معاهو اسمع بملاها ليك بول بس بعد النتيجة تطلع نضيفة تديني قروش.نطط عيونو وقال لي يااااااااااا الله انت يا ناس جزيرة كمان بول تبيع ما تخاف الله.
يا أخي انت راجل لذيد وصريح والله قعدت اضحك في الشركة زي المجنون ... حكاية بيع البول دي ذكرتني البنغالي اللي كان بيشتغل راعي إبل وطبعاً زي ما بنسمع أن بول الابل بيساعد في شفاء مريض السرطان اذا شربه المريض والبنغالي كترت عليهو الطلبات فلجأ الى حيلة خلت الشيطان قال لأولادو ( اتعلموا يا وهم من البنغالي ده) زولنا بقى يبول في قوارير ويبيع القارورة بـ 100 ريال وشغال كده سنين لحدي ما وقع في شر عمله وقبضوهو .ما عايز أخرب عليك البوست كنت بنزل ليك موضوع البنغالي ده لكن موجود على النت ... هههههههههههه واصل والله ذكرتني لمن جيت المملكة قبل 25 سنة ابداع يا دسيس
تخريمة : المغترب لما يصل مرحلة سرد قصة إغترابه ، فذاك يعني أحد أمرين :
إما أنه زهج من الغربة وعاوده الحنين إلى أيامه في السودان. إما أنه في حالة إسترجاع لحسابات الربح والخسارة في فترة الإغتراب ( بمعنى ماذا أنجزتَ وما هي الأحلام المتبقية وهل يمكن تحقيقها ) ؟؟؟؟
الحالة التانية دي بتكون إحدى مخرجاتها ( القرين كارد ) ...
Quote: دور حرك البابور وحاجزين قمرة اتنين دور ,,,, الحبيب عباس الدسيس والله مشتاقين يا رجل غايتو يا خوي قصصك دي يوم بتودينا التوج كل مرة اضحك والجماعة في المكتب يسالو فيني انت شو فيك عم تضحك ,, اقعد ابرر واتعزر ليهم ... لكن بالرغم من كده متابعين ونقرقر .. فواصل ومن غير فواصل خلينا تستمتع بالسرد الجميل لهذه الرحلة الجميلة ... .. واوع تقول لي دي رحلة عزاب دابها انتهت كيف تاني ترجع من جديد وصدقني ما بقدر اعيد ... هههههههههه
تحياتي : ياسر العيلفون .....
الوجيه ياسر سلام وتحياتي للاسرة الكريمة حمدلله علي السلامة شوفتا ليك تغريدة في الفيس مبروك الزواج كنت عايز اخش عليك بس النت عندنا كان ضعيف ما بعمل داون لود للفيس مشتاقين يا حبيبنا
Quote: تحياتي عباس رغم حلاوة الحكي والسرد لكن يبدو لي أنك تعيش حالة إحباط دفعتك لإجترار تلك الذكريات . مستمتعين بقلمك وحضور بإذن الله حتى نرى بدايات هذه الرحلة أما نهاية الرحلة بيد الله سبحانه وتعالي . موفق
فتح العليم سلام يا حبيبنا اقول ليك ولله لا احباط لا شيء حسيت شكل المعانأة أول ما جيت هنا عايزة توثيق اتوكلت علي الله وكبيتا واحد من الناس رغم المصايب البتقابل الزول من الصعوبة اصل مرحلة الاحباط بل بقابلها بي سخرية تحياتي وتقديري
Quote: هسه اولادك البعزلوا في الحلاوة ديل اكان جو معاك من قولة تيت في نفس الباخرة كانو قشوا اي حاجة قدامهم مش لو بتتلصق في السنون لو تكسرهم عديل.. لقوها باردة اولاد اللذينا هههههههه. الهروب الكبير بعد 1989 ده فعلا داير توثيق.
دكتور سيف النصر اخبارك يا وجيه احيانا بحكي ليهم كلام بشوفو غريب او من الخيال ولدي الكبير في7 Grade ياخي مرة قال عايز ليهو حذاء بتاع كورة لقيتو بي 400 ريال ضربتها بالسوداني لقيتها تساوي حوالي مليون وميتين واربعون جنية قلته ليهو زمان بشترو لينا حزاء اسمو الكبك للمدرسة والخريف الوالدة الله ارحمها كانت بتعمل لينا شنطة المدرسة من قماش كيس المخدات القديم . الولد المفعوص ما برد لي بتعامل معاي كانو انا حارقاني تطلع القروش ...حاجة تمقص ما عايزين افهمو دا واقعنا زمان. لما اقولو ماشين McDonald's بقول ليهم احنا زمان ملاح الغذاء بنتعشي بيهي وتاني يوم نرجع وقت الفطور من المدرسة نفطر بيهو بتي البعد الولد الكبير بتقول والله بابا ((Liar)) وكااااااااك اقعدو اضحكو. فعلا لقوها باردة تحياتي وتقديري
Quote: يا أخي انت راجل لذيد وصريح والله قعدت اضحك في الشركة زي المجنون ... حكاية بيع البول دي ذكرتني البنغالي اللي كان بيشتغل راعي إبل وطبعاً زي ما بنسمع أن بول الابل بيساعد في شفاء مريض السرطان اذا شربه المريض والبنغالي كترت عليهو الطلبات فلجأ الى حيلة خلت الشيطان قال لأولادو ( اتعلموا يا وهم من البنغالي ده) زولنا بقى يبول في قوارير ويبيع القارورة بـ 100 ريال وشغال كده سنين لحدي ما وقع في شر عمله وقبضوهو .ما عايز أخرب عليك البوست كنت بنزل ليك موضوع البنغالي ده لكن موجود على النت ... هههههههههههه واصل والله ذكرتني لمن جيت المملكة قبل 25 سنة ابداع يا دسيس
الهادي الشغيل اخبارك يا حبيبنا حكاية البنقالي فعلا كانت روعه تعرف يا الشغيل غالبية الناس الجات من السودان بعد ناس المشروع الحضاري كانت ليهم معاناة بصورة كبيرة كما قال د. سيف النصر يسمي الهروب الكبير الناس عايزة تطلع. تحياتي وتقديري
حامد بدري يا صديق مشتاقون مفروك اعمل .........كوكه اقول ليك شايل لي 25 ريال تقول لي الغذاء جليتو ياخ الرحلة دي انا ضوقتا فيها جوعه ما تتخيلا كلو كلو وقت نزلت مع مولانا المسجد لقيت بلح عملت بيهو سندة للرياض ومع الجوع عمل لي اسهال تحياتي وتقديري
تخريمة : المغترب لما يصل مرحلة سرد قصة إغترابه ، فذاك يعني أحد أمرين :
إما أنه زهج من الغربة وعاوده الحنين إلى أيامه في السودان. إما أنه في حالة إسترجاع لحسابات الربح والخسارة في فترة الإغتراب ( بمعنى ماذا أنجزتَ وما هي الأحلام المتبقية وهل يمكن تحقيقها ) ؟؟؟؟
الحالة التانية دي بتكون إحدى مخرجاتها ( القرين كارد ) ...
