Post: #1
Title: غيمه و نِغيمه
Author: أبوذر بابكر
Date: 10-25-2015, 12:58 PM
Parent: #0
11:58 AM Oct, 25 2015
سودانيز اون لاين
أبوذر بابكر-
مكتبتى فى سودانيزاونلاين
كنتى الغيمة
والدنيا خريف
وكنتى النسمة
والدنيا هجير
وعيون الواطا كانت
مكحله بالندى
كنتى الفرحة
والدنيا عيد
يا وعد عمرى الأخير
وكان عرس الشمس والنور
النهار برش الرقيص
شغف الفراشات بالزهور
عبق البنيات قام فرح
اتمد فى طرب النشيد
ونبت بدور
فوق السباته
ارتاح عليها اتوسدا
ضلا ضليل
احساس اليف
حلما جميل
موال وريف
انشرا فى الروح و المدى
وقوس قزح كان زى عريس
زرع فى وجناتك الوانو
فى جرتق سماحك وابتدا
دوباى مطعم بالنجوم
دفق فى الليله الحانو
غنوات مزركشه بالعديل
نمات تهز عصب الغيوم
وتبدا البنيات الرقيص
وقوس قزح واقف عريس
ضو عديلو
هلال وخرزة وقرمصيص
مد غناهو لى عينيك
بياض الفال
خدار الريده يتفتح
طرب موال
بشد حيلو
وجنب عينيك كتب اسمو
نحت فى الفجه عنوانو
مبسوط يبشر في بهاك
يشيل شباله من القمره
يقدل فى بساط ليلو
يا بنيه يا ريحة الأرض
فارسك رفيق الروح
يا ساكنه فى عمق النبض
يا عشم البجيك مجروح
وشايل شيلو
يا بنيه يا تومة الملاك
يمين قومتى بى جيتك
مسير روح الصبر
ساهرتى بى شغف الحوجا
تمرتى جنبات العمر
نورتى فرقات الدجى
سافرتى فى الخاطر
مشاوير انبهار
ستفتى حاجات السفر
ومرقتى زى حس النغمة
جميلة من عصب الوتر
جملتى عتب الإنتظار
وبقيتى دار
|
Post: #2
Title: Re: غيمه و نِغيمه
Author: إدريس محمد إبراهيم
Date: 10-27-2015, 02:45 PM
Parent: #1
الله عليك يا أباذر ياخ ... منتهى الروعه والالق الجميل ... وتاني كمان .. الله عليك ....
|
Post: #3
Title: إمتنان
Author: أبوذر بابكر
Date: 10-29-2015, 09:19 AM
Parent: #2
كتر الله خيرك يا إدريس
و زادك سماحة و طيب و طيبة
وسعادة فياضة
|
Post: #4
Title: Re: إمتنان
Author: الصادق اسماعيل
Date: 10-29-2015, 06:09 PM
Parent: #3
فوق
|
Post: #5
Title: Re: إمتنان
Author: Abdalla Gaafar
Date: 10-31-2015, 07:48 AM
Parent: #4
ابوذر يا صديقي
نسيم حرفك هواك
ضد اتجاه الريح غناك
حلمك غيوم
تطلع من النيل المهاجر فيك
قصيد
يازول مهاجر
لي جمال ضحك البنية
السارحة في عمرك قدر
حلمك مطر
يرسم علي خاطر الدفاتر
خطوتك والليل حداك
قدرك هواك
للمستحيل
والدنيا نيل
مليون سلام
عبد الله جعفر
|
Post: #7
Title: يا بن جعفر
Author: أبوذر بابكر
Date: 11-02-2015, 09:58 AM
ذات شغف يا صاحبى
كنا ننشد:
يا عطرَها
لو أن غيمةَ
تسكن خاطرَ المطر
تفكُ أسرَ قطرةٍ
تبلُ شوقَ زهرةٍ
كنتُ جئتكِ
وفرحتى ايقونةٌ
نجمةٌ صبيةٌ
تخبئ وردَ حلمِها
فى محاجرِ القمر
ذاك كان مبتدأ الشغف بسر الغيوم و سحرها
وكان خبر المداد شائعا بين مرابع النشيد
فهل تطيق فراقا أيها الوجل ؟
هل نطيق غيابا ؟
أحييك
وأهديك كل ما فى الود من عطر
وكل ما فى الإعزاز من إخضرار
|
Post: #6
Title: إمتنان
Author: أبوذر بابكر
Date: 11-02-2015, 09:52 AM
Parent: #4
سلام و تقدير يا الصادق
إنت ذاتك فوق والله
|
Post: #8
Title: Re: إمتنان
Author: ابو جهينة
Date: 11-03-2015, 10:50 AM
Parent: #6
أبا ذر المطر
تحايا وسلام يا صاحب
أما بعد
هنا :
انشرا فى الروح و المدى
وقوس قزح كان زى عريس
زرع فى وجناتك الوانو
فى جرتق سماحك وابتدا
دوباى مطعم بالنجوم
دفق فى الليله الحانو
غنوات مزركشه بالعديل
نمات تهز عصب الغيوم
***
ضجّتْ الأركان برنات نواقيس كانت ترقد في بيات شتوي
سلمتْ يمناك
|
Post: #9
Title: يقين الحضور
Author: أبوذر بابكر
Date: 11-05-2015, 01:40 PM
Parent: #8
حياك الخالق يا أبا جهينة
فدوما عندك الخبر الأكيد
ولديك الظل المديد
نتفيأ حرفك فنسعد
اسعدك الله يا صديقى
|
|