مفاهيم سودانية فقط - اللوتري 2017 ... وخدمات/ سيف اليزل والخير محمد العوض كمدخل!!!

04:19 PM Oct, 07 2015
سودانيز اون لاين
الهادي ابوبكر-
مكتبتى فى سودانيزاونلاين



وأكيد كلهم فيهم الخير ...
الا بي لغة السوق وبعيدا عن أخوي وأخوك وخليها علينا وطيبتنا ال في النهاية بتقلب ديك ...

يا ريت كل مكتب من المكاتب دي يورينا شنو الميزات لكل مكتب من المكاتب دي.
وشنو الاسعار
وطريقة الدفع
وأي شروط تانية.


مافي زول يقول لي خدمة ساكت... نحن الصراحة من تاريخ خروجنا من السودان، عرفنا إن مافي حاجة في الدنيا دي مجاني وكل زول مفروض ياخد مقابل أي مجهود قام بيه مهما كان ضئيل أو كثير.
وحكاية المجاني ساكت دي والله من طلعنا من بلدنا يا حليلة نسيناها ...

مفاهيم سودانية فقط (1):-
في الصيفية الفاتت كنت في السودان تعطلت بي العربية في حي قالو بقولولو حي (يثرب) ما بعرف بين الشجرة وجبرة ول بين العزوزاب والعشرة ، المهم جاني وليد حلال وقف معاي لمت شغلنا العربية، حلفت اديه حقه، حلف ما يشيل، قلت ليه ياخ واقف ليك 3 ساعات معاي وتصلح وفي النهاية عايزني اقول ليك شكرا... يمين وطلق وحرم ، ختيت ليه القروش في جيبه غصب، والولد خجلان تقول عمل عملة.

Quote: وشنو الاسعار وطريقة الدفع وأي شروط تانية. مافي زول يقول لي خدمة ساكت

العزيز الهادي ابوبكر
حياك الله وطابت اوقاتك بكل خير
ياحبوب المال ماكلو شيء أنا عن نفسي درجت كل عام بفتح بوست عن اللوتري في الفيس والعام الماضي قدمت لكمية من الناس
رسلو لي بياناتهم ورسلت لهم ال Confirmation Number وهذا العام ايضا وصلتني بيانات ناس وشغال بقدم ليهم والله
لا ارغب في اي مقابل وأخونا الخير محمد عوض درج من سنين بفتح بوست سنوي تنويري جزاه الله خير الجزاء .
قصدت طيلة السنين الماضية أن لا أفتح أو أعلن عن تبرعي لمساعدة من يرغب في اللوتري احتراما لاخونا سيف البرعي
وهو عندو مكتب خاص بالمساعدة بالمقابل وهذة خيارتة .
لازالت الدنيا بخيرها والناس بالناس والكل برب العالمين .

تحياتي الهادي
الخير ما أظن عندو مكتب او بقدم للناس بمقابل

Quote: تحياتي الهادي الخير ما أظن عندو مكتب او بقدم للناس بمقابل

تحياتي اخ الخضر

وأنا لم احدد إنه بيقدم خدمة بمقابل ولكن ، أنا أتحدث عن المفاهيم العامة عندنا، إن تقديم خدمة وطلب مقابل يعتبر عيب.

وهذا يؤدي في الغالب الى واحد من اثنين، إما أن يتفاجأ العميل بالمبلغ ويجد نفسه أمام أمر واقع، وإما أن يعتبر العميل إنها خدمة مجانية في حين من قدم الخدمة كان يتوقع مقابل لخدمته ولكنه مستحي.
وهناك حالة ثالثة: هي المفروض أنا إذا أحد قدم لي خدمة أن أجازيه على صنيعه.

أما أن لنا أن نطور مفاهيمنا...

Quote: العزيز الهادي ابوبكر حياك الله وطابت اوقاتك بكل خير ياحبوب المال ماكلو شيء أنا عن نفسي درجت كل عام بفتح بوست عن اللوتري في الفيس والعام الماضي قدمت لكمية من الناس رسلو لي بياناتهم ورسلت لهم ال Confirmation Number وهذا العام ايضا وصلتني بيانات ناس وشغال بقدم ليهم والله لا ارغب في اي مقابل وأخونا الخير محمد عوض درج من سنين بفتح بوست سنوي تنويري جزاه الله خير الجزاء . قصدت طيلة السنين الماضية أن لا أفتح أو أعلن عن تبرعي لمساعدة من يرغب في اللوتري احتراما لاخونا سيف البرعي وهو عندو مكتب خاص بالمساعدة بالمقابل وهذة خيارتة . لازالت الدنيا بخيرها والناس بالناس والكل برب العالمين .

