أربعة مداحين ومرة

03:52 PM February, 28 2016

سودانيز اون لاين
أبوبكر عباس-الإمارات
مكتبتى
رابط مختصر

مشيت إرشيف 2014 الربع الثاني أثناء كتابتي لدرافت القصة الداير أشارك بيها في جائزة الطيب صالح، لكن لقيت قصتي العظيمة بتاعت:
http://sudaneseonline.com/board/470/msg/%D8%A7%D9%84%D8%AA%D9%82%D9%88%D9%85%D9%83-%D9%85%D9%86-%D8%A3%D9%87%D9%84%D9%83-%D9%85%D8%B1%D9%8A%...9%82-1416891499.html
ناقصة كم مداخلة كدا؟؟؟

المهم قلت أجدد البوست وأغير الاسم وأكتب المداخلات الضاعن:


أربعة مداحين ومرة
وسخل وتلاتة جدادات

التقومك من أهلك مريوق
تغشيك أم شانق، وتبيتك مرزوق

أم شانق سعد، وأم شانق حاج إبراهيم ومرزوق من قرى شرق الجزيرة ريفي رفاعة، ومرزوق دي مولود فيها الفنان أحمد الجابري.
ناس البطانة فوق؛ شايلين حس أم شانق ومرزوق وبوصفوهم بالبخل.

مرّة قمت من قرية السعدية بلوري قاصد رفاعة وتمبول.

السعدية دي فريق كواهلة سعدية وهي آخر قرية تابعة للجزيرة شرق رفاعة وأهلها لحدي التمانينات كانوا رحل.

قبل التحرك من السعدية خلوني أوصف الصورة قبل أركب اللوري.
الوكت كان أول يوم في ضراع الأسد ستة صباحا، شيخ عوض الكريم خير الله قال لي: لو ما المطرة دي جاية كنا مسكناك معانا لحدي ما تاكل كرامة حاج الدابي، إلتفت وكورك للبنات السايقات حمير الري لبيارة أم طرطارة ورجعن وحماهن الورود، لأنو المطرة أكيد جاية.

للوري وصل قرية الكاهلي زيدان، ودخلها من فريق أولاد عون، ركبوا فيهو أربعة رجال لابسين جلاليب بيضا وطواقي خضر، لفت نظري انو الجلاليب نظيفة كغير عادة متسوقي تمبول! ركبت كمان امرأة شايلة ليها جدادتين فيوميات - بسري قلت أكيد الفيومي دا دخلتو للعرب ديل جمعية بلان سودان- وواحدة بلدية وسخل أبيض أضانو مشرومة، ورجلو اليسار مربوطة مع يدو اليمين، الجداد علقوهو برّة اللوري والسخل توشك بدأ يكركم في رباط جزمتي الاديداس.
مجرد ما اللوري إتحرك واحد من الأربعة النضاف وقفو وقال لأخوانو: عيك نسينا عدة الشغل، قبل ما ينزل من اللوري واحد من أخوانو همس ليهو في أضانو الما مشرومة: مع الطارات جيب معاك حجر، المرة دي واحدة في اللوري، الله يكفينا شرّها.

يا ابو بكر سمعت بي ناس النيو ايج New Age؟
دي حركة مضادة للثقافة الغربية و تبحث عن بدائل لتفسير العالم يكون فيها ابعاد روحية و لمحات صوفية و ومضات ما ورائية
و بشكل غريب الناس ديل لقوا ضالتهم في الفيزيا الكمومية او مكانيكا الكم او الــQuantum Mechanics
اها باستخدام مناهج الجماعة ديل يمكن تفسير حكاية الحجر اذا في مرة واحده مع رجال.
من افتراضات الكوانتم ميكانيك أن الاجسام ذوات الكتلة في نهاية الامر تتكون من جسيمات تحت ذرية subatomic particles
و الجسيمات دي موجودة اساسا في شكل موجات و بما انو الجسم البشري مكون من عناصر و هذه العناصر في النهاية هي
تجمع للجسيمات تحت الذرية، فالبشر ايضا موجودين في شكل موجات. اعتقد انو موجات النسوان قد تتداخل مع موجات الرجال
إن لم تجد موجات انثوية تتداخل معها الشي الممكن يسبب نوع من الاختلال الكوني و ربما يؤدي لحدوث تشويش
تكون نهايته حادث و للا مصيبة تانية. اها الحجر بقوم يعمل التوازن المطلوب بحيث أن موجات المرة ستختاره للتداخل معه باعتباره
موجة محايدة تغنيها عن التداخل الموجي مع الموجات الذكورية.
النظرية دي فكرت فيها قبل دقيقة واحدة بس و هي عايزة تظبيط اكتر لما القى ليها وكت :)

