أي بت شديده ماحقو تحب ليها واحد جبان/مع التحيه لناذر الخليفه وطارق جبريل

أهديها إالى الأخ العزيز /ناذر الخليفه
وإلى الحبيب الصديق/د. طارق جبريل

فهما من ألهماني هذه الحكايه : ناذر من خلال قطعته الفريده( أي بت شديده أخوها
لازم يكون أسد). وطارق عبر رائعته التي مازالت تقطر ابداعا( أي بت شديده لازم
تحب ليها طلبه ـ صبي بناي)
كل ماأتمناه أن اكون ضيفا خفيفا على قلوبكم وآمل ألا تقارنوا نصي المتواضع
بجمال حكيهما .سخرية ناذر وعلو كعب طارق .لقد أمتعانا فلهما التقدير والإعجاب.

هيا تعالوا

قبل دشليون سنه كده وامكن بعد بداية التاريخ على طول،كنت مره في حفلة عرس.كنا مهججين آخر هجيج والعجاجه رابطه للسما.
شي رقيص هورس وشي كاروشه وكمان حاجه مسخره من الزمن داك اسمها تطش( touch) ودي ياأولاد الزمن ده رقصه مطوره من رقصة
الجيرك ،بس فيها لصيق أفخاد على خفيف ومره ومره كده ضربا ت جنابيه بالصلب لا مؤاخذه.
وأنا في عز الكبسيبه بتاعة الحاجات المنقرضه دي ، فجأه قربت مني وقالت لي:
-أنا عاوزه اشوفك.
- الله اكبر،انا؟
اتسمرت في محلي زي الضربتني كهربا.ياربي انا في حلم ولاعلم؟
معقول سلوى هي الإتكلمت معاي وكمان عاوزه تشوفني؟
وقفت محنط زي العوير فاتح خشمي ما مصدق الحصل. وهي عملت روحها مندمجه في الرقيص وجات جنبي تاني ولكزتني:
ـ هيي شنو ياصلاح مالك متلش كده؟ وبعدين ياخي خليك طبيعي عشان ماتلفت انتباه الناس الجنبنا ديل.
في الحقيقه كنت محتاج واحد يديني كف ولايرشني بي مويه بارده عشان اصحي من التنيحه الأنا فيها دي. وصدقوني
الحصل بعد داك انا ما مستحضرو،لاكين غايتو بتذكر أني بعد كلامها داك قعدت اتهوزز يمين وشمال زي بندول الساعه،
بسوي في شنو ؟الله اعلم.لمن جا صاحبي ابو السره قال لي:
- ياابو صلاح الغنيه دي ماانتهت، الموقفك شنو ومقهي كدي مالك ؟
المهم يا سيد الأمنتي ليك مشيت قعدت في الطربيزه مع شلتي مسهي ساكت زي البوم وماعارف الحاصل لي شنو.
وبي صراحه يا شباب ،اليوم داك كنت ضارب لي عبارين لزوم الشجاعه الأدبيه في الحفلات، يعني شباب زمان يمكن افهموني
بقول في شنو.لاكين وحاتكم بعد الحصل داك طارت النعنشه جنس طيره زي الأدوني حقنة كرومين. ودي بلاش أحسن تنسوها لأنكم
ماحتعرفوها وحتعبوني معاكم ساكت بالشرح . المهم اخوكم عليك أمان الله بقى صاحي التقول حكم كورة تنس ، وراسي
بقى زي مروحة الطربيزه. مره اتلفت بي هنا اشوف البنيه ومره اقبل جهة اصحابي واقول ياربي مايكون في زول كشف حركتنا.

وتاني ..تاني..لسه راجعين مره تاني للقديم اللي تنسى

ومودات تبش من:
ود اللحمر أب زادا مابخمر

ياخوانا هوي الحقونا البوست ده عاوز ليهو عتاله
ولا حيمشي شمار في مرقه. يعني دايرننا نعتل
برانا من اللول.
يلا ياشباب البصلي علي النبي دفره ولالزه ولا ان
شاءالله قحه، برضو اخير من صمة الخشم.

ومودات تبش من:
ود اللحمر اب زادا مابخمر

طيب انا جيتك ياصلاح الاحمر
وينا البت الشديده عشان نشوفها
فى الاول حتى بعدين نحبها

بوست شكلو لذيذ متابعين

نون

Quote: طيب انا جيتك ياصلاح الاحمر وينا البت الشديده عشان نشوفها فى الاول حتى بعدين نحبها

يعني يامحمد عادل ياخوي صبرا يبل
الآبري ماعندك؟ شكلك كده عاوز تقطع
الرحط قبل العريس. روق ياحماده
انا لسه جاييك.
شكرا لمرورك.

ومودات تبش من:
ود اللحمر أب زادا ماببخمر

Quote: بوست شكلو لذيذ متابعين

شكرا يانون وانشاء الله ظنك مايخيب.
وخليك معانا.

