ثعبان يثير الرعب بمكتب والي القضارف !!!

07:17 AM Nov, 11 2015
سودانيز اون لاين
يوسف الطيب احمد إدريس-
مكتبتى
رابط مختصر

Quote: ثعبان يثير الرعب بمكتب والي القضارف الراكوبة- القضارف أثار ثعبان يبلغ طوله متر ونصف، الرعب داخل مكتب والي القضارف، المهندس ميرغني صالح ما أدى إلى تعليق دولاب العمل قبل أن يتم قتل الثعبان بواسطة أحد العاملين بأمانة حكومة بالولاية. وقال العامل: "عثرنا على الثعبان بالقرب من الكرسي الخاص لوالي القضارف ولكننا تمكنا من قتله". مؤكدا أن العاملين بأمانة الحكومة أصيبوا بحالة من الرعب والذعر وأبدوا اندهاشهم لصعود الثعبان إلى الطابق الثاني ودخوله مكتب الوالي ولم يستبعدوا أن يكون الثعبان وصل إلى مكتب الوالي بفعل فاعل

Quote: ولم يستبعدوا أن يكون الثعبان وصل إلى مكتب الوالي بفعل فاعل

حقيقة هذا ما جعلني اتوقف في هذا الخبر كثيراً (إن صح) :

هل باتت تسيطر علينا عقلية المؤامرة في كل شيء ؟؟!!

هل فعلاً تم بفعل فاعل ؟!

هل هو أسلوب جديد للعصبة الحاكمة لتنفيذ الاغتيالات وتصفية الحسابات ؟؟!!

هل وصل بهم الحال إلى هذا المستوى ؟!

Quote: ... ولم يستبعدوا أن يكون الثعبان وصل إلى مكتب الوالي بفعل فاعل

الأخ يوسف الطيب
في النهاية، هي رسالة.. ونسأل الله السلامة لأخونا الوالي ولنا..
تحياتي

الأخ الطيب عبد الرحيم

هلا بيك

Quote: في النهاية، هي رسالة.. ونسأل الله السلامة لأخونا الوالي ولنا..

نسأل الله اللطف بأهل السودان من افاعيل الإنقاذ وعجايبها .

بلدا ما فيها ابو القنفد يسرح ويمرح فيها الدبيب

سلام يوسف الطيب

خلق أخبار (من مافي) لعدم وجود أخبار (ســـارة)

... قنافذ .. جقور ... سعالي ... تماسيح .. ضـبوب ..

... برامــج إلهاء الشعب السوداني ...

.... لكي لا يفكر في التغيير

سلام اخي يوسف,,,

ما استوقفني حقيقة هو العنوان نفسه

Quote: أثار ثعبان يبلغ طوله متر ونصف، الرعب داخل مكتب والي القضارف،

القضارف !!!!
ما الخرطوم 2
ولا قاردن سيتي
ومتر ونص ما أناكوندا طولها أكتر من عشرة أمتار!!!

القضارف!!!! والوالي زاتو !!! ورعب عديييل كدا!!!
هو السودان دا غيرو ولا شنو!!!!

خرجت كريمة ولا وين كدا ما عارف برمتها وكل اهلها لإصطياد ثعبان روع أهلها!!!!
ما عارف وين تاني كدا البلد كلها مرقت تشوف تمساح طولو مترين كتلوه!!!

في حاجة غلط غايتو!!!

أنا دابي الكر وانا دابى التكل وانا الدود وأنا العمسيب واناالعشارى واناتمساح الدميرة كلو غنا ساي !!

تحياتى

بما إنو ثعبان وحيوان زاحف فعليه فقط الوقوف عند الطابق الأرضى وعدم التسلق للطابق التاني حيث مكتب عامل أمير المؤمنين

Quote: الثعبان إلى الطابق الثاني ودخوله مكتب الوالي ولم يستبعدوا أن يكون الثعبان وصل إلى مكتب الوالي بفعل فاعل

وغالبا دا بكون أهم خبر نشرتو الجريدة في اليوم داك!!


يكون ثعبان شيوعي أو إسرائيلي

سلام لصاحب البوست وضيوفه،

هى القضارف دى حكايتها شنو؟ مرة طائر تجسس فى مقر جهاز الأمن، ومرة دبيب جاى يحقن الوالى بالسم النقوع الفى بدن نتاح.

