مسافرين همهم أنفسهم فقط هناك الطريف والعجيب (صور كميات)

07:58 AM Nov, 04 2015
سودانيز اون لاين
Adam Youssif-Jeddah, Saudi Arabia
مكتبتى فى سودانيزاونلاين



كويسة انه مافي سودانيين

السودانيين براءة

أخي آدم
تحياتي
أها دي ماشه وين وجايه من وين بالغوا أو كادوا أن يفعلوا يا زول إنت متأكد إنه الطيارة دي طايره. وبتشبه لي الجارودا (الخطوط الأندونيسية) أو السنغافورية أو الماليزية من لبس المضيفات وعلى فكرة العبد لله طار ذات مرة إلى سنغافورة فحطيت رحالي في مطار شانغي وكانت الرحلة بالخطوط السنغافورية وفعلاً كانت كما يقولون a great new way to fly ولم تكن هناك فوضى كما في هذه الصور.

اخوي الملا عمــــر
تحياتي
هي فعلا طائرة تابعة لاحدى الدول الذكرتها والحاجات الواقعة في الواطة دي نتيجة لمطبات جوية قوية لكن باقي الصور طبعا مبالغة من الركاب ههههههههههههههههه
مع شكري للمرور

العزيز ... آدم ..

غايتو العشوائية بعض مرات مطلوبة ودوليآ كمان .. غايتو احلي
ما في السفرية اصبح المسافرين في طائرة من السكن العشوائي
هههههههههههه . قبل كدا يا ادم شفت لي قطر في الصين عبارة عن
كونتينر مزبلة بدون مؤاخذة والناس قاعدة في وسطو كد النفتشو اجيبو
ليك لو لقيتو .

بوست خطييييير ومن التغيير . ههههههه

سلمت .

ومتابعين ز

اختنا بت عمسيب
لك التحية

Quote: كونتلير مزبلة بدون ماخذة والناس قاعدة في وسطو كد النفتشو اجيبو ليك لو لقيتو .

هههههههههههههه منتظرين بشدة هاتي بسرعة خلينا نشمر هههههههههه

ديل كمان بالغو مسافرون يقيدون ويكممون راكبا مشاغبا على متن الطائرة في الجو

هاكم دي كمان

بس البيبي الكبير داك ما في زول قال ليهو ( ككا) ، ولا صورة مركبة

لو صورة حقيقية دي (أكساقريشن) عديل .

حاجة عجيبة يا آدم أخوي .

حبيبنا ولياب
لك التحية

Quote: بس البيبي الكبير داك ما في زول قال ليهو ( ككا) ، ولا صورة مركبة

يا اخوي الخواجات ديل عاااادي عندهم الـ (ككا) تسوي في الهواء الطلق تسوي قدام ناس! هههههههه
والصورة حقيقية 100% انت ما شفت حاجة لسع
سلمت،،،

الراكب أب فنيله سوداء وبنطلون جينز دا ساعي ليهو كرشه بنذكرني بي كرش الفيل ما حقت بحري لفيل الراسو عديل داك ، والراجل دا لو داير قهوة أو أكل إلى يدهو ليهو في العضل وفي اليد اليمين كمان يا زول ما تعملو حسابكم وراكم سفر

iهههههههههههههههههههههههههههههههههههههههه
يا الملا عمر
الله يجازي شيطانك هههههههههههههههههههههه

الزول أو الزولة دي لا فرق لو كنت أنا واحد من الطاقم الشغال في الرحلة دي بي كل بساطة حا أقول ليهو يا مسافر إدلي وسيب السفر يلا وطراخ أرمي ليهو شنطتو في الأرض