ومودات تبش من:
ود اللحمر أب زادا مابخمر

السلام عليكم ورحمة الله وبركاته

والله ياصلاح اسلوبك جميل فئ الكتابه

ود اللحمر دي سوات شنو دي
انا كنت قايلك بي عقلك
ماك زينا تجقلب
وشابكني انا الجعلي
انا الكلس
انا تمساح الدميرة
اتاريهو فسو ساكت



متابعين يا حبيب

أبو رضا ... إذا شك القميص ... فكأنما شك قلوب الدائشات بأسهم ..
__________

Quote: شي رقيص هورس وشي كاروشه وكمان حاجه مسخره من الزمن داك اسمها تطش( touch) ودي ياأولاد الزمن ده رقصه مطوره من رقصة الجيرك ،بس فيها لصيق أفخاد على خفيف ومره ومره كده ضربا ت جنابيه بالصلب لا مؤاخذه.

من الأرشيف

متابعين أبو رضا ... مع التمنيات بعدم إنتقال البوست الي (مغاربةأونلاين)


-

Quote: ود اللحمر دي سوات شنو دي؟ انا كنت قايلك بي عقلك ماك زينا تجقلب. وشابكني انا الجعلي انا الكلس انا تمساح الدميرة،اتاريهو فسو ساكت

العزيز تاريح وليد جبريل
الرجاله ان شاء الله تطير يايابا،وبعدين
قبل كده ماقلت ليك انا( جايقي).غايتو
خليك معانا لحدي مانلقى لينا مخارجه
من الورطه الدخلنا فيها دي.صدقني ديل
حيبقو عوضين.

Quote: المهم اخوكم عليك أمان الله بقى صاحي التقول حكم كورة تنس ، وراسي بقى زي مروحة الطربيزه. مره اتلفت بي هنا اشوف البنيه ومره اقبل جهة اصحابي واقول ياربي مايكون في زول كشف حركتنا.

ونواصل الحكي

وانا بفكر في الحصل مريت بي لحظات فراغ عجيبه مابتتوصف ،
حاجه كده مابقدراحددها بين الإندراوه وانعدام الوزن. قعدت اقول لروحي
هسه سلوى دي تكون عاوزاني في شنو ياربي؟ طبعا سرحت بعيد واتخيلت
حاجات كده ماليها لا أول ولا آخر.لاكين مالقيت أي راس خيت يدلني علي
سكه يمكن الواحد يقول تقدر توصلك لي حته معينه.واول شي خلاني استبعد
الجانب الشخصي انو سلوى اكبر مني بي سنتين وتاني في الوكت داك كنا
بنعتبر بنات الجيران ـ حتى لو عاجباتننا ـ زي اخواتنا ، رغم انو
ناس سلوى جيران بعاد شويه وبيتهم جبده من بيتنا.
المهم وانا بضرب اخماس في اسداس اشوف ليك سلوى جايه قاصده طربيزتنا
عديل.الطوله والقدله والطله المهيبه ماعارف لييه خلوني اتخيل في
اللحظه ديك قائد الأسطول.والله ياخوانا لما قربت علينا فكت ليك واحد
بسمه لما برقها شلع.والله الساعه ديك حسيت بي قلبي عمل تاح تاح تتاح ،
زي ال انفجر فيهو لغم وشعرت بي دمي كأنو سخن وبقى يطاير في عروقي
زي عربات الفورميولا ون.يمينا بالله لما خلاص وقفت قدام الطربيزه اسمع
ليك اضنيني شاغلات زي حلة البوب كورن طاخ طراخ طرطاخ. حالتي بقت تصعب
علي العدو .ماعرفت اقوم ولااقعد ولااقيف ولااضحك ولا ابكي.
سلوى كان معاها صاحبتها أمل .فجتنا ليك وقعدت بيني وبين أبو السره ،
وامل قعدت جنب ود خالتها أمين . بعد السلام وكلمه من هنا وكلمه من
هناك ، سلوى انتهزت الفرصه لما الجماعه كلهم كانوا بضحكوا علي نكته
حكاها أمين،وميلت علي عشان تتكلم. والله ياخوانا لما اتكت علي كده بي
كتفها اتكبكبت جنس كبكبه لي حدي ما دفقت كبابي العصير المكبوبه قدامنا.
واتخيلت ليك ناس الحفله كلهم قاعدين يشوفو فينا ويصفرو ويكوركو.
قالت لي بالمناسبه الموضوع بهمنا انحنا الإتنين. ومافي داعي نتكلم كتير
عشان ماحاقدر اطول القعده معاكم.وطبعا ليها حق خصوصا انو الحفله ماكانت
مختلطه للاخر. وصدقوني لما كانت بتتكلم اخوكم كان ماسكاهو ام رجفيبه
وركبي تحت الطربيزه شغالات يكركبن ساكت زي عربية الكارو لما تكون شايله
ليها صفايح فاضيه وماشيه في الدقداق. غايتو حالتي خلوها على الله.

وتاني ..تاني ..تاني راجعين مره تاني للقديم اللي اتنسى

وومودات تبش من|
ود اللحمر أب زادا مابخمر

Quote: أبو رضا ... إذا شك القميص ... فكأنما شك قلوب الدائشات بأسهم ..

حاتم ودعمتي فاطنه
ولييه بس الدايشات ياحاتم
والله اخوك كان لما يقشر ويشق
ليك الحله كده( كانت قلوب
العذارى تكاد تقفز من صدورهن).
بس لاكين مامن وسامتي، من تعبن
وهن متشععبطات في الحيط
بتاوقن للزول المكلوج ده
البتقوم وراه العجاجه وهو ماشي.

