الشايقية

12:23 PM April, 05 2016

سودانيز اون لاين
جلالدونا-
مكتبتى
رابط مختصر

و حديث الافك

دقيقة دقيقة يا جلال - حديث الافك - عندو دلالة محددة عليك الله ما تلخبط الكيمان

والشايقية اجدع ناس

نعم يا ايمن حديث الافك له دلالة محددة و خصوصية
ولكن هنا اشير لى حتة البهتان فيه
و الاستشهاد بالتاريخ و النفس لا تخلو من سوء غرض

وأهل أحاديث الإفك إنكشفوا بعنصريتهم..
ويحيا السودان وتحيا قبيلة الشايقية

سلامات يا جلالدونا

بنعزهم وبنحبهم ويكفى إن أعز الناس منهم...وخلى الحساد يموتوا بغيظهم.

هم أبناء عمومتنا..وجدنا غانم.

تحياتي جلال
وضيوفك
مالهم الشوايقة
دخلت متجاوزا صرامتي في عدم الخوض في القبايل ل سببين
محبة فيك
محبة في الشوايقة
ومحبة الشوايقة جات لانهم ابهات عيالي وامهاتهم .. فزوجتي من القرير
وانهم لاناس افاضل

يا الف مرحب بالحبيبة بت خوجلى
و الف مرحب بى عودتك

Quote: وأهل أحاديث الإفك إنكشفوا بعنصريتهم.. ويحيا السودان وتحيا قبيلة الشايقية

ياريتا لو عنصرية و بس و كمان معاها تشفّى و وعيد و تهديد
و المدخل التاريخ و ترسيخ معلومات محددة و صياغتها بشكل منفر تبرر لذلك الغل الاسود
و يحيا السودان بى كل قبايلو و شعوبو

سلام يا جلة
هذه مداخلة في البوسن الآخر

حبيت اشاركك بها هنا لو مافي مانع

السلام على راعي البوست والمتداخلين
على مدى يومين وقفت على هذا البوست صدمني العنوان في الأول ثم بعد تردد دخلت .. وعدت وقرأت ..
أنا والحمد لله شايقي اما عن أب ..
لكن ولدت ونشأت بشرق السودان
وكذلك أهل أمي وأبي وزوجتي وأهلها كلنا نشأنا بمدينة كسلا ..
صبغ أنتمائنا بالشرق وكذلك لهجاتنا ووجداننا ..
بل في مراحلنا الدراسية كنا نمثل روابط الأقليم الشرقي .
وأنشطتنا الصيفية انحصرت في مدن الشرق من القضارف حتى بورتسودان .
لم نحس بالمن على أي أحد وكما لم يحسسنا أحد بأنا غرباء أو ضيوف..
وتصاهرنا تقريبا مع كل القبائل بالشرق
عن نفسي لم أزر ديار الشايقية الا في العام الماضي فقط ولمدة يومين .
لا أدري من أين وردت صفة الكره هذه .
الانسان السوي لا يستطيع أن يعيش شهرا واحدا أذ أحس بالكره ممن يحيطون به .أو أحس بالكره تجاههم . فضلا عن أن يعيش وسطهم وتصبح هي حياته .
ظاهرة التنميط أو الأسقاط النفسي هي آخر مراحل العنصرية ..
أي شخص يريد أن يعمم شعوره الخاص ويحوله لقاعده عامة سيظلم نفسه ويظلم الآخرين ..
الشخص الذي يحكم على عنصر كامل بكلمة واحدة ليس عادلا قطع شك .. حتى اليهود الذين يجمع العالم على كرههم لأنانيتهم وتعاليهم وتكبرهم وخباثتهم .. هذا التعميم مخل .. لأنهم فيهم من يكره الصهيونية نفسها ويقر بظلم الفلسطينين وتزوير الصهاينة للتاريخ .
والأدهى والأمر من كل ذلك صرنا نستدل بكتب ( الخواجات ) مستعمرينا القدامى لنثبت وجهة نظرنا .. نسينا أنهم من أستعمرونا وأذلونا وأذلوا أهلنا وسرقوا خيرات بلادنا بسياسة فرق تسد .. حتى لا يجتمع الناس على محاربتهم .
عايزين دليل على ضحد هذا الافتراء .. بسيطة جدا بل صارت أكثر من ممكن في هذا الزمان أذ توفرت الوسيلة وما أيسرها ..
أطرح سؤالا من ثلاث فقرات فقط
1- أنا أكره الشايقية
2- أنا أحب الشايقية
3- شعور عادي لا حب ولا كره
وأنشره في الوسائط وأجمع النتائج وحللها ..
أذا كانت الغلبة لزعم الكره تعالوا نجلس ونتدارس الأسباب
أما غير ذلك سيظل زعما للفتنة فقط وزيادة لتشتيت هذا البلد الذي لم يبقى من تماسكه الا خيوط قليلة قوامها المحبة واحترام بعضنا لبعض .