واصل يا عبس
سلام يا ريس اخبارك واحد صاحبنا بسأل فيهو عن حكاية الحنين للبد والرجعه النهائية قال لي : يا حبيبنا الزول بعد اموت وادفنو هنا بجيو ادقو ليك باب القبر بقولو ليك ما جددت الاقامة..... قلت ليهو لا قال لي الشبر بتاع القبر بالايجار النصف سنوي .....قلت ليهو لا قال لي خلاس انا حاجز في مقابر النسيم حكاية الحنيني انسي يا ريس. خليك مع الحالة بتاعت القرين كارد هي الاقرب. المرأة لو قلت ليها ننزل الاجازة السودان تشاكلك كم شهر اخططو للاجازة في دولة تانية من بداية العام الدراسي تحياتي وتقديري
Post: #34 Title: Re: رحلت اغترابي Author: عباس الدسيس Date: 04-12-2016, 08:06 AM Parent: #33
سلمنا الامين المشلخ تي الفحوصات والجوازات ومبلغ استخراج الاقامة وقول كدا اغطس ستة شهور بندق ليهو في البيجر (( جهاز نداء قبل الجوال)) ما برجع لينا توصلت لفكرة اشوف لي شغله اقزقز بيها بدل العطالة اشتغلت مع وكيل هوندي الوعلان بايع معرض ما كنت متخيل ابدع في هذه الوظيفة اول مرة اشتغل فيها ادونا كورسات في مواصفات السيارات والشغله تعتمد علي شرح مواصفات السيارات وتلبس ليك بدلة وكرفته وتكون واقف غالبية الشغالين في المعرض مصريين وشوام الشغل معاهم صعب في المبيعات خاصة المصاري البقولو للسعوديين (( شخبطة سيادتك تخطيط لحياتنا , صوابع سيادتك اشارة لمستقبلنا ))) مع الراتب بدوك نسبة في المبيعات لازم اشوف لي تكتيك غير شرح المواصفات للسيارة عشان ابدع اول حاجة فكرت فيها اصطياد الاسر والتركيز علي المدام هي مفتاح الراجل للشراء واهم شيء تعمل فيها ظريف واحد مصري جاء المعرض مع زوجتو عشان اشتري ليهو هونداي اكسنت بالاقساط زاغ من البياعين كلهم وقال اقع السوداني بكون خطو واحد اشرح المواصفات ونشتري ونمشي نيشت ليك علي المدام اقنعتها ليك الهونداي الاكسنت لما تكون ماشي بيها في مرور سريع زي الراكب ليك كرتونة حكيت ليها قصة ماساوية عن حادث من خيالي لاسرة حصل ليها حادث بالاكسنت والالنترا والسوناتا افضل خاصة هي عندها ثلاثة اطفال حجم السيارة اكبر شعرت راجلها بدأ اتزاوغ مني مشي لي بياع تاني .كنكشت ليك في المرأة وخشيت ليك في قصص تانية قلت ليها الرجال دايما بحبو لم القروش ولم القروش بخلي الراجل عينو طايرة ممكن اتزوج تاني وهاك يا نبذ في الرجال بعد شوية اشوف ليك الراجل دخل غرفة الزجاج إعمل الاجراءات لشراء الاكسنت قلت يا زول الشغله دي مع الشوام والمصريين ما بقدر عليها فكيت المرأة اشوف لي زبون تاني عليك امان الله مشت جرتو من جوة مكتب الزجاج وجاتني عدل تسأل فيني أها نبقي علي الالنترا و ل السوناتا قلت ليها السوناتا .ماشي ليك فارد عضلاتي أول بيعه تضرب بعد الراجل كمل الاجراءات شايفو بتكلم مع مرتو بابتسامة توحي انو عايز اشكرني وجاء ماشي علي عديييييييل بعد وصلني قبل بي ضهرو علي المرأة وقال لي:(( الله اخرب بيتك يا سوداني يا عــــر ص دا انت طلعت لي من فين انعل ابوك وابو البشير بتاعكم)) بعد كدا الموضوع فتح معاي حيرت الوعلان الكبير ذاتو.الغريبة مفروض استفيد من تجربة بائع المعرض الاشتغلتها لمدة ستة شهور لو عايز اشتري أي حاجة ما اسوق معاي المدام العكس ياخ لو عايز اجيب رغيف من المخبز تلقاها راكبه معاي بعد اشتري الرغيف تفتح الكيس تقول ليك مالك جبتا الرغيف الابيض وكمان بي ريالين رجعو جيب الاحمر بي ثلاثة ريال بالله ما تنسي جيب معاك فطاير.كمان في مشكلة وجات لي صالحي قبل الزواج كان زوقي في اللبس سيء تلقاني لابس بدلة بنية والقميص اخضر والكرفته حمرا الوان افريقيه صارخه كانت بتجيب لي السعوديين من بعيد اقصدوني ((اخبارك يا زول ايش علومك)) واكنكش ليك في المرأة .مره مشيت الصلاة متاخر كنت مع زبون والصلاة داخل الصالة اتوضيت بسرعة البنطلون والبدلة اتملو موية اها لما قلته السلام عليكم لبست السفنجة عشان امشي البس الجزمة في اللحظة دي باب المعرض اتفتح دخلت سعودية مع زوجها متعطره بعطر لاحولااااااااا قلت دي صيدة لو مشيت لبسته الجزمة الشفوت ديل بشيلوها كبستهم لسؤ الحظ الوعلان كان ماري بالمعرض وشافني من اغرب الجزاءات الادارية اخذت فيها انذار وخصم وحافز الخصم كان خمسمائة ريال من الراتب والحافز المرأة طلعت عندها مؤسسة عطور اشترت ليها عشرة سيارات هونداي اكسنت لمندوبي المبيعات وكاش وفي ظرف نص ساعة رقم قياسي للبيع كان الحافز خمسة الف ريال واخر الشهر كانت صورتي معلقة في اللوحة لافضل بياع غايتو الدنيا لو عاوزة تديك مافي زول بحوشا
200 كيلو من خارج الرياض تمد ليهو 15 ريال ..؟ اريتو كان لفخك بمفتاح العجل ولا يد العفريته ..
Post: #36 Title: Re: رحلت اغترابي Author: عباس الدسيس Date: 04-13-2016, 08:18 AM Parent: #35
Quote: 200 كيلو من خارج الرياض تمد ليهو 15 ريال ..؟ اريتو كان لفخك بمفتاح العجل ولا يد العفريته ..
حبيبنا الطاهر اخبارك كان معانا في البنك كهربائي بتمتم كل يوم من الصباح بجي بايته معاهو واقف لط وجنو دين بكمل الماهية من خامس يوم في الشهر انا شغال معهو نصايح يا زول اشرب يوم الخميس المسألة دي ما جميله كل يوم تجينا من الصباح سكران النصايح البديها ليهو عشان ما اقول لي ديني قروش اشوفو جاي علي طوالي اقتح ليهو الموضوع بعد فترة قال لي انا خلاس خليت الطشة قعد ليهو اسبوع رجع تاني وجاء من الصباح وشو مورم راسو ملفوف بي شاش. يازول الدقاق منو ومالك رجعت تاني للطشة ؟؟؟؟ قال لي انا ما رجعت في واحد عزمني ملح طيب الفلقك كدا منو ؟؟؟ امس كان عندنا حفلة في الفريق مشيت لي خطيبتي عشان تمشي معاي امها قالت لي الساعة عشرة تجيبا راجعه لانو ابوها بقفل الباب ولو عرف مشت معاك بعمل مشكله اها مشينا الحفلة لاقاني صاحبي العزمني ملح قلت اوزن الراس عشان الواحد اكب الرقيص كاس كاسين رقصه رقصتين ونسيت كلام ام البت قعدنا لما الحفلة انتهت جينا راجعين البيت لقيت ابوها نايم بره في عنقريب وخالف كراعو قال للبت خشي جوه كلامي معاك بعدين انا جيت عليهو عشان أحنسو ما اعمل معاها شكله بالله وقفت جمب العنقريب عمك قام علي حيلو عندو عكاز تحت العنقريب شالو وقع فيني تخبت خلي الدم موية جاري من راسي . طيب وقت عمك دنقر تحت وشال العكاز انت الموقفك ليهو شنو كان تقوم جاري ؟؟؟؟؟؟ قايلو عايز اشيل الابريق..... انت قايل انا بنتظرو لما افتش مفتاح العجل ولا يد العفريته والله الا اكون طاشم زي الكهربائي
Post: #40 Title: Re: رحلت اغترابي Author: محمد عبد الله الحسين Date: 04-14-2016, 07:53 AM Parent: #39
الأخ الدسيس ما شاء الله سرد جميل و ممتع و واقعي ...................و اللغة بسيطة ............................و قريبة من الوجدان. أعذرني لدخولي المتأخر لأني ما كنت قايل الطرح بمثل هذه الطلاوة الآسرة. و العتب على العنوان...................................... الذي جعلني اعتقد إن الموضوع مثله مثل كثير من المواضيع المكررة التي تحكي عن الإغتراب .............................( لا أقصد أن تغيّر العنوان...بل أن نغيّر نحن طريقتنا في الحكم المتعجّل). لك التحية
Post: #42 Title: Re: رحلت اغترابي Author: Mohammed Alhasan Mohammed Date: 04-16-2016, 07:11 AM Parent: #41
Quote: مره مشيت الصلاة متاخر كنت مع زبون والصلاة داخل الصالة اتوضيت بسرعة البنطلون والبدلة اتملو موية اها لما قلته السلام عليكم لبست السفنجة عشان امشي البس الجزمة في اللحظة دي باب المعرض اتفتح دخلت سعودية مع زوجها متعطره بعطر لاحولااااااااا قلت دي صيدة لو مشيت لبسته الجزمة الشفوت ديل بشيلوها كبستهم لسؤ الحظ الوعلان كان ماري بالمعرض وشافني من اغرب الجزاءات الادارية اخذت فيها انذار وخصم وحافز الخصم كان خمسمائة ريال من الراتب والحافز المرأة طلعت عندها مؤسسة عطور اشترت ليها عشرة سيارات هونداي اكسنت لمندوبي المبيعات وكاش وفي ظرف نص ساعة رقم قياسي للبيع كان الحافز خمسة الف ريال واخر الشهر كانت صورتي معلقة في اللوحة لافضل بياع غايتو الدنيا لو عاوزة تديك مافي زول بحوشا
تحياتى استاذنا عباس الدسيس ....
