جواب خجيجي لعبدارحمان ولدها في الدمام !!

08:13 PM Jan, 10 2016 سودانيز اون لاين
ست البنات-
مكتبتى
رابط مختصر
يا عبدارحمان يا ويليدي نحنا اشرولنا للحج خلاص ! دحين لاقينا في جدة فيشان تختلنا شنطنا ديل معاك وتضملي دهيباتي !عيللي ان سعل عن حالنا , حالنا يغني عن سوعالنا يا ويليدي اول شيئ الكركعوبة اللات الغاز الجبتها لينا قاعدي خلا ليها تلاتي شهور !حيكومة السجم مدسدسي مننا الغاز عبدالعظيم ولد حليمي الشغال في الديش قاللي الغاز ولاهو مافي بس داسينوا فيحال يغللو !يسعلني الله الحطب جاء يعمي عيوننا !بس الزول يشد حلتو قبال ما تنجض الحطب يبقى هبود ! اشتهينا القراصة والملاح الحار يا ويليدي .حومد عوسمان ولد فاطني خالتك اشتغل في الأمني مقطمنا الكلمي ! بس ما نفتح خشمنا عيللي يسويلنا :يا جماعة هوي انا حالف القسم ! ان بقيتو نضمتو في الحيكومة بسوقكم عليي التومنة ! دا شغلي واكل عيشي !لمن فاطني أمو حلفتلو وقالتلو ماني عافي منك ان ما مرق من الناس ديل !قالتلو كمان : انت قايلون ديل رجال ! ديل ملاطنين ساكت حايمي فوقنا !!ما اخيرلك تقعد تقرع واطات ابوك وتشوف التميرات الباقياتلنا وشيدرة الجوافة الواحدي الفضلتلنا بعد ما جابوا كراكاتون وحشولنا شدر الجوافة وقلعوا الشتلات فيشان سد السجم دا !!علويي بت ود اب جولة جاها واحدا مغترب ختبا , جابلها يايابا كل شي ! وساقا السعوديي وبعد شهر جات صادي دمعتا فوق وشيها !قدر ما انحايلنا عليها تقولنا السبب بس أبت ضوومة ! أمها مشت لي ولد شيخ الحيران عزمولا وسوولا حجاب ! حتين نضمت !قالت يقوم من الصباح شايل مقشاشتو يقولها ماشي الشغل ! أتاريهو عد يقش في الشوارع !انت ا عبدارحمان دحين هي ماها دكتورة ؟؟ انا زمان ما قوتلك اختبا عيللي انت قلتلي متفلسفي وشايلي نخرتا خاتاها فوق جبهتا ! أها اسع بس يبقالي جبهتا من نخرتا اسع بس بقت ماها فارزاهن !! شفت الزمن دا كيفنو ؟!تك الغنمايي بالمرض اليخمك ! اكلت البرش ! الجوع اليكايتكن ! يا عبدارحمان القش زاتو بس بقى بالشي والشيويي ! غلبنا ناكل رقبتنا لامن الغنم ! بس بارك الله فيهن تراهن جايبات شيخيبة الليبيني لي شاي الصباح !أماني يا ويليدي ماني حزناني على العبور اللاتي الراحت ! سرقوها ! زمان ما كانت في سرقي شي ضوومة !ناس مسكة قالنلي اليومين ديل في ناس اغراب جابوهن ناس القشورة سكنوهون في الحيلي أغراب ونضمون كوتور !بلا البارح ماشي دكان عطا الله اجيبلي ظهرة لهدوم ابوك الشربن بحش القش لااقاني واحدن سمين وطويل ميتل اللمين الاطرش داك عاينلي بيقعر عينو لامن كوت جايي اقع على وشيي ! قوت لي عطا الله انت دا هوول منو ؟ قاللي ديل جايبنهون ناس القشورة فيحال يكتتلوا وليدات الناس ان مرقوا يهتفوا ضد القشير !أها حومد عسمان يي داك الجايي ! اسع يشبكني انا حالف القسم ودا شغلي ! قوتلك ا عبدالرحمان أنا عافي منك ومحلليلالك لبن شطري يا ويليدي ! تراك جاي تودينا للحج انا وابوك !رب العالمين يغتيك وشاحدي ربي حافظ الطيرة لامن تفققع وتطير , وحافظ المي في البير , وحافظ علي من الكافرين يحفظك في قبة حديد راسا في السموات وكرعيها في الأراضي بقدرة اليالطيف يا لطيف.
أمك السيدة بت ود العجل الحسونابي (خجيجي).

مساء الخير أختنا ست البنات
صحي إنتي غاتسي في القاطوع دا قاعدة تسوي في شنو
ناس الامن الله يكفينا شرهم
تحياتنا

ابداع والله يا ست البنات
ابداع

أخوي أحمد عز الدين مرحب ,

القاطوع فيهو الهمبريب وغنيماتي جنبي وحوقتي ملاني تمباك !!

عيللي الشاي راميني البيت عدمان الفحمايي !!

كتر خيرك علي الجيي .

ست البنات.

أخوي عبدالحفيض اب سن ,نعلك طيب ؟أنا عارفي جنس النضم دا بيجبك واسع كمان يجيب طارق ود عمي جبرين ,شايفاهو عند شيتن يقولولوا الفيس بوك يسحر للبطان في اكلون ويوصف فيهو !شي جعارين وشي جوروم ! الجنا دا بس ضوومة ماب يعرف اكل ناس فوق دا !ظنيتو داير يخلي القراصة والويكي والسبروق فيشان ينشلم ملا دا !!مشيت تاوقلو بلا فجخ حوقتي ودفق صعوطي !!شكرا ليك.ست البنات.

