أشـواق ..

صحيح بشتاق ..
وافتش ليك
وأسأل عنك الغيمات
وأوصى النسمة كان تغشاك
توصل ليك صدى الآهات
دموع الشوق
وكيف برجاك
وكيف بتذكر الغنوات
وأردد أروع الآلحان
وأسال عنك النجمات
أريتنى الليلة كان ألقاك
أمانة عليك
وكت أشتاق
تجينى براك ..

خواطر اللهفة والآشواق
تسابق الغيمة والنسمات
وتنزل طل
وتبقى السيل
وشمساً تفضح الآهات
وتتوهج مسارب ضى
ساكنة النظرة والكلمات
وأنا المخلوقة شان أهواك
بصارع فى جوى الإنات
وأفضل أرجى يوم جيتك
وأعيش فى الدنيا شان أرجاك
وأخاف من لحظة تبعدنا
وتسرق آجمل اللحظات
وأرجع من جديد أحسب
وأسأل عنك الغيمات
أمانة عليك
وكت أشتاق
تجينى بـــراكــ ..


هند محمد

هند...

انا.. فى شوقك
ماهو ذى شوق المسافرين للرجوع..
حسيتو فى الروح
ذى عطش الفؤاد آلآم و جوع..
طيفك معايا مدن مدن..
نتناجى يفرقنا الركوع
أشكيلو..يبكى من العلي..
و ابكيلو يمسحلى الدموع..

مودتى...

وأنا فى شوقك..
كنت الفكرة
وواقع أنه
الصبر أتلاشى
وأصبح ذكرى ..
العزيز محمد ..أشكر لطفك ومداخلتك الجميلة ..
شكراً جميلاً ..

مشكور استاذ محمد على اللحن الجميل ..

أشكر لطفك ..

هند الجميلة سلام

دائما تتنفسين الدرر

ايتها الرائعة


أمانة عليك
وكت أشتاق
تجينى بـــراكــ ..

العزيز بدر ..

الروعة فى وجودك هنا بين أحرفى ..

أشكر لطفك وكلماتك الجميلة وعذب الحضور ..

شكراً جميلاً ..

Quote: أمانة عليك وكت أشتاق تجينى بـــراكــ ..

الشوق ملاني و فاض كمان
و سرحت هيمان في علاك
مشتاق و كاتم الشوق سنين
مستني اشراق نور ضياك
لوعة و أسى .. فرقة و ضنى
وريني وين آخر مداك
.
.
.

Quote: خواطر اللهفة والآشواق تسابق الغيمة والنسمات وتنزل طل وتبقى السيل وشمساً تفضح الآهات

دوام بسأل عليكِ الليل
يناديكِ و يقول سلامات
و تتدفَّق دموع الشوق
و تنزل من عيون تايهات
تفتِّش و مضة من نورِك
تصارع في الظلام سنوات
.
.
.

Quote: الشوق ملاني و فاض كمان و سرحت هيمان في علاك مشتاق و كاتم الشوق سنين مستني اشراق نور ضياك لوعة و أسى .. فرقة و ضنى وريني وين آخر مداك

جاى تسأل عن مدايا !
وانت عارف أنى لابسة
الـشوق أسـايا
لو صحيح مشتاق وباقى
كان خطاك وصلت خطايا
كان حنينك لى جابك
وكان دليلك ذكرى باقية ..!

Quote: دوام بسأل عليكِ الليل يناديكِ و يقول سلامات و تتدفَّق دموع الشوق و تنزل من عيون تايهات تفتِّش و مضة من نورِك تصارع في الظلام سنوات

عشان ما أجيك ..
سألت عليك وماخليت
حنين مشتاق ضناهو الريد
زهر نوار من البستان
نسايم ليل ..
كمان وصيت عيون الناس
محل ما تروح تكون هى دليل
تسوقنى عليك
ولو بالايد
أسابق الضو وأفوت الريح
عشان ما أجيك ..

::
:

مشكور على المرور والمداخلة الجميلة حسام ..

شكراً جميلاً ..