فعلا يا أخوانا، "وفي السماء رزقكم وما توعدون"
شوفوا هسع جددنا البوست دا، وشوفوا كيف جاب لينا مداخلة مجنونة كيف!
المهم يا دكتور، رجعناك مستنير كامل الدسم وسامحناك في حكاية الطشت، وأعدنا تصنيفك في أعلى سلم الفيفا وهي تستشرف عهد جديد مع السويسري أبصلعة،
ونقول لبني هاشم: نحن الديمقراطية ما عندنا فيها كلام، لكن الفيكم اتعرفت.

الغريب في نسوان الواحدة لو لقت روحها براها في العربية براها بتجيب حجر
خايفة على روحها من الحوادث

في برضو عادة السبر يا ريت لو تكتب عنها
العادات دي بالمناسبة ممكن تكون مؤشر لأصل الهوية وتحل الجدل الازلي العايشينن دا

Quote: الغريب في نسوان الواحدة لو لقت روحها براها في العربية براها بتجيب حجر

يا ود الشيخ،
فعلا الدنيا دي فيها ناس كتيرين متصالحين معاها

المداح جا راجع اللوري ومعاهو طارين في مخلاية، صاحبو قال ليهو: إن شاء الله إتذكرت الحجر؟ ردّ بالنفي، وقال البتجي من الله كلها سمحة. دخلنا أم شانق سعد حوالي تزعة ونص ومشينا نزلنا مكنة بابور عند ميكانيكي طرف الحلة، التنزيل أخد وكت طويل لأنو المكنة تقيلة.

بقينا في اللوري أنا والكمساري، والمداحين الأربعة، والمرأة والسخل ًوتلاتة جدادات بجنب اللوري.

الكمساري خلص من المرة حق نفرين بحجة انو السخل والجدادات بساون زول!

ضربت معاهو حجة شديدة، وبعد قنعت منو قالت ليهو: خليتك ليوم القيامة إن شاء النار تشوشوك زي الشية،

قال ليها: إتي يا مرة مجنونة؟ نار شنو الربنا بشوي بيها الناس! إتي ما عاقلة، معقولة ربنا يرمي ليهو زول حي في نار؟! هسع أنا بقدر أرمي تيسك دا حي في النار؟! دا كلام ساي ما في عذاب بنار ولا شيء.

لا شعوريا إنحزت للكمساري وبسري قلت الكمساري دا علماني!!

بعد عشرة دقائق من خروجنا من أم شانق نزلت المطرة من النوع البفلق في الرأس داك. بسرعة عمر الكمساري طلع ليهو تلاتة مشمعات صفر؛ أدا المرة واحد، وواحد غطى بيهو شوالات العيش والتالت إتكومت فوقو مع المداحين وخرتاية الطارين، بعد داك عمر جاب السخل وجا إتكوم معانا تحت المشمع، بسري قلت: الكمساري دا علماني وحنيّن.

المطر صبّ صبيباً بدّع (علي وزن خبّ خبيباً بدّع بتاعت ود بادي*)، السواق شاف ليهو حتة عالية وتكّل فيها، سيد اللوري الراكب جنب السواق نزل وكورك للمرة وساقها ركّبها قدام وجا إندفس معانا تحت المشمعات، بعد المرة نزلت، المداح قال للمداح: ما قلت ليك جبيب معاك طوبة؟ المداح ردّ للمداح: وأنا موش قلت ليك البتجي من الله كلها خير؟ ووقف على حيلو ورفع يدينو الإتنين لفوق واستقبل المطرة بصدرو.