نسيتلي شي ما قوتوا ليك :

جابونا راجلا سمين كدي منفوخ عيللي تور ناس جدي ود ميرغني باعلو واطا من ود الهجيني وكت ولدو قيبلوا في الجامعي وكان ما عندهون حق القرايي !!وبقى يزح شيويي شيويي علي واطاتنا !
وكت سعلناهو قالولنا دا من ناس الأمني جابتو القيشورة فيحال يراغب الناس ونيجسس عليهون !
نان وكت من ناس الأمني بايعلو واطا ليشنو ؟؟ داير يعشعش بيناتنا لا ميتين !!
شفت يا عبدارحمان الناس ديل خبايسون ! جنس سواتون دي ما شفناها عند الانقليس وكت كانوا حاكمين البلد !!
بس كانوا شيويي رعوفين بالناس !!

أمك خجيجي بت ود العجل الحسونابيي.

سلامات ست البنات
ياسلااااام علي جوابات زمان وكلام زمان
هسي الحكاية ماخربت تب واتساب وفيس
رسالة في دقيقة تكفيك من جواب طويل عريض
الحنية الزمان دي مع تطور وسائل الاتصال اصبحت
قليلة شديد لكن في ناس زي خجيجي دي مازالو محتفظين
بس ان شاء الله خجيجي جبتو ليها التلفون الهبش
هههههه البغشو بالاصبع
تسلمي اخت ست البنات

الشفيفي ست البنات دائما تاتين بالجميل المدهش فهذا الحكي الطاعم افتقدناه منذ امد بعيييييد وهذه السماحة والبساطه اصبحت غير موجوده في مجتمعنا الذي اصبح يعاني التشتت والانحدار واللهث وراء متطلبات الحياة التي اصبحت بالكاد تكون ما يعين على حياة يوم واحد فقط ..
على العموم شاكر ومقدر لك هذا الكلام الجميل الذي اعادنا سنين ضوئية عديدة ,, وهيهات يعود الكان ولى وما اظنو يعود الكان ولى ...


تحياتي : ياسر العيلفون ....

ستو الحبيبه كيفك

لما وصلت دعاء خجيجي ضحكت واتذكرت الوالده عليها الرحمة

كانت تكره المستشفيات والادوية مرة اخواني اقنعوها تعمل عملية المرارة وقالوا ليها تتعمل بالمنظار وبسيطة
بعد جهزوها ودخلت غرقة العملية طلعوها من دون تعملها ,سألت الحاصل شنو رد اخوي تتعمل كيف وانتي الليل كلو
تدعي قبة حديد
ما خلاص تربستيها

يا سلام يا ستو
حكي بطعم طين جروف ونكهة الحرجل والحمريب

يا ريت تقرطيلنا على كدا

سيبك من كلام الجرايد

عبري لنا بلسان هؤلاء الغلابا

وتسلمي

Quote: أمك السيدة بت ود العجل الحسونابي (خجيجي).

والله خجيجي دعوتا كاربة .. جواب جميل بلغه البلد

سلام عليكم جميع ,

واسمحوا لي أرد أولا على الحبيبة اخلاص ,

لما في تداخلها مما مس شفا القلب !!

يا اخلاص يا خية هذه نفسها دعوات امي عند كل صلاة لذلك حفظتها عنها ( الله يرحمها ويرحم وادتك وجميع موتانا).

ست البنوت .. كيفيك يااا حبيبي قسم مشتاقة
لكي ضربتك امبارح يا المسنوحي علي مو رفعتي
التلفون علك طيبي يا المسنوحي ..

هههههههههههههههههه شفتي كيف كلام شوايقة بمساختو كمان .

يا جماعة كمان اسمحولي الرد علي منى اخيتي:سلام يا الحبيبة , يطرشني ما سمع تلفونك !انا ما رسلك في الخرابة الاسمو الواتساب دا !اساميا متل اسامي الشواطين بس ماب يتحفظن شي الله يقلعن !!ما ترسليلي جواب مو اخير يا منى ؟؟اكتبلك علواني في البلد جنم سبيقة السرير وتحت لا عند بيوت ناس دو دكام وقصاد المترة اللت ابوي حسين ود كروم بتلقيلك بوطان يلعبو في الطاب تحت الحرازي قوليلون بيت ست البنات وينو !!بيركبوك فوق حمارة أبوي كمبال البيضاء ويمشوبيك لامن تجي عند الدومات التلاتي القبال الحدادييد , وقبال دا بتجو بام سبيب والشاماب وتلاقي سوق تنقاسي وتشوفي شوالات التمور وتشوفي القرفتن والمنقة يا سماحتن !اها مو ساهل ؟؟ لا تجيني فاضي شي بيعيلك منقايات وقرفتن جيبيهن معاك ! ورغايفا حارات النتغدابن سوا !!
ست البنات.

أخوي سليمان القرشي حبابك ,

خجيجي ماها دايرالا تلفون ! فيحال ود اختها الفي الامني فيشان مستفيد !!! عد يجيبلها الليلو وكت عبدارحمان يدور ينضم معاها !
وكمان مرة مرة عد يبيعلها الرصيد ( قروشو مو كتيري) قوتلك في الامني ومستفيد !!
ست البنات.

يا خيتي ... ماني مكضبه عليكي علا كنت مشغولي ..

والله الشئ البقشو دا زي ما قال النشمي ود البوش كجنتو زي الحيكومة

وقت علا اجدعو .. يا ست البنات يا خيتي .

