أرَى ذلكَ القُرْبَ صَارَ إزْوِرَارَا .. وَصَارَ طَويلُ السَّلامِ اخـْـْــتِصَارَا

Post: #1
Title: أرَى ذلكَ القُرْبَ صَارَ إزْوِرَارَا .. وَصَارَ طَويلُ السَّلامِ اخـْـْــتِصَارَا
Author: يحي قباني
Date: 01-23-2016, 09:08 PM

08:08 PM Jan, 23 2016
سودانيز اون لاين
يحي قباني-فى الدنيا العجيبة
مكتبتى
رابط مختصر
وهب الله استاذنا الكابلي حب القراءة و مهارة استخراج الدرر المكنونة في الشعر العربي القديم ..

فنجده كثيراً ما يبدأ أغنياته برميات من أمهات الشعر العربي ... قديماً و حديثاً ...

و لعل أجمل ما ( دندن ) به الكابلي احد قصائد المتنبئ العجيبة ...

و التي قالها حينما استبطأ سيف الدولة مدحه .. فتنكّر و قال له :

أرَى ذلكَ القُرْبَ صَارَ إزْوِرَارَا .. وَصَارَ طَويلُ السَّلامِ اخـْـْــتِصَارَا
تَرَكتَنِي اليومَ في خَجلةٍ .. أموتُ مِراراً ، و أحيا مرَارَا

و الغريب هو استخدام كلمة إزورارا ...!!

الازورار كما جاء في ديوانه : العدول و الانحراف . و قد إزورّ عنه ازورارا .. و ازوارّ عنه ازويرارا ..
و تزاورَ عنه تزاوُرَا و كله بمعنى عدَلَ و انحرف .. و قرأ ابن عامر ( تزورّ عن كهفهم ) على وزن تحمَرّ ..
و قرأ الكوفيون ( تزاورَ ) مخففاً . وقرأ الباقون ( تزّاورَ ) مُدغماً: أي تتزاورَ و كله بمعنى تعدل و تنحرف ..
المعنى: يقول: صار طويل السلام مختصرا ، و صار ذلك القرب منك عدولا عني و انحرافا .. وهذا نوع من المعاتبة ..

و يبقى السؤال : تُرى ما هو مستقبل الغناء و الشعر في السودان ...

فالكابلي هو وحيد جيله متفرداً بتلك الهبة ...

هل يا ترى سيأتي شبيه لأستاذ الأجيال ؟ حتى يطمئن ان الفن السوداني سيكون بخير ؟

Post: #2
Title: Re: أرَى ذلكَ القُرْبَ صَارَ إزْوِرَارَا .. وَ
Author: يحي قباني
Date: 01-23-2016, 09:09 PM
Parent: #1

Post: #3
Title: Re: أرَى ذلكَ القُرْبَ صَارَ إزْوِرَارَا .. وَ
Author: Salah Zubeir
Date: 01-23-2016, 09:25 PM
Parent: #1

تحياتنا يا قبانى

ياخى عاميتنا السودانية دى فى أحلى منها ,,,, أسى مكتبة الأغنية السودانية طرفكم كم نسبة
الأغانى بالفصحى مقارنة بالعامية 90/10% .

ياخوى إنت هاقق و كاسس البجى منك كلو كويس. قلت لى إزورارا ,,,,ماشى يا عم.

Post: #4
Title: Re: أرَى ذلكَ القُرْبَ صَارَ إزْوِرَارَا .. وَ
Author: يحي قباني
Date: 01-23-2016, 09:28 PM
Parent: #3

صلاح الزبير يا حلو ...

ياخي لغتنا العامية ناس المستنير بشتنوها ...

قال صير بالموردة قال ... و الله قربت أقول ليهو القلتو انت ... :)
___________________________________________
بعدين انت قريت في القديمة متين ؟

Post: #5
Title: Re: أرَى ذلكَ القُرْبَ صَارَ إزْوِرَارَا .. وَ
Author: Salah Zubeir
Date: 01-23-2016, 09:49 PM
Parent: #4

قبانى يا ظريف

Quote: بعدين انت قريت في القديمة متين ؟

عايز تقولى يا خال ولا شنو ,,,,,,,, 76 إنت كنت وين ,,,,, أنا لسع ما جاوبتك ,,,,,
حسن عابدين درسك ماث ,,,,, الشايقى - أحياء ,,, الزول السمين نسيت إسمو - كيمياء
حسن فضل المولى - فيزياء ,,,, الناظر - الشايقى (حسن عبيد؟)