عمر الكمساري طلّع ليهو من خّرج جنبو تمر بركاوي ووزعوا علينا بالخمشات، وبحركات الكماسرة السريعة ديك مدّ للمرة والسواق القدام خمشتين، بسري قلت: الكمساري دا علماني، حنيّن وكريم، وبسري برضو شكرتو شكر شديد علي فكة الجوعة الدخلها فوقنا برد المطرة.

شوية والمطرة هِدت، عمر شال واحد من المشمعات ومعاهو حبال وظبط لينا تاية بجنب اللوري في دقائق (كنت داير أسري وأضيف للكمساري صفة سريع، لكن خلونا من الجمل الإعتراضية دي)، شلنا المشمع التاني جلسنا فوقو وإنضم لينا السواق. سيد اللوري قال للمداحين أمدحوا لينا، نزلوا الطارات لقوها مرخية، قلت ليهم أنا عندي بابور غاز في شنطتي، وأضفت: نحن برضو عندنا عدة شغل.

شدينا الطارات وكل زول حمس يدينو في البابور والمداحين قعدوا جنب بعض، وبدوا بمدحة:

شيء لله يا حسن، يا حسن**

الأداء بتاعم أحسن مية مرة من أداء الجمهوريين لهذه المدحة، والمداح الما جاب الطوبة، صوتو لو ما أحسن من صوت إخلاص همد، بكون زيها.

قلت ليهم إتوا جمهوريين ولّ ختمية، ردوا لي بمدحة سريعة:

شيء لله يا أب جلابية ويا عثمان شيخ الختمية

شيلوا الفاتحة وأعقدوا النيّة، التمساح جيبولوا أذيّة

* في الخاطر مداخلة عن ود بادي

** ومداخلة عن الحب البين الجمهوريين والختميّة

.

.

.

سلام ابو بكر

حكي طاعم وجميل

علا رجعني لسبعينات القرن الماض

في شرق الله البارد ونواحي بطانة اب علي

متابع

.

.

.

.

.

.

شعب عملاق يتزعمه اقزام

.

.

أقطع دراعي لو ما الحكاية دي حبكتها بعد قريت بوست الجمهوريين وزيارة الكابلي والضريح.

Quote: هسع ده كلام زول طالع من عمليه؟ ولا تكون هضربه ساي؟ دكتور الرازي

طبعا يا خال، إتزريت جنس زرّة، لكن آ هو مددوا لينا تاني عشرة

وكنت كل ما أشم لي شوية نفس بالموبايل بشاغل لي زول في سودانيز

"يموت الزمار وأصبعو برقص"

دي سانحة نشكر ود خالتي ود أختك الدكتور الجراح هيثم عمر على الرعاية الدقيقة

لعب معاي مان تو مان

وينك يا الرازي ياخي ما تجينا بى جاي ..

لاحولالالالا بالله اود أختك ده لسه تحت الرعاية ؟ أكيد بهضرب ..

بس الحمد لله البقت على المداحين والسخلان ..

الف سلامة ليك يا مستنير أنت عامل فيها جعلىي يعني ؟.

ربنا يتم شفاك ويمتعك بالعافية ..

صديقي الجميل محسن خالد، في أكتر من مرّة سمعت أو قريت ليهو كلام في ونسة عن إعجابو الشديد بشعر ود بادي، وكان مستغرب من إعجاب ودبادي بإسماعيل حسن!

قال: ود بادي أشعر من إسماعيل حسن بمراحل.