اخوي ياسر العيلفون,

حبابك,

نان جنس نضمنا دا باقيلك الناس بيخلو كيفن؟؟

اسع عليك روسل الله ماهو مفهوم مالا ناس( زي ماشين - وزي نقوم - وكمان حكمة الله الناس بقت تبدا النضم بي يلا !!! سمع اضاني دكتور سعلوهو من دوي لمرض بدا كلامو بي: يلا ) !!

حسبي في عجبي !! بيس !! الناس قربوا يبقوا عجم يا كافي البلا !!

مو اخير نرجع لينضم اهلنا ؟!

ست البنات.

يا اخواني انا فتر !

ما تخلوني يا الحيبان ارد عليكون باكر ,

باقي الزمن هيني مشلوم وماهو ميتل الليلكون !!

ست البنات.

يا عبدارحمان يا ويليدي باقيلي ويليد فاطني خالتك الفي الأمني دا لقى الجواب الكاتبا ليك دا وقراهو ! جاء قاللي يا خالتي لا تقولي جنس الكلام دا لعبدارحمان ! قوتلو ميتل شنو ؟ قاللي لا تشنفي الحيكومة وتقولي حالنا يغني عن سوعالنا ! قوتلو نان عاد كيضيب ؟ مو صيح؟؟
كدي شوف الناس الفي الدروب ديل ما عد تعاينلهون ؟ الناس بقوا يمشوا بيروسيهون يسعلني الله تعاين للواحد فيهون بلا السينينات ما تشوفلك شيئ ! وكان للبيطينيين السوغار بس عيدموا العافي الواحد فيهم بقى ما يقدر يمشي لحوليني اتنين !
الاحدسك يا عبدارحمان باقي ويليد فاطني دا عد يشرب الشي داك الفي القزاز !
يوم الجيمعي جوهو ناسن كدي مموشنيين قاللي ديل معاي في الشغل - الأمني يعني , حس قزازون يطرقع الليل كلو للنباه ! ميي قالوا مندينيين ! سوب فوقون بس بلا الدقون والقفاطين ماني شايفالي شي!
الصباح عيللي كورك للشافعي بت ريقيي قوتلها جيبيلك كرتونة خوميي فيها القزاز دا لا يجيبلنا النبيشي !
انا بس ما كوت بعرفو دا الشي داك ! عيللي بينية ريقيي وقعتلها فوك قيلمة ساسويي وجرحت ايدها قمت سوقتها للحكيم قوتلو البنيي دي الجرحة الفيي ايدا دي غريقي شديد , قاللي لا تخافي شي فيشان الساسويي الجرحتا من قزازي كان فيها الشي داك , وقاللي الشي دا بس ماب يخللي الجرح ينتهب ضوومة .
اتاريهو ويليد خالتك دا خولقو ضيييق فيشان عد يشرب الشي الخرابا دا !
ويومو داك سعديي جارتنا دي كانت موقيللي عيونا فييو , وكت فات قوتلها مالك عازيي عيونك في الجنا كدي؟
قالتلي ما شوفتي ايديهو يرجفن كيفن ؟ الجنا دا ماهو نصيح ! قوتلها هون اللاميهون زاتون نصاح ؟؟ كولهون ميتلو كدي الواحد فيهون ينضم معاك ميتل المهجوم ! دا اللارو حق وليدات الناس الكتتلوهون والقعد يعذبوا فيهون , زكمان في ويحيدي خاتفنهون أماتون عيانات بالهجمة . عليك النبي الناس ديل ماب يخافوا رب العالمين ولاب يطروا الشيبير داك لاب يخجلوا ضوومة ؟؟ حسبي في عجبي ! رب العالمين يقلعون من فوقنا يريح وليدات الناس من شرهون !
لا باكر بتمالك باقي الجواب دا يا عبدارحمان.
أمك خجيجي.

أول البارح بت ريقيي البتقرا في الجامعيي دي قالتلي : خالتي خديجة ما تجي تمشي معاي للجامعة مارقين مظاهرة باكر وانتي شكلك كدا يا خالة مسيسة وعارفي كل شي !!
قوتلها : أولا بالتبادي لا تخربيلي اسمي شي ! انا اهلي وكت ضبحوا وسموني - سموني خجيجي !
وتانيا : مالي ببيرا البوطان في المظاهره ان ضكوني بي حضنقال قدوولي عيني ! بس اقول شينو ؟
ولا انتي جايي تفشللي عليي مشي الحج ؟ شوف قلة ادب البت دي وهنكرتا ! والله ياهو !
عيتمان .. عيتمان يا ولد تعال امشي جيبلي تمباك بي قرش ونص قوامك , اها البزاق دا ما ييبس انت تجي صاد !
أصلو التمباك يا حيليلو أفرقنا تاني ! باقي قالوا الزول ان بقى حجا يحرم عليهو التمباك حرام مكة علي الكفار !!

أمك خجيجي.

يا سلام علي حكي الشوايقة السمح
ذكرتيني بت عمي أخدا واحد ظنيتو من أهلكن ناس تنقاسي
لمن تجينا في البلد النسوان في الحلة إقولن
بت البشير حديسا بقي كتر
واصلي الجميع مستمتع
_____
الحليلة

