عمك واحد قال ( اجمل الروائين ، منسيين وغير مقروءين ، لأن اجمل رواياتهم تظل حبيسة الأضابير..!!!)..فهل نحن من زمرة اجمل الروائيين؟..مندري.. على قول سيدنا وصاحبنا ، شيخنا دكتورحسن موسى عليه السلام..!!
ياخي داير اعمل بيك بريك ممكن؟...
جنون مؤقت صابني ، وانا اعافركتابة الفصل الأول في راوية.. واظنك بتحب الرواية ياا صديقي..!
اتذكرت بدور القلعة ، ومزيكا وهبة المعطرة ، وانا احاول الحكي عن تفاصيل القاهرة ..شكل زول راكب ميترو الف مسكن..!!
كبر
Post: #2 Title: Re: معاوية الزبير: حفلة يا ابو الحاج بتذكرا..!! Author: Kabar Date: 01-28-2016, 11:42 AM Parent: #1
في لحظة المعافرة الأولى ، تطب عليك ، كزول بتحاول تكتب رواية ، بتطب تفاصيل كتيرة..كتيرة شديد ياعمك..منها ، انك تشوف ليك وش زول اهداك رواية واسيني الأعرج (نوار اللوز) في جخانين حي النصر بمدينة كوستي ، ومنها تفاصيل الحاجات الممتلئة حنين ومسغبة ، فليكن ردفين جانحين ، وخدرة دقاقة وتفاصيل امسودان التحتانية ، وما تنسى الضحكة الرنانة، والصوت الفيهو بحه لن يقدر (وهبة) مباصرتها في مزيكا يعطر بيها الحفلة ذاتو ، تلك التي لو سمعها عمك محمد موسى لكتب مليون مرة عن (ليلة السبت) حتى يخلع اليهود طواقيهم الما مالية الراس تلك..طواقي زي نص سفة التمباك الجاي من جبل مرة..حاجة ما بتم الكيف كلو كلو..!
او وجه نزار جلاب الطفولي (ده شيوعي يا معاوية من الدلنج) ، وهو يحمل بين يديه رائع الطاهر وطار (اللاز)..ويقول ليك اقرا..اقرا..اقرا..ثم تضحك عيشة (مواطنة من الدلنج برضك)..تضحك وهي تختبر هجايص اليفع من الأدباء المشغولين باعمال الرواية ، وترى انهم لا يكتبون رواية الواقع بتفاصيلها الحميمة..فيا ترى من يرضي مزاج عيشة تلك؟..!
ثم ترجع بك الذاكرة الي حي النصر بكوستي ، من تاني ..فتلفك ترانيم عود البعثي الأوانطجي اسامة الهادي (سلام يا اسامة اينما كنت وكيفما كنت ياااااااخ)..وتخلخل فيك معنى الهوية والسكون والوجود ذاتو..!
حصل يا معاوية ، سمعت هدير عمر خليل ـ وهو يترنم حنينا شفيفا في حي المرابيع ، (من بعد ما عز المزار) ، ؟..حنين يقد صفحة النيل فيجري مرحا في زقاقات طيبة ، وطيبة البيارة ، والحلة الجديدة ، وجامع (الكون) ذاتو ، محل سيدي المهدي الإمام؟..الموضوع ده ما داير ليهو فطرة سمك ، ولا تشجيع فريق الرابطة ، ولا رحلة بنطون عتيد يا عمك..!!
كبر
Post: #3 Title: Re: معاوية الزبير: حفلة يا ابو الحاج بتذكرا..!! Author: Kabar Date: 01-28-2016, 11:53 AM Parent: #2
بشراك يا صاحب ، قاعد اكتب في رواية..وما ح احكي ليك موضوعها..لكن يقيني هو موضوع جديد..لم يسمعوا به من قبل في اباءهم الأولين..!!
ياخي انا ذاتي ، القاعد اكتب فيهو ، لم اسمع به من قبل في ابائي الأولين..!!
هل تحتمل يا صديقي شوفة وجوه مثل:الياس خوري ، ادوارد الخراط ، اقبال بركة ، بهاء طاهر ، صنع الله ابراهيم ،عبد الحكيم قاسم ، الطاهر وطار ، ابراهيم الكوني ، زهاء طاهر ، وزينب بليل؟..ولا نحن قاعدين نرطن برانا..؟!!!
وشوش كتيرة من امسودان بتجبرك انك تكتب رواية ، وتحاول تجتهد فيها عشان تبقى مفارقة ، وش عيشة (ده مافي زول هنا شافو غير عبد الرحمن عزاز ، والكويسة انو قاطع موية ونور) ، وش ابنتنا الشاعرة الجميلة غدير شيخنا ، وش ابنتنا الجملية التشكيلية ايمان هرون وهي وتجمل شوارع برازيليا محل المجك ذاتو..!!
فهل كتيرة الواحد يحلم بانو يبقى جورج امادو أمسودان ، قدس الله سرها؟!!!
