شكرا لمن صنعوا (فرحة العيد) لاطفال المايقوما .. (صور) وأطنان محبه...

سيكون عيد اطفال المايقوما هذا العام (جديدا) وجميلا...
(طولنا من الهدوم الجديده)..
الاطفال يفرقون بين ماهو جديد وماهو دون ذلك..
تختلف حتي الضحكه وحركة الايادي وهي تمسح علي اللبسه ...
(عاين دي هدومي الجديده)..
العيد ... في الدور الايوائيه عامة والمايقوما خاصة له طعم ولون ورائحه مختلفه...
حتي الضحكه لها طعم (أطعم) بكثير..
شكرا لمن رسموا الضحكه..

البركه ....
عند المتصوفه (في اي ديانه)..
لها كتله وليس لها وزن... ومن خواصها (الالتصاق)..
كنا كمتطوعي المايقوما نرفض تلقي مبالغ ماليه ونحرص علي (الدعم العيني)..
وذلك لعدة اسباب (اهمها) ان المواد (العينيه) تأتيى الينا وقد التصقت (نيات) اصحابها بها.. تاتي مبروكه..
أن تعطي ما ذاد عن حاجتك هذا (تكافل)..
لكن ان تعطي (جديد) ... هذا عطاء..
شكرا لاصحاب هذا العطاء..
ملابس جديده لعموم اطفال المايقوما..
نعم ... لهم اجمعين..
بكرة أحلي اذا..

قبل ان نشكر نبعث بصوت لوم للجمارك السودانيه..
500 جنيه سوداني (500 الف بالقديم) كانت جمارك (الثلاث شنط) من الملابس الجديده المرسله من السعوديه.. لاطفال المايقوما..
قام بدفعها (شخصان) ليس لديهم الرغبه في الافصاح عن انفسهم (لهم المحبه)..
500 جنيه رغم اننا قمنا باستخراج مكتوب من الدار بتبعية الشحنه لهم..
وصوت شكر للمخلص الذي رفض ان يتقاضي اتعابا علي تخليصه للحقائب
وقد وهبها لروح والده (نسأل الله ان يرحمه ويغفر له)..

ثلاث حقائب من (الحجم ابو كديس) ارسلت من السعوديه (فاعلي خير) عن طريق
الاخ الحبيب عضو المنبر (صديق الموج)..
له ولهم ولكل من ساهم في ايصالها الينا (حتي عمال الشحن والتفريغ بالمطارات)...
كل المحبه وصادق الدعوات..
منذ الامس السبت تسلمت (ماما حنان) مشرفة الامهات مهمة توزيعها علي الاطفال..
ثم لابد من شكر (ادارة دار الطفل اليتيم بالمايقوما) لتحملهم طلبي الثقيل بضرورة جرد محتويات الحقائب..
وقد قاموا بتسليمي ايصال استلام بالجرد..
بيكم كلكم ... بكرة أحلي..

Quote: قبل ان نشكر نبعث بصوت لوم للجمارك السودانيه.. 500 جنيه سوداني (500 الف بالقديم) كانت جمارك (الثلاث شنط) من الملابس الجديده المرسله من السعوديه.. لاطفال المايقوما..

دائما متلومين بس الله اخير منهم ..

تحياتى يانعيم ليك ولكل اطفال المايقوما والامهات

عيد بخيت وسعيد

نعيم اخوي
العيد مبارك عليك وعلي اطفال المايقوما وعلي كل اطفال بلادي
كل سنة وانتو طيبين

جرد محتويات الثلاث حقائب

1- ملابس متنوعه وعددها حسب الانواع الثلاث
371 لبسه
405 لبسه
170 لبسه
وكلها جديده وموضعه داخل اكياسها
2- الجوارب (الشرابات) ثلاث انواع ايضا
50 شراب
66 شراب
114 شراب
3- بشاكير نوعين
20 بشكير
38 بشكير
بالاضافه الي ديتول وبودرة اطفال ولوشن
صابون لايف بوي (وهو مهم جدا بالمناسبه) نوعين ايضا
72 قطعه
79 قطعه

وكل الحاجات دي جديد واول مستخدمين لها سيكونوا اخوانا الصغار في المايقوما باذن الله..
عليكم الله بكرة أحلي ولا ما أحلي..؟؟

مرحب حباب ابو مرهف

Quote: نعيم اخوي العيد مبارك عليك وعلي اطفال المايقوما وعلي كل اطفال بلادي كل سنة وانتو طيبين

وعليك يتبارك..
كل سنه وانت بالف الف خير..

اميره الاميره..

Quote: دائما متلومين بس الله اخير منهم .. تحياتى يانعيم ليك ولكل اطفال المايقوما والامهات عيد بخيت وسعيد

الله اخير والله..
علينا وعليك سعيد يا اميره..
سألين منك والله ومشتاقين..
العيد ده مابجيبك..؟

Quote: قبل ان نشكر نبعث بصوت لوم للجمارك السودانيه.. 500 جنيه سوداني (500 الف بالقديم) كانت جمارك (الثلاث شنط) من الملابس الجديده المرسله من السعوديه.. لاطفال المايقوما

ده زاتو البخلي الواحديفكر
ألف مره قبل الشروع في مشاريع مساعدات...اتيحت لي عدة فرص من هنا لمساعدة المرضى في السودان.لكن بعد السؤال ...والجمارك ..ألخ...تريثت قليلا ..