استاذنا عادل الباهي
حياك الله يا حبوب وربنا يديك العافية ويقدرك على المعروف ..

المشكلة من طيبتنا إننا نشوف مثل من يقدم الخدمة بمقابل كأنه عيب.
والله ليس عيبا ولا حرام ...
وكل من يقدم خدمة من حقه أن يطالب بمقابل مجزي ومعقول، طالما إن الطرفين على تراضي.
مكتب الاخ سيف يقدم خدمة بمقابل ... مقابل ضمان تعبئة البيانات بالشكل المطلوب وضمان عدم تقديم بيانات خاطئة، ومتابعة النتائج والاتصال بالعميل عند اختياره ضمن المتقدمين.
ولكن الشيء المبهم هو تكلفة هذه الخدمة.
وعدم الاتصال بالعميل في حال عدم اختياره.
هذه ملاحظات بسيطة جدا.

السلام عليكم
البعمل فيهو الاخ الخير والان عرفت اخونا عادل ياها دي طباعنا وياها دي شمائلنا
لاحظ الاثنين هم الببادروا وماعازين اي حاجة

نشكر الشباب المتطوعين في التقديم للوتري مجانا

سيف بعرض خدمة بي مقابل، للناس أن يقبلوا أو يرفضوا ونحن بس نتشطر على بعض وزامر الحي لا تطرب مزاميره يعني لقيت كم بوست بينتقد في سيف في اتخاذه للحاجة دي كعمل، هسع لو كان واحد من جنسية تانية مافي زول كان قال حاجة وكان جرى عليهو، بس طالما اتخذها كعمل من واجب سيف انو يبين للناس أسعاره وشروط الدفع وكل ما يتعلق بذلك.

ربنا يوفقهم جميعا

يا جماعة الشغلانة دي ما ساهلة و الموضوع يحتاج لمعينات مهمة :
1- أن يكون عندك الزمن ( الوقت ) الكافي للقيام بهذه المهمة.
2- أن يكون لك معرفة ودراية تامة للتعامل مع الكومبيوتر لأن الموضوع تقني يعني تقدر تتعامل مع الصور و تعديلها حسب المطلوب
و الصور بتجيك بطرق مختلفة في ناس بيرسلوها بالايميل في ناس بالواتساب او الفيبر في ناس بتقيف ليك عشان تصورها في ناس
بيمشوا الاستديو و يرسلوها ليك بالبوستة و دي طبعا دايره إسكانر ( ماسحة ضوئية ) عشان تدخلها الكومبيوتر.
3- المعرفة التامة بطريقة التقديم بداية من فتح الصفحة علي الموقع و ملء البيانات بطريقة صحيحة و التعامل مع تقديم الفرد أو الأسرة
و إدراج الأطفال و التقديم العكسي لزيادة الفرصة للأسر انتهاء بالحصول علي صفحة الكونفرميشن و حفظها في الجهاز و كذلك طباعتها
لأهميتها عند ظهور النتيجة.
4- يكون عندك جهاز كومبيوتر ممتاز و خدمة انترنت عالية السرعة بالاضافة الي طابعة حديثة مجهزة بالأحبار و الورق و ملحق بها إسكانر
عالي الدقة إن لم يكن منفصلا عن الطابعة.

في هذه الحالة أنت تقدم خدمة تقنية لمساعدة المتقدمين تسحق عليها الأجر بالشروط التالية:

1- أن يكون رسم التقديم معلنا و مكتوبا أمام المتقدم بكل تفاصيله و يوافق عليه المتقدم.
2- المتقدم يدفع المال فقط نظير الخدمة المقدمة له دون أن يكون لذلك علاقة بالسحب و النتيجة سواء كان المتقدم فايزا أو غير ذلك.
3- يجب عليك تسليم المتقدم الكونفيرميشن نمبر بتاعو لحظيا طالما دفع رسومه كاملة و هنا تكون الخدمة إنتهت و بعد داك هو و حظو مع القرعة.
4- الإحتفاظ بالكونفيرميشن و عدم تسليمه للمتقدم حتي ظهور نتائج السحب يعتبر إبتزاز و بداية لمساومة مالية كبيرة و إستغلال لحوجة المتقدم بالسفر
الي أمريكا حتي لو كان التقديم مجانا دون رسوم.
5- للمتقدم كل الحق في كتابة معلوماته الشخصية في الفورم من إيميل و تيلفون و عنوان بريدي دون التقيد بما يمليه عليه مقدم الخدمة ليقفل عليه الطريق
و يضطر لقبول المساومة إن فاز في السحب.