Post: #6
Title: Re: أرَى ذلكَ القُرْبَ صَارَ إزْوِرَارَا .. وَ
Author: ABUHUSSEIN
Date: 01-23-2016, 10:01 PM
Parent: #5

Quote:
عايز تقولى يا خال ولا شنو ,,,,,,

مالو ما بقول ليك يا خال صغير و ل صغير ....😂😂😂
76 دي انت جيت مع المرتزقة من ليبيا ...😂😂😂😂😂
يا خال سلام و الزول دا ما يغشك 76 دي كانت حقتو في جيبو ....😂😂😂

Post: #7
Title: Re: أرَى ذلكَ القُرْبَ صَارَ إزْوِرَارَا .. وَ
Author: يحي قباني
Date: 01-23-2016, 10:11 PM
Parent: #5

Quote: عايز تقولى يا خال ولا شنو ,,,,,,,, 76 إنت كنت وين ,,,,, أنا لسع ما جاوبتك ,,,,,
حسن عابدين درسك ماث ,,,,, الشايقى - أحياء ,,, الزول السمين نسيت إسمو - كيمياء
حسن فضل المولى - فيزياء ,,,, الناظر - الشايقى (حسن عبيد؟)

انت حضرت علي السيد الله يرحمه لما كان ببدا المظاهرات ؟

أستاذ الكيمياء النسيت اسمه هو مصطفى حسن ( بوستي ) الله يرحمه ...

انحنا ناظرنا كان الطيب السلاوي و عمك حسن عبيد كان الوكيل ...

75-78 ... شكلك ورانا بي سنة لكن بتكون دفعتنا ...

بعدين أستاذ الماث اسمه مصطفى عابدين ... ( حسن عابدين ده ممثل ) ... :)

حالتك صعبة في النسيان ... دي الغربة يا حبيب ...

Post: #8
Title: Re: أرَى ذلكَ القُرْبَ صَارَ إزْوِرَارَا .. وَ
Author: يحي قباني
Date: 01-23-2016, 10:20 PM
Parent: #7

Quote: مالو ما بقول ليك يا خال صغير و ل صغير ....😂😂😂
76 دي انت جيت مع المرتزقة من ليبيا ...😂😂😂😂😂
يا خال سلام و الزول دا ما يغشك 76 دي كانت حقتو في جيبو ....

عارف و الله يا عادل ...

لكن نسوي شنو ...

Post: #10
Title: Re: أرَى ذلكَ القُرْبَ صَارَ إزْوِرَارَا .. وَ
Author: د.محمد بابكر
Date: 01-23-2016, 10:49 PM
Parent: #8

يا سلام عليك يا قبانى .. دايماً تتحفنا بالجميل يا جميل .. كده اقوى عينى وابقى شحاد ما دام ممكن نلقى عندك النادر من الألحان..نلقى عندك رائعة الطيب عبدالله ( زمان لو قالوا عن تاجوج روائع خلدا الدوبيت)؟
فى كل الأحوال مودتى واحترامى..

Post: #12
Title: Re: أرَى ذلكَ القُرْبَ صَارَ إزْوِرَارَا .. وَ
Author: يحي قباني
Date: 01-24-2016, 08:22 AM
Parent: #10

Quote: يا سلام عليك يا قبانى .. دايماً تتحفنا بالجميل يا جميل .. كده اقوى عينى وابقى شحاد ما دام ممكن نلقى عندك النادر من الألحان..نلقى عندك رائعة الطيب عبدالله ( زمان لو قالوا عن تاجوج روائع خلدا الدوبيت)؟
فى كل الأحوال مودتى واحترامى..

غالي يا دكتور و الطلب رخيص ...

ياخي انت تأمر بس و انحنا نجيب ... :)

Post: #9
Title: Re: أرَى ذلكَ القُرْبَ صَارَ إزْوِرَارَا .. وَ
Author: Salah Zubeir
Date: 01-23-2016, 10:46 PM
Parent: #7

Quote: حالتك صعبة في النسيان ... دي الغربة يا حبيب ...

