و الله ما عندي ادنى فكرة عن حكاية الكروت و لم اشاهد في حياتي على الاطلاق عملية لف الكروت دي مشاهدة مباشرة و لم يصادف ابدا أن كنت جلوسا في مكان يلف فيه. لكن شفت كاركتيرك بتاع اول ما يفتحوا ليك الباب قول ليهم شالووم و شفت فيه خفة دم خيالية و قدرة على السخرية عالية. قليلة هي الكاركتيرات التي تجعلك تضحك فعلا، ضحك بصوت يعني مش مجرد ابتسامة او حتى شعور بانو الحاجة دي funny و خلاص و هذا الكاركتير واحد من تلك القلة. و ناسنا لديهم حكمة موروثة أن مثل هذا لا يصدر عن شخص الا باكثر من كرت. و لعل مثار احساسي بالسخرية هو تجربتي الشخصية مع مواقف مشابهه في السودان. ناس البيت او اصحابك او ناس جيرانكم او غيرهم يلزوك للقيام بمهمة لا يريدون هم القيام بها بانفسهم لسبب الله وحده يعلمه و طول الوقت ينزلوا فيك نصائح و يرسمون لك خارطة الطريق من طق طق للسلام عليكم هذه المهمة غالبا ما تتضمن الطرق على باب ناس ثقلاء او اغنياء او منعزلين و غالبا ما يكون الطرف صاحب المهمة حريص على نجاحها عبرك لذا فانه يكثر عليك من النصائح: دق الباب و ارجع لي ورا ، و استنى شوية قبل ما تدق تاني و اول ما يفتحوا ليك قول كده و اوعك تعمل شنو كده ما عارف ههههههههه
Post: #2 Title: Re: عمر دفع الله: دي بكم كرت ؟ Author: سيف النصر محي الدين Date: 01-20-2016, 06:55 PM Parent: #1
Post: #3 Title: Re: عمر دفع الله: دي بكم كرت ؟ Author: Salah Ahmed Ali Date: 01-20-2016, 07:24 PM Parent: #2
سلامات سيف النصر و التحية عبرك للفنان المبدع عمر دفع الله...
Quote: و الله ما عندي ادنى فكرة عن حكاية الكروت و لم اشاهد في حياتي على الاطلاق عملية لف الكروت دي مشاهدة مباشرة و لم يصادف ابدا أن كنت جلوسا في مكان يلف فيه
مافي داعي للحليفة الكتيرة دي...
Post: #4 Title: Re: عمر دفع الله: دي بكم كرت ؟ Author: أبوبكر عباس Date: 01-20-2016, 07:25 PM Parent: #2
سلام يا سيف، يا أخي يبدو انو أنا متابع ما قدرت أفهم ليش الاسلاميين دافرين البشير يتصالح مع اسرائيل؟ زايد من وين الاسلاميين جابو القوة السيطروا بيها على البشير؟ الكاركتير من ناحية سياسية ما وقع لي هل السعودية حابا تتطبع علاقاتها مع اسرائيل؟
Post: #5 Title: Re: عمر دفع الله: دي بكم كرت ؟ Author: أبوبكر عباس Date: 01-20-2016, 07:30 PM Parent: #4
ايران اقرب ما تكون الآن لاسرائيل
Post: #7 Title: Re: عمر دفع الله: دي بكم كرت ؟ Author: سيف النصر محي الدين Date: 01-20-2016, 07:49 PM Parent: #5
يا صلاح احمد علي اتخيل انو الحليفة الكتيرة دي لنفي التهمة و لكن انا ذاتي مستغرب ليه ما مريت بالتجربة دي؟ زماان في الكلاكلة كنا بنمشي البحر في المغربية انا و اتنين اصحاب و دائما كان بتدور حولنا الاقاويل اننا بتاعين الحكاية دي لأنو البحر عند الغروب كان المكان و الوقت المفضل للجماعة ديل..لكن الغريبة لحدي ما طلعت من السودان ما حصل اني شفت الناس ديل in action :)
Post: #9 Title: Re: عمر دفع الله: دي بكم كرت ؟ Author: جمال ود القوز Date: 01-20-2016, 08:06 PM Parent: #5