وسلام لمحسن خالد ، عثمان محمد صالح، علي عبد الوهاب عثمان ، محمد عبد الله حرسم..وعيشة بت اللذينا..!!
كبر
Post: #4 Title: Re: معاوية الزبير: حفلة يا ابو الحاج بتذكرا..!! Author: ANWAR SAYED IBRAHIM Date: 01-28-2016, 12:19 PM Parent: #3
السلام عليكم الاخ كبر عساك طيب وبخير نتشرف والله بمعرفتك بس قبل كل شيىء انت رجل رائع لانك بتعرف معاويية الزبير ولانك جبت سيرة كوستى وخاصة حى المرابيع ولانك جبت لينا اغنية للراحل الغالى الاستاذ مصطفى سيد احمد ياخ ازيّييييييييييييييك تانى وثالث ورابع لك الود حاول خلينا نعرفك شوية وبعدين نجيك تانى ومعانا معاوية أنور ......
Post: #5 Title: Re: معاوية الزبير: حفلة يا ابو الحاج بتذكرا..!! Author: Kabar Date: 01-28-2016, 12:23 PM Parent: #3
سنبهار..
المزيكا التي نحلم ان نتقاسمها مع الأصفياء والصفيات ، سمار الصفا وخلانا الوفا..اسامي واسامي ..ولن نجازف بحصرها وتعدادها هنا.. ابراهيم فضل الله (صاحب الفخامة ، حياه الغمام) ، ابراهيم فضل الله (عضو المنبر) ، محجوب علي عثمان ،عادل اسماعيل، عبد الرحمن بليا ، سيد منوفل ، الزين سلمان ، اسماعيل زمام ، محمد خليل الدومة ، حسن فضل الدود ، محمد فضل الدود ، حسنة سالم ، عيشة ، سبأ ، عائشة عبد الله ، حنان يعقوب ، امتثال الشيخ ، انتصار، مشاعر ، اقبال ، ليلى ، منال اسماعيل ، يسرية ، حنان الضو..جدية ، ميرفت حامد ، كل الوجوه التي تطل في لحظات الصفا وهي تعتمر الإبتسامات المشرقة ، او كلمات المواساة..لهم ، لهن جميعا ، المزيكا التي نحلم بان نتقاسمها معهم..اما ما تبقي من حكي ، فسوف نحكيهم ، سوف يحضرون ويتراكضون في ثنايا ما نكتب من رواية..فان لم يحضروا في هذه الرواية ، سيحضرون في روايات قادمات ، كما حضروا في روايات سابقة..وظلت حبيسة الأضابير..!!
وكده انتهي البريك يا معاوية..وبعد ثلاث ايام سنعود لسحب هذا البوح..!
كل سنة وانتا طيب يا صديقي..
كبر
Post: #6 Title: Re: معاوية الزبير: حفلة يا ابو الحاج بتذكرا..!! Author: أبوبكر عباس Date: 01-28-2016, 12:36 PM Parent: #5
في زيارتي الأخيرة للسودان قبل أيام، ذهبت لحي الدرجة، طرقت باب بيت أخي حتى كلّ متني لحدي ما كلمتني بتو الحتالة العشرينية وبعد طايبتني قالت لي بلغة عربية فصحى: أبي مع نفر غزير من أهلنا بالصالون يختمون في القرآن، وكذلك نساء العائلة مع والدتي ببيت النساء قلت لها بنفس الفصحى: هل توفى أحد يا أبنتي؟ - لا يا عمي، إنه راتب اسبوعي تعاهدنا عليه حديثاً غفلت راجعا للوراء كشيطان طردو فكي من جسد عذراء تخيلتها مدني ووعدت بنت أخي بالعودة لاحقا قفزت بي الذاكرة المجنونة لنهاية السبعينات،وأولاد الدرجة يتنافسون في ليلة راس السنة بنادي الجزيرة على انغام بوب مارلي، على جائزة أحسن راقص وراقصة! تمتمت سرا: إن الأرض يرثها عبادي الصالحون وتحيرت من هم الصالحون وتيقنت أن أجمل الروايات، هي في صدورنا نخاف أن تمس تفاصيلها من نحب بأذى!! لمعاوية وكبر السلام في الدارين الدلنج وكوستي والتحية لعرقي الرديف
Post: #7 Title: Re: معاوية الزبير: حفلة يا ابو الحاج بتذكرا..!! Author: Kabar Date: 01-28-2016, 01:17 PM Parent: #6
كتر خيرك يا انور.. زكتر خير ول ابا ابكر الطويل (وفق رواية قمر عليها السلام)..
عارف يا ابوبكر..حاجاة امسودان دي فيها جخنانين عجيبة خلاس..
من كوستى مرقت جدواية وشقيقتها عشة (المشهورة بعشة الفلاتية)..
وبرضك كان صلاح كوستي ، واحد من اجمل الأصوات التي تغنت لمصطفى سيد احمد ، وصلاح موهوب لدرجة انو مرات صوتو بيلاقيك وما تعرف انو ده صلاح..