مفروض ناس الجمارك ديل يعمل قسم خاص للتعامل مع مثل هذا المساعدات خاصة في دوله زي السودان يقوم كثير من المغتربين بتقديم مثل هذه المساعدات ...

كل سنة وانت وكل اطفال المايقوما واحبابهم بالف خير يارب

كل سنة وهم وانت طيبين يارب


بكرة أحلى

نعيم الانسان بحق


كل سنة وانت وكل اطفال المايقوما والطيبين بالف خير يارب

Quote: كل سنة وانت وكل اطفال المايقوما والطيبين بالف خير يارب

وانتبالف الف خير..
الاخت العزيزه نجلاء..
تحياتي للوليدات..

ايصال الاستلام من ادارة الدار

الاخت العزيزه انعام حيموره..

Quote: كل سنة وهم وانت طيبين يارب بكرة أحلى

وانت طيبه وبالف خير..
ولابد يوم باكر يبقي أخير..

شحنة البركه تقيله..
بكرة أحلي

Quote: كل سنة وانت وكل اطفال المايقوما واحبابهم بالف خير يارب

وانت طيبه وبالف خير يا شبكه..
السنه دي ربنا يحقق ليك احلي من امنياتك..
وبكرة أحلي..

الاخ الحبيب Dr.Elsadig Abdalla

Quote: ده زاتو البخلي الواحديفكر ألف مره قبل الشروع في مشاريع مساعدات...اتيحت لي عدة فرص من هنا لمساعدة المرضى في السودان.لكن بعد السؤال ...والجمارك ..ألخ...تريثت قليلا ..

ماتتريث والله ياحبيب..
الموضوع هنا (صدف) وتساهيل..
ممكن تلقا زول يعمل ليك (اعفاء كامل)..
واكيد بتلقي ناس في حالة العدم يتشايلوا الجمارك..
هي في النهايه بتلفق يا دكتور..
بس اتوكل وبتسهل..
وبكرة أحلي..
شاكر مرورك يا حبيب...

أهلاً نعيم
عيدك سعيد
و ربنا يعينكم.
للأطفال عيدكم مبارك وبكرة أحلى.
التحية لمن ساهم ولو بالدعوة الصالحة.








كان تدخلوا الشنط دي إستثمار؟؟؟
عجبي!!
مودتي..

الحبيب أحمد الصديق..

Quote: أهلاً نعيم عيدك سعيد و ربنا يعينكم. للأطفال عيدكم مبارك وبكرة أحلى. التحية لمن ساهم ولو بالدعوة الصالحة.

وسعيد عليك وربنا يحقق الاماني..
ولك من التحايا اعطرها..

Quote: كان تدخلوا الشنط دي إستثمار؟؟؟

ههههههههههههههههههههههههه
ربنا يديك العافيه..

شكرا نعيم علي الانسان ..
شكرا لاؤلئك الرجال الذين جعلوا الفرح ممكنا
شكرا لكل من ساهم ولو بدعوة في رفع معاناة عن انسان في زمن صعب فيه حتي التمني ...

Quote: شكرا لاؤلئك الرجال الذين جعلوا الفرح ممكنا شكرا لكل من ساهم ولو بدعوة في رفع معاناة عن انسان في زمن صعب فيه حتي التمني ...

وشكرا ليك انت يا ريس..
انت الخير والبركه..
بكرة بيكم اكيد أحلي..


_______
مبروك ياخ شديد

الحقائب في فناء المايقوما...
معجب ب كلمة (فناء) دي..

عزيزي نعيم

بكم يبقي الامل وتبقي أشياء أخري رائعة


تحياتي

الأخ نعيم

تتقاصر قاماتنا احتراما لك

أحســبك ممن قال فيهم المصطفى "كهاتين فى الجنة"

تقبل الله طاعاتك

الاخ الحبيب Osama Siddig
شكرا علي كلماتك الطيبه..
لكن لم اكن الا (ساعي بريد)..
الشكر لهم من صنعوا هذه الفرحه..
بيهم وبيك بكرة أحلي..
عظيم احترامي يا حبيب...

الاخ الحبيب معتذ خليل

Quote: يبقي الامل وتبقي أشياء أخري رائعة

الامل اكسير بكرة أحلي..
بيكم يبقي يا حبيب..
شاكر كريم مرورك يا عزيز..

Quote: ثلاث حقائب من (الحجم ابو كديس) ارسلت من السعوديه (فاعلي خير) عن طريق الاخ الحبيب عضو المنبر (صديق الموج)..

