Post: #1 Title: بل رأسك يا المنطط عينيك Author: طلحة عبدالله Date: 04-05-2016, 09:53 AM Parent: #0
08:53 AM April, 05 2016 سودانيز اون لاين طلحة عبدالله- مكتبتى رابط مختصر في عصر التقنيات والإنترنت وما تبع من وسائل إتصال حديثة بما في ذلك المنابر ( سودانيز أون لاين مثالا) والمنتديات ومواقع التواصل الإجتماعي، واتس، فيسبوكسناب شات، إنستجرام، الخ الخ الخ، زادت عزلة الصحافة الورقية وتضاعفت بالتالي محنة الذين يحملون في جيوبهم (بطاقة صحافية)، بعد أن ظهر على السطح جهابذة يجيدون فن الكلم وبلاغته من حسن تعبير وتعليل وكناية وجناس وطباق، مع أفكار من ذهبمؤكدين بما لا يدع مجالا للشك أنهم مواهب كانت مدفونة تحت الركام بسبب مجاملاتأصحاب الصحف الذين وظفوا متواضعي الإمكانات والملكات من الذين يجيدون مختلف فنون النفاق الإجتماعي من دهنسة وتمظهر وتبختر مع رؤوس أفرغ من الفراغ العريض..أعتقد والله أعلم أن سنة واحدة بالكتير وسيحال هولاء جميعا إلى الشارع العام ليبقي ما ينفع الناس.. سارعوا إلى الإنضمام للمنابر والمنتديات وقروبات الواتس والفيس وخلافو دون قيد أو شرط إلا الموهبة والكيبورد السنين .. خلاص ولي عهد الزيف والنفخة الكدابة . وبل رأسك أنت وهو يا ......... خخخخخخخ ملحوظة: في المنابر برضو توجد كائنات تحمل نفس صفات بعض المتصيحفين أعلاه بل وأكتر خصوصا فيما يتعلق بالرأس الفاضية وإجادة الدهنسة وحرق البخور ودق النوبة .. خخخخخخخخ برضو . يتبع إن الله هون .
Post: #2 Title: Re: بل رأسك يا المنطط عينيك Author: طلحة عبدالله Date: 04-05-2016, 09:55 AM Parent: #1
ملعوبة حكاية (سودانيز اون لاين مثالا) دي .. علق يا ريس علق .. خخخخخخخ
Post: #3 Title: Re: بل رأسك يا المنطط عينيك Author: معاوية المدير Date: 04-05-2016, 10:11 AM Parent: #2
Quote: ملعوبة حكاية (سودانيز اون لاين مثالا) دي .. علق يا ريس علق .. خخخخخخخ
يعني يكتب تعليق، واللآ يعلّق البوست فوووق ؟. والله مشتاقين ...
Post: #4 Title: Re: بل رأسك يا المنطط عينيك Author: قصي محمد عبدالله Date: 04-05-2016, 10:34 AM Parent: #3
Quote: بل رأسك يا المنطط عينيك
كأنك قاصد وكالة سونا للأنباء !!!!!!!!!! ---- ظل المشهد كما يبدو لي من الزاوية التي قرأت بها المنشور
Post: #5 Title: Re: بل رأسك يا المنطط عينيك Author: طلحة عبدالله Date: 04-05-2016, 10:46 AM Parent: #4
ود المدير وقصي الإتنين من الأحباء في المنبر غايتو أنا بعرف لكن متأكد أي زول من هنا وهناك قرأ البوست دا بعرف طوالي انو هو المقصود .. طواقي مفصلة بالمقاس .. خخخخخخخ
ويا ود المدير إشمعني انت يعلقوا ليك يعني ؟ أعتقد انو البوست دا يستحق التعليق والتعليق الاتنين .. هه
Post: #6 Title: Re: بل رأسك يا المنطط عينيك Author: قصي محمد عبدالله Date: 04-05-2016, 11:26 AM Parent: #5
Quote: ويا ود المدير إشمعني انت يعلقوا ليك يعني ؟
أمس كنت على وشك افتح موضوع عن افلاس بكري، ياخ فقط عنوانين رئيسين (واحد عن الإنفصال وواحد عن جامعة الخرطوم).. 3 منابر (حر وأخبار وعام) وأكثر من 100 مفال ما في أي موضوع تالث ملأ عينو !!!
Post: #7 Title: Re: بل رأسك يا المنطط عينيك Author: طلحة عبدالله Date: 04-05-2016, 11:43 AM Parent: #6
يا شيخ قصي ياخ أنا البوست دا عايزو فااااااااشنو أبعدنا عن الكلام في السياسة يرحمك الله ..
Post: #8 Title: Re: بل رأسك يا المنطط عينيك Author: آدم صيام Date: 04-05-2016, 11:51 AM Parent: #6
Quote: أعتقد والله أعلم أن سنة واحدة بالكتير وسيحال هولاء جميعا إلى الشارع العام ليبقي ما ينفع الناس..