دى شنو الخيابة و المياصة دى؟!!!

طبعا السيد الوالي بكون في الحج او العمرة عشان كدي ماعضاهو

الدابي ده بيكون مشى يتظلم للسيد الوالي من إنعدام القنافد وهجرة الجقور للعاصمة بعد إستحلالها للكباري!

أبو القنفد والجقور هم الغذاء المفضل للدبابي والتعابين (الحيوانية) وإن نافسها البشر مؤخراً...





مرة واحد سوري سألني عن معنى لقب الجنرال الدابي بعدما عرف إنو سوداني أممي...
أها بعد ما قلتا ليهو معناتو الثعباني... إتعجب وقال لي هو بيلدغ؟




غايتو ده موضوع كاركاتير جاهز لأخونا الفنان عمر دفع الله!

أخونا جمال
كيف حالك

فعلاً زي ما قلت بلد ما فيها ابو القنفد يقدل فيها الدبيب

وينك ما ظاهر .. بالله ادينا النجيضة في الخبر دا

الأخ الشايقي

تحياتي ،،

فعلاً اختلاق أخبار وصرف نظر للشعب ، لكن لماذا الشعب منساق ورا الحكومة بهذه الدرجة من البله والعبط ؟؟!!

الشعب السوداني فقد عقله وتفكيره وصار منقاداً للعصبة في كل شيء في استسلام عجيب ومريب

وعليكم السلام
اخي ايمن

نعم القضارف هيمسلف ، في تصوري الخاص القضارف ولاية مهمة جداً وفي خضم الصراع الخفي والمحتدم بين أجنحة الإنقاذ المتصارعة لامتلاك نقاط القوة فكل شيء جائز .
فالهدوء السائد الآن وخاصة من المبعدين من واجهة الأحداث (علي عثمان ، نافع ، أسامة عبد الله ... الخ) لا ينبيء بخير أبداً ، في وجهة نظري أنهم يرتبوا لأمر ما وإن تظاهروا بالاندماج في نظام البشير، فهم معروفون بخبثهم ومكرهم.
لذا في رأيي أن كل شيء جائز ، لذا تتعدد الوسائل والهدف واحد ، واعتقد اختيار الولايات لتصفية الحسابات بسبب أن البشير وبكري وجماعتهم محكمين القبضة تماماً في الخرطوم مما يمكن أن تأتيهم القاضية من الأطراف .

نسأل الله السلامة من شرورهم وجعل كيدهم في نحرهم

وعليكم السلام أخونا أنور

Quote: هى القضارف دى حكايتها شنو؟ مرة طائر تجسس فى مقر جهاز الأمن، ومرة دبيب جاى يحقن الوالى بالسم النقوع الفى بدن نتاح.

كما أسلفت في ردي على أخونا أيمن أن القضارف ولاية مهمة (اقتصادية ، سياسية - حدودية مع إثيوبيا - ، اجتماعية - نسبة السكان عالية) لذا من الجائز ان تكون أحد مناطق الصراع بين العصبة الحاكمة .

تسلم

محمد إبراهيم

كيف أحوالك

ديل ما يقابلهم إلا الجن ، أما بشر ، حيوان ما بلم فيهم نهائي ، هم لو بقعدو في مكاتبهم كان دا حالنا ..

ود ياسين

سلامات

Quote: الدابي ده بيكون مشى يتظلم للسيد الوالي من إنعدام القنافد وهجرة الجقور للعاصمة بعد إستحلالها للكباري!

أها مشى وما لقاهو إلا يكتب ليهو (حضرنا ولم نجدكم) !!!


تحياتي

ما يعملوا موضوع ساي..القضارف كلها شقوق وامطار الثعبان عادي ممكن يكون موجود
ويتسلق السور

Quote: فعلاً اختلاق أخبار وصرف نظر للشعب ، لكن لماذا الشعب منساق ورا الحكومة بهذه الدرجة من البله والعبط ؟؟!!

شكرا أخ يوسف

هناك من ينساق وهناك من يتعرض لغسيل الدماغ ويمكنك التجربة بالمبادرة بفتح موضوع نقاش وستجد أناساً متعلمين يؤيدون الباطل, بل وبقوة عين

هذه بلاد فيها شخص اسمه الامين لا يجيد قراءة القرآن (على الهواء مباشرة) ويتخذه الناس شيخاً (بما فيهم علية القوم)