أها دا تلحق تصحيهو أو تسألو يقول ليك بكل صفاقه معليش النوم موت ، يا أخي يموت ضميرك أكتر مما هو ميت أشيلك في رحلة مدة الطيران التقريبي فيها أكتر من 8 ساعات ولو جكساية الواحد بستحمل

almulaomar
دة كمان بدون شرابات الناس الجمبو ديل الريحة ما كتلتهم

غايتو كعوجة الكرعين أنا جربتها، مريحة

سافرت مرة لرحلة امتدت 15 ساعة بدون توقف، البداية كانت مفعمة بالنشاط للمسافرين وفي قمة أناقتهم، بعد 8 ساعات الطائرة بقت زي عنبر داخلية الطلاب، القبيل سمحات ديلك بقن جنس بشتنة حايمات حفيانات، الطائرة بقت زي المسيد. لكن معاهم حق، المقعد أبو 18 بوصة دا بعد ساعتين بتحول لكرسي إعدام، قدر ما تحاول تتعاطف معاهو ما بتجاوب معاك، قاتل الله الدرجة السياحية. معروفة في الأوساط الإعلامية بأعراض الدرجة الاقتصادية (economy class syndrome). "DVT" ______ أنا جادي.

الصورة الأخيرة دي الظاهر عليها في فيلم أمريكي.

فيها ممثلين

ترينس هوارد
كيفن كوستينر

دينق تحياتي
مافي واحد في الإثنين ديل بشبه ترينس هوارد

حبيبنا دينق
لك التحية
فعلا الاثنين ديل ممثلين الفي الصورة الاخيرة لكن ما عارف اسمائهم
تحياتي

يا حاتم
15 ساعة طيران؟
انا من قبيل بفكر في كمية الوقود الموجودة في الطيارة البتكفي ل 15 ساعة سبحان الله
لكن طبعا بخصوص المزز السوفت وير ديل بعد مكياجاتهن والفل ميك اب بعد ال الساعات الطويلة بتبقن زي الواحدة لمن تقوم من النوم هههههههههههههه
تحياتي

العزيز .. ادم ,

سلام ..

لك التحية عزيزي دينق .. مع الاقتباس .

Quote: الصورة الأخيرة دي الظاهر عليها في فيلم أمريكي.

يا دينق اسه الحاصل من المسافرين ديل ما اخير منهم الممثليين ديل ههههههه
والله فوضي وعشوائية تفتح الشهية عديييل للسفر . غايتو انا في الطيارة اول شئ بعملو
بطلع الاحذية . وبكون مضايقة من الجنبي لو كنت قاعدة ناصية ومن الاتنين الجنبي لو كنت
في الوسط وباختصار بكون رافعة حاجب ومنزلة التاني عشان ما يتحركوا كتير ولا يعملو جنس
الحاصل في البوست دا هههههههههه .

هنا الحاصل حاصل لو رفعتي الحاجبين أو غمضتي كلو كلو لأنو ما في تذاكر بي قروش والدخول مجانا والكتابة كذلك وبس لو فرط الواحد في الباسورد ممكن بكري يعمل ميت يعني إلا توسط عشان يدوك واحدة جديدة دحين يا بنت الناس أربطي الحزام وعايني لي قدام

دينق العتب على النظر كلامك صحيح وأسحب مداخلتي أعلاه ولدي الصغيروني قال لي يا أبوي ياها صورة الممثل الفوق دا شكراً

الملا عمر .. السلام عليكم .

Quote: دحين يا بنت الناس أربطي الحزام وعايني لي قدام

سمعآ وطاعا .. اها وان شاء الله الاقلاع متين ؟

هههههههههههههههههه الله يضحكك زي ما ضحكتني يا ملا عمر .