يا زعيم حبابك
كمان الصحافة الجد جد بقت (تخصصين في آن واحد) في العصر ده عالم في التاريخ والصحافة حتى يحرر ليك برامج القناة التاريخية عالم في البيئة والزيولوجي والصحافة حتى يحرر ليك ناشونال جيوغرفك طبيب وصحفي حتى يحرر برنامج صحتك بالدنيا شفت د. الكارس صديقي، جمع الاقتصاد والإعلام حتى مرق لينا وثائقياته الزمن ده تلاتة دكتوارة حتى الواحد يلا ويمين يأكل فول بالدكوة. يا زول، حتى تأليف الكتب أقل من اتنين حاملين دكتوراة المؤلف إلا يلفو بيه الترمس! هذا عصر العقل الجمعي دم بخير
Post: #9 Title: Re: بل رأسك يا المنطط عينيك Author: طلحة عبدالله Date: 04-05-2016, 11:57 AM
حباب الحبيب آدم صيام على كدا في جماعة كدا عارفم أنا حقوا يطلعوا الملود والسلوكة ويشوفوا تيرابم وين ... خخخخخخخ
Post: #10 Title: Re: بل رأسك يا المنطط عينيك Author: حامد بدري Date: 04-05-2016, 04:59 PM Parent: #9
مسا الخير يعني نغني لي ناس البطل وبتاع صلاة نقد داك ياحليل ناس حفظو محبة مانجيك ايدنا فاضية اتفضل موش ناس قصي الواحد شايل اليدوية ونازع فتيل الامان ابصلعة ده مامضمون عادي بشيل العدة
Post: #11 Title: Re: بل رأسك يا المنطط عينيك Author: محمد عبد الله الحسين Date: 04-06-2016, 05:08 AM Parent: #10
حبيبنا طلحة كيفك؟ دايما تغيب و ترجع و تفك لينا موضوع كل واحد يفهمه بطريقته. يعني هسه الواحد ما عارف نفسه وين؟ ههههههه لكن ما مشكلة استمر و نحن حننتظر ورانا شنو؟ مع تحياتي و تقديري
Post: #12 Title: Re: بل رأسك يا المنطط عينيك Author: عبداللطيف حسن علي Date: 04-06-2016, 03:45 PM Parent: #11
طلحة تحياتي :
كلهم اعلام فول خخخخخ وسيكافا سااااي .... الناس بقت تقرا وقافي ، لانو الجواب يكفيك عنوانو !
Post: #13 Title: Re: بل رأسك يا المنطط عينيك Author: درديري كباشي Date: 04-06-2016, 03:53 PM Parent: #12
تذكرت زمان يا طلحة لامن نكون مسافرين من الخرطوم لكسلا في السوق الشعبي تختار لك واحدة من الصحف الصحافة أو الايام أو السياسة أو حتى الراية وألوان .. وكانت دسمة تكفيك لغاية ما يدخل البص كسلا هسع تشتري الصحف كلها ويكملوا قبل ما يصل البص الكاملين .. وتتم المشوار تسالي وفيديوهات النكات الممجوجة التي درج اصحاب البصات على هري المسافرين بها ..
Post: #14 Title: Re: بل رأسك يا المنطط عينيك Author: MOHAMMED ELSHEIKH Date: 04-06-2016, 05:24 PM Parent: #13
انت ياقصي كمان ماتبالغ سونا دي حلقوليها من زمن الدش القدر الكتلة داك
Post: #15 Title: Re: بل رأسك يا المنطط عينيك Author: أحمد محمد عمر Date: 04-06-2016, 07:50 PM Parent: #14
ما وسائل التواصل بس هي الحتنهي الصحافة الورقية انتشار صحافة وسائل التواصل بين الصحفيين حينهيها اسرع الصحافة الرياضية كمثال اصبحت إما تطبيل بالكضب أو انتقاد وتحامل بالكضب تحس بي إنه الصحفي ينفث سموم في العمود والما حاقدين وناسين ساي اختفى التحليل والحياد والوطنية وحل محلها الشماتة والصحافة المغرقة في الشعبية امسك مثالين لصحفيين نجوم شباك بتتباع الجرايد على حسهم .. محمد عبد الماجد وبابكر سلك هل يعقل إنه عمود صحفي عندو قيد يكون يومياً بالكامل باللغة الدارجية !!! البعرفه إنه ممكن تكتب الحوارات والمقولات بالدارجية إذا خفت ضياع المعنى .. وممكن سطر سطرين للطافة .. لكن العمود بالكامل ؟؟!!
Post: #16 Title: Re: بل رأسك يا المنطط عينيك Author: طلحة عبدالله Date: 04-07-2016, 08:15 AM Parent: #15
حامد بدري يا الحبيب سلام .. جبت وجيت وما قصرت يديك العافية
محمد عبدالله الحسن إطمئن انت لا مع ديل ولا مع ديل .. إتا متفرد ههههه تحياتي
عبد اللطيف حسن الاعلام عندنا موية فول يا ريتو لو فول .. حدهم قريب
يا درديري جريدة شنو كمان البشيلا معاي .. والله إلا كان عايز أمتع نفسي بالمساخر يا حليل زمن الجرايد بقيفو ليها بالصف يا حبيب .
محمد الشيخ ليك التحية والشكر ع المرور
يا أحمد محمد عمر شفتا الاتنين الذكرتهم ديل تحديدا هم الجابوا الصحافة واااااطة واحد زي عبد الماجد دا يقعد يشخبط من أول الصفحة لآخر الصفحة وما تعرفو عايز يقول شنو واللا قاصد شنو .. يشيل ويواسي من رويسو ويقحم في النكت القديمة المسيخة في لا مكان ولا مناسبة وقسما عظيما ما حصل قريت ليهو حاجة فهمت عايز يقول فيها شنو .. والعجب سلك.. ياخ دا أبو أم المهازل .. وبرضو يقول ليك عندنا أزمة ورق .. والله أنا شايف حقو الورق البكتبو فيهو المخاليق ديل يستعملوا في حاجة مفيدة للانسان بدل رامينو لأخوان ناس سلك ديل .