نعيم العزيز كل عام انت واطفال السودان عموم واطفال المايقوما بخاصه فى الف نعمه وخير
لكن مادام جابت ليها شيل حس كدى النفتو كلو
والله انا فاعل الخير الاتصل بى ما بعرفه لكن قلت ليه ياود القبائل
والله ما بصدك بى عشمك ده،ودرع لى الشنط فى رقبتى وذهب، قمت مشيت
لاخونا عبد الفتاح عبد العزيز المدير الاقليمى لسودانير وادانى خصم 50%
ومشيت لوكالة المناوله وهم وكلاء الشحن لسودانير حيث صديقى عامر سنجراب
المدير العام وبعد استخراج البوليصه تنازل عامر عن الخمسين فى المية المتبقيه
وكتب لى على الظرف للمخلص فى الخرطوم ان لايتقاضى مليما واحده نظير اتعاب التخليص
وكتبت المستلم العوض المسلمى وارسلت له البوليصه والمفاتيح مع ابن خالى
هذا ماكان من امرى ،يعنى فاعلي الخير الاشترو الحاجات دى بمبلغ اكثر من عشرين
الف اسمهم ما جاء وما يجى الا اسم حماد الراوية ده.
فعلا الخيل تجقلب..
نعيم العزيز وعدنى بعضهم بارسال بعض الاشياء وانا اناشد كل اهل الخير من سكان الرياض
اعضاء وقراء ان يتصلو بى فى مسالة الشحن دى جعل الله ذلك فى ميزان حسنات الاخوان فتاخ وعامر
لكن زعلتنى حكومة السجم البتتقاضى جمارك من هولاء .
معناها ملاحقتهم ستات الشاى امر تقره الاديان ،والله زى ماقال ود الصديق كان دخلناهم
استثمار ما كان اخدو منكم قروش.
حمالتك على المره الجايه الا اشحنن واكتب المستلم البشير والا على عثمان والا نافع وبالعدم
والى الخرطوم الجديد ده..
بالله دى حكومه دى اوع يكونوا بياخدوا من الاغاثات جمارك برضو؟
بس الساعدوه فى قبر ابوه اعوذ بالله..حسبنا الله ونعم الوكيل
ســـــــــــــــــــــــــلام وكل عام والجميع بخير،،،

بكرة أحلي

سلام نعيم ..

كل عام وإنت بخير ..

ارجو أن تتصل بي الآن ضروري على الرقم الثابت 0183464953

Quote: ارجو أن تتصل بي الآن ضروري على الرقم الثابت 0183464953

انا بتصل في (الما) ثابت كما هو معروف..

الاخ الفاضل نعيم

كل عام وإنت بخير ..

وتقبل الله منك صالح اعمالك وفي ميزان حسناتك انشاء الله

احترامي

نعيم ربنا يعينك ويقويك على فعل الخير دائماً ............

كل ما ادخل احد بوستاتك يانعيم اشعر بعجزي وقلة حيلتي عن فعل شيء ملموس اساعد به هولاء الاطفال و المحتاجين .....

وحينها تترقرق عيناي بالدموع ..............

ياخ والله العظيم يا نعيم انت زول ما ساهل والعمل ده ان شاء الله في ميزان حسناتك ............

جنابو عمر..
كل عام وانت بالف خير..
شكرا علي حسن ظنك يا حبيب..
وبكرة أحلي..

الاخ الحبيب Dr.Mohammed Ali Elmusharaf
كل عام وانت بالف خير
يقول المثل (الخيل تجقلب والشكر لي حماد) في هذا البوست انا (حماد)..
بكرة احلي بمن قاموا (فعليا) بهذا العطاء..
عظيم احترامي وتقديري

الاخ الحبي صديق الموج..
تحية احترام ومحبه..
(فاعلي الخير) الكملوا خيرهم بعدم زكر اسمائهم ديل (قبل اياديهم) المبروكه نيابه عن اطفال المايقوما..
(ملابس جديده) اكتمل بها (صباح العيد)..
فرحة اجتاحت ارجاء الدار..
تمهات وموظفين ومتطوعين ومتطوعات..
صنعوا فرحه بمعني الكلمه..
لهم ولك عاطر المحبه واصدق الدعوات..
والشكر من خلالك للاخوه
عبد الفتاح عبد العزيز المدير الاقليمى لسودانير
وكالة المناوله وهم وكلاء الشحن لسودانير
عامر سنجراب (الزول ده رباطابي من السنجراب..؟)
العوض المسلمى
الاخ المخلص الجمركي
ادارة الدار
وبيكم بكرة أحلي..

نعيم ..
أنعم الله عليك وعلى والديك بالجنة

نعيم .. إن شاءالله الله يفتحها عليك شقيش ما تقبل ..

والتحية لكل من قام بهذا العمل الجليل ..

عاجزه عن الوصف بالكلمات ويشهد الله عينى دمعة ..





وبكره فعلا احلى بوجود امثالك ..

نعيم ..
أنعم الله عليك وعلى والديك بالجنة

الاخ الحبيب صلاح ابو دية

Quote: أنعم الله عليك وعلى والديك بالجنة

ااااااااااامين يا حبيب..
علينا وعليك..