قصيدتو بتاعت:

مُسدار جزيرة عِبدِلِة

تدهشني وأستغرب لهذه الصور الغنية التي رسمها فيها:

قبل فترة كنت بشوف في خبر بالتلفزيون لإستقبال للرئيس بكردفان، الكاميرا من رقيص البشير إنتقلت للأبالة الشايلين سيوفم من فوق ضهر السنكيت؛ لمحت رقاب ألبل محجوبة بالخرز والسوميت والحجبات

سرحت في ود بادي وحامد والزبيدية والبطانة، لما رجعت للتلفزيون لقيتم دخلوا في برامج تانية، ورشا الرشيد بتوب جديد وضيف جديد!!

ذات في يوم والغيمة تَهتّف مَطراً نَقَّع

فوق نُوَّار الطَلِح الفقَّّع

رِيحة البَرَم إن جاتك ..

عِطراً فايت خُمَر الفوق أردافَا مَجَدَّع

شُفنا الوادي يقشقِش في دمعَات الليل

والتِعِل الشايِل بدا يتفقَّع

تَلَّب حامد فوق مخلُوفة أب زُور واِتربَّع

طلَق الرَسَن أب زَمة وسوَّا خَبِيباً بدّع

هـوّد في رُقَّّاب الصَيْ

لاقوه تلاتة زِبيديَّة

خالفِين سيقانُن فوق السِنكِيت

ورُقَاب أَلبِل بيناتُن مَرخيّة

مَحجُوبات بالخرَز الفَصلُو السومِيت

كُل واحد درَقة وسيف وطبنجية

وباقي جُرابُن مليَّان دلميت

الجِنيَّات اِتقَبلُو وضاقُوا الحارَة وضاقُوا المُرة

وكان حجَّازُن صقر الجَو

حامد كان عارفين ..ضاقوه رُجال قبَّالكُن

شُوفوا أرزاقكُن أخير من ضَو

حامد عوَج الطُندُب آ وليدات

يا بشير، يا أخي، كلما تكتبوا لي "حكي طاعم" بزيد في الكضب الأدبي، وما بعيد لو "حكي طاعم" دي زادت؛ أخلي غلاط السياسة والدين وأتفرغ للأدب وحده

المهم، الموضوع في يد القراء والمعحبات والمعجبين

بعد مدحة التمساح وقفت على حيلي منتشياً وقلت للمداح الما جاب الحجر: اسمك منو؟ قال لي: يوسف، قلت ليهو: شوف يا أب شرا، إتّا صوتك دا أسمح من فنانين ام درمان الحاليين ديل كلهم، ومديح الرسول (ص) حاجة سمحة بلحيل، لكن الزمن عندو حكمو، وحوامة الحلال دي للمديح يمكن بطنك دي ما فايتها، دحين أقلب حقيبة، حافظ غنا حقيبة؟ قال لي: شوية، قلت ليهو ما مشكلة هسع بكتب ليك واحدة وبقول ليك اللحن ونجرب، بتقرأ؟ هزّ راسو لتحت.

كتبت ليهو جزء من الشاغلين فؤادي:

الشاغلين فؤادي .. وفايقين تائهين

يكفي البي زارف .. دمعا ما يقيف

تالي القبلي شايف .. لي برقاً لمع

والصيد في الخمايل .. ياناس إجتمع

قوموا يا أحبّة .. نسترق السمع

ما بطيق القعدة .. والمها اجتمع

وخلطها مع ما بين تبري ناصع وأخضراني اللون

وقفت على حيلي وريتو اللحن كيف، البشوفني يقول اللحن حقي!! عبد الوهاب وردي بس!!

يا أخي، يوسف دا لمان وصل حتة والصيد في الخمائل يا ناس إجتمع، قلبي قرب ينقلع، ولو ما خفت العرب ديل يربطوا تصرفي الجا في خاطري دا بمدني؛ كنت ....

طبعا يا ملك، دكتور الرازي دا خالي، لكنو في سن أخوي شقيقي الكبير او أصغر وأنا في سن خالتي شقيقتو الصغيرة الست وهي صديقة وخالة وتجاورنا بمدني ولنا ولها معزّة خاصة.