ود الأحمر ..

يا حبيب تراكم في المغرب ما هينين ، حقو نعمل سلسلة نسميها (أي بت شديدة ....) عشان أي زول يجي يفت مصايبو وجلكساتو وماضيهو أكان أسود أو أبيض هنا

بس عليك الله ما تسل روحنا زي صحبك طارق جبريل ، ماطي لينا قصتو قريب السنتين وشلهتنا معاهو ، وأنا المسيكين قصتي مع حبيب الغزالة أخو الاسد كشحتها في ربع ساعة في ليل بهيم بعد ما الناس نامو وإحلوت القعدة والراس ظبط

Quote: وركبي تحت الطربيزه شغالات يكركبن ساكت زي عربية الكارو لما تكون شايله ليها صفايح فاضيه وماشيه في الدقداق.

تشبيهك دا فلت مني ومن طارق !!كنت مخزنو وين

أها

منتظرين

لقيتك ختري يا ابو صلاح
متابعين
بس لوع تلحق صاحبك طارق

ابو صلاح
ده يا هو درب ناس ناذر وطارق ذاتو
تبدا وانت ما طرف في القصة
لامن بعد شوية تبقي سيدا

....
متابعين ايها الرائع

امنة

منتظرين

الشحتفة شنو يابو رضا؟؟
ماكفاية كبكبتك وجرستك
كمل الحكاية طوالي بلا "البقية في العدد القادم"

Quote: المهم اخوكم عليك أمان الله بقى صاحي التقول حكم كورة تنس ، وراسي بقى زي مروحة الطربيزه.

Quote: الله الساعه ديك حسيت بي قلبي عمل تاح تاح تتاح ، زي ال انفجر فيهو لغم وشعرت بي دمي كأنو سخن وبقى يطاير في عروقي زي عربات الفورميولا ون.يمينا بالله لما خلاص وقفت قدام الطربيزه اسمع ليك اضنيني شاغلات زي حلة البوب كورن طاخ طراخ طرطاخ.

تشبيهــاتك عجيبـه و غــريبــه
و غــارقه في الـــظرافه ..

و مع سلـــوى نـواصــل .

_______________________________________________

ليتهم يعلمون ان عمر اللحظـه في بعـدك يا خـرطـوم سنين طـوال
د شهـاب الفاتح ـ كوالالمبـور

Quote: والله ياصلاح اسلوبك جميل فئ الكتابه

Quote: منتظرين

اخوي محمد
شكرا لمرورك وللالاطراء.وان شاء الله مايطول
انتظارك. خميرة الحكايه موجوده، بس اتمنى
الواحد يلقى مزاج الكتابه والوكت مع
دواهي الدنيا والشغل وحاجات الشفع.

ومودات تبش من:
ود اللحمر اب زادا مابخمر

ياابا رضا
الكبكبة قدام الجميلات مشكلة عموم الرجال ولكن تتفاوت من موقف الى آخر
هاك آخر { الكبكبات } التى قرأتها هذا الصباح
وشوف كيف بتخلى الرجالة مجرد العوبة مضحكة