التعديل لخطأ فى كتابة الحروف ..

الاشواق

حالة متوه

حاولت استلف اللحظة
بفتش
انا المعذور
لا شايفك
ولا سامع صوتك

ومبهور
فى حالة
تصور فى الخيال
مهزوم

حاولت استلف
تصور
يمكن تكون
شايل من الوصف

صورة

ويمكن

تخيب ظنى
فى سورة

لكن سورتك بالشوق
وجرد السلاح

الكان يمكن

يقاومك


وهللت بالهزيمة

فرح

وقهرت الظلم

ومنيت روحى

بخيالك

ما ظنيت

ويمك
تلاطمت

امواجو
هددت السلام

لذورقى
الورقة

واشبثت
بالحلم

واتمنيتك
لحظة الموت

تاريتى الاشواق

حية

منتصبة

الرائعه .... هند محمد

أشواقـــ ...

معتلي ...بيك

تشابي ..فوق المدي

نجمك ...حس الغنه

روحك ...نفس القصيد

برجاااكــ وقت السحر

عند الخميلة ..شجــن

وببراكـــ ..حد الشوق

محل العين.. هدب دقشك

المنظوم،،

وحاجب الرمش .. ظل ..الريد

أشوفكــ ..كيف ..ورينــي

أسامح ..الشوق ..وأشواقي

نقئده ..شموع ..ضــواي

تحت ...وصف الحرف ..كلمة

شـــــــــــــــــوق،،

وولًف،،

جرف الشوق هدم لحظات الندم

وسافر ..عبرك جناح الريــد

ســــٌكن ..في ضبابات الهوي

ونامت أشواقي سارحه في دنيا

ما الأشواق ...وطن ..ووطن تاني.

،،،،أبوقصي،،،،

حقيقى ابداع ..مداخلتك فى حد ذاتها قصيدة شاعرنا مجدى..

وقصيدة جميلة بكل ماتحملةه من احاسيس مرهفة ..

أشكر عذب الكلمات والمرور ..تسلم ويسلم لطفك ..

شكراً جميلاً ..

شاعرنا هاشم الروعه فى احساسك الجميل ..

مشكور هلى الاهداء الرقيق ..

يسلم لطفك ..

شوف الليل كيف أتغير
لبس العتمة وملّ غيابك
وحتى النسمة بتسأل عنك
زى مشتاقة تكون أنفاسك
وأنا فى غيابك كيف أتماسك ؟
محاولة لاستلاف اللحظة ايضا..
العزيز شرنوبى ..مداخلتك جميلة جداً والآجمل حضورك الآنيق ,,
شكراً جميلاً ..

هند العزيزه


ماحدث ...

من أهتزازات فاعله وأنا أقرأ
هذا القصيد
أرجعتنى لعنفوان المدعو الشوق
وغادرنى الكلام خلسه



هند كنتِ رائعه
كما من قبل

داش ..الروعه فى قصايدك ..امامها حقيقى بتخذلنا التعابير والحروف ..

اعجابك يعنى ان القصيدة جميلة اكيد مادام لامست احساسك

سعيدة بالاعجاب والمرور الآنيق ..

شكراً جميلاً ..

Quote: أمانة عليك وكت أشتاق تجينى براك ..

هند
ما اروعك

والله لاعندي صحة للكسير بعد ده
ولا برفع ضغطي
عديل كده مشيت طوالي
ورديت عشان اقوليك
لابقرا ولا فاضي للغنا السمح البوجع قلبنا في الغربة
والله وربنا بسألني
فتحت البوست جاتني الغنية الفظيعةدي المليانة شجن
اذكرت اي واحدة اشتقت ليها
واي واحده ادتني شاكوش
واي واحدة صديقة
وعرفت بتكوني
كاتبة ليك كلام في الأشواق
إقطع القلب
إختصرت المسألة
وجريت الرد
وتوش على كلامي ده
لابقول ليك قصيدتك سمحة ولا شينة
شكرناك المرة الفاتت
مادايرة تقيفي
شويه شويه
يوم بي طريقتك دي
بتقتلي ليك زول
رهيف
وفلبو ما بستحمل الأشواق
تضحكي ؟؟؟؟

Quote: وحتى النسمة بتسأل عنك

وحتي النسمة بتسأل النسيم أن آتي من الحبيب

عن الذي هواها في الضلوع لم تغيــــــــــب

فأشرقتـــي الرُبــي وأزهرتـــي لنا الدروب,,,

,,, واصلـــــــ هبهبات هذة النســائم،،،

،،،،أبوقصى،،،،

هند كل التحايا

شدني المدخل فدخلت

Quote: صحيح بشتاق ...