في عام 2002 توفت لنا بمدني فجأة امرأة عظيمة وجميلة من كل النواحي وهي: ست النفر الامين سنهوري، أخذت من اهلها السناهير جمال شكلهم، وحلاوة روحهم وطيب معشرهم.

ست النفر دي زوجة خالي القاضي صديقك وشقيق أمي وأخو الرازي الكبير، شيخ الامين، هو زعيم ختمي كبير، وعندو محبة شديدة للجمهورين وخاصة للرجل الجمهوري الأجمل الأستاذ سعيد شائب

في اليوم التاني للفراش أتى عدد كبير من الجمهوريين والجمهوريات للعزاء، وجلسوا جمعيا بصيوان الرجال، همهم كتير من أهلي المتزمتين مستنكرين جلوس النسوان ديل هنا؟؟؟

بدون مقدمات بدأ الجمهوريين رجال ونساء ينشدوا في قصيدة: شيء لله يا حسن

كل الختمية الموجودين بالصيوان جاتم الحالة، وقفوا حول الجمهوريين وبدوا يشيلوا معاهم بصوت عالي، التلاحم دا كان لا يوصف.

كانت دي واحدة من أجمل اللحظات التي ما زالت عالقة بذاكرتي، وأعتبرت بكا ست النفر أجمل مأتم أشهده بمدني.

بعد رجعنا البيت قلت لأمي: إتي أخوك دا لمّ في ست النفر دي كيف؟

قالت لي: سألتني يا بابكر، وبحكي ليك قصة صداقتي في الطفولة بست النفر وقصة مريق خالك لي من مدرسة الكورة الفي شارع سنكات جبرونا دي.

قلت ليها هي مدرسة الكورة دي من الزمن داك؟

طبعا 2002 انا خارج السودان رحم الله ست النفر وأسكنها فسيح جناته ..

وأحسن عزاء آل أبو قناية وأستاذي الفاضل الشيخ الأمين أبو قناية واولاده ..

طبعا الرازي وأمير ديل معرفتي بيهم من الجامعة طبعا دكتور الرازي اصغر أما أمير فهو دفعتي ..

ثم تعرفت وزاملت الشيخ الأمين وكان قاضيا لمديرية كسلا عندما جئتها قاض من الدرجة الثانية فتلقينا علي يديه العلم والمعرفة والانضباط ..

متعه الله بالصحة ..

السناهير اصلا جذورهم من دنقلا وهي أسرة كبيرة منتشرة في مدن سودانية كثيرة ..

خالي أيضا متزوج منهم .

السناهير اصلا جذورهم من دنقلا

تقصد المتمة؟؟

الهارب D:

خلاص يالـمين ..

والمتمة ومروي ومدني وبربر والابيض وبور سودان .

رحبوا معي بعود الأستاذ الجيلي أحمد لحوش بكري بعد غيّبة طويلة

نتمنى للجيلي إقامة دائمة

تدوروا تدورا وفي الأخير ما ليكم غير سودانيز

سناهير مدني يا ملك، زي ما قال عليهم اللمين، من المتمّة وهي أسرة كبيرة جدا بمدني.

يختلفوا عن أهلهم الجعليين بأنهم ناس لطيفين جدا جدا

Quote: (يختلفوا) عن أهلهم (الجعليين) بأنهم ناس (لطيفين) (جدا) (جدا)

بتبالغ ,,,,,,, ديل جعليين مركبيين مكنة أولاد مدني ,,,, ما عندنا جعليين بالمواصفات دي ,,,, ههههه

سلام أبوبكر

لحدي بالليل

قبل اسابيع ذهب للسودان لواجب عزاء ابن خالي عثمان الأمين الطيب ابوقناية
خالي الأمين هو صاحب التسجيل الذي تناقلته الاسافير الذي يلوم فيه البشير لأنه لم يقم بواحب العزاء في ابنه الذي افتى عمره في الحركة الاسلامية.
ليس هذا موضوع المداخلة، انما مقدمة لونسة رايت ان أوثق فيها ثلاثة مواقف قديمة للرجل مع الاستاذ محمود والاستاذ نقد وعبد الخالق

واصل الحكى الطاعم ما زلنا منتظرين


عامر

ء

الخلاني أفتح ( غوث) الجمهوريين والختمية هو مدحة شيء لله يا حسن
أها القوس جاب القوس لحدي ما طلع بينا لنقد والاستاذ محمود، لكن يا عامر حسين، ما تخاف برجع للنص الأول ان شاء الله بعد سنة.

