عزو والحيوانات الاليفة

11:25 PM Nov, 17 2015

سودانيز اون لاين
Tagelsir Elmelik-فرجينيا الولايات المتحدة
مكتبتى
رابط مختصر

عزو والحيوانات الاليفه

(تعرف يا تاجو، سمعت تحت تحت، انك لو عايز تجكس في امريكا، تسعي ليك كلب، اها الجكس طوالي قالو يجوك طايرات ... اوووو كيوت، اسمو منو عمرو كم، والحنك يِنقرِش، والتلفونات تبودلت، انا معرفتي بالكلاب دي
غير كلب مركوب العرب التفته داك، ومعاه شجر النيم في السودان، حاجتين في اي حتة بتلقاهم، ماعندي تاني عرفة، وغير حيمورة يقرب مني، بفكو في قدومو لمن يعرف حاجة، وبعرف كمان الحنة في البيوت، بزرعوها عشان
يعملو منها سيطان فيجيتيريان، يدقو بيها الشفع، ماعلينا المهم، مشيت اشتري لي دوقي، لقيتم اشكال والوان والاسعار نار، اخويا لينا افروميريكان قالي تشتري كلب؟ يا زول القرش ما بجي بالساهل، باقي هم في الملح ده، كان
يختفو ختف (عند الشرطة يسمي هذا السلوك سرقه)، مابقعدو ساي، قالي امشي الشلتر، كلاب ضاله حلاة الدنيا عليها، ومشيت في ليل من الغربة، يا قول البليبلات، كلامو الرجل الجاكسوني طلع صح، لقيت القفاصة ملانة،
هوهو وسيك سيك، الاكل والشراب والكندشة، واحدين كده بشبهو لي ناس عديل لاقيتم، تميت المعامله، طبقت الجرو بعد توقيعات وحلفان، وقالو لي الله مرقك الاكسنت بتاعك ماتقيل، الكلاب دي ما بتحب الناس بتاعين
ازواظ ونو طايم فوريو، شفت كيف، لفحت معاي شوال ردة عشان حكايه التبول دي، واطعمة من البقاله، واحدات ماركة الكديسه، وساردين للكلاب (ضقتو لقيتو احسن من حقنا)، مشينا عيادة البيطار حجزنا ليه لكشف الاسنان، وقالو
لي البروستاتا لسة بدري عليها، قلت ليهم لا بس للضمان كده.
ريحنا في البيت، وحصل التآلف والتعارف والمودة، يا قول الكاشف، اها قم بنا يا صاح حي الربيع حديقة الارواح، الواطا عصرت والحروم بكونن في النزهة، البودول الانيق هز ضنيبو، ومرقنا وشلنا عصينا، على الحرية منو بوصينا.
مشينا دغري علي " جنينة النزهة" لفة لفتين قعدنا في كنبه، جا ماري فينا واحد من بتاعين العجلات ديك، خبت فرامل مدهشة، كيوت دوقي قال بابتسامة، شكرا ياحبه، سعيك مشكور، فحط خلاص، زولك تكل وداير ياخد ويدي،
قال شبهو على كلبو الضايع، قلت لي ده جا معاي من افريكا؟ قالي ريلي؟؟ عندكم بودولات انتو كمان؟ قلت لي عندنا قراي هاوند احمر برضو، يا معلم الدوقي ده كلفنا كتير، والواطا مغربت، امشي اخد ليك دش وارتاح الله يديك
العافيه، تلقاك ما محتاج لكلب زاتو، الزول كسح بعد ما سل روحي، يلا يا جوني نغير الحته، اها حمنا كده، والضلام بدا يزيد، لاقتنا مرا غليده كده، قالت لي ارخي حبلك ده من الكلب، يرخي شترك، خنقتو فطستو.. عاينت،
