الطفل النيجيري المتهم بالسحر كيف كان وكيف أصبح؟

08:23 AM April, 02 2016

سودانيز اون لاين
Saifaldin Fadlala-الدنمارك
مكتبتى
رابط مختصر

فادت وسائل إعلام بأن الطفل النيجيري ذي العامين المتهم بالسحر وكانت أنقذته الدنماركية أنغا ريدغيرن من الموت بعد أن ألقته أسرته إلى الطرقات من غير طعام أو لباس أصبح يتمتع بصحة جيدة.

وكانت أنغا ريندغيرن وهي متطوعة من الدنمارك أنقذت قبل شهرين الطفل النيجيري الجائع الذي تجنبه الناس ظنا منهم أنه ساحر ولاعتقادهم أنه روح شريرة، بعدما ألقته أسرته إلى الشارع لأكثر من 8 أشهر ليعيش على فتات الطعام الذي يجده في القمامة.

وأعطت ريندغيرن للطفل اسم "أمل"، مشيرة إلى أنها نشرت قصة الطفل المأساوية بعد يومين من أجل جمع التبرعات لتغطية نفقات علاجه.

نقلا عن روسيا اليوم

لا حول ولا قوة الا بالله



الجهل مصيبة

كان كتلو انشاءالله يا رب يربي ويتعلم ويبقي سبب لدك الخرافة وتفتيتها في امخاخ القرون الوسطي العايشة وان يبقي سبب لتفكيكها في مخ اهلو الجدعو وان لا يجد غبن ولا حقد الي قلبه وعقله طريق

التحية للدينماركية وكل الاحترام

Quote: ويبقي سبب لدك الخرافة وتفتيتها في امخاخ القرون الوسطي

شكرا الاخ حامد لمداخلتك القيمة
للاسف الخرافة عندنا في السودان,تعرض تحت الاشجار
وعلي مرأي من المسئولين,باعة العروق والحجبات
وتنزيل الاموال,,حتي وصل الامر بدجالي الفودو
ان يركبوا الماسورة,لاحد خبرائنا الوطنيين,,خبير وطني يهز ويرز
وبرضو الناس تسأل يا حماعة ليه نحن متخلفين

هذه هي الانسانية,لا دين او عرق
شاهدت مثلها,شقراوات..في معسكر ود شريفي,ايام مجاعة1984 وهن يحملن,ويحاولن بمشقة
انقاذ اطفال اللاجئين المحتضرين وبدون تأفف..اختي في الانسانية.
وهذه الفتاة,ورغم انسانيتها,,لو شاء حظها العاثر ان تقع في يد بوكو حرام او داعش..
لهللوا وكبروا عارضين رأسها علي سكين الكلاشنكوف..او يتم اكرامها بالسبي..
خلاصة هذه القصة..ان الخرافة وسحر الفودو يكبلان عقول كثير من المجتمعات الافريقية والعربية
وما زلنا في عهود مطاردة السحرة,,وما زال الكثيرون يبحثون عن حلول لمشاكلهم المادية,عبر
الالتجاء للتفسيرات الغيبية المبهمة

Quote: هذه هي الانسانية,لا دين او عرق شاهدت مثلها,شقراوات..في معسكر ود شريفي,ايام مجاعة1984 وهن يحملن,ويحاولن بمشقة انقاذ اطفال اللاجئين المحتضرين وبدون تأفف..اختي في الانسانية. وهذه الفتاة,ورغم انسانيتها,,لو شاء حظها العاثر ان تقع في يد بوكو حرام او داعش.. لهللوا وكبروا عارضين رأسها علي سكين الكلاشنكوف..او يتم اكرامها بالسبي.. خلاصة هذه القصة..ان الخرافة وسحر الفودو يكبلان عقول كثير من المجتمعات الافريقية والعربية وما زلنا في عهود مطاردة السحرة,,وما زال الكثيرون يبحثون عن حلول لمشاكلهم المادية,عبر الالتجاء للتفسيرات الغيبية المبهمة

ده لانك يا سيف الدين ما عارف حاجة و خرافة الالة الاعلامية الغربية تكبل عقلك .
في منظمات بتشتغل كده ساي لله ؟
قال بدون تأفف !!
دي اعلانات عشان ياخدو لقطة لقطتين لوسائل الاعلام و يعملو اعلان للتبرعات
تبرعو لشراء علاج و ملابس للطفل المحروم يا سلااام
ثم تنهال التبرعات من المواسير فيتم تحويلها الى ارصدة بنكية بالمليارات في حساباتهم الشخصية

هسي تفتكر التبرعات التي اتت لهذا الطفل تكون كم ؟؟؟ و ادوهو كم منها ؟؟؟
قلت لي شقراوات ؟؟؟
خخخخخخخخخخ

سلامات يا سيف وزواره الأكارم ..
يا خالد هاك دا قرآن يتلى :

Quote: ثُمَّ قَفَّيْنَا عَلَى آثَارِهِم بِرُسُلِنَا وَقَفَّيْنَا بِعِيسَى ابْنِ مَرْيَمَ وَآتَيْنَاهُ الْإِنجِيلَ وَجَعَلْنَا فِي قُلُوبِ الَّذِينَ اتَّبَعُوهُ رَأْفَةً وَرَحْمَةً وَرَهْبَانِيَّةً ابْتَدَعُوهَا مَا كَتَبْنَاهَا عَلَيْهِمْ إِلَّا ابْتِغَاء رِضْوَانِ اللَّهِ فَمَا رَعَوْهَا حَقَّ رِعَايَتِهَا فَآتَيْنَا الَّذِينَ آمَنُوا مِنْهُمْ أَجْرَهُمْ وَكَثِيرٌ مِّنْهُمْ فَاسِقُونَ ﴿27

