مازالت بضع كلمات لم نقلها وبعض رشفات من الشاي مقعدك شاغرا ولم ينضب معينك خليك هنا يا خية فأنتي وانتن تضفن للموقع انوثة الباذخة والمشرقة واي مكان لا يؤنث لا يؤبه به
ستنا ماشه وين ده شعور بجيني كل حين , الجابرني شنو ؟ ما عاد هنالك ما يقال وقد اغضبت هذا وتجاوزت الحدود مع ذاك ثم انو البلد غرقانه وغلبنا نلحقها ف شنو ال نفرتق بس يا ستنا ده اخر امل في ايصال كلمة لمجموعة واعية طنشي شوية وتعالي اخدي هدنه وانا عارفاك بتحاسبي روحك .... صدقيني الزعلتيهم ديل ما دايرينك تمشي
كونى بيننا للمة جميلة...كونى بيننا لأخاء لم يكتب له الله أن يترجم لأرض الواقع......لاداعى للبعاد بدون أسباب...رحم الله موتنا وموتاك وجميع موتى المسلمين...ستظلى أخت عزيزة كريمة فاضلة...تقديرى وإحترامى
واحد من اولاد أم سويقو بمدني شاكل أهلو وجري قال ماشي البحر ينتحر، أمو بفردة سفنجة وأخواتو من غير تياب الصلاة، وراهو جري، لمان وصلوا البحر لقوهو واقف جنب القيفة بفك في رباط الكبك أمسكك أمسكك حنسك حنسك رجعوهو البيت، بعد الغدا والليمون البارد قال ليهم: وحات سعدابي، المرّة الجاية تكرروها أنتحر ليكم بالكبك
فشنو يا ستهن: عليك يابا سعدابي، كان تمشي نحن يا دوب أبتدينا
Post: #8 Title: Re: وداعا اخوتي بالمنبر !! Author: محمد فضل الله المكى Date: 10-22-2015, 05:01 PM Parent: #7
. ست البنات وستنا كلنا والله لن أقول لكِ لماذا هذه ( القسوة ) علينا ، لأن الكلمة لا تشبهك والله
كتير جداً بتكلم عن أفضال المنبر دا عليْ كسبت إخوان وأخوات بحق ، أبناء وبنات بحق وجودي معهم هنا يسعدني ، وبعدي عنهم يؤرقني أبارك للعندو فرح ، وأواسي العندو كره ، وأشعر بسعادة في تواصلي معهم
يا ست البنات وستنا ، ستة سنوات ما كتيره ..(فايتانا وين مستعجله ) ؟ نحن بنتمنى من ربنا أن يديم هذه العشرة العمر كله . خليك معانا ولو زهجتى مننا ..أدينا طلة من وقت لآخر ، عشان نسعد بوجودك معانا ، ونعرف أخبارِك وتعرفي أخبارنا
يا ربي يكون واحد مننا زعَّلِك ؟ سامحيهو .. وماتخلينا إسمِك في المنبر مبعث للإطمئنان والله .. أبقي معانا أختنا ست البنات
سكينة كمبال الشهيرة بـ ست البنات، امرأة قوية الشكيمة والرأس و(نادرة على طريقتها الخاصة) حالها حال شقيقيها اللذين عرفتهما معها عبد الواحد و أم الخير كمبال عصامية، لم ولا تهزها عاديات الزمن ولا صعابه، لا أظنها تغادر مغاضبة، وغالبا تكون فايته بي رضاها، وأرجو ألا أكون مخطئاً
هذا المنبر يأخذ الكثير من وقتنا. ومجاراته تكون على حساب هوايات واحترافات وشبه واجبات أهملناها لأجل خاطره. ثم هو نوع من أنواع الإدمان قال لي صاحبي أبو ساندرا مؤخرا إنو من يستطيع أن يهجر عادةً أدمنها (ولو كانت عادة جميلة) فمن الخير ألا يعود إليها طائعا كان ذلك في معرض إجابته عن سؤالي لتركه المنبر الذي كان له فيه صولات وجولات صائبة وخائبة أرجو يا سكينة أنك أبدلتيه بما هو أخيَر
ثم كيف تمشي ؟ ولا زال في الخاطر يلمع طيف ( شايقيه وسفه وجرأة وغنية وزول غاب ) ثم طلب منه ارجاع الهدايا وباقي حكاوي وحكايات لم تكتب وهي حاضرة مشافهة وفي الخيال والخاطر
Quote: وسامحوني ان مست بعض كلماتي رقيق المشاعر أو أغضبت أحدا !
غضب ما في لكن بوستك دا فعلا مس مشاعرى التخينة، فما بال الرقيقـة.. لكن مسامحك تب.. مداخلاتك كلها طيبة ورصينـة، ولكن انتى أدرى بظروفك وربنا يوفقك.. لكن ما تشحني الباسوورد لبكرى وكل ما لقيتى فرصـة أعفصى على الماوس..
والله ياهو كمان جانا كدي يا ست البنات يا بت امي تدخلي وتمرقي علي كيفك! التكنو مو عندك وليان في الحوش دا هدو جوك الكلوس وهدي الوساطات قايمة مو قاعدة في شان هروبك من الحوش ووالله خجلتيني خجلة اليابا فضيل زي مابقول ود المنسي ! اسمعني والله نحن في الحوش دا مو عندنا نسوان ييدخلن ويمرقن علي كيفن !!! يا ست البنات شفتي انا حزينة جدآ بروحل حبيبتنا مني بت الحوش عليها الف رحمة ونور . وبجي هنا عشان الاقيكن انتن يا الحبيبات وتنسوني عذاباتي لو سمحتي ترجعي من غير شروط .
معقول يا ستهم معقول تمشي تسيبينا نحن هنا علشان انتى جميلة وبتدى المنتدى طعم خاص وبنتعلم منك ارجوك علشانا ما تتركى المكان وانتى عارفة نحن بنحبك لي تحرمينا منك !!؟
Post: #28 Title: Re: وداعا اخوتي بالمنبر !! Author: اميرة السيد Date: 10-25-2015, 11:31 AM Parent: #27
العزيزة سكينة بت كمبال(ست البنات) طبعا حيؤلمنا جدا مفارقتك للمنبر العام.. لكن بس عاوزين منك تنورينا ان شاء الله في الخاص او البريد الاكتروني الاسباب الرئيسية الخلتك تصل لهذا القرار... وبعدما نقرا هذه الاسباب..قررنا انا وبسمات ان نفكر هل نغادر معاك المنبر العام ام لا....وهذا تضامنا معاك ...ونحن منتظرين.. والله يديك الصحة والعافية اميرة مصطفى السيد بسمات الشيخ عبد الرحيم