المغرب راجعين من حش القش لي بهايمنا انا وفطني اختي , لاقننا حريم لابساتلهن شرارييب عيللي ضكر الحمام في كيرعيهين !
وسواتنلهن دلوق سوداء مغتغتاتنبهن اصابع ايديهن وايديهن - وصايداتننا : السلام عليكم - السلام عليكم , ويمشن خابات عيللي الرجال !
فاطني اختي قالتلي : انتي أ خجيجي ديل يبقى من الجهديي تاني جونا !! الحريم مالن بقن عيللي الرجال يسوون : السلام عليكم - السلام عليكم ؟؟
متين الحريم عد يقولن كدي يا خجيجي اختي؟؟
قتلها : نان يقولن شينو؟؟
قالتلي : ما يقولن : مرحب حبابكن !! اوالي اهلنا مو علمونا وكانوا يقولوا كدي؟؟
قوتلها ديل يبقا تبع الحيكومة , الرجال ساووين الدقون والحريم لاابسات الشرارييب والدلووق دل في ايديهن ! أماني ماهون كضابيين !
يقولوا ناس القبور سووا الطابور !
كدي شوفي سد السجم دا السوو في مروي دحين منو فايدي ؟ اسع شوفتيلك فريد كهربا دخلتلنا شي ؟؟
بلا جابلنا المرض مع الجقور الحفرن واندفنن تحتو يمرقن بعدين ياكلنلنا القنقر !
اسع جنس الناس القصار الجابوهن مع سد السجم دا عيللي كيرعين بنبر عمتي مسسك اليمن ! الزول ان بقيتي عاينتيلو تحلفي تقولي نايم ! من شدة عيويناتون ماها غاتسي وسوغويري بس مابعرفون قعد يعاينوبين كيفن !
والآ جيزيماتزون عيللي نعليين البوطان السوغار !
الزول تلقي راسو شايب وكريعاتو سوغويرات ! كمان قالوا اخدولون حريم من حريمنا !!
شفتي المحن كيفيناها ؟؟ اسع \يل ينضومن معاهون كيفين ؟؟ الحريم جنن وحات ربي !!

لا باكر تاني بتمالك يا عبدارحمان .

أمك خجيجي.

سلام أخوي الحليلة ,

مشكور ,

وبت عمك دي سعيدي السكنت في تنقاسي !

عليك امشي مرة زورا فيشان تشوف اهلنا سمحين كيفن .
وتاكلك حريفا حار بالسبروق وحبة دفيقات وترمس ,

تاني ماب تصد منها ضوومة !!

ست البنات.

Dafaallah Ahmed Al Jaali · Dammam, Saudi Arabia
اختنا ست البنات لاحدهن الاصيلة المشاعر راحت يوم راحت الجوابات دى كل شئ صار بلا طعم عزاؤنا الوحيد انه ناس زيكم بكتب عن زمن جميل ودمتى
أعجبني · رد · 11 يناير، 2016 09:36 مساءً

مشكور اخي دفع الله .

ست البنات.

والله يا ست البنات وست الرجال
البوست دا متابعو من قومتو
بمتعة فاقت حد الوصف والدهشة
وعلي الليمان والرحمن قدر ما حاولت اعبر عن دهشتي لهذه الكتابة الحية
غلبني كلو كلو
والان تداخلت فقط عشان اعبر عن عجزي التام لوصف هذا الابداع
شكرا ستنا الغالية

أخوي ود البوش حبابك,

الرسول ان ما قلت الفي بالك !
وكدي قول الوصف الجاء في بالك ,
يعني اكنو انت كمان بيغلبك الوصف!!
ولا ما عندك محبرة !!

اكتب ان شالله بي قلم كوبيا !!

ست البنات.

يقول احد الاصدقاء انه اتصل بوالدته الصباح ودار بينهم مايلى

الكان سعلت من البلد البلد بقت كعبى والخرابين ديل شاحد الله يورينا فيهم يوما اسود من سواد الدوكى

يمه انت بقيتى شيوعيه

اى شيوعيه ، اى شيوعيه عاد لا سمعنابم سرقوا لا نهبوا

انت القال لك منو

هى السود على مالى طرشانه ولا عميانه ولا غبيانى

العفو يمه بس

ياولد الشيوعين فطن بلدنا والخرابين فطن بلدنا فى

هسع انت وسط اخولك الاتنين ماعندك الشيوعى وبدقينى
ها البيجى بالباص يقصنى منو وانت وقت درسلى القريشات عاد ترسل مع منو


ست البنات لمن يحكيه صديقنا من فمه
صادقه وتوريك ان معايرهم الاخلاقيه
اهتزت وسط اكثر الناس صدقا ووحدانيه
بعد تجربتهم الفاسده التى قضت على تركيبة
البلد وقضت حتى على امال العشم فى اى تنميه

Quote: اها البزاق دا ما ييبس انت تجي صاد !

موقف لم أشاهده منذ اكثر من اربعين عاماً
تحياتي أختي الكريمة

أخوي عمر دهب ,

سلام ومرحب,
نان عاد سواد الدوكي باقيلك ماهو أبيض شيويي من الشواطين ديل ؟
وحات ربي أم صاحبك دي نجيضي نجاضتن !
الناس كولهون عارفين الناس ديل كعبيين ضوومة !
عيللي بس طالقين كلابون السعرانات ديل ملجمينبهون خشوم الناس !
شاحدي ربي يقبل دعوات أم صاحبك دا ويزقنفون من وشينا دا ,
وتاني ما يعرض علينا واحدن ميتيلون لامن نموت !
هون ديل بشر ؟!
يسعللني الله ديل ابليس ذات نفسو عيللي يقيف مقللع عيونو من فعايلون !
رب العالمين يكنكنش ايدياتون المكنكيشي في الكراسي دي وييبسا ليهون
النشوفون تاني يكنكيشوا بي شينو !
عاد عيللي يعضوها بي سينيناتون لامن ينحتحتينلهون يقعن في بطن الواطا !
قاعدين يبللعوا في حقوقنا رب العالمين يجيبلهون تماسيح تجغمون ونلقطون واحد واحد !
ماك شايفون حتى خلقون شيني ومعشكبين وقاطعين الهيعي عيللي السحاحير وقت يجيبوهون في الشي الاسمو التلفزيون !
يكونوا قاعدين في قاقة الصداقي ساويين دوقونون ونايمين !
عاشة اختي بس أوال ما تشوفون تسدو وتقولهون سوب عليكون يا البعاشيم !