Quote: يا خالد هاك دا قرآن يتلى :Quote: ثُمَّ قَفَّيْنَا عَلَى آثَارِهِم بِرُسُلِنَا وَقَفَّيْنَا بِعِيسَى ابْنِ مَرْيَمَ وَآتَيْنَاهُ الْإِنجِيلَ وَجَعَلْنَا فِي قُلُوبِ الَّذِينَ اتَّبَعُوهُ رَأْفَةً وَرَحْمَةً وَرَهْبَانِيَّةً ابْتَدَعُوهَا مَا كَتَبْنَاهَا عَلَيْهِمْ إِلَّا ابْتِغَاء رِضْوَانِ اللَّهِ فَمَا رَعَوْهَا حَقَّ رِعَايَتِهَا فَآتَيْنَا الَّذِينَ آمَنُوا مِنْهُمْ أَجْرَهُمْ وَكَثِيرٌ مِّنْهُمْ فَاسِقُونَ ﴿2

يا أخ محمد الملك أحسنت وكذلك الصحابة عليهم الرضوان كان فيهم من يعلم بهذه الرحمة للضعفاء والمساكين التي يتمتع بها الروم (العالم الغربي بمصطلح اليوم) قال المستورد القرشي عند عمرو بن العاص سمعت رسول الله صلى الله عليه وسلم يقول تقوم الساعة والروم أكثر الناس فقال له عمرو أبصر ما تقول قال أقول ما سمعت من رسول الله صلى الله عليه وسلم قال لئن قلت ذلك إن فيهم لخصالا أربعا إنهم لأحلم الناس عند فتنة وأسرعهم إفاقة بعد مصيبة وأوشكهم كرة بعد فرة و خيرهم لمسكين ويتيم وضعيف وخامسة حسنة جميلة وأمنعهم من ظلم الملوك
رواه مسلم

Quote: ده لانك يا سيف الدين ما عارف حاجة و خرافة الالة الاعلامية الغربية تكبل عقلك . في منظمات بتشتغل كده ساي لله ؟ قال بدون تأفف !! دي اعلانات عشان ياخدو لقطة لقطتين لوسائل الاعلام و يعملو اعلان للتبرعات تبرعو لشراء علاج و ملابس للطفل المحروم يا سلااام ثم تنهال التبرعات من المواسير فيتم تحويلها الى ارصدة بنكية بالمليارات في حساباتهم الشخصية

والله يا خالد هذا الكلام ليس صحيحا! عمال الإغاثة و التمنية الدوليون يضعون أرواحهم على أكفهم لا يدفعهم إلا إنسانية مفرطة! تراهم في اليمن و العراق و سوريا و غيرها " الغريبة كلها بلاد مسلمة او سبب البلاوي فيها مسلمون كما في نيجريا، كينيا، و مالي و غيرها" !
يا خالد الحكاية ما فوضى! حتى الامم المتحدة لا تتعدى ميزاينة التسير فيها بما فيها المرتبات اكثر من 20% من المال المتبرع به إذا كان دوليا و لا يتعدي 7% إذا كان تبرعات شخصية!
هذا كلام أكيد... لا تبني اوهام في راسك و تبني عليها حقائق!

Quote: دي اعلانات عشان ياخدو لقطة لقطتين لوسائل الاعلام

هذا كلام فطير
الدنماركيون شعب كريم,كثيرون منهم اعضاء في المنظمات الانسانية
ويدفعون لها كل شهر,,اي سوبر ماركت تلقي صناديق هذه المنظمات
وشاهدت حتي اطفالهم يرمون في هذي الصناديق,خمسة او عشرة كرونة
مع نظرات تشجيع من ابائهم او امهاتهم,ولا يمر شهر والا تعلن احدي هذه المنظمات
حملة تبرع لافريقيا او لاسيا,,محلات الاشياء المستعملة,كل عامليها متطوعين وعائد
البيع يذهب للاعمال الانسانية

Quote: “قال الخليل بن أحمد : الرجال أربعة، رجل يدري أنه يدري ، فذلك العالم فاسألوه ؛ ورجل يدري ولا يدري أنه يدري ، فذلك الناسي فذكروه؛ ورجل لا يدري ويدري أنه لا يدري ، فذلك الجاهل فعلموه؛ ورجل لا يدري ولا يدري أنه لا يدري ، فذلك الأحمق فاجتنبوه.”

سلام و تحية ، ، ،

حقيقة الجهل مصيبة ، ، ،

أكيد لا أقصد جهل الشخص الذي أقنع الناس بإجتناب هذا الطفل ، لكني أقصد جهل الذي لا يدري حقيقة ما يقوم به ملائكة الرحمة من المتطوعين بالمنظمات الإنسانية و لا يدري أنه لا يدري حقيقة ما يقومون به !

يتبرع الشعب الأمريكى سنوياّ بحوالى ثلاثمائة مليار دولار للأعمال الخيرية
تنفق فى درء الكوارث وضحايا الحروب وعلاج الأمراض والأوبئة وهذه من تبرعات المواطنين فقط.

