هدية الجمعه .. تعليم كيف تلف العمه السودانية توجد تجارب شخصيه 👳

10:10 AM April, 01 2016 سودانيز اون لاين
الطيب عباس-ناوي للبلد الامين
مكتبتى
رابط مختصر
والله د. راشد دياب جزاه الله خير ما قصر في الفيديو دا كلو كلو الخلاني ارفع البوست دا انو لازم نعتز بهويتنا .. وفي ناس بتبشتن العمه وبتختا من غير هندسة كتار من الشوام بقولو لي علمنا كيف بتلفا .. العمه شان ما تفهمون غلط .. :)نخليكم مع الفيديو

انا شخصياً علي قناعه تامه بانو قعده العمه في الراس بتحكما الطاقيه والطواقي انواع طبعا ً

جميل،
الجمعة دي فاتت علينا طريقتك دي،
أخوك كان بيختها في كتفو خلف الرقبة ،
نص نازل باليمين ونص نازل باليسار،
مع إطالة إحدى النصفين مقدار لفة رأس واحدة،
أها بيبدأ بالجهة الأطول ويديها لفة،
يجي للجهة الثانية ويديها لفة،
يرجع للجهة الأولى ، ثم الثانية ، وفي الآخر يدخل آخر ضنب للعمة تحت أبعد فرقة،
لتستقر موزونة في الرأس!
---------
ياريت تواصل مشوارك وتنزل مجموعة من طرق اللفات ..
منشور تعليمي وطني جميل.

حبيبنا قصي سعدت بمرورك
العمه زي بوري العساكر لمن يصرفو عندو خته الماهيه ولما يفلسو ولما تكتم فيهم كل حاله بي ختتتا هههه
فالعمه فيا لفه ناس جلابه وفي لفه مزارعيه ولفه تجار
وفي حقت صوفيه وسلفيه السلفيه فيا ضنب طبعاً
العمه من السنه برضو بقول ..
كنت حصور طريقه الانصار وطريقه الجلابه بس قت محتاج للدعم المعنوي منكم وممكن نوصف بالصور لما نلقي زمن
تحياتي 🌹👳

ابوالطيب
بصراحة اللفة عندك
بس لو وريتنا طاقيتك تكون ماقصرت
لكن بحكم الخبرة وكدة انت المفروض مع ابتسامتك الجميلة دي تكون عمتك تسعة متر
المابعرفك من بعيد .. القلع عبدالحفيظ

أحييك اخي الطيب عباس وضيوفك الكرام
بوست مميز
الفيديو ادناه فيه عرض لانواع مختلفة من العمم السودانية
منها عمة ودالجبل وكمال ترباس وعمة الانصار وغيرها من العمم



تحياتي

سلام،

أنا بفتكر إنو طريقة لف العمة لا يمكن تشبيهها بالكرفتة مثلاً، لأنو الكرفتة عندها طرق معينة للربط (طريقة للمكتب وطريقة للسفر وطريقة للمآدب، وهكذا).

بينما العمة كبصمة اليد، بمعنى إنو كل واحد بيلف العمة بطريقة تختلف عن الآخر، رغم إنو الفكرة بتكون واحدة، لكن النتيجة النهائية تختلف من شخص لآخر، عشان كده بقول إنها زي البصمة.

تحياتي.