شكرا لهذا الجمال وهذا التميز الذى ثنثره عبر بوستاتك الجميلة ...
وبالمناسبة السودانيين فى دول الخليج هم الوحيدين البكونو حايمين بالسفنجات فى المكاتب مع البدلة والكرفة او حتى البنطلون والقميص ...الواحد فيهم ما يصدق يجى وقت الصلاة ويخش ليك فى السفنجة يمكن لحدى نهاية الدوام ...ويمكن دى الحاجة الوحيدة الما قادرين يتخلو عنها رغم انضباطهم النسبى فى الاتكيت والمظهرفى اماكن العمل الرسمية ...
Post: #43 Title: Re: رحلت اغترابي Author: عباس الدسيس Date: 04-17-2016, 05:16 AM Parent: #42
Quote: الأخ الدسيس ما شاء الله سرد جميل و ممتع و واقعي ...................و اللغة بسيطة ............................و قريبة من الوجدان. أعذرني لدخولي المتأخر لأني ما كنت قايل الطرح بمثل هذه الطلاوة الآسرة. و العتب على العنوان...................................... الذي جعلني اعتقد إن الموضوع مثله مثل كثير من المواضيع المكررة التي تحكي عن الإغتراب .............................( لا أقصد أن تغيّر العنوان...بل أن نغيّر نحن طريقتنا في الحكم المتعجّل). لك التحية
سلام يا حبيبنا محمد عبدالله شاكر ومقدر للمتابعة والاطلاع مع خالص تقديري
Post: #44 Title: Re: رحلت اغترابي Author: عباس الدسيس Date: 04-17-2016, 05:20 AM Parent: #43
Quote: تحياتى استاذنا عباس الدسيس ....
شكرا لهذا الجمال وهذا التميز الذى ثنثره عبر بوستاتك الجميلة ...
وبالمناسبة السودانيين فى دول الخليج هم الوحيدين البكونو حايمين بالسفنجات فى المكاتب مع البدلة والكرفة او حتى البنطلون والقميص ...الواحد فيهم ما يصدق يجى وقت الصلاة ويخش ليك فى السفنجة يمكن لحدى نهاية الدوام ...ويمكن دى الحاجة الوحيدة الما قادرين يتخلو عنها رغم انضباطهم النسبى فى الاتكيت والمظهرفى اماكن العمل الرسمية ...
محمد الحسن اخبارك يا وجيه ظهرت حسي ظواهر جديدة قبل فترة مشيت غبيرا اقبل واحد وصف لي محل بتاع شاي وقهوة لقيت الناس بالكراسي مجدعه في الشارع بصورة غريبة واللقيمات حايم اللمة حلوة أها تعال شوف العراريق بالسفنجات وما خفي اعظم تحياتي وتقديري
Post: #45 Title: Re: رحلت اغترابي Author: عباس الدسيس Date: 04-18-2016, 06:58 AM Parent: #44
اتفقنا أنا وادروب وود الخرطوم نفتش سمسار الاقامات عرفنا سكنو في حي اسمو النظيم الزمن داك ما كان في جوالات في حاجة اسمها بيجر تختها في قاش البنطلون وانت ماشي معلقها زي جرس البقرة الفريزيان تعمل تررررررررررررن معناها في زول عايزك ، اجيك رقمو تتصل عليهو اتلمينا يوم الجمعه وتوجهنا للنظيم حي خارج الرياض كنت مفتكر الحي اكون بشبه احياء مدني الدباغة و ل بانت تلفو في ساعة برجليك لقينا عييييييييييك مدينة كاملة ود الخرطوم طوالي جر وأطي قال ما بقدر الف وقال الواحد زي البفتش ليهو في ابرة في كوم قش فعلا كلامو مقنع المشكلة التخلي ادروب اقتنع شنو وكيف نلم في الزول قلت اشوف ادروب فكرو شنو: ادروب طبعا راجل نكته جدا احيانا من المعاناة اديك نكات بايخة مع المعاناة بتشوفا مضحكه ، وعدم ملائمة النكته للموقف هي الضحك ذاتو ادروب قال لود الخرطوم: انا جيت هنا ما برجع لازم لازم نمسك الزول دا ونحل مشكلة الاقامات انت يا ود الخرطوم ما تكون زي سمك راهات ادروب مشي البحر امسك السمك قبض سمكه ملونه ((إقصد سمك الزينة)) قال يا سلااااااااااام سمكة راااااااااااهات جاي من السعودية ، انت لسع ما عندك اقامة عايز تعمل راهااات. ضحكت لما في حجر اتفنت فيهو وواصل ادروب .... انت يا ود الخرطوم ود راهااااات أنا في بورتسودان غنماية رايحة افتش اليوم كلو من الصباح ما تاكل ما تشرب موية باللليل غنماية تمسك حسي زول ما تمسك هنا في السعودية. لقيت كلام ادروب برضو مقنع قلت لي ود الخرطوم خلاس انت ارجع لي اخوك اقعد معاهو لو لقينا الزول بنتصل عليك. ادروب زعل ليه ما افتش معانا قال ليهو .... والله تمسك مافي زول اكلمك ترجع السودان ما تمسك ماهية شهر واحد. قلت ليهو يا ادروب عملت ليهو حكاية زولكم القالو ليهو جون قرن مات قال لاإله إلا الللله ماهية واحد ماصرف. كنت مفتكرو اضحك اكتشفت الحكاية ما جمعت ليهو في راسو. خطة ادروب كانت نسأل بتاعين البقالات عن سودانيين ساكنين قريب منو لو قال في نوصف ليهو الامين سمسار الاقامات. واجهتنا مشكله غالبية الشغالين في البقالات باكستان او هنود ولسع ما اتعودنا نتكلم معاهم بالعربي الاسيوي المهم بنعرف كلمة صديق مشينا كم بقالة ((سلام صديق هنا في اسكن سوداني)) ؟؟؟ من ابيخ اجابات الهنود ... مافي معلوم... عشان ما تتعبو بالاسئلة بديك الاجابة دي ادروب بقي ازهج من الاجابة دي عشان اختصر سؤالو كان ((صديق هنا اسكن سوداني و ل مافي معلوم)) وماشين نفتش مع المغربية وخلاس كرعينا اتكسرن لقينا باكستاني ادروب خلاس قال دي اخر بقالة رشا بالسؤال عشان نمشي ((صديق هنا اسكن سوداني و ل مافي معلوم)) المفاجأة كانت الراجل قال لينا... في معلوم ... اكتشفا المحل ساكننها سودانيين عذابة كثير أها الخطوة الجاية نوصف ليهو زولنا كيف الراجل لونو قمحي ومشلخ مطارق وقصير. قلت ليهو يا ادروب قال ليك في سودانيين الزول الاطرش دا إفهمو كيف حاول اجتهد ما تبقي زي ادروب قريبك قالو تاجر بتعامل مع واحد بالشيكات وأداهو شيك طلع طاير بعد فترة مرتو ولدت قالت ليهو نسمي الولد اوشيك .... قال ليها اوشيك لا اوشيك لا ... اوكاش بس... يلا وصف للباكستاني زولنا اوشيك ولا او كاش. قال لي لاااااا حولااااااااااااااا عباس انت جيت سعودية تلعب كان تقعد في الجزيرة سمك من ترعة تقبض أنا ما بعرف اتكلم معاهو شيف انت. اشتغلت بي كل جسمي مع الباكستاني وصف .... اسمع يا صديق انت شوف سوداني صغير شكل مصريين ... قعدته افكر اوصل ليهو حكاية مشلخ كيف جات في راسي... هذا سوداني صغير شبه مصريين بعدين هنا خربش كثير ((وختيت يدي في جضومي)). بالله الصدف غريبة جدا الراجل لما قال ايوا معلوم وقعد اوصف لينا في العمارة ادروب ابتسم ابتسامة عريضه مشي علي الثلاجة جاب ليهو علبتين عصير بعد فهم ايوا معلوم والكلام دخل فيهو الوصف وهو ما قدر استوعب كلام الباكستاني (( انت روح سيدا حصل مجطة بعدين روح يمين حصل زبالة اتنين عمارة وقف سوا سوا زبالة هذا سوداني)) . ادروب قال لي فهمت الكلام؟؟؟ قعدته اترجم ليهو ...قال نمشي طوالي نلقي طلمبة بنزين بعد الطلمبة ناخذ يمين بنلقي لينا كوشة وسخ كبيرة في عمارتين جمب الكوشه ساكنين فيها السودانيين. ادروب ارتاح شديد وبانبساطه قال لي (( عباس انت كلام باكستاني تعرف)). وصلنا الوصف بقينا في مشكلة العمارتين ندق الشقق واحدة واحدة مشكله ممكن نلقي فيها عوائل فكرة ادروب الجهنمية قال لي نقعد في المسطبة القدام العمارة ننتظر سوداني اطلع من جوه نسألو أها وقعدنا لي الساعة عشرة بالليل نتونس
Post: #46 Title: Re: رحلت اغترابي Author: Yousuf Taha Date: 04-18-2016, 07:11 AM Parent: #45
الله يديك العافية .....................
Post: #47 Title: Re: رحلت اغترابي Author: عمر دهب Date: 04-18-2016, 09:59 AM Parent: #46
سلام عباس حكى طاعم الله بجازى الفرتقونا من بلادنا ووظائفنا هى معركة لم يكن لنا خيار دونها
Quote: ادروب حيرني قلت نهاظر معاهو اسمع بملاها ليك بول بس بعد النتيجة تطلع نضيفة تديني قروش. نطط عيونو وقال لي يااااااااااا الله انت يا ناس جزيرة كمان بول تبيع ما تخاف الله.
ههههههههههههههههههههه
صدق أدروب
واصل يا عبس
Post: #51 Title: Re: رحلت اغترابي Author: ناصر حسين محمد Date: 04-18-2016, 04:46 PM Parent: #50
ود الدباغة شكيتك على الله مصاريني اتقطعت
Quote: من ابيخ اجابات الهنود ... مافي معلوم
هههههههههههههههههه أكيد طبعا ومافيها كلام
هندي بقالته لصق مركز صحي، ما انتبهنا للمركز الصحي لصقو وبنسال فيه وهو شابكنا مافي معلوم اتاكدنا انو فاهم نحن قاصدين شنو وهو ماعارف وين المركز الصحي طلعنا لقينا المركز الصحي لص البقالة بتاعتو من ديك ما بسال هندي نهائي
Post: #52 Title: Re: رحلت اغترابي Author: عباس الدسيس Date: 04-19-2016, 07:32 AM Parent: #51
Quote: سلام عباس حكى طاعم الله بجازى الفرتقونا من بلادنا ووظائفنا هى معركة لم يكن لنا خيار دونها
عمر سلام يا حبيبنا طيلة فترة حياتي ما كان الاغتراب يخطر علي بالي أو مفارقة الوطن ...الله غالب قعدو فيهو هم وخربوهو تحياتي وتقديري
Post: #53 Title: Re: رحلت اغترابي Author: عباس الدسيس Date: 04-20-2016, 05:27 AM Parent: #52
Quote: اسمع كلامي مرة واحدة يا دسيس
دا مشروع كتاب كارب بنفس طريقة الحكي دي وبدون أي تغييرات
فقط واصل واحكي واسرد
وفي النهاية على المطبعة ودار النشر عندنا جاهزة
حكايتك دي بتشبه كل حكاياتنا بتعديلات بسيطة
المسكوت عنه خليهو بنضيفو في جلساتنا الخاصة
ليك الف تحية
أحمد الشايقي
حبيبنا ود الشايقي اخبارك مشتاقين الحكاية واقعية وطويلة جدا لو في العمر بقية والمشاغل خلتنا نتمها اكون كويس شاكر ومقدر لدعمك المعنوي لو في طريقة طباعة نشوفا لي قدام ونلحق الصديق الدرديري لما نتقابل قريبا نشوف باقي المواضيع شاكر ومقدر للمتابعة مع خالص تحياتي
Post: #54 Title: Re: رحلت اغترابي Author: عباس الدسيس Date: 04-20-2016, 05:30 AM Parent: #53
Quote: ههههههههههههههههههههه
صدق أدروب
واصل يا عبس
درديري يا صديق اخبارك والاسرة الكريمة الحكاية دربها طويل عايزه قعده وانت عارف الحاصل لينا اتجملو تجدعنا فيها مع العلم دايما بحب اشوت المواضيع مرة واحدة والمسلسلات كتابتها صعبة تحياتي وتقديري
Post: #55 Title: Re: رحلت اغترابي Author: ادريس خليفة علم الهدي Date: 04-20-2016, 06:49 AM Parent: #54
عباس .. يسعد صباحك خير ..
يا تواصل يا تحكي لي قصة قطر كوستي ههههههه
Post: #56 Title: Re: رحلت اغترابي Author: عباس الدسيس Date: 04-21-2016, 06:23 AM Parent: #55
Quote: هههههههههههههههههه أكيد طبعا ومافيها كلام
هندي بقالته لصق مركز صحي، ما انتبهنا للمركز الصحي لصقو وبنسال فيه وهو شابكنا مافي معلوم اتاكدنا انو فاهم نحن قاصدين شنو وهو ماعارف وين المركز الصحي طلعنا لقينا المركز الصحي لص البقالة بتاعتو من ديك ما بسال هندي نهائي
ناصر حسين يا وجيه اخبارك الهنود والاسيويين عامة هم الفاهمين البلد هنا ومستفيدين استفادة قصوي احنا الشمارات الكاتلانا مضيعانا لو اشتغلنا مافي معلوم كان الواحد اختصر اغترابو المشكله تختصرو تمشي وين هههههههههههه تحياتي وتقديري
Post: #57 Title: Re: رحلت اغترابي Author: عباس الدسيس Date: 04-21-2016, 08:25 AM Parent: #56
Quote: عباس .. يسعد صباحك خير ..