Quote: الــمـَـقـْـلـب بعد مسافة طويلة من السير، توقفت الحافلة أخيرا في محطة للاستراحة. نزل الركاب تباعا بعد أن أكد عليهم السائق بألا يتجاوزا أكثر من ربع ساعة. هو كان دائخا. توجه إلى مرحاض عمومي فغسل وجهه وقضى حاجته، ثم أقفل عائدا نحو المطعم ليأكل شيئا يسد به الرمق. كانت كراسي المطعم كلها مليئة بالناس، فُرادى ومثنى وثلاث ورباع. بحث طويلا عن مقعد شاغر دون جدوى. فجأة سمع صوتا يناديه من خلفه: - «بس بس.. واسي محمد..». التفت خلفه ليتبين صوت من ينادي عليه، فإذا هي فتاة تجلس وحيدة في ركن من أركان المطعم. اعتقد في البداية أنها ربما نادت عليه خطأ، لأنه لا يعرفها.. وسرعان ما ولى وجهه عنها باحثا عن مقعد، لكنها نادت عليه مرة أخرى، فتوقف وأخذ يقلب وجهه يمينه ويساره.. قبل أن تشير إليه بيدها أن يحضر ويجلس إلى طاولتها. - تفضل.. أرى أنك وحيد مثلي. أجابها بالإيجاب وعلامات الدهشة والاستغراب بادية على وجهه، قبل أن تبادره بالدعوة إلى الجلوس أمامها. - هل تمانع أن نتشارك الطعام؟ سألته عن اسمه، مهنته، عمره، من أين أتى وإلى أين وجهته، فأجاب عن أسئلتها بعفوية وطلاقة. لكنه بدا مستغربا من جرأتها عندما سألته إن كانت له حبيبة، فاحمرت وجنتاه وتلعثم لسانه وهو يجيب بالنفي. - طيب، إن لم تكن لك رغبة في الإجابة فلا بأس. - لا، لقد قلت لك الحقيقة.. ليست لدي حبيبة، لكن لماذا هذا السؤال؟ - مجرد اهتمام فحسب. أنا أيضا وحيدة، لا حبيب لي ولا صديق. - لا. أنا لا أصدق هذا. لا تقولي لي إن هذا الجمال كله لم يحظ باهتمام الرجال؟! - تريد أن تقول إنني كذابة، صح؟ في الحقيقة لقد عشتُ تجارب عاطفية كثيرة، لكنها فاشلة.. وأنا لا أحب الفشل. ولكي تغير مجرى الحديث، بدأت تنظر إليه باهتمام وأخذت تغازله.. - عيناك جميلتان. سبحان الله.. الذي خلق هذا الوجه.. كل شيء فيه جميل.. عيناك.. أنفك.. شفتاك.. شعرك.. يداك.. كل شيء فيك رائع...سبحان الله... وكان يهم بقول شيء ما لولا أن قاطعهما النادل، وقد جاء ليعرض عليهما ما يوفره المطعم من وجبات. اختار هو «سندويتشا» عاديا، أما هي فقد اختارت وجبة دسمة و»متخمة»، تضم من كل طعام نوع. واسترسلا في الحديث وهما يتناولان وجبتيهما، وكانت عينا الفتاة لا تفارقان وجه الرجل دون أن تتوقف أسنانها عن مضغ الصلاطة واللحم والأرز، وشرب العصير.. وفي كل مرة تطرح عليه سؤالا وتتركه يخوض في حديث مطول.. كان يتحدث أكثر مما يأكل. فجأة قاطعته طالبة منه أن يكمل طعامه. - خذ هذه القطعة من يدي يا حلو.. وفتح فمه في خجل فألقمته ما حوت أصابع يدها من لحم. ثم سألته ويدها ممتدة إلى الكأس التي كان يشرب منها «المونادا»: - أيمكنني أن اشرب من كأسك؟ - تفضلي. وشربت من كأسه بتمهل وعيناها مرصودتان على عينيه.. ثم وضعت الكأس بعجالة وقامت من مقعدها مسرعة، وغادرت بعد أن استأذنته في الذهاب إلى المرحاض.. وظل فمه فاغرا ولسانه معقودا وهي تمر بجانبه ورائحة عطرها النفاذ تخترق أنفه... فلم يعد يدري ما يقول ولا ما يفعل. انتظرها طويلا لكنها لم تأت، وبعد مدة، جاءه النادل مطالبا إياه بأداه الفاتورة، فهب إذ ذاك من مقعده ضاربا باطن كفه بجبهته، وخرج مسرعا نحو الحافلة فلم يجد غير أثر عجلاتها...

Quote: أها منتظرين

محمد الطيب يوسف
جاييكم قريب يامحمد ،بس طولو بالكم
القصه دي من عام الفيل والواحد
عاوز ليهو منشطات عشان الذاكره
تدور.
شكرا لمرورك.
ومودات تبش من:
ود اللحمر أب زادا مابخمر

Quote: لقيتك ختري يا ابو صلاح

آمونه بنية عبد الكريم
لازم اكون ختري عشان اسمي الاحمر

Quote: متابعين بس أوعى تلحق صاحبك طارق

خليك قريبه ياآمنه لاني خايف البوست ده
يلحقني أمات ناس فاطنه.

ومودات تبش من:
ود اللحمر اب زادا مابخمر

أها ...

Quote: ود الأحمر ..يا حبيب تراكم في المغرب ما هينين ، حقو نعمل سلسلة نسميها (أي بت شديدة ....) عشان أي زول يجي يفت مصايبو وجلكساتو وماضيهو أكان أسود أو أبيض هنا.

العزيز/ناذر الخليفه
أثني ، بس انحنا ماضينا بالألون وكمان LCD تقول لي اسود وابيض، باين عليك دقه قديمه

Quote: بس عليك الله ما تسل روحنا زي صحبك طارق جبريل ، ماطي لينا قصتو قريب السنتين وشلهتنا معاهو ، وأنا المسيكين قصتي مع حبيب الغزالة أخو الاسد كشحتها في ربع ساعة في ليل بهيم بعد ما الناس نامو وإحلوت القعدة والراس ظبط

انت ماسمعت انو في شركه اتصلت بي طارق عشان يشترو منو حقوق (اي بت شديده..) و يعملوها
مسلسل.والله ياخوي حقك راح وانا كان طارق عمل 50 حلقه ، ياني العامل 60 وشيلو شيلتكم.:
ومودات تبش من :
ود اللحمر أب زادا مابخمر

Quote: الشحتفة شنو يابو رضا؟؟

وليد..وليد صفوت
يادوب قلنا بسم الله.ولو عاوز تجي وتركلس في البوست ده
إلى ماشاء االه ، مرحبا، وإ لا بطل المتاوقه والحركات
الأرعه بتاعتك دي.
والله اشتقنالك يا ابوحليب ..شِنو ياخي محاربنا ولا شنو؟
ومودات تبش من :
ود اللحمر أب زادا مابخمر

Quote: ياابا رضا الكبكبة قدام الجميلات مشكلة عموم الرجال ولكن تتفاوت من موقف الى آخر

شوف ياأبا انس/صلح كلامك واسحبو واعتذر، القاليك منو انحنا قاعدين
نتكبكب؟
انحنا بس بكايين من بعيد لي بعيد

ومودات تبش من:
ود اللحمر أب زادا ما بخمر

Quote: تشبيهــاتك عجيبـه و غــريبــه و غــارقه في الـــظرافه ..