كريب العمه شديد بجيب صداااع احذر لو انت مبتدئ

Quote: لعِمَامَةُ من لباس الرأس، وجمعها عمائم، واعتمَّ الرجل وتعمَّم: إذا كوّر (طوى) العمامة على رأسه عدة أكوار (طَيَّات). وهي من لباس العرب، اشتهروا به حتى قيل: "اختصّت العرب بأربع: العمائم تيجانها، والدروع حيطانها، والسيوف سيجانها، والشِّعر ديوانها". وكانت من علامات الشرف والسؤدد عندهم. قال شاعرهم مادحًا ومفتخرًا: فجاءت به سبط البنان كأنّما عِمامته بين الرجال لواءُ وقال آخر: تَلُوثُ عمامةً وتجرُّ رمحًا كأنك من بني عبد المدان ولما جاء الإسلام ازداد تمسّك النّاس بها؛ فقد ورد في صحيح الآثار ـ كما سيأتي ـ أن العمامة من لبس النبي ³ ومن لبس أصحابه وأئمة المسلمين والسّلف الصالح وكل ذي فضل. انظر: النبذة التاريخية في هذه المقالة، الفقرة الخاصة بالعمائم في الإسلام. العمائم تختلف في أسمائها وأشكالها وألوانها وأطوالها في كل دولة. هيئات العمائم. تُصنع العمائم من القطن أو الخَزّ أو الدِّيباج أو الصُّوف أو الحرير، وعمائم القطن هي الشائعة اليوم. وتختلف العمائم في أسمائها وأشكالها وألوانها، كما تختلف في أطوالها وهيئة تشكيلها، ويعتمد ذلك على الذّوق، والبراعة، والعادة

Quote: ابوالطيب بصراحة اللفة عندك بس لو وريتنا طاقيتك تكون ماقصرت لكن بحكم الخبرة وكدة انت المفروض مع ابتسامتك الجميلة دي تكون عمتك تسعة متر المابعرفك من بعيد .. القلع عبدالحفيظ

حبابك ود يسين ..

الابتسامه هي جواز سفر ورخصة دولية وكل العالم يفهمها ولا تحتاج لترجمان هههه
تسعه متر كتيره لعمه الا يكون الراس مدوقس هههههههههه

تحياتي

اللفه التقليده ساهله جدا ً ركزو معاي .. بس مالاقي لي كورية شان اطبقا ليكم بيان بالعمل ههههههه
الوصف كتابة ً
1- تحكر الطاقية فوق الراس( متسنتره )بدون اي ميلان ويا حبذا لو كات من النوع القوي البتلبس بدون عمه داك شان بتظبط قالب العمه ..
2- تمسك العمه من الطيش ووتمسك الجزء المسكتو تختو خلف راسك .. مروراً بي نص الصنقور وتخلفو مع اخوهو في شكل الحرف اكس بالانجليزي ..(x) دي باعتبارا الساس بتاع العمه ..
3- بعد ما اتشكل الحرف اكس تلف الباقي حوالينو من الوسط لفه واحده .. دي اللفه الاولي بعد الاكس
5- اللفه التالته تدبل نفس الاكس الاول (x) مروا بنفس احداثيات الوصف رقم 2 .. دي اللفه التانية
6- اللفه الرابعه تلف فوق الاكس من الوسط .. لفه اخيره وتكف باحدي الاطراف
7- بعد ما كفيتا بي احدي الاطراف تطلع شي بسيط وهو كشكول لزوم القشرة فوق بالجنبة .. وتهندما بي يدينك

من الفيس وائل حيدر

Quote: Wael Haydar · Khartoum, Sudan تجربتى المتواضعة مع لف العمة والتى تقتصر على العيدين فقط لاغير.. انصحك بلفها بدون طاقية لان الطاقية تؤدى لخستكة اللفة

اختلف معك تماما ً

Quote: أنا بفتكر إنو طريقة لف العمة لا يمكن تشبيهها بالكرفتة مثلاً، لأنو الكرفتة عندها طرق معينة للربط (طريقة للمكتب وطريقة للسفر وطريقة للمآدب، وهكذا). بينما العمة كبصمة اليد، بمعنى إنو كل واحد بيلف العمة بطريقة تختلف عن الآخر، رغم إنو الفكرة بتكون واحدة، لكن النتيجة النهائية تختلف من شخص لآخر، عشان كده بقول إنها زي البصمة.

