شـــــــــــــــــوق

07:53 AM Oct, 13 2015
سودانيز اون لاين
بله محمد الفاضل-جدة
مكتبتى فى سودانيزاونلاين



يا شوق بِحفِر في ثنايا الشوق
وريني إيقاعك..
وأنا ليك مرايا وجوف
خليني في قاعك..
وأرسمني فم ولِسان
قول بيها أوراقك..
شجر الهوى إيدي
تاكِلني في بابك..
عارِفني لحنِ حنون
منساب في اعماقك..
يا شوق معاك عالِق
دسدسني في غابك..

البلال
عوافى ياخ

و شوق عرمرم

انت الشوق و الإشتهاء ديل تيمان ولا اخوان ساى ؟

بعدين شنو

غالبا بكونو تيمان، قول لى ليه

لأنه التيمان دائما متعبين و شقيين

الشوق ده سجال بين بروق التمنى ومراسيل الغيمات البخيلة
عينك للسماء مليان و محيّن مطر وانت مشتاق تبل رويحتك الناشفة
وتقعد تنقط و "تحندك" فيك لا من نشافك يستفحل و يبقى يباب

و تومه التانى، الإشتهاء، عبارة عن تفاؤل ساذج ماخد شكل حسن النية
وما عنده ولا عارف ليه اتجاه يهطل فيه و يتدفق
و واطاة الروح تتمحن و تقعد تعاين و تنتظر

المهم يا زول الإتنين متعبين وقاسين

غايتو اعمل حسابك

حبابك والله يا مواطن
وأشواق ما تسأل


مادام سألت ورديت
ما عندي غير أقول يا ريت ما كانوا تيمان
يعني تأمين على كلامك نقطة نقطة وحرف حرف
طبعاً مع حفظ أن كل واحد منهما ماخد اتجاهاتو براها
وسالك بينا وديان وفيافي
برق وصي

بس ظنيتو كدي أن الاشتهاء بجي بعد الشوق بشوية بس
ما فرقاً كتير يوقف تتويمم بس هو بفوت الشوق بكم سم لافوق



والله غالب

أخي بله

مرة ثانية تأثرني جاذبية الحرف فيكون التداخل الأول
بعد الغياب الممتد لأزمان من جذبه .....
فلك مني الود والتحية ولضيفك الحبيب أبوذر ...

.. .. ..

قالت لي:
ما صبحت على الفنجان
ورسمت البسمة بحد البن
اوعى تكون بالشوق عيان
وحمّى الريد تاعباها جفون

فرددت لها:
الشوق شحتف روحي واعياها
وفي كل مساماتا قايمالو حبون
وينو طبيبا عياها .. وفيه شفاها
غيابو.. فوق العلة يزيدها جنون



إسماعيل حميم

.

نأمل أن يكون غياب غانم لك على جميع الأصعدة
صاحبي الجميل إسماعيل حميم

"قالت لي:
ما صبحت على الفنجان
ورسمت البسمة بحد البن
اوعى تكون بالشوق عيان
وحمّى الريد تاعباها جفون

فرددت لها:
الشوق شحتف روحي واعياها
وفي كل مساماتا قايمالو حبون
وينو طبيبا عياها .. وفيه شفاها
غيابو.. فوق العلة يزيدها جنون"


ويا سلام على ضوء الروح البهيج الذي أهديتنا


التحايا والمحبة والامتنان لك

والشوق بسأل عني ليه
وأنا في محله رميت جبل

شايف صحاري الانتظار
متروسة للأخر أمل

رغم اللحاصل واللكان
يا روحي كل ماشي بيصل

ما تفكي باب الريح علي
خليني في بيت الوجل

دفيان بنار المر كتير
يا شوق كفاك جيب الأجل

أرجع ليها
كان يتدارى الحزن شوية
يا قندول الزمن الأعجف
حارس ضلك بالأشواق
هادي البنت في الأصل نبية
أرجع ليها
شفت الشوق ماليك حنية
وأهو كم عانيت في مر أساك
عاين للموج في الصدر الهائج
دور بيك في دنيا شجية
أرجع ليها
أمسك في الباب الخشبي هناك
أنسى الأرواح المخلوقة عشانك
بعض الألوان مفتوحة الضي
راجع معنى الحب في النية
أرجع ليها

............