قررت أحترف الكتابة ...

07:04 AM Oct, 28 2015
سودانيز اون لاين
معاوية المدير-بكندا محافظة البرتا
مكتبتى فى سودانيزاونلاين



بعضهم سبقناهم إلي هذه الدنيا بخطوات فسبقونا فراسخ
بسمو نفوسهم وجمالها وأريحيتها، وطيب معشرهم وحميمية
مودتهم . لا أُبالي ان اراهن عليهم، فالمعادن الأصيلة لا تصدأ
ولا تبلى .

I sudaneseonline

يا طلحة عبد الله يا حبيب،
يا اخي إنت بالعافيِ التخصك في المصارين
تبقالك هِدم يا سيدي سروال ؤُ نِعلين .

Quote: قررت أعترف الكتابة ...

اعترف طوالي يا عمك


الاعتراف بالذنب فضيلة

بعد ان ادرجني الأخ طلحة ضمن قائمة اساطين الكتابة في هذا الصرح
المنيف قررت ان لا اتوارى خجلاً ؤُ جاتني هوشة قررت بموجبها ان
اتفرّغ للكتابة رغم علمي المُسبق بانّ حصيلتي وسط شاهين ورفاقه
ستكون صفر . ما معروف يمكن مجاملة طلحة دي تضرب معانا
والوآحد يبقى كاتب، لكن ان اطول المجموعة التي ادرجني طلحة
وسطها فهذا مُرتقىً صعب المنال .

كتّر خيرك يا طلحة ...

Quote: اعترف طوالي يا عمك الاعتراف بالذنب فضيلة

ود الغالي يا غالي،
كتّر خيّرك كتيّر علي التصحيح والذي سبقك
عليهو الأخ جلالدونا فالشكر لكما .
زول بيغلط غلطات زي دي عليك الله مالو ؤُ مال الكتابة ؟.
مُوش حرآم يجيبوهو وسط جودة وشاهين ورفاقهم ؟...

ثم انا زاتي العتالة كسرت ضهري والرُكب بِقن ما ياهِن،
والمشي دا بقى في تلتلة دحين دي رفرصة الوآحد ينجمّ
شوية في العِمير الفضل ...

الاحتراف سيد الأدلة ههههههههههه
يا معاوية ولد المدير دا حقك حسب وجهة نظري
ما جبت حاجة من عندي يا راجل كلس شديد ..
راجع نفسك وشوف قدرك .. تلقاك ملان تواضع وجمال
احترف يا حبيب احترف جدا .

كدى يا ود المدير اول حاجة اطلع من حتة المساكين ديل بتاعت المستنير داكا
اعترف اولا ثم احترف ثانيا
اجمل ما فيك يا مدير .. زى ما قال اخونا كبر ربنا يمسيهو بالخير .. انك بتكتب ذاتك
_____
اخونا طلحة
حياك الغمام بى المطر ام رشاش
ما مشيت بعيد لمّن كان من ضمن حاجاتك و رؤاك الخاصة خيار ود المدير
اها بى اسمك بقولو صدق سيدنا طلحة
اما بالنسبة لى ياخى شرفتنى بى متابعتك لى هترشاتى و لا ازيد
ؤ سلام
جلال فى ثياب العاقلينا

وانا اعترف بكتابتك .


صاحبي ود المدير .. صباحك خير ..

ود المدير يستاهل قطع شك
الناس البتنزف ابداع هنا تستحق الثناء طالما
بكتبو ملح خخخخخخخخخ

Quote: اخونا طلحة سيدنا طلحة

ديل كل واحد براهو واللا مرة كدا ومرة كدا ؟
تحديد المواقف والثبات على المبدأ المعين أمر مهم
وحيوي جدا في عصر اللا مبادئ خخخخخخ

Quote: زول بيغلط غلطات زي دي عليك الله مالو ؤُ مال الكتابة ؟.