يا خالد المبارك كلامك ما صاح...فهؤلاء ملائكة رحمة ويعملون
كل ذلك من اجل الانسانية وليس من اجل جمع المال...فاذا كانت
هذه الدنماركية تريد المال والحياة المرفهة فما الذي يجبرها ان تاتي
لادغال افريقيا وتخوض المخاطر لانقاذ المحرومين والمظلومين..
..وبس انا خايفة حاجة واحدة فقط..خايفة انك بتكون بتايد ناس
بوكو حرام والذين باسم الاسلام يقتلون الابرياء ويغتصبون النساء والقصر
وكمان خايفة انك بتكون بتايد ناس داعش المجانين وهم كلهم كانوا قطاع
طرق ومجرمين في بلادهم وجاءوا لسوريا للمغامرة واشباع الشهوات عبر
الارهاب وزرع الرعب وسط الشعب السوري والعراقي وقطع رؤوس الابرياء
بالسيف....بوكو حرام وداعش لا يعرفون الاسلام ...اما هذه الدنماركية
فتعرف تعاليم الاسلام اكثر من هؤلاء المجرمين الذين يدعون الاسلام...
والله يديك الصحة والعافية..

لك الشكر ياسيف الدين على تنويري بماساة هذا الملاك الصغير الذي قسى عليه ذووه وهملوه ليموت فانقذته هذه السيدة الدنماركية المحسنة العطوفة فلها الشكر والثناء.

**دي اعلانات عشان ياخدو لقطة لقطتين لوسائل الاعلام و يعملو اعلان للتبرعات
تبرعو لشراء علاج و ملابس للطفل المحروم يا سلااام
ثم تنهال التبرعات من المواسير فيتم تحويلها الى ارصدة بنكية بالمليارات في حساباتهم الشخصية **

كلام خالد المبارك هذا خير منه جهلة اهله وعشيرته الذين اعتبروه ساحرا وتركوه، وكن لم يعترضوا على من ساعده وأنقذه.. باللاى خالد هذا رجل مسلم
ويقول هذا الكلام.. لا يرحم لا يترك رحمة الله تنزل؟ أعتقد لو كنت هناك يا خالد لحرمت الطفل من رحمة هذا المرأة لأنها اكلت الملايين حسب ظنك السيئ
الذى لا دليل عليه.. ما تتكلم كلام عام عن المنظمات.. هل تعرف هذه السيدة شخصيا وحسابها في البنك؟ هذا ليس انا وإنما قيم الشريعة هي التي تسألك هذا
السؤال.. هل تعرف كم جمعت وكم صرفت.. لو أنت مسلم مسؤول وعندك قليل من الورع الذى يعصمك من الوقوع في تهلكة أخذ انسان بالظن دون أن تتبين
وتقول ان (المنظمات) هكذا.. لا يمكن ان تتورط فيما تتورط فيه. شفت لو المرأة هذه جمعت مليون وأنقذت هذا الطفل بالف دولار فقط، فهى افضل عند الله مما تقوله
أنت.. لأنها أنقذت حياة انسان حين تعترض أنت على ذلك.. وأقول لك شيء: كل اناء بما فيه ينضح، فهذه هي عقلية الإنقاذيين.. نهبوا المعونات وتركوا الضحايا
حتى ان قطر والدول المانحة بدأت تشترط توزيع الإعانات بنفسهـا.. والمعونة الأمريكية التي يتلقاها السودانيون اليومين دول جات من أين؟ اليست من دافع الضرائب
والمتبرعين الأمريكان؟
الا تخاف الله.. لقطة لقطتين: شوف الصورتين وقدر الزمن بينهما.. وحاول تتخيل كيف صار الطفل من الصورة الأولى حتى وصل مستوى الصورة الثانية، وكم من الزمن
أخذته (اللقطتان)؟ وأين كان طيلة هذه الفترة؟
أنت يا اخى تتحسر على المعونات التي تلقاها هذا الطفل البائيس ولم تجد طريقها لجيوب الجبهجيـة.

Quote: فَمَا رَعَوْهَا حَقَّ رِعَايَتِهَا

يحكي لي أحد الأشخاص أنه في فترة ما وأثناء تقديم المعونات لبعض المتضررين،
أن امرأة قدمت فاكهة لأحد الاشخاص ، وعندما لم تطن الكاميرا موجهة اتجاهها ردت
الفاكهة في نفس الوقت الذي كان يمد فيه المحتاج يده لأخذها،
ومن ثم أعطت إشارة للمصور بأن يركز معهما...
عادت ومدت الفاكهة مرة ثانية للمحتاج ، فما كان منه إلا وأن رفضها أمام الكاميرا.
--------

**ومن ثم أعطت إشارة للمصور بأن يركز معهما...
عادت ومدت الفاكهة مرة ثانية للمحتاج ، فما كان منه إلا وأن رفضها أمام الكاميرا.**

وبعدين يا شيخ قصى.. داير تصل لشنو؟

الناس هنا لا تعرف إجراءات وأساليب الجمعيات الطوعية.. الزول القدم الفاكهة لم يدفعها من جيبه، والمانحون يريدون وثائق ان أموالهم تصل الى
المحتاجين حسب إدعاء الجمعيات، حتى يواصلوا الدعم.. ولو اتفقت معك في نقطة واحدة تكون ان الموظف وبعد أن أخطأ في عدم توثيق التوزيع كان عليه تحمل
المسؤولية ويعطيه فاكهة أخرى مع تصوير عملية التوزيع.

شوف موظفي الدعوة الإسلامية وكل المنظمات الخيرية الإسلامية يصورون من يعينونهم ويجيبوهم في التلفزيون.. ما شفت دا؟ بل يجيبوا طفل محتاج في التلفزيون، يصوروه
بائس وجائع، ثم يصورونه بالفيديو وهو مبتســم.