لقيت جوني بقابض في الهوا مقابضة، رخيت الحبل، سمع اضاني قالي في ميزان حسناتك، قلت لي ياود انت بودول كوز ولا شنو؟
تاني يوم النافورة راس، شوية وجا زول خت لي قروش في يدي، ده شنوده، فهمت، شحاد انا يا نجس، ولو فرضنا شحاد، دولار واحد يا اهبل؟ نهاية اليوم عملت زي قريب خمسين دولار، الأمريكان لمن يقومو على المروة، جدعان والله.
المهم، درب النضال اصلا صعيب، شويه كده وجات شله من غادات حسان، خمسة مرة واحدة، بلوندات اصليات، بديت الز في الكلب لقدام، قوم قوم تقوم قيامتك، زولك بدا ينبح "هو هو" يناوش في كلاب
البنات، اخيراً ..... اووووووو، صدحت الاصوات، كيووووت... كووجي كووجي كوووجي، والحنك دور، خمسة بدل واحده، قدامي وخشمي مضرب بينق بونق، اااي نو، راااايت، ريلي، تسالي في خشم ككو، والكلب مع
الكلبات بهناك، شغال نظام داس مشاعرنا وحصل، واليونيفيرس قد ابرة، يا رجل الحنك الرباعي عايز دفع رباعي، فما بالك بالخماسي والسلم الخماسي، انعل ابو التم تم، ولا تلفون ما حصلت، الجماعة مشو وجرحو مشاعري الطفلة.
الصباح جاني ياسر، قالي البودول شنو؟ قلت لي شرك للجكس القوقازي، قالي وبي بودول؟ النوع ده ما بجيب جكس، بجيب الهوا، اهاا عشان كده بتاع العجلة وقف، عرفتَ، من دربي ده اجيب دوبرمان، قالي لا يازول داك
للحرامية، جيب المنقرط داك الدالميشن، كسحت للشلتر، ضحكو وقالو قرررر، قالو لي كمان بقيت تعزل يا مهاميد، ما في دالميشن، عجبك الجيرمان شبرد داك شيلو، بصيت ناحيتو يا قول عادل امام، حاجة جهامة كده،
ده حياكل القدامو ووراه، وشكلو كده بتاع لحم ما حلال، ويكون بضرب السجارة من عيونو الحمر ديل، لا يفتح الله، وتحت تحت قالو بحب رفقة الحروم السناقل، ومن فئة الرجال البواليس، بس، يا جماعة الشتا دخل خلاص، شوفو
لينا كلب نجكس بي، قبال الشمس ما تبقى بطارية، والشجر بدا يحت في الصفق، وطوالي في بالي، واحد زول كده شين ده زي العبلانج، حايم بكلبو النهار كلو، كل خطوتين مفنوس يضاحك في جكسوية،
ويلقط في النمر، سانك يو.. ليتر.. شد حيلك يا بوص، ياقول وكيل عريف التجاني مدرعات الشجرة.
في النهاية لمن فترو من حجتي، الناس ديل قالو لي اصبر اسبوعين تلاتة، بتجي شحنة جديدة، بتلقى "غردك"، مرقت واسفي في عيوني، يا قول حمد، تلاتة اسابيع، و يجي الثانكس قيفينق، والكريسماس، والحريم
في الموسم الزي ده، اختاهن، جنهم هدايا بكونو، واكل برة، ودايرة ارحل لشقة جدية، عتالة عفش في الصقطيبة دي، والعجيبة كمبيوتري طاقي فايروس تعال صلحو، ولستك عربيتي نازل........
يا زول هوي بلا كلب بلا سهر عيونك ليل طويلة اهاتو، يا قول ابو اللمين، يا حبة انا كلبي الواطس ده بس... )