Quote: ايران اقرب ما تكون الآن لاسرائيل
وأقرب مما يتصور البعض .. السياسة كما جبل الجليد .. لايرى البعض منه الا راسه الظاهر للعيان .. تحت تحت .. إيران أكبر حليف لاسرائيل .. ومايجمعهما اكثر مما يفرقهما .. بعدين إنت قايل سر رضا البيت الأبيض عن ايران شنو !! .. هو هذا التقارب من الأبواب الخليفة بين الدولتين .. أمريكا ستترك الباب مواربا لايران وعلى الدوام .. لأنها تعلم علم اليقين أنها ليست عدواً لاسرائيل .. كل ترسانة ايران النووية دي حتتوجه للسنة والخليج بالتحديد .. ولن ترمي ايران اسرائيل بحجر ناهيكـ عن قنبلة .. بل لن تشكل خطر على الدولة العبرية وتحت أي ظرف من الظروف .. ماتشوف هوجة الفرس دي وشغل حزب الله .. والكاتيوشا المابتفوت احراش شمال اسرائيل .. دي كلها دراما وملهاة ليس إلا .. الآن اسرائيل زاهدة أكثر من الاول في تقارب بينها ونظام الخرطوم .. لأن الخرطوم بوظت علاقتها بايران .. يبقى الوجه الآخر للعملة شنو ؟ .. علاقة جيدة مع الخليج .. يبقى كده الحسبة اتحسمت خلاص .. لاتقارب محتمل بين السودان والكيان الاسرائيلي .. بالذات في ظل سوء للعلاقة معه ايران حالياً .. الناس دي جايطة ساي ... وزمااان لمن فرحوا بالنووي الايراني .. قلنا ليهم فرحكم ده بيذكرنا بي فرح ديكـ المسلمية .. القاعد يعوعي وبصلتو في النار ....
أيوه كده يامستنير أدينا نقله يأخ .. وخلي الناس دي تشوف الواقع المحض عبر نظرتكـ الثاقبة المستنيرة ..
Post: #6 Title: Re: عمر دفع الله: دي بكم كرت ؟ Author: احمد الشيخ Date: 01-20-2016, 07:48 PM Parent: #4
يا بكة يا مستنير الاسلاميين حريصين على تطبيع العلاقات مع امريكا عشان تنفتح ليهم ماسورة تحويل عملاتهو الصعبة عشان كدا ليهم سنين جارين ورا امريكا وعارفين انه مفتاح امريكا هي اسرائيل وقبل كدا كرتي * قال ما خلينا حاجة ما سويتاها لامريكا
تحياتي اخ سيف ونشاركك الاعجاب بالكاريكاتير التحفة
* كرتي وزير الخارجية السابق ما كرتي من كروت ههههه
Post: #8 Title: Re: عمر دفع الله: دي بكم كرت ؟ Author: سيف النصر محي الدين Date: 01-20-2016, 07:57 PM Parent: #6
يا ابو بكر شوف الفيديو ده في ندوة تجمع الامير تركي الفيصل بوزير مخابرات اسرائيلي سابق. رغم تأكيد تركي الفيصل انه لا يشغل اي منصب حكومي و محاولته تصوير كلامه و قبوله للمشاركة في الندوة على انه تصرف فردي لكن الحقيقة أن صاحب سمو ملكي هي وطيفة بدوام كامل في حد ذاتها و ايضا لا اعتقد لو أن مواطنا عاديا جلس في مكانه و تحدث بمثل حديثه كان الأمر سيمر بدون سؤال او مشاكل:
Post: #10 Title: Re: عمر دفع الله: دي بكم كرت ؟ Author: سيف النصر محي الدين Date: 01-20-2016, 08:24 PM Parent: #8
يا ود القوز قد يكون كلامك و كلام ابو بكر صحيح بس لازم تثبت أن ايران هي الدولة الوحيدة في المنطقة التي كانت - ولا تزال- على مواجهة مستمرة مع اسرائيل. عبر حزب الله في لبنان و عبر حماس و الجهاد الاسلامي في غزة و المناطق المحتلة. دي حقيقة لا يمكن القفز عليها اطلاقا.