السلام عليكم ورحمة الله وبركاته
فعلاً العمة كالبصمة وعندنا ناس بجرها من حبل الغسيل وجاري على اللوري وبلف فيها ويركب السيخ وللمناقل ما تتفكا هههههههههههههههههههههه

وهذه العراقية أيضا لها طريقتها

ومن غريب الأحاديث النبوية الشريفة
صلاة بعمامة خير من سبعين بغيرها

====
شكرا على البوست اللطيف الحاث على لبس العمامة (كيف ما اتفق)

تحياتي عبد الله عثمان ابن كوستي الحبيبه

Quote: بعض ما جاء في العمامة *الحمد لله وكفى وسلام على عباده الذين اصطفى.......وبعد: **لغة: في القاموس المحيط: والعِمامةُ، بالكسرِ: المِغْفَرُ، والبَيْضَةُ، وما يُلَفُّ على الرأس, ج: عَمائِمُ وعِمامٌ،ِ **في الشرع ورد فيها : * فى كتاب الزينة من سنن النسائى. باب إرخاء طرف العمامة بين الكتفين. عن جعفر بن عمرو بن أمية، عن أبيه قال: -كأني أنظر الساعة إلى رسول الله صلى الله عليه وسلم على المنبر وعليه عمامة سوداء قد أرخى طرفها بين كتفيه.... (قوله :قد أرخى: أي أرسل). أبن ماجة الجزء الثاني. في الحديث رقم: 3587- حدّثنا أَبُو بَكْرِ بْنُ أَبِي شَيْبَةَ. حدّثنا أَبُو أُسَامَةَ عَنْ مُسَاوِرٍ. حَدَّثَنِي جَعْفَرُ ابْنُ عَمْرِو بْنِ حُرَيْثٍ، عَنْ أَبِيهِ؛ قَالَ: كَأَنِّي أَنْظُرُ إِلَى رَسُولِ اللهِ صلى الله عليه وسلم. وَعَلَيْهِ عِمَامَةٌ سَوْدَاءُ قَدْ أَرْخَى طَرَفَيْهَا بَيْنَ كَتِفَيْهِ.

سلامات اخونا نادر ...
العمة العراقية بلبس فيا ربع ساعه ههههههههههههه .. نحنا ما عندنا زمن قدر دا ههههههه
تحياتي

Quote: اختلف معك تماما ً

وانا إختلف معاك و إتفق مع وائل، العِمة بدون طاقية
بتظبط مع إني العمة بهملا فوق صلعتي .


الحجامة خبرا شنو ؟...

هههههه ود المدير الحجامه لسه بس وقعنا الخبز الاسمر والحِميه حسب كلام الدكتور هههه
العمه والصلعه لازم تكون بي طاقيه ..
اطالب سيد الحوش بكري يجي يورينا لافيا بي طاقيه ولا ساي 😂
لو ساي معناتا انتو صح ونحنا الغلط ..!
ولو بي طاقيه لا ولن اقبل الا يعنكش لينا البوست دا فووووق..

تحياتي لبكري ابوبكر المدير وليك ياود المدير 🌹🍃

الأخ الطيب
لك الود والتحايا الطيبات
مصداقاً لما قاله راشد دياب أنه كلما كبرت العمامة كانت رمزاً
للفخامة والعظمة وعلى ذلك جرت الأمثال الشعبية فقد قالوا عمن
تكبر عمامته وهو "فاضي" .. العمة قدر البرش والجيب عدمان
القرش .. أيضاً صيغ المثل بكلمات أخر فقالوا .. العمة قدر الكانون
والبيت عدمان الصابون .... ههههههههه
بجيك راجع كان الله هون لزيادة الحديث عن العمة على الرغم من
أن الموضوع ينحصر في "لفها" ......

Quote: العمة قدر البرش والجيب عدمان القرش .. أيضاً صيغ المثل بكلمات أخر فقالوا .. العمة قدر الكانون والبيت عدمان الصابون .... ههههههههه

مرحب بيك بابكر قدور

العمه ممكن عادي زول يكون لافيها تمام يدقسك ههههههههههه زي قصة البدلة الكاملة .. واقسم ليك بالله لمن البس بدلة كاملة بحس بي انو في سلام بعض الناس اتغير .. ( احترام وهيبه )
زي ما قال الشيخ فرح ود تكتوك كُل ياكُمي قبل فمي ..

