إنفعاليين ؤُ بس، حليل عازة الراجياكم . صور والعندو صورة يجيبا ...

08:21 PM Oct, 31 2015
سودانيز اون لاين
معاوية المدير-بكندا محافظة البرتا
مكتبتى فى سودانيزاونلاين



وحيد القرن
الكركدن
الخرتيت
زمان كان شعار للسودان، واليوم يصلح شعار لهذه الزُمرة .
من طبائع هذا الحيوان الأهوج أنه يكون يرعي في امان الله تعضيهو ناموسة يقوم
يهيج بجسمو الكبير القوي دا ؤُ يكسر كل ما حولينه، ؤُ فجاءة يهدأ ؤُ يقعد يرعي
زي الماحصل شئ !!!...

<

<

<

>

<

يتساقطون في باحة الوطن المكلوم
كأنهم أعجازُ نخلٍ خاوية ...

البشير قال الكلآم، وآحد نقلو للترابي، الترابي فتاهو للخلق .
الترابي يرى هذه وسيلة له للوصول للحكم، وحسب إعتقاده
في نفسة بيشوف إنو المنقذ للبلد من الفساد، يبقى آيه الفرق ؟؟؟...

<

غايتو بعد الاحتراف الا ديكشنري حتى نفهم هسع في الصور دي منو الكركدن ومنو الكركدي ومنو القيردون

Quote: غايتو بعد الاحتراف الا ديكشنري حتى نفهم هسع في الصور دي منو الكركدن ومنو الكركدي ومنو القيردون

من مهمة الكاتب المحترف ان يجعل القارئ في حيرة حتي يفك
الشفرة في نهاية الرواية .
تنتظر لحدي ما ينتهي الحفل، عشان تحضر معانا الونسة اللذيّذة
فوق الكراسي بعد لمها ...

حفلة جنون عديل كدا يا صديقي
أو say حفلة مجون
بعدها ستلقى الناس صرعى وسط الداره
والزبد يسيل من أفواههم

قادر تتخيل المنظر يا معاوية ؟
يا كاتب يا متعلم انت

ليتهم يتخيرون مفرداتهم ان اعجزهم ان يعملون عقولهم
واطالب بارجاع الخرتيت شعارآ لنا ومعه ديك العده وابو الدقيق لنحوز الحماقة من كل اطرافها


لكم التحايا ود المدير وود الزبير ومنتصر سيد الكركدي وجميع المتداخلين

هسى يعنى يا ود المدير نخت ايدينا فوق جضومنا و نتمحن و نبقى فى منو قال شنو لامن تلم كراسيك
شاحد الله يجوك الجضل و حضنقال يفرتكو ليك لعبتك دى قبل تبدا
___
هسى فى ضمتك دى يا منتصر الكركدى ده وينو هنا .. وللا بس عاوز تكفكفنا بالكافات
و اسفين يا منتصر نفسى قام فى البوست داك

ود المدير
الحزن الاكبر ليس يقال
ثم شفقتنا على مستقبل وطن اسمه السودان

مرحبا الزول ابقدومن عسل
كووووباح ريدة ساي لله في لله وكن طشمنا نطشم بي فهم

Quote: حفلة جنون عديل كدا يا صديقي أو say حفلة مجون بعدها ستلقى الناس صرعى وسط الداره والزبد يسيل من أفواههم قادر تتخيل المنظر يا معاوية ؟ يا كاتب يا متعلم انت

ود الزبير يا صديق،
ما اصعب الجنون عندما يصحب المجون في رحلة داخل نفس البني آدم !، عندها تتلخبط
أسلآك الآدمية وتضرب بلكات الإنسانية وترى الناس سكارى وما هم بسكاري، فهل يعقل
ان يكون إنسان وصل إلي هذه الدرجة في الريادة ؟. المسألة مسألة إنارة طريق للملايين
داخل وطن اصبح حالك الظلآم .
صدقت يا معاوية والله هذا نوع من الصرع نسأل الله ان يقي الوطن شرّه ...