يا تواصل يا تحكي لي قصة قطر كوستي ههههههه
ادريس يا وجيه اخبارك اولا اليوم الخميس وبكرة الجمعه وبعد بكره السبت ايام لا يمكن فيها معاقرة النت حكاية قطر كوستي بعد الاقيك انت عايزنا هنا نركب قطر مجيدو مشتاقين يا صديق
Post: #59 Title: Re: رحلت اغترابي Author: مصعب عوض الكريم علي Date: 04-21-2016, 03:06 PM Parent: #58
سرد ممتع جدا .. عليك الله ارمي لينا زي (السبايط) دي طوالي .
Post: #60 Title: Re: رحلة اغترابي Author: طاهر بدر Date: 04-21-2016, 03:20 PM Parent: #1
عبس ... سلام اسمعني ...خلي الحكيتو دا دعاية لي كتاب ابن ستين كلب يعوضك مبيعاتو الكم وعشرين سنة معاناة الناس الضحكتها وفقعتهم بالضحك ديل مفروض يكون تمنو (قرنقش) مش مجرد ثناء ... وبعدين بالجد يا عباس نحن كسودانيين بنفتقد نمط التوثيق وكتابة سيرة الحياة ... في ناس كتيرة كتبت سيرة حياتا وطبعوهو وعملو ليها بهرجة وافتتاحات وحضور وتوقيع على النسخ وفي النهاية السيرة لا فيها جوع ولا حق التكسي ولا البراي المسك بيك زمن ووصلك والتمن اضنيك .... اقيف بعد الحكاية الجاية وقولينا البقية في الكتاب ... وخلى الناس البضحكوا يشتروا الضحكة بي مصلحة ... ... والا اقول ليك واصل خلى الناس تنبسط (عمر الضحكة اقصر مما نشهقا وحيل المنية افتر من نتعلقا) ابقى عافي ود ود مدني الفي الخاطر
Post: #63 Title: Re: رحلة اغترابي Author: ادم شحوتاي Date: 04-24-2016, 06:52 AM Parent: #62
نتابع
Post: #64 Title: Re: رحلة اغترابي Author: عباس الدسيس Date: 04-24-2016, 07:17 AM Parent: #63
طلع زول لابس ليهو عراقي وسروال طويل وسفنجة وشايل ليهو بسلة في يدو من خلال تحليل ادروب وتكتيكو في مواجهة الموقف وصلتني معلومة ادروب قبل اكون سواق في مواصلات بورتسودان كان شغال في البوليس . تعرف يا عباس الزول دا شايل بسلة ماشي اجيب فول كثير للعزابة ومن العراقي والسفنجة ياهو زول بطانة نخلي امشي بعد اجيب الفول نكابسو نطلع معاهو العمارة افتح الباب نخش وراهو لانو لو سألناهو من الامين في الوقت المتاخر دا بقول ما بعرفو بخاف مننا. ديني أنا يا ادروب انت زول خطير!!!! قول ماشاءالله اخوك كان شغال في البوليس.. طلعنا وراء الراجل ساكن في الطابق الثاني وحسب خطة ادروب عملنا فيها طالعين الدور الثالث فتح الباب انا اخذت لي وقفه قلتا لو في مصيبه خليها تقع ادروب قدامي. الراجل ماشي وين يا زول ؟؟؟ ادروب .. عايز الامين اجبرني باقتحامو للشقه اخش معاهو جوه الغرفة المقابله الباب ياسلاااااااام ديل عزابة وسخانين بصورة غريبه كل واحد خاتي ليهو كيس للصاعوط جمبو الكتشينه مدوره وناس مبطحه في الواطه اتقول منتظرين ليهم قطر عندهم تلفزيون من سنة دو قدر الباب خاتينو في الواطه يعني لو عايز تتفرج تكون نايم والتلفزيون عندو مهمة تانية عاملنو تربيزة شاي وفوق ليهو صحانة وسخانه مجلبط فيها عدس والشماعه حقتم الباب معلقين فيها الجلاليب عندهم مكيف لوري تراب اشتغل واقيف بطلع اصوات مخيفه تقول حسي بتفرطق. زولنا الامين قاعد بشلوخو ولابس نضارة لزوم الشوف لي كروت الكتشينه.... حكاية بي شلوخو اتذكر كنت في مامورية بنيالا كم شهر يوم دخل علي الباشكاتب بتاع البنك ومعاهو بت محجبة ولابسه شرابات مع شبط الراجل بعرفني بيها وانا جاي من الصباح ما مجمع قال لي يا عباس البت دي زميلتنا الجديدة معانا في البنك قمت اسلم عليها دخلت يدها جوه التوب طلعت ما بتصافح الحركة بتاعتا لخبتتني زيادة ما عرفته اقول للباشكاتب شنو عاينت ليها من فوق لي تحت قلت ليهو انتو عينتوها بس شرابات ديل. أها الامين من شافنا نطط عيونو قدر الريال ابوعشرة ادروب فقد الحكمة واصبح في حالة غريبه جدا وبدون مقدمات ضرب الامين في يدو الشايله الكتشينه برجلو الورق دا طار لي حسي بكونو بفتشو في بت الديناري ما لاقينها .... الجو اتكهرب
Post: #65 Title: Re: رحلة اغترابي Author: اسامه العريفي Date: 04-24-2016, 07:24 AM Parent: #64
Quote: الجو اتكهرب
وانحنا ذاتنا اتكهربنا متابعين يا جميل
Post: #66 Title: Re: رحلة اغترابي Author: محمد مجيدو Date: 04-24-2016, 07:52 AM Parent: #1
Quote: يا تواصل يا تحكي لي قصة قطر كوستي ههههههه
يا ركس ... ادريس دا اصووو ما تحكي ليهو قصة قطر كوستي .. خليييه يبيييض ..... عاالم بطاالـــــــــــــــة
Post: #67 Title: Re: رحلة اغترابي Author: عباس الدسيس Date: 04-24-2016, 01:24 PM Parent: #66
Quote: أها يا عباس مدام بديت تحكي في مزكراتك
حتحكي كل شئ... ولا نتم ليهم الباقي...؟؟؟!!!