ملحوظة: أغلب النسوان كبيرات السن يقولن لقاعة الصداقة : القاقة !!

ست البنات.

Quote: !تك الغنمايي بالمرض اليخمك ! اكلت البرش ! الجوع اليكايتكن

النبي عزيز وكريم يا ستنا لكن اسع عليك النبي جنس نضميك الشلت منو الحتيتة دي
غير كاميرة ديجتال بقدر زول عادي ساهي بختها قدامنا صورة متل دي ؟
دا اياهو الحيرني وبكمني وخلاني عاجز عن التعبير
دا نوع الكتابة البي روحها حية عينك عينك
تخليك تشوف شوف العين
يسلم قلمك المبدع دايما
تحياتي واحترامي المعلوم لديك

ناس الروضة والنعيمي اترايم فوقن الدونكا من هزهيز المكنات البيحفرن في سد السجم عامناول !
مشن اشتكن للبيقولولو المجلس في صنب , قالولن تجن يوم التلاتا !
أها يوم التلاتا دا سوق تنقاسي وهن عد يفرشن فييو يلقطن رزقن ورزق بوطانن !
عاد يوهدبن رقبتن ويمشن لي صنب فيحال يشولتن كل تلاتة لا متين ؟؟
مشن لي ودحومد صالح قالنلو تعال احفرنا بير اللات مستراح جديدي ,
جاب حديدو وجاء يطقطق ويحفر من النباه !
يعني شاي الصباح وفطورو وشاي الضحي كلو عليهن !
الروضة قامت فتحتو الكلب بالكوشر وسعلتو قالتلو : شيرب ولا اسوويلك شاي ؟
قالها : شوفتيلك زولا شربلو شاي من النباه ؟ كيبيلي احمر واعقبي بالليل اللبن ,
واكان عندك حيريف ولا فطيريي جيبيهن مع الشاي !
النعيمي سمعتو ينضم قامت بيشوييش وقفت عند القاطوع تنصنت !
وأوال ما الروضة جات صادي للقاطوع قالتلها: اسع الريويجل دا بس جايي يرمي حيملو فوقنا لامتين ؟؟
وحات ربي البير دي يبقى للحول ما تتم !! مو كان اخيرلنا نشيل صنب يبقى كانو ادونا تعويض !!
الروضة جابتلو الشاي بلا لقتو قالب الدكي اللات سروالو يفللي فيها !
انهجمت وصدت لاوراء وقالتلو : انت يا حومد صالح جنيت ولا خررف؟؟
دا شينو البتسووي فييو دا ؟ اسع ضوفورك ديلا تاني توديهن ويين بدمهن دا ؟
نحنا بس البير سوب فوقا مانا دايرنها , خرابا البير !!

امك خجيجي .

Quote: قالها : شوفتيلك زولا شربلو شاي من النباه ؟ كيبيلي احمر واعقبي بالليل اللبن , واكان عندك حيريف ولا فطيريي جيبيهن مع الشاي !

ستو لى حدهن كتابة طاعمة وحالتك بت بنادر

أخوي أحمد حمودي مرحببك,

انا حالتي مرق من البلد عمري 3 سنوات !
بس ماب اعرف أكان قعد مالا دا كوت كتب شينو !!
عيللي دا كلو من مخزونات الذاكرة الحديد ( قل هو الله أحد)

مشكور أخوي على الجيي بي هيني .

ست البنات.

روحيتى مشحتفة فى رد عبدارحمان يا ست البنات اخيتى
خسيمك النبى كان ما جبتى و قريتى لينا
باقى الحنين كاتلو ؤ كاتلنا

النعيمي بعد ما انصنتت وشافت حومد صالح مرق يهرج ويقول :
انتن حريم مطرطشات ! جايباتني من النباه فيشان تطوردنني !!
الزول ان بقى فللا سروالو مالو ؟ جاء يسوويلكن أشينو أكنو ؟؟
الله ان شاء الله البيت كلو يترايم فوقكن فيشان الحيللي ترتاح منكن يا البايرات وشينات!
النعيمي طقت الورورووك ! واسيجيمتي يا الروضة أخيتي اسمعي الريويجل دا عد ينابز فينا !
الروضة لحقتو بالكوشر وفلقتو في راسو , وقالتلو :
نان انت مسووي ريويسك المدوقس عيللي حجر المسحاني أكنك قايل رقبتك راجل مع الرجال !؟
أسع باقيلك ان كوت جيت تاخدني قايلني برضابك ! مادي كشرك عيللي البعشوم كدي !
توب دبيتك بالله ساووي كرعيك المراجلات ديل وراسك العدمان الصوفايي !
اسع ما عندك روقابة شي تشوفبها عيويناتك العيللي قدود الجلد ديل ؟
أمانتن في ضوميتك وكت العافي عمتي قالتلك ارفعلي صفيحة الموية فوق الويقايي ما غلبك ترفعها؟؟
أخيرلك تزول من وشيي دا قبال ما اكوركلك ليي عباس أخوي يوريك الادب !

أمك خجيجي .

Quote: روقابة

الرقّابة
امنت بالله
دى نكتيها من وين دى
يمين الله البوست ده خلّا ناس كتار قاعدين فى الخلا
الشرح يا ستهم و خاسة الكلمة و معناها
عشان فى ناس كتار راكبين اللورى التخشيبة

والله يا جلادونا انا قريت مداخلتك دي قبل ساعة !

