السلام عليكم و رحمة الله و بركاته.. اما بعد ... حمدا لله على السلامة ياخ ... ان شاء الله كل الامور سالكة و الامن مستتب .... الزول الجبتو مع زمرته دا غناي لكن بعمل ليهو حركات كدا ما حلوة ... الله يرحمو و يغفر ليه الجابري بدون الحركات دي كان مبدع ...
Quote: الزول الجبتو مع زمرته دا غناي لكن بعمل ليهو حركات كدا ما حلوة ...
(غَمِّد) واسمع يا أبا حسين.. عارف يا شاب، أصلو لا أميل للإستماع لأغنيات الجابري من حنجرة غير تلك التي غابت عنا برحيله ، لكن الشباب ديل - بمن فيهم زمراوي - بنريدم لأنهم بريدوا الجابري ولأنهم يجيدون الغناء وعشان كدا قصدت أجيب (تيه واتاكا) نموذجا، محمد زمراوي عندما يغني للجابري بيطلع من هدومو ، دا مجذوب يُدعى له بالثبات وليس العِتاب، والحمدلله وقفت على كدا.. سبق ورددت هنا ، حد الملل، أنه روي عن م.ع (عليه الرحمة) وهو صديق لصيق بعبدالعزيز داؤود وكان يلازمه في جلسات الطرب، روي أنه ما أن يبلغ به الطرب مداه ويحلق في حيث لاكائنات تمر يقوم يشرِّط جلابيتو سيما في أغنية مساء الخير وتحديدا عند(بحنانك أنا مستجير)، أها قالوا في إحدى القعدات واحد طلب من عبدالعزيز يغني مساء الخير وكان م.ع حاضرا ، ابوداؤود قال ليهو والله أنا ما عندي مانع لكن قبال ما نغني م.ع دا شوفوا ليهو عراقي قديم..
Quote: ود يا أبو حسين احمد الجابري الأصل .. وهو المبدع بدون أي حركات كما تقول
يا بسمات الجابري دا لا بتكرر و لا بتقلد .... ياهو دا صوتو بدون تعب و بدون اي جهد فنان مبدع قدم اغاني خالدة ... تحياتي و احترامي
يا ود حامد دفعتك عبد العزيز محمد داوؤد دا كان بقعد في تومو شيك ... انا و ابن عمي كنا بنفتش لي صاحبنا لي جزمة مقاسو .. صاحبنا كراعو ما شاء الله ...😂😂😂 يازول بدينا من باتا و بعدو ابو سلامة و ااااخر فرصة لينا كانت تومو شيك ... دخلنا قلنا لي الراجل جيب جزمة اكبر مقاس عندك ... الراجل طلع جابا من المخزن شكلها كدا بتاخد مساحة كبيرة في المحل .. يازول انا و ابن عمي بنشاكل في الجزمة عشان صاحبنا يلبسها ... اسمع ليك واحد بي وراي قال لي :- اسمع صاحبكم دا ودوهو المصنع ... اتلفت عايز اشاكلو .... لقيتو ابو داود ... راجل كان نكتة الله يرحمو و يغفر ليه ...
Post: #12 Title: Re: زمرة زمراوي.. Author: محمد المرتضى حامد Date: 11-19-2015, 10:10 AM Parent: #11
(الشاب)* أبوحسين..
ما لا أستطيع استيعابه ، في هذا الزمن الغيهب، أن الأصوات الجميلة لاتجد لها مساحة في إعلامنا التعيس وربما تلك محمدة ، جُل الذين يقدمهم لنا إعلامنا الآن أناس بلا موهبة ، سيما (مَجَلبطي) الشعر والشعور بسوائل و(جل) والذين التزموا بتجفيف وجداننا ومآقينا وهم يرتدون الشورتات البرتقاليه والبرمودا الفوشي والسلاسل والأسورة، زي ديل زمان لو مروا بشارع النيل ساكت بيفتحوا ضدهم بلاغ بتهمة الإخلال بالحياء العام،المطربون الأصائل يتم تداول أغانيهم في الخاص فيسكرونك بأداء شاهق يأخذ روحك ويردها كيف شاء. في زمن التحاريق هذا عليك بالإعتكاف في محراب هاشم حبيب الله ورفاقه الأماجد أو اعتزال الجمال..
تحية فورية للزمرة الجابرية.
-
* قلت لي تومو شيك؟
Post: #13 Title: Re: زمرة زمراوي.. Author: حمد عبد الغفار عمر Date: 11-19-2015, 07:50 PM Parent: #12
تحايا يا مولانا
زمراوي دا ما عندك طريقة غير إنك تسمعو لو عينك وقعت فيهو
Quote: زمراوي دا ما عندك طريقة غير إنك تسمعو لو عينك وقعت فيهو
وما عندك طريقة غير إنك تعاين ليهو لو تغنى للجابري.. ثمة مغنين تضيف لغة الجسد الكثير إلى أصواتهم كخضر بشير وزمراوي منهم ، وثمة مغنين ومغنيات تجري عليهم مقولة ( أن تسمع بالمعيدي..)
اي قلت ليك تومو شيك ... الختيت قبلها النجمة بتاعة يا شاب .. 😂 غايتو الحياة معاكم بقت قلع ... 😂😂😂 بعدين شايفك كررت لي يا شاب مرتين في مداخلتين مجاملة لطيفة و ل طمع في اني ارد ليك المجاملة اللطيفة دي ... غايتو مني ما بتلقاها .... ياخي زمراوي دا غناي نعم لكن بذكرني اسماعيل ياسين ... 😂😂😂😂