دشهاب الفاتح الزول الرصين الأنيق
الحبوب واب لسانا حلو

سعيد بمرورك الجميل، واخجلتني بهذا
الثناء.وانت الأظرف.. وعين الرضا...
ومودات تبش من :
ود اللحمر أب زادا مابخمر

Quote: أها ...

ناذر وليد امحمد ود الخليفه

اها ..شنو..؟شفقتكم ال...
بعدين ياناذر.. طارق قال لي انت سرنا،
طيب مالك ماتصبر ياخي ،ده الجعلي بيقضي
يومو خنق، وانت ماقادرتصبر يومين؟
أها ..السبت والأحد ديل عطلة نهاية الأسبوع
عندنا ومابنفرط فيهن ، هن أصلن ماحايقات
بين حاجات الشفع ومتطلبات البيت والواجبات
الإجتماعيه.بعدين مستعجل لاحق شنو ؟ اهلنا
المغاربه بيقولو ( بالمهل تيتكال بودنجال)
يعني الباذنجان بياكلوه بي رواقه).
ده انا حاخليكم تترحمو علي طارق وكمان عوض.

Quote: وصدقوني لما كانت بتتكلم اخوكم كان ماسكاهو ام رجفيبه وركبي تحت الطربيزه شغالات يكركبن ساكت زي عربية الكارو لما تكون شايله ليها صفايح فاضيه وماشيه في الدقداق. غايتو حالتي خلوها على الله.

ونواصل الحكي


غايتو بلعت ريقي وحاولت اثبت واوريها أني ما متكبكب لاكين وحاتكم من الكبكبه ريقي
زاتو مالقيتو ، بقى ناشف زي البودره مافيهو حاجه بتتبلع.
كان لازم اجاوبها علي كلامها .
اها طلعت الكلام من آخر حلقي ونفسي قايم وحسي مقروش .
قلت ليها ان شاء الله خير؟ أو انا اتخيل لي أني قلت الجمله دي، لاكين الحقيقه انو كلماتي
طلعت هوا ساكت ، يعني زي الرصاص الفشنك.
قامت قالت لي مالك بتفتح في خشمك وتقفل فيهو ،عاوز تقول حاجه؟
ههوززت راسي زي الدلمه يعني آآآي.
قالت لي خلي كلامك لي يوم الخميس الجاي تلقاني مستنياك الساعه سبعه ونص مسا
في بيت ناس حبوبتي بتول.
والله ياخوانا من المفاجأه لمن اضنيني صنو وعيني طششو.
وبي سرعه لمت فستانها ووقفت وبي جديه معاها صرة
وشي فيها حبة حنيه ، طنطنت بي شويش:
ـ خليك حريص لأنو الموضوع مهم جدا.
بعد مامشت بقيت امكن نص ساعه داخل في حاله كده غريبه خلاص ، لأني ماكنت عارف روحي
منو ولااناوين ولا الحاصل شنو.
معقول ياجماعه سلوى السمحه الموقفه الحله كلها على كراع واحده عاوزاني انا من دون
الخلق دي كلها؟
ـ يارب تستر واللهم اجعله خير.
قلتها بي صوت عالي بدون ما اشعر، وصاحبي ابو السره يبحلق فيني ساكت وعيونو بتقول
انتو ياخوانا صلاح ده الليله انسطل ولامالو ياربي؟

وتاني..تاني.. تاني راجعين مره تاني للقديم اللي تنسى

ومودات تبش من:
وداللحمر اب زادا مابخمر

يا ود الاحمر ..

Quote: انت ماسمعت انو في شركه اتصلت بي طارق عشان يشترو منو حقوق (اي بت شديده..) و يعملوها مسلسل.

عليك الله خلي ناس الشركة يجو يشترو مني حقوق قصتي عشان يعملوها إسكتش ربع ساعة

ود الخال ..
راجع الماسنجر ..سررررررررررررررررريع


-

شكرا ياحاتم ، علم، والرد بي هناك.

ود الاحمر
متابعين
واصل يا رائع

*****
سامي عوض السيد

Quote: الباذنجان بياكلوه بي رواقه

والكوسة بزربو بيها؟؟
اما عن الخيار فحدثنا ود النخيل عن ميزاته
(ونواصل في بوست تاني....)
ياخي ده الكرهنا مجلة الوطواط والبرق
فاكتفينا بميكي وسمير وسوبرمان واحيانا سمر...

... اول كنا متعهدين "دفر" لبوست طارق جبريل بس ...

.... هسع بقو اتنين ... ربنا يدينا الصحة

وراكم للنهاية ....

... الاجر مدفوع ... يكفي هذا الفيض من الشوق والمتعه في السرد ...



ودمت يا صلاح الأحمر ....

Quote: ود الاحمر متابعين واصل يا رائع

سامي عوض السيد

شكرا لمرورك واطرائك وأتمنى ألا يطول غيابي.

Quote: ... اول كنا متعهدين "دفر" لبوست طارق جبريل بس.. هسع بقو اتنين ... ربنا يدينا الصحة وراكم للنهاية... الاجر مدفوع ... يكفي هذا الفيض من الشوق والمتعه في السرد ... ودمت يا صلاح الأحمر ....