لكن الضحك أحماني أرد عليك !!

وتاني ماني قادري اكتب ضوومة !

قلبي وجعني من الضحك !!!

ههههههههههههههههههههههههه

ست البنات.

انت يا الروضة اخيتي الريويجل الطردتي دا لا يبقى مع الناس ديل يغتس حجرنا !!
انت يا النعيمة أختي باقي نيي وعويريي وطيره ضوومة !!
ناس شينو المعاهون الزهمول دا ؟ ديلك ناس بي ديقونون وقفاطينون وعربياتون وشبعانيين !
أيي شبعانيين ! مو ماكلين حق الناس ؟
اسع شوفتيلك الشي البقولولو البترول دا من يوم هللوا فوقنا ,
وقالوا مرقوهو من بطن الواطا دي دحين فد بولالة سمعتيبها جابوها وروها للناس ؟؟
مي يبيعوا فييو ويكبوا في جيوبون !
وكمان ديلك عندهم الشي البينضوموبو الاسمو البوبايل , اسع الرويجل دا بس بيعرف ينضمبو ؟
هو رييسون زاتو خلا بلدو اللافوق ديك هو واهلو وجو قعدوا في الخرتوم وسوولون كرييقا في
بوكانن يقولوا كنفوري وقالوا منعوا اي زول يبني جنبهون !
قالولك بس الواحد يجي من بلدون ديك بي فرد جلابيي وبعد يومين اتنين اكان يشوفوهو
لابس القفاطين وراكبلو عربيي بالشي الفلاني !
واصلون ما عندهون شغل شي ! بس منطلقين بي عربياتون يخوفوا في الناس
يقولولون نحنا ولاد أعم الرييس !
وسعاد المدرسة الفي الحاج يوسف قالت لي : يحوموا في السوق والناس يطولقولون الدرب !
والبيبيعوا في بضايعون يرمولون منها في عربياتون فيحال خايفين منهون !
يا عبد ارحمان يا ويليدي ان بقى نضمي دا بيضورك قوللي !
قالوا في واحدي من القرير نضمت ميتل نضمي دا لي وليدا
انكاوشوهو اول ما وصل الميطار ووروهو الجوابات اللات امو وحبسوا ولا ودوهو وين
بس مافي زولن عارفو تم حولين لامن امو عمت بالبيكي عليهو !

أمك خجيجي.

يا عبدارحمان وليدي قالوا في واحدي اسمها جداد قالت هي مرت الرييس ,
بس البيسافر كلو يلاقيها في الطيارة شايلي مارقي وشايلي داخلي !
قالوا غنياني غنى شديد خلاس !
ووكت تجي في الميطار الموظفين الليليين الميطار ديل يقيفولا على فد كراع !
واكان ليي شنطها زول بيفتحلوا واحدي منهن مافي ! بس بي صماتن يدخلوهن ليها في العربيات
يبقى تماني ولا تسعي عربيات ! وهي تنههر فيهون وتنتر ميتل الاسد !
نان باقيلك فيهون واحد بيفتح خشمو البياكل الويكي ! بس أها !!!
رجال بي ديقونون يدنقروا ويدندنوا عيللي النعجي قداما وهي تسويلون في شيل - وقوام - وامشي !
حسبي في عجبي ! دحين ما لقتلها وليان يلفخها فوق شيدوقا ديل فيحال تنأدب ؟
هي قالوا بس عرسوها فوق واحدي !
أها نسيت اقولك ان بيقيت لقيتلك حطبات طلح ضومهن لي لامن اجي الرطوبة كنكشت كيرعيي يا ويليدي!

باقي هيني الطلح سوولوا عتب ! ومنعوا الحني كمان ! اسع بت سعاد راجلها طلقها قال ايديها بويوض ميتل التلميذة !
لاب تنحنن, والطلح بقى زي ما قوتلك فوقو العتب ! اها الكان بي ميي بقى بي ميتين ويمكن زيادي !
يا ويليدي انا عافي منك لا تنسى المرقة البيتطعم الملاح شي باقي اللحم بقى غالي بس جنبو ماب نمشي .
عيللي الموية بحدسك بيها باكر.

أمك خجيجي.

عبد ارحمان جاياك للموية ,

عيللي اساعيتي ناس فاطني اختي لقنلهن حبة واقود عاسنبو حريف قراصة
جايات ياكلينو بالسبروق وقالنلي تعالي انغدي معانا
باقي الزمن دا البيلقالو تريمة يملابا خشمو يطولو شبرين من الفرحه
الاكل مو بقى قاسي ! الناس ديل نشفوا البلد وحرموا الناس من كل شي ! شكيناهون لرب العالمين ,
أكان خلوا الناس مدندنيين عيللي سيد الرايحي ! الزول تنضم معاهو لامن تتم نضمك , يقولك قلت شينو ؟!
الناس بقوا زي البدران داك الدرويش الاوالي في البلد البيشيل نعليي فوق راسو ويمسكلو عويشايي في ايدو يتهبببها !
البارح الشي العيللي الجعران دي اسمها الركشة تندردق بلا عقرب الجمال في الشارع قرربت تطا كراعي ورمتني تحتها
لامن قوت خلاس الانشهد ياهو الموت جاء يجغمني قبال ما احج !!
أمك خجيجي.

ههههههههههههههههههههههههههههههههههههههههههههههههه



لي ساعي بدور ارد
الا الضحك غالبني

ابداع الابداع ذاتووو
شغل رهيب

ده مسرح كامل



تسلمي كتير

أخوي عبدالعزيز عيسى ,

مرحب,

ضحكني تعليق جلادونا ,
وانا زاتي لما راجعت الكلام والرقابة الضحك غلبني شديد,
اسع بقيت شايلي هم الناس البيقروا كلامي دا !!