فوجدت نصك يفيض روعه

Quote: وأنا المخلوقة شان أهواك

Quote: وأعيش فى الدنيا شان أرجاك

وعندما وجدت نفسي في عمق نصك

خرجت انت

Quote: أمانة عليك وكت أشتاق تجينى بـــراكــ ..

ساقبل دعوتك وعندما اجد اسمك

(( حجيكي براي ))


...
..
.

سعيدة بالحضور العذب استاذ عاطف ..وياريت تجى دايما ..

أشكر لطفك وكلماتك الرقيقة..

شكراً جميلاً ..

مشكور ابوقصى على الطلة الحلوة من جديد ..

تسلم ويسلم لطفك ..شكراً جميلاً ..

Quote: اذكرت اي واحدة اشتقت ليها واي واحده ادتني شاكوش واي واحدة صديقة

اتلومنا لوووول

حقك علينا

استاذ السنى أنت اليوم بتموت ليك زول بخفة الدم دى لووول

يديك ألف عافية ياخفيف الروح ..ربى يخليك بسمة وضحكة وغيمة فرحة ..

مشكور على البهجة ومرورك البفرحنى دائما وجدا ..

أشكر لطفك والروح الحلوة ..شكراً جميلاً ..

الروعه فى احساسك الجميل دكتور نبيل وحضورك الدهشة ..

سعيدة بوجودك هنا تقرأنى ..كن بالجوار ..

أشكرك وأشكر لطفك ..شكراً جميلاً ..

أخاف أن يضيع منى بعضُ جمالكِ ..
قبل أن يرتد الطرف الىّ ، يا هند
فأنتِ تتركين أثر الورد أينما حللتِ ..
وتنثرين أسراب الغيم ،
ووشايات المساء الحالم ،
وليس للعشاق إلا مشيئة البوح ..
ما أجملنا بجواركِ ...

ركن الأشواق الجميله..

حلوه انت ياهند..

هند
النص زي الفاتوا ..
مليان بي روحك .. وغرقان ابداع ..
عارفه انا كنته بقرا نصوصك واقيف وافكر لحظه والقى انو مافي رد اكتبه ..
لي صديقه غاليه
بتحب كتاباتك وبتتابع نصوصك
ادتني مفتاح عرفتك ..
عارفه ..
اجمل حاجه اتقالت في الشوق بقولوها اهلنا بي بساطه وفي كلامهم العادي
"الشوق كتال"
مرات بحلم انو يرجع زمن كان فيهو حب وشوق !!
برجع ليك تاني
كوني دايما
طاقة شوق على الفينا !

Quote: وأنا المخلوقة شان أهواك بصارع فى جوى الإنات وأفضل أرجى يوم جيتك وأعيش فى الدنيا شان أرجاك وأخاف من لحظة تبعدنا وتسرق آجمل اللحظات وأرجع من جديد أحسب وأسأل عنك الغيمات أمانة عليك وكت أشتاق تجينى بـــراكــ ..

هند
جيت تاني اقدم مقطع من نصك هديه لي صديقتي !!
شكرا

هندوية سلام

مرور للتحية..وانا مزنووووووق في الشغل

لكن جايييييك بروااااقه

مليون سلام استاذ محمد وياألف مرحب بيك و بانتظار عودتك ..

امنياتى بالتوفيق فى عملك ومشكور على المرور الجميل ..

يسلم لطفك ..

محظوظة قصيدتى ..وسعيدة باعجابك واعجاب صديقتك استاذ ايمن ..