مصطلح التاريخ
بدأ استعمال المصطلح عند العرب فى صدر الاسلام
و ذلك للاشارة للتوقيت و مقدار الزمن ثم تطّور ليشير الى حقبة من الزمن و تسجيل الاحداث
حتى و صلنا الان بمفهومه الواسع لدراسة كل الحقب الماضية بصور علمية تعددت و سائلها و ادواتها
و يرجعه البعض الى اسامية اشتقاقا من كلمة ورخ و استىبط منها لفظيها
تأريخ .. بالهمزة على الالف
و تاريخ بالالف اللينة
كما يرجعها البعض الى اصول فارسية و عربية و اثيوبيةثم
تطوّر المصطلح ليشمل علم التاريخ المعنى بدراسة احداث سابقة و حطارات بائدةو دراستها و حفظها كأرث بشرى
لم ترد كلمة التاريخ فى القرءان الكريم
و لكن وردت كلمة آثار و مشتقاتها كما فى قوله تعالى
إِنَّا نَحْنُ نُحْيِي الْمَوْتَىٰ وَنَكْتُبُ مَا قَدَّمُوا وَآثَارَهُمْ ۚ وَكُلَّ شَيْءٍ أَحْصَيْنَاهُ فِي إِمَامٍ مُّبِينٍ (12) ‏

يا مراحب استاذى اسماعيل و شاكر مرورك الكريم

Quote: بنعزهم وبنحبهم ويكفى إن أعز الناس منهم...وخلى الحساد يموتوا بغيظهم. هم أبناء عمومتنا..وجدنا غانم.

اهلى الشايقية كغالب اهل البلد نفس المشاعر و الهموم
و نفس قسوة الحياه و الظروف جابوا مدن السودان و قراهو
تعايشوا مع الغير و تواصلوا و لا ادرى ما الذى يغيظ بعض الغير فى ذلك

.
الأخ الحبيب جلال
لا يحتاج اهلنا الشايقية لشهادة أخلاق من أحد فوالله أينما وجدناهم أو حللنا بينهم ، أو
جمعتنا بهم علاقة .... كانوا حُسن خُلُق ،وصفاء محتد ، وأصالة معدن ،وطيب معشر ،
وجمال سيرة ، ونقاء سريرة .. أهل كرمٍ ونجدة ، أغنياء كرامةٍ وعِزَّة .
فإن كانوا للطورية فقد كفتهم ولم يتسولوا قوتاً ، وإن كانوا للعسكرية فهي مجال العزة
والشرف والكرامة .
كأني بأخي وصديقي عزالدين أحمد محمد خير يقول :
.
نِحن النجوم الفي السَّــما وصلناها
ونحن الحارة والعرْكه ام عجاج خُضناها
نحن ولاد رِجال الصــاقعة نستناها
ونحن اللبوة من قِدامهــا شِلنا جناها
.
هون عليك العزيز جلالدونا