ست البنات.

عبدارحمان يا ويليدي ,
أها جيتك للموية وعمايلا !
مويتنا بقت عيللي البقنيي !
يسعلني الله حمرا ميتل موية المسسار الليل الدوم !
وماب تشبه بلا موية الهدوم الوسخانات المعطونات في الطين !
اسع دي يشربوها كيفن ؟؟
يا ويليدي الناس بقن عليهون جوع وعطش !
شكيناهون علي الا نام لا اكل الطعام !
يوم الحق داكا يوم نقيف قدامو بلا هدوم ويسعل كل واحدن فينا من عملو !
الساعة ديكا بيعرفوا الله حق ويندموا علي السوو فوقنا وفوق وليداتنا !
واماني ماب ينفضحوا قدام الخلوق !
واحدا كدي مقللع عويناتو قالوا مسعول جايي يحدسنا عن الموية ,
قعد يلولو في الحديس وشي كضب وشي فلقصة , وكلامو زاتو كوتور !
قال الموية نضيفي وسمحي !
نحنا عارفين الحاصل هون قايليننا غبيانيين !
البوطان قالوا الانجليس قالوا ليي ناسون لا تشربوها وحظظروهون بس ما يدخلو ايدون فيها !
قالوا بتجيبلها مرضن يبدا بي وجع بطون ولواية وشييط , اسمو ام كرور ( كوليرا).
وقالوا الزول بس يشييط فوق هدومو قببال ما يلحق يصل المستراح !
كافي البلا يايابا من جنس دا !! نان الزول حاكا البيطينيين السوغار !!
عيللي مو قالوا المرض سلطان !
أها الانجليس قالوا موية الأبيار البتشرب منها البلد علي تيماها منخلتي بموية المستراحات !
هو يا يا يابا الحيكومة السجماني دي ان سوتلنا مستراحات ميتل اللات السعوديي ديك مالا !
والله عامناول وكت جيناكون داك انا بس استغرب من مستراحاتكون النضيفيالبيضا ميتل الصيني ديك !
بس الزول ياخد راحتو , لا يخاف البير تنهبركبو لا يخاف زول يجيهو داقس لا يعذب رقبتو بالنحنيح !!
الزول يقعد فيهو منطمين وبابو مسدود عليهو !
انت عارف يا ويليدي الحيكومة دي ماها دايري تصرف القريشات فوق دا ! دايري تكبها في جيوبها يستفيدو منهن هون براهون !
مالون علينا ومال راحتنا ! يقولوا الناس اريتون ما ارتاحوا !!
عيللي نحنا هيني في البلد بس نرد مويتنا لي اسع بالصفيحي فوق راسنا ,
ونجي نسوويلا الرواق !
عيللي وكت نسوويبا الشاي يبقى شيويي مر لا عندو طعم لا لهج !
والله يا ويليدي بس اشتهينا الشاي السمح !
عيللي البرود مانا صرمانيين فييو ! بس ان مشينا للبحر عد ننبررد ,
نحرس الناس لامن يحوشوا قشوشون ويصدوا لي بيوتون ,
وننزل انا وناس فاطني اختي والنعيمي واحدي تنبررد والتانيات يحرسنلها ان بقى جاء زول شي والآ
ان بقى شفنالنا تمساحن جايي عليي القيفة نزغردلها تجي خابي تمرق .

أمك خجيجي.

سعلت فتحيي بت الهميم انتي عرسولك ود التاج كيفن ؟
قالتلي هو كان كل يوم يزازي جنب السام الليلنا ويرجاني لامن امشي البير ارد واجي صادي !
كوت قايلا مو نصيح ! فيشان بشوفو يقعد في ضل السام ويلوج في فد بيكيين ميتل اتكنو صايدو شي !
هو اتاري عد يريدني ويحرسني وكت امرق اكنو يعايينلي !!
أها جانا يوم لابسلو عراقي وسروال ماهن نضاف بالحيل شي !
وقال لابوي أنا داير فتحيي بتك ! عمي الجايي من الماني كان قاعد , نط قالو انت سعلتها هي بالاول شي ؟
قللع عيونو جاي وجاي , وعاين لابوي - ابوي دنقر منو فيشان لا ينحدس بدلو , وشفتو كمان بالطاقة ابوي غاتي خشمو والضحك عاصرو !
قام ولد التاج قال ليي عمي : لع ما سعلتها شي ! نان اسعليي مرة اقولها داير اعرسك ؟ انت بي صحك ؟
نحنا نقول لوليي امرها ان بقا مضضاها لينا خلاس هو براهو لاعوقبان بيحدس بتتو ويقولها فيلان جاء نضم فيك !
انت اكنك جايي من الماني نسيت الاصول اللتنا ولا شينو؟
والميغيرب كدي ابوي جاء كورك لامي وكت جابتلو الشاي الليل المغرب وهون يشربوا في شايون
قالها ولد التاج دا جاء نضم في البت دي ودحين انا مضضيتا ليهو .
أمي بس كضمت وقلبها تبلع جغمة الشاي الفي خشمها وجاتا عشراقة وقامت من جنب ابوي تقح !
وغشت الجر شربتلها موية شيويي وصدت لابوي قالتلو : دحين انت بي صحك ؟ جايي تقروننا في ناس التاج ديل ؟
قالها : مالون ؟ مو ترا الولد بي تمرو وطينو ! وهو وابو عد يصلوا معانا في الزاوية !
يا حاجي قول بسم الله وخلي البت تعرس وتمشي لي بيتا دوبننا حيين !
حتين امي ضحكت وقالتلو والله حديسك صح .