منور و الله يا تاج.
فاقدنك يا رجل و سامعين بيك طوالي في شاشة الفيسبوك و ناسي ناس المنبر.

مشتاقين يا تاج ... وينك يا رجل ...

قصة التشريك بالكلاب موصوفة و مجربة يا حبيب ...

احد زبائني من العزابة المخضرمين ...

اشتريتله بيت منذ 5 سنوات تقريبا في مكان اختاره هو مخصوص لأنه عبارة عن مجمع من الفلل يلتف حول حديقة ضخمة ...

الحديقة مصممه و منمقة للتمشية ... و بها مكان يجتمع فيها الكلاب و أصحابها للعب و التعارف ...

و كل سكان المجمع تتراوح أعمارهم بين ال 25-35 سنة ... و نسبة الفيميل للميل 70 الى 30 تقريبا ...

يعني لو جبت جرقاس ما بتمرق فاضي ...

صديقي العزابي سعى سعي جاد لشراء كلب تشريكي قبل الكلوسنج داي ... و عمل أبحاث أتمنى انو ينشرها لينا هنا ...

المهم حظه العاثر انو قبل ما يتشنكل في الــ Chihuahua

قامت بشنكلته احد الحسان الأصيلين و تزوج غير مأسوفاً على شبابه ...

سلامات يا تاج
ذكّرتني أيام البسبطة و التشريك, حنك عبد الواحد لكن أصلو ما بجلّي خاصة مع الشهادة العربية على أيّامنا كانوا يادوب طالعين بي (مجّاتهم) و الجيم المعطشة العجيبة ديك النشّفت ريقنا :)
الحنك كان تسال من الساعة كم وانت بتأشر لساعتك اللابسة في يدك, باستغراب طبعا الدامة بعد تجاوب حتعاين لي ساعتك يا سألتك او اكتفت بالدهشة, تقوم تقول ليها عارف عندي ساعة و شغالة لكن عايز افتح موضوع معاك, قلتي لي اسمك منو.. وهكذا

ود البشري ليك وحشة ياخي

وطلحة ياخي... لو سامع سلام
ولو ما سامع بلغو عنا


اها شفت حركة الساعة دي لهسي شغالة ههههههههه
بس بقت في شنطة، انتو بس ما استفدتو منها
:)

يحي العزيز
تحيات وسلامات عميقة

زولك ما لحق جرب الكلب؟؟ ههههههههه
الكلب بكون دعى عليه :)

ياخي شوق السنين واتمنى ان نلتقي قريباً

يا سيف العزيز
تحيات وتحيات

والله جنس طولة من المنبر وشباب المنبر الجميلين
الاصدقاء والصحاب، عوداً حميدا مستطاب حاصل
الفيس برضو بتلاقي الشباب بهناك وقدامي الاصدقاء
لكن اها دي قعدة

يا سيف العزيز
تحيات وتحيات

والله جنس طولة من المنبر وشباب المنبر الجميلين
الاصدقاء والصحاب، عوداً حميدا مستطاب حاصل
الفيس برضو بتلاقي الشباب بهناك وقدامي الاصدقاء
لكن اها دي قعدة

Quote: سمع اضاني قالي في ميزان حسناتك، قلت لي ياود انت بودول كوز ولا شنو؟

ههههههه سرد ممتع تحياتي تاج السر

سلام يا الطيب

التحيات والاشواق

عزو لاوز ياخي من الكلب مداراة المومن على نفسه صدقة
الدنيا ما معروفة :) يطلع غواصة هههه

سلام يا تاج
لفت نظري دكتور سيف لبوستك، غاية الطرافة.
أنا معاي كلب جيران معذبني، وأنا الوحيد المتعذب بيه!
تجده هنا:


كلب في الصباح

تاج السر الملك...يا ملك سلام عليكم..ومن شوفتك طولنا......ويا سلام على الحكى الجميل.....واصل بدون فواصل....سلام وتقدير.

اسماعيل أخي العزيز

تحيات زاكيات
اشكرك علي المتابعة والتعليق
نواصل الحديث باذن الله

تذكرت النكتة التى تحكى ذلك الشاب الخجول جدا الذى ذهب للخطوبة واوصاه صديقه عندما عرف بمشكلته فى الخجل ..ان يفتح اى موضوع .عشان يتغلب على مشكلة الخجل .وقد كان ان جلس الشاب مع الفتاة ..ولم يجد اى موضوع وفجاة جات الكديسة ماشة فقال لها دى كديستكم قالت ايوا قال ليها انا داير اعرسك...


التحية لصاحب البوست الاستاد تاج السر على هذا السرد الرائع ..ولاول مرة من زمن طويل تستمتع بالقراءة الى درجة الخوف من ان ينتهى النص..

تاج يا سيد الكلب

مرحب بعودتك الجميلة للمنبر

والكلاب خشم بيوت ... أبقى عشرة على الواتس والفيس وكمان كان بقيت تفتيحة شوية
أمشي مضارب الانستغرام أو أيا كان اسمه والتانغو وأولاد عمهم ... وأخلص لأخوك حقو معاك

جعفر العزيز تحيات واشوق


والله ما منعنا من المنبر الا الجماعة الذكرتهم ديل هههه
المضارب دي يا رجل فيها تفاعل حي، وفيها اصدقاء واساتذة وتلاميذ
وناس دفعة... واستاتسات عبارة عن صحف شخصية يومية، على بال ما تلف بكلبك وترجع
تلقي المنابر قفلت، أها المرة دي قلنا نرجع لقواعدنا ونرتب بيتنا القديم
لك التحية يا صديقي... وربنا يعينا على المواصلة


لكن لقيتك خبير

محمد الحسن سلامات
المدخل للحنك يا زول فن في حد ذاتو ههههه
اها البني ادم الذكر لا يتوقف عن ابتكار الوسائل
اشكرك على التواصل... وسنواصل
تحياتي

سلام يا درش
والشكر لدكتور سيف

شكرا على الرابط نقراه بمزاج