ما تهمك الهفوات البسيطة دي انت قدرها وزيادة

المهم انك تحترف واترك لنا نحن الاعتراف


( لا ننقص الاخرين حقوقهم ولكن لنا تميزنا)

المقولة دي مكتوبة كشعار في لافتة حقة حلواني اسمو ود الباشا في سوق الكلاكلة اللفة

Quote: الاحتراف سيد الأدلة ههههههههههه يا معاوية ولد المدير دا حقك حسب وجهة نظري ما جبت حاجة من عندي يا راجل كلس شديد .. راجع نفسك وشوف قدرك .. تلقاك ملان تواضع وجمال احترف يا حبيب احترف جدا .

دقستك يا طلحة إنك جبتني وسط حرسم وكبر، والدرديري ود كباشي، قامات
ما ظنيتني الحقا . يا اخي شكراً علي الكلآم السمح الفوق دا، ؤُ ياهو شبهك .

اليومين ديل البرد داخل علينا وبما انني تفرغت للكتابة تاني حا اقوم الصباح بدري آخد
حمّام دافئ واطلع بالروب اعمل شاي بالنعناع، وجبنة بالزنجبيل ثم اقعد جنب المدفئة
استمع للأخبار حتي حين مواعيد الجرايد، وبمجرد ما يصل بتاع الصُحف امرق إتناولن
من خشم الباب، واسكب فنجان قهوة، ثم اشعل سيكار رغم انني اكره التدخين حد الموت
ؤُ عندي حساسية ضدو، لكن لزوم اني كاتب لازم ادخّن . اطالع الصُحُف واتقصى ما يدور
في العالم ثم اركن للكتابة .
عندما إلتفت نحو النافذة واري الجليد يتساقط، وقد تعرّت الأشجار من اوراقها، وهي إعتادت
ان تفعل ذلك دوماً قبل قدوم الجليد وكأنها تقول له، هئت لك، يجذبني خيال الكاتب من وسط
هذا الجو الكئيب ويحلق بي في فضاءآت الوطن الحبيب لأجد نفسي مستلقيٍ تحت نخلآت
تهبهب فوق جروف السآب، فأطلق العنان للقلم كي يكتب عن مريود ؤُ مريوم ؤُ كيف الحراز
هناك مكجِن البحر، والأشجار هنا تتعرى للجليد، ؤُ مريوم ومريود جسدان عليهما هدوم
بالية لكن يكسوهما العفاف ويزينهما لباس التقوى في كل الفصول والأزمان . لكن هنا وما ادرآك
ما هنا ؟، البرد الذي يزمجر في ظلآم الشتاء يفرض الملآبس علي البشر، لكن بمجرد ان تسطع
شمس الصيف ينسون إنسانيتهم، وان الإنسان عندما بدأت له سوءته راح يحاول سترها بفطرته،
فالتخلي عن الفطرة يفقد الإنسان إنسانيته ويدهش النفس السويّة .
تُرى هل نحن قاعدين نندهش واللآ قاعدين نقهي ؟.

ضربة البدآية لإحتراف الكتابة .
ود المدير ...

هههههه
شكيت محنك ياخ
انا زاتي بحترف معاك
ابطل شغلتي وما شا الله العيال اعمامهم واخوالهم قاعدين بعيشوهم
امشي اتحكر في القهوة من الصباح ممسكا بغليوني نافثا منه الدخان الذي يخرج كدوائر تتشكل وتلتقي لتفترق ثم لتذهب في غياهب النسيان .. كما الانسان ! اتأمل الناس لابحث عن شخوص روايتي .. واشرب قهوتي سكر مظبوط .. واتجاذب اطراف الحديث مع رواد المقهي تواضعا مني
ياخوي الاحتراف دة عندو مكان بنسجل فيهو ولا طلقيبا ساي

ؤ.. هي الكتابة شنو يا ود المدير أخوي؟ سِوى البتسوي فيهو دا !
لن تكتب مثل ود مدثر ولن يكتب مثلك ود كباشي، كلٌ يكتب ذاتَهُ، كما نقل جلالدونا عن كبر
خليك كما أنت يا حبيب، عندك ناسك وبله الفاضل عندو ناسو
ياخ المستنير عندو ناسو، تصدق؟!

