Post: #1 Title: عبدالله البعيو و مايكل جاكسون Author: abubakr salih Date: 05-07-2015, 02:28 PM
02:28 PM May, 07 2015 سودانيز اون لاين abubakr salih- مكتبتى فى سودانيزاونلاين
عبد البعيو راجل فنان لا يشق له غبار. يتميز ادئه بحالة عامرة من الطرب، يطرب هو شخصياً حتى يتصبب عرقاً و ثم تنداح دوائر الطرب على الجمهور المحيط. البعيو يدخل على الغناء بكل حواسه، و عندما يطرب للاخر يصبح مثل درويش مجذوب. المشكلة انو ناس القنوات الفضائية، خاصة التلفزيون القومي و بدرجة أقل القنوات الخاصة كانما يتحرجون من البعيو و من نزعته الاستعراضية الراقصة! البعيو حالة نادرة و اظن الاستعراضية دي زيادة فوق البيعة ما شفتو مايكل جاسكون كيف ملاء الدنيا و شغل الناس برقصاته تماماً مثل اداه الصوتي؟ بالله تاني مافى زول يزح الكاميرا لمن البعيو يرقص.
النزعة الاستعراضية عند البعيو لا تتوقف على الرقص فقط. لكنه يدخل ادوات و اعمال اخرى. مثلا البعيو كان بحاول يعمل فى حاجة ذكية شديد فى الاغنية الفى الفيديو الفوق دي. كان بأشر للبنات ضمن المجموعة ان يزغرن، على الاقل واحدة منهن. لكن لم تستجيب واحدة منهن لسبب ما. هل لم يفهمن اٍشارته ام تحرجن ايضا مثل حرج ناس التلفزيونات؟ الاغنية شعبية و اغنية شكر و فخر و ضمن الجوقة و الاداء اذا جاءت ذغرودة من امراة تكون أكتملت الصورة. البعيو راجل ما ساهل و كان بحاول يصنع فى عمل فني متكامل يضم عناصر عديدة، لكن!
الاغنية دى انا فى اي ركن فى البيت بشغلها يومياً حتى لورجعت من الدوام و تعبانة مربوطة في ذهني باهلى الجعلييين البحبهم ودايماً بشغلها لما ابوى او واحد من اخواني يتفوقوا فى فى مجالات تخصصن بفتحها ليك فى الهول واعلى الصوت البيت كلوا يسمع لحدى الطابق الفووووق والجيران كمان وامى بتربط لى التوب فى وسطي ( علشان ما بعرف البس التوب بس ما تكلم زول ) واديها ليك رقصة وترتة لما رجولى توجعنى واخوانى بكونوا فى شكل دايرة حولى وبدى كلو واحد شبال مع العرضة بس شبال ابوى خاااااص فيه ترترة
البنات المع البعيوا ديل ما جعليات علشان كده ما بهوشوا
ههههه، يا وضاحة، ايوة و الله لطشت الفيديو من مداخلتك بهناك. لكن انا شفتو قبل كده فى اليوتيوب و متابع البعيو دا من زمان، حركات سحب الكاميرا منه اثناء الاداء دي مزهجاني من زمااان، من زمن الثانوي. كانت فى تلفزيون السودان كتيرة شديد و الزهج خاصة لانه كان القناة التلفزيونية السودانية الوحيدة فى الزمن داك. البنيات دي ما فهمن او اتحسسن من انهن يزغردن، كانت الحكاية بتكون فنانة و تكمل اللوحة الفنية. غايتو البعيو ظاهرة اٍستعراضية نادرة فى السودان.
يعني يا معفن البعيو فنانك من زمان و كنت داسيهو مني !!!؟ وانا خايف افتح معاك السيرة تقوم تشبكني القضية و عم عبد الرحيم و القطر !!!!؟ خوتك خوة اللستك ياخ انت
Post: #7 Title: Re: عبدالله البعيو و مايك جاكسون Author: محمد البشرى الخضر Date: 05-07-2015, 04:49 PM Parent: #5
سلامات يا بكّور ياخي البعيو اسّي راق وهدا وفوقو النبي طبعا انت ما ود امدرمان وما بتحب كورتها :), كان قلت ليك ما شفتو في التمانينات كان عامل شنو أذكر في تلاتة وتمانين حنة خالي بالبعيو, الزمن داك حنان بلو بلو يادوب طالعة وبتجي الحفلات ساي للشهرة, نزلت في الساحة وهاك يا حت, أنقر البعيو عمل شنو! جدع المايك للعازفين ونزل ليك معاها الدارة, شي رقبة وشي ورا ورا ورا وشي أقلبي بي جاي و البابور جاز وحكاية, يمين أرقص منها كان :)
Post: #8 Title: Re: عبدالله البعيو و مايك جاكسون Author: حسام عبد الرحيم Date: 05-07-2015, 07:42 PM Parent: #7
الغريب في الأمر لا يحجبون الرقيص الرئاسي مع انه لا يقل طربا من رقيص البعيو
Quote: يعني يا معفن البعيو فنانك من زمان و كنت داسيهو مني !!!؟ وانا خايف افتح معاك السيرة تقوم تشبكني القضية و عم عبد الرحيم و القطر !!!!؟ خوتك خوة اللستك ياخ انت
هههههه يا نابري، ياخي عم عبد الرحيم و الغناء الحداثي و الترميزي دا لقيناهو later بعد ما اتعلمنا الشيوعية هههههه. نحنا ناس حواشات و سيرة و دلوكة و جلينا من البطان بشوية بس. زمان كنا مركزين مع الرادي شديد، الراديو كان علاقتنا بالعالم، و أمي كانت بتعرف الفنانين كلهم، منها عرفت اسماء فنانين السودان، و الله اي زول يغنى فى الرادي بقيت افرزو من صوتو و الكلام انا فى الابتدائي. من الحاجات الظريفة فى ايام هوسى باسماء الفنانين عرفت ثنائي العاصمة. لكن مافهمت انو ثنائي دي المقصود بيها اتنين، يعنى نفرين بغنوا سواء. كنت قايلوا زول اسمو "ثنائي العاصمة" على وزن سيف الجامعة و كدة ههههه. مرت الايام و امتلكت مسجل و عترت فى شنطة كاسيتات لوردي و الكابلي و عثمان حسين و ابو عركي. كان خريف ابو السعن. ايام كدة برضو افتتن باحمد شاويش. المهم يا زول هسه بنضربو كلو سيرة دلوكة و غناء ام درماني و لاحقاً لاقينا مارسيل خليفة و فيروز و كيفك آلو عم بـ اولو صار عندك ولاد! كيف انتا مالا انتا. ايام الجامعة اشتريت كاسيت لفيروز "كيفك أنت" شباب الداخلية كانوا دايرين يجلدوني ههههه، شنو حركات الشهادة العربية دي!