مشكور على الاختيار والمرور الجميل ..

تسلم ويسلم لطفك ..

الراقى استاذ ايمن ..سلامات ومليون تحية ..

تصدق انا ردك ده قريتو كم مرة وغلبنى ارد عليك ..

لو النص حرك فيك شئ تأكد انو الشئ ده موجود جواك اصلاً ..

أشكر لطفك ومرورك الجميل وكلماتك الدافئة الواضحة واللى جد أدتنى حماس للمواصلة ..

شكراً جميلاً ..

الجمال فى احساسك يامنى يارائعة ..

مشكورة عزيزتى على مرورك ولطفك وتعليقك الجميل ..

تسلمى كتير ..

بشرانا صاحب القلم البديع

ما اجملك انت بحضورك العذب وروحك الجميلة وكلماتك الدافئة

كن بالجوار دائما حتى ننتشى انا وحروفى سعادة ..

أشكر لطفك ومرورك العذب ..

شكراً جميلاً ..

يا سلام عليك يا هند
مبدعة كالمعتاد
(اها ان شاء الله ما يكون خطفها زول)
ضياء

هند .. الأخت الرقيقة
صباح الإنبهار والدهشة الروعة!!

سلام على أناملك التي خطت هذا الدفق والنميق الجزل ، بهذا الدفق عبرت وصورتِ الأشواق وكأنها كائن حي .. صورتها بمعاناة المعايش الذي هام وإستهام كما لو أنه غكتوى بشفة البعد دهرا .. لذا أقول :-

أيتها الشاعرة الحنونة والحنينة في هذا النوع من كتابة الشعر معاناة مضنية . إنها قصيدة تمزج بين تلقائية الألم الذاتي، والتقنيات الأسلوبية التي تصنع لهذا الألم نبرته وتجلياته المختلفة ولعل الألم، وإن لم يتكرر بالمفردة عينها في كل مرة، فهو القاسم المشترك للتجربة التي تنهض عليها معظم اوجدانيات وعبارات القصيدة فتكتسي نوع من الوله والتوله ومعاناة البعاد والفراق لا تترجمها إلا الأشواق .. وأنت ترجمتِ الأشواق قصيداً ونغماً ولحناً ملائكياً .. أحسنت.

Quote: يوم بي طريقتك دي بتقتلي ليك زول ]

أكييييييييييييييييييد الزول ده حايكون أنا

سلامات دكتور عبدالله ..ربنا مايجيب كتل يارب ..الشر بره وبعيد

مشكور على لطفك وذوقك ومرورك الجميل ..

كل الود والتقدير ..تسلم ..

سلامات شاعرنا ابوبكر ويارب كل صباح جميل صباحك ..

الروعه والانبهار فى قصايدك وردودك ياانسان ياطيب ..

حقيقى بالاضافة لكتاباتك الجميلة بتستوقفنى كتير ردودك فى اى بوست

جميلة بليغة حنونة ومشجعة ..الاحترام واللطف ملكة ليست عند الكثيرين

ولكن بحمد الله موجودة فى دواخلك النقية ..

أشكر لطفك وكلماتك اللطيفة المشجعة ..

شكراً جميلاً ..

سلامات فناننا الكبير ضياء ميرغنى ..الابداع فى احساسك الجميل ياراقى ..

أشكرك على ثقتك واختيارك للقصيدة وياريت لو فى امكانى كنت قدمتها ليك

مع كل الامانى الطيبة والود .. لكن القصيدة ماجديدة ونشرتها فى عكس الريح من فترة

واختارها الفنان ياسر مبيوع ولحنها بالفعل ولولا انو لسه ماقدمها للجمهور كنت نزلتها

هنا ملحنة للاستماع ..عموما الجايات أكتر بعون الله ..

أشكر لطفك وحسن تقديرك ..شكراً جميلاً ..

أمانة عليك
وكت أشتاق
تجينى براك

كدة خفة وشلاقة لكن .....

مشكور استاذ الطاهر على المرور والتعليق ..

شكراً جميلاً ..