تقديري

اخونا الحبيب - الطيب ود عباس

سلام وتقدير لك وللاسرة

بما انّك من ( اندنا ) رايك شنو فى عمّة المرحوم جــاحـوم

لك تحياتى

يشتهر أبناء كوستي بحبهم الشديد لمدينتهم الوادعة وغيرتهم عليها حتى أنهم جرجروا الأستاذ محمد الواثق ، أستاذ الأدب العربي بجامعة الخرطوم ، الى المحاكم لأنه هجا مدينتهم ببعض أبيات. ومعروف أن الأستاذ الواثق له ديوان كامل في هجاء أم درمان ، ثم واصل في هجائه لمدن السودان الأخرى ومنها حلفا وتوتي ومدني وكسلا وكوستي ، التي قال عنها :

سُميتِ باسمِ غريب الدار نازحها ** ما كان كوستي على قدرٍ من الشرفِ
أورثها من طباعِ الروم ألونةً ** من الفسادِ تراءتْ داخل الغُرفِ
فصار باخوس رب الخمر ربهم ** ما بين منهمك منهم ومُرتشِفِ
حتى كأن أذان الفجر يبلغهم ** حي على الشرب في حانوتِ منحرفِ
قوم من الطيش لا تُرجى عقولهم ** كأنما العقل فيهم صِِيغََ من خَزَفِ
إن الإمام الذي عادوا جزيرته ** قد كان يخشى عليهم غصة الأسفِ
أما تراني شددت الرحل منصرفاً ** أحاذر الناس في حِلي ومنصرفي
لا أقرب الدار تستعلي النساء بها ** ولا أقيم بدارِ اللهث واللهفِ
كوستي الرديف ترى بانت نصيحتنا ** لكل رادفةٍ فيها ومردتفِ

ولم يخطر ببال الشاعر محمد الواثق أن قصيدته كوستي ستقوده إلى الحبس بيد أن هذا ما حدث عندما قام بعض مواطني كوستي بفتح دعوى جنائية ضده وعلى إثرها تم اقتياده من مكاتب كلية الآداب بجامعة الخرطوم حيث يعمل أستاذاً بها إلى قسم شرطة الخرطوم شمال كما يقاد الأشقياء، وكان ذلك في نحو العام 1995م. حالت الحكمة وأصحاب العقول النيرة دون أن يستمر هذا الإجراء في مواجهة الشاعر محمد الواثق

جاحوم ما عاصرتو بس سمعت بيو ..

لقيت الاقتباس دا في دائرة المعارف الكوستاوية عنه ..

* جاحوم:
كان من الزاهدين ومن ظرفاء المدينة.. وكان المرحوم أحمد كوكو يحسن إليه، واشتهرت مقولته التي ظل يرددها "كوستي بلد.. احمد كوكو ولد".

Quote: اخونا الحبيب - الطيب ود عباس سلام وتقدير لك وللاسرة بما انّك من ( اندنا ) رايك شنو فى عمّة المرحوم جــاحـوم لك تحياتى

تعرف الطيب وبما انّك لم تعاصر المرحوم جاحوم

فانه فعلا كان زاهدا

ودائم الابتسام - لا يتحدث كثيرا - التقيه وانا صغيرا كل صلاة جمعة - كان يلبس

جلابية فضفاضة واسعة الاكمام ناصعة البياض - امّا بالنسبة للعمامة ولزهده وتصوفه

يكويها ويطبّقها بعرض 15 سنتيمترا ( اعتقد ) ويلفّها على شكل ( الطار )

وترى الطاقية ( المخروطية الشكل ) بارزة وتشاهدها من بعيييييييييييييييد

هكذا كان - رحمه الله رحمة واسعة وادخله الجنّة

مودتى الكاملة

انا طبعا ربطة العمه دي عاملة لي عقدة

Quote: انا طبعا ربطة العمه دي عاملة لي عقدة

ههههه العمه يا عمك زي الشكه تتعود عليا خلاص بتلفق معاك تاني ههههههههههه
تحياتي

جمعه مباركه🌹🕋

شكرا الطيب ..