ياسر نجيله
شكرا لكلامك الجميل وان شاء الله نخدمكم في اقرب بوست.
وتاني / قول لي الرحوم حسن نجيله يقربلك؟ كان صديقا
عزيزا للوالد ابراهيم الاحمر رحمه الله.
وخليك قريب مع مودتي.

ود الاحمر

تحياتي ؛؛


شكرا علي الاسلوب والسرد الجميل ؛

والله اتخيلت نفسي قاعد معاك في التربيزة ؛والكبكبة ماخلتك تعزمني علي العصير القدامك ده؛؛

Quote: أنا عاوزه اشوفك.

ود الاحمر ام رضا لو عرفت الكلام ده بتوديك الخور عديل





واصل متابعين يالحبيب







ابو احمد

Quote: وتاني / قول لي الرحوم حسن نجيله يقربلك؟ كان صديقا عزيزا للوالد ابراهيم الاحمر رحمه الله.

... ودي كمان دفره تاني عشان أبهاتنا العزاز ... رحمهم الله

ابقي مارق ياود الأحمر وتم القصة ...

راجنك

Quote: "(هورس) (كاروشه) وكمان حاجه مسخره من الزمن داك اسمها (تطش(touch)"

ود الاحمر أخوي

لكن يا قريبي لقيتك قديم خلاص

واصل الرجفة يا سيدي ومتابعين معاك

Quote: ود الاحمر أخوي لكن يا قريبي لقيتك قديم خلاص

اشراقه/بت العم

قديم وبس؟ده اخوك من زمن حفرو البحر

يعني لازم تحرجونا ياعالم

شكرا لمرورك الباهي وراجع ليكم قريب.

ناذر يستاهل

Quote: قالت لي خلي كلامك لي يوم الخميس الجاي تلقاني مستنياك الساعه سبعه ونص مسا في بيت ناس حبوبتي بتول.

Quote: معقول ياجماعه سلوى السمحه الموقفه الحله كلها على كراع واحده عاوزاني انا من دون الخلق دي كلها؟

المهم ياخوانا بعد ما البنيه مشت قعدت مع صاحباتها، اخوكم بقى مسمر

في الطربيزه زي حلاوه كريكاب في الضرس.لاقادر اقوم ولاقادر اتحرك يعني

لو جروني جر ما بنقلع.وانا قاعد في الحاله الكربه دي اتخيل لي اني

مسكتني ام هلا هلا، لاكين بعد ساعه كده اكتشفت ليك أنو أنا الماسك أم

هلا هلا وكمان مقعدا معاي في الطربيزه، لأنو بي بساطه كده حسبتها

ولقيت المويه الشربتها يوم داك وأنا قاعد ،ما اظن أقدر اشربها براي

، إلا تكون معاي أم هلا هلا.

والحكايه وما فيها أنو بعد الموضوع داك ، لقيت روحي طلعت من الحفله

كيت. لا استمتعت بالغنا ولا هججت ولا اتفرجت في البنات السمحات من

أهل العريس الجو معاهو في السيره.وحاتكم بنات رفاعه ديل من سماحتن

لمن ضوهن ضيع ليك نور الرتاين.أها اخوكم كمان من شدة الرجفيبه

السببتها لي سلوى، حتى العبارين الزمطهم قبل الحفله دابو شمار في

مرقه واتبخرو بالسخانه الطلقتها فيني بت الناس دي الله يسامحها.

تصورو ياجماعه إني طول المده القعدتها والحفله شغاله، يعني امكن

حوالي تلاته ساعات، ماكنت ناقش أي حاجه زي تور الله في برسيمو.اصحابي

كانو مره مره بيتكلمو معاي لاكين بقولو في شنو ، الله أعلم.الحاجه

الوحيده المتذكرها اني كنت بقوم أبشر في الفنانين عشان أمر جنب

الطربيزه القاعده فيها سلمى. اتلفت واعاين ليها في وشيها السميح

داك واتملى في نور خدودها واتخيل كهارب البندر، واقهي فيها فاتح

خشمي زي العبيط.وهي الله يطراها بالخير كانت كل مره تجاملني وتبتسم

على خفيف ،وعشان تفهمني أنوبلاش من الحركات المبوجنه دي ،كانت تتلفت

على البنت الجنبها وتعمل نفسها مندمجه في الكلام.

اتفرتكت الحفله وطارت السكره وجات الفكره.وانا طالع اتلاقيت مع ود

جيرانا فيصل.حاول يجرجرني في الكلام..الليله مالك ..وما مالك؟ وقصتك

شنو ياعبد ؟شفتك مروس علي سلمى . وكلامات بالشكل ده. قمت قت ليهو

اسمع يافيصل ماتقعد تلولو في الكلام وتحاول تطلع ليك باستنتاجات

ما عندها أي اساس، واول شي انت عارفني انو بنات الجيران ديل ماعندي

معاهم أي قضيه، يعني كلهن زي اخواتي.

اتكلمت معاهو بي طريقه جافه جدا معناها انا ماعاوز أي كلام في الموضوع.

فيصل زاتو كان راجل لماح وزول مؤدب وعلاقتنا كانت فيها احترام متبادل .

ماكنا اصحاب لاكين زي الأخوان. مشينا مسافه بدون أي كلام .حسيت بيهو انجرح،

لاكين ضغط عل مشاعرو وماقال حاجه. فيصل احترم رغبتي وخلاني احترمتو اكتر.