بدت الونسة بالليل وخالي اللمين رجل فصيح وحكاي لا تمل ونسته، بين كل جملة والتانية بقول ليك:
تعرف يا مولانا بابكر
لاحظ لم يقل أبابكر
فهو يظن ككل آل أبقناية أن أبي أسماني بابكر تيمنا بجدهم بابكر أبقناية، لكن هذا غير صحيحا
فقد اسماني أبابكر وكتب ذلك في شهادة الميلاد تحت عمودية محمد سعيد مدني وسط
يقول هو (أي والدي) ذهبت إلى الحج وتمنت بالمدينة وعجبتني رقدة الصديق والفاروق بالبقيع
دعوت الرسول ان رزقتني بولدين اسميتهم ابوبكر وعمر
تصدقوا وتامنوا بالله؟
جاب ولدين متتابعين:
أبوبكر المستنير
وعمر نملة
ما تشيلوا هم
برجع لحكاوي خالي فهي تشابه حكاويني، فهو في كل الحكاوي بطل القصة زيي
"الجنا خال"

تعرف يا مولانا بابكر ود آمنة أختي، الكلام المكتوب الأيام دي انو نقد ما كان بصلي، ما صاح
اشتغلت في القطينة زمان وجاورت جدك ابراهيم نقد وبدأت علاقتنا تتوطد
يوم في رمضان قال لي: الليلة يا مولانا شيخ اللمين تجي تفطر معانا جاينا ولدي محمّد من الخرطوم

نظام تشويق وكد؛ ما بتم المداخلة الليلة

موات بخيل لي انو الدنيا دي عبارة عن ونسة بين إلاهين عكاليت عكلته شديدة في التفاصيل ونحن هم الابطال والتفاصيل.
في نص حكوة خالي؛ دخلوا تلاتة شالوا الفاتحة
بعد دعاوي الرحمة، جابوا ليهم الشاي،
واحد فيهم بشفط الشاي شفط مضرس زي أولاد القرى
دخل الجماعة في ونستنا

غايتو ياجنِس جِنَّك يابكور
لكن تعرف مكيِّفنى القون السجلتو فى أخونا
ياسر الشريف نامن قلت ليه انتو حاقرين بى ناس
العهد المكى ,, نامن الحكم صفَّر ما قدر يدرِّن القون ده.
حا اعمل ليه Replay واشاهده بمزاج

تصدق يا ابوبكر ( بابكر . ابكر . بكر . كر .... الخ ) طبظتها بالتفاخر بالانساب دي
رائي الشخصي

يا فاضلابي سيب الفتنة مع حبايبي الجمهوريين

يا محمد جمعة، ما ظنيت في فخر بالانساب هنا
الفخر الوحيد القاعد اعملو في موضوع الفخر دا، انو أنا والشريف عرفات والشريف السموأل
جدنا هو الشريف العباس
وعندنا شهادة بأختامها

بعدين كدي شوف الواتسابايا الحايمة دي:

"أحفاد العباس:

زماااااان عزمنى صاحبى ود تاتاى لزواج شقيقة الاكبر.. الزواج فى احدى ضواحى شندى.. كان مُصر جدا انى احضر.. المهم سقت معاى صديق مشترك ومشينا واريتنا ما مشينا..
وصلنا حوالى الساعة 12 ونص فى نهار حاااار.. استقبلونا بكرم.. هاشين باشين.. وهاك يا شاى وقهوة و (شربات) ليمون.. وبعد شوية جات الصوانى تتضارب.. ملاحات وشيات وضلعات ومحاشى وسلطات.. ضربنا لما عرقنا.. وصوت الدلوكة واصلنا مخنوق من داخل البيت.. والشباب فايرين ومدفقين ومشنقين الطواقى لما الطاقية ملامسة الحاجب.. المهم صاحبى المعاى بالراحة كدا دنقر فينى قال لى يا ابوعويض ما ملاحظ ان انا وانت فقط اللابسين بناطلين.. ياخ خلينا نلبس جلاليب ذينا وذى الناس.. المهم طلعنا الجلابيب من الشنطة ولبسنا..
قريب المغرب كدا بدأت الحفلة الرسمية.. الفنان عزالدين كبوشية.. وقاااااال كدا قال ليه رمية طويييييلة مجد فيها العريس والقبيلة.. وقاااااام بتاع الدلوكة خمج الدلوكة.. خبت جد والشتامة دورت طج طرج طج.. طج طرج طج.. وقاااااامو الشباب عرضة جد.. والغبار وصل السماء السابعة.. وانا وصاحبى فى نص المعمعة دى..
شوية كدا والجماعة البعرضو ديل كللللللهم ملصو الجلايب وربطوها فى نصهم... ممممممممممممممممم 🙈.. وانا دقست.. خجلت ما عارف.. المهم صاحبى زاتو ملص الجلابية.. شكلو صف ولقيت نفسى فى نص صف الموت ده.. وجاء العريس يقدل شايل سوط طول القناية.. ومقبض السوط مزخرف بالجلد الاحمر والبنى.. السوط روياااان قطران.. والدلوكة والشتامة عاملين شغل.. واحد يدق وواحد يخلف.. المهم الجماعة ركزوا.. وركزت حالى حالهم..وصاحبى زاااتو راكز معاى..
بدأ الجلد (البطان).. من اليمين.. الجلد سوطين.. سمعت جو جو وانا بكشف للزول الانجلد بالاول ده بالطواااال.. صراحة كان واقف ذى الجبل.. لم يهتز.. والبعدو ثم البعدو ثم البعدو
وجانى الدور.. وانا واقف هييييع انا اخو السمحة.. الزول ده عرض قدامى وبعاين لى جوووووه عينى وانا زول حارات.. المهم رفع السوط وهزاه مرتين ثلاثة.. سمعت جووووو.. صراحة بعد جووو دى حصلت لى حاجات عجيبة..
اول حاجة شفت الوان اول مره اشوفها فى حياتى. فسدقى على حرجلى بالبصلى.. سمعت اصوات ما مفهومة.. صوت ديك وصوت نملة وصوت آذان وصوت كلاشنكوف.. كلوووو مع كلوووو فى آن واحد.. وشعرت الرعشة من صوف راسى لى كرعى.. وجوووووو ادانى التانى.. هنا انا بطنى طمت وراسى داش وعرقت وحسيت اظافرى العشرة طارت.. جسمى نمل وحسيت بحول وزغللة والعبرة خنقتنى عديل.. والحمدلله لم انسى الشهادتين.. نطقت بهم سراً.. اشهد ان لا إله إلا الله وان محمد رسول الله...
المهم بعد السوطين ديل بطبك زول من نصك بمرقك من الصف وبتسمع صوت الزغاريد ذى الطالعة من بئر.. وبتاخد ليك نطه نطتين وتبقى راجع على كرسيك.. انا بعد المحط داك لا نططت لا حاجة.. بس عايز الكرسى.. هو زاتو الكرسى وين.. وهو انا كنت بشوف.. المهم بقدرة قادر وصلت الكرسى.. ولبست جلابتى وقعدت.. ضهرى ده ذى الفيه جمر.. المهم صاحبى المعاى برضو اخد نصيبو.. وجاء قعد جمبى.. محمبك ولا بعاين لى زاتو.. بعد مسااااافة قال اسمع ياااا......... اقسم بالله انا ما ببيت هنا.. هههههههه انا سامع لكن ما قادر ارد.. لسانى معقود كلو كلو.. نحن مالنا ومال كدا ياخ.. نحن اولاد امدرمان ناس بنية وشلوت اصلى.. كابويات عدييييل.. مالنا ومال الهبل ده..
المهم فجراً بدرى وفى اول بص بقينا مارقين.. والجماعة يحلفو حررررررم تفطرو حررررررم ما بتمشو طلااااااق تقعدو.. ها.. انتو وهم ولا اشتغلنا بيهم.. ركبنا البص تب.. صاحبى ده طول المشوار لم ينطق بكلمة.. هههههههههههههههههههه لما وصلنا امدرمنا الحبيبة قال لى كلمة واااااااحده ودى انا ما بقولها ليكم..

