السرطان يحاصرنا...

05:11 PM Nov, 18 2015

سودانيز اون لاين
علي دفع الله-سنار
مكتبتى
رابط مختصر

ارضنا تسرطنت
ماؤنا تسرطنت
هؤانا تسرطن
دجاجنا تسرطن
رغيفنا تسرطن
خضارنا تسرطن
صحارينا تسرطنت
اقطاننا عدسنا فومنا بصلنا تسرطنوا
اصلنا تسرطن
فصلنا تسرطن
اباؤنا امهاتنا فلذات اكبادنا تسرطنوا
-----؛-----؛
بربكم ماذا نقاوم ...
السرطان الداء ام السرطان الحاكم...
موجوع والله مما رايت ضحايا هذا اللعين في مستشفى الذرة..
ولا زالت الموانيء تنقل الينا حاويات السرطان ...
--------
كلنا نموت في الهامش والمركز
في الهامش نموت بالبراميل المتفجرة...
وفي الشمال نموت بي سرطانات النفايات
وفي الجزيرة نموت بسرطانات القطن المحور والاسمدة الفاسدة والمبيدات الفاسدة...
الكل سيموت في عهد هؤلاء القتلة ..
-----؛؛----؛؛
انهد حيلنا ...ولكن حلفنا بيك وموحدين سنقاوم كل اصناف القتل السرطاني

على دفع الله يا حبيب
تتعدد السرطانات والنتيجة واحدة الموت
هم قالوها انحنا عايزين ربع هذا الشعب والباقي يذهب للجحيم
لذا يتفنون في توزيع أسباب الموت
من لم يمت برصاصهم مات بفعل حاويتهم ومبيداتهم
ومن كتب له النجاة من كل ذلك
مات وهو يتحسر على وطن وإنسان وطن
انا لله وانا اليه راحعون

سرطان في كل مكان..
اما ان الان للتداعي لعمل مجمع طبي لانقاذ مرضى السرطان في بلاد السودان...
-------
اتمنى ذلك ...
اين مشروعك يا دكتورة وضاحة
الموت يحاصر البشر ...مافي يوم يمر الا و شهدنا موت وفي كل الاعمار..الانتشار كبير للمرض اللعين ...
-------
نقراء لافتات على محلات التمباك ..التمباك مسبب للسرطان...وفي نفس الوقت بياخدوا ضرايب زكاة اجور محلية من نفس المكان البسبب السرطان ....
--------
شمروا اياديكم وزارة الصحة لا قدرة لها ولا جدية في محاصرة هذا الانتشار الكبير للسرطان.....

ابو روضة صباحاتك جوابر...
الوضع بقى شيء مقلق بصورة كبيرة ..قبل كم ماتت جارتنا فايزة وبكل اسف اكتشفت السرطان بعد ان تمكن منها ..عندها ولد واخد شغال وكان كل دنياها ..لمن كانت في لحظاتها الاخيرة اصرت انو ولدها يعقدوا ليه ويحننو قدامها وفرحت وغنت وفي نفس الليلة ودعت الدنيا ...وقبلها قريبتنا برضو زولة اجمل من الجمال ..وقبلهم بعام عمي وكنت اتردد علي زيارتو في مستشفى الذرة في مدني وشفت العجب ..اطفال يقطعوا القلب وشباب زي الورد وشيوخ ونساء في مقام امهاتنا وكل يوم نودع واحد ...الموت يحاصر العنابر كل يوم ....
--؛؛؛؛----؛؛؛
السرطان يحاصرنا في كل مناحي حياتنا ...اتخيل يا اخي انت تمشي السوق تشتري لي اولادك السرطان ..
ولا زال المؤتمرجية يتداعون للحوار الوطني ...من ستحكمون ايها الاوغاد ..بهذا الوضع لن تجدوا ما تحكموه...
المواطن محاصر بالموت في كل شيء..