Quote: شوف موظفي الدعوة الإسلامية وكل المنظمات الخيرية الإسلامية

ودول طبعا مصيبتهم مصيبة لا يمنحون الغذاء والدواء والمساعدات انسانية منهم...بل لغرض الدعوة والاسلمة

يعني يديك شوال دقيق بيد وبالبيد التانية يديك جلابية تصلي بيها

ودا غلط ...دي ما انسانية ولا اخلاقية...كيف تستغل حوجة الناس وفقرهم ومرضهم عشان يبقوا مسلمين؟

وبرضو الكلام دا موجه للجماعات التبشيرية المسيحية

عمل الخير دا عمل انساني في المقام الاول موش دعوة وتبشير

حاجة غريبة

الجهل وغلظة القلب مصيبة

Quote: ده لانك يا سيف الدين ما عارف حاجة و خرافة الالة الاعلامية الغربية تكبل عقلك . في منظمات بتشتغل كده ساي لله ؟ قال بدون تأفف !! دي اعلانات عشان ياخدو لقطة لقطتين لوسائل الاعلام و يعملو اعلان للتبرعات تبرعو لشراء علاج و ملابس للطفل المحروم يا سلااام ثم تنهال التبرعات من المواسير فيتم تحويلها الى ارصدة بنكية بالمليارات في حساباتهم الشخصية

كلامو صاح الزول دا يا سيف وأنا شاهد

نجيب ليك الأدلة على كلامو، من التمانينات بريطانيا كانت مفلسة، قامو شنو لفقوا لينا تهمة وقالوا في مجاعة في السودان عشان يجمعوا مليارات ويكبوها في جيوبهم. الفي الصورة فوق دا يا خالد لمبارك العداء خليفة عمر ما الخليفة عمر. أها برضو مشى هناك ولمو فيهو ناس ديانا والأمير شارلس (أخو الأمير توفيق بتاعنا الواحد ده، في الانسانية)، ديانا قالت لشارلس صورنا معاهو لقطة لقطتين عشان نشتهر ونلم لينا قريشات الدنيا مهي معروفة، كانت عروس جدييييييدة جابوها من الضهاري ودايرة تضمن مستقبلا، كلم سيف الدين الما عارف حجة دا دا ولدنا خليفة عمر العجوز الواقفة جنبو وبتقالع فيهو الرتينة ما عرفتها، لكن ياهم عادتهم الكفار يستغلوا المشاهير بتاعيننا، شوف الحيزبون الماسورة لاصقة فيهو كيفن! ديل المواسير العواطلية القاموا جارين معاهو، قلة شغلة ناس لندن، الكفار الجد جد اتلملمو عشان لقطة لقطتين بالله انكشحوا زي الرز في استاد ويمبلي، هياااا خالد دحين داك ما ريتشارد الواقف جنب القائم الأيمن وماسك السيجارة؟ فشفت يا خالد لمبارك ناس سيف الدين ديل مغشوشين ساكت، أديهم بالتقيل عليك الله. أها النزيدك يا سيف الدين الما عارف حاجة، الود مايكل سمع بالخبر، قووووم يا مايكل لم الفنانين جت عليهم قال ليهم (هوي اليوم غزوة ذات اللقطات وإني موصيكم بما إن تمسكتكم به لن تفلسوا أبدا، الما سمع يكلكم السامع، وتالله إني أرى ما لا ترون ورفع يديه إلى السماء فما زال يحدثنا عن أفريقيا حتى حسبناه منها) أ.هـ الكلام الفوق كان بالإنجليزي طبعاً، أنا ما حضرتو في السقيفة لكن الخبر وصلني، قالوا مايكل وليونيل رتشي اتداققوا اليوم داك اختلفوا في القسمة قبال ما القروش تجي. مايكل الشفت بدل اللقطة واللقطتين عمل فيلم كامل تصور يا خالد لمبارك، الجماعة ديل خلي بالك كانوا مفلسين فلسة عدوك، هسع بالغنية حقتم ديك يكونوا والله العظيم السنة ديك غنوا لجنا جناهم، يا زول قال ليك مايكل دا كان بضبح في الأسبوع مرتين، شبع من الشية بالسلطة الكافر العواليق، هسع دا عمل يستاهل يدفعو ليه قروش! أها يا خالد، عشان يستدروا عطف المواسير، عمك في الصف الأول لابس بدلة ومدنقر دا اسمو (ري جارلس) متشرد خمشوهو غرفوهو من الشارع قالو ليهو إثيوبيا والسودان فيهن مجاعة تعال أرحكا اتصور معانا أطلع ليك بمية ميتين دولار. غايتو كان ما اللقطاية دي الناس الفي صورة ديل كانو ماتوا بالجوع قلة الشغلة تجدد النشاط ___ شفت كيف يا سيف.

**الواقفة جنبو وبتقالع فيهو الرتينة ما عرفتها، **


لايك..

عمرى ما قلت لايك لكن المرة المطلوقة الما معروف ليها اصل دى الدايرة تتلبط في الفقراء عشان تستدر عطف المانحين وتعمل ملايين تستحق..

Quote: تتلبط في الفقراء عشان تستدر عطف المانحين وتعمل ملايين تستحق..

نفس الاسلوب الذي ينتهجة ساكني فنادق أوروبا من ما يسمى بزعماء بلادي المتهالكة الأطراف.

