أيا هلالاب ألا أخبركم بما يستر عورتكم ...

09:24 AM Sep, 28 2015
سودانيز اون لاين
طلحة عبدالله-
مكتبتى فى سودانيزاونلاين



أبعدوا (السوبر وومن) من شئون النادي ويا حبذا لو جردتوها تماما
من هلاليتها التى تزعم .. فقد قيل في المقام : لا خير في فريق كورة
تتولي شئونه بت ما عارفة التكتح ..
فاطنة الصديق ؟؟؟؟؟؟؟ لا حولاااااااااااااااااااا اتوا جادين ؟؟
قال الراوي :
وبعد ما تودوا البنية دي البيت .. أبدأوا بعد كدا أكنسوا الدمامل وما
علق من بثور وقشور.. أعزلوا أرباب المصالح والمرتزقين وحاشية
السلطان .. ولا تعيروا ما تكتبه صحافة المدرجات حتي أذن من طين ..
أفعلوا هذا وأدعوا لي بالصحة والعافية.

سبحان الله
بين يوم و ليلة بقيت خبير إستراتيجي زي صلاح غريبة كمان
تحلل و تدي نصائح و تحدد وين مكمن الخلل و تدي حلول لحلحة أزمات ....!!!!
رهيب و الله ...
لسه قدامك مشوار طويل لغاية ما تصل لي مستوى صلاح غريبة ...
ما تستعجل تقوم تدي ليك زول وصفة خطأ توديهو في ستين داهية
الشغلانية دي ما ساهلة ......
غايتو لو إحتجت لي نصائح و دروس ما عندي مانع بس تاخد مواعيد من سكرتيري ود البشرى .....

و بالمرة قوم لف ....

Quote: وصفة خطأ .

خبير ما حكيم بدي حقن يا داقس .

Quote: فاطنة الصديق

فاطنة الصادق ..
ما الصديق ..
شايفك مصرّ على الصديق دي ..
الصادق مالو ما واقع ليكـ ..

الشغله بقت فوضى ياطلحة ..
غايتو أنا شخصياً ..
اتعودت على انه في الزمن العلينا ده ..
اي حاجه مابتبقى خلوها لينا تبقى ..
وفوق عين أتخن تخين ..
والماعاجبو يقع البحر ..
ولاّ يقرش ليهو كوم ليمون ..

هلا يا ود القوز وكل سنة وانت طيب
ياخ ما كويس ذاتو عرفنا إسمها كمان نقعد ندقق
في إسمو أبوها .. يالا الصادق الصادق في الحالتين
هي الكسبانة ..
الاندية الرياضية تحولت ممتلكات خاصة للعندهم قروش
وللأسف ديل ما ناقشين أبو النوم .. عشان كدا الكورة
في العالم طالعة القمر ونحن كورتنا ماشة أسفل الحضيض .
الله موجود يا حبيب .

Quote: هلا يا ود القوز وكل سنة وانت طيب ياخ ما كويس ذاتو عرفنا إسمها كمان نقعد ندقق في إسمو أبوها .. يالا الصادق الصادق في الحالتين هي الكسبانة .. الاندية الرياضية تحولت ممتلكات خاصة للعندهم قروش وللأسف ديل ما ناقشين أبو النوم .. عشان كدا الكورة في العالم طالعة القمر ونحن كورتنا ماشة أسفل الحضيض . الله موجود يا حبيب .