السيد فاتح البوست

داير اقول ليك شي واجيك من الااااخر كدا

انا الخير محمد عوض دا ما بشيل قروش لاسباب كتيرة ومن الاسباب دي اني عندي قروش كتييييييييرة احمد ربي وما محتاج..... اها تاني شن ليك :)


غايتو

الاخ الهادي
لك التحية والتقدير

و الشكر للاخوان الخير و عادل الباهي
من حق اي شخص ان يطلب مقابل للخدمة التي يؤديها نيابة عن الغير
لكن مشكلة سيف اليزل برعي لا يخبرك بقيمة الخدمة و تتفاجأ بمبلغ ليس في استطاعتك
الافاء به مع العلم ان هذا الامر حدث لصديقين اعرفهم حق المعرفة
و الاسوأ من ذلك احتفاظه بال Confirmation Number
و تجد نفسك مضطراً للدفع مهما كان المبلغ
تهرب سيف اليزل الدائم من الافصاح عن المبلغ يضع علامات استفهام كبيرة و كثيرة
من حقه ان يأخذ مقابل و من حق الناس ان تعرف كم المقابل
و الموضوع على حسب تقديري لا يجب ان يتجاوز ال 50 دولار مراعاة لظروف الناس
في السودان و حتى خارج السودان حيث ان تجهيزات السفر من تأشيرة و تذاكر سفر و توثيق
وخلافه تكلف الكثير

السلام عليكم صاحب البوست وكل الناس هنا
صراحة زي ما قال اخونا معاوية القصة دي تفاصيله كتيييييره واهم مافيها انو يكون عندك ليها زمن مع مجابدة المعيشه
و اخونا سيف ليه الحق انو يعمله بي مقابل .
صراحة اكتر الشغلة دي في السودان موسم عديييييل كده الناس بتطلع من وراها قروش يعني قصة انو في السودان
تتعمل ساي دي بقت نااادره و انا بعرف اكتر من مكتب في الخرطوم اقل واحد فيهم بيعمله بي ٤ مليون من القديم و طبعا،
هم بيستغلو عدم معرفة بملي الفورم الناس وكده .

اخونا عادل الباهي دا زيو كتااااار برضو بيعملوها خدمة ساي للناس و كمان ما بينتظروا بل بيرسلو لاهلهم واصحابهم واصحاب
اصحاب و يسكوهم عشان يتصورو و يقدمو ليهم و انا واحد من الناس البعمل كده و بقدم للناس ساااااااي و بسكهم لكن بقت في
مشكلة وهي الفورم دا عشان يتملي لازم الزول الفاز دا يكون قاعد جمبك و يديك البيانات الدقيقة بتاعتو و ما بينفع باي وسيلة من
الوسائل الوسيطة اها النقطة دي بالتحديد انا بقلى مبرر لانو الناس تعمله خدمة بالقروش لكن في حدود المعقول كمان لانو ايوة ممكن
اقدم لزول و يفوز لكن عشان الفورم دا يتعبىء صح بتبقىء صعبه لانو هو في السودان و انا في بلد اخر و الفورم عندو زمن وقصص
و الشغلة ما ساهلة .




يا جماعة صراحة الخير دا انا بعرفو عندو قروش كتيييييره الحمد لله .





-------------
ابعت المعلوم يازول

قال الرسول صل الله عليه وسلم خيركم الناس أنفهم للناس .
شكرا لكل من فتح بارقة أمل لشباب بلادي
شكرا الخير و المتطوعين وزادكم الله من فضله
شكرا سيف اليزل وغناكم الله بفضلة


تقبلوا مروري

عمر مصطفى محمد

زي ما في ناس محسنين بقدموا الافطار للصائمين في المواصلات في ناس عندهم كافتريات ومطاعم فيها فطور بالقروش بدون أي لوم عليهم

أؤيد حق سيف اليزل في الحصول على مقابل مادي مقابل الخدمة الاحترافية التي يقدمها

لكن عندي سؤال
لو صرح سيف اليزل بالمقابل المادي هي يعتبر سلوكه غير قانوني بحسب قوانين العمل الامريكية ؟