الماذون خلف الستارة...

08:40 PM Apr, 26 2015
سودانيز اون لاين
عبدالمنعم الطيب حسن-السعودية الرياض
مكتبتى فى سودانيزاونلاين



العنوان اعلاه ابتدعته المخيلة السودانية الخصبة، الخصيبة
المثل يلخص حالة تلاشي فترة الخطوبة،
او قل لا خطوبة بعد اليوم؛
وبكرة اهديك دبلة الحب والخطوبة تتحول الليلة اهديها دبلة العقد وكدة...
يتعارف عروسا المستقبل، في مكان الدراسة او العمل، او تحت اي ارض او فوق اي سماء،
باي وسيلة كانت، او استجدت...
تتوافر قناعات مشتركة لتكوين اسرة جديدة، جديدة لنج؛
ولابد للاهل ان يتعارفوا،
اها التعارف دا يوم العقد، على طول يقولوا ليك عقدنا،
هنالك دائما من اهل العريس من هو متخصص في مثل هذا الامر،
والطُّوَلْ فيها الهُوَلْ، وخير البر عاقده،
والماذون تلقاهو قاعد خلف الستارة يتململ، سرعان ما يبتهج، ويشرب الكركدي، ويقش شنبو، شنبو في المصيدة؛
واهل العروس برضو في زول لوحة واحدة ويوافق،
وتسمع الزغاريد، وايويويويوي تشق عنان السماء،
اها العريس لو ضرب تلفون بعد السهرة دي يكون بالغ،
هل الامر ظاهرة في السودان؟
ام محصور بالصدفة في عشرات الحالات التي اعرفها،
لو ظاهرة ايجابياتها وسليباتها،واسباب شنو؟

ظاهرة جميله ويا ريت بعد العقد ما تكون في اي إجراءات اخر ، شيله وفتح خشم وسد مال ووو،
ماشين كويس ودي ظاهرة اجابية ،،،،

Quote: ظاهرة جميله ويا ريت بعد العقد ما تكون في اي إجراءات اخر ، شيله وفتح خشم وسد مال ووو، ماشين كويس ودي ظاهرة اجابية ،،،،

نجاة الشيخ، شكرا للمرور، والمشاركة...
بس العرس السريع دا كمان في وراه فراق سريع... اقل مطب جوي،
او يومي تلقى العريس لتوه، وقد فارق...
هل هذا هو السبب ام ان هنالك اسباب اخرى...
مع ملاحظة ان شباب الزمن دا، ياخ بطلقوا سريع، واحد صاحبنا
عرس بدري وطلق بدري...
اها قام عرس تاني، واحد معرفة قال : والله صاحبكم دا راجل طيب لكن بطلق سريع،
تصدقوا فعلا قام تاني طلق...
ويبقى التحدي الاكبر المحافظة على هذا العش،
قشة قشة......
صاحبنا دا ذاتو في زفة العرس الجماعي، الاولاد صغار واي واحد العروس جنبو، وسكات شديد،
مشينا ليهو الراجل صاحبنا، قلنا ليهو ياخ ما تتنونس شوية، اكسر الحاجز دا، دا انت عندك خبرة،
العروس صرت وشيها.... بدأنا،
زمان العروس الحيطة بي الحيطة، هسع سفر، وصور...
واسكايبي، اها السترة اخير،
ايقاع الزمن سريع والحياة بقت صعبة،
دحين امسك لي واقطع ليك احسن...