عمر مصطفي صاحب الزمن الجميل اخبارك يا حبيبنا احكي ليك دي قبل كم يوم اتذكرتك بحكاية المرأة البتمسك الراجل قعدته اضحك. صاحب لينا جاء من السودان عندو اخو هنا مرتو صعبه مكتفه تكتف اخو قعد معاهو يومين الظاهر قعدت تنق فيهو واخوهو لي التعترو قروش استخراج الاقامة ما عندو زولنا لقي ليهو شغله قال ليهو عشان تمشي بيها امورك تطلع منها حق الاقامة وكمان فيها سكن بعد تستخرج الاقامة نعمل ليك السيرة الذاتية ونقابل المواقع والجرايد الراجل مشي اشتغل وكل مرة اسأل في اخوهو اديني جوال عباس اخوهو اطنشو عندو صاحبو من جاء طوالي معاهو بعد اشتغل اخوهو مسك صاحبو وقال ليهو الزول دا اوع تجيب ليهو عباس هنا ولا تديهو رقم عباس. الايام مشت اسبوعين ثلاثة بالصدفه لاقيت صاحبو نوع الناس الطيبين قال لي يا زول فلان داك جاء من السودان .... ياسلااااااااااام بالله طيب ما تجيبو يوم الجمعه اتغدو معانا ... قال لي يوم الجمعه شايفو شغال من الساعة اربعه لي عشره بالليل اتفقت معاهو نمشي ليهو يوم الخميس قال لي الزول دا بفتش ليك بشدة لكن الغريبه اخوهو قال لي ما اوديك ليهو عندك معاهو مشكله ؟؟؟ قلت ليهو الراجل كان معاي الاسبوع الفات باولادو مشكلة شنو صاحبو إطمئن قلبه قوم سوقني ليهو...... القاهو شغال في محل بيض وجداد أي والله بيض العديل دا من الكرفتات ابيع في البيض قعدنا نتونس قلت ليهو اعمل لي رنه عشان اسجل جوالك وصاحبو قاعد جمبي اعاين في جوالي سجلتو محمد اببيض اها في الونسه الزول مشغول من جاء من السودان ما حلق راسو بقي اشبه لي الديك قلت والله يا محمد إبن أدم صاحب بيئته مالو شكلك بقي لي تشبه الديك واحنا قاعدين معاهو جاني تلفون من السودان المتصل كان عديلو بفتش لي فيزا وصاحبنا الاشتغل في محل البيض مرتو ما قاعدة في الواطه عديلو بعد السلام بسأل فيني الشغل كيف هناك قلت ليهوراقد حسي محمد شغال في محل بيض واحنا قاعدين معاهو ما باقي لينا كان نكاكي. بعد شويه اتذكرته صاحب ليهو في جدة اتصلت عليهو حق الله بق الله احنا والله محمد اببيض هاك سلم عليهو بعد ما سلم قلت ليهو يا محمد غايتو كان نزلت السودان تاني كان اشتغلت في البنك السعودي الامريكي الناس ما بصدقوك شفع الفريق من اشوفوك اقعدو اكوركو ابييض.... ابييض.... ابييض.... ابييض والراجل مبسوط واضحك والله انت يا عباس اصلك ما تتغيير وكاااااااك اضحك طلعنا منو راكبين العربية اخوهو اتصل علي صاحبو الراجل لما وشو اتغيير من الشكل سامعو اتكلم معاهو انا كنت قاعد عباس ما قال ليهو حاجة بس عمل ليهو رنة وعباس سجلو محمد ابييض الظاهر داك قفل الخط في وشو اتلفت علي بطيبة وقال لي عباس وقت انا مشيت البقالة اجيب الموية والعصير أوع تكون قلت لي محمد حاجة؟؟؟ قلت ليه ليه في شنو !!!! قال لي الزول دا قال ما عايز الشغل وقفل محل البيض وقال لي اخوهو خلي اجو اشيلو مفاتيحهم
Post: #68 Title: Re: رحلة اغترابي Author: اميرة السيد Date: 04-24-2016, 01:44 PM Parent: #67
ابداع ما بعده ابداع... يا دوبك بديت القراية.... وبجيك صادة لمن امشي قدام شوية...للتعليق.. والله يديك الصحة والعافية
Post: #69 Title: Re: رحلة اغترابي Author: عباس الدسيس Date: 04-24-2016, 01:46 PM Parent: #67
Quote: سرد ممتع جدا .. عليك الله ارمي لينا زي (السبايط) دي طوالي .
مصعب يا حبيبنا اخبارك شاكر ومقدر للمتابعه كل ما نلقي لينا فرقه من زحمة الشغل بنجدع ليك حاجة تحياتي وتقدريري
Post: #70 Title: Re: رحلة اغترابي Author: عباس الدسيس Date: 04-24-2016, 01:54 PM Parent: #69
Quote: عبس ... سلام اسمعني ...خلي الحكيتو دا دعاية لي كتاب ابن ستين كلب يعوضك مبيعاتو الكم وعشرين سنة معاناة الناس الضحكتها وفقعتهم بالضحك ديل مفروض يكون تمنو (قرنقش) مش مجرد ثناء ... وبعدين بالجد يا عباس نحن كسودانيين بنفتقد نمط التوثيق وكتابة سيرة الحياة ... في ناس كتيرة كتبت سيرة حياتا وطبعوهو وعملو ليها بهرجة وافتتاحات وحضور وتوقيع على النسخ وفي النهاية السيرة لا فيها جوع ولا حق التكسي ولا البراي المسك بيك زمن ووصلك والتمن اضنيك .... اقيف بعد الحكاية الجاية وقولينا البقية في الكتاب ... وخلى الناس البضحكوا يشتروا الضحكة بي مصلحة ... ... والا اقول ليك واصل خلى الناس تنبسط (عمر الضحكة اقصر مما نشهقا وحيل المنية افتر من نتعلقا) ابقى عافي ود ود مدني الفي الخاطر
اهلنا ناس مدني الوجيه طاهر بدر اخبارك مشتاقين طولنا ما شفناك عملت تثنيه لي كلام ود الشايقي فكرة جميلة والله حكاية الطباعة كلام جاء منك وود الشايقي معناتو بتستحق الطباعة شاكر ومقدر للمتابعة مع خالص تقديري
Post: #71 Title: Re: رحلة اغترابي Author: عباس الدسيس Date: 04-24-2016, 02:12 PM
Quote: شكرا ياعباس على الحكى الطاعم لمرارة الاغتراب
تحياتى
مرحب بالاستاذة مهيرة شكرا ليك انتي كثير شرفتينا بتواجدك ورفعتي البوست من خانة بيت العذابة تحياتي وتقدريري
Post: #72 Title: Re: رحلة اغترابي Author: عباس الدسيس Date: 04-24-2016, 02:17 PM
Quote: جميل جدا هذا البوست
هاني سلام يا حبيبنا ياخ انت الاجمل والاكمل والاظرف الغريق لي قدام يا هاني تحياتي وتقديري
Post: #73 Title: Re: رحلة اغترابي Author: عباس الدسيس Date: 04-24-2016, 02:30 PM Parent: #72
Quote: نتابع
حبيبنا ادم شحوتاي اخبارك سعيد جدا بمتابعتك وطلتك علينا مع خالص تقديري وشكري
Post: #74 Title: Re: رحلة اغترابي Author: عباس الدسيس Date: 04-24-2016, 02:33 PM Parent: #72
Quote: وانحنا ذاتنا اتكهربنا متابعين يا جميل
اسامة العريفي اخبارك يا حبيبنا شاكر ومقدر للمتابعة مع تحياتي
Post: #75 Title: Re: رحلة اغترابي Author: عباس الدسيس Date: 04-24-2016, 02:36 PM Parent: #72