http://www.3rbz.com/مركز تحميل الصور

Quote: ليتهم يتخيرون مفرداتهم ان اعجزهم ان يعملون عقولهم واطالب بارجاع الخرتيت شعارآ لنا ومعه ديك العده وابو الدقيق لنحوز الحماقة من كل اطرافها لكم التحايا ود المدير وود الزبير ومنتصر سيد الكركدي وجميع المتداخلين

حياك الغمام يا إخلاص،
لو عرفوا الإقتداء لأحسنوا المفردات ولحكموا عقولهم، ولسمت نفوسهم .
نعته ربه بقوله، وإنك لعلي خلق عظيم، وقال هو عن نفسه الشريفة، ادبني
ربي فأحسن تأديبي، هكذا هُيئت النفس البشرية لقيادة الإنسانية وإن كانت
علي شاكلة هذا النمط الذي امامنا لانفضوا من حولها وتركوها قائمة،
وهكذا جبل الله النفس البشرية للركون للمعقول من الكلآم والنفور من
ساقط القول . إفتكر الشعب السوداني ما عندوا إستعداد عشان يستبدل
البشر وزمرته بأمثالهم إن لم يكونوا اسواء منهم ...

Quote: هسى يعنى يا ود المدير نخت ايدينا فوق جضومنا و نتمحن و نبقى فى منو قال شنو لامن تلم كراسيك شاحد الله يجوك الجضل و حضنقال يفرتكو ليك لعبتك دى قبل تبدا

المِحنة مِحنة وطن يا جلالدونا،
كل النقول عليهو موسى يطلعلنا فرعون، عليك الله شِن فضّل
بلآ المِحنة ؟...

Quote: ود المدير الحزن الاكبر ليس يقال ثم شفقتنا على مستقبل وطن اسمه السودان

والله يا ود الفكي حالة تشفق،
إنعدم الصليح، بس نحمد الله علي سقوط الأقنعة ...

ينصر دينك ياخ

الكلام دا حاصل في المنبر من زماااااااااااان ...
السكات عليه هو اللي وصلكم للمرحلة دي ....
تحياتي و احترامي للجميع

Quote: مرحبا الزول ابقدومن عسل كووووباح ريدة ساي لله في لله وكن طشمنا نطشم بي فهم

،

وانا احبك في الله الذي احببتني فيه .
بقولوا، القومة للوطن، بس يا ريت يا حامد نقيف بفهم مُش وِقاف
ساكت . كنا نعتقد إنهم سيقومون للوطن شامخي القامات فإذا
هم يسقطون ويزبدون كما وصفهم الأخ ود الزبير ...

يا معاوية ديل ياهم كلهن ولاّ الصور كملت؟
عشان نكلم نااس ابوحسين وتنظير يرسلولك صورهم لو تحب

معاوية المدير. حبابك. يا صديقي

عليك الله يا معاوية. اخونا. نمرة. تلاتة. إديهو بالجنبه الفيها. الحديدة

كرهنا. امسودان ذاتو

كبر

Quote: العلي علي والله كنت منتظر منك الرد ده , عشان تعرف نحنا التحت ديل اول من اعترف بإحترافك , تحليلك للواقع من خلال تفكير المجموعة اياهم بيزيد من شعبيتك بس مع مساعدة عتالة اسع ناس بايضه لينا وسحبوهو وسارتانا وهلما مش احسن ليهم يجرو قدامك شايلين بوستاتك قبل ما تغرق . صدقني يا مؤمن انت احسن من تقرأ الناس في هذا المنبر . عشان كده بقيت محترف يا اخي لم (المجموعة ) في بوست واحد وامشي بيهم سايرين دقداق حفر ترعة حجر رملة خجهم خج بدون رحمة

عاطر التحايا للناس التحت وهم اصلاً فوق ودوماً سيكونوا فوق .
شكراً يا العلي علي ثقتك في شخصي الضعيف وإن شاء إنستر وابقى قدُرا .