اقول شنو،،،، خلاص يا اخي

يا علي دفع الله
سلامات .. ربنا يرحمهم جميعاً وحمانا الله وأحبابنا من هذا الوباء
الحقيقة دي بقت واضحة وظاهرة وللأسف مافي زول داير ينتبه لها
أنا كنت مفتكر المصيبة دي عندنا نحن في نهر النيل والشمالية لكن اكتشفت إنها وباء يشمل الجزيرة أيضاً
ومؤخراً وصل للقضارف

الحقيقة هي المبيدات وشركات التعدين يعتبرا المسئول الأول عن هذه المصيبة التي حلت علينا
المبيدات بصفة خاصة
التعامل غير المسئول مع المبيدات من قبل المزارعين هو السبب في توسع رقعة الخطر
المزارع اصبح تاجر يريد أن ينتج أكبر قدر من المحاصيل بدون تعب
فيضطر لإغراق الأرض بمبيدات الحشائش ومبيدات الآفات
فينتج محصول مسمم، والأخطر من ذلك الأرض نفسها تتسمم وكل ما ينتج فيها بعد ذلك يعتبر غير صالح للأكل
لو فحصت الخضروات والمنتجات الزراعية لوجد 80% منها غير صالحة للاستهلاك
وفي ظل غياب كامل لحماية المستهلك والسلطات الرقابية
ما زلنا نرى قمة جبل الجليد
في قرانا الصغيرة على نهر عطبرة، قبل عشرة سنوات فقط كنا نسمع بالسرطان ولا نراه
الآن اصبح خطراً يهدد حياة الكثيرين، بل فتك بكثير منهم
السرطان ، الفشل الكلوي، أمراض القلب
كلها تقود مباشرة الى استهلاك الإنسان لكميات عالية من السموم، عن طريق الأكل
ولا نحتاج الى كبير عناء لنفهم إن السبب هو المبيدات

الحل هو مقاطعة المنتجات الزراعية تماماً .. نعم المسألة صعبة لكن الناس ممكن يزرعوا في بيوتهم
وينتجوا خضرواتهم
وخاصة البيوت الريفية كبيرة نسبياً
وتنظيم حملات شعبية لمراقبة المنتجات الزراعية
في إجازتي الأخيرة لاحظت تغير في شكل وطعم البطيخ والطماطم .. البطيخ بالذات لم يعد بطيخنا البنعرفو
البصل يعتبر أخطر منتج زراعي نسبة للكمية الهائلة من المبيد التي تستخدم في زراعته
يليه الطماطم
ثم الأسود
والبطيخ
حذروا أقاربكم من هذه المخاطر، هذه السموم الخضراء يجب التصدي لها
ولا تنتظروا أي خطوة من قبل الحكومة
نحن في حالة حرب تهدد وجودنا .. الأمر أخطر مما تظن ولا يقتصر فقط على حاويات نفايات
هذه حرب يجب أن نواجهها كشعب ..
الحلول في يدنا نحن .. حتى لو دعى الأمر لتكوين جمعيات شعبية لحماية المستهلك
ثم هناك ملاحظة أخرى، أي شخص يأتي من خارج المنطقة لاستئجار أرض خذوا حذركم منه
فهؤلاء أسميهم أنا قتلة الأرض
يأتي ويغري صاحب الأرض بمبلغ ضخم لاستئجار الأرض
يزرع فيها طماطم أو بصل
يغرقها بالأسمدة والمبيدات .. ينتج إنتاج عالي جداً
لكنه يترك الأرض خلفه مسمومة، كل إنتاجها بعد ذلك غير صالح للاستهلاك
ويستمر تسممها لأربعة مواسم
مع احتمالية أن تتسرب هذه السموم للمياه التي تشرب منها الأرض، وتسقى منها البهائم
نصيحتي
أي إنتاج من الجزيرة والخرطوم ونهر النيل .. خذ حذرك منه فهو غالباً مسموم ومسرطن
وإن استطعت أن تصل لأي منتج من كردفان أو النيل الأزرق فهو الأفضل نسبياً
ونسأل الله لنا ولكم العافية