Quote: يا ركس ... ادريس دا اصووو ما تحكي ليهو قصة قطر كوستي .. خليييه يبيييض ..... عاالم بطاالـــــــــــــــة
مجيدو اخبارك يا حبيبنا ادريس عايز الحقني الجماعه عشان بعدين افتح لي بوست فكو المسجون اديهو قطرك
Post: #76 Title: Re: رحلة اغترابي Author: عباس الدسيس Date: 04-24-2016, 02:38 PM Parent: #75
Quote: ابداع ما بعده ابداع... يا دوبك بديت القراية.... وبجيك صادة لمن امشي قدام شوية...للتعليق.. والله يديك الصحة والعافية
الاستاذة اميرة السيد سلامي وتحياتي شرفتنا زيارتك شوفتي البلد دي لما الواحد اجيها جديد بدردر كيف تحياتي
Post: #77 Title: Re: رحلة اغترابي Author: عباس الدسيس Date: 05-02-2016, 06:50 AM Parent: #76
ومن حيث لا ندري نط واحد من عزابة الامين متضامنا مع ادروب (( الامين يوم يا قتلت زول فينا يا ضبحوك هنا في نصنا الجماعه ديل خبته منهم شنو !!!!)) . رجعتني الذاكرة لسوق نيالا اهلنا ناس شبشبه مشهورين بتجارة الغرب والجنوب زمن الايدز ما انتشر كنا في زيارة لي زميلنا بشبشه عرج بينا علي خالو مريض لقينا عندو اسهال قادين ليهو العنقريب ماسورة ومحلوجة سألنا الزول مالو قالو عندو مرض الجنوب ومعروف عن مرض الجنوب زولو طوالي المقابر. كنا في سوق نيالا وشايفين لينا شكله قايمة بين صاحب لوري وبتاع دكان الغلاط في عدد الكراتين بتاع الدكان كان بنزل في كراتين صابون وقال العدد ما تم وبتاع اللوري لخبت باقي الكراتين الكانت عندو جوه مع الجديده وقعد اغالط فيهو. بتاع الدكان شافنا لابسين الكرفتات استنجد بينا !!!! سألت بتاع اللوري الخلاف في كم كرتونة ؟؟؟ عشرين كرتونة... قلت ليهو انت من وين ؟؟؟ من شبشه !!!!!!! ادي الراجل كراتينو وخلي الاستهبال البتعمل فيهو. أها الراجل النط لينا وفك الاشتباك كان عارف الامين نصاب خشت الاجاويد وحكينا القصة بالتفصيل لرفاق الامين وقلنا عايزين نعرف كفيلنا وين وجوازاتنا وين . من حقيبة في نهاية الغرفة طلعت جوازاتنا بعد فراق شهور بقينا في الكفيل والوقت اتاخر ليلا كان الرأي بكره الامين امشي معانا للكفيل قلت لي ادروب نشيل جوازاتنا ونمشي نجي بكرة ووقف ادروب في العقبة.... شيف أباس تمسك ما تفك الزول دا شهور ما تمسك الليلة تمسك تقول بكرة تجي أنا بنوم هنا. تاني يوم جينا انا وود الخرطوم رغم تحزيري ليهو ما البس كويس اجينا مبهدل الراجل جاء اخر قيافة وكابي ليهو فتيل ريحه قلته ليهو المسألة بضرك مع الكفيل البدوي انت حر مشينا لقينا ادروب مكنكش في الامين تكنكشت ابو الجعران لو عايز اخش الحمام انتظرو بره الباب . مشينا للكفيل..... من باب الشقة ادروب قال لي الكفيل عسكري في الجيش. يا ادروب خلي الدجل بتاعك عرفت كيف ؟؟؟ أنا كنت ببيع بصل بوت ما تشيف انت جمب الباب. دخلنا للكفيل طلع عسكري في الحرس الوطني من شاف الامين وادروب إلذ فيهو لي جوه الراجل اتعفرت طلع الامين ضارب منو قروش الفيز وزايغ دورت شكله واحنا اتمحنا في البلوة الوقعنا فيها . عاين لي انا ما ركز معاي عاين لي ادروب والشلوخ كشا منو ركز مع ود الخرطوم قال ليهو انت شغال شنو؟؟؟ اتخرجت من الجامعه كنت شغال محاسب. أعطيني جوازك روح اهلك دبر خمسة الف ريال تعال نطلع ليك الاقامة يلا مع السلامة انتظر رفاقتك بره. عاين لي ادروب انت بتشتغل ايش؟؟؟ ادروب طلع ابو الزمل عسكري للكفيل وهاك يا الونسه الراجل نفسيا ارتاح لي ادروب خاصة اساءات ادروب كانت للامين كثيرة وهاك يا ونسة وصب للقهوة ادروب وقع في التمر زي الغنماية دقيقتين صحن التمر بقي فاضي. يا سوداني ايش فيك كملت تمر القهوة ؟؟؟ ادروب اعتزر امس ما إتعشا ...يا كفيل الامين الهرامي امس عشا ما تجيب. والكفيل اضحك قال لي ادروب خلاس عوضني حق الفيزا الفين ريال وتعال نطلع ليك الاقامة. إلتفت سألني انت بتشتغيل ايش ؟؟؟ قلت ليهو رمالي !!! ايش رمالي؟؟؟ عندنا في السودان نمشي نجيب الرملة من النيل للمباني في ضهر الحميــ ــــر أها أنا الزول البرفع الرملة في ضهر الحمــ ـــير. ما فهمت يعني عامل؟؟ ايواااا عامل.... سألني تعرف تسرح بالغنم عندي غنم في الديرة ؟؟؟ الراجل عايز اشغلني راعي. قلت اتبالد ليهو شوية ... غنم ما بعرف اسرح بيها لو عندك حمـــ يربشتغل فيها. ايش فيك انت ما تفهم من فين اجيب لك حميــــ ر استوردها من السودان . أبي منك الفين ريال تدفعا كيف؟؟ أنا دفعت للامين وما عندي فلوس تاني والسعودية ابيتا بي الله واحد عايز ارجع السودان انت كفيلي شوفا لي تذكرة باخرة رجعني وعوضي الله. قال لي ادروب انت خلاس امشي الحق رفيقك خلي لي الرمالي دا نسلمو الجوازات . ادروب طلع مبسوط. عاين للامين قال ليهو تدق بيجر لي واحد من اهلك اجيب نص القروش والباقي اكتب بيهو تعهد ولا قسما بالله من هنا ما تطلع. التفت لي انا المصيبه العايزة ترجع السودان ولازم استخرج الاقامة عشان اعمل لي خروج نهائي وفيها تذاكر سفر وعييييك قصة طويلة. اسمع يا رمالي انت روح دبر ليك خمسمية ريال واعمل الفحص عشان نستخرج ليك الاقامة ولو ما دبرت الخمسماية ريال ما اشوف وشك وما تخبر الجماعه ديل بره يلا مع السلامة شيل معاك جوازك
Post: #78 Title: Re: رحلة اغترابي Author: مامون عبدالله نور Date: 05-02-2016, 07:33 AM Parent: #1
الجميل الدسيس سلام طالع تفتيحه من يومك هههههههه حكي طاعم زي ناس مدني واصل نحنا قاعدين لينا كم يوم معديها لي ردود للناس كمل لينا ضهرنا وجعنا من القعاد ياخي
Post: #79 Title: Re: رحلة اغترابي Author: مصعب عوض الكريم علي Date: 05-02-2016, 12:29 PM Parent: #78
والله مفتح لكن ... البلد دي لازم تكون كده عشان تعيش
Post: #80 Title: Re: رحلة اغترابي Author: ادريس خليفة علم الهدي Date: 05-03-2016, 12:50 PM Parent: #79
Quote: الحروم زغرتن تاني شالتني الهوشة قلت ليهم الباقي عفيتو لي الله ورسولو.
متابعه يا دسيس ..
