من حق أي اسرة سودانية -ان كان في استطاعتها - ان تستورد سيارة خاصة لا تخضع للجمارك

08:23 AM Nov, 05 2015
سودانيز اون لاين
خالد المبارك-
مكتبتى

بأي وجه حق يمتطي الدستوريون و اسرهم و موظفي الدولة سيارات خاصة توفرها لهم الدولة دون ان يدفعو فيها مليم واحد
بينما الاسر العادية يجب عليها تخليص سيارتها المستوردة من الجمارك مقابل ضعف سعر السيارة نفسها

لماذا تصر الحكومة على ان يقضي الشعب السوداني اموره و يساسق ما بين مكاتبها و افنيتها و ساحاتها و احياءها و مدنها كداري

يا حكومة و يا مسعولين نحن قلنا سيارة خاصة لكل اسرة و ليس لكل فرد و هذا حق طبيعي و ضروري و لا يوجد اي سبب يجعل افندية الجمارك او اي سياسة تضع العراقيل امام تنفيذه و بأقصى سرعة
اليس فيكم من رجل رشيد ؟؟

طبعا لانكم تمتطون الفارهات و قاعدين في الضللة لن تشعروا بمعاناة الناس الماشين كداري و ماشه تحت الشمس
لا تكلمني .. ليس هناك اي سبب على الاطلاق يقف حائلا اما تطبيق هذا الاجراء الا الجشع و المعاملات تحت الطاولات

يجب الطرق على هذا الموضوع مرارا و تكرارا

يا اقنعتنا الحكومة


يا اقنعناها


فيااااااا ممثلينا في المجلس هل انتم ايضا ممن يمتطون فارهات المال العام ام لماذا لم يخطر هذا الموضوع على بالكم
ام صحيح ما رواه بعضهم عنكم بأنكم فقط تصفقون مثل كورس فناني الحقيبة ؟!!
اليس هذا حق و ضرورة قصوى في زمن تباعدت فيه الاسفار و كثرت الامراض و اجراءات الحكومة و جباياتها
الا تستحق الاسر ان تكون لها سيارة خاصة ستاند باي ؟

يا أخوانا ده خالد المبارك الواحد ده بتاع السفارة السودانية فى بريطانيا أم شخص آخر ،،

مهما يكن هذا الخالد فإننى أؤيد رأيه تماماَ ،،

وأذيد على ذلك ،، يقولوا ليك من حق الراجع نهائى يجيب معاه سيارة لحد موديل 5 سنوات ،، طيب أنا مغترب لكن أولادى رجعوا نهائى
عشان تكون مع الأولاد فى جامعاتهم ،، ألا يستحق هذا الشخص سيارة بنفس مميزات الزول الراجع نهائى ؟؟

مع التحية

لازم تدفعو جمارك
يعملو ليكم ظلوطه من وين؟
-
يا حبيبي اب قنفوت واحد بطلع ليك جق الجمارك

Quote: لماذا تصر الحكومة على ان يقضي الشعب السوداني اموره و يساسق ما بين مكاتبها و افنيتها و ساحاتها و احياءها و مدنها كداري

عشان يكونو حاسين بالتميز من الناس لما يعاينو لهم من خلف الزجاج المظلل للسيارات الفارهة
انت نسيت انو الله اورث الارض لعبادو الصالحين مطبقين الشريعة ! يبقى لازم يتميزو على الناس

الجمارك فرض عين على كل سوداني جايب شئ من بره .. حتى لو كان لستك اسبير ...

ياخي ديل عاملين إداره ( للدردقات ) تقول لي عربات ... ايه الترف الانت فيه ده ؟

سلامات أخي خالد المبارك,,

مر على الناس زمان كان مدير الخدمة الإلزامية عميد أو لواء إسمه
عمر الفاروق على ما أذكر وصاحبنا هذا في أحدى تجلياته وهيجانات
ذاك الزمان صرح وصرخ بأعلى صوت بأنو (الخدمة الإلزامية إلزامية
والجوة جوة والبرة برة)

وأنه منذ تاريخه (أوائل التسعينات) لا إعفاء ولا إستثناء ولا تراجع!!!


الراجل كان طيبان ولا يعلم حجم الجبايات التى تنتزعها الدولة من الناس
بإسم كرت سفر أو إعفاء مؤقت أو دائم أو أو أو أسماء اخرى كثيرة!!
تاني يوم كان ضارب ضل النيمة القدام بيتو,,,,

دولة لا مصادر دخل لها ولا إنتاج فيها ولا وبترول لديها ولا زرع ولا ضرع!!!
ولااااااااااااااا التكتح,,,

ترضع من وين وتيوسا الكتاااااااااار وعتانها الأكتر وسخلاتها
الكترن ديل يمصو شنو!!!