على دفع الله سلام يا جميل،

انت عارف انو الضغوط الهائلة و التوتر و الاحباط و سوء التغذية بتضعف المناعة لى درجة رهيبة و تتسبب فى تغيير كيمياء الجسم و ممكن تسبب السرطان و امراض القلب و غيرو، و الله انا شفت حالات بتاعة حميات مجهولة المصدر فى السودان و أعراضها شبيهة بأعراض السرطان، المريض الا يدوهو خمسين لتر انتى بايوتك بالوريد حتى يبقى كويس وده بعد ما يكون حيله اتهدا. ده طبعاً بالأضافة الى اللستة الطويلة اللى ذكرتها انت و الاخ بدر الدين.

المصيبة انو نحن بقينا راجين الله فى الكريبة و ما شايفين أى ضوء فى هذا النفق المظلم لا فى نصو ولا فى نهايتو بس فى النهاية رحمة ربنا أوسع من كل الظلم و القهر.

حباب ود دفع الله
وضيوفه
شوف دي القضية الملحة .. اياهو الموت .. كان حروب ولا ففر ولا اعتقال والسرطان ميتة وخراب ديار .. ياكل القدامك والوراك ويترك ورثتك عالة يتكففون الناس
لا يمر يوم والا تسمع باصابة احد تعرفه او موت احد تعرفه
النفايات المدفونة
اللعبات المستوردة
الاجهزة المستوردة
كل من هب ودب لافح شنطتو وماشي الصين وخامي وجاي
الحكومة لا دور لها سوي الجباية
المبيدات
الطماطم والعجور والبطيخ ووو كل مسرطن والحكومة بتعرف الجبايات بس

حباب ود دفع الله
وضيوفه
شوف دي القضية الملحة .. اياهو الموت .. كان حروب ولا ففر ولا اعتقال والسرطان ميتة وخراب ديار .. ياكل القدامك والوراك ويترك ورثتك عالة يتكففون الناس
لا يمر يوم والا تسمع باصابة احد تعرفه او موت احد تعرفه
النفايات المدفونة
اللعبات المستوردة
الاجهزة المستوردة
كل من هب ودب لافح شنطتو وماشي الصين وخامي وجاي
الحكومة لا دور لها سوي الجباية
المبيدات
الطماطم والعجور والبطيخ ووو كل مسرطن والحكومة بتعرف الجبايات بس

ود دفع الله سلام
السرطان الحقيقي هو سكوت الجماهير واستسلامها لما يجري من جرائم ومؤامرات ضده ..

Quote: ارضنا تسرطنت ماؤنا تسرطنت هؤانا تسرطن دجاجنا تسرطن رغيفنا تسرطن خضارنا تسرطن صحارينا تسرطنت اقطاننا عدسنا فومنا بصلنا تسرطنوا اصلنا تسرطن فصلنا تسرطن اباؤنا امهاتنا فلذات اكبادنا تسرطنوا

الشعب إتعصر واتمصر بالغلاء والمرض وهاهى الحاويات المحملة بالمخدرات تتربص

بعقول من فلت (السرطان أمامك والمخدر خلفك )

بشر بهذه الأحقاد والأطماع لم يمر على الكرة الأرضية منذ نشأتها ولنا أن نتساءل دائما