طنشت ردى عليك الفوق يا قصى،

طيب صاحبك اللى حكى ليك قصة الفاكهـة ما وراك الصورة دى؟

هسى نحن ضد الاخوان المسلمين واساليبهم للوصول للسلطة، رغم ذلك نرحب بأعمال منظمة الدعوة الإسلامية لأن المستفيد من نشاطها هم المحتاجين ولايمكن ان تقف السياسة عائقا لحرمانهم من المساعدات التي يحتاجونها.. رأيك شنو في الصورة هذه، من السودان، والنسوان واقفات صف لتلقى المعونات من الشاحنة.. توضح ان أساليب المنظمات كلها واحدة وتأتى من ضرورة الشفافيـة المفروضـة عليهامن المانحين والمتبرعين..

شكرا لكل المتداخلين علي اثرائهم البوست بالنقاش..وتبقي الانسانية

Quote: طنشت ردى عليك الفوق يا قصى،

أحمد الله يا أبوريش واحتسب

ناس قصي ديل الظاهر ما حضروا سنوات المجاعة وعيش ريغان. يطنشك دي خفيفة، دا لو لقى طريقة كان مسك البوست دا من لهزمتيه وطبلو زماااااان. ____ فيهم واحد طلب يسلموهو مفاتيح الانترنت صراحة، تصور!

طبعا يا حاتم اخونا قصى غالبا ما فهم تعليقى على صورة مارغريت تاتشـر، او المرأة الحديدية..

**ناس قصي ديل الظاهر ما حضروا سنوات المجاعة وعيش ريغان.**

غالبا يكونوا حضروها يا حاتم، لكن حتى الان ما لقوا فتوى بخصوصها من شيوخهم الوهابيـة.

Quote: غالبا يكونوا حضروها يا حاتم، لكن حتى الان ما لقوا فتوى بخصوصها من شيوخهم الوهابيـة.

سبحان الله

سمح شيوخهم ديل كانوا وين لما الناس حفرت بيوت النمل؟ الكافر يجيب العيش والبسكويت من أمريكا وصوتوا ينقرش بالغناء عشان يلقط لينا قريشات ناكل. ____ أظن كنا بعيدين جغرافيا ولا كنا حبش ساي؟

Quote: سمح شيوخهم ديل كانوا وين لما الناس حفرت بيوت النمل

يا حاتم انت زول ما نصيح دي بسموها ابتلاءات ,تحميص الناس بالجوع عشان يخشو الجنة مشلهتين

Quote: لكن حتى الان ما لقوا فتوى بخصوصها من شيوخهم الوهابيـة.

شكلكم بس بتلغفوا وتقرطعوا وتحمدوا أوباما البعدكم من فتاوى الوهابية !!
-------

والله يا حاتم انت بالغت عديل كده في تعليقك على صورة الاميرة الراحلة ديانا
مع العداء السوداني عمر خليفة ....
يا حاتم انا قبل سنتين زرت لندن وفي اثناء تجوالي شفت قصر منيف ومساحتها
قدر مساحة حي كامل في الخرطوم ولمن سالت عن هذا المبنى الفخم المنيف قالوا
لي هذا قصر الاميرة ديانا....يعني معقولة نصدق ان من تمتلك مثل ذلك القصر
تكون محتاجة تتصور مع واحد مشهور عشان تلم قروش تامن بيها مستقبلها..
..كان ما خايفة الكضب..ثمن القصر ده بيساوي ميزانية دولة افريقية لفترة سنتين
( وجه ضاحك).

والله يديك الصحة والعافية

Quote: شكلكم بس بتلغفوا وتقرطعوا وتحمدوا أوباما البعدكم من فتاوى الوهابية !!

كلامنا عن الانسانية يا قصي، تلميحاً

فما يجمعنا في الكوكب هو الانسانية، ليس اللغف والقرطعة فقط والتي تهم الآخرين فأنت غير ملام إن كان الأكل والشرب هو غاية من يمن علينا، إسلاماً. آمل إنك تكون شفت الفرق بوضوح. ___ ربما لهذه الأسباب أوكلوا للنمل مساعدتنا.

Quote: يا حاتم انت زول ما نصيحدي بسموها ابتلاءاتدي تحميص الناس بالجوع عشان يخشو الجنة مشلهتين

هي والله صحي، إن الله إذا أحب عبداً ابتلاه

هسع يا قصي، يعني ناس النفط والتفحيط والكبسة والمندي والسواق الهندي ديل الله ما بحبهم؟ ولا البلاوي دي معناها يتوقف على الجغرافيا location rated؟ ___ راصنا ضارب.

Quote: فَمَا رَعَوْهَا حَقَّ رِعَايَتِهَا

ربنا متوازن جدا يا قصي ..

Quote: وَقَفَّيْنَا بِعِيسَى ابْنِ مَرْيَمَ وَآتَيْنَاهُ الْإِنجِيلَ وَجَعَلْنَا فِي قُلُوبِ الَّذِينَ اتَّبَعُوهُ رَأْفَةً وَرَحْمَةً وَرَهْبَانِيَّةً ابْتَدَعُوهَا مَا كَتَبْنَاهَا عَلَيْهِمْ إِلَّا ابْتِغَاء رِضْوَانِ اللَّهِ فَمَا رَعَوْهَا حَقَّ رِعَايَتِهَا فَآتَيْنَا الَّذِينَ آمَنُوا مِنْهُمْ أَجْرَهُمْ وَكَثِيرٌ مِّنْهُمْ فَاسِقُونَ الْأَعْرَابُ أَشَدُّ كُفْرًا وَنِفَاقًا وَأَجْدَرُ أَلَّا يَعْلَمُوا حُدُودَ مَا أَنْزَلَ اللَّهُ عَلَى رَسُولِهِ وَاللَّهُ عَلِيمٌ حَكِيمٌ {التوبة: 97} وَمِنَ الْأَعْرَابِ مَنْ يُؤْمِنُ بِاللَّهِ وَالْيَوْمِ الْآَخِرِ وَيَتَّخِذُ مَا يُنْفِقُ قُرُبَاتٍ عِنْدَ اللَّهِ وَصَلَوَاتِ الرَّسُولِ أَلَا إِنَّهَا قُرْبَةٌ لَهُمْ