يا الف مراحب ود ابسن
و شاكر و مقدر مشاعرك الطيبة التى ابادلها اياك
و نفس الشعور يا حبيب .. حتّة القبيلة دى ما قاعد امش عليها
رغم كل ما نتعرض له من اذى و سخرية
لكن ان تصل القصة لى عنق الحقيقة و اجتزاء التاريخ لخدمة اغراض اخرى
هنا لا بد ان اتوقف و اعيد البصر ثلاث كرّات
لنريهم من التاريخ ما لم يروا او تغاضوا عنه

المماليك
و هم رقيق ابيض بدأ بشراء الاتراك على يد الامويين على يد الامويين و استعمالهم فى الجندية
ثم توسع الامر على يد العباسيين و بدأت الاستعانة بهم فى تسيير مرافقق الدولة و امتدت سوق النخاسة
لتشمل دول الاكراد و السلجقة و بعض دول القوقاز
فكان منهم الامراء الذين انفصلو بمصر واشهرهم قطز و الطاهر بيبرس حتى زال ملكهم بفتح
السلطان سليم لمصر

سلام جلال وضيوفه الكرام . اها الشايقية مالهم ؟ أجدع ناس ههههها

Quote: الطاهر بيبرس

الظاهر بيبرس .

والله يا جلالدونا حتي اللحظة ما دخلت البوست ولا ناوي ادخل،
لأني من عنوانو عرفتو جخنون للجهل والجاهلين ...

غايتو يا جلال بصراحة بوست غير موفق , واحسن بدل تركب رأسك اسمع كلام ود المدير
اسحب البوست .
أطالب بسحب البوست احتراما لنسيبى على عثمان محمد طه ههههههها

حيّاك الله و بيّاك حبيبنا ود كبّاشى
تصدّق تشابه كامل فى التجربة
برضك اخوك من اب و ام ممعنين فى شايقيتهم
و ساقنا الزمن حول مدن السودان
و اطول فترة استقرار كانت بالقضارف
قريت فى القضارف الاميرية أ
و القضارف الاهلية قبل ان تصبح جامعة القضارف فى هذا الزمن الاغبر و الاقبر
ثم بجرى الشعبية و كريمة الثانوية
اذكر و انا صغّير و نسكن كمبو هيئة توفير المياه بالقضارف
عمنا احمد يسن ... من دار حمر ..و هو الممرض المسئول من وحدة علاجية داخل الهيئة لمتابعة علاجات المرضى
اخطأت حقنته فأصابت شقيقى الاصغر بالشلل فى رجله و سرعان ما تدهورت حالته و سلف
حمل اهل المعسكر الطفل الى مثواه الاخير
لا زلت اذكر علامات الاسف الحقيقى و الحزن النبيل فى عيون عمى احمد و كمية التسامح الذى وجده من ابى و امى و زملاء الكمبو
و لسان الحال ربنا يعوّض بالاحسن و لم تتزعزع الثقة فيه ابدا
عثمان ازوق ... من منطقة جنوب النيل الابيض
لا زلت اذكر صوته بعد ان يفوز فى اقيام الكشتينة او الضمنة صيحة نصره
انا العب .. انا ازرق
عمر سطيح
ابيض البشرة ذو شعر سبيبى واضحة اصوله الاجنبينة لكنه من اسرة استوطنت الابيض
.. جميع اهل الكمبو يتناولون وجبة الغداء فى راكوبة نصبت وسط المعسكر لآن بالمعسكر بعض العاملين لا اسر لهم فى حالة تضامنية لم ارها قط فى حياتى ..
العم سطيح كان ينادى امى .. لو عاملة قراصة كلمينى باقى فترتا من عصيدة الدخن
عالم جميل و زين الى ان اتانا من تأبط شر العلم ليحاسبنا على دونية يحس بها بالرغم من عدم احساسنا بها
خليهم يا زول فى غيهّم يعمهون