من أين أتى هؤلاء ؟

مع التحية الأخ على دفع الله

الاصدقاء الاعزاء تحياتي
الاخ بدر الدين بابكر فعلا كل ما اضفته هو عين الحقيقة جميع مستهلكاتنا اليومية عبارة عن وكر سرطاني ..و حتى ناس المواصفات لا يهمهم غير غرامات تجار الجملة في تواريخ انتهاء الصلاحية فقط ...
الاخ انور تاج السر فعلا غير السرطانات توجد امراض عدة ونسبة للطابع المتخلف لدي الاطباء وفحصي المعامل زادت الطين بلة حيث التشخيص الافتراضي وتكرار وتبديل الادوية هي ايضا يمكن ان تقود الى مناعة وتطور المرض للاسواء..
الاخ عبد الحفيظ ابو سن الوضع اصبح كارثة عديل يا اخي كل ما تسمع بي خبر وفاة تلقى معظمها بسبب السرطان ...غايتو انا ما عارف السودانيين ديل عملو شنو والله حالهم يحنن..تتذكر زماااان حبوباتنا بقولن ليه المرض الكعب وبنطقنو الصلطان..هسي بقى تسمع وتشوف ناس كتار عندهم .بس المؤلم وبقطع القلب حق الشفع يا اخييي..
الاخ عارف ناشد تحياتي يا اخي والله الشعب بقى حيلو مهدود وزيتو طالع يا اخي نص الشعب بقى مكشر وقرفان ...الله يكون في عوننا..
الاخ جمال خضر فعلا الوضع بقى ملان اوبيءة سرطان مخدرات حتى الطلاب الخريجين من الفاقة والعوز والله تلقاه اتخرج قبل سنة تشوفو تقول ليه عشرين سنة مما اتخرج هموم وقرف ومسؤوليات وتفكير في المخارجة ...
-------
الحال اصبح معقد ...ودي الحلقة العاوزين الاسلاميون يوصلونا ليها ..الشعب اصبح في وادي واهل السياسة من معارضة ونظام في عدة اودية ..
الشعب اصبح يا عيان يا زاير زول عيان يا ماشي لي وفاة يا ماشي يفتش لقمة عيشو ..اصبحنا شعب ماشي ..
في فرق بين الشعب المنتج والشعب الماشي ..نحن شعب زي ما بقولوا المصريين جاري ورى لقمة عيشو ..وحتى الناس المتمكنين في السوق اصبحوا معظمهم على كف عفربت موسم زراعي فاشل والتجار اصبحوا محاصرين بتجارة جديدة اسمها الكسر وكل يوم بتسمع فلان طيارتو قامت ...
الكلام الفي النص الكتبتو اصلا ما خارج موضوع السرطان ...بل مكمل ليه لانو الحالة العامة في الوطن تشبه المريض بالسرطان موت بالبطيء..
----------------
اتمنى من كل من يجد فرصة يزور مستشفى الذرة الخاصة بمرضى السرطان سواء الخرطوم او مدني او اي مكان اخر ..وشوفوا الكارثة ..واتمنى انو نعمل حاجة ونتنادى لعمل محمع طبي متخصص نقدر نقدم فيه خدمة لما تبقى حي من هذا الداء اللعين وخصوصا الاطفال....
ربنا يكتب العافية لكل مريض ولا يصاب اي عزيز لديكم..
تحياتي

Up
فوق
اصلا ما بحب الحركة دي..
لكن بحكم اهمية الموضوع عملتها....
بس خلاص

حكومة المؤتمر الوطني الكيزانية تعامل الوطن بحساب الربح والخسارة وتتجاهل تماما ان هناك بشر يعيشون فيه منذ فجر التاريخ
لا يهم ان يصاب كل السودان بالسرطانات او غيرها من الكوارث لكن المهم استلام العمولات والارباح المادية التي تنتفخ بها جيوبهم وحساباتهم البنكية في ماليزيا
هناك ايضا مصدر للسرطانات اغفله الاعلام عمدا وهو ابراج الضغط العالي رديئة الصنع والتي تمر في قلب الاحياء السكنية وهي ذات علاقة كبيرة بسرطانات الدم التي انتشرت في الآونة الاخيرة نتاج حتمي لها
نوقش هذا الموضوع بشي من استفاضة في بوست قديم حواه هذا المنبر
http://sudaneseonline.com/board/277/msg/%D8%A7%D8%A8%D8%B1%D8%A7%D8%AC-%D8%A7%D9%84%D8%B6%D8%BA%D8%B7-%D8%A7%D9%84%D8%B9%D8%A7%D9%84%D9%8A-%...%85--1189413727.html

تحياتي الزميل علي والمتداخلين

تحياتي صديقي عوض
فعلا سرطان في كل مكان...
نتمنى السلامة للجميع