بوست جميل ومفيد

Quote: شكرا الطيب .. بوست جميل ومفيد

حياك الله وكل الكوكبه الجميله


بكري قاليكم اي زول ما لافي عمه مايجي لافي هنا ههههه

رمضان كريم

بوست ظريف

شكرا أخ الطيب

بوست ظريف وانيق اخونا الطيب التحيه لك وكل اهل كوستي الماضي والذكريات
لف العمه مهم لانه مكمل للمظهر والعمه والجلابيه تضفي هيبه علي الشخصيه
اذكر كنت في محفل رياضي اوربي في اسبانيا. اضمرت ان افاجئ الخواجات وكل الحضور يوم الختام بلبس
الزي السوداني وكانت المفاجأه لي انا، اتلموا فيني نسوان علي رجال عاوين يتصوروا. في الوقت داك شعرت بالهيبه والفخر مع الزي
السوداني الاصيل. اذا ربنا سهل برجع لك بي صور ان شاء الله
تحياتي

بكم تكتمل الروعه ..التحايا لكل الحضور الانيق
البلفها بدون مرايا محترف شديد والبقيف قدام المرايه بكون في ايامو الاولي فقط 😂🍃👌🏻

Quote: بوست ظريف وانيق اخونا الطيب التحيه لك وكل اهل كوستي الماضي والذكريات لف العمه مهم لانه مكمل للمظهر والعمه والجلابيه تضفي هيبه علي الشخصيه اذكر كنت في محفل رياضي اوربي في اسبانيا. اضمرت ان افاجئ الخواجات وكل الحضور يوم الختام بلبس الزي السوداني وكانت المفاجأه لي انا، اتلموا فيني نسوان علي رجال عاوين يتصوروا. في الوقت داك شعرت بالهيبه والفخر مع الزي السوداني الاصيل. اذا ربنا سهل برجع لك بي صور ان شاء الله

رسلو لي صور لعقد اهلنا قررت تاني ما الف عمه .. وحردتا لبيم

" target="_blank"> ‏

اصلو ماف زول قالي قوم لف هاهاهاها قت اقولا لي نفسي

بوست مميز..شكرا الأخ الطيب عباس.

Quote: أنا بفتكر إنو طريقة لف العمة لا يمكن تشبيهها بالكرفتة مثلاً، لأنو الكرفتة عندها طرق معينة للربط (طريقة للمكتب وطريقة للسفر وطريقة للمآدب، وهكذا).بينما العمة كبصمة اليد، بمعنى إنو كل واحد بيلف العمة بطريقة تختلف عن الآخر، رغم إنو الفكرة بتكون واحدة، لكن النتيجة النهائية تختلف من شخص لآخر، عشان كده بقول إنها زي البصمة.

أتفق تماما مع الأخ محمد أبو العزائم
لكل شيخ طريقتو

تجربه شخصيه الفيديو اعلاه

واحد في الفيس قالي كملت المواضيع خلاص ياا فايق ؟؟

دا يردو لي كيف ؟؟

لفه زي كتابة الامضاء (التوقيع) مهما حاولت تغير فيه لن تحدث الا تغيرا طفيفا ,,شخصيا عاجباني لفت العمة الانصارية لكن كل ما احاول تفشل ,واجد نفسي لفيت زي قبه مفطحة ,, ___________________________كسر لف العمة لرجال الدين الشيعة (توجد انواع حسب البلدان) لفه واحدة ممكن تقعد سنة كاملة



تعديل الفيديو في المداخلة التالية

هههههههه عمار زولك الشيعي دا لفاها في ركبتو ههههههه وبعداك حيختا في الراس جاهز يامعلم هههههههه

