Post: #1
Title: لا وجود للحكومة بدارفور
Author: علي محمد الفكي
Date: 11-11-2015, 06:27 PM
Parent: #0
05:27 PM Nov, 11 2015
سودانيز اون لاين
علي محمد الفكي-
مكتبتى
رابط مختصر
احد الاصدقاء في قروب دفعتنا بالجامعة سالوه وين مختفي
فكان الرد الذي بين من خلاله حالة دارفور اليوم :
كنت في فاشر السلطان الفاشر ابو ذكريا
كنت في سفرية الفاشر .. كتم .. ام برو .. كرنوي .. الطينة
استطيع ان اقول لا وجود لحكومة في تلك المناطق
الحكومة داخل الفاشر فقط
دي حالة لا بحلها حوار ولا مفاوضات
الكل مسلح والكل حكومة الله المستعان
بس ممكن تقول دارفور بقت دويلات
الحكومة تسيطر علي المدن الكبيرة فقط
وسيطرة منقوصة لأنها تعج بمسلحين منفلتين
لا سيطرة عليهم خارج المدن
اي شيخ من الرحل عندو ارضو وجيشو ودولته
ولا يأتمر لاي شخص ويفعل ما بدأ له
ولايمكنك دخول المنطقة الا بعد موافقته
وتحت حراسة من مسلحيه مدفوعة القيمة
وكذلك الحركات الموقعة علي اتفاقيات السلام
مازالت محتفظة بأراضيها وجيوشها
وتتعامل بنفس الطريقة السابقة
وكذلك الحركات التي مازالت تقاتل موجودة في بعض المناطق
وبالاضافة لكدا في حاجة يطلقون عليها المتفلتين والشواذ
ديل مسلحين حايمين بمواتر ينهبوا اي شي
و مافي زراعة نهائيا
وقدر الزراعة الموجودة يعتدي عليها من الرعاة
ولا وجود للقانون في الخلا
|
Post: #2
Title: Re: لا وجود للحكومة بدارفور
Author: Abureesh
Date: 11-11-2015, 06:34 PM
يا زول حمد الله على السلامة
وهو في حكومة في الخرطوم عشان تكون في دارفور؟
|
Post: #3
Title: Re: لا وجود للحكومة بدارفور
Author: علي محمد الفكي
Date: 11-11-2015, 07:06 PM
Parent: #2
الاستاذ ابو الريش
سلمك الله من كل شر
هو صديقي عثمان ابراهيم انا نقلت عنه فقط
المقارنة معدومة ما بين الخرطوم وما رواه عثمان
السؤال هل نتوقع ان ينصلح حال هذا الجزء العزيز في ظل سياسات النظام
التي لاهم لها الا تامين الكراسي
اللهم الطف باهلنا في دارفور
|
Post: #4
Title: Re: لا وجود للحكومة بدارفور
Author: نصار
Date: 11-11-2015, 08:47 PM
Parent: #3
الاخ علي
كنت شغال في الشركة البتورد ليناميد تمويناتها الغذائية
بتنقل عبر الجو و الشاحنات
كنا بنسمع من سواقين الشاحنات العجب العجاب
زي ما الحكومة بتعمل تطويف بحراسة قوافل الشاحنات
في حاجة اسمها التطويف الاهلي
كل منطقة يقيم اهالي حواجز يفرضوا على السواقين رسوم عبور
بعد الدفع يركب معاهم شخص يوصلهم للحاجز التالي
و هكذا لحد يصلوا
ديل بيضمنوا ناسهم
لكن المتفلتين الحكى عنهم صديقك مافي زول عنده سلطان عليهم
حتى الضامن الراكب مع السائق بيهربوا لو اعترضوهم
سواق قال لي بقيت اطبل الباب بطبلة و اقول للمعاي نموت سوى و لا نحى سوى
واحد حكى لي قصة نقلا عن صديقه ضابط امن
قال ليهو كلما نطلع من الفاشر في مجموعة تترصدنا و تضرب لينا عربياتنا
قام بوساطات اتصلوا بقائد الجماعة
فاوضناهوا عاوز شنو بالضبط
قال ليهم عاوز منصب نائب رئيس الجمهورية
شفت المحن الوقعنا فيها...
|
Post: #5
Title: Re: لا وجود للحكومة بدارفور
Author: معاوية المدير
Date: 11-11-2015, 08:53 PM
Parent: #4
| Quote: وهو في حكومة في الخرطوم عشان تكون في دارفور؟ |
هو في حكومة في السودان من اصلو ؟.
السودان تسيطر عليه عصابة ...
|
Post: #6
Title: Re: لا وجود للحكومة بدارفور
Author: علي محمد الفكي
Date: 11-12-2015, 10:18 AM
Parent: #4
الاخ نصار
لك التحية
هذا التردي الامني والانفلات وغياب القانون
المتضرر منه الضعفاء والاطفال والنساء للاسف
نسأل الله ان يلطف باهلنا في دارفور
|
|