: قررت أحترف الكتابة ...

ياود المد ير إنت هسع ما لاعب دولي ... وبرازيلي عديل كِده
بعد دا إلا تبقى كوتش

كُل الود

غايتو ود اب سن و ودالمدير ديل بى احترافيتن دى ح يشربو بنقو
و الله صحى

Quote: لكن هنا وما ادرآك ما هنا ؟، البرد الذي يزمجر في ظلآم الشتاء يفرض الملآبس علي البشر، لكن بمجرد ان تسطع شمس الصيف ينسون إنسانيتهم، وان الإنسان عندما بدأت له سوءته راح يحاول سترها بفطرته،

بعد اعتزالك الورق والغناء والبنق بونق والحلل والكوارع
وبعد قرارك ده انقع مكتبات الازبكية بحثا عن روايات ود المدير

عساك طيب يا ود المدير،


ما عايز أكبر ليك راسك، لكن كتاباتك بتشبه كتابات الأدباء الأخدو جوائز نوبل للاداب، والله صحى:)، بس زبط التوابل شوية حتطلع اخر حلاوة.


أوعى طلحة الرشحك ده يجى يقول خخخخخخخ بتاعتو دى

انت حتي كمان با جلادونا ما تبالغ وتعملنا زينا وزي الناس العاديين .. الانفلات هو ما يميزنا نحن اصلو عندنا نظرة مختلفة للامور وشوفنا ما زي شوف الناس العاديين . عشان كدة سلوكنا ما بشبه سلوك الناس . انت تراه بنقو بقصر نظرك ونحنو نراه كما رآهو بوب مارلي ومن لف لفه
الاحتراف دة اصلو نابع من تدفق الموهبة حتي تنفلت

طيب ما ياهو دا نبع الأسحار والعبارات الحسان ذاتو
يا ود المدير .. الناقصك شنو تاني ؟ ما أظنك محتاج
امارة ولا سيكارة .. قوم إلى دواياتك أو محابرك عسى
أن تحتفي بك الكتابات والموشحات .
ما قصرت أبدا والله بالذات في حتة الدفاية دي خخخخخخخ

Quote: ا اتوارى خجلاً

اها من هسة قمنا على السرقة الأدبية

خليك كاتب عندك أسلوبك الخاص بيك بالله نحن التعابير دي قاعدين نتعب فيها مثلها تماما كلمة " يعج بها"




جمعة مباركة للجميع

Quote: اخونا طلحة سيدنا طلحة ديل كل واحد براهو واللا مرة كدا ومرة كدا ؟ تحديد المواقف والثبات على المبدأ المعين أمر مهم وحيوي جدا في عصر اللا مبادئ خخخخخخ

ديل حاجتين مهمات لتأكيد المحبة و الاحترام
غايتو نقعد نتدهنس كدة عشان ما نطلع من اللستة خخخخخ
---

Quote: ومن لف لفه

غايتو جنس غايتو يا حفيض
مالا و من سار فى دربه .. عيبا لىّ
انفلت لكن ما قدر ده .. و تانى خخخخخ

Quote: : اتوارى خجلاً اها من هسة قمنا على السرقة الأدبية

امنت بالله
من قولة تيت قبضوهو
ده حالتك يا حمد لبد متوارى خجلا !! خخخخخخ
غايتو جنس خاخات

Quote: كدى يا ود المدير اول حاجة اطلع من حتة المساكين ديل بتاعت المستنير داكا اعترف اولا ثم احترف ثانيا اجمل ما فيك يا مدير .. زى ما قال اخونا كبر ربنا يمسيهو بالخير .. انك بتكتب ذاتك

يا جلالدونا كبر دا بيمسكك من إيّدك ؤُ يحومك معاهو الفرقان فريق فريق،
من المحطة ولفريق القطاطي ؤُ يقعد يوصفلك لآمن تشوف السما شايل
شوف العين ؤُ تكرُف الزيّفة .