ممتاز دا زي لفتي ام عزبا

لفة العمة الصاح عند الانصار ولا بلاش.
بوست هادف وتعليمي مهم،وخاصة عند المغتربين الطولوا من السودان
ونسوا لفة العمة،

بحبها جدا عند والدى
خاصة لما يلبسها مع الشال والجلابية البيضاء
بلبسها بطريقة جميلة
هاك امثلة
ديل اجمل من يعرف لبسها
التحية لهم

الناس دي شايفا انا ياوضاحه .. العمه فخامه ..
اها شنو ليك في ام زؤابه دي 👇

نسيبي قالي والله اتعلمت منك

امكن تكون تلجه اهاهاها

فوق شان العيد لازم تلبسو عمم ههههههههههه

الطيب
جبت البوست في الوقت المناسب

عشان في كتار من المغتربين وخاصة في دول اوروبا وامريكا الشمالية نسوا

لفة العمة، رمز الشخصية السودانية...

وفي ناس بيقولوا احسنةمن يلف العمة في السودان ثلاثة وهم السيد الصادق المهدي

وترباس وبابكر ود الجبل

وكل سنة وانت طيب

سلام الطيب
كل عام وأنت بخير

بالله شوف السدار دا بدردم في العمة دي كيف

كل عام وانت بخير
عمتك سمحة بث ما زى حقت ابوى
ابوى زاتوا ياخى اوجه واحن واحب البشر
ربنا يخليه لى حبيب انا

هسع يا عبد العظيم افرض قالوا للرجال السودانيين مفروض تلفوا العمة

بنفس طريقة لفة السدار الهندي السيخي ده...هل كنت حتجد سوداني واحد

لافي ليه عمة ...كانوا حيكونوا عندهم حساسية ضد العمة...لانهن اساسا ما عندهم

الصبر البخليهم يلفو اللفه العادية ويرموها ورا ضهرهم..

تلقاهم بعدما شافو الفيديو بتاع الهندي ده فرحوا جنس فرحة بانه ما مفروض يلفو

العمة زي طريقة الهندي الصبور ده...

وكل سنة وانت طيب

مع وافر الاحترام

كل عام وانتم بخير
عبد العظيم✨ وامتثال ✨ووضاحه ✨

السيخي دا والله هذبا تهذيب هههههه برضو القيمه الجماليه في المثلث الفي الوسط صح هههههههه
انا غايتو فتره كده بلقي السودان كلورلافي لفتي دي ههههههههه شان مشاهداتا كترت وعندا معجبين وردود ههههههه

عمتنا دي مازي حقت ابوي وابوك ناس ابوي بجدعوها ساي وبتكون حلوه نحن بنتصنع الجمال .
مره المدام قات لي اجدع العمه دي كده ولاكده ماتتكوبر فينا 😂
تحيلتي للجميع وتقبل الله طاعاتكم

Quote: واحد في الفيس قالي كملت المواضيع خلاص ياا فايق ؟؟

أمسك الإجابة دي وأشريها في جوفك لأي سؤال مشابه:
مافي شئ اسمو مواضيع انتهت،ولا مواضيع انصرافية.
نحن محتاجون ننقل ونتبادل أي معلومات ، مهنية أو وطنية أو عالمية."
نحن كذلك فقط نناول الجيل التالي ما تعلمناه مما سبق"
وإذا كان الموضوع بالنسبة ليك بايخ يا متعلم ، ففي ناس يادووووووب شافوه،وفي أجيال قادمة ستراه لأول مرة طالما منبر بكري سابح في الفضاء
--------------------

غايتو الهندي السيخي اذا شاف السوداني اللفه عمته في نص دقيقة
كان حيضحك جنس ضحك...
ودمتم

ما حكَّ جلدكَ مثلُ ظفركَ فَتَوَلَّ أنْتَ جَميعَ أمركْ ..
وإذا قصدْتَ لحاجَة ٍ فاقْصِدْ لمعترفٍ بقدْرِكْ ..

الحلقه ٣ تعلم لف العمه السودانيه 👍🏻👳🏻