انا شلت نفسي وختيتو وقوت الحمدلله وتبنت محفضتي ولقيت اب خمسي الليلي قاعد وقلت باكر اودي لقبة شيحنا ود الحيران
فيحال كوت بندهو يفك سوجاري.

أمك خجيجي.

بنوت ابزيت (ابو زيد) قالن شايلات الخرتوم يودن امهن للحكيم هناك ,
باقي لا صنب لا كريمي فيهن حكيم ! بلا التمرجي يطبظ في الناس بالحقن اظنو تاميها موية !
قالنا ناس الخرتوم ما عندهون دويي لينا عيللي بس عد يجيبولو الاسبرين قالولو بس جنس عيان يجيك اصرفو ليهو !
اها البنوت خايفات فيحال قالولن البنوت في الخرتوم عد يدوقوهن بالسوط في قلب الشارع والخلوق كولها تنفررج فيهن !
عاد دا كلام دا ؟؟ وينون الولاايي للحريم ؟
اسع باقيلكم ديل رجال شي ؟ رجال شينو البيدوقولون مرة في قلب الشارع ؟ بس ان كان هدمها وقع منها ؟
وكمان قالوا في ناس ململمين في الشارع ينفررجوا في البيدوقوها !
ماب يخجلوا ؟ دحين اسع الواحد فيهون بيرضا امو ولا اختو يسوولا كدي ؟
نان هون البيدوقهون منو ؟ ساووين خلاقون عيللي البعاشيم كدي !
أكان عندهون رجالة ما يسووها مع الماكلين حقهون وزالينهون ديل !
أسع انا المرة دي ان في زول اداني سوط وقاللي دوقيبو مرة , بس في الأوال بمحططو بيهو زييين !
واقولو انت مافي زول رباك ضوومة ! الله ينعل تربايتكون الكعبي !
أوالي وكت اهلنا يدوروا يدوقونا كانوا بيدخلونا في قلب البيت فيشان مافي زول يشوفنا ان انكششفنا !
وهن يدوقوهن فيشان شينو ؟ البت ان لبستلها منطلون اكنها بددعت ؟
ما ياهين ديلا الجنهون من بلاد برة لابسات الملاطنيين والكسكتات ميتل حريم الظهر !
بس كانت ناقصاهن العصايي والسيجارة البيتشيلا المرة الداقينلها الظهر !
مالون ما سعلوهين ! والآ اكنهن ديل فيحال عندهن البظابورطيات اللات بره !!
وينضررعن فوقنا وهون يهليجولين ومباريننهن وينصوروا معاهين ميتل اتتكناهين شيتن سمح !
حتى في الدق عد يفررزوا الناس ! غايتو يوم القيامي اليرجوا الراجيهون !!
والله يا عبدارحمان يا ويليدي انا بس بطني طمت من الشي الحاصللنا في البلد دي !!
يا ويليدي لا تصد هيني تاني شي ! بس عيللي الشواطين ديل يفوتوا من وشينا !

أمك خجيجي.

يا عبدارحمان وليدي الليلي اصبحنا بلا رغيف في الطابونة !الحيكومة دي جايي تكتللنا بالجوع والمغسي!دسوا مننا الدقيق السمح , وجابونا دقيق نافد ضوومة وفوقو سم !ومغتغيتينو في الشوالات ومخييتينهن فيحال الناس ما تقرا الكتابي وتعرفوا نافد !شفت الناس ديل مضررتون ؟ عيللي الشواطين ! بس الشي البيسووهوه ماب ينعرف !يبقالي ابليس واتو بقى يخاف من عمايلون !اسع بس بوطان المدارس يسوولون الشندوتشي بي شينو ؟عاد يا ويليدي الكيسري والقراصة بيتحشن ويبقن شندوتشي !!يعني اسع الجنون يمشوا المدرسة ويجوا بي ريقون ؟؟عليك النبي الناس ديل ماب يخجلوا من سواتون دي !!نان قايلين الناس بيسكوتوا ليي ديمي !!الله يا يابا يكايتون من فوقنا مكايتت الجراد البيروشو بالطيارات داك !!لاسعيتي ما فكيت الريق وحتى ضول الضحى ختا !كدي الاقوم اشوف ناس الروضة ان كان لقنلهن رغايف ,قالوا مشن للكدرو يفتشن طابونة هناك !شفت المحن دي ؟؟أمك خجيجي.

Quote: أخوي عبدالعزيز عيسى , مرحب, ضحكني تعليق جلادونا , وانا زاتي لما راجعت الكلام والرقابة الضحك غلبني شديد, اسع بقيت شايلي هم الناس البيقروا كلامي دا !! ست البنات.

سلامات ست البنات

أنا ضحكت من كلمة خجيجي في عنوان البوست
ولما دخلت مسكتني أم هلا هلا...

وفعلا في كلمات كتيرة لي أكتر من ثلاثة عقود ما سمعتها..






في بوست صلاح جلال كتبتي لي جلالدونا
وهو ما دخل البوست بتاعي خالص!!
لكني يا ست البنات عليك جنس زهايمر هههههههههههههههههههههههههههههههه

هههههههههههههههههههههههههه

أخوي عبدالعزيز ,

بكون الزهايمر ! ما بعيد ,

واكتشفت كمان مرات بكتب اسمي في ذيل الموضوع مرتيىن !!!
لكن برضو ما تبقى متفائل وتقول جلادونا في بالي طوالي !
ما هو أصلو طلع ود عمي !!
مالك ماشي للزهايمر !!
وبركة النبهتني !

شكرا ليك أخوي عبدالعزيز .

ست البنات.