دائماً ما احادثك من مقهى علي الشارع السياسي وانا جالس وسط الكتب التي امست قراءتها
تستعصي علينا، فأذكر تلك الأيام التي خلت، ويطوف بخاطري زول سمح بالحيل ألا وهو جدي
(عوض الله دبورة). كان آخر عهدي به زرته وانا عريس، وكان دائماً عندما ازوره يتهلل
فرحاً ويبتهج فقد كانت له صُحبة مع الوالد . يومها قلت له بعد ان طفق يحدثني عن عطبرة
واستفاض في الحديث، آيه رايك يا جد انا اجي اسجل ذكرياتك دي ؟. بكل فرح ؤُ ترحيب
بالفكرة قال لي، تعرف يا معاوية جاني عمر الجزلي عشان يسجل معاي برنامج اسماء في
حياتنا قتلو، يا عمر داير تكتلني، لكن تعال يا معاوية وانا بحكيلك تاريخ المدينة . يا جلال في
زحمة الإجازة الممحوقة ما لقيت نفسي إلآ في كندا وكان ذلك آخر عهدي به، له الرحمة
والمغفرة . تعرف يا جلال لآمن اكلمك من علي مقهى في الشارع السياسي بتذكر مكتبته
العامرة التي كانت ملتقى للسياسيين وأهل الفن والرياضيين وجميع ألوان الطيف في
عطبرة، بتذكر مجلة المستقبل، مجلة المصور، مجلة العربي، كتب نجيب محفوظ وإحسان
عبد القدوس، وعبقريات العقاد، والجرايد وريحة الحبر المنبعثة منها عندما تختلط برائحة
الصعوط وروث حصين العتالة، ؤُ ريحة البرسيم، ؤُ ريحة زيت الورش، وكيف كنا في
ذلك الزمن مغرمين بالقراءة التي سرقتها مننا الإنترنت . تعرف بعد اصابتنا الخمالة من
القراءة انا قلت إنتهز فرصة طلحة دي وابقى كاتب، باقيلك بنفع ؟...

Quote: وانا اعترف بكتابتك . صاحبي ود المدير .. صباحك خير ..

بت عمسيب يا صديقة،
يصبحك الله بالخير .

بعد دا ما عندك خيار غير تعترفي، عشان انا قررت
ؤُ ماني متراجع .

كان احد شُفع القطر الفقارا البِفنو الشايلآ إيدُن ؤُ يجرو ساكين القُطارا، الذين وصفهم شاعر
كان يوماً ما وطن حدادي مدادي، وصفهم تضامناً مع حالهم، وغناهم فنان كان وطن ينضح
حنان ويضج ثوره، غناهم ايضاً متعاطفاً معهم . تربي في كنف الفقر، كان بملابسه البالية
الممزقة حافي القدمين يجري المسافات الطويلة مع القطر في غيظ الحر ولفح سموم الخلا
يكورك بصوته المبحوح، كرآمة، كرآمة إلي ان دآرت حلقة الزمن ليزمجر هتلر من سماعة
المزياع حتي يهتزّ فوق الطاولة ويخطب بعنف لا يخلو من تهديد ووعيد مختزلاً سنين حكمه
العجاف في تحدي المحاكم الدولية بإختراق المجالآت الفضائية ليصبح الشعب في سني
حكمه ذلك الطفل البائس الذي كان هو يوماً ما .
حال الأوطان عند ما يحكمها ذوي العاهات .

شئ من تداعيات الكاتب ود المدير ...