إنت عارف مشيت أشترى غرض من السوبرماركت , وقفت العربية فى الباركنق , دخلت و إشتريت الأغراض,
جيت العربية دخلت الأغراض , و فتحت الباب الورى السواق و ركبت فى الكنبة الورا , وطلعت الموبايل لقراءت إيميلات,
بعد خمس دقائق أو أكثر إكتشفت إنو أنا السواق لأنو أصلا" ما معاى حد. دا زهايمر عديييل

ياحبيب أنا قبلك شديد 72/75 وناظرنا كان السراج و حسن عبيد الوكيل ,,,,,,,
ياسلام ياخى بوستي ربنا يرحمو ,,, بعدين والله بستحق تقول لى ياخال كيتن فى أبوحسين,
ياخى أحفادى تلاته جودي6 و جهينه4 و سوسو-1.

Post: #11
Title: Re: أرَى ذلكَ القُرْبَ صَارَ إزْوِرَارَا .. وَ
Author: محمد أبوالعزائم أبوالريش
Date: 01-23-2016, 10:58 PM
Parent: #9

مصطفى بوستي وجرجس محارب

وبمناسبة إزورارا دي .... ناس العربي: كدودة والنوراني

قباني يا عجوز ..... إزيك ياخ

Post: #13
Title: Re: أرَى ذلكَ القُرْبَ صَارَ إزْوِرَارَا .. وَ
Author: عمر عثمان
Date: 01-24-2016, 08:59 AM
Parent: #11

Quote: و يبقى السؤال : تُرى ما هو مستقبل الغناء و الشعر في السودان

الفن انعكاس لحال المجتمع
من تحضر ورخاء أو عكس ذلك

وما أراه أن سودان الافنديه والقعدات
لتسبيك الغناء وتثقيف الفنانين
قد ولى

وهل كان يكون الكابلي لولا أصدقائه
المثقفون أمثال الحسين الحسن
وسفراء الخارجيه

Post: #14
Title: Re: أرَى ذلكَ القُرْبَ صَارَ إزْوِرَارَا .. وَ
Author: د.محمد بابكر
Date: 01-24-2016, 11:35 AM
Parent: #13

Quote: غالي يا دكتور و الطلب رخيص ...

ياخي انت تأمر بس و انحنا نجيب ... :)

تسلم وكتر خيرك كتير و ما يأمر عليك لئيم مع تحياتى..

Post: #16
Title: Re: أرَى ذلكَ القُرْبَ صَارَ إزْوِرَارَا .. وَ
Author: يحي قباني
Date: 01-24-2016, 06:04 PM
Parent: #11

Quote: مصطفى بوستي وجرجس محارب

وبمناسبة إزورارا دي .... ناس العربي: كدودة والنوراني

قباني يا عجوز ..... إزيك ياخ

وين يا دفعة ...

ازورارا دي ممكن بالدارجي كده تكون ازورارا لامن تجيب الدم ...

Post: #15
Title: Re: أرَى ذلكَ القُرْبَ صَارَ إزْوِرَارَا .. وَ
Author: يحي قباني
Date: 01-24-2016, 05:59 PM
Parent: #9

Quote: ياحبيب أنا قبلك شديد 72/75 وناظرنا كان السراج و حسن عبيد الوكيل ,,,,,,,
ياسلام ياخى بوستي ربنا يرحمو ,,, بعدين والله بستحق تقول لى ياخال كيتن فى أبوحسين,
ياخى أحفادى تلاته جودي6 و جهينه4 و سوسو-1.

ما شاء الله ... ربنا يحفظهم جميعاً ان شاء الله ...

اخوي محمد نجيب خريج القديمة 67- 71 ... ... دفعته مصطفى نواري و حسن محمود ابوبكر ...

هاك القصاصات دي نذكرك الذي مضى ...

اخوك ململم زي ده كتير ...

Post: #17
Title: Re: أرَى ذلكَ القُرْبَ صَارَ إزْوِرَارَا .. وَ
Author: علي دفع الله
Date: 01-24-2016, 06:29 PM
Parent: #15

قباني ازيك يا مايسترو
والله عنوان بوستك دا يلم فيه واحد من المؤتمرجية يختو في يافطة على اساس انو اية او حديث ههههههه
مودتي يا زوق

Post: #18
Title: Re: أرَى ذلكَ القُرْبَ صَارَ إزْوِرَارَا .. وَ
Author: يحي قباني
Date: 01-25-2016, 03:10 AM
Parent: #17

Quote: قباني ازيك يا مايسترو
والله عنوان بوستك دا يلم فيه واحد من المؤتمرجية يختو في يافطة على اساس انو اية او حديث ههههههه
مودتي يا زوق

و الله يا علي مع الشايفنوا منهم اليومين ديل هم و حواريهم ...

ممكن كمان يتموها بي صدق الله العظيم ...