Quote: انا من قبيل بفكر في كمية الوقود الموجودة في الطيارة البتكفي ل 15 ساعة سبحان الله

A340-500

دي بتديك لغاية 18 ساعة، أنا الخمسطاشر ساعة شفت فيهن زي 8 أفلام طقة واحدة، الباقي عديتو ماشي وجاي. يابوي الله عندو حاجات. هسع الإيربص 380 دي بتسافر من دالاس لسيدني 19 ساعة، أبنص واحد لمن الدخان أبياااااض وراها شوف عيني، سواقة مساعدية، شفت كيف وشايلة بشر بيعملوا مظاهرة برااااحة، دايرين ليهم زي 50 بص مواصلات عادي براهم غير العفش عشان يفرغوهم، تقول لي شنو؟ ومال الشركات بتتسابق على الطيارات الصغار ورخاس لشنو؟ مُزز الطيارات هههه ______ أي سؤال؟

** قاتل الله الدرجة السياحية.**

ما بتاعـة الإماراتيـة.

تعرف يا حاتم لو الله غضبان عليك في اي رحلة أكتر من ٧ ساعات تركب اي شركة طيران امريكيه سياحي بزيدوا عدد الكراسي وبضيقو المساحه والله ما تعديها مشي تجيك جلطة في ساقك انا مرة مشيت من دبي لواشنطن في يونايتد ١٣ ساعة حلفت تاني ما اقطع محيط بطيران امريكي

Quote: ما بتاعـة الإماراتيـة.

معاك حق، المرة دي

طياراتم جداد ومضيفاتم شداد.

هههه

يسعد مساك يا آدم

غايتو خليتني أحرم السفر بالطيارة

نت الليلة حمير ساكت

ولو بالغت سيارة

Quote: تعرف يا حاتم لو الله غضبان عليك في اي رحلة أكتر من ٧ ساعات تركب اي شركة طيران امريكيه سياحي بزيدوا عدد الكراسي وبضيقو المساحه والله ما تعديها مشي تجيك جلطة في ساقك انا مرة مشيت من دبي لواشنطن في يونايتد ١٣ ساعة حلفت تاني ما اقطع محيط بطيران امريكي

أيوة لاقتني، لكن ما أكعب من النو فريلز

no frills ديل بيحرموك من أي حاجة، حتى الاسبرين، والله ما يفضل ليك إلا تبقى إرهابي جوي. غايتو الناس البيزيدوا المقاعد ديل ذكروني زمان النيسانات، بعدد ما يتملي بيرصوا صناديق البيبسي في الممر، بيسموهوا "مصران" في أدبيات السفر.

علي طاري اعلان الخطوط الاماراتية
ديل بمارسوا معانا اسوأ انواع التفرقه العنصريه الجويه
أكثر من مرة اسافر من الرياض الي دبي بي طيارة قريبه من الفي الاعلان دى حاجه أبها
ومن دبي للخرطوم لوررى عديل
اول مرة قلت امكن صدفه والطيارات كملن ماباقي الا دى
فى العودة نفس الشى من الخرطوم لدبي لوري مكسر ومن دبي للرياض طيارة خمسة نجوم
ولو ما اخاف الكضب المضيفات زاتن بغيروهن من دبي للخرطوم
وامكن الاكل كمان

يا لطفي الخطوط القطرية تفعل نفس الشيئ في رحلاتها للخرطوم رغم ان هناك ٣ رحلات يوميا والتذكرة غالية ولكنها هملتنا كسودانيون وسبهللتنا

والله يا منتصر حكايتنا بقت حكايه
الخطوط السودانية ابت تبرنا تب

الأخ العزيز لطفي العمدة

Quote: علي طاري اعلان الخطوط الاماراتية ديل بمارسوا معانا اسوأ انواع التفرقه العنصريه الجويه أكثر من مرة اسافر من الرياض الي دبي بي طيارة قريبه من الفي الاعلان دى حاجه أبها

الإٌماراتية براءة يا أخي. المقاطعة المفروضة على السودان لا تتيح لهم تسيير طائرات أمريكية الصنع، وبالتالي ليس لديهم خيار

المقاطعة دي عازلانا من العالم عديل لكن الناس مستهينين بيها وكويس إنو لسة الخطوط دي ما أوقفت رحلاتها للخرطوم.