تحياتى لجميع الحلوين،

ود المدير انت مافى حاجة بتضيعك غير مباراتك لى جلالدونا ده، ياخى ده زول غير مثقف وانت قلت داير تعحترف (مقصودة) الكتابة فرجائى ان تبارى المثقفين مع العلم اننى لست منهم.

جلالدونا ازيك يا جميل ياخ و الله انت فاكهة هذا البورد العجيب.

Quote: ما تهمك الهفوات البسيطة دي انت قدرها وزيادة المهم انك تحترف واترك لنا نحن الاعتراف ( لا ننقص الاخرين حقوقهم ولكن لنا تميزنا) المقولة دي مكتوبة كشعار في لافتة حقة حلواني اسمو ود الباشا في سوق الكلاكلة اللفة

يا ود الغالي إنت والناس الجوني ديل، هسّع اشكركم كيفِن ؟.
غايتو عِلآ تسولكم شكلة في المنبر دا ؤُ تزحوا لي منها .

بعدينك كان إستمريتو بطريقتكم دي بتلقوني لآعب في برشلونة ...

Quote: ود المدير انت مافى حاجة بتضيعك غير مباراتك لى جلالدونا ده، ياخى ده زول غير مثقف وانت قلت داير تعحترف (مقصودة) الكتابة فرجائى ان تبارى المثقفين مع العلم اننى لست منهم. جلالدونا ازيك يا جميل ياخ و الله انت فاكهة هذا البورد العجيب. ثمة حدود لا يبقى الصبر بعدها فضيلة

غايتو يا انور بقيت زى اخونا الخالدى الضلالى
تفلّق و تداوى

و تشكر على المطايبة و اتمنى اكون دايما عند حس الظن
بالمناسبة جديد ابوسن بعد الاحتراف... سراولينا ...

Quote: هههههه شكيت محنك ياخ انا زاتي بحترف معاك ابطل شغلتي وما شا الله العيال اعمامهم واخوالهم قاعدين بعيشوهم امشي اتحكر في القهوة من الصباح ممسكا بغليوني نافثا منه الدخان الذي يخرج كدوائر تتشكل وتلتقي لتفترق ثم لتذهب في غياهب النسيان .. كما الانسان ! اتأمل الناس لابحث عن شخوص روايتي .. واشرب قهوتي سكر مظبوط .. واتجاذب اطراف الحديث مع رواد المقهي تواضعا مني ياخوي الاحتراف دة عندو مكان بنسجل فيهو ولا طلقيبا ساي

يا ود ابوسن ما بنغبالنا بُكان تسجيل بعدينك الغليون دا لآزم يكون معاهو شنب ماكن
مُصفر من نفث التبغ، وشعر ابيض تخلله بعض السواد غير مُصفف، ؤُ لآمن تتصور
لآزم تخُت يدك كدا ...

Quote: اقوم الصباح بدري آخد حمّام دافئ واطلع بالروب اعمل شاي بالنعناع، وجبنة بالزنجبيل ثم اقعد جنب المدفئة استمع للأخبار حتي حين مواعيد الجرايد، وبمجرد ما يصل بتاع الصُحف امرق إتناولن من خشم الباب، واسكب فنجان قهوة، ثم اشعل سيكار رغم انني اكره التدخين حد الموت ؤُ عندي حساسية ضدو، لكن لزوم اني كاتب لازم ادخّن . اطالع الصُحُف واتقصى ما يدور في العالم ثم اركن للكتابة .

غايتو كان ما قفلت السريا ماظنيتك.

Quote: ؤ.. هي الكتابة شنو يا ود المدير أخوي؟ سِوى البتسوي فيهو دا ! لن تكتب مثل ود مدثر ولن يكتب مثلك ود كباشي، كلٌ يكتب ذاتَهُ، كما نقل جلالدونا عن كبر خليك كما أنت يا حبيب، عندك ناسك وبله الفاضل عندو ناسو ياخ المستنير عندو ناسو، تصدق؟!

