جوايا أكتر من حلم ..

الدنيا آيه من غير آمل . . ونور الآمل هو الحلم . .
جوايا أكتر من حلم . . . آحلام كتيره . . :
أول حلم عندى الوطن.. وطنى يا آروع حلم . . وطن شمس المعزه
.. ووطن تاجوج وعزه..
حلمى أنك ..لا الريح تهزك لا العواصف أى هزه..
والسلام الفيك يصبح هو الحقيقه وكل واحد فينا يرفع بندقيه وفأس مروه...
وطنى يا أروع حلم..
وطنى يا كل الحلم . . يا الخضرة والنيل والجنان . . يا الكنت للجائع
آمان . . أنا قلبى بينقط آلم . . ليه تعز اللقمه فى فم الصغار..
أنا قلبى بينقط آلم . . . أنا قلبى ببكى على الصغار الماتوا فى بداية
النهار فاقدين طعام . . وانت يا بلدى الكرم !!!!!
حلمى أنك الخير يعمك .. وكل أنسان فى ربوعك يتنعم يسعد برخاءك
.. وتبقى جنة للمساكين والغلابة والصغار . . .
وطنى يا أعند حلم . . آتمنى ليك كل السمو والرفعة والخير والامان
..يا وطنى يا آول حلم...

جواى أكتر من حلم ..ولسه بحلم :
حلمى الجديد..أنه السعادة تهل وتغمر كل قلوبنا ....
والحزن يرحل ويبقى ماضى وذكريات ..
والدنيا تصبح مهرجان ..
والدنيا والزمن العنيد يدونى منديل الآمان..
والمستحيل يصبح جبان .. يرجع يخاف وينهزم ...
حلمى أنه الدنيا تشرق بالحنان ، والطيبه داخل كل زول
والرقة والأحساس كمان ،
وكل زول يصبح سعيد..
والدنيا جنة من السعادة ، وملانة بالحب والآمان .. ...

وصل جوابك الكاتباهو للي الولد الحتالي

وكان الظن ترسل لي فيهو هين هينين من البركاوي داك الطعمو حالي

ألف مرحبا بالحضور الآنيق استاذ عبد المنعم ..

كل عام وانت بألف خير وصحة وسعادة ..

وشكراً لوجودك هنا بين أحرفى ..

تالت حلم ..أنو القلم بكل عزة وكل شموخ يفضل يقيف
ما ينكسر..
وكل زول يرمى السلاح ويشيل قلم ،ويكتب ويقول كل
الكلام الما آنكتب ...
حلمى أنو .. قلمى يتحدى ويطوف .. ويكسر مدار عصف
الظروف ..يسرح بعيد ما ينهزم ..
ويفتل خيوط نار الحروف ,ويفتح عيون عقل القصائد
وينسج الآبداع روائع ..
حلمى أنه قلمى يفهم مكان حفر المكائد ..
يفهم مكان حفر المكائد

حلمى مروحة الفصل ترجع تدور تشتغل..
وكل تلميذ ليه كتاب وقلم حبر..
والفصل واسع نظيف ..
والكنب يصبح جديد..ما من حديد..
والكراسى من صوف ملبس بالحرير ..
حلمى انه الرحمة توصل كل قلب ..
ومافى تلميذ ينضرب ، بالآلفة
والذوق الجميل والحنان قبل الآمان
أكيد حيستوعب كتير
حلمى المعلم يصبح وزير
وكما قال الشاعر مبارك حتة :
أستاذ الآساتذة يا الللعلم متطلع
قانع بالقليل جيبك خلاص متشلع
يا لايك الصبر حاشاك ما متدلع
نسأل الكريم ما تصيبك هموم وتولع
ما تسألونى مبارك حتة دا منو ..

حلمى الجوع الكافر الآصبح شكلو حديث ومعاصر يموت
بالسكتة .
حلمى أن يتغير أحساس هذا الطفل :
لينه يا بنت عمى
انتو بالتفاح تفطرو
ونحن بالويكة بنحلى
انتو فى الدش استكانة
ونحن تلفزيون محلى
أنتو تلعبوا بالآتارى
ونحنا لعبنا كله بلى
أنتى حظك ديمه سكر
ونحن حظنا لو فعلنا الواطة
ذاتها يمين يجلى
الجزم أيطالى عندك
ونحن آخر قشرة لينا
تموت تخلى
أنتو ما ناس (لولا)..(سونا)
ونحن ناس مكة وحسونة
أنتو ما ناس (مامى)..(بابى) ..منقولة..
الجوع الكافر الخلى النبقة أتبدل دينها وصبحت منقة
خلى كمان الحب الكان مربوع ومصدق أتهلهل ساسو
أحلم ان يتغير هذا الواقع ..