يا الف مرحب ود المكّى و شاكر شهادتك الطيبة فى حق اهلى
التاريخ يا ود المكّى بقول
فى ذلك الزمان كانت تحكم السودان ثلاث ممالك
مملكة البجة و عاصمتها هجر
مملكة علوة و عاصمتها سوبا
مملكة المقرّة و عاصمتها دنقلا
و بعد اتفاقية البقط بدأ العرب و غيرهم الهجرة الى السودان
و انتشروا على ضفاف النيل حتى حدود مملكة علوة
و ان الحروب و الغارات الغير حاسمة لم تتوقف بين النوبة و المسلمين
و عندما دانت مصر للمماليك
نشطت تجارة الرق بهدف تجنيدهم لحماية دولتهم
و كونوا جيشا عماده السودانيون و البربر
حتى جاء السقوط الكبير على يد الظاهر بيبرس
و دان الشمال النيلى للقادمين الجدد
و نشطت حركة التجنيد و الاسترقاق للعمل فى مجال الزراعة

Quote: لا يحتاج اهلنا الشايقية لشهادة أخلاق من أحد فوالله أينما وجدناهم أو حللنا بينهم ، أو جمعتنا بهم علاقة .... كانوا حُسن خُلُق ،وصفاء محتد ، وأصالة معدن ،وطيب معشر ، وجمال سيرة ، ونقاء سريرة .. أهل كرمٍ ونجدة ، أغنياء كرامةٍ وعِزَّة . فإن كانوا للطورية فقد كفتهم ولم يتسولوا قوتاً ، وإن كانوا للعسكرية فهي مجال العزة والشرف والكرامة .

جلجل وضيوفك الكرام .. سلام

الكلام المقتبس فوق دا .. خير الكلام في اهلنا الشوايقه ...
وحبيناهم من قلوبنا وحبونا اكتر من حبنا لهم .. وما شفنا منهم الا كل خير ...
فلهم التحية والتقدير ...

عالم بطااله ...

حبيبنا جلادونا .. أهلنا واحبابنا الشايقية ..
أنا عشت معلم في نوري الغويبة سنتين ..
كنت أجي من دنقلا إلى كريمة ثم إلى نوري ..
نوري جنة الله في الارض أجمل بقعة زرتها في السودان ..
عرفت سر إبداع هؤلاء لأن البيئة غنية ومترفة بالخضرة والاهرامات ( الكرو ) والرمال في الغويبة
كما النيل فيه منعطف ما تعرف الشرق من الغرب .. والناس حلوين ورائعين وكلامهم منغم وجميل ..
طرب وإبداع حتى الطلبة في المدرسة تجدهم مبدعين وخاصة في النشاطات المدرسية ..
ونسة وعكننة في ميز المدرسين ( وما أدراك ما ميز المدرسين في تلك الايام ) نحن الدناقلة كنا نشتغل للشواقية
عشان نميري كان جاب لينا الكهرباء والتلفزيون ..في السبعينيات .. أيام جميلة ..
الله الله على لغتهم وتلك الإمالة الجميلة .. والدمج والادغام ..
في طالب جاني في المكتب وقال ( أستاذ ألفتولي جمع كراسات الحساب) قلت ليه ( شكراً يا شاطر )
ضحك زميلي الاستاذ قمر وقال ( علي طلاق انت ما فاهم الموضوع شنو .. ألفتولي يعني شنو ) لم أعرف الاجابة
وقال : إسمع يا دنقلاوي يا متخلف يعني ( الفة سنة أولى جمع كراسات الحساب )
ألفتولي ( يعني ألفة سنة أولى )
ليت الشباب يعود يوماً لذهبت من جديد إلى نوري الغويبة ..

مودتي جلادونا .. لقد ذهبت بنا إلى الزمن الجميل .. على الأقل ننزل الضغط شوية

يا هلا بى ود مهدى
غصبا عنك الشايقية احسن ناس
خاصة فى البنيان ال لا ورا و الطمبرة
و البوست ما فيهو حاجة عشان نسحبو
بس محاولة قراية للتاريخ من خشوم جدودنا و بعض ما كتب
تحياتى ليك و لى اسرتك الجميلة