تصدق انا وآحد من ناس المستنير دا، لكن اكان قمت عليهو بخلي ريحتو
طير، طير . من اروع رواياته التي كتبها (جك الفول)، عاين جاي، ما تكلم
مصطفى مدثر تقولو، الكاتب ود المدير قال كدا ...

Quote: : قررت أحترف الكتابة ... ياود المد ير إنت هسع ما لاعب دولي ... وبرازيلي عديل كِده بعد دا إلا تبقى كوتش كُل الود

ود المكي حبابو،
نبادلك الوُد .

اكان كدي دربي مرق تب .
عندك وآحد وردة فوق ...

الاستاذ الفاضل معاوية المدير..
سلامات ونثني بشدة اتجاهك للكتابة الاحترافية هي لك وانت أهلاً لها ..

يبقي اكان كدة عليك باللوازم ..

يبقى لازماك تفة وشعر منكوش ودقن لولبية مشرئبة للأسفل.. ( ديل ما عندك ليهن طريقة والله صحي

البديل صلعة وطاقية نجيب محفوظ وغليــون .. وطالما بتكره التدخين عليك بحقة صعوط " وما تنسى النقرة وانت بتفتحها "

وغير البروفايل دا لصورة وانت فاتح كتاب وراخي النضارة..
بعدين ابعد من الرجرجة والدهماء في التداخل هنا ناس حيدر حنين وجلالدونا وود الفكي وهلمجرا ..
خلي مداخلاتك في بوستات الاخرين قليلة واكتفى في بوستاتك بالرد من على شاكلة شكراً لمروركم امتعني مرور الزوار الكرام.. شاكر حسن الظن وهكذا..

افتح برنامج الرسام ودبج ليك صورة غلاف لإصدارك الأول ويكون عنوان جاذب مثل .. مسلك سكينة في قلع الجضُل من الطينة مع لوحة سيريالة كغلاف للكتاب
تأليف الكاتب معاوية المدير.. وبالخلفية تقديم وليكن باسم اي ناقد مشهور محمد طه الملك مثلاً..
وتحته دار الأعضاء البشرية العربية للنشر والتوزيع طبعة سنة 2016م

ولتكن حقوق الطبع محفوظة..


وأركب الدقداق :)

Quote: غايتو عِلآ تسولكم شكلة في المنبر دا ؤُ تزحوا لي منها .

هههههههههههههههههه

كان كدا كفكف اكمامك وشيل عكازك وابقى مارق


باقيلك الشكل الأيام دي في المنبر بفتشولو كتير


راااااااااااااااااااقد وما طلبت الا موجود

Quote: غايتو ود اب سن و ودالمدير ديل بى احترافيتن دى ح يشربو بنقو و الله صحى

يا زول هوي، علي اليمين انا كان نِعِست ساكت ما بجي
داخل منبركم . والله صحي .

كلو ولا كشف الحال ...

Quote: بعد اعتزالك الورق والغناء والبنق بونق والحلل والكوارع وبعد قرارك ده انقع مكتبات الازبكية بحثا عن روايات ود المدير

ههههههههههههههههههههه،

ازبكية في عينك يا ابراهيم ناصر، اقع Chapters يا اخ Chapters ازبكية !؟ إنت
قايلني بن المقفع، ازبكية قال !، . عمر خالد الذي دفعني لإعتزال لعب الورق رجع قال،
لو ما ود المدير رجع هو زاتو حا يعتزل، اما الغنا خليتو لعبد الهادي، والبنق ما عندي
ليهو نضارة، وكان ما ختيتو الكوارع يا ابراهيم يوم بلقاكم ملصقين في الحيط، انا غايتو
لا قاعد اكلآ لا بمشي عليها .
<
هنا تجد حميع إصداراتي يا ابراهومة ...