Post: #82 Title: Re: رحلة اغترابي Author: عباس الدسيس Date: 05-04-2016, 06:40 AM Parent: #81
آمنتم له قبل أن آذن لكم إنه لكبيركم الذي علمكم السحر ... ماشين حسب مواعيد الكفيل للذهاب للمكتب لاستلام دفتر الاقامة حكيت لادروب ما دار بيني والكفيل ادروب جاهو احساس انو إدقس وخاصة كان بتوقع اشاركو في مخططي كان حافظ ليهو شويت ايات بقلبنا قال لي (( انت طلعت صغيرهم الذي لم يعلمهم السحر)). جملة ادروب واحنا راكبين اللموزين خلتني اسرح بخيالي عشان اقصر المشوار. فترة من العمر وهي مرحلة خلوة القران قبل المدرسة بموردة الحطب مع فكي ابكر واصدقائي اولاد فريق فلاته بالدباغه. فكي ابكر كان صعب جدا في حكاية الحفظ نكون قاعدين في السباته وعندو صبي بكتب ليهو في السبوره لانو رجلو مقطوعه من الساعة سبعة صباحا حتي الساعة اثناشر تكون قاعد بتردد معاهو في القران . اوقات كثيرة لما افكونا البيوت بنلقي واحد ((بال في محلو هو قاعد)) بعد نبعد من الخلوة خوفا من الفكي بنطلع معاهو سيرة لي بيتم نكورك (( واحد بال ... واحد بال... واحد بال)) فكي ابكر كان صارم لو ما حافظ يوم التسميع بدوك عشرة سيطان في ضهرك ولو اتملمت بجو العتاولة امسكوك فتشت لي طريقه اتودد ليها لي فكي ابكر . الطريقه الوحيده كانت لما افكونا البيوت مع الاذان في ناس بتتسابق عشان تجيب ليهو الابريق امشي بيهو الحمام وإنتظرو إرجع اكبو ليهو اتوضي الحاجة دي فيها مدافرة شديده وكمان أنا كنت مكتشف حكاية نسير الزول البال في لباسو لي بيتو وكانت هواية ممتعه الاصوات بتطلع بطريقة جلالة تشبه بتاعت الجيش وبندق معاها رجلينا في الواطه وناس تدق شنطة الدلاقين بيدينا قررت اتقرب من الفكي تحاشيا لي سيطان التسميع العشرة وكمان مرات الزول بدقس تجيهو نومة بلز ليك الصبي اقطع فيك سوط في ضهرك اثناء القراية . اول فكرة جاتني من الصباح بدري املي لي ابريق موية واختو في ركن الناس وقت تكابس مواسير الجامع الابريق حقي اكون عند الفكي نجحت الخطة وشويه شويه بقوني ريس مجموعة تسميع الامور مشت معاي باسطه والرفع الاسهم بتاعتي اكثر كان زمان في مرض اسمو ((القوب)) بحت الشعر دواير بالراس وبعمل ليك كاروشه في راسك أها أنا أول مكتشف لعلاج هذا المرض. انت في الخلوة لازم اجيك بالعدوي مسكني في راسي مشكلتو الحكة بتنشط بالليل كنت زهجان من القوب وجيت ماري بي موردة الحطب لقيت بتاعين اللواري عاملين حفر لتغيير زيت اللوري شيلتا لي حبة من زيت الراجع مسحت بيها كم قوبايه كدا الفكرة جاتني لما تضرب في الدافوري ((كورة الشراب)) والدم اسيل بتكشح ليها رماد بوقف الدم وكل يوم تكشح رماد لما الجرح ابري المحلات العملت فيها زيت الراجع بالليل ما اكلتني تاني يوم شوفتا لي علبة صلصة مليتا زيت راجع وقت النوم مسحت الراس لقيت الحكاية تشبه لي مسألة المضاد الحيوي في العلاج بين خمسة الي سبعة يوم حسب مقاومتك القوب بنتهي لو ما المرض دا حسي اختفي كان الزول وضعو بختلف وعمل ليهو اعلان في قناة تلفزيوينة زي حكاية ناس النيل للاعشاب... (( افضل طريقة لعلاج القوب وتجيب ليك زول شايل ليهو علبة صلة وبت بتجدع في شعرها تمسح ليهو راسو بزيت الراجع ممكن تختار البت بتاعت ... تونا جننتونا.. مع مقطع اغنية ممكن تبقي ملياردير)). الفكي ابكر لاحظ لفترة العلاج القصيرة سألني.... يا ود الشريف القوب راح منك بسرعه كيف ؟؟؟ دشيت ليهو العلاج أول ما صدق بعد التجربة مع كم واحد الحكاية لفقت. أها زيت الراجع اختفي من المورده وعلب الصلصة من الكوش فريق فلاته والدباغه تلقاهم اغرفو من المورده بتاعت الحطب وللجودة في العلاج في ناس هجمو علي المنطقة الصناعية. اموري كانت ماشة مع الفكي زي الحلاوة وجات الكارثة. كان في حاجة اسمها بليلة الاربعاء وقرش الاربعاء كل زول يوم الاربعاء اجيب للفكي قرش واجي شايل معاهو كوره ملانه عدسية او قمح ممنوع الذرة ((العيش الفتريته)) كانت ارخص شيء في تلك الفترة ممكن تمشي لي بتاع الطاحونه املي ليك الكوره بلاش فتلايته واحيانا تلقي الطاحونه واقفه وصاحبها في راحة الضهرية جوة البيت تخش تملي الكوره وتزوغ لو جبتا ذرة فتريته الفكي بديك عشرة سيطان في اماكن متفرقة من جسمك وعشان تجيب العدسية او القمح بتشتريها بي قرش. أها أنا كنت بجيب الفتريته ولما نجي نكب في حلة البليلة الكبيرة بعمل فيها الكوره وقعت مني جوه وبسرعه بلخبط الفتريته مع باقي الحاجات كان في واحد خاتنو للمراقبه بنتهز فرصة الزحمة وبشتت وبدي الفكي قرشو والقرش التاني بستمتع بيهو في (( القدو قدو)) اكله بتاعت الفلاته بالدخن والروب والامور ماشه معاي باسطه. الفكي وفريق التفتيش بلاحظو لي حبات ذرة في البليلة بسيطه كانو مفتكرنها لخبتت محاصيل. عندي صاحبي حسي مدير بنك الله اطرا بالخير دا الجاب لي الكفوة كل يوم اربعاء بياكل معاي القدو قدو هو عارف الزمن داك مافي دلع ما بدوك قرش زيادة حاول اعرف من وين بجيب القرش وبما انو صاحبي قلت ليهو حاول اطبق الفكرة بتاعتي يوم الاربعاء ستف الكورة فتريته ولسؤ الحظ مشي اكب قدامي في الحلة الراجل شاف المراقب ارتبك كشح الفتريته قبضو. تم ايقاف جيمع عمليات نجاض البليلة وكب العدسية والقمح في الحلة وخضع لتحقيق سريع افاد في التحقيق: والله اول مرة اعملها قال لي عباس كل مرة بعملها وحسي كورتو ملانه فتريته.... قبضوني بالثايته!!!! الفكي بشع بي بصورة غريبه اول حاجة شالوني من رئاسة مجموعة التسميع وثانيا اقعد قدام جمب الفكي لو زعل من اي زول عمل هرجلة أو خلافه بقطع فيني سوط عشان إخوف البقية ثالثا عاقبني عقاب باثر رجعي لقاني وقت انا رئيس للمجموعه ما قاعد احفظ ...كل يوم من الصباح اسمع جزء معاهاعشرة سيطان في الضهر لمدة سبعة ايام ((حقن ملاريا)). الفكي ناداني أول جملة قالها لي ... كبيرهم الذي علمهم السحر.... لي حسي في مكنيكي صاحبي من اولاد الفلاته لما الاقيهو في مدني قبل السلام بقول لي أوووووو كبيرهم الذي علمهم السحر. وأحنا ماشين علي المكتب حسب توجيه الكفيل لاستلام دفتر الاقامة راكبين اللموزين ادروب جمبي ومع زكريات الطفولة والخلوة كنت احيانا بتبسم ادروب الحكاية ما عجبتو رجعها لي أنا دقستهم احنا نازلين قال : ياها تضحك مبسوط وللاهي انتو يا ناس مدني !!! قام قال لي نكته افش بيها غليلو. تعرف يا أباس بوليس الهركه مسك ليهو هلفاوي سايق لوري في كبري هنتوب فتشو يمين شمال أشان إعمل ليو مخالفه الهلفاوي كلو شيء تمام ..اشارات ...فرامل .. لابس مركوب ما إندو شبشب ما لقي هاجة عشان يشيل منو قروش قال ليهو والله انتو يا ناس هلفا سبابين الدين ما نلقي منكم شيء السواق قال ليهو وللاهي احنا نقطعو معاكم ناشف يا ناس مدني يا ...... ((أحسن نخليها ما كويسين)) . في اللحظة دي وصلنا المكتب لاستلام الاقامات.
Post: #83 Title: Re: رحلة اغترابي Author: ادريس خليفة علم الهدي Date: 05-10-2016, 08:58 AM Parent: #82