حكيت لكم من قبل عن وندي هسبند وزوجها دكتور هسبند اللذان عملنا معنا بالأبيض لسنين عددا.. وعن صديقهما الأستاذ مستر أشر الذي عاد إلى السودان في مهمة خاصة بعد أكثر من اربعين عاما من مغادرته السودان...
تراتيل على أنغام سودانية في وداع وندي هسبندتراتيل على أنغام سودانية في وداع وندي هسبند

Quote: والله يا حاتم انت بالغت عديل كده في تعليقك على صورة الاميرة الراحلة ديانا مع العداء السوداني عمر خليفة

معليش يا أستاذة

أنا متقمص شخصية خالد لمبارك وبتكلم بلسان اللمير توفيق وبرد على سيف الدين. ___ معليش، أظني القميص طلع مقاسي، للأسف.

دي حدايق الحيوان

بدون تعليق

يا قريبى قول بســم الله.. دا كان زمن بعيد الناس خلته.. لو اردت المقارنة فقارن نفس الفترة الناس في السودان كانت تعامل العبيد كيف..

قارن فعل هذه المرأة الخيرة بأفعال ناس الإنقاذ وأفكار ناس خالد المبارك وقصى.

والله لولا الحساسية والإعتبار للمشاعر لذكرت قصة تخلى الطفل يشيب من هولها. تقول لى أدوها موز.. بس أضمن لى بكرى لا يودى البوست للخور.. رغم ان هذا سيكون
حرفا لموضوع البوست مثل تعليقك المصور هذا.

سلام صاخب البوست
وتحياتي
قريبى ابوريش

غدا المساء حفتح بوست اسمه ...
الفضل للمعلوماة انت
تحياتي

Quote: البابا فرنسيس قبل أقدام 11 لاجئا مسلما

سلام صاخب البوست وتحياتي قريبى ابوريش غدا المساء حفتح بوست اسمه ... الفضل للمعلوماة انت تحياتي
الاخ عرفات
اذكر انك فتحت بوستا عن انسانية البابا فرانسيس وتواضعه لدرجة تقبيل ارجل لاجئين مسلمين
اذا ما هو الفرق بين انسانيته وانسانية الفتاة منقذة الطفل؟
اما عن البلجيكيين,فقد ارتكبوا اكثر من اطعام طفل اسود موزا,,كانت ايدي الافارقة في الكونغو تقطع
في حالة نقصان المطاط المجموع رطلا واحدا..ولماذا نذهب بعيدا..الم يلغي الرق في موريتانيا عام 1980 وما زالت علاقات الرق مستمرة.
وماذا عن اليمن؟ما زال بعض اهل اليمن يحتفظون بالعبيد حتي الان,,
واجزم انك لم تنشر هذه الصورة استنكارا للحدث

Quote: دي حدايق الحيوان بدون تعليق

ودي صكوك الغفران

بدون تعليق. لكن الأسئلة قائمة: والإشارة لعبارتك دي (والحمد لله نحنا اصحاب بلد , ويهمنا سمعت السودان) والشهادة الكرتونية الفوق دي - الصك الفوق دا بيمنحك أي نوع من الحقوق الأخرى غير (ملكية هذا البلد)؟ - وبيمنعك أي عقوبات مستحقة على الآخرين داخل هذا البلد؟ - وبيرفعك إلى أي درجة لم يبلغها مواطن ينتمي لهذا البلد؟ دي بلد ولا حديقة حيوانات البتملكها بسكانها بورقة واحدة زي دي؟ ___ يا أبوريش، شريف لنضن أبو صك دا خليهو لي.

During the 1850s, Maximo and Bartola, two microcephalic children from El Salvador, were exhibited in the US and Europe under the names Aztec Children and Aztec Lilliputians.[5] However, human zoos would become common only in the 1870s in the midst of the New Imperialism period.
لماذا نذهب بعيدا ,اليهود والغجر اعتبروا subhuman لذا كان مصيرهم غرف الغاز والمحرقة

Quote: ولماذا نذهب بعيدا..الم يلغي الرق في موريتانيا عام 1980 وما زالت علاقات الرق مستمرة. وماذا عن اليمن؟ما زال بعض اهل اليمن يحتفظون بالعبيد حتي الان,, واجزم انك لم تنشر هذه الصورة استنكارا للحدث

Quote: وتطاول علي سيدك يا ناقص +++ وما علاقة سيدك واسيادك ال عثمان منصور هنا اسمع يا عره .... ويا حاقد مننتظر منك اعتزار وعلني لكل كلمه في حق حسين عثمان منصور سيدك وسيد العلموك

يستنكر ليك شنو المشوش دا؟

إذا كان هو حايم بالكرتلة بتاعتو دي يستعبد في أعضاء سودانيزأونلاين 2016. دا علام برة، وعقدة الخواجة. ما حيرد عليك هنا، هو أروع من الرد، يفتح بوست عشان يحاور روحو العاجباهو. ___ قالوا في لندن الإنجليز ما بميزوا بين السوداني والنيجيري، صحي يا عرفات؟

حاتم
اذا كده..انت براءة....ويعني انت مع البطل وما مع الخيانة...(زي ما بيقول مجيدو)وجه ضاحك)
والله يديك الصحة والعافية

Quote: اذا كده..انت براءة....ويعني انت مع البطل وما مع الخيانة

يا زولة أصلو ما يداخلك شك

شفتي الشرذمة دي (خالد لمبارك، قصوي، ش. عرفات، النور، اللمير توفيق، منتصر، مقعد محجوز، مقعد محجوز، مقعد فاضي، عبد الصمد). مافي شيء يلمني معاهم أنا ضدو. ____ إلا الخيانة.