حكاية النلاوة الأسبوعية يا ابكر..امرها عجيب,,
اهديك الغنية التالية ليك ولصديقنا انور (لغاية ما نجي راجعين ليهو قبال نسحب البوست)..
هنا المجيك يا ابكر ، انوغنية كوستي دي كتبها عمنا واستاذنا الشاعر الجميل الأستاذ محمد حامد ادم ، وده نفس الشاعر الكتب رائيعة ود بارا (ضابط السجن)..
استاذنا محمد حامد ادم ، عمل بالدلنج..زكانت استاذ في مدرسة البنات الأميرية..فنحن كنا بنحي اشجار الياسمين ( والله صحي يا ابوبكر) الكانت بتسور المدرسة ، وبنحي استاذنا الكان بيحكينا عن ضابط السجن..
وانا هين يا ابوبكر ، خليها تصبح شوية ، يمرق فيك استاذنا احمد الأمين ، لأنو محمد حامد ادم برضك كان من ناس المجلد (دينقا ام الديار..)..!!
الغريبة يا ابكر ، الغريبة المافي زول ح يقدر يستوعبها في الساعة الضيقة دي.. استاذنا محمد حامد ادم كوز الله والرسول..كوز عديييل...!!!
و يا انور..الناس العاصرونا في الجامعة..جامعة الخرتوم...من اقتصاد..فاطنة عمر جامع ، ليلي عمر من ناس اقتصاد ، ومن قانون: مدثرالجعلي ، بابكر التوم ، واختنا الصغنونة الجميلة.. ساميه عمر جامع (دي الزولة الخلتنا نقرا الفيلسوف الألماني مارتن هيدغر من الألف للياء..ليها التحية ام محمد)..طبعا ديل ما فيها ناس الجزيرة ابا..لأنو ديلاك خلق كتيرة خلاص..!!
كتر خيركم يا شبابا ..والبريك انتهي..
ونشوفكم...
كبر
Post: #8 Title: Re: معاوية الزبير: حفلة يا ابو الحاج بتذكرا..!! Author: Kabar Date: 01-28-2016, 01:24 PM Parent: #7
هههه.. يا ابوبكر..
نهاية السبعينات دي بعيدة شوية ،
هسع الواحد يقول ليك ، امن كنا بنجي القوز.. دحدوح عادي جدا بنشخت ليهو زي الترتيب..!!!!
ياسر سعيد قال الإنقاذ شنو كده ما عارف وجابت تراجي..!!
فهل في واحد هنا ممكن يصدق أنو زمااااااااااااااااااااااااااااااااااان.. كنا بنجيب دحدوح ، ومن نفس الحتة الليلة / بيجي حميدتي..؟
عشان كده صدق الخواجة لمن قال (لمن الرب خلق امسودان ، ضحك كاااااااااااااااااااااااااااااك)..!!!
كبر
Post: #9 Title: Re: معاوية الزبير: حفلة يا ابو الحاج بتذكرا..!! Author: أبوبكر عباس Date: 01-28-2016, 01:45 PM Parent: #8
غايتو يا كبر، امسودان الشافتا عيني دي، ما ظنيت الرب خلقا باقي لي أمسودان دي بعد بلت التمر وشربت عرقيهو وموصو شالت التفل بتاع التمر لختو وعملت منو رب الغريبة أنا لي زمن كلما تجي سيرة الله، بتذكر عمر بن الخطاب ولي زمن كنت بحلم لي بحيطة وردية لمان جيت بيتنا في بانت لقيتم ضاربين البرندة وردي،وعاملين ليهم زخارف دائرية حلوة بالأخضر والأبيض قلت ليهم وأنا راقد وكباية القهوة قدامي: الاختار اللون الوردي دا منو؟ أمي سمعها بقى نص تقيل قالت لي: أجي يا بابكر، وردي ما مات؟!
Post: #10 Title: Re: معاوية الزبير: حفلة يا ابو الحاج بتذكرا..!! Author: معاوية الزبير Date: 01-28-2016, 05:17 PM Parent: #9
هسي الزول يكتب يقول شنو يا كبر؟! كدي أول حاجة خلينا نضحك لحكاية أم بابكر دي
من كم يوم كدا زانّه في عضاني غنية موسى أبّا (عيني عليك باردة) ح أرفع البوست الكتبو عنها عبد العظيم عثمان عشان تعلّق عليهو
وبدون مناسبة ح أرفع بوست (ومن يكتب عن مريسيلا) مزاج كدا بس
ح أرجع ليك طبعا
Post: #11 Title: Re: معاوية الزبير: حفلة يا ابو الحاج بتذكرا..!! Author: ANWAR SAYED IBRAHIM Date: 01-30-2016, 09:41 AM Parent: #10
دى اجمل هديّة ... لقد ابكيتنى يا رجل ....!! خاصة وانا لم اغادر الى كوستى للسنة الرابعة على التوالى واحس باننى كالمجافى ؟؟!! التحية لك ولشاعرها ولمن لحّنها ومن غنّاها ومن استمع اليها ولجميع اهل كوستى .. شكرا ليك كتيييييييييييييييييييييييير