Post: #11 Title: Re: عمر دفع الله: دي بكم كرت ؟ Author: Mohamed Yassin Khalifa Date: 01-20-2016, 08:49 PM Parent: #10
Post: #12 Title: Re: عمر دفع الله: دي بكم كرت ؟ Author: سيف النصر محي الدين Date: 01-20-2016, 08:56 PM Parent: #11
منورين يا شباب احمد الشيخ و محمد يسن
Post: #13 Title: Re: عمر دفع الله: دي بكم كرت ؟ Author: سيف النصر محي الدين Date: 01-20-2016, 09:02 PM Parent: #12
يا صامت يعلم الله ما داير اتلوم معاك بس في دعبستي في اليوتيوب ما لاقاني مسؤول ايراني جالس كتفا بكتف مع مسؤول اسرائيلي فلو عندك رابط امددنا به رعاك الله. و هذا لا يعني أن لدي اعتراض على الجلوس مع اسرائيليين فهم ليسو مخلوقات فضائية او وحوش بل اولاد تسعة زيهم زينا. المهم تعجبني جراءة تركي الفيصل و احببت جدا تمكنه من التحدث باللغة الانجليزية في عقر دار بني الاصفر ههههههه
Post: #14 Title: Re: عمر دفع الله: دي بكم كرت ؟ Author: احمد الشيخ Date: 01-20-2016, 09:27 PM Parent: #13
امريكا بتجهز ايران لتكون شرطي المنطقة مرة أخرى مثلمان كانت في عهد الشاه وذلك في اطار إعادة ترتيب الأوراق في المنطقة تمهيدا لولادة الشرق الأوسط الجديد والذي كان الربيع العربي وداعش مكونان لمرحلة مخاضه امريكا ستتخلى عن العلاقات الاستراتيجية مع الخليج خصوصا السعودية وتستبدلها بإيران ودلائل ذلك خذلان الخليج في سوريا لصالح حزب الله وايران والسكوت بل التنسيق للتواجد الروسي هناك وخذلان التحالف العربي ضد الحوثيين في اليمن واتفاقية النووي مع ايران ورفع العقوبات عنها وغيرها من الدلائل
Post: #15 Title: Re: عمر دفع الله: دي بكم كرت ؟ Author: جمال ود القوز Date: 01-20-2016, 10:22 PM Parent: #14
Quote: عبر حزب الله في لبنان و عبر حماس و الجهادالاسلامي في غزة و المناطق المحتلة. دي حقيقة لا يمكن القفز عليها اطلاقا.
سيف كيف حالكـ .. الامر ده بتقدر تقرأهو .. في سياق اثبات أن أي عرض درامي .. في حوجة للكثير من أدوار الكومبارس .. ليكتمل المشهد ويكون مقنعا ..
فعلا الرجل متمكن .. والدليل مزجه لثقافات عدة وايراده لحكاية البتاعين في بتاع واحد دي .. ما اظنه محتاج لشرحها بالعربي ..
Post: #16 Title: Re: عمر دفع الله: دي بكم كرت ؟ Author: Mohamed Suleiman Date: 01-20-2016, 10:31 PM Parent: #14
المستنير:
Quote:
ما قدرت أفهم ليش الاسلاميين دافرين البشير يتصالح مع اسرائيل؟
الإجابة في الكاريكاتير: شوف منو القابض علي القرعة ؟
تحياتي يا دكتور سيف .
فعلاً كاريكاتير معبر من إبداعات الأخ عمر دفع الله.
Post: #17 Title: Re: عمر دفع الله: دي بكم كرت ؟ Author: كمال عباس Date: 01-20-2016, 10:49 PM Parent: #16
.......... ويكليس يقول محاولات التطبيع قديمة:-
Quote: وبحسب البرقية التي ارسلت في 29 تموز/يوليو 2008 قال مصطفى اسماعيل لدى لقائه البرتو فرنانديز مسؤول الشؤون الافريقية بالخارجية الامريكية "اذا مضت الامور بصورة جيدة مع الولايات المتحدة، قد تساعدوننا في تسهيل الامور مع اسرائيل الحليف الاقرب لكم في المنطقة".غير ان فشل المفاوضات الثنائية قضى على احتمال المضي في هذا التوجه. وارسلت البرقية عدة اسابيع بعد تعليق الولايات المتحدة مباحثات لتطبيع العلاقات مع السودان جزئيا بسبب الفشل في التوصل الى حل مع جنوب السودان حول منطقة ابيي .