البوست دا يا العلي مرآة للناس عشان كل واحد فيهم يجي يشوف وشيهو هنا،
وينظر لحال الناس البيدافع عنهم هل بيشبهوهو ؟، إذا كان بيشبهو اليواصل
في سواتو، أما كان لقاهم ما شبهو اليراجع نفسو .

ألف شكر لك مني ...

Quote: مركز تحميل الصور

سلامات يا معاوية,,,


والقائمة تطول وتطول وتطول..
وكل يمارس السقوط بكل أشكاله,,

والبتهبشو وتقول ليهو كلمة حق ولا راى يخلي القدامو ووراهو ويبقى ليك في رقبتك....

صاحبك بكرى أبوبكر مشارك تماما في إستمرار (الإنفعالات الليها أبعاد دي) !!!!
المغزى شنو من بقاء كميات من الأسفاف والإنحطاط والإنحدار والأولى أن يزال ويماط الأذى
عن الطريق !!!شفنا وقرينا وسمعنا وشمينا زاتو خلاص شيل الفطايس ياخى!!!
المنبر دا مراية نفسو بس وعلاقتو بالواقع مشوهة بشكل كبير,,

قال ديمقراطية قال!!!!!

تحياتى,,

Quote: ينصر دينك ياخ

جزاك الله خير يا يوسف،
ؤُ حباب طلتك ...

Quote: الكلام دا حاصل في المنبر من زماااااااااااان ... السكات عليه هو اللي وصلكم للمرحلة دي .... تحياتي و احترامي للجميع

سلآمات يا ابو حسين .
نبادلك التحايا والإحترام .
النبذ وفاحش القول قطعاً مرفوض للنفس السوّية عبّرت أم لم تعبّر،
فالسكات لا يعني القبول لكن احياناً يكون اجدى .
البوست ليس المقصود به فاحش القول ولو ان ذلك جزء من
موضوعه، في المقام الأوّل البوست القصد منه الهشاشة التي
ظهرت علي هذه الشخصيات ...

الصورة نمرة (3) ده منو؟

Quote: الصورة نمرة (3) ده منو؟

سلآمات يا ابو الريش .

نمرة 3 دا كبر، (Kabar)...

شكرا عزيزى معاوية المدير على حرصك النبيل ..شكرا يادغرى
اقر واعترف بان هنالك عترات فى مسيرتى الاسفيرية ..وربك يسهل
شكرا كتييير يا مواطن

تحياتي معاوية عبيد
احيك والله
وتحياتي لمبارك بطري

Quote: يا معاوية ديل ياهم كلهن ولاّ الصور كملت؟ عشان نكلم نااس ابوحسين وتنظير يرسلولك صورهم لو تحب

يا ود البشرى إنت بس الصق هنا من طرف
وانا بجيهلك ...

Quote: معاوية المدير. حبابك. يا صديقي عليك الله يا معاوية. اخونا. نمرة. تلاتة. إديهو بالجنبه الفيها. الحديدة كرهنا. امسودان ذاتو كبر

كبر يا صاحب حبابك ألف .
فليكن جلد للذات يا صديق فالطريق شائك ووعر ومرهق ولا بُدّ من إلتقاط الأنفاس
ولا بُدّ من التروي، ولا بُدّ من ان نحسب الخطوات ونقيل العثرات . الإنفعال لن
ولم يخدم لنا غرض، وإذا سقطنا في اعيُن الناس الذين ندافع عنهم تبقى مصيبة .
والله يا كبر كان ما طولنا بالنا وتجاوزنا الصغائر من محلنا ما نتحرك . ضبط
النفس مهم، بل هو اهمّ شي لمن سالك سبيل الدفاع عن المظلومين، فالذي يظلم
نفسه قطعاً عاجز عن نصرة المظلومين . انا قايل نقيف شوية مع نفوسنا ؤُ نراجعا
اخير، لأننا إذا تمادينا في السقوط القومة بتكون صعبة .
أحسب الخسارة يا كبر واجرد كويس، ثم ودعك من الإنتصار للذآت فالنفس
احياناً امآرة بالسوء ...