لاكين لما دخلت البيت ورقدت النوم طار من عيني وجاني احساس مزعج وتانيب ضمير.

بأني كنت بايخ اكتر من اللازم مع فيصل. مرقت تاني ومشيت بيتهم القريب مننا

وعشان مااصحي زول في الوكت المتأخر داك، وقفت جنب الحيطه قريب من الحته

البنوم فيها فيصل في حوشهم وندهت عليهو براحه لما صحى وقام فتح الباب

وطلع عندي بي سرعه وقال لي ان شا ءالله مافي عوجه ؟اعتذرت ليهو وقلت ليهو

والله يافيصل انا ماقصدت.ماخلاني كملت كلامي وقال لي انا برضو ماقصدت.

انتهى الموضوع على كده معاهو، بس موضوع سلمى ماانتهى ونومي بقى خزاز،

و الظاهر انو الموضوع يادوب ابتدا..

ودي قصه تانيه حنرجع ليها تاني.

مودات بالكوم من:
ود اللحمر اب زادا مابخمر

أخوي بشير أحمد

كيفنك ومعليش سامحني ، والله ماشفت تدخلك
في وكتو والمده طالت.حقك علي.

Quote: والله اتخيلت نفسي قاعد معاك في التربيزة ؛والكبكبة ماخلتك تعزمني علي العصير القدامك ده؛؛

اها ،هسه اقبل عزومتنا وتعال بي جاي
فبل مابكري يودي البوست ده للخور.
،،،،،،،،،،،،،،،،،،،ولك مودتي،،،،،،،

اها
الكع

Quote: ناذر يستاهل

شرفت البوست يادكين باشا.ومعليش البوست كان غاتس

ويادوب شفت كلامك.ولحدي كده كويس ،بس دحين ناذر ده

اختاهو كده ولا كده، طارق جبريل قالي الزول ده سرنا

ومن اهلنا المسلماب، وخرم البرشو بالحليب نرشو

بالريحه،،،،،،، افو انا اخوك آ..التايه.

,,,,,,,,,,,,,,,,,,,,,،،،،ولك مودني،،،،،،،،،،،

Quote: [المهم وانا بضرب اخماس في اسداس اشوف ليك سلوى جايه قاصده طربيزتنا عديل.الطوله والقدله والطله المهيبه ماعارف لييه خلوني اتخيل في اللحظه ديك قائد الأسطول.

ألأخ العزيز / أبو صلاح

تحيه رباطيه عطره
طبعا بعد الكبكبه دي تلقاك قريت الحمدو خمسين مره حتى قدرت تتنفس
ورصيت نعلاتك بالمقلوب وبديت تلبس
وعاد سلوى قالت قر وانت السجمان مرقته تنجر
تقول غرقان مرق في بر
حاولت تقول باي .. باي .. لقيت خشمك بى كماشه ما بنفر

غايته جنس كبكبه
كبكبه في المنبر وكبكبه في تمرين السبت
والله نحن حالتنا حاله
واصل ايها الشفيف
وراجع ليك بعد نهاية الروايه
وإلى اللقاء يا صديقي

Quote: اها..الكع

أخوي طارق

وحاتك ماقادر، بلابيطي وقعن.

عليك الله الحقني وانده لي

شيخك داك ،اسمو منو؟ ود

الكرسني.

Quote: طبعا بعد الكبكبه دي تلقاك قريت الحمدو خمسين مره حتى قدرت تتنفس ورصيت نعلاتك بالمقلوب وبديت تلبس وعاد سلوى قالت قر وانت السجمان مرقته تنجر تقول غرقان مرق في بر حاولت تقول باي .. باي .. لقيت خشمك بى كماشه ما بنفر

اخوي ناجي
ياود ياخطير..إيه الحلاوه دي؟

Quote: غايته جنس كبكبه كبكبه في المنبر وكبكبه في تمرين السبت

وأهم كبكبه نسيتها..
في الحريق وانا جاي الليله ياكيشه
بس جهز الخمسينات،انا حالف إلا ادشدشكم.

رمضان كريم

صلاح انزيك

والله لكن طلعت جبان بشكل

لو كانت جعلى كان .......... عجبي

sami Alzubair

سلام ورمضان كريم

ياخى كرهتنى سيارتى الكروزر مالك مبشتن بتاعتك دى كده

Quote: ياخى كرهتنى سيارتى الكروزر مالك مبشتن بتاعتك دى كده

الزول ما يوحل معاكم ولا شنو


وضاحة ازيك ورمضان كريم

يا صلاح.. ما دايرين نسمع حكاية فيصل...
ان شاء الله طاير في السماء
ياخ كمل لينا موضوع سلمى... وجيب بسرعة..
ما تقعد تقول لي لما الليل كان والنهار والدغش وهلمجرا
ناس طارق ما قالوا ليك النسيبة دي صعبة... أخير ما تزعلها

رمضان كريم يا صلاح.. وفي انتظار البقية

مودتي
غادة

Quote: رمضان كريم

الله أكرم، وتصوم وتفطر على خير
ياسامي الزبير،وشكرا على نكت
البوست بعدم افتكرتو مات وشبع موت.