إإسرائيل تعتبر رقما لا يمكن تجاوزه في الشرق الأوسط"!سؤال المليون دولار من صاحب التصريح الأتي .إإسرائيل تعتبر رقما لا يمكن تجاوزه في الشرق الأوسط !! " !1- نتنياهو ـ إجابة غلط2- بيريز - إجابة خطأ إذا من صاحب التصريح في إعلاه ؟ إنه الفتي المعجزة ـ مصطفي عثمان إسماعيل القيادي في المؤتمر الوطني! لاتندهش لا مكان للدهشة في زمن كرتي ومصطفي إسماعيل وغندور! ....... مقتطف خبري
Quote: قيادي بالحزب الحاكم السوداني يعتبر إسرائيل رقما لايمكن تجاوزه الخرطوم ــ العربي الجديد17 يناير 2016أكد القيادي في "حزب المؤتمر الوطني" الحاكم بالسودان، مصطفى عثمان إسماعيل، أن إسرائيل تعتبر رقما لا يمكن تجاوزه في الشرق الأوسط، وأشار لإخضاع ملف العلاقات مع إسرائيل للدراسة مرات عدة. وأيّد القيادي بالحزب ما ذهب إليه وزير الخارجية السوداني، إبراهيم غندور، حول إمكانية دراسة التطبيع مع إسرائيل وعد الأمر مقبولا وطبيعيا، وقال في ندوة بالمركز السوداني للخدمات الصحافية إن الواقع يؤكد أن تل أبيب تزداد قوة في كل يوم بكافة المناحي وهي رقم لا يمكن تجاوزه في الشرق الأوسط.وأكد إسماعيل أن الحكومة ظلت تدرس ملف العلاقة مع إسرائيل من وقت لآخر, .
(سونا) - ......................
Quote: لجنة العلاقات الخارجية تناقش العلاقة مع إسرائيل(سونا) - عقدت لجنة العلاقات الخارجية بمؤتمر الحوار الوطني اجتماعها اليوم برئاسة سارة أبو وناقشت قضية العلاقة مع إسرائيل.وقال إبراهيم سليمان عضو لجنة العلاقات الخارجية في تصريحات صحفية بالمركز الإعلامي للحوار أن الاجتماع شهد مداخلات من 41 شخص داخل اللجنة مبينا أن الاجتماع استمع الي أربعة آراء تمثلت في الدعوة الي تطبيع العلاقة مع اسرائيل ورأي آخر بإقامة علاقات طبيعية معها باعتبارها إحدى دول العالم أو علاقة مشروطة معها فضلا عن رأي يدعو الي عدم إقامة أي علاقة معها وأضاف إبراهيم أن غالبية أعضاء اللجنة يدعمون الرأي القائل بضرورة إقامة علاقات طبيعية مشروطة مع الدولة العبر ية باعتبار أن جامعة الدول العربية تدعم هذا الاتجاه. وقال عضو اللجنة أن القضية لم تحسم بعد مبينا أن النقاش لا زال مستمرا بين الأعضاء .
تشير صحيفة العربي الجديد الي أن الإستقبالات الكبيرة التي حظيت بها السيدة: تراجي مصطفي لم تكن من أجل عيون الحوار الوطني وإنما من أجل عيون إسرائيل وتغزلا في تل أبيب!! صحيفة العربي الجديد
Quote: واعتبر المراقبون أن استقبال الحكومة، خلال الفترة الماضية، لرئيسة جمعية الصداقة مع إسرئيل، تراجي مصطفى، وعقد لقاءات معها على مستوى رئيس الجمهورية، عمر البشير، فضلا عن إشراكها في الحوار، رغم إسقاط الجنسية السودانية عنها بوصفها "خائنة للبلاد" لتأييدها التطبيع مع الكيان الصهيوني، وزيارتها لتل أبيب، بمثابة أولى خطوات التغيير في مواقف الخرطوم من إسرائيل بحيث تقدر السياسية للخرطوم أن عداء إسرائيل كلّفها فاتورة باهظة لأنه يقف حجر عثرة أمام التطبيع مع أميركا. ة .
...........
Post: #18 Title: Re: عمر دفع الله: دي بكم كرت ؟ Author: أبوبكر عباس Date: 01-21-2016, 02:43 AM Parent: #17
يا محمد سليمان، رؤية الكاركتير السياسية تختلف عن رؤيتك للوضع في بوستك بتاع رفع العقوبات عن إيران!!