احى يا ضهرى البقيت هامل."

لا أعرف الكاتب لهذه القطعة..

Quote: بقينا في اللوري أنا والكمساري، والمداحين الأربعة، والمرأة والسخل ًوتلاتة جدادات بجنب اللوري.

سلام ابوبكر عباس ..اولا نعبر عن اعجابنا بهذا السرد الجميل ... وثانيا بالنسبة لوجود كمسارى فى اللورى والمعروف ان الكمسارى دائما بكون فى البص السفرى ...واللورى دائما بكون فيه مساعدين واحد بكون مساعد للسواق والثانى مساعد الحلة .وهو المبتدىء..ووجود الكمسارى فى هذا اللورى ربما كان القصد منه الترقية وتعظيم مكانه هذا اللورى ..بعدين ..الحاجة التانية المداحين ديل قامو بى نمرة 4 يعنى شيل لله يا حسن دى دائما بمدحوها بعد الحكاية ما تسخن ومع الختام وخصوصا بالايقاع السريع والترمبيتة ...ومتابعين ....

تعرف يا مولانا، بابكر، بعد حللنا صيامنا، قمنا نصلي المغرب، الجماعة قدموني،
قام محمد ا نقد قال: لا لا يا مولانا، أنا صاحب الدار بصلي بيكم أنا، ولّ شنو يا مولانا شيخ اللمين؟
قلت ليهو: كلامك صاح يا مولانا نقد، لكن القاضي يقوم مقام أمير المؤمنين
ابتسم نقد وقال لي: دي جديدة علي، كان كدا تقدم يا مولانا
صلينا وقام نقد تنفل تنفل العارفين أقطاب الأرض*
----
العارفين أقطاب الأرض دي هوادة مني

ابكر الف سلامة ياخ وربنا يتم الشفاء
اول مرة اعرف انكم اتشرفتوا بالنسب مع ارقى العائلات و الافخاذ , رحم الله ست النفر سنهورى وتقبل الله عثمان ابقناية فى الصالحين
فعلا حكاية كمسارى فى اللورى دى زى لما اولاد البندر يحاولوا يعرضوا او يلعبوا صقرية مع اولاد الريف
ركوبك اللورى مرة مرتين او اكلك لكبدة الابل فى سوق تمبول مرتين تلاتة كدة لن تجعل منك عارفا ببواطن امور الريف , من لباساتكم بتتعرفوا ما من الضهارى

أبدا يا محمد الحسن، دا كمساري كامل الدسم
بركب وينزل الركاب وبخلص القروش من الركاب وبتشاكل معاهم وبحرج الماعندو حق المشوار
المساعد هو من يكون في لواري الشحن
دا لوري مواصلات زيو وزي كانترات أمبدة والثورات

(ابتسم نقد وقال لي: دي جديدة علي، كان كدا تقدم يا مولانا
صلينا .........)
عليك الله اميتم ...
غايتو لمبة الاستنارة هنا لمبة عجلة ما فيها دينمو بس ...

صباح الخيرات
ابداااع
يامستنير واريتك لو تركز في الشفل البربي زباين وعضلات ومحبين ومريدين وتخلى ناس شراب الشاي بي صوت ويجيبو ليك الم الفكيييين اكتب يااخ
اسمع الكمساري لامن .... ماقاليك مدني جاطت