Quote: (خالد لمبارك، قصوي، ش. عرفات، النور، اللمير توفيق، منتصر، مقعد محجوز، مقعد محجوز، مقعد فاضي، عبد الصمد).

حاتم والله حرام، يا خي
طلع عرفات من الشلة دي.. عرفات عنده إشراقات كثيرة جدا تغطي على الهفوات بتاعة الشرف دي.. والله صادقا.. عرفات على الاقل متسق مع نفسه و لا يبدو منافقا او متنطعا!

Quote: طلع عرفات من الشلة دي.. عرفات عنده إشراقات كثيرة جدا تغطي على الهفوات بتاعة الشرف دي

من المشرقين هو بالله؟

لا كان كدة مافي مشكلة. ____ خليهو يتلب.

الإنسانيه لا تعرف لها لون أو تحيز لغير نفسها...
ولا إدعاء الدين يمكن أن يخلق إنسانية
فلقد أصبح الدين مطية في اليد للقتل والحروب والتشريد وبعيدا تماما عن جوهر ديننا الكريم..

Quote: فلقد أصبح الدين مطية في اليد للقتل والحروب والتشريد وبعيدا تماما عن جوهر ديننا الكريم..

أي دين أصبح مطية ... وأي دين هو ديننا الكريم؟
ورد دينان هنا!
----
على أي حال:
تعتمد على نية الشخص...
سواء كان في العمل السلمي أو العسكري...
ولنا نموذجان حيان في السلمي والحربي : الحكومة والمعرضة !!

-----
الدين برئ من نوايا الأشخاص ، خيرها وشرها.
----
تحياتي وتقديري

Quote: شفتي الشرذمة دي (خالد لمبارك، قصوي، ش. عرفات، النور، اللمير توفيق،منتصر، مقعد محجوز، مقعد محجوز، مقعد فاضي، عبد الصمد).مافي شيء يلمني معاهم أنا ضدو.

وحتى يتيقن الناس من أنك ياحاتم ابراهيم ..رجل انطباعي وتنطلق من أهواء ذاتية وأنك رجل مصنفاتي من الدرجة الأولى ولا تعتمد على الطرح إنما تعتمد على التصنيف للناس الذي تعتمده لنفسك .لاميني يا حاتم مع خالد المبارك وقصي وعرفات حسين وأمثالهم على أي أساس؟؟!! ...أنا رديت على خالد المبارك وضحدت كلامه وأوردت ما يؤكد أن رحمة الغربيين بالضعفاء والمساكين أصيلة وقديمةوليست مصتنعة ...أم أن مشكلتك مع المصدر والشخص الذي كتب الكلام ؟؟؟؟؟؟!عندك عقدة مع الاسلام وأي كلام عن العروبة رغم أني لست من العروبيين رغم أنني هنا فضلت الغربيين على العرب في الجانب الإنساني الله يشفيك ياحاتم ويزيل الغشاوات التي تبعدك عن المنطق والموضوعية. .

Quote: لاميني يا حاتم مع خالد المبارك وقصي وعرفات حسين وأمثالهم على أي أساس؟؟!!

يازول والله العظيم فخر لك أن تكون منبوذ من حتاميتو ..
يازول أنا والله لمن لقيت نفسي في قائمته السوداء لمن فرحت.
ده زول شبهة ، غير النفخ ما عندو شئ..
------
يازول التصنيف ده لومادايروا أديني نصيبك من كرهه لك ، أكن لك من الشاكرين.
---
تحياتي وتقديري

أي دين أصبح مطية ... وأي دين هو ديننا الكريم؟
ورد دينان هنا!
----
على أي حال:
تعتمد على نية الشخص...
سواء كان في العمل السلمي أو العسكري...
ولنا نموذجان حيان في السلمي والحربي : الحكومة والمعرضة !!

-----
الدين برئ من نوايا الأشخاص ، خيرها وشرها.
----
تحياتي وتقديري
_____________________

شكرا أبو قصي..

ديننا يحدثنا عن الإنسانيه وقيمها العظيمة وواجب المحافظة عليها
مثل العطف والرحمه ومد يد المساعدة وصون الروح التي خلقها القادر الكريم..
يحدثنا عن مساعدة الفقير والإحسان لليتيم..
هذا هو ديننا الذي أمرنا الله به وأمر غيرنا به في الأديان الأخري التي أنزلها سبحانه وتعالي..
إلا أنني أتحدث هنا عن ديننا الإسلامي..
وأؤكد لك أن النوايا أيضا تظهر في الأعمال..فمن ينوي خيرا يفعل خيرا ومن ينوي شرا يفعل شرا
ومن يدعي بالقول أنه يقصد خيرا تكشفه اعماله الشريره..
وبالطبع هناك فرق بين أن أصلح حالا وأن أهدم حالا..
واٌقصد بالتحديد الذين يستغلون الدين سياسيا وهم ينهبوم ويشردون ويسرقون ويقتلون ويغتصبون النساء..
وبالتحديد أكثر النظام الحاكم في السودان صاحب "المشروع الحضاري بشعارات إسلاميه كاذبة..
لعلي شرحت لك الآن ما أقصد بعبارتي المقتبسة في سؤالك..