Post: #19 Title: Re: عمر دفع الله: دي بكم كرت ؟ Author: سيف النصر محي الدين Date: 01-21-2016, 03:22 AM Parent: #17
سلام يا حافظ طبعا بتكون متابع النقاش بتاع تقنين الماريوانا ده في امريكا ما بين مشدد على اضرارها و ما بين متحمس لفوائدها و ما بينهما من اناس لا يرون فيها اضرارا تذكر. المهم ما اظن في براهين طبية قاطعة على ضرر هذه المصيبة Cannabis دراسات تشير لتأثيرها على العملية الادراكية بشكل سلبي و اخرى لم تجد دليلا على هذا و ثالثة تقول بتاثيرها الايجابي على الادراك. مشكلة معظم الدراسات التي اطلعت عليها هي صغر حجم العينة التي تجرى عليها الدراسة و اظن هذا يرجع لصعوبة تجنيد المدمنين الذي يرجع لخوفهم من الوقوع في مشاكل مع القانون او مع مخدميهم و ايضا لوجود محاذير اخلاقية في اعطاء المشاركين في البحث هذه المادة الممنوعة بالقانون و دراسة تأثيرها عليهم. ده بحث درس تأثير الكنابيس على الابداع و لاحظ انو طلع البنقو الكويس يضر بالعملية الابداعية :) :
Quote: Cannabis users often claim that cannabis has the potential to enhance their creativity. Research suggests that aspects of creative performance might be improved when intoxicated with cannabis; however, the evidence is not conclusive. The aim of this study was to investigate the acute effects of cannabis on creativity. We examined the effects of administering a low (5.5 mg delta-9-tetrahydrocannabinol [THC]) or high (22 mg THC) dose of vaporized cannabis vs. placebo on creativity tasks tapping into divergent (Alternate Uses Task) and convergent (Remote Associates Task) thinking, in a population of regular cannabis users. The study used a randomized, double-blind, between-groups design. Participants in the high-dose group (n = 18) displayed significantly worse performance on the divergent thinking task, compared to individuals in both the low-dose (n = 18) and placebo (n = 18) groups. The findings suggest that cannabis with low potency does not have any impact on creativity, while highly potent cannabis actually impairs divergent thinking.
Post: #20 Title: Re: عمر دفع الله: دي بكم كرت ؟ Author: Mohamed Yassin Khalifa Date: 01-21-2016, 04:24 AM Parent: #19
A one man show at New England Medical Center - Boston
Post: #21 Title: Re: عمر دفع الله: دي بكم كرت ؟ Author: MAHJOOP ALI Date: 01-21-2016, 05:06 AM Parent: #20
ياسيف انت الامير تركي خلي [ انور عشقي باقي نجم في الاعلام الاسرائيلي ، ولقايه مع مدير ادارة العلاقات الخارجية الاسرائيلي في واشنطون تلقاه في اليوتوب ، ويقول مبادرة فردية وهو لواء سابق في الجيش ، ليه ماشفته مبادرة فردية في دولة المبادرات الفردية طالب في الاعلام بضرورة وقف الحرب المذهبية السعودية ضد ايران ومن متين كان في السعودية حريات مبادرات فردية ــــــــــــــــــــــــــــ انت ياسيف قاعد في شارلوت ام الكروت دي البلد الشغلة ذاته ، اسال ناس ود الخليفة المخضرمين تلقي قايم بروس في الباك يارد بتاعك وانت ماداري B]
Post: #22 Title: Re: عمر دفع الله: دي بكم كرت ؟ Author: سيف الدين بابكر Date: 01-21-2016, 06:22 PM Parent: #2
يضيف الخبير الإسرائيلي أنه من الطبيعي جدا أن تغير كل دولة مواقفها وإستراتيجيتها حسب مصالحها وهذا ما يفعله السودان حاليا الذي يحاول تحسين وضعه الإقليمي. وعن الموقف الإسرائيلي من تصريحات الغندور يقول بن مناحم "حتى الآن لم يصدر أي رد رسمي ربما لأن الأمر لا يتعلق بقرار بعد وإنما مجرد نقاش. لكن مبدئيا إسرائيل ترحب عادة باعتراف أي دولة عربية بها* منقول من Deutsche Welle
Post: #23 Title: Re: عمر دفع الله: دي بكم كرت ؟ Author: سيف النصر محي الدين Date: 01-21-2016, 07:56 PM Parent: #22
يا محجوب لما كنت في جدة مرة واحد قال لي تعال امش معانا بيت انور عشقي عندنا صالون اسبوعي. قلت ليهو بتتكلموا في شنو؟ قال لي انور عشقي هو البتكلم و نحن بنسمع و بنسأل و نناقش بعد ما ينتهي و الكلام في كل شي سياسة ، دين، فلسفة..الخ. قلت ليهو يا شيخ انا خليني بعيد و انتو سعوديين في بعضكم البدخلني معاكم شنو..و بعدين لو حصلت حاجة بتتخارجوا كلكم و انا بضيع في الرجلين ساكت هههههههه جدة غير و هي لا تخلو من حراك ثقافي مهم . قلت لي البتاع قايم بروس في شارلوت؟ ما عندي فكرة و الله ..شايف لي كم شجيرة شكلها غريب في الباك يارد كدي النسأل الخبرا :)
Post: #24 Title: Re: عمر دفع الله: دي بكم كرت ؟ Author: محمد حيدر المشرف Date: 01-21-2016, 07:58 PM Parent: #23
Quote: الله ما عندي ادنى فكرة عن حكاية الكروت و لم اشاهد في حياتي على الاطلاق عملية لف الكروت دي مشاهدة مباشرة و لم يصادف ابدا أن كنت جلوسا في مكان يلف فيه
آآآلو أول للحرامي إحلف يا عملات عادل امام !!