Quote: سلامات يا معاوية,,, والقائمة تطول وتطول وتطول.. وكل يمارس السقوط بكل أشكاله,, والبتهبشو وتقول ليهو كلمة حق ولا راى يخلي القدامو ووراهو ويبقى ليك في رقبتك.... صاحبك بكرى أبوبكر مشارك تماما في إستمرار (الإنفعالات الليها أبعاد دي) !!!! المغزى شنو من بقاء كميات من الأسفاف والإنحطاط والإنحدار والأولى أن يزال ويماط الأذى عن الطريق !!!شفنا وقرينا وسمعنا وشمينا زاتو خلاص شيل الفطايس ياخى!!! المنبر دا مراية نفسو بس وعلاقتو بالواقع مشوهة بشكل كبير,, قال ديمقراطية قال!!!!! تحياتى,

التحية والتقدير أخى معاويه لك ولضيوفك الكرام
ونتمنى ان نشهد منبرا يعكس الوجه الحقيقى للسودان ويعبر عن أعضاء المنبر ولانشك انهم صفوة أهل السودان
شكرا اخى ايمن فقد عبرت عنا

Quote: العندو صور يجيبها ...

كدة كيف ؟؟؟

Quote: سلامات يا معاوية,,, والقائمة تطول وتطول وتطول.. وكل يمارس السقوط بكل أشكاله,, والبتهبشو وتقول ليهو كلمة حق ولا راى يخلي القدامو ووراهو ويبقى ليك في رقبتك.... صاحبك بكرى أبوبكر مشارك تماما في إستمرار (الإنفعالات الليها أبعاد دي) !!!! المغزى شنو من بقاء كميات من الأسفاف والإنحطاط والإنحدار والأولى أن يزال ويماط الأذى عن الطريق !!!شفنا وقرينا وسمعنا وشمينا زاتو خلاص شيل الفطايس ياخى!!! المنبر دا مراية نفسو بس وعلاقتو بالواقع مشوهة بشكل كبير,, قال ديمقراطية قال!!!!! تحياتى,,

ايمن يا صديق،
سلآمات .
نسأل الله ان يتقبل الحجة، وإن شاء الله تكون دعيت لينا .

بالله تخيل هبشة سغيييرة فرتكت الحكاية ؤُ كلو زول كشف اوراقو وسقط علي جنبة، ثم بعد شوية تجي
تلقى الأمر عادي وواحد مشي يتكلم عن الحقيبة والآخر تلقى سارح في البادية، وواحد ينقل الفيس بوك
بغثاءه يجيبو هنا، ؤُ ست الكل في كل تمنطاشر كلمة بالصدفة تطلّع كلمتين صحيحات، ؤُ يرجع الكركدن
بعد كل هذا الدمار يرعي العُشب كأنوا ما حصل شئ في إنتظار ناموسة تانية !.
معقولة يا صديق بعد كل هذه السنين النتيجة صفر !؟، وهل الشعب الكليم في كرامتو دا حا ينتظر تاني ؟،
وهل الوطن المغلوب علي امرو دا حا ينهض ؟، وهل حا يقدر يواكب الأوطان التي سبقتنا بملآيين
السنين الضوئية ؟، وهل سيحدث هذا والحال كما اوضحت في مداخلتك ؟،. الخسران هو الوطن الذي
إعتاد الخسارة، فمن ربح ؟، هاهي التي اكلها السبع إتفضت وقامت، وهاهي النطيحة تناطح، والموقوذة
قد درّ ضرعها، والمتردية صعدت إلي أعلي القمم، وسيظل حال البلد كما هو إن لم يتردى للأسواء
طالما هذا حال من تصدو للدفاع عنها .

يا اخي إن شاء الله إنت ؤُ وِليداتك تبقو طيبين ؟...

جوهر الماساه يكمن في ان الكل يعتقد انه علي حق

Quote: شكرا عزيزى معاوية المدير على حرصك النبيل ..شكرا يادغرى اقر واعترف بان هنالك عترات فى مسيرتى الاسفيرية ..وربك يسهل شكرا كتييير يا مواطن

سلآمات يا معاوية،
أخبارك والوِليدات إن شاء الله تكونوا طيبين ؟.
رغم الخلآفات حوله إلا ان حسن البنا يعتبر قائد ناجح لكن مقولته بخوض الباطل لتحقيق الحق
فشلت، وأفشلت سيد قطب المفكر الذي لا يُشق له غبار لأن الحق ابداً لا يتماشى مع الباطل
وظلّ الفشل ملآزم لجماعتهم .
الشعب السوداني يا معاوية شعب ذو أُصول مهما اصابته المحن تظل هذه الأصول ثابتة وراسخة
وهو لا يقبل ان ينفصل عنها ولا يرضى مِن مَن يأتي مدافعاً عنه بنقيضها، يا معاوية شعب انجب
حميد لا يقبل ان يسمع للسفيه الذي إستشهد بشعره كبر . يا معاوية كان السقوط من اول تجربة
حقيقية لأن الأساس لم يكن متين، لذلك يا معاوية بعد إقرارك هذا أسألك بالله ان تركن لنفسك
بعض الشئ وتقوم بمراجعة تاريخك من يوم اتيت لهذا الصرح وضع أمامك صورة الشعب
السوداني ثم ألصق عليه حصادك فإن وجدته لآئق فامضي في طريقك، وإن وجدته لا يتناسب
وعظمة هذا الشعب فأعرض، الشعب السوداني في غنىً عن فاحش القول والشعب السوداني
لا يعبأ للترهات ولا يلتفت للسفهاء امثال الشاعر الذي اراد كبر ان يقيم حجة بساقط قوله .
يا جماعة الشعب السوداني دا بيتي ؤُ بيتك يا معاوية ؤُ بيت كبر ؤُ بيت صديق الموج ؤُ بيت
تراجي ولا نرضى في بيوتنا الساقط من القول، ولا نرضى ان نقيمها علي اعمدة الباطل.

شكراً ليك يا معاوية واتمني ان تمضي
في مسار التصحيح ...

Quote: Nabeel Ali · الخرطوم التجارية صدقت يا العلي علي ود المدير زول متسق مع نفسه ومرتب افكاره _ جلالدونا اشوفك اتاثرت بي صحبك المستنير المتخلف المتظارف _ لوسي الشترة ركبت البوست ونقشت المحنة قبال ود المدير يلم كراسي البوست وانتا ما زلت ماسك جضومك ههههههه يا اخي الطوربيت قال عايز يتحلل من مسيرته الاسفيرية واحتمال يشارك في الخوار الوطني _ وكلو جايز مع الشوايعة والكيزان

هههههههههههههههه،

يا نبيل يا اخي كتّر خيرك كتير،
والبركة في الضحكة ...

Quote: التحية والتقدير أخى معاويه لك ولضيوفك الكرام ونتمنى ان نشهد منبرا يعكس الوجه الحقيقى للسودان ويعبر عن أعضاء المنبر ولانشك انهم صفوة أهل السودان

حبابك كتيّر أخي عماد وألف مرحب بطلتك .
والله يا ريت يا عماد، ونتمنى ان يحدث ذلك .

تشكر يا ملك ...

Quote: كدة كيف ؟؟؟

ههههههههههه،

يا قسم الفضيل إلتقى جيل البطولآت بجيل التضحيات، ؤُ بتاع
القلوب مرتاحة جاري ليهم السبحة خوفاً من العين، مُش ؟...

Quote: جوهر الماساه يكمن في ان الكل يعتقد انه علي حق

صدقت يا هجو،
ولك مني التحايا النواضر ...