Quote: والله لكن طلعت جبان بشكل لو كانت جعلى كان .......... عجبي

شكرا ياوضاحه على مرورك الظريف،

والجعليين ديل أهلي ،لاكين انا مكجنم

عشان عوارتهم ودايما بقول لي صاحبي

طارق جبريل انا (جايقي) نص جعلي ونص

شايقي ،لأنو أهلنا الشوايقه ديل حنان بالحيل.

لك مودتي وكل عام انت بالف خير.

Quote: ناس طارق ما قالوا ليك النسيبة دي صعبة... أخير ما تزعلها

ان شاء الله يوم زعلك مايجي، ونورت البوست

ياغادة .وكان ربنا هون بجيب ليك باقي

خبر سلمى قريب وامكن في رمضان ده ،

اصلي قاعد مركلس وفي اجازه .شكرا

لمرورك الباهي ولك مودتي وتحياتي

للأخ هاشم والأبناء وكل عام وانتم بخير.

اففففففف
الزول دقس

الغالين مراحب

والله يا ناذر إنت مصيبة
هسي صاحبك ده ليهو اربعة شهور عديل ما كتب ليهو حرف
في داعي تجيب ليهو السيرة دي تاتي ههههههههههه
والله القصة شكلها لزيزة لكن لسا نحن منتظرين

غايتو صاحبك عملها فينا
هسي منتظرين منو

سلوى؟
سلمى؟
ولا
فيصل؟

برضو منتظرين

Quote: والله يا ناذر إنت مصيبة هسي صاحبك ده ليهو اربعة شهور عديل ما كتب ليهو حرف في داعي تجيب ليهو السيرة دي تاتي ههههههههههه والله القصة شكلها لزيزة لكن لسا نحن منتظرين

يامعتز ياخي الغايب حجتو معاهو،لاكين والله عشان كلامك
السمح ده وبرضومحبة في العزيز ناذر، هاكم التصبيره
دي لحدي ماجيكم تاني بعد كم شهر

المهم بعد الحصل داك يااخوانا قعدت لي كم يوم كده افكر في حكاية سلوى واقول لروحي ياربي
القصه دي حترسى على ياتو بر؟ طبعا ياجماعه الخيال ماعندو حدود والافكار مابنقدر نتحكم فيها
زي الهتش ونقفل عليها بالطبله في شنطة حديد مصديه0 لاكين بصراحه ماحأقدر اقول ليكم
الحاجات المرت في راسي حته واحده لانو في ناس امكن تفهمني غلط وتفتكر اني زول مخو وسخان
0وبعدين ياخي انتو حرين قولو الكلام البريحكم وانا برضو على كيفي بقول الكلا م العاوز اقولو0
اها ياسيد الامنتي ليك وزي ماقلت ليكم المده كلها كانت كم يوم لاكين من شفقتي حسيت بيها
كأنها شهور طويله، وبعدين مهما كان نوع الكلام او التصرف بتاع سلوى في اليوم الموعود داك،
ما كنت متخيل شكلو حيكون كيف0 طيب لو فرضنا انها قالت لي ياخي انا بحبك يعني موقفي كان
حيكون شنو؟ وبالتبادي انا اصلي كنت زول كبكابه وكمان جبان وماعندي اي خبره في التعامل مع
(الحمام) وقبل كده ماجربت إلا الريده من بعيد لي بعيد في الحفلات وقصص الحب الصامت بتاع عوارة
زمان ديك0يعني لما تروس ليك علي بت ولا البت تروسك تقعد تعاين ليها وهي تعاين ليك ولغة العيون
للأحباب احسن خطاب 0وبعدين لما الحفله تتفرتك، تقوم انت واصحابك تعملو فيها الاولاد شهمين وتوصلو
البنات لبيوتهم، وتلقى نفسك لايص ليك في ونسه عامه ماعندها لاراس لاقعر وبتتخيل ليك في في حاجات
عبيطه ماليها اي اساس0 وبين حفله وحفله تطول المده بيناتكم بدون كلام وقبل ماتلحقو تتلاقو في
مناسبه خاصه تلقو اجازة التلاته شهور انتهت وموسم الاعراس اتشلع
والحله كلها بقت حزينه زي فردة جزمه قديمه برباط مكرمشه مرميه جنب الكوشه0تقوم تسافر لي مدرستك
وترجع للداخليه واكل العدس ابو حصحاص والسكن في عنبر مليان وطاويط واولاد ضهرا ريحتهم زي مطامير
العيش بعد الخريف0 وكمان الحبيبه الخياليه تمشي عند اهلها في البندر وتخلي خشمك ملح 00ملح،انت
من خجلك وعوارتك ماقدرت تصارحها، وهي من عفتها وحياها مابتقدر تبادر وتقول ليك0 وقبل ماتجي الاجازه
الجايه يجيك الخبر انو حبيبتك الراجيها تحبك، جاها عريس جاهز مغترب في الخليج ،خطفها وستتها في
بيت العدل0 وقراية شنو وبهدلة شنو وحب شنو ووهم شنو،،بلا لمه0أها وكان سألوك عن المؤوده ديك الكتلها
منو ،حقو تعرف انو ذنبها معلق ليك في رقبتك المعووجه دي، ان شاء الله بالتقطعها ليك0