Post: #25 Title: Re: عمر دفع الله: دي بكم كرت ؟ Author: سيف النصر محي الدين Date: 01-21-2016, 08:08 PM Parent: #24
سلام و شكر لمحمد سليمان و كمال عباس و سيف بابكر و ود المشرف يا مشرف حكايتي دي فعلا غريبة ليه ما ما حصل شفت ناس بسطلوا؟ ياخ كان عندي اصحاب يمين و شمال بس ابدا ما كان فيهم من يمارس هذه الهواية :)
Post: #26 Title: Re: عمر دفع الله: دي بكم كرت ؟ Author: عمر دفع الله Date: 01-26-2016, 03:50 PM Parent: #25
Quote: و الله ما عندي ادنى فكرة عن حكاية الكروت و لم اشاهد في حياتي على الاطلاق عملية لف الكروت دي مشاهدة مباشرة و لم يصادف ابدا أن كنت جلوسا في مكان يلف فيه.
سلام يا سيف النصر وعساك طيب ..
ربما لانك تكتب بشكل تلقائي وبأسلوب بسيط وصادق لذلك تذكرت تجربتي الوحيدة مع البنقو وبالفعل كنت قد نسيتها لسنوات طويلة حتى باتت خارج الوعى . كنت في العطلة الصيفية في ذاك الزمن الجميل وبالتحديد عطلة ما بعد السنة الاولى من مرحلة الثانوى العالى وعادة ما اقضي العطلات المدرسية بالعزوزاب حيث يعيش معظم اهلى واذكر اننى ذهبت مع ابن عمتى - نحن دفعة واصحاب - الى زيارة اهلنا بالثورة وكان ابن عمتى وقريبنا بتاع الثورة من المساطيل المعروفين بين اولاد الاهل وفي ذلك الوقت كان المساطيل يعدون على الاصابع لا كما هو الحال في ايامنا هذى المهم ذهبا ثلاثتنا لمشاهدة ماتش كورة في الميادين بين الثورة ومقابر احمد شرفي . جلسنا على مسافة بعيدة نسبيا من الجماهير ولغشامتي قلت الليلة اجرّب السجارة الخدرا دي . وبعد ما انتهينا وطفيناها لم اشعر بشىء لكن بعد مُدّ بسيطة لاحظت ان هنالك اكثر من كورة بين قدمي اللاعب الذى يعدو امامي .. قلت بإسم الله .. دا شنو دا ! ثم إلتفت الى يمينى لأستمع الى ابن عمتي وكأنه يتحدث معى بميكرفون فقلت له ياخى ماممكن تتكلم براحة شوية ، شرّط اضانا ياخي ، فإنفجر الاثان بالضحك يازول خُفت خوف شديد وقلت ليهم البتاعة دي طارت في راسي اخذونى الى البيت ويبدو ان والدة قريبنا قد فهمت قصتى وعملت لي كوب من العصير واشياء لم اعد اذكرها لكن يبدو انها من المخففات للسطلة وقالت لي بعد ان افقت من سطلتى بعد عدة ساعات : اسمع يا ولدى ما تبارى المطاليق ديل بكرا تبقا مسطول زيهم . وفي اليوم الثاني قال لي ابن عمتى مفسرا ما حدث لي عصر يوم امس :
انت دمك ضعيف ما بيستحمل البنقو . ومن الطرائف التى اذكرها انه اضاف : احسن تشوف ليك حاجة غيرو . اها يا دكتور سيف بالله شوف لينا حاجة غير البنقو تناسب دمنا الضعيف دا ...
سلام تحياتي لضيوفك الكرام
Post: #27 Title: Re: عمر دفع الله: دي بكم كرت ؟ Author: محمد عثمان ابراهيم Date: 01-26-2016, 05:27 PM Parent: #26
..