Quote: عساك طيب يا ود المدير، ما عايز أكبر ليك راسك، لكن كتاباتك بتشبه كتابات الأدباء الأخدو جوائز نوبل للاداب، والله صحى:)، بس زبط التوابل شوية حتطلع اخر حلاوة. أوعى طلحة الرشحك ده يجى يقول خخخخخخخ بتاعتو دى

انور التاج،
تطيب لك العافية يا رجُل .

يا اخوي كبيّر الراس دا كيفنو اول ؟...

Quote: اها من هسة قمنا على السرقة الأدبية خليك كاتب عندك أسلوبك الخاص بيك بالله نحن التعابير دي قاعدين نتعب فيها مثلها تماما كلمة " يعج بها"

الأديب الأريب حمد،
النحرير كمان .

يا اخي هذه من باب تبادل العبارات بين الأدباء وليست من شباك السرقات
الأدبية، لكن وكِت اصلك قررت قفل هذا الباب اوّع بالك اشوفك قاشر
بي يهترف وعلي سجيته ديل اللتنين حقاتي ...

حسة يا ود المدير ،
مش دي سرقة أدبية واضحة كالشمس ،
في كبد السماء ،
تجيب صورة القطار ،
وتختها في البروفايل كمان ،
،،،،

...





عزالدين عباس الفحل
ابوظبي
...

ياخوي وقت احترفنا .. والناس محترفة ! بي احترافنا
ما تشوف لينا ناشر لهلوبة ونجاضة كدة نمسكو مقاولات كتابتنا دي ما تروح بندق في بحر

يا صاحب

احترفتَ الكتابة ولا لسه ؟

Quote: يا صاحب احترفتَ الكتابة ولا لسه ؟

منتظر الحوش يهدأ .


يا هانئ ليك وحشة حركت اشواقنا نحوك ...

Quote: غايتو كان ما قفلت السريا ماظنيتك.

صدقت،
المعجبين مزعجين ياخ ...

Quote: العلي علي اسع من الصباح بفتبصم بالعشرة انك كاتبي المفضل ش علي البوست ده بارك الله في جلالدونا ... المهم ود المدير ا

إنت يا العلي تتعلى ما تدلآ يا بركة من جعل محمد نبئ،
ؤُ يزيدك رب العالمين من فضلو، شاحدك يا كريم ...

Quote: بعدين ابعد من الرجرجة والدهماء في التداخل هنا ناس حيدر حنين وجلالدونا وود الفكي وهلمجرا ..

ود الزين الزين،
شكراً للنصيحة الغالية وسوف آتي لباقي النصايح بالمهلة،
وايضاً سأضع الملك في الإعتبار ...

ود حلتنا ود المدير..
وزي ما اكد ليك طلحة فانت اهل للاحتراف
وجدير بان تكون من ابرع كتاب وادباء المنبر العام..فانت تطوع اللغة كما تريد وتجعل
الحروف تتراقص فرحا والقا..
لكن ما تسيب شغلك وتتفرغ بس للاحتراف..يعني ممكن لمن ترجع من الشغل وتاخد راحة
ساعة وتقوم تشرب فنجان جبنة من نوع جبنة ود الفاضلاب..وانت عارف القهوة بتاعته معمولة
من موية الاتبراوي...وتمسك القلم وتكتب المسودة في ورقة وبعد داك تقبل على الكيبورد..بس ابعد
من التدخين لانه ضار بالصحة..وبتليف الرئة زي ما بقولو الدكاترة..مع ان الدكاترة ذاتهم
بيقولوا الكلام ده والسجاير في خشمه..
..هسع نحن عرفنا ان ود ابوسن ممكن يحترف الكتابة ويخلي شغله عشان اعمامه وخيلانه حيصرفو
على اولاده...وانت البصرف على اولادك منو..؟؟(وجه ضاحك)''
ودمت بالف خير وصحة وعافية