Quote: ياخي البعيو اسّي راق وهدا وفوقو النبي طبعا انت ما ود امدرمان وما بتحب كورتها :), كان قلت ليك ما شفتو في التمانينات كان عامل شنو أذكر في تلاتة وتمانين حنة خالي بالبعيو, الزمن داك حنان بلو بلو يادوب طالعة وبتجي الحفلات ساي للشهرة, نزلت في الساحة وهاك يا حت, أنقر البعيو عمل شنو! جدع المايك للعازفين ونزل ليك معاها الدارة, شي رقبة وشي ورا ورا ورا وشي أقلبي بي جاي و البابور جاز وحكاية, يمين أرقص منها كان :)
يا ود البشري قلت لي الراجل دا حالتو هدا ههههه. ياخي عندوا سماحة رقيص رقبة، اٍنا لله. يعوم زي الوزين و يجيبها ليك نضيييفة الحركة فيها Very smooth. رقيص الرقبة عند البعيو يعادل الــ Moonwalk حقت قريبنا مايكل جاكسون. الرقصتين قريبات من بعض الى حد ما و يستخدم فيهن الرقبة و الاكتاف بالاضافة لحركة الارجل. بس دور الارجل ما كبير فى الرقبة حقتنا يها حركة لقدام. و الله البعيو دا لو كان امريكي كان هسه يكون مالي الدنيا و شاغل الناس. زول يقول ليهو قدم اللوتري
Quote: الغريب في الأمر لا يحجبون الرقيص الرئاسي مع انه لا يقل طربا من رقيص البعيو
تحياتي ابو بكر و ضيوفك
سلام يا حسام، و الله نقطة منطقية للاخر، بيكون فى فى رايهم انو رقصة البشير دي رقصة رسالية. انت فى رقصة البشير، قبل فترة جابوا عبد الرحيم برقص! عبد الرحيم الكلام قاسي عليهو، فأتخيل كيف يكون رقيصو
Iو الله يا بيكو انا نفس الكذلك في قصة الوالدة و الرادي و حفظ الفنانين و الغناء و كذلك شديد في غناء الدلوكة و الحماسة و العرضة و مرضان دوبيت بطانة و نميم و النكلمك دغررررري لو فضلوني بين انواع الغناء لاخترت الحماسة و الدلوكة و الدوبيت عن جميع اللالوان الاخرى . جد جد القصة دي من لحظة عرفتها لحدي الليلة انا بسمع هذا النوع من الغناء و بإدمان يحير بعد الزمن اتقدم و المعرفة زادت شوية وبقيت اسمع مزيكا اخرى اعجبت غاية الاعجاب و الهوس بمزيكا البلوز و الريقي و صراحة لقيت في تماذج بينه و بين ما اعشقه في اغاني الحماسة و الدلوكة لانها تعتمد على الاصوات و قوتها و تعتمد علي الايقاع .
و الله يا بكور ضيعته على نفسك متعه لانو الزمن الكنا فيهو مع بعض داااك لو فتحت السيرة دي كان متعتك متعة السنين .
Quote: و الله يا بكور ضيعته على نفسك متعه لانو الزمن الكنا فيهو مع بعض داااك لو فتحت السيرة دي كان متعتك متعة السنين .
اخخخخخ، دي خسارة كبيرة. و الله كنا عاملين لينا برنامج ونسات فى الغناء مع بعض الشباب من اولاد هندسة. كنا بنقعد ليها تحت سلم مكتب المسجل بتاع علوم. لكن يا فردة قالوا الحى بلاقى. أكيد بنتلاقى كان حيين فى الدنيا دي و تونس فى الغناء و الدوبيت و مزيكا البلوز. هاك الجيتار الصحاروي عربون اتفاق. دا رواب البلوز:
