عشان كجبار

04:47 PM February, 22 2016

سودانيز اون لاين
عمار محمد ادم-
مكتبتى
رابط مختصر

فى كجبار بجيب مسدار
وكامن شوقى ولع نار
طريت العمه والجرجار
طريت الطار
طريت ماضينا فى حلفا
جزين ومشاعرى مختلفة
تغادر حلفا مكلومة
وجوه مشاعرى مهدومة
قطار الشوم يشيل يرحل
يشيل اشواقنا فى الاول
يبشتنو فينا ما بنسأل
تبدل حالنا واتحول
تمرنا عول
بقينا همل
وكل عريب ركبلو جمل
سعالو حمل
وفى البيداء زرعلو نخل
حليلها حضارة البركل
يقوم السد يغرق دال
هموم ايامنا تبقى جبال
شعوبنا اصيله محترمة
حلات القعدة فى كرمة
حليلها سمت حليلها بدين
تقولى كفاك وجيت من وين
اعيش مغموم وديمى حزين
وفى فريق فى شوق وحنين
حليلها بلدنا يوم تغرق
وبى اشواقنا نتحرق
مضوها وريقة تتطبق
ونيل ابيض ونيل ازرق
وسد كجبار كتير فرق
تسيل دمعاتها حبوبه
بتبنى الطوبه فوق طوبه
وساوى ضليلها راكوبه
وشوف الطفلى يا دوبها
بتبكى حضارة النوبة
وفى ما ضينا كم عشاق
يغوص الماضى فى الاعماق
كتير الالمنا ما بتنطاق
بنحكى اصالة الاعراق
ونبكى رماتك الاحداق
ونذكر حلفا كيف ضاعت
بابخس قيمة اتباعت
عشانهم ناسنا فى كجبار
يعيشوا احرار
وشان الناس صغار وكبار
يعيشوا كرام
نجرد راينا والاقلام
نقولو كلام
ولى قدام ولى قدام
نعلى اصواتنا فى الاعلام
عمار محمد ادم

لك التحية استاذ عمار
و مأساة عبود لن تعود.

منظر من ضفاف النيل في قرية دفوي ( تقع جنوب قرية كجبار مباشرة ) يظهر في الضفة الاخري
قري فريق المحس و مشكيلة و جبال نوري.
اركونقا فا موقمو.
لن نتخلي عن بلادنا.

يا سلام عليك يا عمار... قصيدة جميلة ومحزنة...زمان الشيئ الجميل كان مفرح لكن الآن صار الحزن جميلا ونبيلا لانه حزن غاضب على القبح..