بحلم ألقى البسمة تضوى ..
وتملآ وجوهنا .. تزيل الغمة .. تنسّى الهم .. والعيشة المرة ..
بسمة رقيقة ملآنه محنه .. شايلة الطيبة ..
تملآ حياتنا بغيم الآلفة ..وتصبح جنة ..
آيه راح يحصل ..لو كل إنسان أتبسم بسمة .. أيه راح يخسر؟
أكيد كسبان الذوق والرحمة ..وينوبه ثواب ونعيم الجنة ..
بحلم أنو الناس تتبدل .. تنسى عبوسها ..
تعالوا نشيل جوانا الرقة .. ونهدى الرقة .. وتبقى حياتنا وئام ومحنه ..
ومادام فى إيدينا مفتاح الحب والآلفة ..بسمة جميلة ..رقيقة
تزيدنا نضار وتجيب الآلفة ..وننسى الحقد والكره والقسوة ..
أكيد الدنيا حتصبح جنة ..

لو كل إنسان أتشكل غيمة تصب وتمطر ..
قطرة ألفة .. وقطرة رحمة .. وقطرة ذوق ومحنة .. أيه راح يحصل ؟
أيه راح يخسر ؟
أكيد الدنيا حتصبح جنة .. ويبقى مطرنا أروع وأنقى ..
ونروى أرضنا .. نروى نفوسنا ..وتنبت فيها زهور الحب والرحمة ..
ويبقى إحساسنا صوت الرعدة .. عالى النبرة ..
ويبقى عطاءنا .. زى سيل المطرة ..
بحلم أبقى الغيم والمطرة ..أجيب الخير .. أزيل الغمة ..
أروى أرضنا عطاء ومحنة .. أبقّى الدنيا معاى زى جنة ..
والاطفال يبتهجوا يغنوا .. جاتنا المطرة .. حلاة المطرة ..
ويامطيرة صبى لينا فى عينينا ..
وبس ياريت لو ابقى المطرة ..

الأديبةُ / هِنْدُ محمَّد ...

أنشدَ سيبويْهِ لجرير ذاتَ مرَّة :

أَخالِدَ قد عَلِقْتُكَ بعد هِنْدٍ *** فَشَيَّبَني الخَوالِدُ والهُنُودُ .

فحرُوفُكِ يا امرأة دائما تُشيبُنا جمالاً وروْعةً
ودَهْشةْ ..
وقد قيلَ في المعاجمِ إنَّ هِنْدَاً هيَ اسمٌ للمِائَةِ من الإِبل وقال جَرِيرٌ في ذلك :
أَعْطُوْا هُنَيْدَةَ تَحْدُوهَا ثَمَانِـيَةٌ **** مَا فِي عَطَائِهِمُ مَنٌّ ولاَ سَرَفُ .
وأنتِ يا هندُ قد أعطيتِنا مئاتٍ من إبلِ
الحُرُوفِ الجميلةِ هُنا ،،
فبداخلِكِ يا هندُ أكثرُ مِنْ حُلمٍ ،
وبدواخلِنا أكثرُ من عشم ،
لكِ التحيَّةُ أيا بيضاءَ
الدَّواخلِ والكلِمْ .


احترامي لكِ بروْعةِ حُروفِكِ
وأكثرْ ..


أخوك / محمَّد زين ...

ولك التحية للكلمات العذبة والحضور الآنيق استاذ محمد ..

ماتراه من جمال يتدفق من دواخلك .زلو لم يكن بداخلك لما أحسسته ..

أشكر لطفك والمرور العذب ..

شكراً جميلاً ..

هند الجميلة ده ما حلم بس دي هضربة عديل كده
وإنشاء الله حلمك يتحقق ونسعد كلنا بوطن واحد
كبير يسع الجميع دون تفرق وتدمير ونغني كلنا
للوطن .

شاعرنا هاشم ..لو بطلنا نحلم نموووت ..

مادام الامل جوانا ..حتكبر احلامنا ..على امل يأتى يوم وتتحقق ..

أشكر لطفك ومرورك الجميل ..

شكراً جميلاً ..

الجميلة هندوية ..

ما اجمل احلامك ....

احلمي يا هندوية كتير

اصلا احلامك ما اجملها فيها

نفحة امل لي وطن خير وجميل

احلامك يا هندوية مشروع الحلم الوسيع لنا

احلمي يا هندوية ليناوالله محتاجين حلمك بشدة

عسل يا هندة

كمان دة رأي فلانة الفلانية القاعدة جمبي دي

بتسلم عليكي

شكرن كتيرن!