وإنت طيب يأخ ..
وأضحى مباركـ ..
والله صحي بختها وبخت الزيها ..
عارف أنا قاعد أفكر كتير في الموضوع ده ..
ولم أتركـ التفكير فيه أبداً .. دائما بسأل نفسي السبب فيهو شنو ؟
ليه يعني دائماً يختارو لينا اكثر زول ما مناسب ..
ويختوهو لينا فوق راسنا ..
فيقعد يبرطع ويعربد ويفكر ويقرر بي نفس مستواهو المتواضع ده ..
يعني هسه أمسكها في أي حته .. سيبك من فاطنة الصادق دي ..
أي منصب حساس او وزارة أو أي حتة ..
يشوفوا اكتر زول ما مناسب ولايتمتع بي أي مؤهلات ..
تؤهله عشان يكون في المنصب الذي يتم اختياره له ..
وطق يختاروهو ليكـ ..
والناس دي كلها تقعد تحتج وتفنجط وتكورك ..
ولا في زول يشتغل بي كلامهم ده الشغله ..
يعني عنجهية وقوة عين تخليك تستغرب وتدي ربك العجب ..
الشيء ده يكون من شنو ؟ ..
ياربي يكون ده ( استحمار ) لينا مثلاً ..
ولاّ كسر عين ..
عشان أي زول بيتمتع بي كفاءة ..
مايحلم في يوم انه يكون في موقع قرار ..
الشيء الشايفو أنه تم اختيار شرار الناس للمناصب ومواقع القرار ..
وكمان مرات الزول المختارنو هو ذاتو مابيصدق انه تم اختياره !! ..
وفي قرارة نفسه بيكون عارف إنه غير مؤهل وغير جدير بذلك المنصب ..
والهلمة والهيلمانة والقروش والوضع والامتيازات الاتحصل عليها ..
فتجيهو صدمة تخليهو متحفز لتحطيم كل نظام ..
يحتمل يكون سبب في ابعاده من مكانه ده ..
وعشان كده دائماَ تلقاهو بيجي بي أجندة كلها حقد وحسد ..
ويعيث فسادا ويخرب كل نظام لقاهو ..
وابدا مايصلح شيء بل يزيد الطين بله ..
الكلام ده ياربي عشان شنو ؟..
عشان يسمع الكلام يعني مثلاً !! ..
وينفذ التعليمات بلا تردد ..
ولا عشان الناس الجديرين عينهم تنكسر ..
غايتو انا شايف البيحصل ده ..
كسر عين لكل هذا الشعب ..
والشغلة دي شغلة كبيرة ..
ما مجرد خطأ في الاختيار مثلاً ..
تحس بأنه ده شيئ مقصود ويتم العمل به عنوة ..
يعني بيذكرني بالمقولة البتقول ( ياتشربي يا نكسر قرنكـ ) ..
فياتقبل زي ناس فاطنة الصادق ديل وماشاكلها ..
ومن دهماء وغوغاء وارازل القوم ..
يا كمان تقع البحر ولا تشوف ليك مصيبة تبلعكـ ..
أنا بشوف ده السبب الخلي البلد دي تصل المرحلة دي ..
مامناصب بس ياطلحة ..
لاحظ المنظومة دي اتطبقت في كل حتة في البلد ..
وفي أي مجال أو نشاط وفي أي تخصص ..
أي مكان كان رجال دين أو رجال سياسة او وجهاء المجتمع ..
او الراسمالية أي مكان الحكومة دي دخلت يدها فوقو ..
وقلبتو جابت التحت رفعتهم فوق وشالت الفوق طمرتهم في التراب ..
ودعكت بي أمهم واطاة الله دي ..
لاحظ الشيء ده اتطبق في كل البلد كيف وفكر في كلامي ده ..
غايتو مفروض الزول الابتدع الفكرة دي من كيزان السجم ديل ..
يجيبوهو في نص ميدان ابوجنزير ده .. ويجيبو سيطان عنج ..
وكل زول من الشعب السوداني ده يجي يديهو سوط في ضهرو ..
لأنه دي أغبى فكرة في التاريخ السوداني ..
وحتى أوسخ وأرزل الحكومات المرت على البلد دي ماسوت الكلام ده ..
غايتو الرمادة دي كالت البلد ده ..
والحصل حصل ...

معليش فضفضت ليكـ أو ( فتفت ليك ) ..
كله سيان ..
لأننا والله بقينا بنفتفت زي الخروف المذبوح ..
وأضحى مباركـ يأخ ..

هههههههههههه
والله لكن يا ود القوز ما خليت ليهم جنبة يرقدوا عليها
وان وراك المشجعين البكتبوا في الجرايد ( عاملين فيها صحافيين )
الواحد تلقاهو عوك عاك شاتح ليك الجريدة من أقصاها
لأدناها بورجغة السنين .. لا تعرفوا بقول حكم لا بقول نكتة
لا بخفف في دمو .. يطبع ليهو مليون كلمة وما يقول أية حاجة
في أية حاجة .. محض هتافية وسباب وسخرية من الفريق
التاني .. وكان قبضتو في زقاق تلقاهو ما عارف الكورنر
من رمية التماس .. والبقهر زي دا عندو سوق وبصرف
مرتب كل آخر شهر وكمان مرات تلقاهو قاشر بى بدلة
وعامل نفسو ضيف مهم في القنوات التلفزيونية السايبة
وقاعدة في السهلة دي ..
ياخ دي حاجة تخلي الزول ياكل ليهو طن ليمون بدون
ما يخشي الحوامض والحيرقان .. هو ياخ حيرقان أكتر
من الحاصل دا تاني كيف ؟

مراحب يا Patch Adam كل عام وأنتم بخير
أبوحسين مهرجل درجة أولي ما عليك منو .

هلا والله يا Abdulqadir Hago Tajuldin
نصيحتي للمريخاب زي بتاعت الهلالاب مع مراعاة
فروق فاطنة الصديق .. المريخ صعب جدا يتأهل
للنهائي يا حبيب .. دا كلام قلتو قبل مباراة مازمبي بالخرطوم .