دي بلايين داخلة جيوب ناس كتار ويظنونه رزقا !!!!! ما بفكوه ليك!!!
وأظن قريب كان جبت عجلة يسألوك من موديلا ويدفعوك جماركا,,

ما بخجلو يا أخي خالد ما بخجلو والله وما بشبعو كلو كلو,,

تحياتى

تحياتي خالد


فوووووق ونتمني من بكري يعنكش البوست دا فووووووووووووووق

كلام عديل يا خالد

اها
قبل طاشر سنة كدى ركبت لي مع دستوري(نازل في الخرتوم 3)
الرحلة من حي المطار الى وزارة الصحة
بالله العظيم من خلف القزاز اشوف ليك الشعب السوداني دا زي النمل .....
الله يرحم ذلك الدستوري كان بالو واسع جدا مع الشعب العجيب دا المابيعرف قواعد ولا بلاغة المرور
سمع اضاني الزول دا ما سب ولامرة واحدة




يا اخوانا للمرة المليووووون خالد دا ما بتاع السفارروووووووووووووووووووووه

فى تقديرى ان ما ذهب اليه صاحب البوست راى سديد ..

السلام عليكم

التحية لصاحب البوست و المتداخلين الكرام. البوست يهم كل السودانيين في الداخل و الخارج.

للمزيد من المعلومات بالتحديد عن اثار الجمارك علي اسعار السيارات ارجوا الاطلاع علي هذا المنشور

ما هو تبرير الضريبة الجمركية الجنونية علي السيارات المستوردة؟ ما هو تبرير الضريبة الجمركية الجنونية علي السيارات المستوردة؟

.
خالد سلام

ياخ أول بالتبادي فِك لينا الإشتباك بينك وبين ( بتاع السفارة )
وأنا أقترح أن تكتب دائما ( خالد المبارك الما بتاع السفارة )

أنا شخصياً من تاريخ التسجييل مقتنع بأنك ما ( بتاع السفارة ) لكن البيقنع الديكة شنو ؟
أها بتذكر لما الناس شربكو عبدالكريم اللمين وعبدالكريم اللمين طلع عبدالكريم اللمين
وبدا يكتب عبدالكريم اللمين ( الما كيكي )

فياخ فِك لينا الإشتباك دا
كامل المودة

.
أها يا خالد المبارك ( الما بتاع السفارة ) أجيك على موضوع سيارة للأسرة بلا جمارك !!
في موبايلي فديو مصري ، وبصراحة أعاني من بعض أمية كمبيوترية ، يعني ما بعرف
أنقل فديو من الموبايل للكمبيوتر .. عموماً بوصل ليك السالفة .

في الفديو بيطلع واحد مصري على المسرح ويقول :
ــ أنا حرامي ... أيوه أنا حرامي ! .. لأنو لو ما أنا حرامي البوليس والقاضي وبتاع المحكمة
وضابط السجن حيشتغلوا إيه ؟ يعيشو عطاله يعني ؟؟

أها يا خالد ( الما بتاع السفارة ) ..لو كل أسرة أدوها سيارة بدون جمارك ناس سيادة ( المقدم )
يصيروا عطالة يعني ولا الراي شنو ؟

كل المودة

Quote: يا اخوانا للمرة المليووووون خالد دا ما بتاع السفاررووووووووووووو ووووووووه

ههههههههههههههه


...اقترح
لفك هذا الاشتباك
انشاء سفارة للأخ خالد لو ما عندو
علشان يريحونا من العوة العجيبة دي
ولو الميزانية ما بتسمح
يودو سفارة لندن كحل مؤقت

.....
اثني... موضوع السيارة

خالد المبارك أخوى انت شغال Top Down Troubleshooting ؟ خلاص اتحلت مشاكل الغلابة و المساكين الأساسية جداً ماشى تكوس لاستيراد السيارات. ياخ عليك الله وفر للناس أنتى بايوتك بس ان شاء الله عنهم ما ركبو عربات.

التحية للاخوة المتداخلين و شكرا للافادات الثرة سلبية ام ايجابية

ايمن محمود
عوض الشيخ
القاسم
ايمن الطيب
الطيب عباس
محمد الشيخ
الطيب رحمة
محمد
محمد
اسامة
انور

سنعود ان امد الله في الاجال