مع تقديري..

Quote: لاميني يا حاتم مع خالد المبارك وقصي وعرفات حسين وأمثالهم على أي أساس؟؟!!

Quote: يازول والله العظيم فخر لك أن تكون منبوذ من حتاميتو .. +++ يازول التصنيف ده لومادايروا أديني نصيبك من كرهه لك

فخر ليهو في الآخرة يعني؟ الراجل بتململ داير ينجض من ورود اسمه في الشاهنامة!

منتصر أنا معاك القعاد في نصهم حار لكن أسوي ليك شنو؟ لميتك معاهم خوة ساكت والله! أجدع ناس أمثالهم ديل زي منو؟ أوع يكونوا أكتر من كدة! كان عامل ليك شاهنامة أجدعها في الخاص حالتي خليت مقعدين احتياط. هسع يا قصي أنا قلت شرذمة، تقوم تعملها كراهية وقائمة سوداء؟ حرقص دا؟ ____ في مقعدين فاضيات

للاسف معظمكم معلوماته لا تتعدى نشرات الاخبار في التلفزيونات و كثير منكم بالسمع الشفاهي بس
الشئ الغريب الناس عايشة وسط الغربيين و ما عارفين عنهم اي حاجة

يقولو ليك ديل ملائكة رحمة خخخخخخخ

اولا حاتم ده بتاع مغالطات بس و عناد مفتكر الزول عايش وسط البيض و في الدول الباردة يعني خلاص هو ملك الفهم

Quote: دا ولدنا خليفة عمر العجوز الواقفة جنبو وبتقالع فيهو الرتينة ما عرفتها، لكن

زول مارجريت تاتشر ما بعرفها وبعد ده عامل فيها عالم

صراحة ما محتاجين نتكلم عن دور المنظمات الطوعية في التبشير و المتاجرة بالقضايا و التجسس
حكومتنا الرشيدة لها خبرة منقطعة النظير في هذا المجال
لا تقول لي مايكل جاكسون و لا غيرو كل هؤلاء مدفوعي الاجر او يلهثون وراء الشهرة و الكاريزما

ياخ بالبلدي كده
المجتمع الغربي مجتمع ذو عقلية رأسمالية فردية ، لا يعرف التكافل و لا يعرف التراحم حتى في الاسرة الواحدة يقتتلون من اجل ميراث
هذا على مستوى الافراد فما بالك بالمؤسسات و الشخصيات
عايزين تقنعونا بأن شخص مثل جورج كلوني خلاااص اخر شفقة و رأفة بي اهل دارفور و جبال النوبة ؟؟

نصيحة : لا تسمعو اخبار من نشرات التلفزيون تاني ، اندمجتم في المجتمعات الغربية و صرتم كالآلات
الالة الاعلامية الغربية و دي مشكلة كبيرة

Quote: زول مارجريت تاتشر ما بعرفها وبعد ده عامل فيها عالم

معقول مابعرف اشهر ملكة بريطانيا

بالغ لكن

Quote: معقول مابعرف اشهر ملكة بريطانيا بالغ لكن

رئيسة وزراء و ليست ملكة

للتصحيح

Quote: حكومتنا الرشيدة لها خبرة منقطعة النظير في هذا المجال

دعك من البشر,في فصل الشتاء تنتشر مغذيات الطيور في البيوت وعلي اشجار الحدائقالحدائق

الأخ قصي لك جميع وللالتحية

Quote: يازول والله العظيم فخر لك أن تكون منبوذ من حتاميتو .. يازول أنا والله لمن لقيت نفسي في قائمته السوداء لمن فرحت.

يا أخوي أنا كرهو ما مابيهو.....لكن أردت أن أوضح للناس أنه رجل غير موضوعي ومواقفه على حسب الأهواء ولا يوجد لها أي مبرر موضوعي
وأنا غير معترض على أن نكون في قائمة واحدة ....فإن لم نكن في هذا المسألة متفقين وفي بعض الأمورلأخرى ا فمؤكد أن ما نتفق فيه أكثر ...وهناك نحن في قائمة واحدة
ولعله حين وضعنا في قائمة واحده كان في باله تلك الأمور المتفقين حولها ...وليس في باله هذه المسألة المطروحة في البوست.

Sorry

Repeated

Quote: ولعله حين وضعنا في قائمة واحده كان في باله تلك الأمور المتفقين حولها ...وليس في باله هذه المسألة المطروحة في البوست.

لعلني!

أها وانتو متفقين على شنو بخصوص المسألة المطروحة في البوست؟ ____ قصي دربو مرق باللغف والقرطعة.

Quote: أها وانتو متفقين على شنو بخصوص المسألة المطروحة في البوست؟

هذا السؤوال بالذات من الفترض أن أوجهه لك وأنت الذي تجيب عليه ....وليس أنا
لأنك إعتبرتني متفق معه في المسألة كما كان يبدو من وضعي معه ومع خالد المبارك وعرفات حسين
في كوم واحد رغم أني كان لي رأي آخر مختلف تماماً بل ومضاد في المسألة ...
يبدو أنك قرأت كلامي من أسفله ووجدت عبارة (رواه مسلم) وحكت على الكلام وصنفته دون قراءته
أدعوك لقراءة مشاركتي الأولى في البوست ..ولا تكتفي بقراءة قال رسول الله صلى الله عليه وسلم ورواه مسلم
وتحكم على الموضوع بأنه تطرف لمجرد ذكر ذلك ...فهمكم الانطباعي عن الاسلام ....هو ما يعمي بصرك وبصيرتك عن استيعاب محتوى كلامي.